Zêldin thu mai mai

August 4th, 2012 4:00 pm by Awmtea Khiangte

Inngaihtuah mûk awm fahran hian a thu kûn reng a, a ngaihtuahna a kâwm nge a rilru a buai deuh tih pawh tu man an hriatpui lo. Midang lo thu ve te pawh chuan eng emaw tak enghelh an nei a ni tih chu hai rual a ni lo. Tu man tawng zai pawh an rêl hek lo. Chu pindan chu a thim hle a, kil khata zero bulb inkhai va va chauh lo chu êng dang rêng rêng a awm lo. A laiah chuan dawhkan lian fe mai a hi a awm a, lehkha erawh hmuh tûr a awm lo thung. Pindan thim leh vâwt ruihah chuan thu pawimawh tak rêl tur an nei a ni tih hai rual lohvin a laia dawhkan lian fe chu mi eng emaw zât hian an kîl bial taih a. Khawvêl pum lâk zawh vek an châk a ni tih an mitmeng atang rêng pawhin hai rual a ni lo.

Minute sâwm vêl dâwn lai an ngawih thap hnu chuan an hotupa leh an pathian ni pahfâwm âwm tak chu a rawn hawi chhuak a. A mitmeng atang rêng chuan a ngaihzâwnawm a, hmêl tha tak a ni. A nui te chu a mawi hmêl êm êm a, biangsum te pawh a neih hial a rinawm. Nimahsela, a nui ngai hauh lo. “Unau leh ka pathianpuite u” tiin bul a han tan a. Midang zawng chu an lo bu suau a. Eng eng emaw ni hi an chham rual a, an tâwp leh ta duak a. Ka mak ti lutuk chu ka bihthlâkna atang chuan ka tla thelh nghe nghe.

“Setana hmalâk chakzia leh mihring fate luhlulzia hian ka rilru a tina a, tûn ang mai maia kan kal a nih chuan mi zawng zawng deuh thaw hi meidilah an kal dâwn si a. Eng vangin nge hetia ngawih kan chuh reng ang ni. Mahni nihna inhre lo, sual bawiha tâng, mihring mai ni lova pathian ropui tak kan nihzia inhre lote hian chhanchhuah an ngai a, an nihna dik tak hrilh hriat hi kan tihtur hmasa ber a ni. Mawngvawm bâ kan nei a nih chu. Pathian ropuina zawng zawng keimahniah a awm a, keimahni hi pathian kan ni tih thu hi eng tin nge kan hrilhhriat theih tâk ang? I ngaihtuah tlâng teh ang u” tiin lalpa tia chibai an bûk hial thin Rorelliana chuan a hote chu zâwt titih thu pe aw deuh si hian sawi dap dap a. A aw te chu a ngaihnobeiin mi hneh theihna riau a nei lehnghâl.

Sawi tûr an tlachham hlawm nge, an rilru an kâwm zâwk tih zawng ka hriatpui lêm lo. Nakin deuhah chuan mi pakhat hi a rawn tawng chhuak a, “Lalpa leh pathian, kawng hrang hrang chuan hma kan la tawh a, pathian an nihna hrilhfiah kawngah chuan kan hlawhtling hleithei lo chu a nih hi. Kawng khat dang erawh ka la hria, vawi khat chu i han tang mar leh teh ang u khai. Tûnlai changkânnain a ken tel, social network leh internet lamah te hian tan la thar lehzual ila, kan thurin hi vawrh darh chuai chuai ang u. Chu chuan tu tu te emaw thinlung pawh a hneh mial mah na. Tûnlai mite chuan thil danglam leh maksak pui pui hi an lâwm nasa si a.” tiin a rawn sawi piap piap mai a. Uluk lehzualin ka han bih a, a thim êm avangin a hmêl ka hmu hleithei lo. Ka lam lo hawi deuh hian a inher a, ka mak ti lutuk chu ka meng bial kâwk a houdini ni ngeiin ka zuk hmu ta!

“A tha khawp ang chu, nangni a thiam leh tui chilh deuhah tan han la ula. Thâwk leh khatah erawh ram kan la duai duai lo maithei, mahse zâm rêng rêng loh tûr. Pathian thiltithei ber kan nih kha.” tiin Rorelliana chuan a naute chu a fuih leh sauh sauh a.

Rorelliana bula thu mi pakhat hi a rawn tawng chhuak ve a, an hotupa leh an pathian bula a thut dân atang rêng chuan dinhmun pawimawh tak chang pha a ni ngei ang le. “Ka pathianpuite u, malsawmin awm rawh u. Kei pawh hian internet leh social network lam chu ka tuipui khawp mai. houdini rawn sawi kha hmân atang tawha ka lo ngaihtuah a ni a, thil tangkai tak pawh a ni ngeiin ka ring. Mahse chutia kan ngaihdân leh thurin kan puan chhuah nghâl ngawt chuan tu thinlung mah kan hneh lo vang. A pehhêl zâwnga kan tih thiam erawh a tûl ang. Keiman kawng ka lo dap hmasa ang a; thuthlung hlui, mihring dinhmun, eden huan, sual lo intanna, mihring tlukna, pathian thilsiam dân leh mihring pathian kan lo nihdân, chuti ang chuan ka lo chhui kual ang a. A theih chen chenah an rilru ka lo dawi â hmasa ang a, an ngaihtuahna sûkthlêk ka lo kuai her ang a, chumi hnu chuan kan thurin bulpuiah kan luhpui chauh dâwn nia. Ka phûr zâwng tak a ni. Mi tam tak thinlung ram la duai duai ang maiin ka inngai a, hnehna hi kan ban phâk maiah a awm tawh a ni.” tia Hnam sakhua a rawn tawng chhuah meuh chuan thâwm a ri hak a, an lâwm tlâng hle a ni tih a hriat a, kut erawh an bêng miah lo thung.

Rorelliana chuan a duh khawp leh a lungngawi tâwk a hmu tawh nge, a rawn ding deuh uai a, kil khata lo thu ngawi reng pa pakhat chu a va hmu thut a, “Nang khân sawi tûr i nei ve em?” a va ti a. A en ngai en reng chung chuan “Hnam sakhua-in a duh a tih hunah kei chuan kan thurin bulpui leh a nihna zawng zawng hi ka rawn phawrh chhuak ang. Thil huphurhawm tak a ni, nimahsela, pathiante tân tih theih loh pakhat mah a awm lo.” tiin Rinzova Khawlhring Lalhnam chuan ngêng âwm deuh hian a rawn chhâng a.

Midang thu ve te pawh chuan sawi tûr an nei ngei ang, mahse Rorelliana chuan “I ding ang u” a tih avang chuan an ding ta a. “Kan tawngtai ang a, kan rorêl kan duhtâwk ang…” a tih mêk lai chuan ka ke kham tawh lutuk chu ka han insiam tha e ka tia, ka rahchhan chu ka rap sual pek a, ka ri ta khut khut mai. Ka lam an lo hawi thap a, ka bihthlâkna bang âwng atang chuan pathiante mit chu ka chungah a rawn fu ta far mai a. Rorelliana chuan engmah a sawi lo, mahse a mit meng erawh a thîp hle a, pathian mit meng atân chuan a ngaihnobei lo mang e ka ti rilru hman chauh a. houdini chuan “Thianpa” a rawn ti a, Hnam sakhua chuan “Eng nge i rawn tih?” a lo ti bawk a. Chhânna tûr ka haihchham kher mai. Ka inngaihtuah buai lai tak chuan “Nang pawh hi kan ramah kan la seng lût ang che, mi(sual) tak i ni…” tia Rinzova Khawlhring Lalhnam-in a sawi lai mêk chuan ka tla ta dawp a, a thusawi pawh ka hre chhunzawm ta lo. Tlân chhe chungin “Nangni pawh dâwt kâwm (dotcom) thin (dâwt hmanga mi kâwm thin) in nih kha” ka ti a, ka tlân haw nghâl nal nal a.

A tûka misualdawtkawm ka han luh chuan, ngai teh, an tuan zawng a lo fûm hauh lo.

Ka lâwm e.

Similar Posts:

Recent Posts:

14 Responses to “Zêldin thu mai mai”

  1. 1
    TuaiSialA Says:

    Chhiar angs!

    [Report abuse]

  2. 2
    sisen Says:

    ;-)

    [Report abuse]

  3. 3
    Rinzova Khawlhring Lalhnam Says:

    Fiamthu i va thawh thiam ve

    [Report abuse]

  4. 4
    Rinzova Khawlhring Lalhnam Says:

    Va phuah thiam tak em! I zeldin thubawl mai mai zawng a ni e. Min han bei zel teh.

    [ Ka Pa rulin an mei an phah ta, Ka rap ngei/mêk min chuk an tûr tha hmangin;
    Mualpho leh thi tur a duhtute mit hmuh ngeiah, rul chuk reng haw lova min siam tak si hi.]

    [Report abuse]

  5. 5
    donald Says:

    lolz

    [Report abuse]

  6. 6
    sheldon Says:

    Lol…va zeldin thiam ve a… I thum dawp mai tur ania :-D

    [Report abuse]

  7. 7
    david Says:

    phuah thiam hi mo le ka nuih chur chur chule

    [Report abuse]

  8. 8
    sheldon Says:

    Hnam Sakhua leh a pawl te hi an zaidam in an dawhthei tih hi ka hmuh dan. HS ngat phei hi chuan sawisel a dawl ngawt mai.

    [Report abuse]

  9. 9
    doc_lib Says:

    EURO 12 a Hnam Sakhua a post a England kan OT pui zet kha chu aw..Hnam Sakhua a va in thawi a, England khan Italy hneh lovin an tla ta daih alawm.. :-)

    [Report abuse]

  10. 10
    Sihtea Says:

    Mit tui tlaphunga, ka’n nuihtak chiam chule. I phuahthiam hlemai.

    [Report abuse]

  11. 11
    CFL Says:

    Hahahaha! I va thiam ve a thianpa. (Y) :-D
    Hengho post a rawn chhuah hi chuan OT na tur post a rawn chhuak e ka tizel tawh mai. :-P

    [Report abuse]

  12. 12
    Ignatia (33-115 AD) Says:

    Ka nuih a za ve tlat lo mai. :-(

    [Report abuse]

  13. 13
    Awmtea Khiangte Says:

    Thenkhat tan chuan a ho maithei a, zeldin thu tak2 a nih hi. Thutak a pai lem lo

    [Report abuse]

  14. 14
    shailendra Says:

    Vawi 4, a zawnin hming ka tlar ta :-D

    [Report abuse]

Leave a Reply

You must be logged in to post a comment.