Pi Mary Kom tan ang aw…

August 5th, 2012 3:12 pm by Ignatia (33-115 AD)

Thu hma Kum

2006 khan MZP chuan Zofest a huaihawt a. Hetah hian mizo hnam peng hrang hrangte kan kalkhawm a. Kei ngei pawh ni hnih lai chu ka kal ve a ni. Kha tah khan Pi Mary Kom kha Pi Jenyte ho nen chawimawi tur an ni a. Khami tuma a chawimawina dawng tur lo penchhuak kha ka vawikhat hmuhna a ni. Ka rin aiin a lo hmel tha a. Pa tak tura ka ngaih kha puan bih thlapin a lo chhuak a ni. Olympic-ah hian tun hmain hmeichhe boxing hi an tel ngai lova. Tun kum atang hian a hmasa ber atan hmeichhiain an khel ve dawn ta. Pi Mary Kom hian vawiin tlai hian a vawikhatna atan ring-ah a inlan ve dawn a ni.

Harsatna a tawk hnem ve khawp ang

A nu leh pa hi lo hna thawka ei zawng – thing tlang mi diktak ang an ni ve a. Chu mai nilovin amah hi an unau zinga upa ber a ni bawk. Khawpui lama sport zir tura a liam dan velte pawh a ngaihnawm khawp mai. Pi Mary Kom hi tribal hnam ve tho a ni. Hetiang em em a peihreiv(consistent) hi a mak khawp asin. Kum 2000 atang khan Boxing khawvelah a lo inlan a. A la khel char char a ni. Kei ni mizo ngei pawhin boxing thiam kan nei thin a mahse kan daih rei thei lo a ni e. Kum 2005 khan pasal a nei a. Mahse boxing hi a la chawlh san chuang lo. Ti chung hian Boxing ala khel char char tho, medal pawh a la zel. Phir pahnih a nei leh nghal a. A buai thei ve khawp mai. Tum 5 lai World Champion a ni bawk. A turu khawp mai.

A lawmman dawn tawhte

Arjuna Award (Boxing), 2004 , Padma Shree (Sports), 2006 ,People of the Year- Limca Book of records 2007, CNN IBN &Relaince Industries Real Heroes Award , 2008, Pepsi MTV Youth Icon 2008 , ‘Magnificent Mary’, AIBA 2008 , Rajiv Gandhi Khel Ratna Award, 2009, International Boxing Association’s Ambassador for Women’s Boxing 2009 , Sportswoman of the year 2010, Sahara Sport Award te a ni. A thahnem ve khawp mai. India khua leh tui tan Padma Shree leh Rajiv Gandhi Khel Ratna Award phei khi chu hlu tak a ni. Rajiv Gandhi Khel Ratna Award hi infiam mite chawimawina sang ber a nih kha.

British Monthly Magazine – SportsPro khan MS Dhoni hi khawvela infiam mi hlawhtling a tehnaah 16-na a pe a, tin Pi Mary pawh hi number 38-na ah an teh ve bawk. A lawmpuiawmin a entawntlak khawp mai. Anni pahnih chiah hi India ram atangin an lang pha a ni.

6:30 pm-ah a inlan dawn

Pi Mary danglamna em em chu a rilru huaisenna leh tumruhna hi a ni. Amah enkawla hrual hmasa bertu Ichomba Singh sawi dan chuan ‘Mary anga boxing skill tha leh fit hi ka nei teuh mai mahse ani hi chu a danglam a ni. A rilru a huaisen a, a zam ngai lo. Mi dang chu an zam (nervous) leh mai thin a. Ani erawh hi chu a dangam em a ni. A ti mai mai lova a peih rei (consistent) bawk’  tiin a sawi a ni. A thusawi hi a dik tih a lanna chu – hei, tunah hian nu ni tawh chungin Olympic medal lak a tum em mai. A inthununtheihna mawlh hi a turu a ni. Vawiin hian Pi Karolina Michalczuk-i nen inhnek dawn ta a ni. Lo thlir ang u.

Ka duhtawk mai ang

Pawi deuh mai chu Pathianni berah kher an inhnek dawn tlat mai hi a ni. A nungchunga an inkhuainuai lai ka hmu ve thei dawn ta lo. A theih hram chuan lo en ula… A che a rang em em a, a tum ruh hle tih a lang thin bawk. A inkhel hi a hmuhnawm. Boxing kan khel ve lo a ni mai thei amaherawh chu khawvela kan awm chhung hian khelhpui kan nei reng thin chutah chuan Pi Mary anga tha thlah miah lova kan tan ngaih chang a tam thin khawp mai. Rethei taka seilian a nihzia pawh ziak ka chak khawp mai. Hun ka neih loh avang leh a sei lutuk ka hlauh avangin duhtawk mai ang. Kei aia hre zawk pawh in awm far hlawm ang.

Mahse ka sawi tel leh hram duh chu – Isua Krista ringtu diktak a nihna leh tawngtaina thiltihtheihzia ringtu a nihna hi a ni e!

Similar Posts:

Recent Posts:

104 Responses to “Pi Mary Kom tan ang aw…”

Pages: « 1 2 [3] Show All

  1. 101
    Whatever Says:

    “Kom” hnam hi Manipura Hmar cheng tam tak chuan Hmar thlah anni anti, chutiang bawk chuan Kom ho tam tak hi Hmar an in ti ani awma. @tribepower hi chuan Mary Kom hi Mizo anilo atibur mai sia, Hmar ani ti ila chuan a sawisel ka ring kher lo. Manipur hnam buaia buai ho pek hi, Mary Kom hi Mizo anih leh nih lovah kan buai em em lo, mahse NE/Manipur chhuak chu ani ngei mai, chuvang ringawt pawh chuan kan tan em em ani. Duh leh Assamese pawh ni rawh se ka tan hrim hrim – HE NU HI ANIHNA/PIANNA VANG NILOVIN, A TALENT HI KA NGAISANG ANI.

    [Report abuse]

  2. 102
    lushai_er Says:

    Rinlawk ang ngeiin a chak zo ta lo, Ka fapa bicycle chhia kan siam laiin an lo inhnek zo va…..ka en chak em em lo bawk a ! A tumpui-nu inhnek hi ka hmu a, ka huphurh pui tak zet a ni, mahse bronze a la ve tho a lawm !!!

    [Report abuse]

  3. 103
    sheldon Says:

    Gold Medal rawn hawn ngei se ka tih nen, a pawi, a hneh lo em ani e.

    [Report abuse]

  4. 104
    shailendra Says:

    Pawi khawp mai. Final a inhnek ni se. Sumkar awm lo in in hnek ta se…

    [Report abuse]

Pages: « 1 2 [3] Show All

Leave a Reply

You must be logged in to post a comment.