Pa Hmangaihna(Sunday Pual)

August 5th, 2012 10:59 am by PKfanai

Kum 1989 kum a, Armenia a Lirnghing rapthlak tak ritcher scale 8.2 lai maia nghing kha kan la hre theuh awm e. minute 4 lek chhungin mi 30,000(singthum) teh meuhvin nunna an chan ta a nih kha. Chutia mi an phili buai nuai nuai karah chuan, Pa pakhat hian, a in chhuahsanin chumi ni zing lama a fapa a va dahna Sikul chu ava pan vat a; mahse, ava thlen meuh chuan, an Sikul building chim sawp nulh mai bak chu engmah dang ava hmu ta biklo a ni. Chupa chuan, a fapa hnena athil lo sawi thin; “Eng thil pawh lo thleng sela, puih I ngaih hunah chuan, tanpui tur chein I kiangah ka awm zel ang” tia alo tiam tawh kha a hrechhuak ta uai uai mai a, hrehawm a tiin, a mittui chu danzawh rual lohvin a far ta zawih zawih mai a ni.

Tukin zinga a fapa a thlah laia an Sikul building chu a mithlaah alo lang leh uai uai a, an classroom zawn awm chu a han ngaihtuah leh a, chulaia inchim intiangkhawm nulh mai chu a en vang vang a, eng dang ngaihtuah tawh lovin, a theih ang ang chuan, a fapate classroom zawn a, inchim sawp nulh mai chu a theih ang angin a thianfai tan ta a. A thiltih an han hmuh chuan, a bul vela Paho lo awmte chuan, “ti ti duh teh suh, I hahthlawn mai mai ang” an lo ti a. Ani erawh chuan, engdanga chhang talo chuan, “Min pui ve zawk ta che u” tiin alo chhang mai thin a, a hna chu ngawrh takin a thawk mial mial mai a ni.

Kangthelhtu pawl hotupa pawh chuan, “I thiltih hi a hlauhawm lutuk, keimahniin thil tul chu kan lo tifel mai ang” tih pahin han pawhsawn mai hi a han tum a, mahse, chu Armenian pa chuan, a ngaite bawkin, “Ka Fapa hi min zawnchhuah pui dawn a mi?” tih pahin, a hna chu ngawrh takin a thawhsan hmiah hmiah mai a. Chutiang zelin, Police lam hotupa berin khap ahan tum pawh chuan, angaite bawkin a chhang a, a hna chu ngawrh lehzualin a thawk sauh sauh mai a, “Ka fapa hi a thi nge a dam tih ka chian hma chuan ka chawl dawn lo” a ti bur mai si a, tihbuai tinah pawh an tin ta lova, an tha en ta mai mai zawk a.

Chutianga chawl hauh lova darkar 38(sawmthum leh pariat) zet ngawrh taka a thawh hnu chuan, Cement tlang lian tak pakhat a han phawh leh chuan, a fapa aw niawm tak chu a hre ta tlat mai a. “Armond, Armond, khawiahnge I awm? Ka aw chu I hre thei em?” tiin a au ta tuar tuar mai a ni. Chutah le, thilmak alo thleng ta!, Armonda aw ngei mai chuan, “Ka Pa, I aw ka hria e, keimah I fapa Armonda ngei kha kani e. Ka thianteho hi an thlaphang lutuk a, ka hnem tang tang a, ‘Ka Pa kha he Lirnghingah hian thi lova a damchhuak anih phawt chuan, min rawn zawngchhuakin min rawn chhanchhuak ngei ngei ang, “Engthil pawh lo thleng sela, tanpui I ngaih hunah chuan, tanpui tur chein I kiangah ka awm zel ang” tiin min tiam tlat a ni’ tiin ka lo fuih tang tang hlawm a, hei ka sawi ang ngeiin tunah I aw kan hre ta ngei a, kan lawmin, kan thla a muang ngei mai”, tiin a rawn chhang ta a ni.

“Engtinnge in awm mek?” tiin a han zawt leh a, Armonda chuan, “Ka pa, kan vain mi 14(sawm leh pali) kanni a, kan thla a phangin kan ril a tam em em tawh a, kan tuiin pawh a hal tawh tak zet mai. Kan Sikul a han chim rup khan, kan classroom chim kha a bang pahnih kha a chunglamah an indokhalh a, kan awmna lengtawk vel hmunawl leh him a awm phah ta a, hei, tunthleng hian kan la him phah ta a ni” a rawn ti ta lauh lauh mai a.

A pa chuan a fapa chu rawn chhuak nghal tura a han tih chuan, a fapa erawh chuan, “Ni love kapa, kei te chuan pa ka nei che a, eng ang dinhmunah pawh min chhanchhuak turin ka tan I inpeih reng dawn a, heng ka thiante hi lachhuak hmasa phawt rawh” a rawn ti leh ta tlat mai a.

Kangthelhpawl te, Policeho leh mipui lo awm vete chuan, an thil hmuh leh hriat chu awih har an tiin mak an ti kher mai le. Pa pakhat, a fapa achan tak avanga thluak buai ta ni ngeia an hriat chuan, naupang 13 zet mai chu, a mal malin a pawtchhuak ta hlawm a, a tawp berah chuan a fapa duh tak, a hmangaih em em Armonda ngei mai chu a pawtchhuak ta a, an inkuah vawng vawng mai an han hmuh chuan, an vela lo thlirtute chu, an hnuk a ulh teuh hlawm mai a, kut an beng ta dur dur mai a ni.

Ania sin, Hmangaihna dik tak (genuine love) hi mihringte tan hian hriatthiam phak tak tak hi a harin, sawifiah pawh ava awlai lo tak em. Pathianin min hmangaih dan hi hriatfiah leh sawifiah tak tak phak ava han har tak em. Amah Pathian ngei mai chu Hmangaihna hlawm Pathian, kan Pa chu ani miau si a. Hringfaten hmangaihna chhinchhiah tlak leh chungchuang tak kan han tih ve chang hian, Kan Pa Pathian hmangaihna hlimthla hi alo lang ve pha riai ruai thin a ni.
Hmangaihna dik tak chuan, a dawhthei a, ngil a nei bawk thin. A itsik lo va; a infak lo va, a uang lo va, a chemawilo lo va, mahni hma a sial lo va, a thinur duh lo va; fel lohnaah a lawm lo va, thutak erawh chu a lawmpui thin a; engkim a tuar hram hram a, engkim a ring a, engkim a beisei a, engkim a tuar chhuak thin a lo ni. (I Korinth 13:4-7).

Hmangaihna chuan mi a ti beidawngin a tithlawn ngai lo.
Hmangaihna tih loh hi chu tuma engmah hi bat tur pawh alo ni lo. Mahni kan inhmangaih ang hian kan vengte hi hmangaih vek thei teh ila aw…Pu Hnam Sakhuaa leh a pawlte beisei angin he lei hi Vanram tlafualah kan chantir ang a, Pathian ang main kan leng suau suau mai tur. Mahse…tunah zawng, darthlalanga inhmu riai ruai ang deuh chauh kan la ni rih si; a kimlovin kan hria a, a kimlovin thu kan la hril thin si anih hi. A famkim erawh ala thleng ngei dawn a, chutih hunah erawh chuan, a kimlo hi tihban a ni tawh ang a, a famkimin kan hre tawh dawn a ni. Aw, ava nuam dawn em, chu hun lo thlen hun tur chu.
Lalpan a thu malsawm rawh se. Amen.
Sunday hman nuam vek u le.

Similar Posts:

Recent Posts:

17 Responses to “Pa Hmangaihna(Sunday Pual)”

  1. 1
    VaiVa Says:

    Inkhawmna tur nei ve lo in chhiar hmasa ber ang aw (C)

    [Report abuse]

  2. 2
    doc_lib Says:

    A ngaihnawm hle mai.

    [Report abuse]

  3. 3
    lrpa Says:

    Tehkhin thiam khawp mai. Very nice (Y)
    Pu Hnam Sakhua te, Pu Rinzova te hoin pianthar nan hmang se a tha ang.

    [Report abuse]

  4. 4
    Ignatia (33-115 AD) Says:

    A va tha tak em! (Y)

    [Report abuse]

  5. 5
    Hmuhneia Says:

    Ava han tha tak em, hei aia sei hian han sawi chhunzawm la ka la duh hle mai…

    [Report abuse]

  6. 6
    sparta Says:

    Ngaihnawm khawp mai… (Y)

    [Report abuse]

  7. 7
    donald Says:

    Chhiar a nuam zaih zaih hle mai. A thuchah i uluk ang bawkin a type lam pawh i uluk tih a hriat e (Y)

    [Report abuse]

  8. 8
    Charice_mizo Says:

    Van ngaihnawm dap dap em…tukin chu ka thawhtlai vangin zing service ah ka inkhawm ve hman lova, zai tur ka ni lehnghala, ka inthiamlo takzet…

    [Report abuse]

  9. 9
    sheldon Says:

    Pu Pk-a thu hi chu chhiar a nuam thin ngawt mai. Pathian hmangaihna i rawn tehkhin fiah lutuk a, min hneh takzet. Pathian thu hi ka ti, a reference pek chu a ngai thin ngei a, mahse, thu har pui pui leh un pui pui a in hrilhfiah tum hi a tul ka ti lo. Nizan khan Lta post a comment sei tak tak te kha ka chhiar vek a, ka engahmah a thawk phalo!!

    Kan pi leh pu ringtu hmasa te pawh khan ‘Isua hi lo ring ve tawh rawh u’ an ti mai a. Hnamdang Pathian thusawi te pawh hian ‘Jesus loves you’ an ti mai a. A Greek tawnga in hrilhfiah vak hi a lo ngai lo. Kan thinlungah Pathian chuan hmanrua leh tawngkam tlawm te hmangin thu hi chu a sawi mai.

    [Report abuse]

  10. 10
    Chhuaklinga Says:

    Post (Y)

    Kan Pathian hian thildang ba lo tura min ti si a, hmangaina hi engvangin nge bat a phal tlat tih hi ka ngaihtuah thin. :S

    tren tren

    [Report abuse]

  11. 11
    sisen Says:

    (Y)

    [Report abuse]

  12. 12
    chhana Says:

    A VA ropui em, Ka lo hre hauh hleinem le. (Y)

    [Report abuse]

  13. 13
    Lamji Says:

    Amen. (Y)

    [Report abuse]

  14. 14
    PKfanai Says:

    @5 Hmuhneia, a thawnthu hi a sei tawh ang reng si a, han sawizau vak kha ka inthlahrung deuh alawm maw le. @Chhuaklinga, Pathian hian thil dang tih loh Hmangaihna inbat tawn hi chu, pawi a tilo mai pawh nilovin, min fuih zawk si a, in bat sup sup mai teh ang u. Aman min hmangaih hmasak(hmangaihna min bat hmasak) avangin (a fapa Isua krista hmangin a lantir tawh a) hmangaih let ve hi kan ba a ni.

    [Report abuse]

  15. 15
    Dr John Says:

    (Y) A Ngaihnawm-in a tha hle mai, Pu Pk-a nge nge, a man-hla thin e.

    [Report abuse]

  16. 16
    bigboss Says:

    Post tha thin hle mai a.

    [Report abuse]

  17. 17
    zoho Says:

    ka mittui a hnam sawk mai a, tunlai ka thil vei No.1 a ni bawk nen, ka fapa te school ka mitthla ah a lo lang uar uar mai nen, energy 2, RINNA leh BEIDAWN DUHLOHNA imphumru khi ka van duh teh lul em.

    Ka like mawlhx2 e. (Y)

    [Report abuse]

Leave a Reply

You must be logged in to post a comment.