Nuthlawi min ti maw!

August 28th, 2012 8:00 pm by chowtrixx

Hei le, a ziaktu nu phalna thlapin, tamtak chuan in chhiar tawh ngei ang. FB (THU NGAIHNAWM HUANG July 26 at 9:29pm via mobile)  ah leh Vanglaini (FRIDAY, 10 AUGUST 2012 05:10 ) ah chhuak tawh  mah se tha ka tih em avangin ka rawn copy-paste ve thuai mai.

– Romuanpuii Zadeng

Bazâr lûn lai taka ‘Nuthlawi tharlâm’ tia min put nawlh a, min kalpui vâwk vâwk lai khân, fiam dawl lo nih ka hlauh vàng khan ka nui ve mai a nih kha aw! Ka thinlung hi hliam hlim hlawl a ni asin!

“A lung a la lêng a ni ang, a bawrchhawr em mai” min ti teh sek a, ka’n inchei ve dêk dêk a, a ka kaw nazawngin engvangin nge, “A kâk leh tawh” ”Va tang ve” min tih sek kher.

In zingah inthla­hrung ru vè takin ka rawn kal a, eng vangin nge patling pawmlai nei thleng thlenga min kuah sek in tum kher! Remchang hlekah biang in lo piai ve thla zen a, in piai ve ngawt tur hian ka biang hi ka dawh chhin miah lo!

Chhiatni/ thatni-ah leh laklawh thilah te, zan rei thlen palh leh hmun ralti deuha kal a ngaihah, min vèngtu tur emaw ka tihten engah nge min fawh ngawt in la tum sek! Chuti ngawta nanga fawh thlahlel tur khawpa nang ang mipa ngaisangtu ka ni hauh lo!

Tlangval virgin ngat pawh ni se engah mah ka tih hleih loh tur patling vun zûr tûk tawh thlenga ka hnute leh taksa tawh tum sek te hi! Thawhlawka chartin bunga hlap zèk tak a nia ka nâp ni! I kam tamzia ka hriat vang hian bei let lo che in, nui chungin ka in vèng ve tawk tawk thin asin!

Khawlai kal hlek ila, rálkhat atangten min lo au nawmnah thla zen a, nui duh lo ila i zah lawrh lawrh dawn vei nen! A chàng leh duk khawp khawpin ka bânah min lo la piai zui! In tâ ni miah lo hi enge maw in khawih vè sek le?

I nupui kha in then­awmpaten i mi fiam ang hian fiam se i lawm ang maw? Kawppui ka neih ve loh vang hian khawih thiang ka ni bik kher em ni? Ka rilru hi a na thei lo bik em ni!?

Tawngka lama he ka hming lo ni ta hmanga khawi hmunah pawh min chhaih nawm­nah reng a, kam chhe tleuh nâna hmanga, thawka phita i mi deùna phumruk i au chhuahpui sek, “Nuthlawi, nu­thlawi” i lo tih sekte hian ka zah loh i ring em ni? Ka zah lùattuk vàng hian ka zak ngam lo thin chauh zawk asin!

Min ngàinépin min hmusit viau mah la e, hei hi lo hre ve ta che! Engmah ni lo mah ila, tu emaw, i ngaihsan zawng tak emaw, i hmuhsit ber emaw tân khan, ka lo invèng tha khiau thei asin. Chumi tàna ka hlut phawt chuan enge pawi? A nih loh vék pawhin, keima tân ngei hian, mi zahawm leh hlu ber ka la ni ve tho asin!

Nupui nei reng chung pawha vawikhat melh uih deuha uire thei mai tur te, min hmangaih vang ni miah lova, duh thing fahran neih vanga min ngaizawng der hreh hlek lo tur tlangvalte hi zu han awm cheu a!

Heti ang mai maia nung vè chung hian min la hmusit teh sek a maw? Min ngàinèp rawh, a  pawi lo, mahse ka ngaisang bik lo mai thei che asin.

Mipa nazawng hi engahmah ka ti chai lo! Duhzawng nei thiam tur khawpa bawhpelh tawh, tùn hmâ zawng aia fimkhurna leh hlauhthawnnain a hrual fîp ka ni lo bik em ni! Ka’n nuih ve ngawt che vang hian kan ‘hope’ kher lo che, i tumbûr loh nan kan khi ve mai a nia.

Ka tleirawl vel lai kha chuan, nuthlawi te hi an zauin, fiam an dawl em em vek emaw ka lo ti thin a, mahse an dinhmun vanga zak ngam lo khawpa zakzum an lo nihzia hi ka lo dawn tel phak lo!
 

Similar Posts:

Recent Posts:

Leave a Reply

You must be logged in to post a comment.