Ka thil tawn pahnih(Sunday Pual)

August 19th, 2012 10:47 am by PKfanai

August thla chawhnu lam ani tawh a, boruak lum vawng daitu tura Pathianin Natural Air Conditioner min pek ruahtui pawh a hul tan ta a, Thitin thla leh Khuangchawi thla kan la chuangkai bawk si lova, boruak chu a lum uap churh mai a ni. Ka thiannu ha-nget hnawh tir kan tum a, mi an tam lutuk lo nain, pakhat khawih chhung pawh a rei duh hle mai. Waiting room-ah pawh chuan ka awm reng peih lova, bathlar, kawngpui bul maiah chuan ka thuchhuak ta zawk a.

Chutia tihtur a awmloh lutuk avanga hun khawhral nana Facebook leh misual.com ka luh chhawk chhen lai chuan, tlangval pakhat sam bal leh hreu bum mai, kawr ha lo, balh hmel em em mai hi ka bula kawngpuiah chuan a lokal ta a. Kekawrbul ang reng deuh chu a ha ve bawk a, mahse a elastic chu a rul tawh hle tih hi a hriat a, a thler hniar sung mai bawk a. A serh hmul te chu a lang vek a, a Sazu tak erawh chu, a lang bik chiah lo deuh a ni.

Ka rilruah cuan Matthai bung 25:36 thu, “Saruak ka nihin puan mi sin tir a” tih kha a rawn lang a, tanpui chakna a rawn lang thut a, mahse, ka chetchhuah hmain min kal pel hman tawh a, a hnunglamah phei chuan a kekawrbul hak ve khan hliah a lawi a lo nei tawh lo va, a mawngtam a pan awm luai mai pawh chu a lang chiang hle mai. Tanpui duhna thinlung ka pu viau na a, ka chet chhuah tak tak hmain akal liam hman ta a. Pathian thu bawk chuan min rawn deng leh a, “Thil tha tih tur hria a, ti si lo chu, a tan sual a ni” tih kha. Pathian lakah pawh chuan inthiam chiah lo deuh chungin, “Ka tanpui hman lo a lawm” tih rilru puin ka inthiam chawp deuh ta a ni.

Mahse, mak tak maiin, a rawn let leh ta kher a!. Chutah zet zawng, Pathian tirh a nih rinna ka nei ta tak tak a, ka va pan ta chawt mai a. “Hey” tiin ka han au ta ngawt a, a ding ve ta chut mai a, chutah ka va panhnai ta a, khawlaia mi dawr kawta thawmhnaw mantlawm te te an zawrhlai an khaite chu kawk pahin, “Saw laia thawmhnaw an khai saw lei sak I duh em? Kekawr tal chu ka lo leisak ang che chu” ka han ti ta rawih mai a. Ani chuan, fiah ang reng tak hian, “Aih thawmhnaw chu ka duh lo, cheng sawm min pe zawk mai rawh” a ti ta teh tlat a! Tichuan ka wallet ka han phawrh a, cheng sawmhnih chu ka pe ta a. A Lawm kher mai.

Ka ngaihtuah zui nasa ta mai a, a tlawmngai ve te pawh a ni thei a, engahnge kekawrbul tal kha chu ka lo lei sak luih loh le aw, Pathian hian engtin tak min ngai ang maw? Tiin ka rilru chu a hlim viau laiin, inthiam lohna ruk deuh chu ka nei ru ta tho a ni. Ka hma lak dan hi a tawkin a awm ve thoin in hria em? Engtin nge ti ila, tha ber awm a in hriat le? Min han hrilh teh u.

Hemi ni hi Second Saturday a ni a, Hostel naupang an nu leh pa ten an rawn hruaichhuak deuh vek a, mahse, hmun hla a mi 10 rual vel hi lachhuaktu nei lovin an cham bang thin a. Chtianga chambang an awm tawh chuan, kan fate hian, min theihnghilh thak deuhthaw hian an kawm ta thin a, an bulah chaw an ei a, zanah pawh an bulah an riak ve mai thin a ni. Hemi ni pawh hian, ka fapa te ber chuan, a kawm rual mipa naupang pahnih chu a lo zui nileng a.

Zanah chuan, nidang ang lo tak hian, inthlahrun hmel tak leh tim tak hian ka bulah a rawn tawlh hnai hrat hrat a, a tawpah chuan, heti hian a rawn tawngchhuak ta a. “Ka Pa, Vawiinah khan in awm loh hlan khan, Sikul Ceiling luhna awngah khan ka thiante pahnih nen kan lut a, Ceiling chungah khan kan kal kual a, I room chung Ceiling kha ka rap pawp palh ta hlauh mai a, khawngaih takin min ngaidam la, min hrem lo hram rawh aw” a ti ta reuh a.

Mak ka ti hle mai a, thinrim viau tur ka nih laiin, ka thin a ur ta mang hlek lo mai a, ka fapa, ka hmangaih em emin inthiamlo em em mai a, ka bula a thil tihsual a rawn puang a, ka ngaihdamna a rawn dil chu, ka ngaidam chiang kher mai. Ka ngaidam satliah mai pawh a ni lo va, min tihlim veng veng zawk a ni. A nu nen chuan, vawikhat mah Ceiling-ah chuan lawn tawh ngailo turin kan hrilh a, anmahni tan tlak palha thih emaw, a nih em loh pawhin piansual emaw a hlauhawm zia tha takin kan hrilh ta a.
Thawhtanni a ka han Office chu, ka office chung Ceilng pawp chu ka hmu ta ngei a, Ka fapa khan, inpuang lo khan lo zep ni ta se, an tam tham lo bawk a, ka dawp chhuak tho tho ang a, ka hrem hlawm ngei ang. Nimahsela, tlang taka an thiltihsual zep tlat lo va, ka laka inpuanga ka ngaihdam a rawn dil avang khan, ka ngaidam tawh a, ka thin pawh a ur hek lo a ni. Harsa lutuk lova thawm that theih a ni tho bawk a.

Mihring kan nih chhungin, Sualna ti tur leh Kan tisa chakna te Pathian duhloh zawnga hmang khawlo tur tea thlemin kan awm fo thin a ni. Thlemna hnehloh palha tluk palh chang te pawh a lo awm thinin, Kan Pa Pathian duhloh zawngte pawh kan tih chang a awm ngei ang. Pathian mithmuhah langlo tura thuhruk reng a awm si lo. Kan zep ruk ve tang tang a, sual tihna remchang dang melh reng leh, a tul chuan ti leh duh zel mai a kan awm ai chuan, inchhir leh Simna thinlung pu chung a, Kan Pa Pathian hnena kan sualte puanga thupha kan chawi chuan, min hmangaih em em reng tu kan Pa hian min va ngaidam nasa dawn em.

Kan Sualte thupha kan chawi chuan, kan sualte ngaidam tur leh, kan fel lohna zawng zawng tlengfai turin amah chu a rinawmin a fel a ni. (! Johana 1:9)

Sunday hman nuam u le.

Similar Posts:

Recent Posts:

30 Responses to “Ka thil tawn pahnih(Sunday Pual)”

  1. 1
    CFL Says:

    A va tha tak em. Hlawkna ka chhar leh ta e.
    Inkhawm tura ka kal a hun ve leh ta e. Sunday hman nuam u. (Y)(Y)

    [Report abuse]

  2. 2
    ulawng Says:

    chhiar i la,….. (E)

    [Report abuse]

  3. 3
    ahooma_ Says:

    A thain a va ngaihnawm lehpek em, a tawk teu teu hle mai (Y)

    [Report abuse]

  4. 4
    Jacka Pi Says:

    A ngaihnawm, a tha bawk si..ka inkhawm thei si lo a, Misualah sunday pual hi ka lo chang thin

    [Report abuse]

  5. 5
    Charice_mizo Says:

    Chhiar a manhla khawp mai..i fapa khian rilru a khawih reuh.

    Case hmasa zawk ang khi tawk ta ila, ka inngaihtuah buai ve fu maithei a ni. Tlangval khi mi ang lo emaw rilru kimlo deuh anih hmela, saruaka awm pawh zah nachang a hriatloh danah. Mahse tlangval a pum pa saruak titiha vah vah chu a fel lo hrim hrim a ni. Thawmhnaw han leisak mai tur alo awm hnaivai anih chuan i va approach ta rau rau, kekawr pakhat emaw te chu tlawm deuh pawh han leisak ta la (pawisa i neih remchan chuan), leisak kha i ba miah loa mahse i rilru a hlim veng vengin ka ring.

    Mahse mi tam takin an en liam mai mai laia khawngaihna leh tanpui duhna rilru i pu hrim hrim pawh kha a hlu lutuk aw.

    [Report abuse]

  6. 6
    Chhurbura Says:

    Ava tha lehpek em! (Y)

    [Report abuse]

  7. 7
    PKfanai Says:

    Charice_mizo, keipawh mi anglo lailet der amaw ka tih laiin, fiah fel ang reng tak khan, ‘chengsawm min pe zawk rawh’ a rawn ti ta mai khan min barakhaih deuh a lawm. Cheng za vel thleng pawh inhuam khan chengsawm chauh pek a han ngaih takah khan, cheng sawmhnih kha ka pe ta zawk a ni. “Because, because…” tih ang deuhvin, ka inthiam chiah chuanglo chu a nih ber hi.

    [Report abuse]

  8. 8
    chhangteval Says:

    Fapa i nei fel hle mai, a pa a chhun aniang :-)

    [Report abuse]

  9. 9
    Charice_mizo Says:

    Pu Pk min lo hrethiam la ka lo OT lawk teh ang..

    Misual.com a mak ka tih em em chu Pathian thu lama ril leh hre tak tak ni awma lang, hnam sakhua post ah chuan a tam ber ber, inhnial lama tangkai em emte hi Pathian thu tak tak post ah chuan an vang diak zel. Hnam sakhua leh a chekkawite ho post ning inti hlea sawisel reng chunga an post alo chhuah apianga comment pakhat tal hnutchhiah ziah si te hi an mak ka ti thlawt. Ka sawi phak chu a awm lova, mahse heng ho hi chuan an nin thu hi sawi sawi mahsela an ning tak tak lovah ka ngai hmiah. Anmahni ho vang hian alawm an rawn phur zual zela, misual.com hi an rawn ta neih tihtih tawh ni. Tenawm hlawm em mai a.

    [Report abuse]

  10. 10
    lrpa Says:

    post tha e.
    hnam sakhaw ho vantirhkohte pawn rawn comment ve se a tha ang :)

    [Report abuse]

  11. 11
    Lalramchhana Says:

    Pathian duhzawng tih tum tlat hi chuan a duhzawng tihna chance hi Amah hian min siamsak ve thin nite hian a hriat. Kekawr i leisak lo chu inthiamlo reng reng suh.

    Leisak i tum ngei a, mahse a duhzawk leh mamawh zawka a inhriat i pe a, chu chu a tawk reng – Pathian lamah chuan. ‘Miin i chunga an tih i duh tur ang bawkin mi chungah pawh ti rawh’ tih a nih kha. A chunga i tih a duh kha kekawr leisak nilovin, pawisa pek a ni a; a beisei let i pe mah mah. Mahni thahnem ngaihna hi a tha, mahse Pathian thu hi a pawimawh zawk chu a ni. Titura min tih hi ti mai ila, Pathian chu a lawm. Kekawr kha leisak ngawt la, a hak duh chuan loh chuan awmzia a awm lovang. A lungawina i siamsak kha a tawk em em a ni. Lo leisak tho la a pawi ang ka tihna erawh a ni lo a nia :-D

    Good post (Y)

    [Report abuse]

  12. 12
    Lamji Says:

    (Y)

    [Report abuse]

  13. 13
    PKfanai Says:

    8.Chhangteval, :-P Charice, kan thin khei zar zawng leh chhan let chakawm tak a min Provoke an thiam/ching em a nih hi. Pending ah a la intlar thup lehnghal. (N)

    [Report abuse]

  14. 14
    mr.Duhlova Says:

    9
    Charice_mizo # Pathianin a mite hi chi hrang hrangin a hmang thin a lawm, misual.com a Pathian thu post lam hi chu, Pu PKa te Pathianin a hmanga, mite tan a hriat thiam awlsam, mawl te te, fiah tak takin a sawi thiam a, a nung tlat a lawm.

    [Report abuse]

  15. 15
    saint sammoo Says:

    chhiar chuak ve chiah

    [Report abuse]

  16. 16
    Vetehmial Says:

    Ka duh ang ngei chhiartur alo awm leh ta hi ka va lawm em..
    Kekawr tethnuanga khi tanpui thei dinhmunah kei hi ding ni ta ila,,a awmna/chenna hriat ka tum ang…rilru kimlo nge anih a,.awm khawlo hrim hrim, tichuan amamawh ka hrechiang deuh mah na.

    [Report abuse]

  17. 17
    vakul Says:

    a tha hle mai. fate chanchin hi ka inthlahrung deuh thin a..i rawn post takah chuan mi dang a fuih tha hle mai a…la tih ve chi.

    kolkataah tum khat chu kutdawh pawisa cheng sawm pek ka tum a…ka puar tawh ka mamawh tawh lo ve…a ti a..mak ka ti ve khawp mai.

    [Report abuse]

  18. 18
    vakul Says:

    9,,,,charice i lo committe law…Pathian ni hi zawng i sawiho tan chuan buaina ni a ni ve a…luh a rem lo a ni mahna.

    [Report abuse]

  19. 19
    mr.Duhlova Says:

    Vawikhat chu Delhi ah kutdawh pakhat, Rs 2 (coin) ka pe a, a duhlo aniang chu, hmel nur deuh min hmuh a, a paih ta daih mai a, ka hrilh hai zawk kher mai. Taxi pu (driver) hnenah, “..in kutdawhte chu an hausa a niang maw, ka pek theih tawk Rs 2 ah a lung awilo hle mai a..” ka tia, kan nui ringawt….engzah tak beisei ve ni maw? :-D :-D

    [Report abuse]

  20. 20
    Pakak Says:

    khawro lai a ni bawk a, tlangkawmna chuan mi deng det mai… (Y)

    [Report abuse]

  21. 21
    ɪ̣uɪ̣pnoɥ Says:

    Tha khawp e. (Y)

    [Report abuse]

  22. 22
    PKfanai Says:

    Ngaihdan tlang taka rawn thawhtute Vetehmiala te, Lalramchhana te, Charice-Mizo te, in ti lawmawm tak zet e. Ka rilru nuam chiah lo pawh a nuam ta huai e. Pu Vakul leh Pu Duhlova te tawnhriat pawh khi a makin a ni ve thei tlat si. Pakak pawh i reh rei ta hle mai.

    [Report abuse]

  23. 23
    april Says:

    Mi tanpui dawn hian tìmna ka ti dawn nge, ka zak deuh emawni, tanpui duh deuh chung a liam tir tak hi ka nei fo zu nia! Ka inchhir leh thin. A kal liam ta mai tih ka chhiar lai khian kalo in hrechhuak vang vang. Voikhat erawh chu kutdawh naupang cheng 5 ka pe a, a dang min dil chuan ka pek tawh sa pawh chu a hum tha duh mang lova, ka laksak leh daih :-P

    [Report abuse]

  24. 24
    chhingdailova Says:

    A ngaihnawm in a tha khawp mai

    [Report abuse]

  25. 25
    Pakak Says:

    pu pk, tisa leh thlarau a bawrhsawm hi chuan khawiah mah a tam theih loh…. :) in thu leh hla tha tak2 ring hian in ka lo inawmtlei hrih a nih ber hi . ;)

    [Report abuse]

  26. 26
    PKfanai Says:

    Pakak, I thu leh hla ka lo ngaichang reng ang. Tha ka ti thin riau va.

    [Report abuse]

  27. 27
    Puii Says:

    Testimony ngaihnawm anih hi….(Y)

    amahin a mamawh a intih loh chuan thawnhmaw pek hi chu vawkhmaa tuikeplung paih ang pawh a ni thei ;-)

    Thawmhnaw ha mang lo khan miin an khawngaih a ring te pawh a ni thei ;-)

    i fapa hi fel top…. !!i fapa tan chuk chooks… :-$

    [Report abuse]

  28. 28
    mamboihi Says:

    Pu PK a hmasa zawk ang khi keini pawh kan nei a! kum tamtak kan inah a awm tawh a, a chhungte kan hre lo. :-S Vawi tamtak thawmhnaw kan lei a, mahse a mawngtet lo chu a ha duh lo :-( Mi an lo len chang te hian a hrehawm lek lek thin. Pawisa i pe zawk khi kei chuan a tha zawk ka ti e.

    I fapa story chu a va ropui em.. (Y)

    [Report abuse]

  29. 29
    bbney Says:

    Tunah ka chhiar ve chiah a, a á¹­ha hle mai. I fapain khitia a rawn approach ngam che khi in enkawl dan a dik a nih dawn khi.

    Tunlai Pathian thu ka lo ngaihtuah loh deuh lai a ni a, a tawpa Bible chang chuan min hneh hle mai.

    [Report abuse]

  30. 30
    PKfanai Says:

    Puii & mamboihi, in thlir dan hi Pathian thlir dan pawh ni ngei turah ka ngai. A Lawmawm e. bbney, Pathian thu hi chu, Thlarauvin a tih nun chuan, khandaih hriam tawn aia hriam, ruh leh thling phel tlang vek thei, rilru khawih che dawt dawt thei a ni reng a ni.

    [Report abuse]

Leave a Reply

You must be logged in to post a comment.