JOSEFA SUANGTUAHNA KA SUANG TUAHA

August 16th, 2012 12:17 am by Zama Khiangte

Chu kan chenna In lian tha tak mai, reh ruihah chuan ka khawhar hnem tur reng ka nei si lo. Ka hunawl hnawhkhah nan tiin chu khaw lum tak hnuaiah chuan kan In chhunga awm Tuibûk (Swimming Pool) hmun lam chu ka pan ta a.

Chu Tuibûk hit nuam raih maiah chuan ka in chiah dai a. Ka ngaihtuahna khawvela cheng tumin ka lu chu tui chim loh chiahah chuan ka dah chhuak a, che lo châng lo hian ka thaw helh helh a, ka chhing diar diar a.

Ka naupan lai nun te kha. Unau 12 zinga fapa duat bik ka nih dan te, ka pa rosum an duh vanga ka unaute chet duhdan râwng leh mak tak mai te kha.

Ka nuna Vanduaina chhum pik tak, fur laia hâwktui ang maia luang hum hum te kha a hun lai kha chuan ka va hâk nasa êm, ka thihpui lo chauh kha a ni si a.

Mahse a malsawmna ka dawn meuh chuan khâng vanduaina tuihâwk te kha ka tan malsawmna min hriatfiahtir tu a lo ni reng si.

Keimah kha in khawngaih châng ka nei ve fo a, ka nunna neitu Khuanu pawh ka dem hman thelh a nih kha. Mahse Vânduai ber chu ka ni lo, ka dinhmun aia hniama awm kha an la kuh ve tûn tho si a.

Ka bul maia lo ding tawh hmeichhe pianthiam zet aw chuan ka khawvel chenna atang chuan hrui lo hian min phih chhuak nawk a, dimdawina tel reng reng lo in.

Kan en thuak a, a mawi ngawih ngawih, kan en chiang leh a, a mawi tulh tulh mai si. En chhuak dap pawh ni I la, sawiselna tur ka hmu anih chuan keimah hi ka insawisel ang.

A mitmeng vam ham mai, hremhmun nena in kungkaih lek lek, Vantirhkoh mitmeng a tana mawi chuan beisei nei tak hian min melh ran a. A duh chu ka hrethiam mai. Kim lo taka a fun a nau chaw bâwmte chuan ka mipa chil chu a tiput lo chauh a, ka khawvel thinlung tuihna chu a thlem hian a thlem chhuak hiau hiau hi a ni ber mai.

Nawmchenna tuipui thûk lama liluh dun turin ka khawmual silhfente chu min hlih sak a, tui hleuh kawr min haktir a tum a ni. Kei pawhin chu lui thûk lama liluh dun pui atan chuan amah tluka hleuh min zirtir thiam tur an awmin ka hre lo a, an awm hek lo ang, an awm lo hrim hrim ang!

A kut chu a rawn phar a, ka lo chelh mai a. Chu Tuibûk atang chuan a bân tha no tak ring chuan ka inkhai chhuak a, tuipui lian zawk a liluh turin.

Mahse ngai teh, suangtuahna thlipui namên lo tak chuan min chhêm a, ka khawvel parchhuah tumna lei tha ni a ka hriatah chuan eichhetu rannung tam tak an awm tih ka hre ta, tihian ka tawng chhuak ta a.

“Ngai teh, ka pu chuan he Inah hian eng eng nge awm a hre si lo va, a neih zawng zawng ka kutah hian a dah vek a; he Inah hian ka aia lian zâwk tumah an awm lo a; a nupui I nih avângin nangmah chauh lo chu ka lakah engmah ui a nei hek lo; chutichuan, he sual lian tak hi tiin Pathian chunga thil ka tihsual theih ang?”

Similar Posts:

Recent Posts:

16 Responses to “JOSEFA SUANGTUAHNA KA SUANG TUAHA”

  1. 1
    ɪ̣uɪ̣pnoɥ Says:

    Va ṭha êm (Y)

    [Report abuse]

  2. 2
    Charice_mizo Says:

    I’m like ‘wow’ (F)

    [Report abuse]

  3. 3
    Astericâ„¢ Says:

    Lo ngaihtuahpui ve thin hi a tha viau a ni

    [Report abuse]

  4. 4
    Tripleseven Says:

    He nau hi chu a fel chiang a nia. Ka duh tawp.

    [Report abuse]

  5. 5
    Tripleseven Says:

    He nau hi chu a fel chiang a nia. Ka duh tawp. (Y)(Y)

    [Report abuse]

  6. 6
    Chhuaklinga Says:

    Awm ang fu mai, he tia lo ngaih mai chuan. Pathianin a mihriatte a ven dan erawh mihringin a hriatthiam phak rual a ni si lo. Pathian humhimna leh kaihhruaina hnuaiah chuan Joseph-a tawrh aia nasa leh mak pawh kha kan tithei vek ang tih hi ka rin dan a ni.

    tren tren

    [Report abuse]

  7. 7
    drake Says:

    OT: Israel hian Iran ni 30 vel beih a tum awm in an sawi a, zoram a tang a chhukthla te an va ngaihtuah awm ve le!!

    [Report abuse]

  8. 8
    PKfanai Says:

    Post leh Chhuaklinga comment (Y)(Y)

    [Report abuse]

  9. 9
    saint sammoo Says:

    sheldon says : Tukchhuah nuam vek u le..

    [Report abuse]

  10. 10
    Kawhterenga Says:

    Kei chu ni ila ka liluhpui em em ang :-P

    [Report abuse]

  11. 11
    Awmtea Khiangte Says:

    (Y) (C)

    [Report abuse]

  12. 12
    Sihtea Says:

    Suang tuahna tawlh pahrit nal leh , suang tuahna khawizu thlum tha hlemai. Ngaih tuahna a ti kalbing hmantep a lawmle, taptawraw pui a chakawm viau takang a.

    [Report abuse]

  13. 13
    Dust_Lv Says:

    An eiru a building an sa a, hausa deuhin an piangthara upa an ni leh mai alawm!!! kei pawh ka liluh pui chiang viau ang, thawk chham hma chu pil vang vang mai ang!! chhuah veleh ngaidam dil leh keuh anga ni mai. Nuam hlep boks ngaihdam ni boks. :-D:-D:-D

    [Report abuse]

  14. 14
    ɪ̣uɪ̣pnoɥ Says:

    A va ngaihnawm e…! Thu i va thiam hlap hlap ve leh! (Y)(Y)
    #13 Dust_lv (Y)(Y):-D :-O

    [Report abuse]

  15. 15
    PKfanai Says:

    13.Pathian hi rilru chhungril(thinlung) entu a nia. Kan thil tih engkim chungah hian ro a la rel dawn. Midang chu midang anni a, anmahni leh Pathian inkar kan sawi sak thei lo. Keimahni theuh leh Pathian inkar hì Kan Pathìan hian a la rel fèl dawn tih hi hriat a tha e.

    [Report abuse]

  16. 16
    Lamji Says:

    Hei chu…Tialkhara ani ang tih ava hlauhawm ve le..huhu!

    [Report abuse]

Leave a Reply

You must be logged in to post a comment.