Fapa Sual

August 21st, 2012 8:00 pm by Dinsa

A pian tirh a ka lawm zia leh tun hnu a namen lova mualpho a min siam a, min tih buai a min ti zak thin tu Fapa sual neih hahthlak zia hi.

A naupan lai hun te han chhuikir chuan, a pa a pa tiin ka office kal haw kan varanda ah min lo hmuak in ka thil hawn beisei in min lo lawm thin kha a ni ngai a. School an kal chho ve a, chhuang ru takin mi puitling tak a la nih dawn hi tiin hmabak eng tak in he ka Fapa hian min thlir tir thin. A duhzawng leh a awh zawng chu ka neih em avang ni hauh loin, rual awt tak a nun a hman a rualpui te a pha lo ang tih hlauh in neih chhun chhun in ka fapa daut lai chu a duhzawng te ka lei sak thin a. A rawn leikang chho zel a, kan chhungkaw ti hlim tu ber ah tang in. Kan unau zing a Mipa awm chhun leh upa ber ka nih avangin ka farnu leh ka nu leh pa te pawh chuan ka fapa an tu hmuh hmasak ber chu an ngaiin, an lawm a duat pawh an duat narawh e. Ei tur tui chitin hi chu ei loh a hlei pawh a nei lo ang, a school kal ve tan tiffin pai tur buaipui a, a Ni te ho phur zia leh buai pui thin zia te kha.

A pu in Pastor a la ni anga Bawihtuaia hi chu, mi chung lamah zel a la nung dawn a ni tia duat tak ka pa in a sawi thin te khan min ti phur chu kan fapa lakah chuan beiseina sang tak kan nei chho phah a ni. Primary level an zo chho a, an class ah rau rau chuan a thiam ber pawl a ni chho a. Middle section ah lah an zirtirtu te pawh in thu awih naupang thiam thei tia an fak der ve thin te chu a rawn ni chho a, chuti khawp a a rualpui te lakah fak hlawh chho ta chu chhuan pawh kan chhuang rilru viau thin reng a. High school a kal ve dawn tum te khan a Ni te ho state dang a awm ho phur lutuk in a uniform tur leh a mamawh hrang hrang te a tha thei ang ber rual pawl thei tur ber a ngaih an rawn thawn tawk tawk a. Kan duat tlang a ni kan fapa chu, thlatin mai naupang dangin an chhiar phak loh english magazine hrang hrang te chu an rawn thawn reng a ka farnu te ho chuan. Thiamna a neih theih nan theih tawp an chhuahna pawh chuan rah tha chu a chhuah teh meuh mai, an class ah pawh english a tawng thei ber a ni hial reng a.

Class-X an exam zo hlim te kha ka farnu te ho in state dang an fan pui a a duh zawng leh thil chi hrang hrang lei sakin nuam thei ang ber hian an siam a ni tawp mai. MBSE in Board exam result a ti chhuak dawn tih chanchinbu ah kan hmuh te khan kan phur lutuk hi awm ngaihna kan hre lo tlang a ni, result te chu an chhuak ngei a kan beisei ang ngei in Mizoram pumah chuan lang phak chiah lo mahse Dinstinction ah pass in Subject pathum velah Letter a rawn hmu haw reng a. Kan lawmna kha a sang teh a sin, ka pa in a tuikuk vawk vulh chu pass lawmnan a talh in then leh rual te nen chawhlui te kan kil ho reng a nih kha.

Fapa fel kha Fapa sualah

Matric an pass chho chu naupang en a kan en khan, bike ngenna chang a hre ta tlat mai le. Bike pakhat na na chu lei na tur chu haihchham bik tak chu kan ni lo a lawm, mahse a ni ang kum pawh la tling lo in bike ka duh e an ti mauh mai chu ka ngaihdan hi a ni ta hauh lo mai. Duat rawn fapa chuan thil tih dan te te chu a lo thiam khawp mai kan rin phak bak in , a pa in ka lei duh dawn lo tih a hriat hnu chuan a Ni te leh a pu te bulah chuan a ngen ta tluk tluk mai. An nin an tu daut lai awh zawng chu a hma hunah enge thleng dawn pawh ngaihtuah loh chuan an lei sak ta ngei a ni. An lei takah chuan Pa ber in rawlh lo theih loh, dawt hmang in liciense chu kan han siam ta poh a. Higher an kal chho ta chu mi fate awh tur in thawh chhuah nei lo chuan school kal nan bike in a leng ta zia zia ta mai. Kum chanve em pawh a la nei lo ti ah chuan mi a su palh, traffic police in an man a bike a chhia siam a ngai tih te chu kan beng ah chuan a ri ngun ta khawp mai. Petrol lah a heh lai leng, a nu dil ngam lo kei min dil ngam bawk lo chu a pu leh a Ni te ho bulah bawk tuan in petrol man chu a thlachham ngai lo. Petrol chuti khawp a heh chu khawihah nge a kal thin tak ang le. Khawi hmun dang ni love school tlanbo in rangvamualah zu in, nula a lo fawr pui ziai ziai mai thin chu niin.

A khawsak thin thu ka beng an thleng chu ka thin hi ati rim takzet, pastor tur khan rangvamualah zu a in a maw tih chu ka rilru a awm dan a ni. Vuak nawk nawk mai hi ka nap a, mahse ka pa in fate kut thlak mai mai loh tur a tih thu chuan min dang hram hram zawk a ni. Nun kawng dik zawh tur in an school a an zirtirtu te dil aiin a vawikhat nan camping ah kan han luh tir a. A rawn piangthar ho ngei , a sual a sim thu te chu a camp chhuahni a kan chhung inkhawm na ah sawi chhuak in nu leh pa thu ka zawm tawh ang tiin thu a tiam kan lawm khawp mai. Mahse a thutiam chuan kar em pawh a deih ta lo a ngai te bawkin school tlan bo a hrat avangin hnawh chhuah hial a tawk ta. Ka ngaihdan a pel ta duat taka enkawl tu a pa chuan tiang hmang in a nun sual kawhmawh bawl chu vuak chhuah tum in kut pawh kan in thlak na sa teh e. Ngaihdam dil in a sual tawh lo thu in thu a tiam leh ngei kar hnih vel kan han chawlh tir phawt a sum a awm hi chuan tih theih loh awm hek lo le school dang ah kan admit leh ta.

School thara an lut chu a chuti lutuk nghal lo fel tih a hlawh chho tan phian, mahse kan fapa hi rilru thianghlimtak pu a kan lo ngaih ang ngawt kha a lo ni ta reng reng lo mai. Kum tling lo chuan nupui ka rawn ru haw e te a rawn ti, tih vak ngaihna awm lo kan chhungkua ti buai chho tan tu lakah chuan zawl dah takin inneih a la hun loh thu leh a puitlin hun a inneih tur athuthlung in kan then hrang thei ta hram. Buai na cho chhuak reng a khawsa chung chuan pawl 12 chu a rawn zo ve ta hram a. College an kal tan tur te chu kan unnau fate zing a college rap hmasa ber tur a lo ni bawk nen , khati khawp khan chhungkua min lo ti buai tawh mahse an lawm teh asin a pi leh pu ka unau te chu. Phai awm se a tha lo maw tiin duhsak tu ka farnu te chuan ro an han rel leh, kan fapa a mizia kan chian tawh loh chuan a lo chak sa teh mai a kan dah ta ngei mai hostel ka awm peih lo tiin in an luah hrang ta ngei a ka rilru te te chuan ka ngaih chu a va tha lo em.

Hun a liam tha taka awm tur in kan ngai, sum lah kan thawn nasa teh e mahni in lum aia nuam zawk mah a khawsa thei hial turin thlabi mai nilo kartin duh tho kei leh ka chhung leh kua te chuan a mamawh phuruk nan kan thawn teh meuh a. Kumhnih zet a awm ve ta, Higher a kallai suala kha chu rawlthar rilru a nia a sim ve tawh dawn a nih boruak chhia a nei khat em mai kan lo tih rilruk chu a teuh lo in thup sen a nih loh hunah a rawn lang chhuak ta . A awmna state a mizo awm te chuan in fapa hi awm ve tlak a ni lo e tiin an rawn thawn haw tawp mai min va ti mualpho tak em. A rawn thleng tir chu ka thinrim lutuk hian jail tan tir vuak hlum mai ka duh, mahse kan fapa fin kherek tak mai chu a piangthar ta tlat mai..

Fel a chhuah a, a tih peih miah lo te ti chho in min bu ru ta fo mai fel ang taka lang chuan Revival Team te zui in fel takang chuan ka hmuh ah chuan a lang chho zel a mahse lem chan reng theih a ni lo. Kan fapa chuan nupui a ru mai ni loin minu uire in an team atanga pet chhuah a ni leh ta. In ti fing tawk a lehkha zir phai a awm ve ni bawk chu min ti buai tu mai a ni chhunzawm ta. A duh zawng apiang leisak tur a min demand na chu han hnawl mahila rukru sual ang mai in kan bank account thlengin fing takin min rawk sak ta zel mai milian fapa awm tha duh lo an sawi thin ang chiah kha kan fapa awm dan chu a ni chho ta, thu tha in awmzia a nei lo kut thlak in awmzia a nei bawk hek tawh lo.

Amah avang chuan police hmel kan hmu zing em em a mi fanu te hi nuthlawi ah a siam zel zul; a. Mimawl sual chu an la zia deuh mifing sual buaipui hahthlak zia chu. Thil ti sual se an rawn man hma hauh in an man dan tur lam a lo ngaihtuah hman vek tawh thin, tawngkam a thiam zel leh nghal a. Kum tam tak in siam tha duh lo a, nuam ni a ngaih a khawsak chhoh tak zel ah chuan. Chhungkua in a chhawr ber chu Mualphona min thlen hi a ni. Harsatna min thlen tu kan ril a rah ngei mai in Nung hming pu si a Thi reng nun nei a min han siam chu le…

Similar Posts:

Recent Posts:

8 Responses to “Fapa Sual”

  1. 1
    Pakak Says:

    min sawi chhan em lo maw :p

    [Report abuse]

  2. 2
    PKfanai Says:

    Cl-xii pass in, College hial te a rap a lawm maw le. Kalsual tantirh dan hi a ho duh ang reng khawp mai a, mualpho hluai chhan te hi thil sual vawi 2/1 tih vang te pawh a ni ve thei tlat thin. Inven fimkhur leh rilru neih hi a ngai tak zet mai. Naupanlaia enkawlna dik dawng leh nu leh pa tawngtai sak tlat tu nei te hi chu han tlu ve deuh nawk nawk thin mahse, thawh chhuah hun an nei leh nge nge duh khawp a sin.

    [Report abuse]

  3. 3
    Pakak Says:

    chhungkaw black sheep min ti ve thin, mahse nungchang (character) ni lo, rawng (colour) ah :p

    [Report abuse]

  4. 4
    ɪ̣uɪ̣pnoɥ Says:

    Ṭha dawn e… (Y)

    [Report abuse]

  5. 5
    Awmtea Khiangte Says:

    A khai, a la fel ve leh mai ang. Enkawl dan thiam a ngai a nih kha. Kha thingpui hi lo in phawt teh (C)

    [Report abuse]

  6. 6
    Dinsa Says:

    Pakak sawi chhan lo e lo in ngaihbel ngawt lo la :-D , Awmtea ka lo in mek e kha ka lo khilai ve ang che (B)

    [Report abuse]

  7. 7
    lrpa Says:

    Khawi lai takah khan nge a kal sual tak? Engvangnge ni ang le?
    Kan tleirawl ve deuh lai khan kan venga ‘ruih theih thil a fihlim hmak’ kha kutzungtang a chhiar tham lek an awm a! ka la tel lo zui!! Engvanginnge han ‘tih deuh chhak’ kha kan chak em em? normal lo deuh kha? Kan khawtlang nun/ kan society vang ani em? generalize chu theih loh mahse ‘gene’ ah hian a awm em ni aw a tih theih! …sawi zawm zel chuan kan sakhuana, christianity te thleng thleng hian a sawi kai thei awm e..
    Kan tlakchham chu ‘principle’ hi ani mai thei em, dik leh dik lo thliar hrang thei lo khawp a ‘dawihzepna’, awh phak loh (kan thawhchhuah phulo) kan awh tlatna chhante hi..Engatinge kan nih ang hi kan zahpui tlat le? miin min ngaisang se…materialism ah hian kan ‘bo’ ani ber em? kan CM thleng thleng pawh a car man to chi kan duh tlat mai te hi! keimahni leh keimahni hi engatinge kan ‘status’ ai a lan ropui kan tum thin!? ti ta duah e…the end :)

    [Report abuse]

  8. 8
    Mama_B Says:

    True story a nih chuan a pawi ka tihpui hle mai che. A la sim ve chek ang chu…

    Ka tleirawl laia ka invenna ber pakhat chu ”Keimah ang hi fapa nei ve ta ila, hetiang hi tih ka phal ang em?” tiin ka inzawt a, fapate tih atana ka duhloh leh phal loh chu keipawn ka ti tur a ni lo tih principle kha ka nei thin a, hei hian sual lakah min veng thui khawp mai.

    Fa kan han nei a, theihtawpin kan han duat ve a, min han sual san leh tlat si thin hi chu hriatthiam a har ngawtin ka ring!

    [Report abuse]

Leave a Reply

You must be logged in to post a comment.