AWMPUI HRINGNUN

August 5th, 2012 12:07 pm by Zama Khiangte

Chu Bus tukverh teah chuan kan hawi thawveng vel a, hawi thawveng e ti lo chuan ka thinlung erawh chu zing tiau chhum ang mai a pik a ni lawi si!

Ka khawvel dam ni te khan pathum hmunnga a pel ve awrh chauh kha a ni a, kan bana kan ‘rubber’ bunna leh kan in ‘marble’ thapna kut chât te pawh a la reh hman lo tihah khan chawlhni tuka ka nu tawngtai hre pha tawh lo turin mikhual nun zawnga khual ber mai “awmpui nun” chu ka zir tan a ngai ta si.

Pa berin a fate zirna aia ruih a thlan tak fo avangin a harhchhuah meuh chuan mual lehlamah kan khawvel chuan min lo liam san tawh a. Theih tawpa mawngkaw tha nena tan khawh ve hnu pawhin kan um pha zo ta ngang si lo! Mi khawngaihna dilin thiam run sang belh kan rel ve ta a, a hahthlak mang thin teh e.

Zingah maw BAÂL hma pawha thingthi ngai lo naupang fel, lawmman hial lo dawng ve tawh khan thingthi meuhin zan lama ka pu leh a thiante ke phah hlai pui thla chu chibai ka han buk ta thin a. Thlan tla hluama an thawh hmaa darthlalang an phah ta emaw tihial tura kan lo nawh tlet vang hnu khan ka pu dul tiah lawih bal tin chu kawtin tuikhur lam chu kan pa leh ta thin a. Tlang kan lawn ta a nilo maw tih khawp hial tur khawpa chho bira kan kum phu aia rit tui kan han kawt par par a, rilruah chaw chhum a la ngai a ni tih hre reng chunga muang châng ngam silo khan hah kan hre ve reng tho thin si.

Chaw chu ka chhum rum palh chuan ka pi in min hau ang a, a lo nem ta anih chuan ka pu in. Do lung leh tuboh karah a ni ber e, kut zung tang nena teh meuha a tui zat tur min hrilh chu fimkhur takin kan han chhung lut a, rilru tawngtaina nen kan la hmuh ngai reng reng loh ‘gas’ thukah chuan kan chhuang kai ta a.

Alu kan mawlh kha, tel lah hi a lo tam awl thin si. A tlem lahin min hau a, a tam leh pawisa ren nachang hre ve thlawt lo kan ni leh thin. A tawk chiaha kan kha ka tan chuan maw thla lova thlawh duai duai tum ang chauh a ni.

Pulpit a ding tlak hial tur khawpa kan in chei ve tawh hnu khan maw kawmthlanga vawk riltam chaw pek kan la hmabak thin a, ani lah khan ka kekawr mam nalh takte kha îtsîk leh hmusit takin a chaw chu min hap per ta bawrh nawrh thin a. Ka theih tawpa chum chawrh mai kha ka chak thin. Mahse a ruka min thlir rengtu ka “pi” chuan min lo hmu ang a, a zawm ngai reng reng loh khawngaihna thu te kha a chham leh hem hem mai dawn si.

Lunglente kha chu ka pi ang ri leh min hau thawm khan a hnawt kiang mai thin a mahse chhun riltam kha chu tuar a har ka tithin. Kan khuaah kha chuan rethei hle mah ila, chhun chaw ka nghei ngai si lo a.

Awmpui kan nih chuan infiamna te kha kan thihsan a ngai a, tv kan en ve pawhin zaithiam kan tih ve te aiin kan hotunu zaithiam tih kha kan ngainat a ngai a, vai serial film-te hlei hlei kha pu ber hovin kan thlir ta veng veng mai thin a nih kha.

A hreawm zual lai chu maw kekawrte hlui tawh chhuat nawh nana min han pe tlat mai te, washing machine-a kan pite hnute tuamna kan han tleuh hruih hruih thin te, thiante nena inhmuhkhawm kan chak ve em em ni pawha kan rinni hunawl hnawh khahna tha tak min pe thin te, Burma hlawhfate ruala chawlhni inkhawm ho hela kan thiante in kan han pan thin mawlh kha.

Khawlaia kan khua a mi, tupawh han hmuh khan lung lente kha a hnem em em a, kan ngai em em vek tawh nimai hian ka hre thin, Veng lehlam daih a mi, a hming pawh khuaa kan awm laia kan hriat loh kha kan ngaina em em a, kan zui hnu hnu zel mai tawh thin.

Mahse kha nun kha ka tan chuan harsa viau mah se a hlu asin. He hmun leh hun thleng tura ka kawng zawh tawhte hi kham leh suar ang maia bumboh ni thin mah se ka paltlang hnu chuan ka phurritte nghatin ka thlir let a, ka ngai hlu thin khang ni te kha.

Nun hi awlsam taka paltlang tur nise Isua kha ran thlengah lo piangin kraws-ah kher a thi dawn em ni? Hringnun chu a hlutna hre fiah tur chuan tuar a lo ngai em si a, ni e, kan intlansiak a, kan tlan chak loh chuan min leh pel ang. Amaherawhchu a hnuhnung ber pawh a hmasa ber a la nih theih tlat si chuan CHAWL hman kan lo ni lo ve. Hei hi chu kan intlansiakna kawng chanve em pawh a la ni si lo a.

(210520120800)

Similar Posts:

Recent Posts:

13 Responses to “AWMPUI HRINGNUN”

  1. 1
    Robert April Says:

    Ngaihnawm ve aw… (Y)

    [Report abuse]

  2. 2
    TuaiSialA Says:

    Ka hawng hawng leh e!

    [Report abuse]

  3. 3
    littlerascal Says:

    Tuaisial Khar leh rawh :)

    [Report abuse]

  4. 4
    Lamji Says:

    Ka va tluk lo che ve aw. Ka ngaisang che.

    [Report abuse]

  5. 5
    PKfanai Says:

    Awmpui nun i ziak chhuak thiam hle mai. Tin, hmalam panin ila kal zel tih hriat khian thaw a ti veng e.

    [Report abuse]

  6. 6
    Charice_mizo Says:

    Van ngaihnawm em em, ka hnuk te pawh a ulh tep alawm le…mahse chhel takin i tuar tlang tih ka hriaa, ka thaw huai mai..

    Hmanni Mac Donald’s a kan chawl chu vai nula hausak hmel deuh hi alo chawl vea, a bulah khan a thil (stuff) vel kensakin an awmpui (maid) ni awm tak, cher chhe deuh, hmel riangvai deuh hi alo thu ve renga, a burger ei lai pakhat mah kha a pe ve miah lova, mak kan ti khawp mai ka thiante nen kan en hrek hrek ringawt…

    [Report abuse]

  7. 7
    chhana Says:

    Nia awmpui nih chu tlawm thlak tak a ni. Keipawh mi awmpui ka ni tawh a, thil hriat nan erawh a tha fu.

    [Report abuse]

  8. 8
    Chhuaklinga Says:

    Awmpui nun i rawn sawi fiah tha hle mai. (B)

    Thil pakhat erawh chu kan awmna ten min duat poh leh a inthlahrunawm tulh tulh mai a ni. (H)

    tren tren

    [Report abuse]

  9. 9
    Zama Khiangte Says:

    I fel pauh leh i awmna te an fel ang a, i awmna te sual i tih fo chuan nang pawh i dik bik tawh lo tihna a niang..engpawh chu ni se, hahthlak ve tak chu a ni chiang e…a pch theih loh a..he3

    [Report abuse]

  10. 10
    Dr Mahminga Sailo Says:

    A ngaihnawm teh e. Khitiang harsatna tuarchhuak theia tuarchhel i ni khi i fakawm… (Y)

    [Report abuse]

  11. 11
    Kher Kher Says:

    I ziak thiam in i ngaihsanawm hle mai.

    [Report abuse]

  12. 12
    Awmtea Khiangte Says:

    Good post (Y)

    [Report abuse]

  13. 13
    Sihtea Says:

    Mi dik , Mi fel , Mi rinawm, Pathian thu awih leh awiho, hriat theihna awl samber chu, an awmpui ah va tang ila, a hriat khawpmai. Mi awm pui’a tan hreh awmzia chu, a tuar tawhte’n kan hrechiang ber. A bik takin, Ram dangmi, Hmeichhia te pheichuan an tuar nasa lehzual. Nu ber awmloh hlana, Pa berin an awmpuite, an vehthlema an khuaikhem thin hi ka hre fomai. An pite’n hre chhuak mahse, an PU te chu, hau lovin, an mahni zawk chu, an hauvin an limerh zel a. Thiamloh an chantir fothin. He kristian ram ah ngeihian.

    [Report abuse]

Leave a Reply

You must be logged in to post a comment.