Ka Nun – Khawdur leh Ni Êng

August 31st, 2012 4:45 pm by Awmtea Leo Khiangte

(Ka note: Nidang aiin tûn tum chu ka ziak sei ve deuh hlek)

Ka naupan têtlai hian vai ramah zai ka tâwk tawh a. Enga ti tehrêng nge ni, min thui lai mêk chuan ka harh ta tlat mai! A natzia leh vân sânzia chu sawiin a siak lo. Rei vak loah min thui zo a, tap hlawp hlawp chungin min nawr chhuak a. Kha mi tuma ka nu mangang hmêl kha ka la theihnghilh thei lo.

Chu mi hnu kum rei loteah ruhseh (rheumatic fever) ka vei tih hmuhchhuah a ni leh a. Daktawr-in kum 5 chhûng, thla khata vawi 2 Penidure (LA12)-a inchiu tûrin min han ti tehrêng a nih kha, veng vawng mai a! Shillong lamah pâwl 11 zir tûrin ka chho a, inchiu lah chhunzawm zêl a ngai si. Ka inchiu-na hi a na thei êm êm a, a tûkah ka khua a tisik ziah bawk. Mizo pawh ni lo nurse (nula) hmaah khêl lovin thla tin vawi hnih ka mawng ka hlim ta ziah mai a ni! Ka mawng lah hlui bawk, ka phûr lo thei fu. Nurse lah chuti bawk!

‘Natna’ an tih hian min thlah tak tak ngai lo va, Nazareth hospital (Shillong) khum te pawh ka zuk delh khuar ve kêk kûk tâk kha. Phuar beh ni ta lo chu ka chhuak ve leh mai bawk a. Pawl 12 ka exam dâwn chuan ka dam lo na ta riau mai. Ka chhûngte chah chhoh lah tlâwmpa êksekah ka la a, mahse an lo chho ta nge nge a. Result lah chuan ‘damlo chungin a exam kha maw, hrethiam ta’ng nge’ ti chuang bawk si lo. Eng tin tin emaw ka ‘pass’ ve ta hlauh mai. Tûn hnua ka ngaihtuah leh hian ‘ka lâwm’ tulh tulh.

Govt. Aizawl College-ah BA ka zawm ve leh a. Ka inchiu pawh ka chhunzawm zêl a, helamah erawh Mizo nurse (nula) hmêltha bawk si an lo ni ta! Phûrawm fê hian a zahthlâk duh fu a ni! Kum 5 hnu-ah ka inentîr leh a, Daktawr lah chuan “A la dam fel lo, kum 5 dang inchiu leh rawh” min han tih tlat pek chu(h)! Ka thu ni se, ka transfer nghâl nal nal ang. A kum 6-naah pawh chuan a tlangvâl zâwk bawk chu nula hmaah thla kipin ka bawk leh ta hun hun mai a ni. Sexy lo ve thlâwt! A kum 7-na zawng ka peih ta ngang lo a, ka bânsan ta nge nge a. Tlangvâla pumpa, eng kim than kin tawh tân chuan a tiha tih reng chi pawh va ni suh.

Midangten BA chu 1st-ah lungawi zân lova an pass laiin kei erawh lâwm êm êm chungin 2nd division-ah ka pass ve hlauh pek a. MA zawm ka duh si, ka mark a chhe bawk si. Thihna pawh ni hlei lo tiin application form chu ka zuk submit ve ta nge nge a. Seat 30 a awm a, waiting list 3 a awm bawk a. Result a lo chhuah chuan 33-na ka ni! In hrethiam mai em? Mahse Pathianah ka innghat tlat a, tul a tih chuan min luhtîr ang a, a tih loh chuan min luhtîr lo mai ang tiin ka inhlân lâwk vek bawk a. Kawng min hawnsak leh ta a ni! (Hemi chanchin pawh hi thui tak ziah tûr a awm, mahse duhtâwk rih mai ang.)

Hêng hunlai hian ka hrisêlna pawh a tha viau a, 1st Sem.-ah te chuan BA-a topper pawh khûmin ka sâng filawr ta mai a. Mak ka inti a, ka’n in enchiang a, keimah tho ka la ni! Mahse, ka nunah khawdur a lo lang leh ta! ‘Vâl to lo’ tia nula pawh melh ngai hlei lo khân ngaihzâwng ka nei ve khang lâng pek alawm le!

Ka nei thiam lo êm êm mai lehnghâl, ‘kelphûng tap chim hmu’ ang maiin ka birh tlut tlut tâk mai chuh! 4th Sem. exam result a chhuah meuh chuan 1st-ah pass-in 3-na ka ni ta dawrh mai. Tûnhma zawnga hrisel lo leh harsatna namên lo tâwk chunga ka pass ve tâwk tâwka ka lâwmna ang kha ka nei ta hauh lo. Eng dang vang a ni lo, 1-na nih ka tum êm êm a, ka ni si lo. Ka lungawi lo a ni. Mite ka demna thin dinhmunah ka han ding ve a, dem thei ka nih bîk lohzia ka inhmu chhuak a. Ka zah rual rualin ka lâwm rilru hle.

Kum 30 êm pawh la tling si lo, ka lû te hi zuk tuak zo têp tawh a! Zahthlâkah pawh ka la peih tawh lo, ropuina ka ti hmiah! Natna hi inhnehtîr ka tum ngai lo. Ka dam lo tih inhre mah ila ‘Ka dam a ni’ ka ti lui tlat a, ka dam chho ve zêl mai. ‘Bâkah mite hian ‘thih hma’ te hi an tum thin hi ka tia, kei ve thih te chu ka la tum lo nasa mai, thi hman pawh niin ka inhre lo! Tihtûr ka la ngah lutuk tlat! Ka nunna chungah erawh thu ka nei hauh lo, mahse dam rei erawh ka tum nghet bur.

He ka hrisêl lohna hmang hian lungawina insiam ka tum a, na mah ila ka dam hun tûr ka ngaihtuah hrâm hrâm thin. Chu chuan hlimna min siam a, hmabâk êng min hmuhtîr thin. Ka nuna natna leh hrehawmna khawdur lo thleng thin hian nakina ni êng mawi lo lang tûr a tifiah zual ngei ang. Chu chu beiseina leh rinna mitin ka thlîr reng thin. Chuvangin eng dinhmunah pawh ding ila ‘Lungawi’ zêl ka tum a, chu chuan ‘Hlimna’ min thlen thin. Hrisêl tha tak, ngal fîm tliang hlarha dam hi ka tum tlat, kei… hrisêl lo ber hian!

Similar Posts:

Recent Posts:

34 Responses to “Ka Nun – Khawdur leh Ni Êng”

  1. 1
    Pakak Says:

    chhiar ang hmiang

    Report this comment

  2. 2
    Dr Mahminga Sailo Says:

    Hringnun ngaihnawm tak i nei a nih hi… (Y)

    I mawng chiu-tu ni ve ta ila, ka phur em em ka ring bik lo.. :-P Tin, bialnu te i nei tawh vel a, tun atang chuan U enin ka en tawh ang che… :-D

    Report this comment

  3. 3
    sheldon Says:

    Haha..mawng hlui :-D

    Tak tak a, i hmel en in i hrisel hmel hle sia i lo insawisel neuh neuh ani maw.. Thu i ziak thiam, chhiar a kal zaih mai.

    Keipawh BA final ka exam dawn khan Principal in a phal lo, a chhan chu khami kum khan ka attendance a chhe lutuk a, ni 30 em pawh ka kal tling lo mawle. Mahse 1st year lamah ka result a lo that deuh vangin ka dil tlut tlut a, ka exam ve thei ta hram.

    Report this comment

  4. 4
    Dr Mahminga Sailo Says:

    K’u sheldon, he post atanga ka hriatchhuah chu: hmel keu ve deuh pawh hi (bus conductor emaw an ti hlauh erawh an hmu sual chiang.. :-P ) an mawng a hlui ve thei tho a nih hi… :-D

    Attendance chungchangah chuan, UG kan zirlai khan attendance hi minimum 75% a nia. PG-ah phei chuan 80%. Minor subject, Credit hour tlemah phei chuan class vawikhat lek kal loh paw’n, attendance a pawt hniam dawrh zel a. FImkhur a ngai thin tak a ni.. :-(

    Report this comment

  5. 5
    Awmtea Khiangte Says:

    #4 Mawng facial hi kan mamawh thin khawp asin :-D

    Report this comment

  6. 6
    ɪ̣uɪ̣pnoɥ Says:

    Ngaihnawm hlë. Nurse hmaa inhlim hlui kung thin chu ka va huphurhpui hnuhnawh che ve… :-P

    Report this comment

  7. 7
    Dr Mahminga Sailo Says:

    #5.. Nia, Mawng facial = MawngCial hi tih ve zeuh zeuh tur asin… :-P

    Report this comment

  8. 8
    Charice_mizo Says:

    Ruhseh hi an khawngaithlak thei e, ka cousin pawh i inchiuna ang khian kum tam a inchiu alawm, a natzia an sawi thin.

    Man khawp mai i thuziak chu, ka like mawlh mawlh e :-)

    Report this comment

  9. 9
    Awmtea Khiangte Says:

    #3 & 8 Thank Q

    Thuziak te pawh hi tlang hreih hrawiha ziah hian a ngaihnawm bik riau hi ka tia :-)

    Report this comment

  10. 10
    Puii Says:

    Awmtea chu lo “Man” ngei mai nih hi…. (Y)

    Report this comment

  11. 11
    Pakak Says:

    ngaihnawm e, dam reng rawh (Y)
    kei pawh mawnghlui deuh, perek phawina tam deuh ka nei :p
    attendence khi kei poh ka kal chhe ve khawp, panga ka kal ;)

    Report this comment

  12. 12
    Awmtea Khiangte Says:

    #11 Perek phawina.. hahaha

    Report this comment

  13. 13
    vakul Says:

    i felin i ngaihsanawm thlawt…ruhsehpui phei chu turu tak a ni a…inenkawl tha hle rawh…chutiang natna nei chu shillong ni lo a thlang lawk…gwahatiah khan awm zawk la a tuar a nep deuh tur.

    ruahsur tur i ring dik thiam ve em?

    pawi ta ber chu in class topper i ni lo khi…ngaihzawng tih vel mai mai tihchhiatpui tur a ni hlei nem…Ignatia te ang hian namnul puat puat la nulate zawng.

    Isua hi kan future a ni e…dam rei lamah kan thu lo.

    Report this comment

  14. 14
    mamboihi Says:

    I chanchin chu a va ngaihnawm ve… Mahminga te ho chuan I inchiu khawngaihthlak awm zia aiin Nurse hma a mawng cial an lo tuipui daih nih hi :-P

    I lungawi thei zel hi a ropui ka ti (Y)

    Report this comment

  15. 15
    TuaiSialA Says:

    Ngaihnawm ka ti hle mai. Tun thleng hian Govt. Aizawl College-ah in sulhnu hmuh tur a la tam khawp mai. Ngaihzawng neih chin tawk hriat loh hi tu paw’n kan lo chhiatpui a nih hi. (Tichuan, fb-ah ka rawn inbox awks dawn che) ;-)

    Report this comment

  16. 16
    caribou Says:

    Kum 30 êm pawh la tling si lo
    Thuziak tha tak tak, thu un leh ril tak tak rawn ziak thintu hi, i lo va la naupang ve le. Thu leh hla lamah leh engkimah ka aiin i lo chungnung hle mai. I thuziak tha tak tak i rawn post thin te hi, misual.com tihlutu an nih hi theihnghilh ngai miah suh ang che.

    Report this comment

  17. 17
    Awmtea Khiangte Says:

    Kei aia chanchin ngaihnawm tak tak nei in nih hlawm ka ring. Ka cho chhuak che u a nih hi

    Report this comment

  18. 18
    Ignatia (33-115 AD) Says:

    Lehkhabu-ah pawh hian BIOGRAPHY lam hi keimahah chuan hralh a tla thin khawp mai. Chutiang bawkin thuziak-ah pawh hian mimal chanchin hi ka ngaina thin.

    A ngaihnawm. Thuziak i thiamzia pawh a lang. I thu laimu ni-a ka ngaih hi a tha khawp mai.

    Penidure injection nangmah anga lak ngai thiannu ka nei tawh a. Ka khawngaih thin khawp mai. A injection dawn hian a huphurh thei lutuk a vawi engemaw zat chu ka tawngtai sak hial a ni, a in-chiu dawnah. ‘Ka upa tulh tulh a na ka ti telh telh’ a ti ngawi ngawih thin. Tunah chuan ani pawh a dose a zo ve tawh.

    Master degree result i nei tha hle mai. (Y) Result that rau rau-ah a ler lam result tha hi chhan hrang hrang avngin ka lawm tlat a ni.

    Nula lamah beihvai hmel takin i lo inziak ziah a mahse kan GURU rual i lo ni reng dawn a nih hi. Nula lamah hei aia TURU i duh chuan Pu Vakula hnenah SPECIAL COACHING CLASS thlakhat chuah tal kal thei la ka va duh em aw!

    I chanchin a ngaihnawm e. Thih pawh hlawkna a tih kha maw…

    Report this comment

  19. 19
    vakul Says:

    Ignatia *baihvai* ehem.

    engtik nge i rawn zin dawn.

    Report this comment

  20. 20
    Ignatia (33-115 AD) Says:

    Hmmmm..ka lo ziak sual pek a ni maw.

    Kumin Durga Puja hian min ti nasa khawp mai a. Ticket pawh min neih sak tawh a mahse chhan hrang hrang avangin keimah hi ka la chiang thei lo… bakah Puja hmanga ka lo zin chuan i TREKKKK DREM DREM DAWN EMMM MYYY….. :-D Ka hmu ngam lovang che. :-D :-D

    Report this comment

  21. 21
    CFL Says:

    Chanchin ropui leh zahawm tak a ni e. All the best for your future. (I)

    Report this comment

  22. 22
    Dr Mahminga Sailo Says:

    K’u mamboih, Jenifer Lopez khawvel hriata a lar chhan pakhat hi ka hre chiang ve em a. Awmtea pawh hian, misual.com khawvel ramzauah hian mawng hi a larpui theiin ka ring tlat… :-D :-P

    Kan nau pakhat, kum 4 velin tunah hian Rheumatoid arthritis a vei mek a. A lainatawm khawp mai… ;-(

    Report this comment

  23. 23
    ɪ̣uɪ̣pnoɥ Says:

    Han tih leh ta ila, i hrisel lo chu a zia lo hle mai. ;-(

    Lo hrisel tawh rawh taksaah, rilrua i hrisel ang bawk khán. (Y)

    Report this comment

  24. 24
    mamboihi Says:

    @22 Mahming haha!! Awmtea chu mawng cial ber ah kan puang mai dawn mi… :-D :-P

    In nau chu a lainatawm hle mai ;-( naupang damlo hi chu hmuh a hrehawm.. Pathianin ti dam ngei rawh se.

    Report this comment

  25. 25
    drake Says:

    rheumatic fever hi mizotawng in ruhseh maw lo ni? Rickets/rickettsia hi engnge mizo in ni ve le? pancrease hi mizo in engtinnge kan tih?

    Report this comment

  26. 26
    Awmtea Khiangte Says:

    #22 Mawng cial ngawt pawh chu in lo buaipui le :-D

    Report this comment

  27. 27
    keimah Says:

    Hring nunah hian a hun laia hrehawm ber berte hi a hnu lama sawi nuam ber ber leh nun thawnthu tingaihnawmtu ber an ni fo thin.

    I nun thawnthu a ngaihnawm hle mai. I thil thlir dan hi a fuh. Siamtu zarah ngal fimin dam rei mawlh ang che!

    Report this comment

  28. 28
    Awmtea Khiangte Says:

    Ka lo lut leh zuai, hringnun thawnthu kan ziak mek hi, a tha thei ang bera ziak turin theihna kan nei a. Kan chungah thu nei lo mah ila, a hman thatdan thu-ah erawh thu kan nei thung

    Report this comment

  29. 29
    evergreen Says:

    A va ngaihnawm ve, Awmte!
    Ka’n belh ve lawk, tuk khat chu ka zing tho khawchak lam ka han hawi a, ni chhuak chu a mawi danglam bik riauv hian ka hmu a, engdang vang ni lovin khawdur kara ni chhuak a ni. Ka ngaihtuahna a kal ding hle mai..

    He hringnunah hian khawdur chang lo thleng thin mahse chu khawdur karah chuan a ni ISUA hmel hi a lo mawi zual thin n; harsatna te ,manganna te, lungngaihna te lo thleng thin mah se, chutih hunah chuan Isua lam hawi ila, a hmel a lo mawi zual thin! khawvel hi a lo mawi thar leh a, nun hian awmzia anei thar leh thin!

    #25, Pancrease: Ril bawh.

    Report this comment

  30. 30
    keimah Says:

    #29, ril bawh hi chu Sap tawnga “Omentum” hi a ni zawk lo maw? Pancreas hi Mizo tawngin kan neih ka hre miah lo.

    Report this comment

  31. 31
    evergreen Says:

    #30, Omentum pawh a ni zawk mai thei/
    Kei pawh Pancreas hi ka hre thin lova. Hmanah vawk talhnaah Pa pakhat hi, Pancreas kawk va chungin , “Hei hi mizo tawngin eng nge?” tiin ka zawt a, RIL BAWH tiin min chhang ve mai a. Ni mai ang hming ka ti thla ve rawk a… :-)

    Report this comment

  32. 32
    drake Says:

    pancrease leh adrenal gland hi mizotawng ah awmlo ni ang, rilbawh chu omentum nih hmel zawk, mahse omentum hi hlap kan tihhi ni zawk em le?

    Report this comment

  33. 33
    Jacka Pi Says:

    A ngaihnawm hle mai

    Report this comment

  34. 34
    Awmtea Khiangte Says:

    pancreas, adrenal gland leh omentum chu dictionary-ah en ve mai ula maw le :-D

    Report this comment