Panlai Nun – Lirthei Ngaihsan Lai

August 30th, 2012 8:00 pm by Dr Mahminga Sailo

Hmui tuvu…
Kan khuaah lirthei a lut lova. Lirthei kan hmuh theih chhun chu thlangra/kho leh belval a ni mai. Diesil/petrol rim kan hriat chhun pawh buhherkhawla buh kan her laiin a ni mai. Mahse, lirthei rik dan leh, an hma mite kawng kian tura an hriattirna ri piiiit piiiit dan kan hre ve chiang! ;-)

Tin, heti hi a ni a. Sikul chawlhlawk/banlawk a thlen meuh chuan, sikul kal paha mi huan pal (mau phel) kan phawi ruk ngei kha kan thian pahnih pathum-in a rualin kan vuan a. Lirthei ri ang ni ngei kan hriat, chil phuan suah suaha hmui tuvu hlurh hlurhin, kan han vunnnn vunnn.. ta thin a. Hmui tuvu hlurh hlurh chunga, theihtawpa chaka han tlan phei kha chuan, hah a na thin asin. Thian thenkhat, khawpuia zin thang deuh leh lirtheia chuang zing deuh kha chuan a gear thlak nachangte kha an hria a, kan ngaisang thei teh a nia. ;-)

Jeep tlanliam thlirin
Kan khuaa lirthei hmuh tur a awm tlat loh avangin, kan khaw thenawma zin changin lirthei (Jeep leh TMB) kan hmu thin. Tin, kan khaw thenawma kan zin phak tawkna khaw kawngpui lah kha alkatra luan loh; fur laia diak kawi nuai, thlasik laia khu em em si a ni.

Tawng miah lo leh nunpui ngailo tan chuan, kan nun hi nuihzatthlak leh mawlmang tak pawh a ni ngei ang. Mahse, kan tan chuan hlu ve tak a ni. Ralkhata jeep tlan ri vang vang kan hriat tawh ngat chuan, jeep tlan thlir liam ringawt tur khan theihtawpa chaka tlanin kawngpui kan pan thin! Eng teh ual hlawkna kan neih erawh kan hre lo, mahse a thlawn erawh kan ti phal lo. Kan khuaa haw hunah jeep engzat nge ka hmuh, TMB rik dan chu hetiang hian tia TMB rik dan hmui tuvu thova kan han zir thei te kha thiante ngaihsan hlawhna a ni. Computer games neih thar lam kan buaipui lo, mahse kan hlim ve em em si. :-)

Jeep-ah ka chuang ve
Kan khaw thenawmah pawl li board exam kan zawh ni chuan, Lunglei zinna remchang a awm tiin ka pi’n min hruai hlauh mai a. (Ka thu ziah hmasaah, pawl li exam laia ka thiante nen Lungleia zin kan tum, kan thlen hman tak loh kha.. DMS) Lunglei atang kan haw ni chuan, chhumliamkawn kan pel tihah jeep pakhat a lo tlan vang vang a. Rin loh tak maiin, kan bula thlen chuan a ding a, rawn chuang ve r’u an ti hlauh mai. A rang a rangin thatho takin ka pi nen chuan jeep hnungah chuan kan thulut ve ta. Ka veng ka haw hun chu sawi tur ka va’n ngah dawn rua em tiin jeep hnungah ka khi var var. :-)

Ka pi an nuih
Kawng a chhiat avang leh, lung hraw pui pui (boulder) an phah avangin, jeep tawng deuh tawha han chuan zet chuan a sawh nghawr a lo na khawp mai a. Ka pi, tar chak tawh lo chu, kan chuang fel chiah tihah a inchelnghet thei si lo, tawng a’n tum ngawt a. A tawng khur ta dawt dawt mai. A sawi tum reng a sawi chhuak thei ta lo. :-P

Chutia ka pi tawng khur hlawk hlawk chu, Jeep-a chuang te chuan an lawm phian a. Nui hawk hawk pahin, ka pi vawikhat chiah han tawng leh teh an ti ta chhen a. Ka pi lah a nuih a za ve bawk si; nui chunga tawng a’n tum phei chuan, a ha bal then tawh nen, nuih a tiza tual tual. Minute sawm chuang zet chu lirthei sawh hrehawm pawh hrechang lek lovin kan nui. :-D

Similar Posts:

Recent Posts:

30 Responses to “Panlai Nun – Lirthei Ngaihsan Lai”

  1. 1
    ChhanaPa Says:

    1st keuh mai ang.

    Report this comment

  2. 2
    H.Vangchhia Says:

    A ngaihnawm hle mai, mitthla tir lah min ngah hairehai :-) (Y)

    Ka blog a ṭangin kan kawnṭi ve ange aw :)

    N.Vanlaiphai ah AO pisa an enkawl tir ta a. N.Vanlaiphai ah chuan 1977 khan han zin ve in, ka pa (uncle)Kulh-a (Lalkulha, inchaichak) Sakawr, Pate-a! chu ka sakawr chung chhuan hmasak ber a ni ta a ni. N.Vanlaiphai supply tlangah te chuan Dakota thlawhna hian sipai ho ration tur parachute in a rawn thlak ṭhin a, a hmuhnawm kan ti ṭhin hle mai. Kulikawn atang pawh khan Reiek tlanga an thlak thlir thin mah ila, N.Vanlaiphai ah hi chuan bawnghnute ṭin (dut) tla darh te kha kan chhar ṭhin a, a nawm dan a dang khawp mai. E.Lungdar piah Leng khua ah kan zin a, an khaw kawng chu motor kal zen zen ni heklo le, kan kal pahin kan sam phei zel a, chutia kan chet vel naah chuan ka nau Sangtea chu hnim karah rei vaklo chu kan hlauh nghe nghe a ni.

    Leng khua kan luh dawn hnaih chuan, a khawmi ten motor thawm an hre pha tihah, ‘haw haw’ chungin motor an rawn hmuak a, a hmuhnawm hle mai. Zanah chuan petrol hnim tur ruk tum an tam a vangin, tlangval tlawmngai te chuan Mizo pa Sairawkherhin motor chu an veng ta nghe nghe a ni. Hetih lai hian an khawsak dan hmanlai Mizo ang mai kha a la ni ber a, Hrikhrah te pawh an la in Vam sak pek pek mai, thil dang pawh hmuh tur a tam ngei mai.

    http://henryvangchhia.blogspot.....-test.html

    Report this comment

  3. 3
    lr hlonchhing Says:

    La naupang hle mah ila, ka naupan chhiat zual lai a ngaihawm mang e. I ziak thiam lutuk (Y)

    Report this comment

  4. 4
    mamboihi Says:

    Va ngaihnawm thin ve aw.. (Y)

    Report this comment

  5. 5
    sheldon Says:

    Mahminga hi naupan lai nun a ngah hmel bik ee. Thil i hre rei thei ka ti, kei chu han sawi mai tur hi ka hre thin lo. A ngaihnawm e (Y)

    Report this comment

  6. 6
    ɪ̣uɪ̣pnoɥ Says:

    Ha ha ha… va ngaihnawm leh dawn êm. Chhiar hmain nui phawt ang.

    :-D

    Ka chhiar nghâl e.

    Report this comment

  7. 7
    ɪ̣uɪ̣pnoɥ Says:

    Ha ha ha! Ha ha ha! Va nuihzatthlâk leh ham ham ve… :-D:-D

    Report this comment

  8. 8
    saint sammoo Says:

    tha e…

    Report this comment

  9. 9
    CFL Says:

    Ka’n nuih huk chu a. A ngaihnawm kher mai. Lunghlui te pawh a tileng ve mai dawn alawm le. (Y)

    Report this comment

  10. 10
    caribou Says:

    Ziak thiam hle mai.

    Report this comment

  11. 11
    Eve Says:

    mahminga chu inla upa ve tawh hle mai…. ;-) panl ;-) ai nun a ti ve ta.. ;

    pu Hva naupan lai nen hian a in ang teuh rap!! ngaihhnawm ve ve ee… (Y)

    Report this comment

  12. 12
    drake Says:

    la chhiar hman lo a, luck loh zia zep tel tit tet leh em aw ;-) :-D

    Report this comment

  13. 13
    Dr Mahminga Sailo Says:

    Vawiin khan mi(sual) pakhatin jeep-a a chuan thu a sawi a. Ka lung a’n leng thut maw le.. ;-) @ Pu Hva.. I blog khi ka lo chhiar ngei ang, ka chhiar chak zawng tak..
    @ Eve.. Panlai nun hi inlak-young nan a tha ka ti riau.. :-)

    Report this comment

  14. 14
    LaMea CâcTùs FLh Says:

    Lung iti leng

    Report this comment

  15. 15
    JaKura Says:

    (Y)

    Report this comment

  16. 16
    Rinzova Khawlhring Lalhnam Says:

    Kawmen hi a lut thei em awww.test

    Report this comment

  17. 17
    Rinzova Khawlhring Lalhnam Says:

    Tin, heti hi a ni a. Sikul chawlhlawk/banlawk a thlen meuh chuan, sikul kal paha mi huan pal (mau phel) kan phawi ruk ngei kha kan thian pahnih pathum-in a rualin kan vuan a. Lirthei ri ang ni ngei kan hriat, chil phuan suah suaha hmui tuvu hlurh hlurhin, kan han vunnnn vunnn.. ta thin a. Hmui tuvu hlurh hlurh chunga, theihtawpa chaka han tlan phei kha chuan, hah a na thin asin. Thian thenkhat, khawpuia zin thang deuh leh lirtheia chuang zing deuh kha chuan a gear thlak nachangte kha an hria a, kan ngaisang thei teh a nia.

    ^^
    min lo enthla a ni lo maw!!

    Report this comment

  18. 18
    Dr Mahminga Sailo Says:

    @ K’u sheldon… Ka naupang rei bik em alawm mawl le.. :-D

    @ Rinzova… Min enthla zawk a ni chiang mai… (H)
    Ti ve khanglang ila, engkim hian hunbikte hi a lo nei ngei a ni.

    Report this comment

  19. 19
    Lamji Says:

    Mahminga hi ‘gari’ khalh uar lai khan a ‘dai rum’ thei raps an ti! :D

    Report this comment

  20. 20
    vakul Says:

    mahminga hi thingtlang naupang nun dai kim ve tak i ni a…kan inang.

    i lung a leng ve thin ngawt ang…dinhmun kha hniam zawk mahse.

    Report this comment

  21. 21
    Dinsa Says:

    Ngaihnawm hle mai, lung a ti leng tlat.. Kum Naupangte mahniila ka pa hnathawhna vanga kan khaw awmna in zir hek Motor chu kan ngaisang teh asin. Khang hun lai kha min ti hre chhuak Dr.Mahminga hi ka lung i ti leng ziah.

    Report this comment

  22. 22
    Dr Mahminga Sailo Says:

    @ Lamji… Motro lem hian high sikul ka luh thleng khan ka mit a la reng asin… (H)

    @ vakul… Ka ti mai mai thin. Tuna kan hnathawh leh awm dan hi chu mumang pawha ka man phak loh a nih rualin, duhtawk reng kan nei lo chu a ni si a. Thingtlanga panlai nun hlimawm, enghelh leh engto nei miah lova kan nun kha ka ngai vawng vawng thin…

    @ Dinsa… Motor kawng (lem) kan laih chawp ngeia, bungbu tur tur chunga chartin bung kan han nawr tawrh tawrh lai te kha, a ngaihawm thin.

    Report this comment

  23. 23
    chhangteval Says:

    Lunglengthlak reuh e. Naupan lai kha chuan mi motor number te kha kan lo chhinchhiah ve vak vak zel a :-P

    Driver nih hi ka thil tum hmasak ber ania, tun hnua ka thiante hnena ka sawi leh pawh hian an awih ngai lo reng reng; tet laia driver ka ngaihsan thin zia hre ve hek lo (H)

    Report this comment

  24. 24
    Puii Says:

    :-$ Motor kawng chu a bumboh awm? ;-) i pi tawng khur ta hial hial chu…? (Y)

    Lirthei ngaihsan lai tih lemah tunah pawh kan la ngaisang hle zel chu a nih hi… (U)

    Report this comment

  25. 25
    ahooma_ Says:

    A ngaihnawmin chhiar a va nuam thin em (Y)

    Report this comment

  26. 26
    lrpa Says:

    Pan lai tih hi ka hmang ngai reng reng lo a, a chhuak thar deuh emawni ka hmu ta zeuh zeuh a! :-)
    Naupan lai tui kan inchawi hlawh a, tin kan zawn a, chengkhat min pe a, duli duli kha an nei si lo a, chengkhat note kha ´inbun mai rawh u´ an tia, pawh bun kan tum uaih hman a..min rawn khap leh sia :-) Khaini bur chhin a te lam khat kha naia-sawm man vel ani ta in ka hria!

    Report this comment

  27. 27
    Dr Mahminga Sailo Says:

    @ Puii… Jeep-a kan chuanna kawng khi chhe ve tak a ni. Bakah, jeep tawng tawh phei hi chu, Mizoram kawngpui tha pangngaiah pawh a sawh na phian.. :-(
    Non-metal road (alkatra luan loh) kawng pangngaiah hi chuan a sawh a zia zawk mah. Lung (boulder an ti emaw ni? ;-) ) kuttum tiat pui pui an phah ngei maia Jeep tawng tawh lama chuan chu a nghawr dawt dawt a ni ber mai.

    Motor chuan thlakhlelh hrim hrim lai a ni a, kan chuang mai pawh a. Thingtlang mi tan chuan, kea kal a thlanawm mah zawk, a hahdam zawk fe (motor rui mi tan ngat phei chuan..)

    @lrpa… Buh phurin kan inhlawh thin. Buh tin khatah, cheng khat zel.. :-) TV en turin, TV neitute tui kan chawisak zeuh zeuh bawk.. :-)

    Report this comment

  28. 28
    Mx Says:

    Haha, a ngaihnawm hle mai a.. (Y) (D)

    Report this comment

  29. 29
    TuaiSialA Says:

    Suihlung i van tilêng ve aw…!

    Report this comment

  30. 30
    Pakak Says:

    lunglen thlak e..
    Tun thleng hian masi bazar nikhua hi chuan motor lem ka la lei ziah :-P

    Report this comment