The Unsung Hero – Pu JJ Waterstone

July 29th, 2012 7:00 am by Ignatia (33-115 AD)

Degree of freedom sawifiah hmasa ang

Physics lam zir miah lo hnena sawifiah a har thin fu a mahse sawifiah ka’n tum dawn ang e. Thil chet dan (mechanics) lam lo zir thinte chuan kan hre sa tawh viau ang. Mahse degree of freedom awmzia hi tunthleng hian Mizoram lama graduate zirlai leh master zirlai te’n min lo la zawt leh zeuh thin, hriatthiam mai a har a ni ang e…

Thil eng pawh hi a chet vaih chuan nihna (physical sytem) danglam a nei hmiah a. Chu a nihna thar chu thununtu a nei zel a ni. Entirnan: Kawng ngil takah Car I khalh ta a. Chu I kar khalh chuan a tlanchakna avangin thil thar a nei a ni. Chu a thil thar neih chu chakna a ni. Mi tu emaw han su palh vaih teh. An thih loh vek paw’n Civil Hospital casuality lam chu inti buai hle ang. I kut tumin na taka a hnek theih ai pawha na zawkin I Car khan mihring kha a hliam thei tlat a ni.

I Car-in chakna a neihtheihna chu engti zawngin nge kan teh theih ang le… A nihna takah chuan I car kha a chetsawn avangin chakna a nei a lo ni a. Chu a chakna chu hmu turin a kal thuizawng (spatial) chu hun hmanzat nen sem la, chuan I hmuhchhuah chu amah leh amah puntir bawk la, 0.5 leh car rihzawng nen han puntir leh ta la, a lo chhuak mai ang.

Car chakna hriltu chu a chetsawn theihna a ni mai tihna a nih chu. Chumi awmzia chu car chuan a awmhmun avanga a nihna neihtheih zat (degree of freedom) chu pakhat chauh tihna a ni. Hriatfiah a har tho mai thei. Hriatfiah piah lama pawm chi a ni zawk mah bawk. Degree of freedom hi a sawifiahna awl tak a ni a mahse a kawh tak erawh hriatsual a awl fo thin.

Engkim mai hi atom siam a ni tih kan hre vek ang a. Chu atom chuan molecule an siam leh a. Tin atom pakhat chauh pawh hi molecule a ni thei bawk. Chung ho chu monoatomic molecule an ti a. Noble element kan tih ho zawng zawng Helium, Neon, ldt., hi an ni vek a ni. Heng ho hi boruak (space)ah an awmin degree of freedom pathum an nei ve thung a ni. An neih dan chu zir lo tan sawifiah a har viau mai thei a. Pawl XI Mathematics zir tan chuan hriatchian loh tur a awm hauh lo thung. Engpawh hi boruaka (space) awm chuan a awmhmun sawifiah turin kil thum (3 co-ordinates) atangin kan teh a ngai thin a. A chhan pawh kil thum emaw hawi zawng pathumah a nihna (physical system) a insem tlat a ni.

Di-atomic molecule kan tih thinte erawh hi chuan a virtheihna (rotation) avangin nihna dang pahnih an neih belh leh a chuvangin degree of freedom panga lai an nei bik a ni. Chumi awmzia chu di-atomic molecule chet avanga a thazung  pek nat zawng hmuchhuak turin thil panga hawizawng inang lo thiau I mamawh dawn tihna a nih chu. A chiang em aw… Hriatfiah a la har mai thei. Hmaichhanah hrilh theih che ni ta ila I man viau tur a le…mahse a theih tlat si lo a nih hi.

Sawi lut tan dawn teh ang aw

Chhingte-ate awmna Delhi chu a lum hle mai a, chutih lai chuan ka awmna khua erawh hi chu a nuam ham ham hle mai. Kan chhehvel awmdan hi a siamtu (gas) hian a hril tlat a. An nihphung a zirin a danglam thin chauh zawk a ni. Chutiang zichianna chu Kinetic Theory of gas an ti a. He tah hian temperature (lumna) leh pressure (nekna) chu molecule nihna hmangin an sawifiah ta a ni. A nihna takah chuan lumna leh neknate hi lakhran theih miah lo inhne reng an ni a. Gas lamah phei chuan an chakna pawh a ni reng a ni.

Kinetic Theory of gas intanna tak hi a la rei lo hle a. Mahse a bulthutna tak erawh a rei ve tawh viau. Pu Boyle-an kum 1662-a a thil hmuhchhhuah, ama hminga a phuah Boyle’s Law atang daih tawh khan a lo intan tawh a ni. Chuan Pu Fourier-a te, Pu Carnot-a te, Pu Helmholtz-a te, an lo lang ta zut mai.

Kum 1857 a lo ni meuh chuan Pu Clausius-a chuan gas hian tuihnang (fluid) aiin an chet natna avanga tha an neihna hi a tam zawk a ni tiin paper a publish ta hmiah mai le. He hi Kinetic (chetna avanga chakna) lam zawnga thil lum leh vawt (heat) zirna a lo hring chhuak ta det det mai. A hma zawng zawng chuan Pressure (nekna) leh Temperature inlaichinna bak an buaipui ngai lem lo. Mihring tan hmasawnna turu lutuk a va ni em!

1860 a lo herchhuah meuh chu Pu Maxwell-a chuan Royal Society lamah paper mak dangdai tak a thehlut leh ta keuh mai. Chu thil chu engdang ni lovin Pressure, Temperature leh Kinetic Energy inlaichinna a ni tlat mai.  Sawi tawh angin kum 1857-ah Pu Clasius-a khan Kinetic Energy lam hawi a lo sawi det det a. Mahse ani khan Maxwell-a ang em emin a hre ril lem lo. A hnu lawkah Pu Maxwell-a vek hian kinetic Theory of Gas innghahna lungphum tur a lo lai chhuak ta. Chu chu Laws of equipartition of Energy  tih a ni. Endiktue’n an hrethiam lo viau a mahse Pu Maxwell-a paper a nihna avangin a publish ta hram a ni awm e.

Laws of equipartion of energy-ah chuan gas emaw engpawh boruak (space)ah che ta se a energy neih tam zawng kha degree of freedom pakhat zelah 1/2KT a nei tihna a ni. Heta K hi Boltzmann constant a ni a, number a ni, tin T hi temperature a ni ve thung. He law hi Gas leh a kaihnawih zir nan chauh ni lo Solids (gas aia sakhat zawk) zir nan pawh alo hmantlak zel a. Thil tangkai lutuk – Scientific discovery turu lutuk a va ni teh lul em! Quantum theory of Solids kha Pu Einstein-a khan bul a tan a. Mahse ani pawh khan he law hi a hmang tho a ni. Pu Maxwell-a thilhmuhchhuah hi vanhnuaia leng hring fate tan hian lawmawm em em a ni.

Mahse mahse…

Mahse maw thu lungchhiatthlak lutuk a awm tlat mai. Scottish chhulchhuak kum 1811-a piang mathematics thiam hmingthang leh Heat (lumna) lam thiam tak Pu Sir John Leslie zirtir Pu JJ Waterstone a hi mawle… Amah hi a pu ang bawkin Mathematics leh Heat lam a tui hle mai a. Scotland leh a chhehvela kum engemaw ti zat a awm hnuah kum 1839 khan East India Company hnuaiah Naval Instructor ni turin ka vangkhua hi a lo thleng ve ta a. A awmchhung hian Bombay-ah deuh hlir hian a awm thin a ni awm e.

Ani hian kan sawi tak Pressure, Temperature leh Kinetic Energy inlaichinna an neiin a hre tlat mai a. Chu mai a la ni hlei ne’m Pu Maxwell-a hmuhchhuah Equipartion of Energy pawh a ngaihtuah chhuak hial a ni. Chuan a thil ngaihtuahchhuah chu a han ziak ve ta a. A ziak zawh meuh chuan kum 1845 a lo ni der tawh mai. Chuan Bombay atang ngeiin Royal Society lamah a paper chu a thawn ve ta a. Pu Clasius-a aiin kum 12 zetin a hmasa zawk tihna a nih chu. A nihna takah chuan Pu Clasius-a paper engah Pu Maxwell-a khan Kinetic theory of gas leh a inghahna Equipartion of energy kha a hmuchhuak ve chauh zawk a ni. Pu Maxwell-a hmuhchhuah kum kha 1860 a ni a; mahse Pu Waterstone-a khan kum 1845-ah daih a hmuchhuak tawh. A nih chuan kum 25 zetin an inthlau tihna a nih chu.

Thildang ka lo sawi leh hman a ni maw…

Chuan Pu Waterston-a paper duhawm tak – Kinetic Theory of gas lo chhuahna tur leh a ingahna lungphum turu lutuk Equipartition of energy  ziakna chu ROYAL SOCIETY OF LONDON lam a thleng tih kum 1845 vek khan a hre thei ta a. A lawm kher mai. A paper chu chhuak tlak a nih leh nih zirchiang turin endiktute (Referee) an inpung khawm ta. Mahse Pu Waterstone-a thil ngaihtuahchhuah leh a mathematics-te chu an hriatthiam pui loh piah lamah tuman an pawmpui lo va. Kinetic theory ang zawnga thil sawifiah kha a hun lai chuan thil mak a ni dawn reng a ni. Endiktute zing ami Mathematics thiam leh mi chal lang tak Pu Sir John William Lubbock phei chuan deusawh takin ama paperah ngei chuan paper awmze nei lo tak a nihzia a ziak nghe nghe a ni. Chuan chu paper chu archive lama paper publish tlakloh an dahnaah an dah tha ta hmiah mai le.

Royal Society pawi tihna chu

Kum 1883 khan Kinetic Theory of Gas lama sulsu tu mi ropui tak mahse tu khawkha in an hriat tak loh Pu Waterstone-a chuan rihsang min lo kai san ta a. Mahse kum 1891 khan a paper chu an archive lama paper chhuahtlakloh  an dahna atangin an hai chhuak leh ta tlat mai. A haichhuaktu pawh hi tu dang ni lovin Pu Lord Rayleigh-a, Rayleigh Law Scaterring hmuchhuaktu ngei kha a ni.  Mahse maw engmah awmzia a awm thei tawh lo. Pu Waterstone-a pawh kum 8 zet lei hnuaiah a mu tawh, phengphe khua a tlai zo ta…

Pu Rayleigh-a kha Royal Society lama Secretary a ni nghe nghe a, pawi a ti em em a ni. A hunlaia endiktute’n an hrethiam lo kha mak a tih rualin mak a ti lo bawk. A nihna takah chuan Pu Maxwell-a paper pawh kha a endiktu te’n an pawmpui vak lem lo mahse Maxwell-a khan kuthnu a lo ngah tawh em avangin an publish sak chauh zawk a ni.

Newtonian Mechanics hi Relativistic Mechanics lamin a lehlan ang deuh hian kan sawi tak Pu Waterstone-a thil hmuhchhuah hi Scientific breakthrough pawimawh lutuk a ni. A paper chu chu zahtak leh pawi ti tak chungin a hunlaia mithiam te’n a huhovin an zir tha leh a. Kum 1892 khan Royal Society chuan a thiltihsual hre reng chungin a publish sak ve leh ta a ni.

Pu Waterston-a hian Bombay Grand College ( Medical College) lama a khawsak laiin tuna kan sawi tak paper hi a ziak a. A sulhnu Wilson College (Bombay) lamah hmuh tur a awm nual bawk. Tun hnai atang khan TIFR hnuaia Homi Bhabha Institute of Science Education chuan India rama a awm lai chauh ni lovin ama chanchin hrim hrim hi an zirchiang (research) mek a ni.

I dawn ve ngai em?

Tualvungi leh Zawlpala-te dawtthu leh hmelma avanga inthen khan i thinlai a fan ve thin em? Khawvelah hian inbumna, inphatsana leh inhnawlna hi a duhawm ngai reng reng lo. Inhnawlna (rejection) phei hi chu tiarthiam har tak a ni. Pu Waterstone-a paper hnawl a nih reng laia Pu Maxwell-a paper pawm a nih hi amah hian engtin tak tuar ve ang maw. A na vawng vawng viau ang le. Mahse Isua hian vawikhatmah min hnawl ngai lo. Kan lawmman lak tur pawh min dahsak diam a ni.

Mite aia hre zawk ni mahse a vanduaina avanga tu mah hriat tak loh hi amah ka ngaihtuahchhuah apiangin Pu Robindranath Tagore-a hla phuah Unsung Song hi ka hrechhuak ve ziah thin.

The song that I came to sing remains unsung to this day.

I have spent my days in stringing and in unstringing my instrument.

The time has not come true, the words have not been rightly set;
only there is the agony of wishing in my heart.

The blossom has not opened; only the wind is sighing by.

I have not seen his face, nor have I listened to his voice;
only I have heard his gentle footsteps from the road before my house.

The livelong day has passed in spreading his seat on the floor;
but the lamp has not been lit and I cannot ask him into my house.

I live in the hope of meeting with him; but this meeting is not yet.

                       

Ka lawm e.

 

 

 

Similar Posts:

Recent Posts:

38 Responses to “The Unsung Hero – Pu JJ Waterstone”

  1. 1
    lr hlonchhing Says:

    1st ma1 ma1

    [Report abuse]

  2. 2
    lhpa Says:

    Ciar leh keuh2 teng. :-[

    [Report abuse]

  3. 3
    saint sammoo Says:

    devition ka neih zawh ah ka chhiar mai ang…

    [Report abuse]

  4. 4
    Hope Says:

    Bengvar leh ta sawt mai….. (Y)

    [Report abuse]

  5. 5
    drake Says:

    hnap lo tawlh kan han sut chho leh hi a speed chak ve fu lo maw Pu ignatia :-D

    [Report abuse]

  6. 6
    Tete-i Says:

    Good post (Y) … Hetiang hi ka chhiar duh chi..a ngaihnawm khawp mai.. Waterstone-a chu hah taka buatsaih a paper an hnawl sak chuan a rilru a na ve ngawt ang le… Chuan Rabinranath Tagore-a hla khi a rhyme a nalh ka ti….
    Good morning and have a bless sunday to you all…

    [Report abuse]

  7. 7
    Kawhterenga Says:

    He post sei tak chhiar zawhnan hian minit engzah chiah nge ka hman le? (Y) Ka reading speed pawh ka hre thei mai lo ;-)

    [Report abuse]

  8. 8
    lr hlonchhing Says:

    A ngaihnawmin, a va han tha tak em! Hetiang lam hi han ziak vak vak teh.

    Atom ringawt pawh hi zir tham leh ngaihnawm tham a ni a, an zir a, an hmuchhuak reng bawk. Matter reng reng hi, atom in a siam a ni tih kan hre theuh awm e. Matter kan tih hi, thil engpawh mass nei leh hmunawl luahkhat thei tiin kan zir thin a nih kha.
    Dalton phei chuan, “Atom is the smallest indestructible and indivisible particles” a ti nghe nghe a. Mahse, thiamna sang zelah atom smashing machine hmanga mithiam ten an han khawih dere tak tak mai chu, atom chhungah proton neutron te an la awm a, electron ten an la kal hual tih hmuhchhuah belh a ni ta a ni.
    Chuan, matter reng reng million and millions of atoms emaw molecules(group of two or more than atoms) ten an dinchhuak ta a nih chu.

    Ka insawi-buh nuai mai, han sawi ve ka duh si a.

    [Report abuse]

  9. 9
    lr hlonchhing Says:

    @Tete-i welcome back…
    Stay here, stay with us…

    [Report abuse]

  10. 10
    PKfanai Says:

    A bengvar thlak hle mai. (Hrethiam pha vek lo mah i la) Good post (Y)

    [Report abuse]

  11. 11
    drake Says:

    #8 hlawnching it doesn`t matter hian engzah nge a ken etawms chu :-D :-P

    [Report abuse]

  12. 12
    maawma Says:

    Ka chhiar chhuak vek, ngaihnawm khawp mai, mahse ka tan chuan han hlawk pui na tur vak a awm lem lo.
    Mechanical lai vel chhiar a ka rilru a lo lang daih chu, Sana (Clock) pendulum hmanga hun rawn ti lang thin, mahse pocket size a hman thei tur a Balance leh balance spring hmanga Pu Patek Philippe in a rawn thlak daih thiam hi ngaihsan awm ve khawp mai. Sana hi Mechanical Engineering marvel an tih pawh hi a awm khawp mai.

    [Report abuse]

  13. 13
    lr hlonchhing Says:

    @Drake, “it doesn’t matter” hian engzat atom mah a keng lo. Ka hriat zawng chu, “drake” or “brake” pakhat a ni. :-D

    [Report abuse]

  14. 14
    Kawhterenga Says:

    Vacuum-ah hian eng ATOM mah zu han awm hlek lo a :-O
    Thlarau hi Atom siam a ni ve tho ang em? :-P

    [Report abuse]

  15. 15
    drake Says:

    #13 hlawnching i hre tlem em mai :-D Hnap hi hnit in nge a dawk sut let in speed chak zawk i hria em :-D :-P

    [Report abuse]

  16. 16
    Ignatia (33-115 AD) Says:

    In comment a ngaihnawm hle mai. Misual.com lama chhuah chi a ni ang em tih ka ngaihtuah nasa a. Mahse misual lama lut pha chin chu mi fing tak tak – intellectual tak tak vek in ni bawk a, comment pawh a ngaihnawm hle mai.

    Engkim hi atom siam ka ti tawp nangin khi khi ka ziahna eng min lo thlir sak a pawimawh viau ang. Popular SCience article anga ziak ka ni tlat a, chuvang chuan a tlanglawn thei ang bera ziak a ngai a ni.

    A nihna takah chuan kan chhehvela thil awm zawg zawng hi particle tereuh te tein a siam vek a ni a. Chung particle chu hlawm lian pui pui an then leh a. Pakhat zawk chu FERMION a ni a, tah chuan electron, proton, neutron, muon, tau, hyperon, ldt., an awm. Fermion hian spin half integral an nei nghe nghe a nih kha. Tin a dang leh chu BOSON an ti leh a. Boson hnuaiah chuan nuclear energy siamtu meson leh tha chakna petu (force field) zawng zawng hi an awm ve leh thung a. Anni hi chuan spin hi integral an nei thung a ni. Chuvang chuan atom han tih tawp kha a thelh deuh tlat a ni.

    [Report abuse]

  17. 17
    Ignatia (33-115 AD) Says:

    Pu Kawhtehrenga zawhna (comment number 14na) khi kan chhang ve ve dawn teh ang. Sawina hun remchang takte pawh a ni ang :

    1) Vacuum-ah hian eng ATOM mah zu han awm hlek lo a : Hei hi a word origin leh hmanlaia an hman dan nen ngaihtuah chuan i thuziak hi a dik chiah a ni. Latin atangin vacuum tih hi lak a ni a chu chu vacuus a ni. A awmzia chu ‘engmah awm lo kawrawng vek’ tihna a ni mai. Mahse khawvelah hian hetiang ang vacuum hi khawi laboratory ah mah an siam thei lo tlat mai. Hmanraw tha ber ber paw’n vacuum diktak hi siam tum mah se an thei lo. A chhungah atom a awm zel tihna a nih chu. Ultra High vacuum an tihah pawh hian 100nanopascal vela sang nekna a la awm tho. Chumi awmzia chu vacuum-ah hian atom an awm zel tho tihna a nih chu. Tin, vacuum chhungah chuan atom lo awm lo thei pawh ni se la quantum theory hmangin vacuum fluctuations, dark energy nei a la ni cheu a chuvang chuan atom awm lo anga ngaih hi a dik chiah lo.

    2)Thlarau hi Atom siam a ni ve tho ang em? : Science-ah hian physical parameter nei chi chauh sawifiah a ni a, pawm a ni. Entirnan : I lehkha ziakna pen kha a rihzawng i teh thei a, a sei zawng pawh i teh thei bawk a ni. A rih zawng leh a sei zawng chu physical parameter a ni. Mahse thlarau kan tih fo erawh hi chuan engmah chutiang a nei lo. Khawihtheihloh leh hmuhtheih loh a ni miau a. CHuvangin Science hian Thlarau awm hi a ring lo reng a ni. Sakhuana pawh a sawifiah ngai lem lo.

    [Report abuse]

  18. 18
    Nguntang Says:

    A ngaihnawmin, a bengvarthlak khawp mai. Temperature, pressure leh kinetic energy an in relate dan sawifiahna awlsam ber chu ‘Liquefaction of gas’ niin ka hria. Chu chu meitalh(lighter)ah hian a chiang leh zual.Gas molecules inkarah hian hmunawl a awm ve a, chu chu ‘Voids’ tih a ni a. Voids chu 10^-15cm aia a zim chuan gas chu liquid form/state-ah a awm thin. Meitalh pawh hi temperature hniam te, pressure sang taka siam a ni a. Pressure a san khan kinetic energy a lo tlem a, gas molecules inkara awl awm kha a tlem ta a; gas ni si,tuiril angin kan hmu ta ni. Meitalh hi a temperature kan tihsan( meia rawh emaw mei bul hnaia dah) chuan kinetic energy a lo sang ang a,gas molecules che vel chuan meitalh kha a tawnpuak pawp mai dawn a ni.

    [Report abuse]

  19. 19
    Sangpuiipa Says:

    Thil reng reng hi atom in a siam a ni a, thlarau pawh chu atom siam ni ve awm tak ania. :-D ;-)
    Science thiamna ropui tak tak te en leh chhiar chang hian, engkim siamtu, Atom thleng pawha siamtu kan Pathian Ropui zia hi ka rilru ah a lo lut teh tlat a.

    [Report abuse]

  20. 20
    lr hlonchhing Says:

    @Drake, hnap hi a dawk sut let aiin, hnit chhuah hi a speed a chak zawk.
    Fluid leh liquid reng reng a kaw te atanga, a kaw lian lama an han chhuah chiah hian pressure a sang a, a chak ta thin a ni. I hnap i hnit reng rengin, chelh lova i hnit ka ring lo. I han hmet phek a, pressure na takin pawn lam zau zawkah i han blow chhhuak a. Chak fat fat tak a ni. I hnap dawk chu chelh miah lovin, i sut let a. I hnit aiin a speed a muang ta zawk a ni.

    A dik em Pu Ignatia?

    [Report abuse]

  21. 21
    lushai_er Says:

    A tha e, rawn “RECITE” zel rawh…..mizotawnga hrilhfiah i tum chuan i hahthlawn ang ;-)

    He lai RCC Beam hian 6 degree of freedom a nei zu nia… :-P

    [Report abuse]

  22. 22
    drake Says:

    haaahaha hlonchhing leh :-D i ti dik ang

    [Report abuse]

  23. 23
    donald Says:

    Ignatia, a ngaihnawm hle mai. I comment chhunzawmna te khi a ngaihnawm ka ti hlei hlei (Y) Zirsang naran nilo, i thil zirah i belin thiamna tak tak i nei tih hi a chiang thin ngawt mai. A hlu ka tih ber mai chu i thiamnate midangte tana, mahni hlawkna chu sawiloh, hreawmna leh harsatna kara i hlanchhawng thin hi a ni.

    Science-ah hian physical parameter chauh nei sawifiah i tih lai khi han sawi zau deuh la ka va ti em! Energy lam te hi science chuan a sawi tam viau mai si a, thlarau kan tih nen hian inlaichinna an nei thei ang em? Entirnan kan kut kan tih chhet theihna chu thluak/nervous system a lo ni ta a, mahse chu’ng rawn khalhtu chu ngaihtuahna a nih hmel bawk si a. Ngaihtuahna/rilru hi thlarau tiin sawi ta ila, mihring min khalh tu ber a ni bawk si a, energy chikhat a ni thei ang em?

    Thil kan sawi hian ri fawn (sound wave) angin boruakah a kal a, midangin an lo hriat khan an lo dawnsawn dan azirin an chezia leh nihphung a influence thei tlat bawk a. Ri (sound) hi energy a ni ve tho em ? thlarau tia sawitheih a nihna chhan chu Lal Isua khan ‘in hnena ka thusawi hi thlarau leh nunna a ni’ a ti tlat mai a; thlarau chu physical parameter nei lo, thiltihtheihna/chakna thahrui nei a nih si chuan energy chikhat tiin a sawi chi ang em? Dark energy te pawh a awm tho a ni awm a, Holy energy tih ve mai chi te a ni khiah lo maw le..!

    [Report abuse]

  24. 24
    lr hlonchhing Says:

    Drake, dik lo mai thei bawk :-P

    [Report abuse]

  25. 25
    donald Says:

    Thiamna tehna pakhat nia ka hriat ve mai mai chu, tawngdanga an zir mizo tawng ngeia an sawifiah thiamdan hi a ni.

    [Report abuse]

  26. 26
    Ignatia (33-115 AD) Says:

    Pu Lr: I thil sawifiah khi a thuphung chuan a dik thei ang. Law hmasa ber Boyle’s law kha i hmang a ni, mihring hnarkua kha dawt (tube mahse inlen hleih) anga i ngaih chuan.

    Pu Nguntang: A very good illustration. Phase diagram – P, V leh T khan concept chu a hawlh chhuak tha khawp mai.

    Pu Lushai: E khai, ka fiamthu mai mai a nih kha. I post thenkhatte phei hi chu ka duh thei lutuk a ka save hmak hmak zel a nia aw.

    Nia, mizotawnga sawi thiam a har a mahse Mizo zirlaite hi an taima lo a term hran hrante hi an lo hre lo leh thin a. Chuvang chuan mizotawnga sawi hian a awmzia ber mai. Vai thiante hi an awhawm ka ti thin. Anmahni tawngin lehkhabu an nei bik a. Tlem tlemin mechanics lam chu ka let ve bek bek e, duhlian tawngin. Tawngkam thar pawh phuahchawp a ngai hial.

    Pu Donald: Tawng fimkhur a va ngai thin tak em tiraw. ;-)

    Kan chhang chhin dawn teh ang che. Science-ah hian physical parameter nei chin chiah pawm a ni tih hi pawm a har viau mai thei. Nia khita i sawi angin dark energy pawh a awm a ni. Mahse dark energy pawh hi a nihna takah chuan dark matter avanga lo awm a ni a. Kan universe za zelah 70 vel hi dark matter niin an ngai. Dark matter hi hmuh theih a ni hauh lova mahse a awm ngei a ni tih hi a hriattheih tlat a ni. A chhan chu Big Theory sawifiah dawn leh tuna kan universe expand zel sawifiah dawn hian a lo lan a ngai tlat. Chumi awmzia chu ama physical parameter chu a influnce neihte physical parameter hmangin kan nei thei tihna a nih chu. A nihphung leh awmdan miin an hmuchhuak teuh tawh a ni.

    Sound-te phei hi chuan physical parameter an nei a lawm. Sound hi a lo awm theih chhan chu boruaka awm particle te kha an chet vang a ni a, chu che a chu waves angin a awm ta thin a. Waves chu a inthen dan thlengin kan hre thei a ni. Particle kal thui zawng leh a momentum kan hriat chuan a chakna – energy zawng zawng pawh kan hre thei a ni. He lai hi quantum mechanics innghanna lai tak a ni bawk a. Sound hi energy nei a ni a, hna pawh a thawk thei. Beng pawh a ti chhet thei.

    Khi laia ngaihtuahna i tih tak khi lawm physical parameter nei ta lo chiah chu. Kan thluak vela hriatna lo chhuah theihna hi chuan physical parameter a nei a. Mahse kan ngaihtuahna hi chu mihring hian rinthu bakin a predict thei lo reng reng.

    Tin physical parameter nei tawh phawt chuan energy an nei thei vek a ni. Mahse thlarau hi science lamin a sawifiah thei lo, physical parameter a nei lo miau a. Chu chauh pawh a ni lo thlarau awm hi science hian a ring ngai miah lo. Science hmanga Bible thurin chin leh vak vak phei chu tih chi loh cult lam rawngkai diktak a ni mai. :-)

    [Report abuse]

  27. 27
    Lamji Says:

    Hriatthiam tum takin ka chhiar a,ka hrethiam nge ka bo tulh tulh pawh ka hre lo! :) A ngaihnawm..ti phawt mai ang. Donald comment leh a chhanna a bengvarthlak. (Y)

    [Report abuse]

  28. 28
    Tete-i Says:

    # 25 Donald comment khi ka (Y) e…:)

    [Report abuse]

  29. 29
    donald Says:

    A lawmawm e Ignatia… chuan energy hi matter tello chuan a awm thei lo tihna a ni ang em? ngaihtuahna pawh hi mihring taksa (matter) a awm loh chuan a awm lo ve mai chu a nih hmel a [Sam 146:4]. Ngaihtuahna a awm loh hnu pawha thlarau a la awm si chuan thlarau leh ngaihtuahna hi chu thuhmun han tih ngam chiah chu a ni lo maithei e.

    Science chuan physical parameter nei lo ngaihtuahna ang chi te a sawifiah thei lo a nih bawk si chuan, a aia la chungnung thlarau lam chu sawifiah ngaihna a la awm rih lo a nih ber tak chu tiraw..!? I sawi ang hian ni e, Science hmanga Bible thurin chin leh vak vak hi a atthlak thei viau mai. Thenkhatin thlarau chu energy an ti bur mai phei chu a zia lo deuh a ni. Thlarau hi energy a nih chuan a pechhuaktu chu matter a nih leh hmel si a, Pathian chu matter tia conclusion siam chu a mawlmang leh viau bawk si.

    [Report abuse]

  30. 30
    Ignatia (33-115 AD) Says:

    Pu Donald: Ni mai e, physical parameter nei lo chuan energy a nei ngai lo. Bible pawh hi fimkhur taka thlir a ngai thin reng a ni, science thiamna eng hmanga thlir hian diklo pui pui hi a awm nual a, chuvang chuan tih hlek loh a tha.

    I sawi ang khian Thlarau chungchang hi Science hian a sawifiah ngai lo, a theih miah loh a ni. Thlarau energy anga ngaih phei chu a nuihzatthlak lutuk. A thiam ho bulah phei chuan sawi chhin eih loh tur a ni.

    High Sikul Science Teacher inzawmkhawm pawhin kum zabi liam ta khan Thlahrang a awm lo a ni tih an prove kha! Ka hriattirh chuan Science teacherte kha mak ka ti khawp mai a, mahse tunhnu hian an science thiamna a lo ril ka ti khawp mai. Khami tum pawh khan mi pakhatin an lovah ramhuai a awm a tia. Chu chu a nih tak tak leh tak tak loh finfiah turin an riahchilh ta a. Zan khatnaah chuan engmah an hre lova mahse a zan hnihnaah chuan thawm dangdai tak an hre ta a. An va kal hnai a mahse Uchang chi khat hi ruah sur laiin an lo inchithlah thin hi a lo ni a. Chumi an inchithlah pah chuan thawm chi hrang hrang an siam thin a. Chu chu ramhuai emaw tiin lo neitute khan an hlau ta a ni. Ka sawi tum tak zawka chu Ramhuai a awm love ka tihna lam a ni lo va, science principle avanga ramhuai awm an rinlohna kha a ni.

    Chutiang zelin ramhuai ka hmu tia miin an sawi zawng zawng pawh hi taksa hrisel thatlohna anga leh a physical system-ah science chuan a puh zel mai a ni. Chuvang chuan Thlarau hi energy a ni awkawng lo tihna a nih chu….

    [Report abuse]

  31. 31
    donald Says:

    Ignatia

    I tanhmun chu ka hrethiam e. Science lam zir thui ve vak lem lo te hian thahnemngaihna avangin Bible leh Science hi harmonize an tum sateh thin a, engemaw chenah hlawhtling angin lang thin mahse, dik tak chuan intellectual circle-ah hi chuan a tla na lem lovin, thil siamthat aiin pawi a khawih mah zawk hian ka hre thin.

    Mihring thiamna leh hriatna hi a famkim hunah chuan science leh Bible hi a la inrem thlap ang tih ka ring. Mahse tunah rih hi chuan an thlenna tur hi thuhmun pawh nise, an kawng ve ve hi chu a la inpersanin, a la kualkawi rih viau dawn niin a lang.

    [Report abuse]

  32. 32
    chhingdailova Says:

    A va khawngaih thlak in a va uihawm ve aw. Mahse, Degree of Freedom chu ka man pha meuh chuang lo…..hehehehe

    [Report abuse]

  33. 33
    lrpa Says:

    Bengvar thlak khawp mai.

    [Report abuse]

  34. 34
    houdini Says:

    E! A va bengvarthlâk ve…

    Popular science lamah pawh mi hlawhtling tak i ni dawnin a lang, i ngaihpawimawh peih chuan.

    Sâp á¹­awnga mizote’n popular science kan lo ziah ve chiam hi a á¹­ul lo va, a chhan chu, sâp á¹­awng chuan chhiar sen loh lei tur a awm sa.

    Chuvangin kan ṭawngkam hi la hausa tâwk lo mah sé, hetia ṭan in lâka in ziah sauh sauh chuan kan ṭawngkam pawh a ṭha chho ve zël mai dawn a ni. Mizo ṭawngin a daih lo tih reng ringawt ai chuan, phuah belha sawifiah bawrh bawrh hi a chhenfâkawm zâwk.

    Sâp á¹­awnga kan lo ziah ve khanglang hi chuan tukhawkhain an chhiar peihin ka ring lo ve… Mizote hnêna hrilhfiah kan tum chuan mizo á¹­awng ngeiin… tichuan kan á¹­awng a lo hausa chhawm ve zël mai dawn a ni. Kan á¹­awngin a daih lo ti chatuan lo turin á¹­an kan la thei.

    Tin, i rawn sawifiah á¹­ha khawp mai; mizo á¹­awngin a sawifiah theih tih i rawn pholang… (Y)(Y)(Y)

    [Report abuse]

  35. 35
    Charice_mizo Says:

    Van ngaihnawm kher ve le…ka khamlo hle mai, Arts student mah ni ila political theory leh philosophy te hi peng tin kiltin atang kan zir ve thoa, scientific epistemology leh rational principles tel lo chuan kan Professor te pawn an sawifiah hleithei lo..chuvang tak chuan alawm science, abikin modern science hi ka ngaihsan em em, Newton’s laws of motion atanga liberation theory an han hrilhfiah te hi pui tak a ni…entirnan Is the idea of ‘Universal’ possible? tih chu ‘Is universal made up of particulars?’ ( popular science ah chuan particles tlukpui aniang chu) tih atang sawifiah alo ngaia…chu chuan structures leh systems lam hrilhfiahna a phut nghala, chutiang zelin thildangah pakai alo ngaia…sawi duah lo mai ang..

    Royal Society in Pu Waterstone-a thil hmuhchhuah an hnawl sak vang hian mihringfa (humankind) ten pressure, temperature leh kinetic energy inlaichhinna pawimawh lutuk kan varpawhna tur kum 25 zetin kan tlaiphah tihna alo ni reng anih chu, tin energy leh a behbawm (post+comments) vel chungchang pawh a bengvarthlakin rilru a hruai peng thei viau mai….

    Science tawngkam hi mizo tawnga dah a har takzeta, pawl sawm ka zirlai hian Renewable Energy Day denchhenin Nizung chakna hman tangkai dan tih Essay Competition ah ka tel ve tawha, mizo tawnga physics sawifiah tum chu har talh talh tak a ni, entirnan solar cell panel, space vehicle, solar thermal, biomass, tidal energy, photosynthesis etc kha mizo tawng vekin thiam ang tawkin ka dah ve a, First Prize ka lak phah ve ngei tawh, ka’n insawithei lawk anih chu hehe..

    PS: science hi chu ka zir chak em em ka thluakin a phakloh ania, mahse a interesting takzet, Ignatia rawn ziak zel teh (Y)

    [Report abuse]

  36. 36
    Mx Says:

    Post leh comment te chhiar a manhla in a bengvarthlak khawp mai (Y)

    [Report abuse]

  37. 37
    Mr.Fanchun Says:

    Bengvar thlak hle mai a! (Y)

    [Report abuse]

  38. 38
    Ignatia (33-115 AD) Says:

    Heta kan sawiho – Heat and Thermodynamics hi Industrial Revolution lo chhuahna bul a ni. Science khawvelah chauh ni lo khawvel history-ah hun leh hmun pawimawh tawpkhawk a chang a ni. Kum 1750 atanga 1890 chhung kha dai tawh ngai lo tur – Industrial Revolution hun a ni. Industrial Revolution malsawmna dawngtu kan ni a, Industrial Revolution awm hmaa khawvel awm dan a taka tawngtu kan ni lova a pawimawhna leh a hlutna kan suangtuah thiam lo viau mai thei. A hun laia hetiang lam hawi zawnga thiamna intlansiakna a nasatzia pawh a turu viau a ni.

    Comment a ngaihnawm a, a DECENT em em bawk.

    [Report abuse]

Leave a Reply

You must be logged in to post a comment.