Hnam Sakhua bihchianna

July 24th, 2012 7:00 am by donald

“Mizoram hi Mizo nihnain kan luah tur a ni. Pathian chu khawvel hnam tinrengte hnenah an hnam nihna ang theuhvin a inpuang thin; keini Mizote hnenah pawh Mizo hnam kan nihna angin a inpuang.”

Hei hi NUNNA LALCHHUNGKUA te’n an tlangaupui thupui a ni a, misual.com-ah hi chuan Hnam Sakhua tiin kan hre lar zawk awm e. NUNNA LALCHHUNGKUA-te hi atir chuan Lal Chhungkua tih an ni thin a, amaherawhchu pawla hruaitu dinhmun inchuhna leh chhan dang eng emaw neuh neuh avangin April 1986 khan an pawl hi a phir ta a ni. Lalchhungkuaa hruaitu nihna chelhtu mektu Pu Thangluaia leh a hote chuan an pawl thil neih zawng zawng an nei vek a, pawl kaldan tura an lo ruahman angin an kal zui ta zel a. A lehlamah Pu Rorelliana leh a hote chuan NUNNA LALCHHUNGKUA invuahin pawl thar an din ve ta a ni.

Pu Rorelliana hi October 1, 1947 khan Biate khuah a piang a, a pa chu Pakunga a ni a, a nu chu Rualchhingi a ni. Kum 1966-a Biate-a hlimna lo thlengah khan a lam tan a, 1969 vel atang khan rawngbawl turin a thianpa Saia nen an kal chhuak a, Kohhran pawhin urhsun takin an thlah a ni.

Zirna lamah thleng sang lo mahse, talent tha tak a neih avangin a zinna velah leh a telna pawlah reng reng hotu a ni zel thin. Lehkhabu chi hrang hrang ziakin hla pawh tam tak a phuah tawh. Senior deuhte chuan kan hre pha anga, ama hova an siam “Chhiahhlawh Chhaw” drama phei kha chu a lar hle a nih kha.

Kum 1974 vel thleng khan Presbyterian Kohhranah rawngbawlna a nei a, 1976 vel atang kha chuan a thu zirtir leh Kohhran zirtirnate an inkalh tak avangin Kohhranin a ruai zui ta lo. 1981-ah phei chuan ama lawina Kohhranin a phuar a, chuta tang chuan Kohhran a chhuahsan fel ta a ni. Hemi hma kum 1978 vel khan mithenkhatte nen pawl an din a, Mizo Evangelical Association (MEA) an invuah a.

MEA-ah chuan an chairman a ni a, an thu zirtir tlangpui chu heti ang hi a ni:

1) A tirah chuan mihring hi Pathian anpuia siam kan ni a, mahse mihring nihna zawng zawng chu paihthlain Pathiana siam kan ni ta an ti. Pathian kan nih chinah hremhmun chu kan hnen atanga lak bo a ni tawh an ti bawk.

2) Pa ramah kan cheng tawh a, Lal Isua pawh anmahniah a lo kal tawh an ti.

3) Pa leh Fapa leh Thlarau Thianghlim hunbi a tawp tawh a, Krista leh thlarau la beisei tute chuan an hnena Pathian awm reng chu an hawisan a ni an ti.

4) Kristian Kohhran hrang hrangte hi lei dana remkhawm, Pathian lak atanga in la hrang leh thil sual tihna hmun mai a ni an ti.

5) Kum sang rorelin kan awm mek an ti.

6) Leilung din a nih hma daih khan Pathianin taksa neiin amahah min lo siam tawh a, Paah chuan famkim sa kan nih avangin, tlan kan ngaih lohna te, chhandam kan ngaih lohna te, thawhleh pawh kan ngaih lohna te rawn puang tur leh min rawn hriattir turin Isua kha a lokal a ni an ti.

Pathian nunna famkim kan chan tawh avangin Isua hian thlarau lam tlanna hna a thawh a ngai lova, Pathian kan nihnaah Isua’n hnathawh a nei hek lo an ti bawk. Pathiana an inngaih avang hian a ni mahna Pathian tanpuina te, kaihhruaina te, malsawmna te beisei chu Kristiante ti tawk lekah an ngai a ni.

MEA an intih laia an innghahna ber (an bible ve a ni ang) chu Evan Rorelliana ziak ‘Ram neitu thu’ kha a ni a. Ram neitu thu 12:1-5 ah chuan, ‘Lalpa I hnen atangin he thu hi ka hmuchhuak ta. Nangma lama ka nihnaah khan piantirh ata sualna ka nei si lo. Tlan ka ngai lova, thawhleh ka ngai hek lo. MI NUNGA chu ka ni a, AWMA ka nih kha. Leilung leh hunbi hian mi khuh phak lova, ka chanchin chhiar thiam khawvelah an awm si lo” tiin Pu Rorelliana chuan a ziak. [‘Sual ka nei lo’, kan tih chuan mahni leh mahni kan inbum a, thutak chu keimahniah a awm lo a ni — 1Jh 1:8]

Kristiante misual.com-a min rawn bei fo tute nihna leh zirtirna chu heti hian tarlang mai ila a tawk awm e. Han sawisel vak pawh a tha lova, a tul ber paw’n a lang hek lo. Heti hian an nihna chu a chiang mai a, chhiartu te’n ngaihdan leh thutlukna chu kan siam thei theuhin a rinawm e. Ram leh hnam hmangaihna kawra hmang a, ramhuai zirtirna leh sakhuaa fing vervek taka mite thlemluh hi an agenda a ni tih tu’n kan hai awm lo ve.

“Nimahsela, nakin hunah chuan mi thenkhatte chu, mi dawtheite vervekna avangin hruaibona thlaraute leh ramhuaite zirtirna thu ngaihsakin rinna chu an la bansan ang tih Thlarau chuan chiang takin a sawi a. Chung mi dawtheite chu anmahni chhia leh tha hriatna ngeia thir linga deh ang an ni a..” — 1Tim 4:1,2

“.. nangmahni tibuaiin, Krista Chanchin Tha tihdanglam duh tute emaw an awm mai a ni a. Nimahsela, keimahniin emaw, van atanga lo chhuk vantirhkoh pawhin emaw, Chanchin Tha kan hrilh che u lo kha chu Chanchin Tha dang reng lo hrilh che u sela, anchhe dawngin awm rawh se” — Gal 1:7,8

“Thu lawilo pawr tak taka sawiin suala awmte zing ata tlan chhuah mekte chu tisa chaknaah hurnain an thlem thlu si thin. Anmahni chu chhiatna bawih ni chung rengin mite chu bawih chhuah thu an tiam thin a; mi ngamtu apiangin chu mi ngei chuan bawihah a siam thin a ni” — 2Pt 2:18-19

“Tupawh Krista zirtirna thua awm reng lova khum chuan Pathian a nei lo ve. Chu mi zirtirna thua awm reng erawh chuan chu mi ngei chuan Pa leh Fapa a nei kawp a ni. Tupawh chu mi zirtirna thu chu rawn keng lovin, in hnenah lo kal sela, in inah thlentir suh ula, tawngkam tha pawhin thlah suh u; tawngkam thaa thlahtu chu a thiltihsualah chuan a tel ve si a” — 2Jh 9-11

(thulakna: An zirtirnate leh an chanchin)

Similar Posts:

Recent Posts:

79 Responses to “Hnam Sakhua bihchianna”

Pages: « 1 [2] Show All

  1. 51
    donald Says:

    Mizo tawnga Hindu ho lehkhabu Bhagvad Gita lehlin chungchang kha post-ah hian ka tarlang ta lova, a chhan chu a copy ka nei mai si lova; thudik a nih leh nih loh comment lamah ka zawt mai ang chu ka ti a. Mahse rinaiin an lo lang har ta sia tihian zawhna chu dah mai ila, an lo luh huna an chhan atan:

    1) ‘He sakhaw lehkhabu-ah hian thuhmahruai ziak an awm nual a, chungte chu Nunna Lalchhungkua (Nunna Lalhnam) mi leh sate vek an ni’ tih hi a dik em?

    2) ‘Rorelliana, Lal puithiam, Mizo Hnam Sakhua pawhin, “Ram leh hnamin a nun kawng dik a zawh a, hnam a lo hmuingilna tur leh mihring hriatna piaha Chung Khuanu – Khuavang ram rel, hnam hnena pholan a duhnate hailanna lehkhabu chhuah a lo ni ta mai hi hnam vanneihna kawng hawngtu lo ni zel sela,” tiin malsawmna a ziak’ tih hi thudik a ni em?

    3) ‘”Gita bu hi uluk takin ka chhiar a, hnam damna tling thu hluin a khat ni berin a lang,” tiin H Chawngpianga, Lal puithiam, Nunna Lalhnam pawhin malsawmna a ziak’ tih hi a dik em?

    4)’Gita thuhmahruaia hnam tinte malsawmna ziaktu B Lalthlengliana, Vice Chairman, Nunna Lal hnam (Saron veng, Aizawl) chuan, “Lalpa (khuavang) chu Lal a nih anga a inpuannate chunga a ropuina chu lang zel se, hnam tinte a siam anga mahni nih dan theuhva a kohna hretute malsawmin awm se…” tiin a ziak’ tih hi a dik em?

    [Report abuse]

  2. 52
    saint sammoo Says:

    dik vek..

    [Report abuse]

  3. 53
    donald Says:

    Thnx saint sammoo..

    Chuti a nih chuan Mizo Hnam Sakhua ‘dinthar’ leh an tumdan chu christian philosophy hnawla hindu philosophy chawk luh a nih hmel hle mai. Bible leh christiante inzirtirna chu hnamdang thil, mizote tana hlutna nei lo an ti a; bhagvad gita erawh chu (mizo) hnam damna tling thu hlua khatah an ngai ang lawi a :-O

    [Report abuse]

  4. 54
    Ignatia (33-115 AD) Says:

    E khai comment number 51-na chu a va tha ve!

    Khawnge an pilbo tak vek chu le. An inveng (defend) ve ang chu ka ti deuh a nia. An fing thiam ngawt mai, kan han ti ve deuh a an reh hmak mai. Min lo tih ve leh hun chuan kan ngawi leh thiam dawn si lova. :-D

    Pu Rorelliana’n Presbyterian a chhuahsan chhhan ni-a miin(kum lama upa tawh, a hunlai hre pha) an ngaihte(qualitative approach a ni a, dik ber ka ti hauh lo):

    1) Kohhran khan dan leh dun uar lutukin a hmu.

    2) Kohhran khan Thilpek (thawhlawm) an uar lutuk.

    3) Kohhran khan Theology an uar mah mah.

    Pathianin Krista hmanga engkim a chinfel dan a hriatthiam loh zia chu tarlang lo mai ila. Khing pathum khi tuna Pu HS-a te, Pu Rinzova te leh Pi Houdini te lo chhuahna bul a nih chuah a HO ve ngawt ang a…

    [Report abuse]

  5. 55
    Chemtatrawta Says:

    Hnam Sakhua te chu hetianga kohchhuah mai mai theih pawh a ni lo. Hnam sakhua original ni lo khan a rawn hmang zui tawh bawk sia, ka en peih tawh lo reng reng..hairehai..

    Tin, Hinduism hi atir takah chuan “way of life” mai niin zirmite chuan an sawi. Hun a lokal zel a, rites and rituals vel te hi chu Social class phunngheh nana hnam tha(inti) hovin an phuahchawp mai mai a ni e. TIn, an origin an sawi thui ber, Harrapan civilisation ah pawh khan an pathian Bawng sa hi an ei thin ni khan a lang tlat.. :-)

    [Report abuse]

  6. 56
    donald Says:

    @55

    Hinduism pawh hi anihna takah chuan hnam sakhua tho alawm. Indus lui kama vela cheng hnamte kha Hindus tih anni thin a, hun a lo kal zela an chenna ram chu Hindustan tih a lo ni ta a – Persian tawngin “Land of the Hindus” tihna. Greek ho khan Indoi an ti thin a, ‘the people of the Indus’ tihna a ni awm e. Tun hnu hian India tih a lo ni ta a, an sakhua pawh hinduism tih a lo ni ta bawk a ni.

    [Report abuse]

  7. 57
    Saitawk Says:

    Post sei tak hi ka beng verh zawng tak anih lemloh chuan ka chhiar chhuak khat viau a tunlai chu! ei chu ka hmuh veleh ka chhiar chhuak nghal dap mai. Good post (Y)

    pathian chanchin ziahna post chikhat a lo ni reng a! :-P

    [Report abuse]

  8. 58
    drake Says:

    :-D ka zak chem chem mai, mizo chu christian vek kanni tih kha thian ten an lo hre ve a, min zawt a, AW ni e ka lo ti ve ngawt a, ka lo hre tlem tiau tiau em nih hi!!

    [Report abuse]

  9. 59
    H.Vangchhia Says:

    drake #58 Kike (Jewish) pawh an awm nual tawh alawm hairehai :-P

    [Report abuse]

  10. 60
    keimah Says:

    @donald, i va tilawmawm êm! A chepa kai aṭanga i han chhui chhuah dap chuan mimâwl pawh kan chiang kuar kuar mai! Pu Hnam sakhua-a pawh a nihna han pho lan tâkah chuan a zak ve deuh roh pawh a ni mahna a rawn chhâng har êm mai!

    Hman aṭang tawh khân anni ho ang hi chu hnial an sâwt lohzia leh hnialna point ṭha tak tak pawhin hnial thla mah ila an hriat thiam phâk tak tak lohzia (an hrethiam duh lo?) ka hmu chiang tawh a, ka hnial peih ta lo.

    Nangni ang thil hre zau deuh khan hetiang post hi rawh thawh zeuh zeuh zel teh u khai!

    [Report abuse]

  11. 61
    H.Vangchhia Says:

    Kan OT daih teh ang, a pawi em lovang chu!

    Mizo te hian hnamdang aiin kan sawi uar viau a ka hriat á¹­hin pakhat chu, “Rinna avanga chhandam,” tih á¹­awngkam hi a ni awm e. Hemi thu hi Ephesi 2:8-9 a mi, “Rinna avânga khawngaihnaa chhandam in ni; nangmahni thawh chhuah a ni lo va, Pathian thilpêk a ni;” tiin a inziak a. Thupuan bu erawh chuan rinna ringawt a tawk loh zia bung 20:12 ah khan a sawi thung. “…mitthite chu lehkhabutea ziak an thiltih ang zêla rêlsakin an awm ta a,” a ti hlauh thung!

    Han sawifiah deuh thei kan awm em, Pathian thu zir emaw practice mek te khan?!

    [Report abuse]

  12. 62
    donald Says:

    Hv,

    Zawhna tha tak a ni (Y)

    Kristian history-a chhandamna chungchanga sawi zin leh inhnialna ti tam bertu tun thleng hian a la ni awm e. A fiah deuh theih na’n history tlem tarlang ila a tha a nge.

    Apostolte an thih zawh hnua Kristianna a lo thanlen zel khan pagan ho tamtak kha kristianah an inpe a. An serh leh sang tamtak an rawn chhawm lut a. Chung lo dodalna tur chuan Kristiante khan Pathian chhandamna chu khawnngaihnaa kan chan a ni a, thiltih avang a nih loh thu an zirtir a. Hun a lo kal zel a, thiltih leh Pathian thuawihna lam hlamchhiahin rinna ringawt khan hmun a chang chho ta a. Nun lepchiah taka nungin Kristiante kha an nung ta a.

    Puithiam pakhat Peligia an tih chuan chung chu a hmuhin tha a ti lo em em a, Augustine-a te ho zirtirna vangah a puh ta mai a – khawngaihna in uar lutuk a ni ti zawngin a dem a ni. Tichuan ani chuan thiltih lam a sawi uar ve ta thung a. Augustine-a leh Pelegia inkar chu a chhe ta em em mai a, a tawpah phei chuan Pelegia chu heretic-a puan a ni ta hial a ni. Mahse a thusawi chuan kohhhranah nghawng a nei chho ve hret hret a, khawngngaihna leh rinna ringawt ni lo, thiltih pawh hlamchhiah tur a ni lo tih ngaihdan a lo piang ta a.

    Mahse hun a lo kal zel a, kohhran chuan thiltih lam kha a uar leh ta lutuk si a, rinna leh khawngaihna a hlamchhiah ve leh ta thung a. Kohhranah harsatna chi hrang hrang a lo awm leh ta. Martian Luther-a leh midangte an lo chhuaka, chhandamna hi thiltih avang a ni lo, rinna avang chauhin a ni an rawn ti tha ve leh ta a ni. Hei hi protestant-te chuan thupui berah tun thlengin an hmang ta a.

    Tichuan rinna leh thiltih chung changa problem chu tikhian nangni ang pa fing chuan sawifiah thiam lo hle mah ila in hmu thiam ngei ang. Bible zirtirna lam lo thlir leh ta ila:

    “Rinna avânga khawngaihnaa chhandam in ni; nangmahni thawh chhuah a ni lo va, Pathian thilpêk a ni;” tih awmzia chu mihring hian thil kan tihsual vek tawh avangin engtikawng mahin reverse theih a ni tawh lo. Sual man chu thihna tih hi Pathian thu chhuak a ni tlat a, Pathian chuan engtikawng mahin a thu a sut dawn si lo – misual chu a thih ngei ngei dawn. Thiltha tinreng pawh ti leh eng ang mahse a chhandamna hi a thawkchhuak thei tawh chuang lo reng reng a ni. Chutah chiah chuan Pathian khawngaihna a lo lang ta a; kan thih aiin a Fapa a rawn thi ta a ni. Thihna lak ata chhandam kan ni ta phawt.

    Kan ai a rawn thi mai nilovin ama nun ngei mai chu peka kan awm theihna’n thihna ata a lo tho leh a; chu a thawhlehnaah chuan keini pawh kaithawhin kan awm ve bawk a. Hetah hian rinna chu a pawimawh ta a ni. I Bible chang rawn sawi khi tah khian a tawp lova, tihian a inchhunzawm zat a:

    “Thil tha ti atan Krista Isuaah chuan siama awmin ama kut chhuak kan ni si a; chu thil tha tih chu kan awmna turin Pathianin a buatsaih lawk a ni” – Eph 2:10

    Krista thihna leh thawhlehnaah chuan mihring thar, thilsiam thar kan lo ni ta a, misual kha tihboral niin mifelah Pathia chuan min pawm ta a ni. Chu chu Pathiana kan nihna diktak a lo ni ta a, mahse thil ken tel a nei ta tlat. Thiltha ti atana siamthar kan nih tawh avangin thil tha tih chu kan awmdan tur a lo ni ta a. Chu thiltha/thiltih chu engdang nilovin Isua zirtirna anga nun hi a ni mai. Isua ringtu chuan a thu a awih tur a ni a, a zirtir ang zelin nitin a nung tawh tur a ni. ‘ka mifel chu rinna in a nung ang’ tih ziak ang khan.

    Tichuan rinna leh thiltih chu thenhran theih a ni lo reng reng a, chuvang tak chuan Jakoba chuan “rinna chu thiltih nei lovin amah chauhvin a awm chuan thi a ni” a lo ti bawl reng a ni.

    [Report abuse]

  13. 63
    mr.Duhlova Says:

    Helai te hi kan belh ve lawk:

    Pu HVa zawhna khi, ringtu te tan chiang angreng tho si, sawifiah har ang reng deuh a ni in ka hria. Pu Donald a hrilhfiahna hi a tha hle, heti zawng hian han sawi-belh ve ta ila.

    “Engnge kan sawi tak ang le? Khawngaihna chu a pun lehzual theih nan sualin kan awm reng dawn em ni? Hnai lo ve. Keini sual kawnga thi tawh sualin engtin nge kan la nun theih cheu vang?” Ro.6:1.

    Kristian ni ve si, (piangthar tawh inti bawk)nun fimkhur lo, Bible zirtirna nen a in mil lo tak a nung hi Zoramah pawh an awm nual a tih theih awm e.

    Lal Isua ringa a, a thawhlehna nun changtu te chu, an mihringhlui (pianthar hma nun)a ma rual a khenbeh,(tih hlum) a hnena (a ma ruala) phum bo tawh te an ni. Chu chu, SIM NA TAK TAK, SUAL THIHSAN tawh tu te an ni.

    Tichuan “Rinna avanga chhandam,” hi, chhandamna chang tur chuan Pathian thilthlawn pek awm chhun leh Pa hnen thlen theihna kawng awm chhun, Lal Isua RIN chiah hi a ni. A bak a awm lo. Hindu puithiam ho emaw, mi tha leh fel kan tih te, Buddhist puithiam te leh mi hausa, mirethai khawngaih leh tanpui tu pawh nise, Lal Isua an rinloh chuan,thiamloh chantir tur an ni tho.

    Tichuan, miin Lal Isua alo rin tak hnu chuan, Piangthar, Thilsiam thar, Lal Isua neitu, nunthar nei, chatuan nunna neitu, van khua leh tui alo ni ta. Chu a nunthar chu, zurui buai te, rukruk te, tualthah, pawngsual etc. lam te ni tawh lovin, Pathian duhloh zawng thil thalo te chu thihsan hmak/sim hmak in, “Thil tha ti atan Krista Isuaah chuan siama awmin ama kut chhuak kan ni si a; chu thil tha tih chu kan awmna turin Pathianin a buatsaih lawk a ni” – Eph 2:10

    Lal Isua kan ring a nih tih chu, kan chezia, nun, leh thiltih duhzawngah te alo lang chhuak tawh ang a.”Tupawhin mi hmangaih chuan, ka thupek te a zawm ang” Lal Isua pawhin a tih kha. “Rinna chu thiltih tello chuan thi a ni” Jakoba’n alo ti bawk a. RING inti si, NUNPUIna tel lo, nunphunga lang lemlo a sawi na a ni ber a. Chhandamna kan lo nih ve theihnan, Lal Isua kan ring a, min hmangaih a, kan tan a nun hial min petu a thu kan awih a, a duhdan a kan nun hi ‘THIL TIH’ chu a ni ber.

    Lal Isua zirtirna zawm/zui lo Kristian kan tam ta em a, Hnam sakhua te pawh in, Kristian hi min zuam zo ta a niang.

    [Report abuse]

  14. 64
    donald Says:

    mr.duhlova,

    I last para khi ni e, kristiante pawh hi kan inbihchian a tul ta khawp mai. Hetia min han nuai bawrh bawrh takah chuan na takin kan han tang ve lo thei lo a, mahse an sawi hi a dikna chen tam tak a awm tih hi kan pha thei bik tlat lo a ni. Kristiante min hmuhdan a ni miuava, chuti ang taka nung hi kan tam bawk si.

    An tihsual ber erawh chu heng fellohna zawng zawng hian kristian zawng zawng a huam lo a, an rawn generalize ta pawp pawp thin hi a ni. Kristian nun dik taka nung hi tlem azawng hi chu englai pawhin an awm ve reng tih hi an hre duh lo ni berin a lang. Diktak chuan heng zawng zawng hi kan Lalpa khan a sawi lawk veka, kawngka zima lut chu tlemte an nih thu min hrilh a ni.

    [Report abuse]

  15. 65
    mr.Duhlova Says:

    64
    donald # Amen.

    [Report abuse]

  16. 66
    Rinzova Khawlhring Lalhnam Says:

    “51 donald Says:
    July 24th, 2012 at 6:56 pm
    Mizo tawnga Hindu ho lehkhabu Bhagvad Gita lehlin chungchang kha post-ah hian ka tarlang ta lova, a chhan chu a copy ka nei mai si lova; thudik a nih leh nih loh comment lamah ka zawt mai ang chu ka ti a. Mahse rinaiin an lo lang har ta sia tihian zawhna chu dah mai ila, an lo luh huna anchhan atan:
    1) ‘He sakhaw lehkhabu-ah hian thuhmahruai ziak an awm nual a,chungte chu Nunna Lalchhungkua (Nunna Lalhnam) mi leh sate vek an ni’ tih hi a dik em?
    2) ‘Rorelliana, Lal puithiam, Mizo Hnam Sakhua pawhin, “Ram leh hnamin a nun kawng dik a zawh a, hnam a lo hmuingilna tur leh mihring hriatna piaha Chung Khuanu – Khuavang ram rel, hnam hnena pholan a duhnate hailanna lehkhabu chhuah a lo nita mai hi hnam vanneihna kawnghawngtu lo ni zel sela,” tiinmalsawmna a ziak’ tih hi thudik ani em?
    3) ‘”Gita bu hi uluk takin ka chhiar a, hnam damna tling thu hluin a khat ni berin a lang,” tiin H Chawngpianga, Lal puithiam, Nunna Lalhnam pawhin malsawmna a ziak’ tih hi a dik em?
    4)’Gita thuhmahruaia hnam tinte malsawmna ziaktu B Lalthlengliana, Vice Chairman, Nunna Lal hnam (Saron veng, Aizawl) chuan, “Lalpa (khuavang)chu Lal a nih anga a inpuannate chunga a ropuina chu lang zel se,hnam tinte a siam anga mahni nih dan theuhva a kohna hretute malsawmin awm se…” tiin a ziak’tih hi a dik em?”
    ^
    |

    ” #donald a dik e, malsawmsaknathu ziaktute chu: H. Chawngpianga, Rorelliana, C. Vanlallawma, B. Lalthlengliana, V.LPeka Chhakchhuak te an ni e.
    Srîmad Bhagavad Gita chungchanga i zawhna hi a dik a.He lekhabu letlingtu hi Ramthanga Khawlhring a ni a, a mah hi Nunna Lalhna mi leh sa a ni emaw nilo emaw; a mah hi hnam thuthlunga chiang a ni a. He lehkhabu a lehlin avang hian Hindu sakhuana atanga Hnam Sakhua tundin leh tumna lam a kawk lo. He lehkhabua malsawmsakna, duhsakna rawn ziaktute hian; ram leh hnam din khawchhuah theihna tura kawnghawng theitu a nih an beisei avanga ziak an ni chauh zawk e. Hei hian Hindu sakhua inzirtirna lama inhruailuh emaw an sakhua thuthlung lam zu zira an sakhua biaka dan tawmpui lam a kawk lo, a chhunga thu tha leh ril tak tak awm te hi hringnun kaihruai thei a nih avang chauh zawka chhiara a hlutna phawk chhuah hi a letlingtu leh malsawmna thu ziaktute’n an tum zawk a ni. Heti ang bawk hian Isua zirtirna thu tha tak tak te Bible a inziakte pawh hringnun kaihruai theitu a tam mai, a zawm leh ataka nunpui hi kan chanvo a nih avangin heti ang zawngah chuan engmah hlauhawm a awm love.

    He lehkhabua malsawmsakna thuziakte avang hian Hindu Sakhuaa inlet(convert) mai tura min ngai tawk pawh an lo awm nual mai a ni awm a! Mizo hnam sakhua hi Hindu Sakhua a ni theilo hrim hrim tih hriat a tha. Chuti ang bawkin Kristianna pawh kan hnam sakhua a ni thei hek lo. Kanhnam nun dan leh kalphung tha lai te chhawm nunga Pathian en chung zela a tha lai te la chhuaka a diklo lai te kalsan a kan hnam sakhua dik tak tundin leh hi kan thupui a ni e.”

    [Report abuse]

  17. 67
    PKfanai Says:

    Comment a bengvar thlak hlawm e. Hnam Sakhua ka counter tirh (misual.com a ka luh tirh) khan, Hindu ho nen an inzawm ka rin zia ka auchhuahpui nasa thin a, hei an lo inmawngzawm ngei chu ava ang ta tak tak ve. :-( India hmarchhaka tlangmite zingah hian Hindu ho hian direct-in kua an hreuh theilo tih hi an hrechiang khawp mai. Hnam Feeling zawnga lain Hnam Sakhua ho hmangin hma an la a ni. Mizoramah pawh an lo ti v ngei zawng alo nih dawn hi. (W)

    [Report abuse]

  18. 68
    donald Says:

    @Rinzova Khawlhring Lalhnam,

    I ti lawmawm e. Ni e, mihring nun inkaihhruaina atan mizo Kristiante hian Bible leh Isua zirtirna hi tha kan ti a, kan nunnah kan seng lut mai a ni. Isua krista zirtirna kan zui avangin kristian ka inti a ni mai a, mizo kan nihna a bo chuang lo. Mizo hnam kan la ni reng a, kan sakhua pawh kristianna mizo version a ne ve mai. Kristianna hi tu hnam ta mah bik a ni lova, hnam zawng zawng, a duh apiang te’n inkaihhruai na’n kan hmang mai a ni. A hmuchhuaktu phei chu Juda mi daih a ni. Sap a ni no.

    Chutiang thovin nangni paw’n, gita zirtirna tha inti a, inseng luh ve tho chuan danglamna a awm chuang em ni le? Hindu sakhua kan zawm lo pawh ti ula, an zirtirna inseng luh tho te chuan inzawmna chikhat chu a ni mai lo’m ni? Keinin Krista zirtirna kan la lut a, Kristian kan nih chuan, nangni pawh Hindu zirtirna in lak luh chuan Hindu in nihna chin a awm ve tho alawm.

    [Report abuse]

  19. 69
    donald Says:

    Pk, i sawi dik chiah. #56-a ka sawi ang khian Hinduism pawh hi Hnam Sakhua tho a ni tlat a lawm. A huam chin hi a zau em a, tute nge hindu tih pawh hi sawi fe tham a tling.

    [Report abuse]

  20. 70
    iL leoncino delle Fiandre Says:

    Rorelliana pawl te hi hnial a sawt vak lo ang….Snoop dogg hnenah ganja that loh zia leh zu lo tur a hrilh ang vel aniang :-D

    [Report abuse]

  21. 71
    Rinzova Khawlhring Lalhnam Says:

    # donald, i thlir dan atang chuan ka hriatthiam pui khawp mai che. Hindu zirtirna hi kan sakhuanaah kan senglut tihna a nilo a, senglut a min puh thlu a nih pawhin in hriatthiam awm tho e. Lehkhabu tha nunkawng hruaitu atan atha ani, chutiang bawkin Bible pawh, mahse he Gita bu hi kan ram leh hnam enkawl nan kan senglut lova, a chhunga thu tha tak tak awm te hmanga hringnun kaihruai theitu a nih avang chhiar ve atana athat ringa a letlingtu hian a rawn chhawp chhuak mai zawk a ni. Bible zirtirnaah pawh thu tha tinreng a infuankhawma, nimahsela alo pawmtute hian an zawmlo tih chu in hmu thei ang; kan ram dung leh vang en hian. Zawm atan tha ve ve Bible leh Gita te hi kan sakhuanaa seng lut kherlo pawhin, Khuanu’n kan hnamah thu tha leh nunkawng hruaithei tur thu a thlung a ni tih hi a taka haichhuak thiama, a nihna ang taka kan hmana kan zawm leh kan nunpui mai hi Pathianthu zawk a ni.
    Bible/Gita kha Pathian inpuanna a nilo ka tilo, kan ram kan hnam dinchhuahna atan erawh chuan a tha tluantlinglo tih erawh chu Bible kan lo hman reitawh ngaihtuah hian a chiang mai; Gita pawh chuti ang bawkin.
    Confuse i la neih ka ring a tahtawl te tein inkawm chho ta zel zawk ila. . .

    [Report abuse]

  22. 72
    donald Says:

    Bible zirtirna chu a tha intih ve tho si a, ‘kan ram kan hnam dinchhuahna atan erawh chuan a tha tluantlinglo’ tih leh bawk si hi ka hrethiam chiah lo. A engtizawnga tha tluantlinglo nge i sawi thei em aw..? Bible pawmtute hian kan zawm that duh loh vang nge ni anga, a zirtirna hrim hrim hi fel lo lai a awmin in hre zawk? chutiang anih chuan a khawi lai tak hi nge sawi thei la a lawmawm khawp ang.

    [Report abuse]

  23. 73
    donald Says:

    Gita emaw mizo hnam sakhua inkaihruaina emaw pawh chu a pawmtuten an zawm chuan si loh chuan awmzia a awm chuang dawn em ni?

    [Report abuse]

  24. 74
    mr.Duhlova Says:

    Adama thlah Mihring suala tlu tawh te tan, kawngdik zawh leh hi a har tawh hle, kan han pianthar pawhin kalna ngai loha kal ang mai in kan khawr thin hle. Mahse zawi zawi a, inzir zelchunga hmalam pan tur kan ni a. Mahse khawvela awm kan la nih si avangin, min chimbuaitu a tam hle.

    Biblea thu tha tak tak, Lal Isua zirtirna tha leh thuk, ropui tak tak te pawh, zawm duhlo kan awmlo, mahse, zawma nunpui nghal duak duak chu thil har tak a ni. Ringtu pui tling ni tur chuan hun pawh a duh. Hma kan sawn thui deuh deuh a, Pathian felna leh thukna kan hmu tual tual a, kan fel lohna leh famkimlohna kan hmu nasa tual tual a ni.

    Chung zawng zawng chu, Bible chhung thu leh Lal Isua zirtirna a thatlohna a vang a ni hauh lo.

    Bible hi Gita (philosophy) te nen phei chuan tehkhin chi emaw ni dawn le? Bible chhunga Lal Isua zirtirnate phei hi chu, he khawvel a kan awmchhung atana, thil pawimawh, midangte nen a kan inrem theih na te, chhungkua, khawtlang leh ram a muan (peaceful)na tur vek a ni. Mihringte hian that kan harsat em mai pawh a. Pathian thu (Bible) hi Dai a, chenchilh apiangin Pathianthu dikna leh takna an hmu a, rinna kawngah an thuk zual zel thin. (F)

    Bible hi Gita te anga lehkhabu tha, nunkawng hruaitu atan atha ani ve ngawt lo, Lal Isua hi, CHATUAN NUNNA a ni a, “Pathianin chatuana Nunna min pe a, chu mi NUNNA chu Fapa ah a awm a ni. Fapa nei tu chuan, Nunna chu a nei; Pathian Fapa nei lotu chuan, Nunna a neilo.” (1 Jn 5:11-12). Tin Bible hi,’Pathian thawk khum’ I Tim 3:16) a ni a, ‘a nung a, thil a ti thei bawk..'(He 4:12) (Y)

    Bible hi hi kan ram leh hnam enkawl nan kan senglut lova, a chhunga thu tha tak tak awm te hmanga hringnun a kaihruai theilo a nih chuan, Gita bu hi kan ram leh hnam enkawl nan a tangkai bik a va rinawmloh ve. (N)

    Lal Isua lo lan hma daiha Gautama Buddha zirtirna te kha a tha ve viau a sin….mahse Adama thlah, sualsa a piangte tan zawm a, thatpui a harsat bakah, Pathian hnena min hruai thlengthei a awm lo. Mosia dan sawm (Thusawm)pek te pawh a tha lutuk, mahse, za a za mark hmuh ngai a ni a, Mark za a za, dan sawm zawh famkim thei mi perfect khawvelah an awmlo. ;-(

    Chuvangin, Pathianin khawngaihna kan chunga lantirin, a fapa, mifel famkim, sualna neilo, (mi perfect) chu i tan leh ka tan (kan ai-awh turin) mi pe ta zawk a ni. Chu a fapa min pek ringtu/pawmtu chu, thiam min chantir ta mai zawk a ni. (L) Lal isua fel famkimna chu, Heroda , pilata leh Puithiam lalber te ka atangin kan hmu..”a sualna ka hmu lo” an ti theuh.

    Pathian in mihring hi chi hnihin a then phawk a,(kan ti thei awm e) ringtu leh ringlo tu…a ringtu chu, thiam chantir, ringlo tu chu thiamloh chantir a ni mai. Hetiang khawngaihna thuk leh Pathian inpuanchhuahna hi Gita/Koran etc tih velah in hmu em ni le? ;-(

    Christianity ai a hmasa fe, Hinduism hi rin tlak leh famkim nise, Lal Isua, Pathian fapa khan a van ropuina te kalsanin, he khawvelah min chhandam turin a rawn kal a ngai lovang. (L)

    [Report abuse]

  25. 75
    Ignatia (33-115 AD) Says:

    Pu Donald & Pu Duhlova : (Y) (Y)

    [Report abuse]

  26. 76
    Chemtatrawta Says:

    Hindu hovin Bawng an pathian biak chhan pawh, hmanlai lal ho khan bawng kha a sang tel tel khan inthawinan an hmang mai thin a. Chumi vel atang chuan puithiam hovin bawng chhanhim nana bawng pathiana be ta mai mai hi an nia, an bawng sa ei loh chhan pawh chuti bawk.

    [Report abuse]

  27. 77
    ninja Says:

    Hlauhawm tham an awm lo, Rorelliana & Co. hi an zuih ral tep… Intih maksak an duh a, an tangkhang laklawh a nih hi! An lo kir tep tawh ang…

    [Report abuse]

  28. 78
    Rinzova Khawlhring Lalhnam Says:

    Pu Hnam Sakhuain rawn chhang che u rawh se

    [Report abuse]

  29. 79
    “Hnam Sakhua bihchianna” chhanna | mi(sual).com Says:

    […] (Hnam Sakhua bihchianna tih post chhan letna hi Naupang inhmuh khawmna kan buatsaih avangin kan rawn chhanglet thei lawk lo a, inmi ngaihdamna kan dil in, kan hman ve leh kan rawn chhanglet nghal e) […]

    [Report abuse]

Pages: « 1 [2] Show All

Leave a Reply

You must be logged in to post a comment.