Rual Duh Kan Hlimna Sawmfang

July 31st, 2012 9:58 pm by Dr Mahminga Sailo

Nunhlui ngaia suihlunglen
Vairam khawpui, mihring tam em emna hmunah nitin mahni hna avangin buai thin mah ila; nunhlui ngaih suihlunglen erawh ban ni a awm hlei thei lo. A ni, fur ruahtui bawhawk thleng mai tur vangin; ralkhat tlang bawhin ruahkung lo paw chi chiai mah se, sawmfang pan phurna erawh min pawlhdalsak lem lo. Fur kawng nal leh vangvat te’n kan enghelh an tihnual miah bawk lova. Thiante nena hlim taka vaimim tharlam tak han rawh puah pawp pawp te, fanghma bawl han ei ham ham te khan min tiphur zawk a. Fanghma vel hmaa, a chhip/mawng zailep, tu thlawh nge thui thui tia kan han inel leh tur te nghalhlein, phur takin kan kal sawk sawk thin.

Kan phur, tha a tho…
Darkar chanve dawn feh kawng zawha, lentupui kan paltlang meuh chuan; sawmfang hring dup mai chuan itawmna tinreng nen min lo hmuak ut mai hian kan hria a. Kan rak/khek chul thin. Patek nal leh kang mang kan pawisa lova; thlan tlain uite rim pawh nam mah ila kan inkiltawih lem lo, lovah kan feh tlat alawm.

Tichuan le, thlam kan han lut a. Thosi leh vaihmite lah chuan khual thar hmu ngai lo ni awm a mawiin mi lawmin an lo phar kawi ve reng bawk a. Mahse, min lawm dan erawh a lawmawm lutuk loh avangin mei kan han chhem khu a. Kal bo r’u tih ngai lovin, thosi leh vaihmite chuan min kiansan mai thin.

Sawmfang hring nghel
Thlam namthlakah kan han thu veng vawng a. Fur ruah tuiin a chawm hneh tih takah mit tlin tawk (ka ti mai) buh kung duah leh hrisel tha tak chuan a khuh hring nghulh a. Ngai teh! An sawi zo-thilfim rawn thaw heuh heuh chuan, buh kung a’n chhem chhawkawlh dual dual mawizia te kha, mipa naupang lungmawl paw’n kan hrethiam ve tho asin.

Thlam huala chuailo leh zamzo lo par vul te chuan tawn loh D tleitiri sakhmel duhawmna min hriatchhuah tir a. Fur ruahtui dawng tha tih takah vau lui tui luang ri hum hum kara, ralkhat hauhuk rual phur taka lo huk leh tliar tliar thin te chuan khawhar min hnem thin.

Nuam singkhaw…
Hlo thlo rual kan ni lova, vaimim keh lah kan thiam hek lo. Chuvangin, kan nu te zuiin, a tha leh itawm kan hmuh apiang ‘hei hi ka ta tur’ tiin kan hauh sa a. Tichuan, vaimim rawh tur leh fanghma bawl tur kengin thlamah kan let a. Thawh tur dang reng awm hek lo, thiante nen hlim takin kan ei za thin.

Chawfak hun ber kha a nghahhlelhawm thin. Maian hnah tharlam tak, zawr hnep hnawpin ka nu’n an’n bai a. Lenghmaser, mautuai, pardi, runhmui leh bawlhlo dang dang a’n thlak pawlh niai a. Khai le, hnahthial hnah ngeia chawfun kan han thet a, a rim ngawt paw’n chil a tiput thin a nih kha maw. Chutah, thu sawp ngatin chaw fak hmaa vaimim rawh kan ei leh fanghma bawl kan ei hre chang tawh map lovin chaw kan han ei leh tawk a. Dam man a awm thin ngawt asin.

Tunah zawng maw…
In lianpui chhungah, nisa leh ruahsur tuar lovin ka thu nileng zak thin a. Khawvel thiamna hmangin hmun hla tak tak a mi te chanchin ka hre zung zung a. Mahse, nunhlui ngaia suihlunglengin chhuihthangval hi ka kur luai luai lawi si. Hringnun tak zet hi chu aw…

Khawnge maw, Charice-i te, Saint-a te awm loh hlan changin, lunglen hla tawite ka’n phuah ve ngawt te’ng.. ;-)

Panlai nunhlui dawnin suihlung a leng,
Theih chang ni se, koh kir ka nuam;
Mahse, kir zai an rel lo, aw nunhlui.
Rual duh hlim te’n kan tuanna sawmfang,
Kim te’n tuan leh ka nuam mang e.

Similar Posts:

Recent Posts:

20 Responses to “Rual Duh Kan Hlimna Sawmfang”

  1. 1
    VaiVa Says:

    yes!!!

    Report this comment

  2. 2
    TuaiSialA Says:

    Khai, ka lung i tileng vawng vawng mai ka ti.

    Report this comment

  3. 3
    H.Vangchhia Says:

    Ngaihnawm ve. (Y)

    Chaw kan ei lawks te’ng :)

    Report this comment

  4. 4
    mamboihi Says:

    Ih.. Post hi ka chhiar zo a, engtin emaw ni ka awm!!.. A va ngaihnawm/lunglenthlak ve.. (Y)

    Report this comment

  5. 5
    Ignatia (33-115 AD) Says:

    E khai hei chu ka duh chi zawng tak a nih hi a. Pu Mahming, naute ho chuan an ngaihtuah thiam pui lovang che. Kum 1978 chho vela Sabual mual kan neih lai mawlh kha ka ngai thin. Thlawhlai vela han inthehthil vel kha a lo nuam ber mai a.

    He hla hian ka lo tuihnih ve ang e. Suihlung a leng em mai…

    http://www.youtube.com/watch?v.....re=related

    Chuan hei pawh…
    http://www.youtube.com/watch?v.....&NR=1

    Hei pawh hi…
    http://www.misual.com/2012/07/.....ent-972800

    Report this comment

  6. 6
    ThaiBoy Says:

    A ngaihnawm hle mai he thuziakin an lung a tih lenve phah misual ah hian engzat tak awm ang maw…

    Report this comment

  7. 7
    ninja Says:

    Ka lung a va leng em! I sawi zawng zawng khi ka tawn ve tawh hnu vek a ni.

    Report this comment

  8. 8
    houdini Says:

    Va ngaihnawm leh dawn ve aw… hman hunah chhiar te’ng…

    Report this comment

  9. 9
    sheldon Says:

    I va sawi thiam tak. A lunglenthlak bakah nawm hmel em em in i ziak a. Mahse a tak takah chuan nisa ruahsur, thosi leh vangvat kar a chet chu a chakawm lem loh e te ka tia!

    Report this comment

  10. 10
    ninja Says:

    ‘Kal lai relin lamtluang kan zawh vangkhaw daiah,
    Tin, kal zelin chawlhna hmuntlang kan thleng thin.
    Tah chuan ka han thlir a, a lang e kan sawmfang dumdur,
    Di va leng rual murvate leh thlakawi an leng e.
    ………KA LUNG A LENG MANG E……….

    Report this comment

  11. 11
    ninja Says:

    Ka chhiar nawn leh a, ka mit sulh sulh a, ka nghilh ta dup mai ;-( Mahming, la feh dun teh ang…mahse hman ang khan a nuam tawh awm chuang si lo…huisss

    Report this comment

  12. 12
    sheldon Says:

    A lunglenthlak a, a nawm hmel em em bawk. Nula tlangval inlawm te, inchhawlthuai, adt, kan kalsanin kan changkansan tawh si. Tuna nula tlangval tamtak zingah hian a tak a ‘lo/sawmfang’ hmulo an tam tawh ngawt ang.

    Report this comment

  13. 13
    Kosmovision Says:

    Clasic philosophy lama nature a tuichilh tawp, a tui em vanga philosophy thar rawn pawchhuaktu Baruch Spinoza pawh min tihrechhuak rum rum e (NATURA NATURATA & NATURA NATURATAN) …thanks Dr. Mahminga

    Report this comment

  14. 14
    Kosmovision Says:

    Dr. Mahming, philosophy lama tuimi te tan post-na tur hmun an siam ve em aw… Religion hi Philosophy and Religion ti sela a huamzau zawk dawn asin mawle…

    Report this comment

  15. 15
    Kosmovision Says:

    Dr. Mahming, philosophy lama tuimi te tan post-na tur hmun an siam ve em aw… Religion hi Philosophy and Religion ti sela a huamzau zawk dawn asin mawle… Correction: natura naturata, natura naturan

    Report this comment

  16. 16
    lr hlonchhing Says:

    Lung i tileng mang e (Y)

    Report this comment

  17. 17
    Dr Mahminga Sailo Says:

    Tuktha chibai vek u… (C) (C)
    Ka post ka lo mutthilhsan daih a… Hman veleh val lungleng hian lawmthu ka rawn fah liam liam ang che u… :-)

    Report this comment

  18. 18
    Sihtea Says:

    I thurawn post chuan, lung a tileng hlemai. Thupawh i thiamin, i hlathu han chherchhuan danpawh, a dikthlapmai.

    Report this comment

  19. 19
    Dr Mahminga Sailo Says:

    @ mamboihi… I tilawmawm thin e. Kohkir theih si loh ngaiin kan kur reng dawn a nih hi ti raw… :-)

    @ Ignatia… A dik chiah. Office bana mahnia khawsa tan phei chuan, lunglenna hun a tam ni maiin ka hre thin.. ;-)

    @ ninja… I hla tarlan chuan lung a va kuai ve. Hun remchang a awm veleh kan la feh duh ngei dawn nia… :-)

    @ sheldon… Ka lawm e. I sawi khi (#9) dikna chen a awm. Tun dinhmunah hian, ruahsur kara lova feh tur ni ila, ka inngaihtuah nasa ve viauin ka ring. Mahse, a hunlai khan kan chak ber a ni tlat nia.. Ruahsur han do ngei te kha a nia nuam lehzual… :-D

    @Kosmovision… Thurawn tha tak min pe a, ka lawm e. Thu leh hla lama zirlo leh inchhiar peih lo chu, kan vei leh phak tawk hi kan ziakchhuak tawp a, mi(sual)-ah hian ka thehlut leh tawp mai thin.. :-)

    @ Sihtea… Ka lawm e. Thu phuailuai deuh ziak ve thin mah ila, hla phuah ber kher hi chu ka lar tak tak hmain ka chawlhsan ta daih a… :-D Inthlahrung takin, tawite ka’n tarlang ve tawp a nih khi… :-)

    Tukchhuah nuam vek u… (U)

    Report this comment

  20. 20
    Awmtea Khiangte Says:

    A va lunglen thlak ve, ka lung hlui i kaitho leh tlat mai ka ti ;-)

    Report this comment

Leave a Reply

You must be logged in to post a comment.