Zo Nun Mawi Hlutna – II

July 30th, 2012 6:30 am by Lalhnam Rinzova Khawlhring

By- Laldinthara
Thingsulthliah

Thian chhan thih an ngam a, an sakhua an ram leh an hnam tana an nun hlan chu an hreh lo mai pawh ni loin, engtin nge ram tân, hnam tân ka thih ang ti niawm zawk takin mi tân an nun an ui loa ni. Chu nun chuan Tlawmngaihna a rawn hring chhuak reng mai a, tlawmngai hnam kan lo ni ta a nih chu.

Amaherawhchu an khawhawi kha a lo zim a, ram pum huap khaan ngaihtuah thlen phak loh chang a am thin kha a tâwpa an tlûkchhiatna a ni reng a. Khua leh khua indo kha an Politics sang ber a ni a, râllaka an khaw venhim kha an tum ber leh an râl do hnai ber a lo ni ta a ni. Râl thatthei Pasal ha ngahte chu an thla amuang em em a ni. Tin, an râl thah sawngbawl dânah te khan ran tâna rinawm an zirchhuak leha, thingserh bulah chuan chepui an dah a, pu K. Zawla ziaha a lan dan chuan, ‘thingserh’ satte chu kei ka ni inti deuh te an ni a, chung mite chuan thingserh kha an pan nal nal a, chempui chuan an kik kerh a, a bula thu khan nopuiin zu a lo pe thin a ni. ‘Râlahhian a tul hle loah chuan ka tlan ngai lo ang a, kan khua rawn rûntu phei chu ka chhuah lo ang. Ka khua leh unau hum tur chuan ka hnung tawlh lo ang a, hneh loh ai chuan thih hi ka thlang zawk a ni. Chuvangin, Lal khua lehtui chhan nan nun pêk hi ka phal tih lo hre ve rawh u.’ tihna tluk a ni. Chu chuan hnam tana rinawm a lo zirtir leh reng peka, hnam rinawm tiin kan lo hre leh ta a ni.

Ziaktu tam berte chuan tun hunah chuan Mizote hi ramhuai bia in an sawi a, Kristian Missionary-te pawhin thingbul lungbul bia angin an sawi hial thin. Mahse, ngun tak leh chîk zawka han ngaihtuah chuan kan pi pute khan sakhua an lo nei ngei a. Khawvel sakhaw hrang hrang- Hindu, Kristian, Muslim, Buddist, Confucianism leh a dangte pawh hian an zirtirna zawm tuten thih hnua awm dan turte an kawh hmuh bakah, an damlai ngeia thil tha tih a keng telvek tih theih a ni. Chu chuan mihring dam chhung nun a vawng a, chênna tlak leh engthawl taka khawsak hona hmun nuamah khawvel hi a siam ti ila a sual awm lo e.

Mizo sakhaw kawng kal han thlir ta ila, in lamah thangchhuah tura rahbi te, a tlem berah sial 6, vawk12 leh vawkte 3 talh a ngaia, a nei leh tlin bik ten an vawk englaimaha bàng lo a ni a, zu atân buh engzata tam nge sên ngai tih phei chu chhût chhuah harsa tak a tling a ni. Heng zawng zawng titur chuan taimâk, tawrhchhel a lo ngai bawk a, hengte hian an nun nasa takin a khalh ngil a ni. Tin, heng an thil tih zawng zawngah hian mipui vantlang a huap vek a, chawngchen, sechhun, sekhuan, mitthi rawp lâm leh khuangchawiah te.

Chawng an chen zânah phei chuan nula leh tlangval an lâm a, chawngpa inah an thu tlar pût mai a, tlangval kapkarah nula an thu a, an zai dup dup a, kha kha ‘lam’ an ti mai a, khatah khân nula kha an inthleng kual bawk thin a. Hawihhawm lo deuha nulalo khuaikhem phal a ni lo a, khataan nun kha thianghlimim a mawi em em a ni. Tin, chu chang a ni lo,’Thingfar zân’ an tih kha a ni, ropui chu; nula leh tlangval hrâi nan zu tha bik ‘sumdeng zu’ an kai chhuak a, an siak eng kulh mai a. Chu chu tuin nge in hmasaber ta ang le? Tuma sawipui mamawh lo, minister-te leh M.L.A sawipui chi lah a ni hek lo. Lal leh upa te, valupa te, nula leh tlangvalte leh khawtlangin lungrual taka an hriat tlan, mi kawlh leh sakawlh hmaa zâm ngai lo, lu chhum bân chhum huama khua leh tui lo chhan fo tlawmngai filawrin an in hmasa tur a ni.

Chu Zu, ‘Huai No,’(Nopui an tih bawk) an tih chuan Chawngpa chuan tlangval zinga tlawmngai ber, khua leh tui chhanna tura nunna hlân ngam chu a han hlan thin a ni. Chu lawmman sang leh hlu chu thangtharte leh khawvel dang hian an nei ve lo a ni. English tlangval tan ‘Knight of Certer’ te, French tlangval tana ‘Knight of Legion’ te, India tlangval tana ‘Param Vir Chakra’ te ai mahin Mizo tlangval tan a hunlai na na na chuan he ‘Huai No’ inpek hian awmzia a nei lian zawk a, Zo nun mawiin khawtlang leh tlangval nun a vawn that ziate hi tunlaimite hiankan suangtuah phak lo hle ang.

Tin, ram lama Thangchguahte pawh kha han thlir ila, Thangchhuah pa an thih hnua pialral kal thei te kha chuan a tlem berah ramsa chi nga(5) kah a tul a, sa dang tamtak an kap tel bawk a, sa chu an insem a, khawtlang an hrai thin a ni. Chu chuan Pialrala hnathawh ngailo a,awm heuh heuh leh faisa a châwm chauh ni loin, a kawng kal pumpui maiah hian vantlang tana thil tha tih te, zu leh sa, thlum leh al te mahnia ei tha ve lo,michhia te pawh a huap veka ruai buatsaih te, an nun khawchhuah theihna’na pawimawh tak, khawtlang mipui chhanna tur a lu chhum bân chhum huama, mi kawlh, sa kawlh hmaa zâm hauh loin ring an lo rawlh a, mahni nunna meuhpawh chân ngamin, ‘Ka nun mi dang te tân,’ tih nun chu sawi miah loin a takin an lan tir a ni.

Hei hian Mizote nun chu a siam thain a siam dik hle a. An ram an hnam leh an sakhua chu pumkhat ani a, an hnam duhloh pawh an sakhaw dodalna a nih nghal tlat avangin an nun ngil taka khalhtu an sakhua, an ram an hnam an enkawlnaah khan mipui vantlang hriat theìah pialralkaltur thliar hran theih nghal vek a ni.

Similar Posts:

Recent Posts:

4 Responses to “Zo Nun Mawi Hlutna – II”

  1. 1
    lr hlonchhing Says:

    Nia..

    Report this comment

  2. 2
    James Bond Says:

    Fairy tale

    Report this comment

  3. 3
    Sihtea Says:

    Hman lai a, kan pi leh pute hun laikhan, mi rethei leh chhumchhia hmeithai te tan khachuan, nun khua ahreh awmin, a hahthlak thin ngawtin ka ring. A chhan chu maw, Liandova te Unau chanchin ahkhan, a hriatviau in kahria. Sailo lal fanutan, hnamchawm tlangval neih khachu, thil harsatak leh theihloh tluka, ngaih a nihial thin. A chian lehzualnan, Lianchhiari leh Chawngfianga thawnthu ahkhan, a hriattheih viau ba wk. Hmeithai fanu leh Hmeithai fapa te’n, hmuhsit leh diriam an hlawh thin zia kha aw, Keichuan, kha ti’anga, in thliarna khawtlangkha, khawtlang nuam, Zo nunmawi parang avullai, ti a han fak nachhantur kahrelo. Doral anhlau, Ramhuai, Sihhuai, Khamhuai, Thinglubul, Khawsia,Phung, Tualsumsu, Thinlanga, Dengsura, ka sawi senglove. Mristian, kannih hnuah e rawhchuan, heng kan thilhloh zawngzawng hi a bovek tawh. Chi in thliarna pawh kanban tawh, mi retheileh hmeithai te paw’n, kristian na engahchuan lei rem anrap veta. Kristian na thurin in, Zo nunmawi tlawm ngaihna a hnawllova, Anem nghetzawk ani. A maherawhchu, Kan van Patianin, a mite hmanga, kan zoram nuamah, Zonun zemawi, chitha, arawn thehnahmun ahngeihian, 1950 hnu lamah khan, Setana leh a thurualpui, India sawrkarin, Zo numawi zetha leh kristianna ti dal turin, Zo nun ze Suak, Duh amna, pha karna leh, awl samte-a, sum lakluh duhna, chi chhia, an rawn theh vetak a vangin, takna neilo, kristian suak, kan zoram ahhian anlo tamphah tamai a ni e.

    Report this comment

  4. 4
    lrpa Says:

    I post hrim hrim hi chu a dik tlangpui reng! a tha lam zawng chauh a ‘thlirna’ ania. Mahse hmanlai kan nunzia kha SAKHUANA nen a in sawizawm tum talh kher erawh a fuh lem lo ;)

    Report this comment

Leave a Reply

You must be logged in to post a comment.