Mi rethei Vanglaini chhiar!

July 30th, 2012 6:30 pm by Zama Khiangte

Tideuh nghal tawp I la. Thingtlang Sikul upa ve tawh tak, than mawh bawk zeta a ba nena Pawl sawm (Kan nu leh pa ten matrix an tih kher thin) kan pasi ve tak hnu khan “I fail chuan I bang ang a, hna I thawk ang!” ti a ka pa hna thawk chau in min rumthaihnate chu mual leh lama bung thar kai san turin  Aizawl khawpui lam ka pan san ta a.

Awmpui han nih takah chuan chhungte thawh khalh chu kan ziak loh dan, zawm loh thiang loh a ni ta si a, phur fahran lo hian mitek thian nuah nuah chung hian Ek In lamah Vanglaini chu ka luh pui tuktin ta thin a. Ke lamin mut a lo la kham lo nasa thin chu niin, ke mu chur chur chung hian Vanglaini chu kan chhiar zo leh nge nge thin.

Chutia a tuktin kan bih ve takah chuan eng kha nge ka tan hlawk thlak ber ni ta thin!

A hnung lama Tetea’n mawi hnai taka Ronaldo pet goal vel dan leh tunge infiammi man to tihte thlenga a ziah kur dupte chuan ka thlaurau nun chu sawi loh ka zirna tak pawh kha a pui lo em em a. CH3COONa NaOH tih vel chhun lama kan thai tial leh tak thin avangin kha phek kha chuan rual pawlna kawngah min hnuk lut a, kan thil chhiar kan hriat poh leh lehkha kan zir tlem tihna a ni ta mai si. Khatiang sawi ho nikhua a a hre tlem tlemte kha alawm tuna Facebook vela pawh “engtik nge I lo haw dawn? In awmna chu a lum bawk em?” ti a kan biak leh tak thin te chu!

Tichuan infiamna lam pheka Manchester chak loh thu chhiar te kha a uihawm dan TV a en ve thlap lote tan pawn en tluk hial khan kan hre ve ta thin a. Mahse Home work lam erawh Zirtirtute sawi leh lehkhabu lam kan bih kan nasat tak em avangin en lo te tluk zetin kan hre lo leh ta thin a. Hui ha, a hahthlak thin a nia.

Keu sawn ang!….. Tichuan a lai pheka “Fakna leh hriattirna” mawlhah khan kan tisa leh thlarau chawm thei kha thingtlang naupang tan a vang thin mang e. Toilet tihfai tihte chu keini a khur thar lai leh mai thin tan thil thar a ni a, eng Show room Discount emaw velte lah chu Tupuiral atang hian kan hrethiam pha zo si lo. Tui thianghlim tak kan chawi sak thei tihte chu keini tui kang pawh nghak tang tang thin te tan chuan a tlawm thlak kan ti a, Mesaka tui leh Fiara Tui a ni emaw Kawng chhak tui leh lengkir tui pawh lo ni raw sek sek, kan la hrethiam pha chuang lo!

Bike Seconhand mawlh kha! Kawr Seconhand pawh nei zo tha lo hian Bike-ah pawh Seconhand mah nise kan hmu sang em em tawh a. Tute emaw tan chuan a tangkai dawn mang e tiin kan en kan a, engtikah tak heng huangahte hian kan Bike hluite kan zawrh ni thleng ve ang maw tiin kan melh liam tuktin ta thin anih kha. Kan pui lo thin teh e.

Hnaruak lah chuan min rawn zawng lo thin teh asin. “Ruih theihthil ti lo” tih te mai loah kha chuan han tlin vena kha kan nei mawlh lo a, a chang chuan a kumah te chuan kan tling ve leh nawlh nawlh a. Han interview pui ngam thiamna nei ta hek lo chuan kan en rei ngam ta thin lo a, khawhar chhungte pual a thihfakna te chu lungkuai zet hian kan chhiar a, “a va la naupang ve” kan ti ve leh sup thin. Ni e, naupang taka thi kha an tam thin em a. Thihfakna kan tingawt pek a, tu’n an haw lo ang chu, thih hnu hi chuan kan fel thin hlawm em a.

“Awmpui duh” tihte kan en tui viau tawh chuan zinga chhungte lo tho tur hi kan huphurh em em tih hi keimah leh keimah ka inhrilh nawn leh keuh keuh thin.

Tichuan fakna lamah chuan kan thlarau leh tisa lamin chaw a hmuh tak loh em avangin “Article” huangah a ziaktu hming en hmasa in bul kan han tan leh thin a.  Rev. PC Biaksiama leh Revd Chuauthuama tih a lan tawh kha chuan hmaih ka tum ngai lo. PL Liandinga leh Darrokimate phei chu sawi chhawn leh thei ngei tur khan ka chhiar a, mahse rilru lama mi hnung um ta ngang chuan ka haihawt vang pawh ni bik miahlo hian ka lo theihnghilh leh dim diam ta thin a.

A phek hma lamah mawlh khan alawm ka lungawi loh thin. Pu Hawla Zin thu kan hmuhin Pi Ri-in a lo zui hman ngei ngei a. Hnialtu lamin an thil tihsual hai lan hram an tum laiin lehlamin dawta puh an nih thu an Mithianghlim thusawi leh lawi si. Tan tur zawk hriatthiam a har a, tan tum zawk pawh chu ka nei ngai chuang lo a.

Zirtirtu hlawh la thei lo nuarte kha Sikul chawlh thlakhlelh lai chuan chhiar a nuam em em a. City Bus tawt zet a kawngpui tawt taka chuan kha a chhangban kham ve theih nihialin ka hria. Eng eng emaw kha chu an nuar reng a, kan hre vek lem lo, mahse “No Vehicle Day” tih ang reng vel kha chu ke a sikul kal tho thin te tan chuan a thawl nuam hlei hlei kha a ni mai a.

Khatianga Vanglaini kan bih tuktin atang khan kum te hial a vei nawn tawh a, mahse ka la bansan chuang lo. Kan khaw kawng siam that a nih hun turte chu kan la “Lalruanga Dawi bur tha zawk nghah” char char a, rawn in thai ran ni a la awm ang tih rinna hi nun tichhe lo tawk vel hian ka pai ve reng a. Engtikah nge tih chu a beiseitu ngei pawh hian ka hre bik lo.

Ni e, Vanglaini kan han chhiar tak tak hi chu kan retheih zia kan hre thar leh thin. A thenin Lunghlu dahkhama pawisa puk an phal laiin a thenin In hmun an hralh phal a. In luah tur zawng an awm laiin Bike hralh duh an lo tel ve bawk a, heng zawng zawngah hian mi rethei tan tangkaipui tur a vang thin teh e. Mahse a phek a hlai a, a tam a lawm, a lo thlawna chhiar zawng kan ni hauh lo e!!!

Kan la chhiar zel ang a……

Lammual a hring dawn tih awi vaklo a kan chhiarte pawh hmun hnih hmun thumah an phah hring thei ta sa sa, Power-te pawh exam laia chhe zual thin a eng phut tawh ang a, kawng pakhat min vanga Buhfai leh Gas harsat thute kan hmunkhat hret hret ang a, VIP leh mi inhnuai luahte Khawnvartui man a in ang reng thu te kan chhiar hunah meuh chuan “hei le ZORAM THAR!!!!” tiin hla kan la phuah mahna le…

(090520121000)

Similar Posts:

Recent Posts:

23 Responses to “Mi rethei Vanglaini chhiar!”

  1. 1
    saint sammoo Says:

    chhiar zo vek

    Report this comment

  2. 2
    CFL Says:

    I ziak tha hle mai.

    Report this comment

  3. 3
    mamboihi Says:

    “ZORAM THAR” hi thleng teh se… Mi hausa leh rethei kar hla lutuk hi chu hmuh leh hriat hian thaw a pik tawp. Ka chhiarchhuak vek, i ziak tha ka ti em em e. (Y)

    Report this comment

  4. 4
    TuaiSialA Says:

    A ngaihnawm phian mai.

    Report this comment

  5. 5
    Mx Says:

    A tha hle mai, chhiar a nuam (Y)

    Report this comment

  6. 6
    uncle-charlie Says:

    (Y)

    Report this comment

  7. 7
    Charice_mizo Says:

    Hei chuh…one of a kind anih hi, hetiang lam article ka vawikhat chhiarna, a post tupa hi ka kawm chak zawng tak…Darrokima thuziak aiin nep ka ti chuang bik hauh lo nia..(Y)

    Report this comment

  8. 8
    Awmtea Khiangte Says:

    (Y) (Y)

    Report this comment

  9. 9
    Kitty Says:

    Ziak ngaihnawm thiam hle mai. Han ziak zel teh
    (Y)

    Report this comment

  10. 10
    Kawhterenga Says:

    A ziaktu awm dan tur mitthla ran chungin ka chhiar chhuak dap mai, a ngaihnawmin chhiar a nuam (Y)
    Inzir puitling tur chi hi chu an heti tlat zel nia (H)
    Mi namai lo tak i nih hi le ;-)

    Report this comment

  11. 11
    Kawhterenga Says:

    May ni 9, 2012, Zinglam dar 10 (Y)
    Khitiang khi ka ngaina riau a nia :-D

    Report this comment

  12. 12
    bbney Says:

    (Y)

    Report this comment

  13. 13
    H.Vangchhia Says:

    Ngaihtuah a ti thui e :-S

    Report this comment

  14. 14
    PKfanai Says:

    A ngaihnawmin i pet goal nalh khawp mai. (Y)

    Report this comment

  15. 15
    keimah Says:

    I va ziak thiam em! Ngaihnawm ti deuhin ka chhiar chhuak vek. Tawngkam i thiamin thil naran mai anga lang pawh i sawi ngaihnawm thiam tlat. Han ziak zel teh khai. (Y)

    Report this comment

  16. 16
    sheldon Says:

    Thu i va thiam ve. Ka chhiarchhuak dap mai. Good post (Y)

    Report this comment

  17. 17
    Sihtea Says:

    Thu a thiamin, ngaihthlak a nuam dapdap hlemai. Ek paha, chanchin buchhiar hi simhar duh deuh asin.

    Report this comment

  18. 18
    Dr John Says:

    (Y)

    Report this comment

  19. 19
    LaMea CâcTùs FLh Says:

    nang nge nge, a ngaihnawm e..ti zel teh

    Report this comment

  20. 20
    Dr Mahminga Sailo Says:

    Vanglaini chhiar aiin Vanglaini chungchang i ziak hi chhiar a nuam zawk daih! (Y)

    Report this comment

  21. 21
    houdini Says:

    Va ngaihnawm e… (Y)

    Report this comment

  22. 22
    Zama Khiangte Says:

    Charice_mizo , ka master Darrokima meuh maw bukna pakhata min khai dun tak mai. Kei chu ka zang zawk fe in belh fe ka la ngai tih hai lo mah ila, ka lawmna chuan Pu Dara thiamna pel mauh thung a.

    Report this comment

  23. 23
    Dr Mahminga Sailo Says:

    @ Zama Khiangte… Kei pawh, mi(sual) pakhatin, I thuziak a ngaihnawm tho rualin, Darrokima thuziak rawng a kai deuh tiin min hrilh tawh a. Dara hi a lar a, mahse a thu leh hla hi ka la chhiar mang tlat lo :-O Kum 4 chhung hian, Ui leh zawhte chanchin bak, Mizo thu leh hlaah chuan Misual.com hi ka chhiar a ni deuh mai a. (&)

    Report this comment