Kan khaw Wall Cup

July 30th, 2012 11:00 pm by Zama Khiangte

THE FINAL MATCH

Hun chu a tlem tawh si a, kan inkhel lah chu kan inhneh tawk em em mai bawk a. Lehlam si-nghak kan han en a, Penalty-ah chuan kan dinhmun a chhe zawk tlat! Tan patawp kan chhuah pawhin Vawi thum ‘gawnar’ Penalty kan tichung pawhin pet goal-na hun hlu reng reng lehlam chuan min pe duh bik tlat si lo.

Fans lam an phur a, thawm a thain boruak pawh a sang ngei mai. Fans kan han tih hian nu leh pa ramchhuah hlana nau lo awm pi tar putar te an ni ber a, an tang ve thin khawp mai!

Chhuah lam leh tlak lama kan rin rawl, kan bat (Striker/forward kan tih te) te lah chuan leh lam ‘full back’ te an paltlang zo bawk si lo!

Chhei le! Kan lama out chu kan ‘full back’ chuan a rawn thlawh haw ta nal nal mai a. Kan thlir thap a, a leng phei nul nul a, lehlam si-nghak chuan a ban pha lo mawi lutuk. A goal e!! Kan au nghal dar dar a.

Mahse a goal dan chu he khawvel ram zau-ah hian a lo la thleng ngai reng reng si lo. Pawm tur nge pawm loh tur. Leh lam ho chuan tuma dai loh chuan khatiang kha chu goal-a pawm theih a ni lo an ti a, mahse an pawm leh pawm loh chu World Cup-ah ngei pawh kan la hmu ngai si lo. Kei ni pawl lam kan tan nat em avangin Champion kan  ni ta. Hnial chak vang liau liau pawh a ni ve e.

FIFA emaw kan khaw GSA emaw thutlukna lam ai chuan hnial chak khan kawngro a su em em a, goal chungchang chauh pawh ni lo, foul chungchangah pawh hnial chak kha player pakhat ang maia tangkai kha a ni ve hrim hrim a.

KID NO-2

Kan team, champion team a ka tel ve theihna kha engdang vang mah a ni lo. Khatia BOSS zah thei tak ka nih vang bik liau liau kha a ni.

Boss ka zah lo ve ngai lo. Tv en laiin ka vawih ve ngai lo bawk.

Kan BOSS-te In ah chuan khel lovin zing atanga zan thlengin kan khawsa a ni ber a, chhun zirna sikul lamah pawh an kid rinawm ka ni reng thin. Hei vang hi a ni mahna kei chuan TV remote hial chan chang ka nei thei a, dish hlai pui her pawh kha a neitu tluk zetin ka thiam ve hman a, Sahara, RCTI leh Soho channel thlengin a hawi zawng tur zan thimah pawh ka thiam chat chat tawh bawk nen, a lai lum chang lo thei ka ni lo ve hrim hrim bawk a.

An lung ka tihawi dawn phawt chuan rap a tuah thing fak ka hreh ngai lo a. Chhuata thingthit ka hnial ngai hek lo. An inthiarna tui bel ka chhung khat fo a, an tual hnawk thlengin ka hnawl fai a, an leipui kal ni lahin ka zui awl lo bawk nen, kid no 2 nihna kha kei aia hauh zo reng an awm lo.

Bawng khalh tur BMX ngei a kan kal lai khan chhukah ka um a, chho ah ka nawr a, chu tluka BMX khalh zirna tha a awm lo, a nawr ka thiam fe hnu ah khalh min zirtir ve ta a. Ka va tangkai pui tak em!

Hahthlak ka tih ve thin chu indo lem nikhua a thi zawk nih a ngai tlat bik te, in rubber thap nikhua pawha perh thla thei zawk ni chunga pun laia ban an phal ta thin lo te, in marble thapna a perh nana suan an hmang thei tlat bik kha a ni.

KAN TEAM

Kid No-2 chanchin ka sawi takte khi kan team ho hna thawh dan tlang pui anih vang a ni. Kan team chuan Boss kan nei a, “in vai vawm ang” a tih chuan kan kal mai a, tui chawi a hunah kan chawi mai thin.

Kan khua a mual nuam lai tak chu kan HOME GROUND atan kan hmanga, veng chhung nu ho mit kan tihkham chang  awm fo mai. A chhan pawh kan ball khan mi bang a tih keh fo vang a ni. Chu tiang a thlen ni chuan kan Boss ni lovin a kid ten ngaihdam kan dil thin.

Kan team-ah chuan kid dinhmun in ang lo tak tak kan awm khawm a, silai leh motor lem thlan ni khuaah pawh a chang tha pawl ka ni ve thin, mahse kan silaite khan kan Boss chu a kap hlum ve zo lo a, kan motor te khan kan Boss chu a tlan pel thiang lo.

Veng dang team chuan kan tih ngai vak loh ram chhuah te, sava veh leh tui chen an uar em em a, kei ni lam kha chuan vai film en kan hrat hle thung. A chhan pawh veng dang team neih ve loh kan Boss te khan TV an neih bik vang a ni.

WALL CUP

Mi ramah ‘World Cup’ an khel thin tih chu kan u te ti ti atang kan hre ve a, mahse kei ni chuan ‘Wall Cup’ kan khel.

Wall Cup kan tih daih chhan hi kan cup inchuhna a team pakhat, ‘Dilveng’ team-te chu an home Ground-ah kan hneh thei reng reng lo a, a chhan pawh ko pang pet per an thiam em a, pasarih team-ah player 11 nei ang mai hian an hmang thiamin an indaih phah a, an ko pang hmang tangkaiin kan si nghakte an chhaih buai hneh thin em a ni.

Ko pang pet per tur awm lohna hmunah Tournament chu nghah anih miau avangin Dilveng chuan Final pawh an lut zo ta lo a, Siallam veng (Tuna Venglai ni ta) nen Final match chu kan khel ta a nih kha. Mahse Siallam veng ho hian he hmun hi an Home Ground anih ve tlat avangin an tang khawng thei hle a, vawi thum ‘gawnar’ penalty atanga goal thun tur takngial pawhin kan nawr bet zo lo a nih kha.

Mahse a tawp a tawpah kan ‘full back’ ngei mai khan ke chhipin  thlawh phei ta luah luah mai a, lehlam singhak lo in ring lo chu thlawh khumin kan khaw Wall Cup Champioan kan lo ni ta a ni.

(200620121147)

Similar Posts:

Recent Posts:

14 Responses to “Kan khaw Wall Cup”

  1. 1
    Saitawk Says:

    Chhiar ang hmiang.

    Report this comment

  2. 2
    CFL Says:

    Ni e.

    Report this comment

  3. 3
    luahpuia Says:

    kan naupang lai min ti hrecuak,,,,santa barbara lar vanglai te kha,,lunglen thlak reuh

    Report this comment

  4. 4
    david Says:

    van rei tawh hmel ve ruahsur field chirh diaka han leu tak tak thin lai te kha ngaih awm ve ta hle mai

    Report this comment

  5. 5
    Lamji Says:

    Indo lem I sawia phelhsep ‘X’ shape in kan siam a,sairawkherh phan a laia phel kan vuah a vawihuih hrui hrawl tawk tawk in kan indo a kan in perh pawp pawp thin kha a nuam thei ngei..kan vual nasat theih zia kha. Hmanni lawk ani nain ngaihawm ve mai mai. Hehe!

    Mission Veng KTP hian World Cup awm kup apiangin Kual Kap(em ni kha?) an neih ve thin kha. :)

    Report this comment

  6. 6
    TuaiSialA Says:

    A ngaihnawm leh pek! I thuziak thulkhung ṭha tak tak kha han phawrh zel teh khai.

    Report this comment

  7. 7
    Dr Mahminga Sailo Says:

    A ngaihnawm reuh… (Y)

    Kar hmasa khan kan Boss hluiin min rawn bia a. A lunglen thu min hrilh luai luai mai. Kei pawh ka Boss-te chiah hian kan khuaah TV an nei thin… :-)

    Report this comment

  8. 8
    Sihtea Says:

    Thu ziakmitak chu ani chiang alawm, eng thupui hmang pawhin, bul hantan mahsela a dakthluam, vekmai ani e.

    Report this comment

  9. 9
    Awmtea Khiangte Says:

    Ualkap chu nuam thin deuh asin :-D

    Report this comment

  10. 10
    david Says:

    tahthak zanlen na ah kan han pai a kan han in tat mai kha chuh a thaj hian athak hut hut mai a anuam lemlo thin khop mai

    Report this comment

  11. 11
    lrpa Says:

    Thu ziah i thiam hle mai a..Tom Sawyer te pawh ka hre chhuak thuak thuak mai!

    Report this comment

  12. 12
    lushai_er Says:

    Si-nghak ti lo hian Goalie emaw ti tha ve hle hle la a chiang leh zual tur. Penalty, Corner, Offside, defender, Midfielder, Striker, Coach, referee adt. te hi football chungchang kan sawi dawn chuan Mizo-tawnga lehlin kher loh hian a chiang tawkin ka hria.

    Report this comment

  13. 13
    LaMea CâcTùs FLh Says:

    Ka nau Zama, i thu post ka hmuh vawi khatna nnin ka hria.. WELCOME TO MISUAL.COM… Han ziak zel teh (Y) (B)

    Report this comment

  14. 14
    Zama Khiangte Says:

    Lushai_er, mizo tawnga let ka ni hran lo! Khi khi kan naupan laia kan u te sawi dan kan hriat fo thin a ni. Chuan a mizo tawng (?) a ka hriat khian a sap tawngin ka la hre miah lo zui. Mahse nangni ang sawisel ngamte vanga chak thin thuziak mite hnuk i ni chiang e. @ laMea, ka thiam tha lo vel lutuk a…he3,,,

    Report this comment