Kan thatna tur?

July 15th, 2012 1:00 pm by PKfanai

“Tin, Pathian hmangaihtu, amaha ruat anga a kohvate tan chuan, an thatna turin engkimin a thawhsak hlawm thin tih kan hria” (Rom 8:28)

He bible chang hi a lar viau mai a, kan hre theuh awm e. Amaherawhchu, a thlamuan thlak viau lai hian, kan nuna han tawng chiah erawh hi chuan, Engti kawngin nge kan thatna tur anih theih ang? Tih hi hriatthiam erawh chu a har thin si a ni. Thawnthu awmsa ka hmang tam ta a, tun tum chu keima nuna ka tawng ngeite zinga pakhat chauh I han thai lang dawn teh ang.

Kum 2003 khan, Kan hotuten Itanagar dai North Eastern Regional Institute of Science and Technology(NERIST) awmna Nirjuli khhua a, daipawn deuhva Leilet hmun zau takah Sikul din turin min tir a; kan chhungkuain chhangchhe takin kan chhuk ve a ni. Kan Sikul dinna tur hi aram alo zau hle mai a, NERIST leh kawngpui sial thar inkar metres 350 vel zet mai, avang lam metres 150 vel lai azau hi alo ni a. Leilet hmun anih avangin, In leh Thingkung pakhat mah a awm lo. Chu aia la zau mah kawng leh a thlanga Lui pakhat inkar ram zau takah chuan In lian tak room pawh 6 zet nei, ding fal nalh mai chu kan luah a, kan thenawm hnai ber pawh mel chanve dawn laia hlaah an awm a ni.
Chutiang chuan theih ang angin hma kan han la ve tan ta a. Zankhat chu Ruah asur nasa hle mai a, Power supply pawh a awmlova, a thim mup ringawt mai a. Kei zan ruahsur hnuaia muttui thin tih takah ka mut a tui kher mai. Zing kan han tho ta a, kan choka hi inpui nena inkalpawhna a chung zarzawm siin, a hranpa nalha awm a ni a. Choka ka han hawng chu, kan Gas Cylynder, Stove leh Fridge a kan hman Automatic Stabilizer chu alo awm tareng reng lo mai hi alo ni a. Tala kha a inkalh tha thlap si a, amak kan ti hle. Mahse, kawngkhar pakhat zawk, a chhunglama kan kalh chu a chung chiaha Ventilator atanga zenin an lo hawng chu niin. A hrilhhai thlak duh kher mai. A ram neitu Naharlagun(kan awmna atanga km 7 vel a hla) a awm chuan an gas chu min hmanhawhtir a, chumi zing atan chuan eirawng kan bawl ta a.

Tichuan, chhunah chuan Gas set thar chu ka han lei leh ta a ni.(hetih lai hi chuan Gas ala harsa rihlo khawp mai). A in neitupa chuan, chu kawngkhar chu Brick-in a ping phui ta hmiah mai a, Assam ramri ahnaih em avangin misual (rukru) an tam thu leh, chutiang ang zan ruah sur bur bur leh Power supply awmloh zan chuan an chet thin thu min hrilh bawk a. Tichuan, chutiang zan alo thlen apiang chuan, Torchlight Cell 3 nen, Sairawkherh leh marble nen, Chem sei nen hian ka inring ru hle thin a, mahse, ka chang ru tih anhriat vang nge? An rawn che duh thin si lo.

Tukkhat erawhchu, zing kan han tho chu kan choka kawngkhar kalhna Tala chu alo chhia a, kan Gas bawk chu an lo ru leh a, chokaa kan dah kan chemsei chu an lo ru tel bawk a. mut hmain ruah a sur lova, tui taka kan mut hnuah a sur leh si a, Power supply pawh alo awmlo hi ani awm e. A thinur thlak thin kher mai. Chhunah Gas set dang chu kan han lei leh ta a ni.

Zankhat pawh, a ram netuin aram enkawl tura arawih Gogoi-a chu a te hlut mai a, kan Bathroom-ah mi an luh thu a sawi a(Kan bathroom leh Latrine hi pawnah a awm a) ava um a, a te chul mai a. a te danah chuan misualte chuan an lo khawih ni ngei hian alang a, Paijama leh mutkawr nen, slipper nen chuan chemsei humchhuakin ka va um ve a; Ka thinur tawngkhawng tawh nen, kan Chowkider pa chu chhan tlaklohvin an lo hliam palh ang tih ka hlauthawng nen chuan ka han au tial tak tak mai anih kha. Ka au thawm a rapthlak bawk a, thenawm hla tak taka mite pawh “Eng thil nge nita?” tiin an rawn au ve a. Mahse, eng em chu alo ti lem lo va, misual ho pawh chu ka va hmu hman ta chuang lem hlei lo va. Ina ka han lut leh chu, ka inhrosa thawm kha a rapthlak em mai a, ka thiannu hlauh nei pawha ka hriatloh pawh, a thauvah alo man a, alo khur chhe nasa mai hi alo nia.Kan ram netupa chuan, khatihlaia Kan Chowkider pa Gogoi-a ruk vek anih thu tun hnuah min hrilh a, Uipa lian tak kha an nei a, a bauh ngai miahloh avang khan, a dik pawh a dik mai thei.

Kawngchhak lama Kan Sikul tur kan peihfel hnuah kan insuan chho ta a, Fencing te atha ta bawk a, Tin, mi kan lo awm ve dih diah ta a, thil chu abo ta ngai meuh lo. Amaherawhchu, Tumkhat chu Hostel Chokaa Kan Gas set bawk chu an ru leh a ni.

Gas an ruk hian a Card an ruk tel ngailoh avangin, Gas Card chu kan ngah ta hle mai a. Sikul kan nih avangin, Customer tha kanni a, Doimukh (kan awmna atanga km 2 vel ahla) a Gas agent thar te pawh chuan, Card lo hian min pe mai thin a, Naharlagun lama kan rawngbawlpuite pawh kan kep vek zawk thin a ni.

Amaherawhchu, tunhnaia Gas harsatna hian Arunachal a rawn thleng ve ta tlat mai a. Sawrkar lam an tang a, Gas harsatna bul pakhat chu, Agent ten, Hotel, Restaurant leh Sikul hostel hote Card tellova an pek thin vang ani tih an hriat avangin, card lova lak an phal ta miahlo mai a, a buaithlak ta hle a ni. Vanneihthlak takin, kan Gas bo thin avang khan Gas Card kan lo kawl teuh; Thingrem mawnga kan dah tawl mai mai kha, an lo tangkai ta hle mai a. Khatiang khan kan Gas kha lo bo thinlo sela chuan, tun hunah hian kan va han harsa dawn tehreng em. Hostel kan run thei kher lovang le. A hunlaia hrilhhai thlak em em leh thin tiur em em mai kha, kan thatna tur alo ni reng mai le.

Tin, Mizoram state ralmuang takah kan cheng thin a, mi ramah, mi chitin-chitang inpawlhsawp na hmunah fimkhur atul zia kan hriat phah bawk a ni. Tunah chuan, Kan hostel chokaah pawh Cook tlangval pakhat leh Chowkider te kan riahtir ta ziah a, Kan inluah thar pawh security lam kan ngaipawimawh a, a him ta ang reng hle a ni. Kan hmuh phakloh hi Lalpa Pathian hian alo hmu khiau mai a, kan inven thiamlohna laiah hian inven fimkhur angaih zia hi min lo zirtir thin a lo ni reng mai.

Pathian hmangaihtu, amaha ruat anga a kohvate tan hian, an thatna tuin engkimin a lo thawhsak thin tehmeuh mai a lo ni.

Sunday chibai vek u le.

Similar Posts:

Recent Posts:

33 Responses to “Kan thatna tur?”

  1. 1
    lr hlonchhing Says:

    Tha hmasa ber ang aw

    Report this comment

  2. 2
    drake Says:

    Gogoi chu engvang a rak/au nge i zawt lo mi?

    Report this comment

  3. 3
    saint sammoo Says:

    ventilator hi kei ni mizo nawlpui hi chuan ventilation kan ti mai thin a, ka lo ngaimawh mai mai thin. i sawi dan khi a dik zawkin ka hria.. ;-)

    Report this comment

  4. 4
    PKfanai Says:

    @2 drake, post a ka sawi ang khian, “bathroom ah misual an lut” a ti a, min rawn au va, leilet lehphuh(t) ah Lui lam panin an tlan a tia, a khukri nen a um ve a ni. Pal(fencing) ka va thlen chuan, “lui an dai kai tawh” a ti a, ka va hmu ve ta lem lo a ni.

    Report this comment

  5. 5
    century child Says:

    (Y)

    Report this comment

  6. 6
    Dr John Says:

    (Y) A va tha-in a va ngaihnawm ve aw.. Pu Pk-a nge nge. Tukin Bible Study ah Rom 8:28 “all things work together for good” tih leh, Rukru (thief) anga Lal Isua lo kal lehna cc (2Pet.3:10) kha ka zirtir vak asin! Lo chhiar hman ila.. illustration-ah ka’n hmang nghe nghe tur a nia..

    Report this comment

  7. 7
    mik3s Chongthu Says:

    Gas chu bo lo pawh nise a card chu in nei tho dawn sia, pawisa gas set hnih man in seng belh a. A that zawkna ka man lo deuh NOI. Fimkhur kawngah erawh chuan in hlawkpui ngei ang.
    Pathian hian kan that na turin kan tawrh a phal tih erawh ka chiang. I post tha e.

    Report this comment

  8. 8
    PKfanai Says:

    @Sammoo, nia Ventilator hi ventilation tia sawi tlat kan tam khawp mai. @Dr.John, i reh rei vang vang hle mai, i ngaihawm pha tlat.

    Report this comment

  9. 9
    PKfanai Says:

    @Mik3s chongthu, post i chhiar chianglo nge, i manlo aw? Keimahni chhungkaw tan nilovin, kan Sikul hostelah hian naupang 155 an awm a, thawktu 15 velin an zawm bawk a, gas hmanga eirawng bawl kan nih avang leh Stove lian hmang kan nih avangin gas a hek hem hem hle a ni. Hostel hian gas bur pangai 3 leh a lian(commercial) 2 kan neih bakah Campus chhungah gas bur 2 theuh nei chhungkaw 3 kan awm a, Card lova la mai thìn khan, card hmang chauhva alak theih tak hnuah hian, gas card kan ngah hi kan chhawr tangkai ta em em mai a ni. Gas card extra lo nei nual lo ila chuan, kan buai chhe hle ang.

    Report this comment

  10. 10
    lrpa Says:

    Ekhai! lo va thawk nasa ve..experience danglam tak tak i tawng nual anih hi!

    Report this comment

  11. 11
    april Says:

    Ni e, kan thatna turin min thawhsak thin. Thil dang daih.. Nizan chu zai a rawngbawltu lar tak pakhat, mipat hmeichhiatna hman sual vang a kohhran in an phuar tak chuan a facebook status ah, ‘engkim hi Lalpa’n ka thatna tura min hruaina ani, mualphona ka tawh zawng zawng te pawh hi’ tih lampang in a sawi a. Ka rilru tete chuan, ‘thiannu, Lalpa’n hruai a tum lai che in nangma chákna a hruaibo in i awm zawk ani, tun dinhmun ah khan a hruai lut che a nih loh kha, i luh dawn lai pawh in a aw i hriat ngei kha. Mahse i palzam a, tuna i tlakna ah khan i tla ta anih kha. Mahse a khawngaihna mak tak chuan a thlahthlam lo top ang che. A zilhhauna che tuar turin inpeih la, i tuar tan mek ani tih hre bawk la. Chumi i tuar chhuah chuan testimony ropui tak ila nei ang, mahse thlemna kha lo tuar hram hram ta la zawng tun aia testimony ropui zawk hi a pe ang che mawle!’ kalo ti rilru niap niap a, ka comment ngam lem hlei lova.

    Report this comment

  12. 12
    PKfanai Says:

    @ April, Nia Pathianin sual ti turin min thlem ngailo tih bible ah chiang takin kan hmu rèng a ni. Sualin min thlem emaw, kan chakna hmanga thlemna kan tawh erawh chu a phal khawp mai. Hnehtu nitura min beisei laia hneha kan han awm thin hian, kan Lalpa Pathian rilru hi kan tina thin ngawt ang le. “ka ngaidam peìh tawh lo” tih chin a neilo hlauh a, inchhira kan sim a, alam kan hawi leh hunah min lo ngaidam a, minlo pawm leh tura a inhawng reng mai hi, kan nihlawh tak meuh a ni.

    Report this comment

  13. 13
    Dr John Says:

    #8 Pu Pk, ka hna-ah ka buai ve deuh a ni. Misual leh FB lam pawh ka lut zeuh zeuh na a, ka comment hman thlawt lo a ni e. Silent reader-ah ka tang tawp mai. Nilenga Lecture pek hnu-a Ofis-a tlai 5PM thlenga han thut leh chu… hah thlak ve tak a ni. Zing dar 4 AM hi ka thawh hun pangngai a ni lehnghal a! Quarters kan thleng hi inbual leh mut mai bak chu tih peih hi kan nei tawh mang lova, taihmak hi a har ta thin a ni.

    Kei pawhin ka Misual thiante ho hi ka ngai hlawm che-u asin aw… “Phulo nula hmeltha ngaizawng ang maiin”… misual site-a ka luh ve chhunah pawh… in thu ziak leh in thusawi-te hi ka en ngawih ngawih a, ka ngaithla liam mai mai alawm… tihngaihna awm hek lo le. Awl deuh hun chu a awm ngei ang chu maw…

    Report this comment

  14. 14
    Dr John Says:

    #11 April, i sawi dik khawp mai. Mizo-te hian thlemna kan ti vek mai a, (1). Thlemna (temptation- sual ti tura thlemna) leh (2). Fiahna (test & trials) hi thil hrang daih a ni asin!

    Mahni duhna, sualna, fellohna leh chaknaa avanga Suala kan tluk a, kan hnungtawlh hi Thlemna (temptation) a ni a, keimahni chiah-in mawh kan phur, Setana tak ngial pawh kan dem thei lo, “mahni chaknaa hruaibo” kan nih tlat avangin.

    Amaherawhchu, mahni felloh vang emaw, sual vang emaw, chak vang emaw pawh ni lova, kan rinna min tichak tur leh Belhtlak Pathian kan hriat chian lehzual theih nan-a kan chunga fiahna, tuarna, harsatna lo thleng-te erawh hi chu Mak ti tur kan ni lova, lawm zawk tur kan ni.

    Peteran a lo sawi lawk tawh a, “Unaute fiahna in chunga lo thleng hi thil mak lo thleng angin mak ti suh u, Krista tuarnaah te tuarpuitu in nih zia ang zelin lawmna hlirah ruat rawh u… Ringtu chuan Pathian a rinna avangin tuar loh tur thlengin a tuar ang…”

    Report this comment

  15. 15
    chhangte_ll Says:

    Huto Sikul ani em i sawi hi :-S

    Report this comment

  16. 16
    april Says:

    A dik a lawm! Mahse a khawngaihna ban sei zia changchawi in sual kan sawi mawi fovin ka hria. He fb status ka hmuh ruala ka rilru a rawn lang zawk chu, a bik in Zoram ringtute hian kan tlukna atanga Pathian khawngaihna in min khai chhuah lehna hi kan chhuang mai ni lovin, tlukna atang chauh a thlarau nun rahbi sawn thei ang hial in kan inngai emawni le tih ka ngaihtuah a. Harsatna kan tih tam zawk hi chu keimahni thu awih loh rah kan tuar ni in ka hria. Chu harsatna ti a kan koh chu kan ngaihlu a, a tel lova ringtu nun thang theilo hial ni a ngai te pawh kan awm nawk mai. Paula’n ‘ka chakloh apiang in ani ka chak thin ni’ ti a a sawi nen hian kan hmehbel tlangpui bawk. Hla ah pawh kan nei teuh. Bible chang i rawn tarlan khi A thuawih te chanvo ani a, mahse ‘engkimin’ a tih hi kan huam zau tir mah mah em aw kati deuh.

    Report this comment

  17. 17
    april Says:

    Tunlai ka rilru a lian ber chu, a khawngaihna ban sei zia changchawi in sual kan sawi mawi fovin ka hria. He fb status ka hmuh ruala ka rilru a rawn lang zawk chu, a bik in Zoram ringtute hian kan tlukna atanga Pathian khawngaihna in min khai chhuah lehna hi kan chhuang mai ni lovin, tlukna atang chauh a thlarau nun rahbi sawn thei ang hial in kan inngai emawni le tih ka ngaihtuah a. Harsatna kan tih tam zawk hi chu keimahni thu awih loh rah kan tuar ni in ka hria. Chu harsatna ti a kan koh chu kan ngaihlu a, a tel lova ringtu nun thang theilo hial ni a ngai te pawh kan awm nawk mai. Paula’n ‘ka chakloh apiang in ani ka chak thin ni’ ti a a sawi nen hian kan hmehbel tlangpui bawk. Hla ah pawh kan nei teuh. Bible chang i rawn tarlan khi A thuawih te chanvo ani a, mahse ‘engkimin’ a tih hi kan huam zau tir mah mah em aw kati deuh.

    Report this comment

  18. 18
    saint sammoo Says:

    april……. i ril reuh riau.
    ka thinlung ang pu mi… ti che i la….
    sawi thui lo mai ang.. kan nu in a thik ang che.. haha…

    Report this comment

  19. 19
    PKfanai Says:

    April, ani ngawt mai. Kan Lalpa Pathian nena kan inzawm leh hnua hre reng chunga kan tisual/tlu leh thin hi chu, Pathian tan chuan, thian tha ber leh kan rin em em ten min phatsan a, kan hmelmate lama an tang ang emaw, Pa tan, kan nupui hmangaih leh rin em em ten min uire san tlukin a na ngei ang. Amaherawhchu, Pathian khawngaihna leh ngaìhdam theihna sanzia erawh kan mihring ze milin kan pawthniam ngawt thiang lovang. A ngaihdamna chang nasate hi Pathian laka Lawm nasa tur pawh kan ni reng e.

    Report this comment

  20. 20
    The Biz Says:

    Hlaphuahthiam leh thuziakmiten an thiltawn atangin thu leh hla ngaihnawm tak tak an phuahchhuak thin. Chumi phena zirtur lo inphum khan thu leh hla a ti hlu lehzual. Zirtir neih tum ran thuziak/lemchan hian literary/ artistic value a paimawh viau. Sunday sermon simple leh tha tak a ni e.

    Report this comment

  21. 21
    PKfanai Says:

    @chhangte-11 (Y) . He kan thil tawn chung chang hi ka la sawichhuak ngai lova, hqr. lamah pawh report ka pe hek lo. A chhan 2 a awm a, kan project in a tuar ka hlau a. Tin, mi thilphal leh inpe tak tak an tam zia ka hrechìang si a, Gas min rawn lei sak tum an awm mai ka hlauhthawn vang a ni. Hetia misual.com a ka pholan tak siah chuan, kohhran chanchinbu pawh ka pe ve ta law law mai.

    Report this comment

  22. 22
    Dr John Says:

    #17 April, saint sammoo sawi ang khian, ka rinaiin i ril tlats! Pathian thu hi i lo zir ve tawh reng a ni lo maw?

    Ni e. “Engkimin a thawhsak hlawm thin” (all things work together for good) tih tak hi, “Mahni duhthlanna ngeia Sual lama awn a, tluk hi a sawi tum a ni lova, a huam tello a ni” tih hi chiang hlawm phawt ila, I sawi ang khian Pathian thu kan thlir dan pawh a dang ngeiin ka ring.

    Bible Scholar-te chuan Rom Lehkhathawn hi Paulan Gentile-te hnena a ziak avangin, Gentile-te zinga harsatna leh fiahna (trial & test) tawk tawh Josefa ngei kha entir nan a la chhuak a, Josefa hming hi lang kher lo mahse, Rome khuaa mite hian Paula thusawi hi an hrethiam khawp a, Josefa chanchin a sawi niin an ngai a ni. Josefa khan, a ma rilru dik lo leh lerh vang ni hauh lovin, Potiphara nupui khan a ngaizawng a, mutpui a tum a, mahse huai taka a hnial fithlakna leh a felna leh dikna avang zawka lungin hial khung a lo nih khan, Pathianin thil tha a lo chhuah theih nan leh Josefa ngei pawhin hrehawmna leh tuarna atanga thil a zirchhuah a duh avangin khang tuarna leh fiahna kha a tawh a phal a, Josefa khan pa takin a paltlang ta reng a nih kha… I sawi ang khian, “Ka chak loh apiangin ka lo chak thin, ka chaklohna-te ka chhuang tawh zawk…” tih awmzia hi chu… Theihtawp-a Pathian rawngbawl kan tumna avanga kan harsatna-te min sutkian sak tura Pathian kan ngenna hi a ni a, taksa chak lo chung chung leh thiamna leh finna-in a phak lo chung chunga Pathian ram tulna avanga hmalam pan-a kal luih hram hram, rawngbawl hram hram hi Pathian ngaiha kan hlutna, kan chakna leh kan chhuanawmna lai tak chu a ni zawk.

    Report this comment

  23. 23
    saint sammoo Says:

    i post hi chhuah chhawng dawn ta i la.. tu nge credit ka pek ang.. nang nge.. misual..????????????????

    Report this comment

  24. 24
    april Says:

    @Pu Pk, kan la ti leh hram teh ang.. :-D Ngaidamna chang a lawm tawk em em ka ni thin a. Mahse engemaw chen atang khan thlarau nun a hmasawn ngai ka nih ka inhre thar ve a, hmasawn tur chuan ‘thuawih’ hi a step hmasa ber leh ka zirlai mek ani. Ka sawi tum chu, ngaihdam fo ngai a kan awm hian kan lawm fova, mahse bul kan tan tha fo tihna ni in ka hria. Kan thleng thui thei lova, midang tan kan tangkai hman hek lova, ringtu thuawihte chanvo damchhung a tél tur a dah hi hmu lovin, thihhnu vanram chang tawk chauh in, thifa hnuk chat in kan kal ni in kahria a, a pawi kati ani..@Pu Samoo, i rilru ang pu mi dang minlo melh sak mai la..:-D

    Report this comment

  25. 25
    april Says:

    @Pu Pk, kan la ti leh hram teh ang.. :-D Ngaidamna chang a lawm tawk em em ka ni thin a. Mahse engemaw chen atang khan thlarau nun a hmasawn ngai ka nih ka inhre thar ve a, hmasawn tur chuan ‘thuawih’ hi a step hmasa ber leh ka zirlai mek ani. Ka sawi tum chu, ngaihdam fo ngai a kan awm hian kan lawm fova, mahse bul kan tan tha fo tihna ni in ka hria. Kan thleng thui thei lova, midang tan kan tangkai hman hek lova, ringtu thuawihte chanvo damchhung a tél tur a dah hi hmu lovin, thihhnu vanram chang tawk chauh in, thifa hnuk chat in kan kal ni in kahria a, a pawi kati ani..@Pu Samoo, i rilru ang pu mi dang min kawhhmuh tur i hre lo maw?:-D

    Report this comment

  26. 26
    PKfanai Says:

    Samoo, i thu thu ani e. April, Pa tan Nupui rinawm tak neih nge hlu ang, Nupui uire ching deuh, mahse ngaihdam rawn dil a, tap zawih zawih thin, mahse, ngaihdam hnu lawka uire leh thin neih? A chiang mai tiraw?… :-(

    Report this comment

  27. 27
    malsta27 Says:

    Tha viau mai, kei hetiang lamah hi chuan engti turin nge min duh tih hi ka ngaihtuah fo thin, mahse a rorel dan te hriathiam a har in chhut thiam a har thin, mihring zawng tak a mahni thatna han tih ang zawng hi chu rilru ah awm lo ve khawp thin mai…….ziak tha lutuk e.

    Report this comment

  28. 28
    As_khiangte Says:

    A ngaihnawm rem rem ngei mai, PKfanai chu tawn hriat i nei tha thei hle mai.

    Report this comment

  29. 29
    houdini Says:

    Ha ha ha! A nuihzatthlâk bawk, a ngaihnawm bawk. (Y)

    Ka chhiar tui nasa mai. (Y)(Y)

    Vah thui nge nge hi chuan tawn-hriat te pawh hi kan lo ngah a, a lo tha a ni.

    Report this comment

  30. 30
    Jacka Pi Says:

    (Y) a thu ken laimu chu a va dikin a va han tha tak em!

    Report this comment

  31. 31
    Dr Mahminga Sailo Says:

    A hlawkpuiawm thin teh e… (Y)

    Report this comment

  32. 32
    chhingdailova Says:

    Pk, Nimin zing lamah a chhuak hman lovangin ka chhiar hman lo a. Ka inkhawm ka haw tlai bawk nen, nimin chu chu i thu ziak a awm lo a ni maw ka lo ti hman a sin.

    He thu hi tun lai chu ka hun tawng nen a in hmeh em a ka bible chang duh ber a ni tlat. Hman ni ah mitthi thlahna ah kan pastor in he mi chang hmang hian sermon a thlak a,a hnu lawkah kan bial inkhawmah nula pakhat in a rawn chhiar leh bawk a. Hei ngaihnawm deuh in i rawn ziak leh a. Ka hun tawng nen hian a in hmeh khawp a, tun lai chu ka rilru luah tu ber a ni. ka lawm hle mai.

    Eng tiang takin nge Pathian in ka hun tawng hi ka thatna tur a ni tir ang tih ka hre thiam lo. Tun hnai a thlen tir nghal lo mai thei bawk. Mahse, hei hi erawh ka ring nghet ve bur a, Pathian hian ka chung thil thleng hi ka thatna tur in rem min ruat sak a ni ang tih hi.

    Report this comment

  33. 33
    PKfanai Says:

    @32 chhingdailova, a hunlai hi chuan hriatthiam a har thin. Tunlai gas harsat zual lai tak maia miin vawikhat an lak laia gas card extra ngah avanga vawihnih han lak theih bik chiah hian ka hrethiam ta chauh a lawm. Kum 7 lai aliam hman a sin.

    Report this comment

Leave a Reply

You must be logged in to post a comment.