Bawnghnute no hnih (Sunday Pual)

June 17th, 2012 8:30 am by PKfanai

Thingtlang Motor pawh luh phak lohna hmuna awm annih tlat avangin, College zawm tur pawh chuan nilenga ke a kal hnuah motor man theih tawk a ni a. A lo tihfo tawh avangin tun tum chu thlahtu mumal pawh neilovin amahin a thawkchhuak a. A khua a harin nisa vawl vawl avang chuan a thlan te a chhuak nasa a, a chauvin a tui a hal tawh kher mai. A hma lawkah chuan khua han tih tham pawh ni meuh lo; Leilet awmchilh a, bawng te pawh vulh nghal in 4/5 vel hi an awm a. Chu khua chu thlen theih hram tumin a han kal leh hram hram a, a tawp atawpah zawng a thleng ve ta hram a.
In lo awm hmasaberah chuan tleirawl chhuak deuh awrh nula biangtai tek mai hian zai rat rat pahin bawngchaw alo pe a. Chu mikhual tlangval chuan, hawihhawm takin tui in tur a han dil ta a. Chu tleirawl chuan chu tlangval chauh zia leh a thlanin a kawr a bual huh vek tawh dan a han hmuh chuan, thuhna tur a pe a, an kawta thingbuk daihlim hnuaiah chuan a thut chawlh tir a, inchhungah chuan a luhsan ta a.

Reiloteah chuan a lo chhuak leh a, no khat pam hian bawnghnute thianghlim tak mai chu a rawn keng a, chu tlangval chu a pe ta a. Chu tlangvalin chu bawnghnute a han in mai chu, tui a ti kher mai a, thawkpawh la mang lovin a in ta khawlh khawlh mai a ni. A hmelah chuan a la khamlo a ni tih a hriatin tleirawl chu inchhungah a zuk lut leh a, bawnghnute no khat pam dang a zuk la leh ta a, chu chu a han pe leh ta a. Chu tlangval chuan tui ti takin a lo in leh a, tunah chuan a chhawlhal pawh a reh ta raih mai a, tlangval thaza rual ani bawk a, a hah pawh alo dam fel leh ta bawk a, “Ka lawm e, ka lawm tak zet mai, ka chunga i thatna hi ka theihnghilh leh tawh ngai lovang” a ti a, khawpui lam pan chuan a kal leh ta a ni.

Hun leh ni te an ral zel a, chu tleirawl pawh chu, nula hmeltha taka lo ni ta a. Nimahsela, a nu chuan natna khirh tak mai alo nei ta tlat mai a. Chu chu namen lova a pum na thin chu a ni. Tichuan, a tawp a tawpah chuan khawpui lam pan an lo rel thlu ta a. a lehkha thiam ber leh a tlawngawl ber anih avang chuan chu nula chuan a hruai leh awmpui alo ngai ta a. Khawpuiah chuan Private damdawiin lian tak pakhatah hian an in admit ve ta a.

Chu damdawiinah chuan Test hrang hrangte an han tih zawh hnuah chuan a natna chu Chhul Cancer tantir ani tih hmuhchhuah ani ta a, ‘Chhul paih mai chu kawng awlsam leh tha ber anih thu pawh Doctor chuan a hrilh ta vek a ni. Tichuan, chu damdawiin neitu Doctor thiam tak mai chuan amah ngeiin zaiin a chhul chu paih alo nit a a, uluk taka damdawi tha tinreng nena hun engemaw chen enkawl anih hnuah chuan chu nu pawh chu alo dam fel ve leh ta a, damdawiin pawh an lo chhuahsan thei dawn ta a ni.

Amaherawhchu, an chhuah hmaiin, Damdawiina an awmna bill chu pek tlak fel phawt chu alo ngai dawn ta a. A tuk zingah chuan Envelope pakhat hi Nurse pakhat hian a rawn pe ta a, chu nula chuan envelope chu a han hawng ta a, a nu damdawiin awm bill chu alo ni reng mai a. A han chhiar thla ta a:-

(1) Test chi hrang hrang man – Rs. 25,000.00
(2) Damdawi man – Rs. 12,500.00
(3) Chaw man – Rs. 5,000.00
(4) Zai(operation) man – Rs. 20,000.00
(5) Nurse etc.service charge – Rs. 5,000.00
(6) Cabin fee – Rs. 15,000.00
Total – Rs. 82,500.00 (Cheng singriat sanghnih zanga)

Tih hi a lo inziak that mai le.

A thlanfim a rawn bawl ta tak tak mai a, a sa huam huam hian hian a inhria a. Kal man leh eng eng emaw manah an pawisa neihchhun tlemte an lo hmangzo deuh thaw tawh si. An tanah chutiang ang sum tam lutuk chu khawi atangin nge an hmuh/neih theih tak ang le? A rilru a hah ta kher mai.
Bill chu a han ennawn leh a, a hnuaiah chuan kutziak chhiar har ang reng tak hian Doctor note: hi alo inziak a; “Heng zawng zawng hi bawnghnute no hnihin a rul vek tawh” tih hi alo inziak a, Chu damdawiin neitu Doctor ngei mai chuan a seal chhu kalhin a hming alo sign hnan thlap hi alo ni a.
Awih mai ava han harsa dawn tak em! Chu nula chuan mak a tiin a ngaihna a hrelo kher mai. Nurse duty a han zawh fiah chuan, Doctor ngei chu an va ko ta a, Hmana Doctor a zir laia tuihal dangchara, chau hlum lo chauha a awm laia a chunga that chhuah a, an thil neih hlu ber mai, an sum hmuhna hnar bawnghnute no hnih a peka kha ani tih leh, Doctor thiam leh lar tak loni tain, amahin Damdawiin lian taka lo hawn tak thu te, kha a chunga a thiltih kha rulh let leh ngei a duh thu leh, hei hi a rulh let leh theih dan ni a a hriat thu chu a hrilh ta a ni.

Kan Bible chuan, “I chhang paih la tui chungah chuan, i hmu leh dawn si, ni rei hnuah. Chan tur pe la, mi pasarih, pariat hnenah, i hre si lo, lei chungah hian thil tha lo, lo tla tur chu” (Thuhriltu 11:1-2) tiin min hrilh a ni. Mite chunga a let leh tur ngaihtuah miah lova, khawngaihna leh thatna avanga thil kan pek hi, hun thalo kan chunga alo thlen hunah te kan chungah chiahpuam chungin alo let leh thei tlat a ni.

Kan Pa Pathian hian kan sual man bat zawng zawg hi, a Fapa hmangaih thiltih inpekna ropui avang khan a man pek tlak vekah alo ruat dim diam tawh a, keini zawng lawmthu sawi mai tur leh amah chauh chu faka, a tana rinawma, thuk lehzual zawka inpe mai tur kan lo ni e.

Similar Posts:

Recent Posts:

18 Responses to “Bawnghnute no hnih (Sunday Pual)”

  1. 1
    chhangteval Says:

    Ka chhiar peih rih si lova, ka comment tal lohvin (H) Nakin deuhah chhiar ang..

    [Report abuse]

  2. 2
    buhtlei Says:

    good news (Y)

    [Report abuse]

  3. 3
    chhingdailova Says:

    E khai a va tha in a va ngaihnawm leh pek ve le aw, chhiar a manhla thin e.

    [Report abuse]

  4. 4
    sheldon Says:

    He thawnthu hi ka chhiar tawh tih kan sawi tel phawt, a version tlemin a danglam na a. Entir a nei tha ka tia, kan thiltih chhiat leh that hian kan damlai ngei hian min umpha thin.

    [Report abuse]

  5. 5
    Chhuaklinga Says:

    A ngaihnawmin a tha leh pek hle mai. (Y)

    tren tren

    [Report abuse]

  6. 6
    century child Says:

    (Y)

    [Report abuse]

  7. 7
    PKfanai Says:

    Sheldy, nia he thawnthu hi kan naupanlai(1970s) a Seventhday evangelist pakhat sawi ka hriat a ni. Kan thil tihthat/tihsual ten kan damchhung ngeiin min umphak leh itih pawh hi ka pawm thlap mai. Kan tlangval laia kan nun pawlawh tak te pawh khan tun thleng hian min la tizak thin ania.

    [Report abuse]

  8. 8
    sheldon Says:

    Pu Pk, i rawn chhawp tha thei khawp mai. I taima e. Hetiang thu, entir nei tha hi a hlu. Heipawh hi a ri in ka chhiar a, an ngaithla thap mai.

    [Report abuse]

  9. 9
    Pakak Says:

    He thu hi a ngaihnawm ka ti tawp (Y)

    [Report abuse]

  10. 10
    Maisek Says:

    Ngaihnawm hle mai, ka trap trep! Pathian min hmangaihna ropui zia i sawi fiah thiam hle mai…

    [Report abuse]

  11. 11
    TuaiSialA Says:

    A ngaihnawmin a tha kher mai. Tlai ni nêma thingbuk hnuaia tlangval thu chawl, nulain bawnghnute a pêk a in khawlh khawlh laia a bula nulain ding reng chunga a lo en hi a thlalakin ka hmu châk! A romantic tawp!

    A zirtir a tha e. Thil tha tih hi i ning lovang u. (Y)

    [Report abuse]

  12. 12
    PKfanai Says:

    Tsa, hemi ka type lai hian mishing kristian nula, an leilet bula an in chhetea cheng, Guwahati a Damdawiin lian pakhata Doctor thiam tak pakhatin a duh tlat si a, kristianah inpe hiala a neih tak kha ka rilru kil khatah a awm ran reng tak asin. OT. Indonesia open Badminton ah India nula Saina Nehwal chuan China nula Li Xuerui hnehin a Champion e. US dollar 48,750 lek a dawn tak kha. Mipa final an khel mek.

    [Report abuse]

  13. 13
    malsta27 Says:

    (Y) (Y) ……..

    [Report abuse]

  14. 14
    Princess Ilefam Says:

    A van tha em….midangte tanpui thatzia leh pekin lukhawng a neihzia a ti lang chiang hle mai. (Y)

    [Report abuse]

  15. 15
    Kawhterenga Says:

    A va han ngaihnawm dap dap ve le :-P

    [Report abuse]

  16. 16
    vakul Says:

    va ngaihnawm ve..hetiang deuh hi ka hre tawh. sir Randolph churchil kha MP a nih laiin a bial fannaah a sakawrtawlailir a tang a..a ngaihna an hre lo khawp.

    ngaw hnuai atanga tlangval tleirawl lo chhuak chuan a pui ta a..a rorel dan chu fing a ti khawp a..enge a duh ber tia a han zawh chuan ..lehkha zir..tiin a chhang a. a zirtir ta a a thiam thei em em bawk si a.

    kum tam tak hnuah mp fapa winston churchil chu a dam lo ta vak a..tichuan chu tlangval Alexander Flemming a damdawi hmuhchhuah penniciline lo chuan enkawl dam theih a ni lo va…lehkha zirtir theitu fapa chu a enkawl dam ta a.

    [Report abuse]

  17. 17
    cotdarz Says:

    Good Post (Y)

    [Report abuse]

  18. 18
    bbney Says:

    #16 vakul: Hei hi ka lo la hre ngai miah hleinem, a lawmawm e.
    Post ngaihnawm leh zirtir nei tha tak a ni. (Y)

    [Report abuse]

Leave a Reply

You must be logged in to post a comment.