Ka Nu Tana Lal Remruat!

June 29th, 2012 8:00 pm by Dr Mahminga Sailo

Chunnu dam thei si lo
Kum 2007 khuangchawithla atangin ka nu chu, taksa khing chak lovin a awm tan a. Phak tawk bak sum inpuk chawp hialin damdawi inah hruaiin kan buaipui ve a. A thluaka bawk/chawr emaw awm, enge a nih hriat chian theih loh chuan a ngaihtuahna a tibuai deuh thin a. Lungleng leh mal em ema inhriat chang neiin; a bula ka thut reng pawn, a lunglen a chhuah chuan, min ngaiin a tap fo thin. A fapa thlahlela min ngai kha chu ngaihthiam loh chi a nih loh laiin, a rilru buai avanga lunglenga a tap fo erawh a taksain a tuar si; ka va’n lainatawm thin tak!

Mampui, Pathian hian ka dam a remti lo a niang!
Nia tiraw ka nu, tia beidawng taka chhan mai a chakawm thin. Mahse chutia chhan chi a ni miah si lo.

Doctor thiamnaa kan beidawn hnuin, tawngtaidam thei leh zutdam thei kan hriat apiang kan pan kual zut a. Mi thenkhat te’n damna an changlai, a mit ngeiin a hmu thin a. Ani tan erawh dam ahnekin, a natna chuan zuallam a pan tial tial si. Khatia natna vei e ti lo khan; zo hna thawk thang chu, hna thawk lova a’n awm khan a hmeltha suah lawi si! Chhungkhat laina, a chanchin hriaa rawn kan te paw’n, dam lo pawh a nih mai mai loh kha a ti haw tawk an awm fo, an hrethiam tlat si lo.

Lal remruat
Mampui, kei atan hian damna hi a awm tawh dawn lo a nih hi, ka va’n mangang tak em tih chang a nei fova. A chang leh, a nunna lasak mai turin Pathian hnenah a tawngtai fo. Hetia a beidawn changa, ka thiam tawka ka hrilh thin chu hei hi a ni.

Ka nu, Isua Krista khawvela a lenlai khan; mi hrang hrang natna mak pui pui tuar/vei a tidam thin. Mahse a tihdam dan erawh a inang vek lo asin. Mitdel pakhat chu, a mitah chirhdiak a hnawih sak a; hmai a phih hnuin a mit a var a. Hmeichhe thiput reh thei lo erawh, Isua’n tihdam a tum hmain, a rinna nasa tak zawk avanga Isua kawrfual hmawr a deh zeuh avangin a thiput a reh thung. Chutih rualin, Lazara erawh thlana ni li lai an zalh tawh chu, awlsam takin a ko chhuak lawi bawk si. Pa pakhat zeng natna avanga tho chhuak thei miah lo hnenah, tho la kein kal tawh rawh a ti ngawt a, ani lah a pawnthuah telin a kal thei nghal mai bawk

Chuvangin, I damna tur hian Pathian hian remruat lawk a nei a. I damna tur chu kan la tawng ve ngei ang tiin ka theih tawpin ka hnem ve thin.

College chawl ka haw laiin, vawi duai lo min ngaih avangin tah tak takin a tap fova. Pathian ni chawhnu vawikhat phei chu, kan unau zain a mutna khumah kan thut hual tiau a. A lunglen a chhuak leh ta, a ngai tein a tap. Tihngaihna ka hre lo chuan, ka nu khawngaihin tap tawh suh, I bulah kan awm vek e. ka ti a. Ani lah chuan, min kalsan leh thuai dawn si alawm a ti bawk si. Ka unaute ka kuahkhawma, tawngtai ka rawt a. Ka nu ka tawngtai dawn, khawngaihin ka tawngtai lai chuan tah awih loh, ka ti a. Insum tak, inhnit hlawp hlawpin ka tawngtai chhung chu a awm a. A tap bang ve mai. Natna mak tak chu a va ni chiang em! Ka nu natna tawrh ang kha, tu tawrh atan mah ka duh lo hul hual.

Ka nu dam na’na Lal remruat!
Kum hnih chhung zet, natna ngeiawm zetin ka nu a bawhbeh hnu chuan, thatlam a pan ve hret hret niin kan hria a. Kan va lawm tak em! Ka pa nen, inkuah rial rialin, zawi te tea kalin an inkhawm thin.

Mahse, a va’n rei lo rua em! Ka zirna chhunzawm tura ka kal dawn kar khat velah chuan, khum betin a na leh ta. Lunglenga tap thei pawh a ni ta lo. Ka theih ang tawkin, thisen chaw (drips) te khaisakin ka buaipui chawt a. Mampui min kalsan tep tawh si a, I kal hunah tu’n nge min enkawl ang? a’n ti he haw thin a. Chhanthiam a har thin khawp mai!

Ka zirna chhunzawma ka kal hnu thla thum velah chuan; ka hrih thin Lal remruat chu ka nu chungah a thleng ta. Tisa damna ni lo, lei anchhedawng hnutiang chhawna; chatuan nunna chang turin, a lei hringnun tihtawp a ni ta zawk a nih chu! Chu Lal remruat chu, a sawitu hian mak ka ti a, ka hrethiam lo lek lek. Mahse, ka nu natna khirh tak tawrh ka ngaihtuah a. A chahthlak dawn a, a hmel hmuh a hrehawmzia ka unau te’n min hrih hnu chuan; thlamuang taka a chawl kha, lal remruat dik tak a lo ni reng zawk tih harsa ti takin ka hrethiam ta a ni.

“Keini’n vanduainaah kan ruat,
A hmangaihna lantirtu;
Mahse thlaphan mangan buaina,
Lawm nan a siam ta zawk a”

Similar Posts:

Recent Posts:

20 Responses to “Ka Nu Tana Lal Remruat!”

  1. 1
    Ruata Pachuau Says:

    .

    Report this comment

  2. 2
    Chhurbura Says:

    (Y)

    Report this comment

  3. 3
    malsta27 Says:

    Pathian remruat dan hi a chang chuan hriathiam a har thin a sin…..mahse a fel vel vek ni mai engkimah. (Y) (Y)

    Report this comment

  4. 4
    saint sammoo Says:

    doc.. Ka tuarpui che.
    Kei pawh ka nu sunna hla ka la post ang.. A tan chuan thihna kha damna a ni miau mai si a…
    Ka Chun nu a dam ta,
    Kei erawh ka fam ta…. Tih lam pang………

    Report this comment

  5. 5
    Mx Says:

    Rilru a khawih hle mai :-S A hunlai chuan mihring ve mai tan chuan tawrhthiam ava har dawn em!
    Pathian remruat dan lungawi tak a i pawm thiam hi ka lawmpui che.

    Report this comment

  6. 6
    Charice_mizo Says:

    lainatawm hle mai i nu chu, mihringte hian kan nunna chungah hian thu kan va’n nei lo tak em, mahse Pathian pawh hian a turathiam tur leh a chhel chhel te chungah hian harsatna leh vanduaina a thlen tir thinin ka hria, mi thenkhat chuan tuar thiam lovin Pathian an hlat phah fo si a.

    Report this comment

  7. 7
    sheldon Says:

    Mahminga, i post chuan min vel tep mai. Nu sun tawh te chuan i rilru nat dan kan hrethiam vek ang. Nia, thihna hi damna a ni reng ani. Ka nu boral tur kha ka mitthla ah a la chiang lutuk. Na tuar hrehawma a dam reng ai chuan Chatuan damna kha ka rilru in ka tawngtaina ani.

    Report this comment

  8. 8
    chhana Says:

    Lal remtuata i pawm thei chu a ropui hle mai. Pathian hian kan thatna tur hlirin ro a rel thin a; mahse, kan duh ang erawh chuan a ni vek kher lo tih hi hriat a tul khawp mai. Pawm har tih chang erawh a tam.

    Mahming, i puitlin thlengin i nun a dampui che a, i vannei ka ti. Kei chu kum 10 lek ka la nia, a kal nite khan naupang ta chu chhungte lo kalin pawisa te min pe in min duat si a, nuam kan la ti teh a nia.

    Engpawhnise, i nu chu Pathian angchhung thianghlimah hlim takin a chawl tawh a; a hnen kal ve thei ngei tura in buatsaih hi a pawimawh ber chu a ni mai e.

    Report this comment

  9. 9
    Dr Mahminga Sailo Says:

    @ malsta27.. A dik chiah.. (Y)

    @ saint.. Ka lawm e. I nu sunna hla chu lo post thuai teh.

    @ Mx… Ka nu boral ni hi, PG ka zira exam ka tan ni tak a ni a, a hrehawm duh ang reng. Mahse, thlamuantu Isua ka nei erawh ka vannei teh e…

    @ Charice… Ka nu tana tih theih nei tlemin, hun hmanpui tlem mah ila, min thlahlelna leh min ngaihna zawng zawng kha ka phu lo zawkin ka hre thin. Nute hmangaih tak hi chu aw ti r’u..

    @ sheldon… I nu ruang i kil chu i nihlawh e. Ka nu boral kum khat hnua ka haw khan, zanreiah mahniin an vui lai video ka en fova, hnuk a ulhin lung awi loh rum rum chang a awm fo. Tin, ka inchhung hi a ruak tlatin ka hre thin, ka pa, u leh naute nen hlim mah ila..

    @ chhana… A ni maw? I nu i chan hma hle tak mai. ;-( Vawk chhul/til ka lak hlawh a, ka nu sangha duh tak ka lei sak kha, vawiin thleng hian theihnghilh har ka ti thin… ;-(

    Report this comment

  10. 10
    mamboihi Says:

    Mahming rilru i ti thar vawng vawng, kar leh mai khi ka nu duhtak in kum 2 kal ta a min boral san champha a ni a, mittui hi control a har thin a ni. ;-(

    Pathian remruat a i pawm thei hi a va tha tak em.. kei pawh vuina pakhat mah ka nei lo, mahse ka ngai thin a ni.

    Ka nu leh pa ruang ka hmu lo ve ve, video a en leh en chhung zawng mittui a tla zel bawk si..

    Report this comment

  11. 11
    Kawhterenga Says:

    Lal remruat’ tithei khawpa rilru puitling i pu thei hi i fakawm hle mai. (Y) Kei ni ila ka tuar thiam mawlh lo ang.

    Report this comment

  12. 12
    Dr Mahminga Sailo Says:

    Min fuihna leh thlamuanna tawngkam hriat a nuam hle mai.. (Y)
    Nia, ka nu kha thi mai turin ka ngaihtuah ngailo, ka phal bawk hek lo. Ka kalsan dawna a dinhmun tha lo tak kha hre reng mah ila, a damchhuah leh hram ka beisei tlat a. A boral hi awih loh thut chang ka la nei fo nia!

    Report this comment

  13. 13
    lr hlonchhing Says:

    Ziak lungkuai hle mai. Mahse, ka’n ti ve mai mai teh ang. Lo la na lem lo la. Kan chunga thil thleng tam tak hi Pathian ruat ngei a nih rualin, engkim mai Kristian kan nih avanga Pathian remruat anga kan puhthlu vek erawh a dik lo hul hualin ka hre thin.
    Kum eng emaw zat a liam ta. Class-V ka zir lai hian, ka hming min phuahsak tu ka pu Doliana chuan; vanvawm khua min lo chansan tawh a. Miten Pathian remruat a ni, indawmkun reng suh min ti tu ka tawng fo mai. Min boral san hnua kan chhungkaw rawih tak mai ka hmuh chang hian, tah mai a awl thin. Rethei leh bakberha kan awm hi Pathian remruatah ka ngai thei hauh lo(tun thlengin). Ka lo â pawh a ni mahna…

    Report this comment

  14. 14
    mamboihi Says:

    Lr (Y)

    Ka nu damlai kha chuan ka pa thih anniversary hian ka nu ka call thin a, tunah zawng ka unau te tu ber nge call tur ti te hian ka in ngaihtuah thin..

    Lawmna leh lungngaihna te hi nu leh pa hnena sawi kha a nuam ber a, tunah chuan tu ber nge ka hrilh tak ang?….

    Report this comment

  15. 15
    Dr Mahminga Sailo Says:

    @ lr & mamboihi… In thlir dan ka pawmpui tho che u.

    Nia, mihring taka ngaihtuah chang chuan vuina tur hi zawng a tam thin teh a nia. Mahse, ka nu natna bikah kha chuan, Doctor te’n eng natna nge tih a hre chiang fak thei bawk si lo. A thluaka thang/chawr awm, a lung tha lo, thisenzam tha lo, adt., avanga hrehawm a tawrh reng ai kha chuan, a nun thlahlel tak chungin, a chawlhhahdam kha, atan a nuam zawk si. Sawi tur a va tam em!

    Report this comment

  16. 16
    houdini Says:

    ;-(

    Nun hi a va lungchhiatthlâk ṭhìn tak êm, a cháng hi chuan!

    Report this comment

  17. 17
    tristinabelvawtu Says:

    keipawh ka nu kha kum 5 chuang khum thawhsan theilo in a awma, nikum khan min kalsan ta. A natuar hmel ai mah chuan a beidawng hmel leh a mittui tla a ruka a hru thin hmuh kha na ka ti ber mai..

    Report this comment

  18. 18
    Maisek Says:

    Mahming, ka van lainat tak che em, ka nu in min la dampui, ka pa erawh in chatuan ram min pansan tawh! nu leh pa te hi an va han hlu tak em… kan ngai bang dawn lo anih hi… mahse heng zawng zawng hi Pathian rem ruat vek ani si…Pathiana kan innghah phawt chuan, rilru hreawm hi min lo chhawk zangkhai thin anih hi…

    Report this comment

  19. 19
    laldoma Says:

    Lal remruat dan hi chi hrang2 a awm a, tuna in chunga thleng hi mihring ten a kan huphurh ber, mahse ringtute tana kumkhua a kan chawlhna tur hmuna kan kalna nisi a ni. I tuarthiam hle mai. ISUA neitute tan chuan helei aia nuamah an awm dawn a ni tih kan hria a, chu chuan thlamuanna min pe thin a ni. I nu thihna chu ka tuarpui hle mai che.

    Report this comment

  20. 20
    Dr Mahminga Sailo Says:

    @ tristinabelvawtu.. I nu chuan a tuar rei hle mai. Hetianga ka tawnhriat ka sawilan chhan pakhat hi chu, ka vanneih zawk zia hriatna atan a tha ve tlat. Vanduai bik reng kan awm lo, LALPA remruatnaah tih hla chang hi ka sa nawn fo thin..

    @ maisek… Ka lawm e. Nia, nu leh pa te hlutna kan hraitchhuah hian a lo tlai dawn tawh thin fo ti raw. Pathian kan nei erawh kan nihlawh teh e..

    @ laldoma… HE, who heals me tih ka chhiar khan Lalpa’n kan tana min ruatsak hi ka rilru a lang lian hle a. Ka nu chungchang hi ka sawi zing viau na’ngin, inthlhrung tak chungin ka’n post leh a ni. Pathian hi a tha teh e.. (Y)

    Report this comment