TUIKHUR

May 31st, 2012 1:11 pm by LaMea CâcTùs FLh

Khuanu remruat anih vang nge, tu pa tuh leh enkawl nimiahlo mahse hunin a herchhuahpuiin April par mawi tak mai te chuan a mawina a chhuah a. Boruak ain thlak a, sikni eng boruak vawt leh dairdiak mai te chuan kian zai relin, nipui lo hertur chu hmuakin vanpui te chuan an ziarang leh sakhmel thlakin chunglam rorel zawmin hmalam hun panin an zia an chhuah chho a. Nipui boruak a thaw tanin vawkhniakzawn khawpin ruahtui ala tam lova, tuikhur lama tuikang nghak thawm te erawh thal zualpui a reh tawh avangin tam em em lo mahse, Pu.Khuma bawng no neih thu te leh Zatawni muala sava hmawngkung tlan an tam zia leh awh a nawm zia te tui ti taka sawi ho tham erawh an awm reng si. Kan khaw lama ka haw lai anih avangin tlachham em em lo mah ila, thawhlehni a PHE ho tui rawn sem, kan veng lam pipe a chian loh avanga nidang aia kan dawn tlem avang leh tihtur em em ka neihloh avang chuan tuikhur lam pan chuan ka inkawt chhuak ve ta a.

Kan veng tuikhur hi khawhmawr lama awm nimahse kan veng dawrkawn, Pu.Romana te in bul step a chhuk a, chuta tanga Mohana Chhang ur in bula ding pen niin, a hla em em lova. Step chhuk a ulh deuh e tih lovah chuan a kai pawh a nuamin a ruam a cham a, tui tin 2 kawt chhung pawhin hah hman lovin kan thleng zung zung mai thin. Chu zawng ai cuan tuikhur thlen hma a kawng sir tawn tawn a April kung in tlar thla, kan khaw Lal thin Vankhuma Sailo in a lal laia a phun te chuan a hmun a ti mawiin nula leh tlangval tan pawh tuikang nghah ati nuam a, naupang tan lah tual chaina hmun tha aniin chu aimah chuan hmangaihna in a bual mek nula leh tlangval tan zawng kan khua ah ro ro chuan he tuikhur hmun baka hmangaihna parmawi chhuah tirna tur leh duhber te nena lendunna atana hmun thlanawm a awm chuang silo, mi khua te tan zawng thlanmual leh helipad tlang te hi hmangaih te lenna ni mahse kan khaw tan zawng he tuikhur leh a vel baka hmangaih te lenna tlang nuam leh thlakhlehawm a awm silo.

Nia, kan tui mahmawh em em vanga he tuikhur pan hi ka nilo tih chu a tun an hre loin, min hmu anih chuan ani chuan a hre mahna. He hmun ngeiah hian vawi tam kan leng dun a, kan ngaina a, vawi duailo tuikang nghah pah bakah hunawl hnawh khah nan leh lendun nan zawng nula tlangval tam tak angin helai hmun hi kan tan a hlu a, vawi duailo kan kal si. Ka la hre reng, ka hmuh hmasak berna pawh kum 14 mi ka nihlai niin kan sava veh hawin a U insu a kalpui kan hmu anih kha, ani chu kum 11 mi niin ka hmuh hmasak atangin hmeltha ka tiin min engemaw hip nghal a. Tul miah loin ka tukloh (sava chikhat) perhthlak ka bual phah a, a tawpah phei chuan ka pe ta nghe nghe anih kha.

Kum a tam a, a tira ka star ka tih leh a hnu kum 2 chuang ka biak that ngamloh kha kan innel chhoin nulat tlangval khawvel kan chhuan chhuah hnu leh vawi tam ka len hnu leh thian anga kan in kawmngeih hnu ah biahthu ka hlan ta nih kha. Kum 3 kalta kha aniin Krismass dawn hnaih ani a, tui a harsa in zanlama tuikan nghah kha keini ang rual kha chuan kan thlahlel in a tam pawh kan tam tei hle thin. Thal lai anih vang nge tuiput a muangin tin khat nghah chhung pawh a rei hle a, U Hrangan a guitar hrui kimlo a rawn keng in kan zai nasa in kan thawm pawh a tha hle . Nimin a thleng ang main kala hre si, a tho a khilai April kung hnuaiah khian thu in a zai ret ret a, a bulah ka han thu chhoin khatah ngei khan ani ka hmangaih tih ka hrilh a, ani pawhin min chhan ni.
Ka thinlung lawmin a zai a, khawvel te hian enna thar an neiin thlasik boruak vawt tak maiah chuan shawl hnuaiah kut in hum sakin tu hriat ve phak lohin biahthu kanin hlan a, kan nui a, lawm avangin tu dang kan ngai silo. Ani ka han ti ngawt a, a hming tak chu Ramengmawii niin kan khaw mihlun Pu Romawia fanu tlum ber, nula chum lampang vun ngo leh k thianpa sawi dan takin hmeltha vur tihtur nilo mahse “Hmangaihawm tak” ani, a pa hi kan khaw parawn leh pi leh pu atanga leilet, huan neitha thei leh neinung tak chhungkua anni a. A Pu, Pu Chhawntluanga hi kan khaw kohhran hruaitu hmasa leh khaiding tu hmasa kan khaw kohhran a din tirh atanga Upa a an thlan hmasak ber leh Zosap missionary te nen pawh a inthian tha tak anih bakah an chhungkaw thlah ho hi Kohhran leh Khawtlang tana mitangkai leh zahawm tak anni bawk.

Tichuan hun alo kal a, thla leh kum a liam, kha thla 12 liam ta khan nupa tuak tam inthen hmel te leh thihna avangin mitam inthen tir mahse keini ah zawng thenna thu chu sawiloh, kan inkar a hnuk hnaiin kan inhmangaihna par a khah liam tir nitin a, inhauh leh hmel hlimlo inhmuhni te rawn thlen tir mahse thenna thu inhlan tur em khawp buaina a keng tel silo. Tichuan pawl 12 ka zawh hnuin a bak zirna awm talo chu Aizawl lama ka Patea te bula awma B.Sc chhunzawm tur chuan ka liam a tul hun a rawn thleng ta a. A dik alawm, nulat tlangval inngaizawng tan chuan kar hla a awm baka thil hreawm leh rilru thlak danglam tir tu a awm silo. Mahse, “Buangpui” tia ka koh ka hmangaih Ramengmawii kha kei chuan ka ring a, a thinlung ka tana a hlan tawh chuan tang dang a kan dawnlo tih Mizoram khawpui chu Aizawl ani tih ka hriat chian tluk zet hian ka chiang si.

Mak iti mai thei, mahse ka ring sual lo asin. Kum 3 ka awm bosan chhung khan minute khat te pawh a thinlung tihnghinin a awmlo tih ka hrechiang si. Mahse, inti teh ang ar talh dan pakhat chiah a awmlo antih ang deuhin inthen dan chi khat chiah awm silo. Karhla a awm nimah ila, vawi tam lehkha kan inthawn in phonein kan inbia a, kum khatah vawi 2 haw thinin kan inhmuh chhun ah te ka inthlahlelin kan induhna a zual zel si. 3rd year ka zir tan kum atang khan kan inngaihzawn rei an rin loh avanga eng tehuala an ngaihloh chu a chhungte chuan kan inkar ngheh zia thlirin kan inkar ah hem thlak tumin amah lam chu inthen turin an kar tan ta. Vawi tam tap chungin mi rawn bia , min hmangaih thu te min hrilhin “ka rawn haw dawn ami” ka tih leh a ngailo a tisi. Nia, haw ngawt mah ila engmah a sawt dawn silo. B.Sc ka zawh meuh kha chuan kan inkar ah kak zau tak siam ani tawh a, kum khat chhuga a chhungte hem thlak thlak khan kan thinlung tinghinglo mahse kan chhungkaw hnih inkarah leikhi kak zau tak awm sa (kanlo hriatloh) chu tinung tharin a khaw pum titi ah kan chang tasi. Chhuanlam tha tak M.Sc zir zawm alo ngai ta nen tihtheih a awm silo thenna biahthu inhlan silo in kan inthen ta a. Tawrh zawng a har ani.

Keini hi Roman Cathloic niin ka pu hi kan khua ah chuan kan Kohhran khaipa ber leh dintu te zinga mi a ni a, kan khua chu rambuai chhoh velah Sap father te innghahna alo ni chho nen Presbyterian lam nen boruak thalo awm siloin an inkarah engemawni a awm ani awm e. Chu boruak chu Sap father tena School siamna tur ram an dil khan rawn alh chhoin Presbyterian ina an hmun atana an hual Bungpui hmun kan tih mai kan khaw tlang per nuam tak chu Sap father ten thuneitu an dil khan a lehlam ngaihdan ani lo a, a kohhran 2 a khaipa ka Pu leh “Buangpui” tia ka koh duat pu, Pu chhawna te chu an intai lo theilo ta a, an boruak a chhhia in a sang viau ani awm e. Hei hian kan chhungkaw 2 inkarah khanloh ramri alo siamin keinin hreve lemlo mah ila kan Nu leh Pate leh Pi leh Pu te ve ve atang chuan kan inkar sawirem chu thianglo a ngaih alo nisi.

Pathian tana rawngbawl tur a siam kohhran leh a thawktu te khawvel rilru chuan thlarau leh rilru thianghlim tam tak chu a hruai sual a, nula tlangval inhmangaih tak te nun chu tahna leh rumna ah chantirin an taksa peng pakhat hlehthlak angin an nun chu kimlohna neiin a siam ta si. Vanram kaitum theuh theuh leh a kawhhmuhtu atana siam kohhran hrang hruaitu te rilru khawvel avang leh kohhran inkara khawvel in elna hian nun engzah takah maw buaina thlenin thlarau engzah nge a hruaisual ang tih min ngaihtuah tir fo thin.

Keizawng ka pian hma a thilthleng avanga ka hmangaih ka chan hi ka la hrethiam thei lo ani e. Ani pawh chhungte nawrna avangin kan khaw nula fel leh hmeltha alo ni nen, chutiang ngaihzawng a huai taka nupui atana be mai thin pro pastor pakhat kan khua a awm chu pasalah a nei ta a. Ka tana chhia a duh lova, atana chhia ka duhlo ang bawkin khaw khatah awm mahila kan nun tihreawm belh turin thil kan ti dawnlo tih ka chiang a, mahse kan thinlungah veve chuan hmun sang kanla inluahsak tih erawh ka chiang si. Nimin kan veng bazaar ka chawhmeh lei turin ka hmuh chu inbe lo mah ila kan mitmeng in thil tam tak kan sawiin kan inhre tawn si. Kei tlangval pawh hi ka hnuk a ulhin ka mittui a parawl hial asi, ani pawh a rawmawl la chhuak pahin hmeichhe zunin ah a luh kha, zung tura lut anih erawh ka ringlo.

Helai thingkung hnuaiah hian ani,
Nemten min chawi nang che
Mahten lunglen tuar ka zuam nem maw
Min dawn ve hian ka ring silo..

tih hla U Hranga leh ka thiante hoin an saklaia “U Lamea keipawn ka hmangaih che” tia a aw nem leh zawi sapa min chhan kha.
Chunnu chang tawh mahla
I nung reng si, ka thinlungah
Nau ang kan hlimlai ni
A thar reng si, a hlui mawlh lo.

tichhung chuan nunhlui ngai leh lungleng takin tui kawt chung chuan ka haw ta a.

Similar Posts:

Recent Posts:

32 Responses to “TUIKHUR”

  1. 1
    Kher Kher Says:

    A va sei kher kher em!!

    Chhiar tan ang.

    Report this comment

  2. 2
    Hope Says:

    Comment phawt ila, nakin lamah chhiar ang….. :-)

    Report this comment

  3. 3
    valzz Says:

    Ka hna ka zovin..Kan Department bika kan pi..(Lo melh taih ruk vein)min nuih sak bok nen. :-$ ..Kiai deuh suk chungin ka chhiar a…A tawp lamah eroh a mi den dan a dang ta daih…
    Ngaihnawm e… (Y)

    Report this comment

  4. 4
    Awmtea Khiangte Says:

    Hman deuh hunah chhiar ila :-D

    Report this comment

  5. 5
    ninja Says:

    Haw hunah ka chhiar ang (Y)

    Report this comment

  6. 6
    Charice_mizo Says:

    A van ngaihnawm em! a ‘Sialton official’ raih mai alawm :-) Lungngai suh, khuareiin ala hnem ve mai ang che, nupui tha tak te neiin hlim takin ila awm ve em em ang.

    Report this comment

  7. 7
    Chhuaklinga Says:

    A ngaihnawm a, rilna riau a neih khi ka hmuh hmaih lo tih ka sawi tel duh kher(van kai tum theuh theuh).

    tren tren

    Report this comment

  8. 8
    Lamji Says:

    A ‘ZO’ in chhiar a nuam hle mai,thu i thiam ngawt mai. (Y) A phena kohhran problem lo lang erawh a tenawm,fact ani. Khawvel hmun hrang hrang ah pawh kan la tawk mek zel chu anih hi.

    Report this comment

  9. 9
    Charice_mizo Says:

    Thil pakhat leh lawk, mizo te pawh hi nupui/pasal chungchangah zalen viauin kan insawi thin nain kohhran leh mimal thil avanga duhtak te nei theilo kan la tam zia hi chu haider theih rual a ni lo.

    A langsar zawngin vai (Caste Hindus) te angin endogamy leh exogamy rules te kan nei velo a ni mai pawha, Lianchhiari hunlai atang tawh khan ‘love marriage’ hian chhan hrang hrang avangin dodalna alo tawng fo tawh tih chu a chiang.

    Report this comment

  10. 10
    saint sammoo Says:

    lamea dik tak kan hmu leh ta..a tha ka van ti em! Ka’n halelui hial teh ang.. haleluiah..!

    Report this comment

  11. 11
    saint sammoo Says:

    sufix ‘zia’ hi zawm tur. Pu zawha fulstop ka hmu. Lamtawi Tv. Nl. Bakah dah loh tur. a bak chu edit tha viau..

    Report this comment

  12. 12
    chhingdailova Says:

    A ngaihnawm e. Mahse kha kal fimkhur la, i in ngaituah lungpuam hian i tui kawh kha i ti baw vek ang e aw……….

    Report this comment

  13. 13
    Chhuaklinga Says:

    Ka chhiar nawn leh ngat. :)

    ‘…kan khua ah ro ro chuan he tuikhur…’ tih khi ‘…kan khua ah rau rau chuan he tuikhur…’
    tih ni ta zawk se a dik zawk hmel. :)
    tren tren

    Report this comment

  14. 14
    saint sammoo Says:

    @charice: mizo te hian love mariage hi kan chhiatpui… tih lampang in hman deuh khan ka ziak ve tawh a, min bauh rawn nasa ngei mai..haha..

    Report this comment

  15. 15
    LaMea CâcTùs FLh Says:

    A diklo lai in hmuh in sawi kalo chang thin. Zeplohah chuan grammer h ka thiamlo.. A lawmawm e, mi phunchiar min khalhngiltu te anlo lang a, U ADUHI ,CFL te selna ka chang zel e.. U SHELDON, a thui emai i th ka nghak a. Tin, Pu Pk ka experience anilo ania aw..
    Tren tren

    Report this comment

  16. 16
    saint sammoo Says:

    @lamea: kei zawng: mizo hnamdang nupui nei.. kha han hai chhuak la, link han dah teh. ka chhiar leh chak ber mai.. fone te ka hmanga hai a buaithlak sia..

    Report this comment

  17. 17
    Charice_mizo Says:

    #14 saint sammoo kan chhiatpuina chu tam tak a awm ngei alawm, arranged a that zawkna pawh sawi tur chu a tam ang. Mahse mihring nupaa insiam dawn chuan “hmangaihna’ hi pre-condition a ni ka ti ve tlat. Duhthusamah chuan arranged+love ni thei se…te ka tia :-P

    Report this comment

  18. 18
    LaMea CâcTùs FLh Says:

    Saint.. Tnah cuan phn atagin ka ti. Google ah khan “Dawn chiang rawh se (the other side) , misual.com” tih type la search rawh. A link a rawn lang mai ang.

    Report this comment

  19. 19
    PKfanai Says:

    He thu ka chhiar laia ka rilrua thil lo lang chu, “Thuzlak thiamte hian rilru an lo hneh thei mang e” tih daih a ni. Denomimation dang ami nula han ngaihzawn sak leh nupuia han neih sak min ti chak dawn alawm le. Fanu nei ta ila he paws avang hian a pasal denomination a zawm ka phal phah hle dawn mai. Kha daih kha asin. Tunlai misual.com Shakespeare-a meuhin ‘ro ro’ i hmang erawh i inhmeh lo ang reng. Tuikhur scene vel khian ka lung a tileng pha tlat.

    Report this comment

  20. 20
    saint sammoo Says:

    ni tak, dawn chiang rawh se… sex scene vel kha… ka hrechhuak leh uai uai mai.. than KS.

    Report this comment

  21. 21
    Princess Ilefam Says:

    A ngaihnawm hle mai. (Y)

    Report this comment

  22. 22
    LaMea CâcTùs FLh Says:

    Catholic ka ni a, fanu ka neih chuan a pasal te pawl a zawm khawp ang. Silent reader ah khan UPC leh Catholic in awm chuan, “in pasal te lakluh in tum chuan in level (thlarau leh khawvel thil takin) aia hniam neih a awl a, tin rawn lut mahse a tui taktaklo ang”.

    Chuan, he site ka tana hlutna chu in constructve critcism hi.. Ka thuziah te hi 40 dawn anni ta a, hma ka sawnve chuan ka inhria,a bikin mizo tawng ziah leh editing ah :-) mahse…ka la nawi tho

    Report this comment

  23. 23
    kawlhawk Says:

    Thu phuah kual-kawi vel dan leh, ngaihnawm tak – ZO tak sia khalh kual vel i thiam mange!

    Ka thiam e… ka tihna ni miah lovin, ziak erawh inzir i la ngai ve det. A hnuaia tlar tlem te chauh pawh hi han entawn teh le —

    Khuanu remruat anih vang nge, tu pa tuh leh enkawl nimiahlo mahse hunin a herchhuahpuiin April par mawi tak mai te chuan a mawina a chhuah a. Boruak ain thlak a, sikni eng boruak vawt leh dairdiak mai te chuan kian zai relin, nipui lo hertur chu hmuakin vanpui te chuan an ziarang leh sakhmel thlakin chunglam rorel zawmin hmalam hun panin an zia an chhuah chho a.

    ⇨ Khuanu remruat a nih vang nge, tu pa tuh leh enkawl ni miah lo mah se, hunin a herchhuahpui April par mawi tak maite chuan an mawina an chhuah a. Boruak a inthlak a, sikni eng boruak vawt leh dairdiak maite chuan kian zai relin, nipui lo her tur chu hmuakin, vanpuite chuan an ziarang leh sakhmel thlakin, chunglam rorel zawmin, hmalam hun panin an zia an chhuah chho a.

    Ka lawm e.

    Report this comment

  24. 24
    sheldon Says:

    Haha @LaMea CâcTùs, a thui na a a thui ka ti dawn miahlo. A chhan chu a ngaihnawm tlat a. Ka chhiar a, ka chhiarchhuah hma in current a rawn thi pek a, tunah ka chhiarchhuak chiah. A ngaihnawm tak tak ka ti. Ka advise tawh che ang khan novel pangngai chu i buaipui ta em? I englo thenna lam a ni tlat.

    Report this comment

  25. 25
    lr hlonchhing Says:

    (Y)

    Report this comment

  26. 26
    sheldon Says:

    Comment nawn leh teh ang. Thu leh hla reng reng hi a ti mi chu awm a ni teh meuh mai a, mahse, mahni chunga tla mek ang te hi a luangliam thin a. Hei pawh hi i tawn ani lo a tih theihloh. Keini te ang chuan ziak dawn i la kan hul tlat ania :-D

    Report this comment

  27. 27
    LaMea CâcTùs FLh Says:

    Ka sawi dawn lo..he2..

    Report this comment

  28. 28
    lmdarkim Says:

    a ngaih nawm hle mai.. (Y) @ Lamea ku sheldon -i sawi novel i ziah lo pawn i short story ho hi a bu han siam teh khai

    Report this comment

  29. 29
    TuaiSialA Says:

    A ngaihnawm hle mai. Induh tak chunga inthen hi thil har tak tur chu a ni chiang. Ka tawrh thiam chi a ni lo.

    Report this comment

  30. 30
    LaMea CâcTùs FLh Says:

    Kawlhawk,thanks. Tuaisial, inla sensitive triah2, saphai khawi rawh ;-)

    Report this comment

  31. 31
    TuaiSialA Says:

    :-P:-P:-P

    Report this comment

  32. 32
    TuaiSialA Says:

    HEI HI update a hun tawh khawp mai.

    Report this comment