Pathian hi fair lo ka ti thin

May 31st, 2012 12:46 am by ultimate

Pathian khawngaihna a zarah tluang takin ka tuina ber ni lo mahse sorkar hna hi kum 23 lai ka lo thawk ve ta a, ka hun kal tawhte ka thlir let vang vang hian Pathian lakah hian vuina ka nei fo thin tlat nia. Thil tam takah lawm viau mah ila, ka bet bik reng mai hi nin thut chang ka nei thin. Ka nu leh pate khan eng pawh thawk ila, eiru lo tur leh mi chanai lek phei chu ti chingpen reng reng lo tur hian nasa takin kan naupan tet atangin min lecture thin a, chu chu thanlen puiin theihtawp ka chhuah ve thin a, ka hlawhtling ve thawkhatin ka hria.

Mahse a tha zawngin rah reng reng hi ka la seng lo ami aw ka ti thin. Ka thawhpuite leh Dept danga ka level puite leh a hnuai zawkte thleng pawha an len thur thur hian rual ka awt ngawih ngawih thin a, ka nupui leh fanaute ka zah ru tlat thin bawk. Min hmu nep bik ang tih ka hlau thin a, tin, thiante bulah insitna an nei lian bik ang tihte ka hlau thin. Kan kohhran upa pakhatin “Eiruk loh na na na chuan mi insenna damdawi leh thil dangah pawh kan inseng tlem nge nge” tih a sawi te chu ‘kaha’ hi a ni ringawt mai. Sawma pakhat tha takin ka pe a, ai kal tirhna ang deuha ngaiin missionary pakhat kan chawm a, thil dang reng reng pawh theihpatawp bakah tlem ka pe ve thin. Mahse keini ve hi zawng kan bawrhsawm tawlh tawlh mai niin ka hre thin a, pawisa hmanna tur hi a pung thur thur mai niin ka hre thin.

Bible chang ka innghahna ber thin chu Sam 37na “ Thil thalo titute avangin intilungngai duh suh la, fel lo taka tite chu awt hek suh. Hlobet angin ah thlukin an awm thuai ang a, hnim hring angin an la vuai dawn si a. Lalpa chu ring la, thil tha ti rawh; He ramah hian awm la, rinawmna um zel rawh; Lalpa chungah chuan lawm bawk rawh; Tichuan I thinlung duhzawngte chu a pe ang che….” tih thla vel hi a ni a. Fel lo taka tite chu awh chang ka nei fo va, hlobet angin ah thlukin an awm thei si lo va, hnimhring angin an vuai thei hek lo. An lian tulh tulh a, thu an nei lian tulh tulh a, an hawisang telh telh hlawm niin ka hria. Heng Bible changte pawh hi Lal Davida khan a rindan leh duhdan in a phuah vel mai mai a ni zawk lo maw tih chang ka nei fo thin.

Sam 37: 16 phei hi chu ka duh zual a- “ Mi fel thil tlemte neih chu mi suaksual tam tak thil neih rei ruite ai chuan a tha zawk a ni” tih hi. Ka roomah langsar thei ang berin ka tar hial a, a aia langsar zawkah “ Min hrethiam teh, THAMNA ka la ngai lo” tih nen. Hei hi a effective thin viau nghe nghe, thlemna chu a lo kal hmain tam tak a lo hmet hlum nual tawh a, sermon-ah pawh an lo sawi chhuak ve fo tawh a ni awm e.

Mahse Ka thawhpuite chuan a min ti thin a, ‘Mawl’ min ti hial zawk niin ka hre thin. Vawikhat chu thlemna ka do zo ta lo va, sing 2/1 chu kan ziak bo ve mai a, mahse ka tawngtai dawnte, ka inkhawm dawnte hian ka hrechhuak zel mai a, ka engtih mah a tui thei ta lo va, ka tawngtai ngam tawh si lo, Bible pawh ka melh ngam lo. Ka inchhir leh si chu ka u hnenah ka inbunchhuak ta rawih mai a, a thu min hrilh chuan min ti zak khawp mai. Stapler machine leh a pin bawm khat office atangin a hawn a, a inthiam thei ngang lo va, zan hnih a kawl hnuah a dah let ta ngawt a, a leiin a lei ta a, a rilru a nuam huai huai tih min hrilh a, keipawh ni dangah ti zui zel ta ila, a hlawkna aiin rilru lam a inthiamlohna chuan min ei na zel dawn tih min hrilh a, tun thlengin Pathian hnena ngaihdam ka dil hi a la bang thei lo. Mi tam tak chuan an eiru teuh teuh a, kohhran leh khawtlangah zaklo leh inthlahrung miah lovin an inhmang thei tho a, an awhawm ka ti ang reng viau mai.

Bible chuan help rukna hi a haw hlein ka hmu thin a, uire pawh ngaidamtu chuan eirute chu chawp leh chilhin a ti hlum tih Anania leh Akana chanchinah kan hmu hial a ni lawm ni? Tam tak eiru pawh an pianthar leh hlauh phei chuan Vanram an tan a la awm thei tho niin a lang lehnghal a, an dam lai lahin an tluang ang reng phian hian ka hmu hlawm bawk si a, keini chhungkua ai daihin an lang awhawm zawk daih hlawm niin ka hria. Ka Pathian zui hi a fair tawk lo niin ka hriat phah fo thin. Khawvela a lo kal lai pawh khan Zakaia inah a thleng mauh mai a, a ni kha a eiru tih Bible-in ziak chiah lo mahse chhiahkhawntu a ni a, theologian-te chuan tax collector-te kha an eiru nasa niin an ziak tlangpui a, chu vanga Judate pawh khan hua an ni awm e. Kan Lalpa lahin ‘He inah hian thlamuanna a lo thleng ta” a la ti ta dah a. Lal Isua sawi a ni a, thlamuanna pawh a thleng nghal ngei ang tih a rinawm a, Zakaia ‘n “..a leh liin ka rul ang” a tih hnuah chauh a lawm ti thin mahse a rul ta chiah em tih lah hriat ni suh. Heng thu hi Pulpit tlangah ngei ka sawi pawhin ‘sawi tha’ min ti tu lah an vang thei hrep mai. Pathian chu ni ila, eiru nasa leh mi dang chanai ei tun tun hi chu an damchhung pawhin ka tuartir viau ang a, Vanram pawh hi ‘closed’ tluk a ni ang.

Mahse hei hian ka inhnem thin, Ka fapa lian zawk hnenah “Register size lehkabu chu office atangin ka lo hawn mai ang che, a tam a lawm” ka ti a, “Ka duh lo, chu te chu office ta alawm, I eiru dawn asin, min leisak la ka duh zawk” a tih meuh chuan ka fapa pawh keimah ang a la ni chho ve dawn tih ka hria a, ka lawm fu lawi si.

Similar Posts:

Recent Posts:

45 Responses to “Pathian hi fair lo ka ti thin”

  1. 1
    Saitawk Says:

    Fair deuh in chhiar ila!

    Report this comment

  2. 2
    TuaiSialA Says:

    Read more a awm lo va, admin online an awm chuan han siamṭha teh u’n.

    Report this comment

  3. 3
    PayableOnDeath(Zrma_C) Says:

    Post fair tak anih duh hmel… Chhiar ang.

    Report this comment

  4. 4
    TuaiSialA Says:

    Ka chhiarchhuak e. Sawma pakhat i pe zat zat a, missionary pakhat i chawm thei bawk a, i vawi khat thil tihsualah tun thlengin ngaihdam i la dil bang lo va, vanah i ro i va khawl hnem tawh dawn tak em! Fair lo emaw i tih kha i fate-ah a fair zia a rawn lang chho dawn chauh a ni. I ṭhiante, lian thur thur te hi an chhungril nun a hlim bik hauh lovang, i vawi khat tihsuala i inthiamloh dan aṭangin i hrethiam mai ang. Vawi khat aia tisual tam phei chu an va hlim dawn lo rua em! Vana an tan hremna rapthlak a la awm dawn chauh si. I ngaihsanawm ka ti takzet.

    Report this comment

  5. 5
    VaiVa Says:

    Post ropui tak a ni (Y) A tawp khi a tha lutuk a a lan loh palh an hlau a niang Sir TS :P

    Report this comment

  6. 6
    Chhuaklinga Says:

    Post ropui tak a ni. (Y)
    Han sawi belh vak tur pawh ka hre lo, mahse kan Lalpa berin ‘He khawvel hi ka ram a ni lo….’ a lo ti miau si a le. Vana erawh chuan ro i khawl khawm ngei ang tih a rin theih e.

    tren tren

    Report this comment

  7. 7
    Vetehmial Says:

    Inchhira,thinlung lungchhiaa i awm ni khan ngaihdam ini tawh in ka ring..a ropui thlawt e he thu zet chu..mi tamtak tana thlaraulam chaw anih ngei ka ring..keia tan ani ang hian..

    Report this comment

  8. 8
    PayableOnDeath(Zrma_C) Says:

    A tha hle mai. Good post (Y) (Y)

    Report this comment

  9. 9
    TuaiSialA Says:

    In chhungkua in fair ka ti thlawt. I nu leh pate zirtirna a fair a, i u a fair a, nang i fair a, i fapa a fair bawk a, chu chu malsawmna hlu tak a ni. In chhungkua in ngaihsanawm ka ti takzet.

    Report this comment

  10. 10
    Lamji Says:

    Ka fapa lian zawk hnenah “Register size lehkabu chu office atangin ka lo hawn mai ang che, a tam a lawm” ka ti a, “Ka duh lo, chu te chu office taalawm, I eiru dawn asin, min leisak la ka duh zawk”a tih…

    Hei bak bak a hlawhtling leh malsawmna hi a awm bik chuang em mawni le.. Sum hi hlawhtlinna criteria a hman fo loh hi a fin thlak zawk fo. Khawvel tehna ni mahse kan thih hnu ah sum chu a ral mai. Kan hna/thil tih outcome ah a innghat zawk fo ang. Ka ngaisang khawp mai che. (Y)

    Report this comment

  11. 11
    Uaiizzz Says:

    I inbeisei lohna lamah hian FAIR-zia chu ila hmuh ngei ka ring, i chanchin i sawi te khi dik tak vek anih chuan.

    Ngaituah a tithuiin belhchian a dawl ka ti.

    Post thra tak ani (y)

    Report this comment

  12. 12
    Ralte thlahtu Says:

    Ava ropui em!! I Thlahte chuan Pathian malsawmna an la tel mawlh ang.

    Report this comment

  13. 13
    Kher Kher Says:

    Mihring mihrinna ah hi chuan thikna, awhna tih vel hi a reh thei tak tak dawn chuang lo. A hnung kan zui a hi kan chian phawt chuan a tlai ngai lo an tih kha maw! I tu leh faten an la chhuang khawp ang che. (Y)

    Report this comment

  14. 14
    lrpa Says:

    Nia..post tha khawp mai! Pathian hi a fair lo riau a ngaih chang hi a awm ve thin a mahse mahniah in chhut ila..kan tih sual apianga min hrem nghal zel anih chuan..a tha lo tawp ang. “Tun hi khawngaihna hun, zahngaihna hun” ani e.

    Report this comment

  15. 15
    keimah Says:

    I post chuan min fuih thar hle mai! I tlangkawmna thu khian ka rilru a khawih hle bawk! Pathian malsawmna hi sum leh khawvela dinhmun sang aṭanga teh chi a ni lo. Heng Pathian i ṭihna zawng zawng hi he khawvela lawmman hmuh nan ni lovin NAKINAH a hun takah LALPA’n a la pe ang che.

    Mi dang dik lo taka titute hlobet anga ah thluka an la awm lo nia i hritte khi tun aṭanga kum 20 emaw lekah chuan hmuh tur an awm tawh lo mai thei a asin! Mihring chuan kum 4 kum nga vel mai kan thlir ṭhin a, Pathian erawh chuan CHATUAN hawlhtlangin a thlir thung ṭhin. LALPA chuan Amah ṭihtute chu an thlahte chhuan sâng khat thlengin mal a sawm ṭhin a sin! (Deut 7:9)

    Sam 73 kha lo chhiar chhin teh. I post aṭang chuan ka mi ngaihsan zawng tak i ni e. (Y)

    Report this comment

  16. 16
    EmEich Says:

    Nu leh pa duh dan i ti hlawhtling thei ringawt pawh hi i vannei e….

    Tuarna te hi, Pathian duh dan dik a tawrh chuan, A let tam takin malsawmna in min vur a phal,Joba ang in. ..Pathian in a hman ralna tur a siam anih chuan, hman ral tur tawk min pe thin..Mihring chuan mamawh ai tam deuh kan phut chawk thin.

    Misionary aikal i tir hi a ropui. Pathian in i hma a hruai zel ang.Thil tha lo ti tute hlobet anga ah thluk a an awm lai leh, hnim hring anga an vuai lailawm tak a l o thlir hi Pathian tum ber ani lo hian ka hre thin. Jona pawh kha……. :-S

    “ Min hrethiam teh, THAMNA ka la ngai lo” hei hi a ropui ka ti, tar meuh tur khawp a thamna do ngam hi kan tamlo maithei. (Y)

    Sualna te reuhte pawhin, inthiam lohna a neihtir che u hi in vannei e…. Eiru teuh teuh, kohhran leh khawtlanga zak miahlo a in hmang te hi an itawm loh a, an khawngaih thlak zawk.

    Eiru chhungkua a harsatna tawk lemlo a Piangthar leh daih te hi an vannei tlat in ka hre thin. Mahce, an nun a zalenlo ru reng tho.

    I rinawmna avang in i rohlu ber I fapa-ah Pathian in hlawhtlinna a pe che a… A ropui ngei mai. (G)

    Ka comment sei ve lutuk a, ka zak deuh.Mahse, I post hi tha ka ti ve bawk sia, ngawi thei bik lo.

    Office pakhat a staff pakhat pawh in, “ Kan pu te chuan, a nuaitel an eiru a, natna avangin phai an pan a, paper ka hawn ru ve a, lu a na ve fek fek” a ti ;-)

    Report this comment

  17. 17
    PKfanai Says:

    Tunlaiah hetiang mi hi alawm chherchhuah tuma kan beih tauh tauh le. In chhungkua in ropui e. In thlahte zelin Pathian malsawmna in chang anga in arh telh telh ka ring. Chawkhawn, drugs avanga thi, vanduaina mak tak tak leh hrisellohna mak tak tak nei an vang pharh ngei ang. Sam ziaktu pawh hi a vui ve fo thin asin. I vuina pawh hi Lalpan a hre ngei ang. Kei chu ka vui rih lo e. Ka hlawh tamlo naa kan ei leh in bak sum senna dang vak kan neilo a, damdawiah sum kan senglo tluk ani bawk si. Joba anga min fiah velo hram turin Lalpa hi ka dil thin.

    Report this comment

  18. 18
    nell_maiden Says:

    Pathianin thuai a tih hi mihringte tan a lo thuai lo thin.. Mahse Pathian hi a muang tihna a ni lemlo. A chhan chu, Ni li laia a tlai pawhin a hun takah a ni a thlen tho ni.

    Report this comment

  19. 19
    TuaiSialA Says:

    #15 (Y) Comment duhthusam ni maiin ka hria.

    Report this comment

  20. 20
    chhana Says:

    I fate hmangin Lalpan malsawvm che rawh se. Nia, Pathian hi a fair lo. Mahse, a fair lo hi ka damna tur a lo ni si. Ka lawm e, hetiang thu tha chhiar tur min pek avang hian.

    Report this comment

  21. 21
    ultimate Says:

    Power supply awm loh hlanin ka post a lo chhuak a, comment leh fuihna zawng zawngte khi ka lawm lutuk vek e. Ka hre reng hlawm ang. Nia, a vai khian fiction a ni lo.

    Report this comment

  22. 22
    saint sammoo Says:

    pathian chu pathian a ni a, nghet takin a ding mup mai a, a thenin fair an tia nga, a thenin fair lo. Ni a lo chhuak tawp mai a, puan pho duh an lawm em em a, a thenin a lum an tia.. an phun an phun thung a.. Ni chu a sat ngaiin a sa reng. A fair, a fair lo tih ngawt theih a ni ngai lo.

    Report this comment

  23. 23
    Awmtea Khiangte Says:

    Sawi belh tur vak ka hre lo. Post tha tak leh challenging tak a ni tih erawh ka sawi duh.

    He Bible thu hi i hriat tho chu ka ring “Thil tha tih i ning suh ang u, chutichuan a hun takah a rah kan seng dawn si a”

    Report this comment

  24. 24
    april Says:

    “Theipui thing parvul dawn lovin, Grep hrui rah dawn hek ruh seng, Olive thing poh rah lovin, Lovin ei tur chhuah dawnlo seng….Ka lawm zel ang Lalpa ah chuan…” Kavan awih hleilo e aw!! tih hi he chang anchhiar rik ka hriat apiang a ka rilru a lo awm thin chu ani. A dik chiah! Pathian hi a fairlo chiang alawm. Sakei in sakhi zanriah a a hman hi a fair lova, sangha lian in sangha te chaw a a ring hi a fair kati lo. Ka thiannu Director fa ni tur a alo piang leh kei Driver fa a kalo piang hi a fair kati lova, officer eiruk a insak keini kristian chhungkua in manchawi a luah angai hi a fair kati lo…keiin nitin eitur hnianghnar ka neih lai a riltam a thi an awm hi fair kati chuang pawh ani lo. A tam lutuk ka sawi seng love..hman deuh ah khan hengte hi nitin zantin ka ngaihtuah thin a, hlimni hmel ka hmulo ani deuh ber e. Tichuan he bible chang hi ka ngaihtuah ta a. ‘Ka van awih bik hleilo e! Lalhabakuka mai2 chuh…mi pawh hian ansawi ansawi tak na a, an chhungril tak chuan anva lawm bik awmlo e! Lawmlo chung in Pathianthu awih awmdan tur ni a an hriat vangin an lawm der ve mai mai aniang..a der chuan kava lawm awm hleilo e! Khawnge Habakuka hian chhan thate anei aniang, kan zirchiang teh ang’ ka ti a. A bul atang in ka chhiar ta a..ka chhiar ka chhiar a, kalo lawm ve ta em em a.. :)

    Report this comment

  25. 25
    muansakhi Says:

    I rilru tihah reng reng suh. Nawmsakna aiin dikna hi kan value ah han thlag tlat ila a zahawm riau asin. Kan thenawm a officer pakhat Jt. Director ve lai ni tawh hi mawl ti aiin zahawm ru riau a ngaitu kan tam daih ang mawle.

    Report this comment

  26. 26
    sheldon Says:

    He post chu a va tha em! Mizoram mipui, a bikin Sorkar hnathawk te hi nangmah ang ni vek ila ka va ti ve. Nang ang lo tak hian mi tamtak chuan an theih tawk a tam an eiru a, inkhawm leh tawngtai an tim hauh lo asin. Mahse an thih hnu nun a ngaihtuahawm deuh dawn a ni mai a. Kei ka awt reng reng lo mai.

    Report this comment

  27. 27
    saint sammoo Says:

    chawp leh chilhin min thungrul/hrem nghal zel se chuan kei leh ka chhungte hi chu kan nasa lo ngawt ta ve ang.
    Lalpa,Hei pui, tleirawl itawm zet mai a lo lut leh ta.. A tul lo thleng thleng ka khawih loh nan min pui ang che..

    Report this comment

  28. 28
    missetlar Says:

    vawi thum ka chhiar chhuak, ka chhiar nawn leh fo bawk ang… (Y)

    Report this comment

  29. 29
    vakul Says:

    A va thain a va hlu ve a. Mi hausa i nih reng chu, ka ngaihsan mi tak i ni. Fate thutaka an awm a lo liama lawmna nasa zawk dang enge awm chuang le? US, Germany, France, Australia tih vela an awm ai chuan emaw officer lian tak an niha an bo si ai chuan, thutaka an awm hi a tlo zawk dawn si a, a ropui ka ti zawk bawk. I rinawmna a ropui e, Sam 73 na hi ka nun chelhtu a ni ber mai. chang 1-5 bawr velah hian kan tang fo, 19-23 bawr velah a boruak a dang..chang 25atang kha chuan hmawr fel nelh nawlhin a bawk ta a nih kha. (Y) (Y)

    Report this comment

  30. 30
    Dr Mahminga Sailo Says:

    Ka chhhar zo chiah, a tha ka ti kher mai. Mahni nun ngei inphawrh ngama Pathian thu nunpui te thusawi tluka hlu leh min hneh ka hre lo. I fapa chuan chhun mawlh che rawh se.
    I office-a thuziak kha lo tangkai zel se, he lei malsawmna (kan tih ve ngawt te) i duh angin dawng lo mah la, malsawmna hlu ber Chatuan lawmna lo chang zel ang che.. (Y)

    Report this comment

  31. 31
    Charice_mizo Says:

    Ka ngaisang che. I thuziak chhiartu tupawhin an ngaisang ang che. Chu chu sumin a leitheihloh hlawhtlinna pakhat a ni phawt. I damlai hunah i dikna rahchhuah duhawm tak seng tur nei lovin inhre mah la, i thlahte zel chu an la hmuingil khawp ang. Nagmah ang mi tlemte avang hian kan Zoram hi ‘Zoram nuam’ ala ni ve hram hram chauh a ni. I rilruah Pathian a fairlo nia i hriat apiangin Joba kha ilo hrechhuak thin dawn nia. Example tha tak i set tawh bawka, i fapa chauh ni lo, keini te pawh hian kan la rawn zui ve ang che..Pathianin rem a tih chuan. God Bless you!

    Report this comment

  32. 32
    bbney Says:

    Tunlai ka rilrua awm reng i rawn post a, a fair lo zawnga ngaihtuah chuan Pathian hi a fair lo ve alawm. Hnam thlan bik nei tlat kha a ni hrim hrim a.
    Ka chanchhiatzia ka inngaihtuah changa kei aia dinhmun hrehawm zawk nia ka ngaihte inhnem nana ka hman dawn pawhin, an chunga Pathian fair bik loh zia ka ngaihtuah tel zel mai. Tunlai chu rilru hi a hel riau mai.

    Report this comment

  33. 33
    Princess Ilefam Says:

    A va han ropui em ! I thuziak hi ka chhiar uluk khawp maia, mi hneh lutuk. Pathian malsawmin mal a sawm zel dawn chein ka hria.

    Report this comment

  34. 34
    Asteric™ Says:

    I harsatna leh ka harsatna tawh thin hi a in ang hle in ka hria. Ka mangan lai chuan keipawh alangin vui lo mah ila, tawngtai tlem te, inkhawm phur lohna te, thil tha ni a ka hriat pawh phur lo taka tih te ka ching thin a, ka thlarau chu a lungawi zan lo thin a ni. Sam 77-na ziaktu hian chutiang rilru chiah chu a nei ve in ka hre nghe nghe a, ka rilru ang pu Bible ah alo awm ve anih hi ka ti thin(han chhiar ve mah teh). Pawi ta ber chu “Thil tha tih avanga lawmman kan beisei tlat thin hi” a ni, hei hian kan lawmlohna tur min count tir tlat maia. Beisei ngaimiahlohna thinlung hi chu pu thei ila a fel duak ka ring. Pathian rawngbawl hi chhiahhlawh nun a ni tih te hi hriatthiam a har ka ti thin. Engatinge chhiahhlawh nun kher kher?
    Pathian hian amite a hruai dawn reng rengin hriatthiamlohna, rinhlelhna ruamah a hruai hmasa phawt thin a, an hriatthiamlohna ah chuan an vui leh vui loh a hre duh a ni. Hei hi ami kohchhuah te bul a tannana a hman fo chu a ni, amah ring duhtu te chungah pawh a ti fo. Isaia 55:8 ah chuan “My thoughts are nothing like your thoughts,” says the LORD. “And my ways are far beyond anything you could imagine.” a ti a, hei hi va hriatthiam ka tum hram hram thin. A conclusion ah chuan Engpawh kan chungah thleng se “LALPA a lawmna hi kan chakna a ni” :-)

    Report this comment

  35. 35
    Pangpuielhtliaka Says:

    Hei zet hi chu chhiar zawha ngawihbo mai mai chi niin ka hre lo. A ropui ka ti takzet a ni. Ka pa ka ngaihsan em em pawh hi a ni asin.
    I hnung zui tur leh support tlat tur che in heta hi ka awm e. (Y)

    Report this comment

  36. 36
    Asteric™ Says:

    Vawiin ah pawh i rilru vuina avangin hriatthiampui tu emaw, i tih that fak tu emaw awm se phur sawt i duh ka ring a. “Eiru ve mai la” kan rawn tih chu i duh hauh lovanga, keini pawn chutia kan sawi i ring bik lovang. A bul ber ah chuan “Hringnuna tha i tih ber i zawm mek ah i lungawi lo” ti ila a dik maithei, i huat loh ka beisei bawk a. I eiruk loh thin avanga Pathian tihlawm i inbeiseina ah Pathian lawmna a lang leh silo niin i hre bawk in ka ring. Pathian lawm leh lawm lohna chu engtinnge i teh? I tih that puangzar lo mahse chawimawi tur che in em ni? Pathian fair leh fair lohna chu thil tha titu aia thil tha lo titu an chungnun zawkna ah emni i teh? Bible-a a in ziah anga a lan thuai loh vang em ni?
    Hei hi lawm Joba’n “Vut leh vaivuta thu in ka sim ta e” a tih kha, engvaknge Joba (Pathian fak) khan a sim leh chuan ang, han ngaihtuah teh, Pathian remruat a alo lungawi lo ve ngawt kha a chhan a hre chhuak a, a inten hial a ni.
    Paula’n “LALPA ah chuan lawm fo rawh u, ka ti leh pek thin ang lawm rawh u….” a tih kha nun thuruk chharchhuak ni a a inhriatna chu a ni “Keizawng hausa leh tlachhama awm dan ka thiama, thil engkim ah tlai leh riltama awm dan thuruk ka hre tawh…” a tih kha Pathianin min hruailuh a tumna chu a ni.

    Report this comment

  37. 37
    sheldon Says:

    A vawi 3-na atan ka chhiarchhuak leh. I thuziak hi a ropui ka ti. Eirukna ka huat thu hi ka sawi ve thin. A sang/sing bi chuan ka fihlim ngei mai, mahse paper, stapler neuh neuh ang ah te hian ka fihlim lo fo tawh. Mahse i post hi ka tan darthlalang a ni. Hetiang thu ropui chhiar tur min pe hi ka lawm a. Zoram mipui zawng zawng hian chhiar se ka duh.

    Report this comment

  38. 38
    Jacka Pi Says:

    (Y) … A breath of fresh air!!!

    Report this comment

  39. 39
    Asteric™ Says:

    Pastor Thomas a hian ṭhenawm Christian leh Pathian ringlo mi a nei a. Lo nei mi ve ve an ni a. Buh seng hun (October) alo ral chuan Pathian ringlo pa chuan “Pastor, Pathian chu malsawmna tiin i sawi ṭhin sia hei ka ṭhenawmpa Christian pa nen huan in tiat chiah kan neia a ni aiin a let engemaw zah in ka thar tam zawk a, enge a chhan min hrilhfiah thei em?” tiin a ṭawng el khum a. Pastor chu a ngawi vang vang a, chhang tura a tur chhen avang chuan ti hian a chhang ta a, “Unaupa October thla hi Pathianin thil zawng2 rel fel nan ala hmang rih lo a ni” tiin.

    He thu hi Upa pakhatin a sermon na ah sawia vawiin ni thlengin ka thinlung ah hian a reh thei lo.

    Report this comment

  40. 40
    malsta27 Says:

    I fapa thusawi khi i hlawh chhuah chu ni dawn lawm ni..khi tluka tha khi awm dawn mi?………….lo ti ve ngot teh ang. A fair lo pawh ka lo ti vak hleinem kei …………….

    Report this comment

  41. 41
    ultimate Says:

    Asteric, i thurawn or comment khi a hlu hlawm hle mai. Midang comment pawh a hlu hle vek e. Hriat reng fo ka tum hlawm ang. Thanks.

    Report this comment

  42. 42
    century child Says:

    ka lo chhiar lawk lo a, ava tha teh lul em.
    ka ngaisang khawp mai che. (Y)

    Report this comment

  43. 43
    Asteric™ Says:

    #41@ultimate…i ti lawmawm e. Kan harsatna tawh theuh hi mahni tawk ah hmuh len bik a awl khawp mai. Nangmah atang pawh hian ka inzir belh leha lawmawm ka ti(i hmu lian bik tihna nilovin keimah zawk bika ka inhriatna vang zawkin). I harsatna ang deuh chiah hi kawng dang daih ah ka zawh ve a, he post hian Pathian rorel dan a thuhmun zia chu nen chuan a ti lang in ka hria. Tha ka tih ber mai leh mi tam tak tan pawha zawm har bera ka ngaih pakhat hi a awm a (corruption ang tho hian), a zawm awmchhun te tan malsawm dawn phah hialna ni a ka ngaih chu chaklo tak chungin nghet taka vawn ka tum ve tlat mai a. A chan chhe zawk ah vawiin ni thlengin ṭanga inhriatna ka nei ta tlat a, a zawmlo te nun ka en a, ka ngaih ang ngawta pawi an tihna hmel reng reng ka hmu lo. Malsawmna ni a ka hriatna pawh chuti maiin a thleng hek lo, thlen a hnekin ka thil duhna piang ah thin urna min siam min siam mai.
    Pathian hian fel leh tha kan intihna lai tur ah hian min han vaw chau duh em em lehnghal a, fello kan intihna lai zawk hi chawimawi a tum daih mai thin zawk a. Paula’n “Ka chakloh apiangin ani ka chak ṭhin ni” a tih te hi ngaihtuah nawn leh mai mai teh, “…..ka chaklohna te hi ka chhuang tawh zawk ang” ala ti deuh deuh lehnghal. Vawiin ni ah i chaklohna leh ka chaklohna hi enge? Pathian fair lo ni a kan hriat tlatna hi a ni dawn lawm ni. Chu chu Paula angin engtinnge kan chhuan ve theih ang? Chhuanawm alo ni zawk em? Paula chuan “ka chak loh apiangin a ni ka chak thin ni….” a ti a. Tuna he kan lungawilohna emaw, kan rilru tuihalna hi Pathian lama rilru kan pekna awmchhun alo ni reng zawk thei a, Pathian min ngaihtuah tir tam tu ber alo ni zawk hlauh thei a ni. Kan felna leh kan ṭhatna, kan chaknaa fak hi Pathianin alo lawm ber hauh lo, kan lungawilohna bera lungawi kan tum ṭalh ṭalhna hi ania a lawm zawk chu. He indona khawvel ah hian do neihloh chu a hlu vak lo, mahni indo tura min tihna pawh hi hei chiah hi alo ni a. Chuvangin he kan chaklohna hi kan chakna awm chhun zawk alo ni reng thei a ni.
    Pathian hi kawng dangah ngaihtuahna i nei ṭhin em? Nei pawh nila heti em em a rilru pe a i ngaihtuahna awmchhun leh a biakna che chu i chaklohna lai ber zawk hi alo ni daih ang. Hemi avang hian Pathian zia kawng tam takah i zir si a, chu chu Pathian biakna aw chu a ni. I chaklohna i hneh apiang khan a aw i hre ṭhin si a. Chuvangin kan chaklohna hi alo chhuanawm ber zawk a ni.
    Gudnyte :-)

    Report this comment

  44. 44
    Mad.virus Says:

    (Y)

    Report this comment

  45. 45
    Unsung Says:

    Post tha hle mai.. Keipawh a fair lo tih chang ka nei fo mai. Eiru teuh teuh in, an fate school tha tak ah an kaltir a, an nungchang lah tha viau bawk, zirna ah hlawhtling bawk, hmuh ve reng bawk si chuan fair lo tih chang ka ngah mai. Mahse, mahni aia chan chhe zawk an tam zia ka ngaihtuahin, ka itsik in ka ngaihtuah zui peih loh phah.

    Report this comment

Leave a Reply

You must be logged in to post a comment.