Tawngtai

April 29th, 2012 8:00 pm by Lalhnam Rinzova Khawlhring

Tawngtai tih tawngkam hi Mizo Kristiante atanga lo chhuak anih tlat avangin Kristiante thurin bulpuiber Bible hian eng angin nge a zirtir tih i lo chhui hmasa teh ang.

Bible chuan “Bang loin tawngtai ula,”(I Thes.5:17) a ti a. Mahse hna thawh a lo ngai a, chaw ei a lo ngai a, mut a lo ngai a; bangloin a lo tawngtai theih hauhlo mai. Kan han maimitchhing a, “Aw Lalpa….” Kan han tih lah chuan,”…vawi tam tak in tawngtai pawhin ka ngaithla lo ang,”(Isaia1:15) alo ti tlat a. Vawi tam tak tawngtaiin kan sawi ngaite hi kan sawi nawn zing hle thin. “In tawngtaiin Jentailte angin sawi nawn sawi nawn mai suh u; an tawng tam avangin hriain an rin ani. Chutichuan anmahni angin awm suh u; amah in dil hmain in pa chuan engte nge in mamawh tih a hre reng si a,” (Matt. 6:7&8) a ti. Eng emaw hi kan dil duah mai thin a nih kha. Tunah pawh i la dil hnem thin hle lo maw? “…In dil a, in dil dik loh avangin in hmu lo, in nawmsak nan hman in tum si a,”(Jakoba4:3) a ti bawk. Chuvangin maimitchhinga, “Aw Lalpa..,” tia kan chham vel hi zawng a lo pawm hauh lo mai; mi vervekte tawngtaina mai mai a pawm lo a ni. ” ‘Lalpa,Lalpa’ mi ti nazawng chu vanramah an lut lovang..,”(Matt.7:21)a ti tlat si.

Isua khawvela a len lai khan a zirtirna thu zawm duh si lote chuan an be tha luam thin a, chungho rilru chu a hre reng a,”…nangni’n eng atan nge ka thu zawm si loin, ‘Lalpa,Lalpa’ min tih thin?”(Luka6:46) a ti mai a ni. Bible thu hi a tam ber chuan engnge a sawi tum a, an chham zuah zuah thin. “Dil rawh u” a ti ngei mai; mahse engnge dil tur nia engtia dil tur nge an chhût tawh lo. Isuan engtinnge a tih le?

“Chutichuan ‘engnge kan ei ang?’ emaw, ‘ennge kan in ang?’ emaw, ‘eng sinin nge kan awm ang?’ emaw tih, lungkham suh u…chung zawng zawng chu in mamawh tih in Pa vana min a hre reng a ni” (Matt.6:31&32)a ti. Heti khawpa min hre chiangtu Pa Pathian hi mawl leh bengngawng, thil hrelo lutuk ang maia kan cheibawl vel hi Isua ngei pawh hian a ngaithei lo a lo ni e.

Lalpa Pathian chu a awm ngei ani tih leh. Amah atangin nun neiin, chatuan taksa neiin kan ding reng tawh ani tih inpuangin min hriattir a. Chutah chuan engkim neitu niin khawvel pum hi kan ta anih kan hre ta a. Dil ngai tawh loin ‘A ram leh a felna’ kan hmu tawh a. Nunna Lalramah dingin engkim neitu kan nih kan hreta ani. Chu ch Isua leh a zuitute pawh khan an lo hre chiang êm êm tawh zawk ani. Amahah kan awm a, amah pawh keimahniah a awm bawk. Amah Pathian taka chu “Krista, Thlarauthianghlim” ti a an sawi chu a ni e, Isua ni lovin. Chu ngei chu Mizote chuan ‘KHUANU’ kan ti ani.

Mihring hian thlarau kan neilo a, Khuanu ngei chu tisa mita hmuh theih loh chatuan taksain a ding, chu chu Kristiante’n “THLARAU THIANGHLIM” an tih chu ani a. Chuta tanga chhuak ngei mai, tisa mita hmuh theih loh chatuan taksaa ding chu kan nei a, chu chu kan thlarau chu a ni. Chu chu pêkin an awm, “…in Pa vana mi chuan diltute chu Thlarauthianghlim a va pe dawn êm!” a tih ang khân; amahah nun a awm a chu chu min pe a, ‘thlarau’ ani. Chu chu pekin kan awm ta. “Krista thlarau neilo chu amaha mi anilo” tih ani. Chutichuan chumi Thlarau neitu chu bâng lovin a tawngtai thei ta ani. Tisaa awmte chuan Pathian an tihlawm theih loh avangin, tisaa tawngtaia, ‘LALPA’ tih pawh chu Pathian lawm zawng anilo. Thlaraua amah pawlna chiah hi a lawm zawng anih avangin Thlarau chauha tawngtai tur a lo ni zawk ani. Thlarau erawh chuan bâng loin kan tawngtai thei ta. Pa chu thlarau a nih angin Paa mi Thlarau chu kan nei a, chu thlarau min pek chu chatuan taksaa dingin min lo tawngtaisaktu ani. Lalpaah kan awm a, ani pawh keimahniah a awm bawk a. Chumi keimahnia awm thlarau chuan kan tawngtai ta ani. “Chutichuan, amaha Pathian hnena lo kalte chu a tawpkhawk thlengin a chhandam thei ani,an mahni tawngtaisak turin chatuana a nun reng avangin” tiin ziak ani e. “Tawngtaina leh dilna tinrengin eng hun pawha Thlarau tawngtaiin…” an lo ti anih zawk hi.

Similar Posts:

Recent Posts:

18 Responses to “Tawngtai”

  1. 1
    ^-||R@lT€||-^ Says:

    chhiar phawt ang

    Report this comment

  2. 2
    lr hlonchhing Says:

    (Y)

    Report this comment

  3. 3
    Sãñgpüîípã Says:

    Current kan nei lova, chuvang chuan chhiar hma in comment phawt ang.

    Report this comment

  4. 4
    buh-duha Says:

    Mizo Kristianten Tawngtai tih tawngkam kan nei hi a mawi ngawt mai. Saphovin Prayer an tih ai mah hian a ril zawkin ka ngai ve thin…

    Report this comment

  5. 5
    Sãñgpüîípã Says:

    Thlarau a tawngtai khi ka la man thiam ve chiah lo.

    Report this comment

  6. 6
    PKfanai Says:

    A dik hmel thluam laiin pawm hmiah hmiah chu harsa ka ti deuh tlat mai ka ti. Bible in Tawngtai hrim hrim hi a sawichhe ngailo a, tawngtaitu te rilru(motive) hi a ngaipawi mawh em em thin a ni. Miten thlaraumi, Pathian mi min ti se tih duh vanga mite hmuh leh hriata chhamphual kual vel hluah lam hi ani a sawisel chu. Pathianthu sawi ani emaw, tawnghriatloh ani emaw, hla ani emaw, tawngtai ani emaw, Isua krista chawimawilo leh hnawl chi reng reng chu Pathian Thlarau atanga chhuak Zirtirna dik leh him ani ngai lo vang.

    Report this comment

  7. 7
    khirhkhak Says:

    Ka man chiah lo, thlarau nei lo kha, Pathian thlarau thianghlim kan hnena a lo awm khan kan tawngtai a lo ni reng a maw? ka man thiam lo teh nuaih mai, kei chu han maimitchhin a, rilru le tihtakzeta kan duh leh mamawh te, lawm thu te Pathian hnena thlen hi TAWO KL tight

    Report this comment

  8. 8
    khirhkhak Says:

    TAWO KL tight ai ah khian TAWNGTAI ka ti. Ka tihna

    Report this comment

  9. 9
    sheldon Says:

    Pu Pk @6 ka amen e.

    Report this comment

  10. 10
    Princess Ilefam Says:

    (Y)

    Report this comment

  11. 11
    Lamji Says:

    I duhtui deuh ani maw. Tawngtai hrim hrim hi a tha,tawngkam thiam lutuk te tawngtai han ngaihthlak phei hi chuan thiam taka Pathian kar ve hi a chakawm thin. Mahse tawngtai tura kan kun a engmah sawi tur kan hriat loh pawh in AMAH zawkin kan mamawh te min lo chham tir thian, Thlarauthianghlim chuan rum sawi hleih theih loh in min lo tawngtai sak reng zawk hi alo nia. Kan PA ania,pa te hnenah chuan pangchang takin ka mamawh te dil hmiah hmiah zel mai tur. Tul a tih danin aman min chhang mai ang…tih hi ka ngaihdan nghet bur ani. Tin,’LAWMTHU SAWI’ hi ka thupui em em bawk,harsatna ah pawh,a effective khawp mai.

    Report this comment

  12. 12
    Ignatia (33-115 AD) Says:

    I sawi tum hi a tha viau a mahse i thuziak hi tha ka ti hauh lo. Isua nihna, Thlarau Thianghlim chan leh Pa nihna i thai pherh nasa hle. Bible thu hi tawngpawng quote tawp tawp theih a ni hauh lo a nia. Ngun taka zir chian hnua hman tur hlir a ni!

    Isua Krista pawh kha TAWNGTAI MI diktak a ni. A Pa hnenah khan a tawngtai nasa thin hle!

    Report this comment

  13. 13
    Sãñgpüîípã Says:

    Tisa tawngtaina kan hnualsuat chuan, thlarau a tawngtai phei chu a har awm mange te ka tia.

    Report this comment

  14. 14
    saint sammoo Says:

    tawngtai chungchang hi a har phian a nia..
    Khawi category ah nge kan awm le?
    1. Dil rawh u…
    2. In dil chu Hmu tawhah inngai rawh u..
    3. In dil hma pawhin a pe tawh che u…

    Report this comment

  15. 15
    Dr John Says:

    (Y) Tawngtai pawimawh-zia i ziak hi tha ka ti khawp mai.

    Helai thu, “Amahah kan awm a, amah pawh keimahniah a awm bawk. Amah Pathian taka chu “Krista, Thlarauthianghlim” ti a an sawi chu a ni e, Isua ni lovin. Chu ngei chu Mizote chuan ‘KHUANU’ kan ti ani” i tih tak erawh chu… a buaithlak deuh em aw? ka ti.

    “Contextualization” hi fimkhur a ngai a. Uar lutuk chuan “Pluralism-ah” a lut duh khawp mai. Muslim te Hindu te Kristian-a siam an harsatna chhan chu Pluralism vang a ni. Indian Christian Theologian-te tihsual lian tak pawh a ni tel bawk. Isua kha Krishna a ni, Isua kha Zawlnei pakhat a ni an tih tlat chuan… an tan Isua rin khan awmzia a nei tawh lo a ni.

    Mizo Theologian-te pawh an fimkhur khawp-in ka hria a. Pathian/Isua/Thlarau Thianghlim hi Khuanu anga sawi (contextualized) hi ka hre miah lo nia? Ka hriat tlem vang nge ni ang? Chuvangin, Mizo-ten Khuanu kan tih kha Pathian/Isua/Thlarau Thianghlim kan ngaihruatna a ni thei ang em? tih chin hi chu a him mai thei.

    Report this comment

  16. 16
    liandova khawlhring Says:

    “Thlarau chuan kan chak lohna te a pui thin a” a tih hian, kan chak lohnate chu chak deuh hret turin em ni a puih le? tiin inzawt ta ila, tisa tawngtaina leh thlarau tawngtaina danglam zia kan hre thei ang. Thlarau chuan kan chak lohna chu tlema chak hret turin emaw, chak thut turin emaw a pui hauh lo mai, ‘engtia tawngtai tur nge tih pawh hre theilo hial khawpin’ a pui chak lo ta zawk a nih hi. Chuveleh chuan Thlarau chuan rum rawi hleitheih lohin min lo tawngtaisak reng a ni tih kan hria a; tisa tawngtaina ka bansan ta a nih hi. Chuvangin alawm “Chutiang bawkin, Thlarau chuan kan chak lohnate a pui thin a; engtia tawngtai tur nge tih kan hre si lo a, nimahsela, Thlarau chuan rum sawi hlei theih lohin min tawngtaisak thin” tia an lo ziak ni. Chu thlarau avang chuan “Abba!(ka Pa)” tiin kan au ta a nih hi. Chuvang chuan Pathian hnenah engmah kan dil a ngai ta lo, tawngtaia dil engmah a ngai lo. “Engkim hi in ta a ni vek si..” a tih angin a neitu nihnaah kan lut ta. Khawvel te, thihna te, nunna te, thil awm sa te, thil lo la awm tur te, a zavaiin kan ta ani. Chuvangin neitu nihna changtute chuan,
    Thuthlunna Isua hringnun mite chuan,
    He khawvel hi an ram a ni si lo;
    Khawvel hmangaih suh se, a chhung thil nen,
    Nunna Lal faten khawvel kan hmangaih;
    Khawvel hi kan ta, a chhung thil nen”
    tiin kan sa thei ta a ni. Van leh lei kan rochung tawh si a. Kan Lalpa Pathian Khuanu nen chuan Nunna Thlarauin kan inbe reng tawh zawk ani e.

    Report this comment

  17. 17
    Torrent site Says:

    Torrent site…

    [...]Tawngtai | mi(sual).com[...]…

    Report this comment

  18. 18
    Vana Lalhnam Says:

    Atha vek e

    Report this comment