A lem chu a tak hmelma a ni (Sunday pual)

March 11th, 2012 4:30 pm by vakul

Kum zabi 17-na lai vel a rinna leh ngaihtuahna chungchanga inhnialna nasa tak a awm lai khan, French mi, mathematics leh philosophy lama mi thiam tak Blaise Pascal-a, Pascal’s Law duang chhuaktu chuan, a lehkhabu hmingthang tak Pensees (Thoughts), kum 1670 vel a a chhuahah chuan Pathian chungchanga a ngaihdan a sawi chhuak a, chu chu Pascal’s Wager tiin an sawi a.

Chuta a sawi dan tlangpuiah chuan, “mihringte hian Pathian awm leh awm loh hi thudik kan zawna a, kan ngaihtuaha kan pawm (reason) ang chi hi chuan kan finfiah thei ngai dawn lo va. A awm hi ring ila, a lo awm loh chuan engmah kan hloh chuang lo va, a lo awm phei chuan vanram kan hlawh dawn a, kan hlawk hle dawn a ni. Pathian awm hi thenkhat tan chuan rin mai a harsa a, rin angin awm phawt ila, chu chuan rinna tak takah min hruai lut thei mai ang,” a ti a.

Kristian zingah Pascal-a ngaihdan pawm lo an thahnem hle a, chutih rual chuan engemaw kawng tala rinna a sawimawi avanga faktu pawh an awm bawk. Pascal-a ngaihdan lehlam zawng chiah hian han thlir ta ila, mihring hian ngaihtuahna hmangin Pathian a awm a ni tih a hre thei a, Rom1:19&20-a kan hmuh angin miin, ‘thil reng reng hian chhan (reason) a nei a ni (cosmological argument),’ tia a ngaihtuah (reason) phawt chuan a chhan bulthum ber chu Pathian a ni lo thei lo, thil siam hmangin chu chu kan ngaihtuah chhuak thei a ni.

Tin, ‘thil reng reng hian tum a nei a ni (teleological argument),’ tih ngaihtuahna hmanga chhut pawhin Pathian a awm a ni tih kan ngaihtuah chhuak thei. Amaherawhchu, Pathian a awm tih hriatna ringawt hi chhandamna khawp a ni hauh lo, ramhuaite pawhin a awm tih an hriaa mahse an himpui dawn chuang lo; ‘Pathian a awm’ tih kan ngaihtuaha kan rinna a ni emaw, kan rin avanga kan hriatna pawh ni se, a pawimawh lai tak chu ‘kan rin man kan pe em’ tih hi a ni.

Tunlai khawvelah hi Pathian awm ring leh Pathian awm ring lote inbeihna khawvel a ni a, a awm ring zingah sakhaw hrang hrang an tangrual mek a, chu chuan sakhaw intluktlanna (religious pluralism) ah min hnuk lut mek zel a ni. A awm rin hi a tha em em a, chutih rual chuan mimal nuna Pathiana innghahna leh rinna tak tak a awm si loh chuan a lem chu a tak hmelma a ni tho.

Luka 9:57-62 leh 14:25-33-ahte leh hmun dang dangah Lal Isua rin man kan pek tur kan hmu a, chu chu Pathian a awm tih kan hriatna piaha mihringin rinna kan tarlanna hmun tur chu a ni a, kan ngaihtuahna mai piah lamah hian kristiante thiltihtheihna chu kan rinna hi a ni. Tunlai khawvelah hian thiltihtheihna kan tlachham tial tial a, a chhan pawh rinna man kan pek tawk loh vang a ni ber, ringtu mi huai kal taten ropui taka engkim an ngamna thuruk chu rinna chauh kha a ni. Pathian rinawm zia an ngaihtuah a, a manah engkim an pe huam si a.

Kohhran rinna puanchhuah (confession of faith) thenkhat chuan rinna chungchang an sawiin, ‘rinna nung’ emaw ‘chhandamna tling rinna (saving faith) an ti deuh kher thin a, ‘rinna hian van a tawng pha tur’ tihna a ni ang chu. Pastorten Lalpa zanriah sacrament an buatsaih dawn hian an sawmna thuhmaah, “kan Lalpa dawhkan hi simna dik tak leh rinna nungin i hnaih ang u,” an ti thin bawk.

Rinna hi Thlarau Thianghlim hnathawh a ni a, Thlarau Thianghlim puihna tel lo chuan tuman chhandamna chang khawpin rinna an nei thei lo. Mihring atanga chhuak rinna hian chhandamna min thlen zawh loh avangin leh mihring rinna hi sualin a khawih tel avangin chhandamna chang tur chuan Krista Thlarau puihna kan ngai a ni; Petera’n Isua hnena, “Krista, Pathian nung Fapa chu i ni,” a tih a, Lal Isua chhanna-ah khan, “…tisa leh thisenin a hriattir che a ni si lo va, ka pa vana miin a hriattir zawk che a ni,” tiin a chhang a, kan rinna (saving fath) hi keimahni leh Pathian hnen atang chhuak inzawmna thuk tak nei a ni.

Miin rinna man a pek a pek ngamna chhan chu amahah chianna tak tak, zakhamna (assurance) a neih vang a ni, rinna hi risk thil a ni lo. Phak lo mahse mihring tehkhin thua hnaih pawl tak chu, cheng sawm kan nei a, cheng ngain thil kan lei a, cheng nga a lo kir leh dawn tih kan hriatna (reason), chumi ai chiang zawk Thlarau Thianghlim zakhamna changtu chuan Pathianah rinna nung a nei a, Pathian tan a inhlan pumhlum thin a ni zawk. Tunlai khawvela kristianten harsatna kan tawh mek chu ‘kristianna naran’ kristiana inchhal, mahse rinna nung nei tura thahnemngai si lo kan pung zel hi a ni.

A nih loh leh engvang nge ni ta ang? Kan rinna leh beiseina leh Pathian thua kan ngaihtuahna kan sen tawk loh vang a ni. Ngaihtuahna tel lo chuan Pathian thu pawh hi a nihna kan man pha thiam lo, kan rilruin ngaihhlut dang a neih phawt chuan chu miah chuan kan ngaihtuahna kan seng thin a, Augustine-a sawi angin kan rin hrethiam tura ngaihtuahna kan sen peih loh vangin kan dahlau ta thin a ni.

Ngaihtuahna dik, Kristaa chhuak kan hman chuan kan nghing ngai dawn lo va, chu chuan rinna kawngah min suihnghet zel dawn zawk a ni. Amaherawhchu, kan ngaihtuahna hi Pathian dodalna leh a ropuina hliah zawnga kan hmang a nih ngat chuan, chu ngei chu, ‘a lem, a tak hmelma’ chatuan anchhe hmawrvalh chu a ni.

Similar Posts:

Recent Posts:

15 Responses to “A lem chu a tak hmelma a ni (Sunday pual)”

  1. 1
    superpinqponq Says:

    1st phot ang :-P

    [Report abuse]

  2. 2
    PKfanai Says:

    Post ka thlawp zia entir nan, Ka hla duh (Favourite Song) ka han tar lang mai mai ang e.

    Chatuan nunna ro hlu ka chhar ta,
    He khawvel hneha ngamna chu
    Lal Isua leh a hnathawhte ringin,
    Hnehin ka ngam, Sual thihna ral lian.
    Hei hi a ni, khawvel hneha ngamna chu,
    Kan rinna hi (2x)
    Aw thihna, khaw nge i tur chu?
    Aw thlan khaw nge i hnehna chu?
    Nun tawp lovin chatuan ram ka leng ang,
    Halelluia! Hnehtu Lal lian, ka fak a che.
    Thenkhatten tawlailirte ringin,
    Ralthuam famkim ring mah sela,
    Kei erawh chuan Lalpa hming ka ring a,
    Nungin ka tho, Hnehtu Lal zarah.

    Tunah hian sual ral lo lian mah se,
    Ka hneh ang Lal Krista zarah;
    Pathian thu nung, ngunhnam leh rinna phaw,
    Hmangin ka hneh ang, Sualna ralian

    Rorelna lo thleng tur ka hlau lo’ng,
    Thiamchan lawkna ka neih vangin;
    Tu nge ka Lalpa hmaah min hek ang?
    Ka ta a ni, a ta ka ni si.

    He hla hi Rev.H.Hrangena phuah a ni a, tunah hian Kristian hla bu no 411 na a ni a, a dawt leh chiah 412 na pawh hi ka duh kher mai bawk

    Nangin min puih leh hmelmate,
    Ka hneh ang i thisen zarah;
    I chatuan ro luahpui turin,
    Aw, Sual bawih ata ka hruai chhuak ang.

    Nakinah khua a var hunin,
    Ka Chhandamtu chu ka hmu ang;
    Chutah ralthuam ka dah tawh ang,
    Aw, puan var ropui mi sintir ang.
    Aw, min thuam la, Imanuel,
    I Thlarauvin min thuam ang che;
    He khawvel sual thim kulhpui hi,
    I tan ka do leh ang e.

    [Report abuse]

  3. 3
    century child Says:

    (Y)

    [Report abuse]

  4. 4
    donald Says:

    Chhiar a nuam zaih zaih thin e (Y)

    Rinna (saving faith) hi a pawimawh si a, engtia neih chi nge tih hi uar taka sawi a tul reng a ni. Hebrai ziaktu chuan Isua Krista chu kan rinna siamtu leh tifamkimtu a nihzia min hrilh a [Heb 12:1]; Paula pawhin rinna chu hriatna avanga lo awm a nih thu leh hriatna pawh chu Krista thu avanga lo awm a nih thu min hrilh bawk a [Rom 10:17].

    Post-in a sawi, “Rinna hi Thlarau Thianghlim hnathawh a ni a, Thlarau Thianghlim puihna tel lo chuan tuman chhandamna chang khawpin rinna an nei thei lo. Mihring atanga chhuak rinna hian chhandamna min thlen zawh loh avangin leh mihring rinna hi sualin a khawih tel avangin chhandamna chang tur chuan Krista Thlarau puihna kan ngai a ni” tih hi a dik em em a ni. Chu Thlarau Thianghlim chu engtia neih chi nge tih chu Bible hian chiang takin min hrilh a:

    1) DIL TUR a ni.

    ‘”Chutichuan nangni mi sual mahin in fate thil tha pek nachang in hriat chuan, in Pa vana mi chuan a diltute chu Thlarau Thianghlim a va pe dawn em!” a ti a.’ [Luka 11:13]

    2) SIM a ngai.

    “Sim ula, in sual ngaihdam nan Isua Krista hmingin baptisma chang theuh rawh u; tichuan Thlarau Thianghlim pek hi in hmu ang.” [TT 2:38]

    3) THUAWIH a ngai.

    “Thlarau Thianghlim, Pathianin a thu zawm apiangte hnena a pek kha, a hretu a ni ve bawk a..” [TT 5:32]

    Kan tlak ve leh tak duah chu .. :-$

    [Report abuse]

  5. 5
    Jacka Pi Says:

    (Y). Theory hriatthiam har zet zet ai chuan thlarau nun a chawm e

    [Report abuse]

  6. 6
    TuaiSialA Says:

    (Y)

    [Report abuse]

  7. 7
    Mama_B Says:

    Chhiar chhuak dap. Tha khawp mai
    Post tha tak hi chhiartu an tlem deuh thin emaw ni…??!! Pathian thu lam post te hian comment an dawng tam thin lo riau mai… Rawn post zel teh, bengvarthlak thin a nia

    [Report abuse]

  8. 8
    Ignatia (33-115 AD) Says:

    Industrial Revolution lai vela kristianna lamin kan tuar zia kha lo la post teh a, Pu Vakul. I hriatna hi a zau viau zel mai a, lo share zel rawh.

    Hlawkthlak thin hle mai. (Y)

    [Report abuse]

  9. 9
    ltachhakchhuak Says:

    Min sawi chhan em lo ang chu maw.. :-)

    [Report abuse]

  10. 10
    vakul Says:

    Ignatia, han ti zawk teh, i tihawm tak zawk a ni. Kei aiin i hre fe tih ka hria.

    Lt, sawi chhan lah lo ve, nangte chu tlangval fel i nih kha. Ka article chhunga mi hlawm khat mai a nia, chutin tumah ka sawi chhan lo ve.

    [Report abuse]

  11. 11
    ltachhakchhuak Says:

    Haha, ka fel loh teh lul nen. Post maksak pui pui ka ziak teuh tawh a nia..mahse he post kher chu ka rilru a la khawp mai (Y)

    [Report abuse]

  12. 12
    vakul Says:

    lt, post tam tak i ziak tawh a, maksak ka la ti reng reng hlei nem, ka rawn hnial fo che a, mahse ka haw miah lo che.

    Tunlai khawvelah hian tlangval zingah Pathian thu tihtakzeta ngaihtuah peih hi an tlem tial tial, tin Puitling rilru put hmang a ni ve hrim hrim bawk a, a sahaw zawnga la erawh an thahnem lutuk.

    Pathian thu hi i ngaihtuah ve tak tak niin ka hria a, a tha ka ti, i thu lak dan leh kan ngaihdan a inang vek lovang, amaherawhchu, kan la zir tlang dawn chauh a ni vek a.

    [Report abuse]

  13. 13
    Chhuaklinga Says:

    Pathian thu hian a va huam kim tak em. Eng zawng pawh mai hian thiam takin an ziah hi chuan a dik em em mai zel zawng a nih hi.

    Thlarau Thianghlim puihna leh awmpui a nih hma kha chuan Petera pawh khan puithiam beng sat thla ngam khawp khan Lal Isua kha tan mahse, hmeichhe tawngkam khat avangin a phat zuah zuah a. Pentikos ni Thlarau Thianghlimin a awmpui atang kha chuan a huaisen zia kha, mihring huaisennain a neih theih rual loh huaisenna a nei leh si. Thlarau Thianghlim hruai nih hi a va tul em. (OT em aw…) tren tren

    [Report abuse]

  14. 14
    ltachhakchhuak Says:

    @Vakul, haha. Ni e, ka la rawn post cheu dawn nia. Kan sawiho leh a niang chu. Ka lawm thin, min fakna ang hian hmasawn zel ila ka puitling tawh ngawt ang.. :-)

    [Report abuse]

  15. 15
    Dr John Says:

    (Y) A Thupui “A lem chu a tak hmelma a ni” tih hrim hrim hian min hneh tlat tawh, tha ka ti khawp mai.

    [Report abuse]

Leave a Reply

You must be logged in to post a comment.