I thlang sual e

March 31st, 2012 2:04 pm by LaMea CâcTùs FLh

Fur lai aniin boruak a hnim ruai a, chhum lah chu a zíng phui mup mai bawk nen boruak pawh a uap hle a. Chu furpui boruak uap chhurh mai chuan Pu Lalnuntluanga te in chhung pik tak chu a belhchhah in chu in ah chuan hlimna in thla a zar lova, an chhungkaw nun a hlim lo ani tih a hriat theih bawk si. An In lian tak ah chuan cheng an tam lova, a ruak huai a, an sofa set mawi tak te, an LCD TV liantak te chuan chu in chu cheimawi mahse chu in ah chuan hlimna a thlen hauh silo. Van lama chhawm theihloh khawvel thil mawi tak tak chu Inah chuan a tam a, mahse chung chuan hlimna a pe silo. Engkim mai, an In atanga a chhunga awmte chu Pu Tluanga leh Pi Remi te thawh hah liau liau rah aniin eirukna leh hlemhletna cheng khat pawh a tel silo. Mahse, hah taka an thawh hram hram rah mah nise, Pu Tluanga te nupa, kum upa lam tawh tan chuan engmahlo mai a ni si.

Pi Remi chu an sitting room thutthleng nuam takah thuin an chhungkaw thlalak a en a, a keu let a let in, a bianga mittui rawn luang chuan a album ken chu a far karh karh a, an nunhlui leh an chhungkaw nun thin te thlir letin an fapa Sangtea naupan lai thlalak, a Pa ina a kokichhuan lai chuan a lung ati chhia a, a vel ani. An Inchhung an thlir vel a, Fanu 2 leh fapa 1 an neih avangin an fapa neihchhun an duat em em tan veka an tih an in leh rosum zawng zawng te, hah taka anlo thawhchhuah sa engmahlo maiah a chang ta si. Nu ber rilru atang chuan a fapa a hmangaih leh a duat em em, naupang fel tak, kehthei ena a en hetianga a awmta mai hi a na a, tawrh thiam a har ani e.Pu Tluanga erawh a tawng lemlo, mahse a hmel ah chuan lungawi lohna, hlim lohna a langin a rilru a hah tih reng a hai theih siloh, sitting room lama an chhungkaw thlalak chu a en a, muang ban charhin
“Mama Nu, keini pawh kan thiamlo ania nge” tiin an Nu lamah chuan a phei ta a.

Pu Lalnuntluanga leh Pi Lalremsangi te hi nupa inkawp rem tak, an nulat tlangval lai atang tawh a vengchhung fak hlawh, Pathian hre mi tak anni in kum 30 chuang nupa ni tawh, fanu pahnih leh fapa pakhat neiin chhungkaw hlim thei tak anni a. An fanu te pahnih pawhin mi angin pasal duhawm tak neiin khual khuaah an awm a, ngai thei hle mahse chu chu khawvel nihphung anisi. A enkawltu in a zir ania nge an fa tlum ber leh an fapa neihchhun Lalnunsanga pawh a tetlai reng atangin naupang fel, sikul leh kohhran lamah pawh fak hlawh, Sunday school lamah pawh Pi.Zaii medal dawng pha leh school ah pawh kg 1 atanga a college kal thlenga first division aia hniama pass ngailo aniin an fapa chutianga a puitling chhuak chu Pu Tluanga leh Pi Remi pawh an lawmin Pathian hnenah lawmthu an sawi fo thin.

Sangte a pawh a zirna te a lo zawha hna duhawm tak a thawh hnu phei kha chuan a bik takin Pi Remi phei chuan tu hmel hmuh a chakawm tiin nupui nei turin a turfo thin. Sangtea hrim hrim hi tlangval lerlo, ngawichawi tak anih avangin a rualpui te aiin ngaihzawng pawh a hre har hle a, mahse a mit erawh a lerin hmeltha a hre hle , a Pa phei chuan tum khat “Mama chu hmeltha I hre emai, mit chauha nupui I zawn chuan upat lama thuk kan melh ngat ngat ang tih a hlauhawm hle mai” ati nghe nghe tawh a. Tlangval ruihtheih lama fihlim, chhe zawk zawklo leh hnathawh tha tak nei ta chu nula lamah pawh a tla nain fanu nei hlei hleiin an be tha a, ama tawkah chuan a to ve hle a, nupui pakhat na na chu a huphurh biklo.

An vengchhung ami Pu Roberta fanu hmeltha Aduhi, Lalduhawmi, an veng pathlawi hoin a “pheichham man ila chu zankhat hlawh ka thlang ang” anlo tih fiam fo thin nen chuan Sangtea chu an inkawp chho ta a. Sangtea lah tlangval hleitling, Aduhi lah nula hmeltha, Zawlkhawpuiah chuan a tluk an tamlo ang tih ngam a niin an pahnih inkawp chu tlang mawitu, vakul nupa ianga hmuh nuam an niin inhmeh tilo reng an awmlo. Thuthang a hriat atang erawh chuan Pu Tluanga chu a lawmlo a, engmah a sawi lemlo. Pi Remi erawhin a fapa chu a hauin an duhloh thu a sawi zing hle a. Mahse hmangaihna chungchang ah erawh zawng, “ka Nu leh ka Pa min zilhna hi ka tan a tha e” tih lam ai chuan,

“Chun leh zua a hrang e ka di mampui
I vawng zel ang kan tiamthu di” tih lam hi mihring te thil ngaihtuah duhdan a ni si.

Mama, Aduhi hi zawng a hmel ah zawng sawisel bo mahse a Nu ina Aduhi Pi leh Pu a enkawl dan hi tlang sel leh mak tih khawp ani a, kan nei ngam dawn emni.
Ka Pa, Aduhi hi chutiang anilo, a rilru a thain a tluang asin, a mizia te chu kei aia hre chiang an awmlo.
Aduhi mizia chu kan hrelo, mahse a Nu ina a pasala chhungte a enkawl dan hi kan veng chhungah demlo an awmlo a, hmeichhia hi chuan an Nu te an chhun tlangpui si.
Ka Pa hmeichhiate chu mipa a zir anni asin, ani tluka hmangaih ka neilo
Ka fapa in I duh chuan kan nei ang, I thlang sual anih leh kan tuar tlang aniang chu.

Sangtea leh Aduhi te pawh chua an innei ta a, a tira an hlauh ang em em nilo mahse insaka ban ril atana thing chhe hman chu a nget hma ti a an sawi ang deuhin Aduhi sual vang nilo mahse, amah enkawl tu a Nu mizia chu amaha a lanchhuah hun a awmlo thei silo. Hun a ral a, kum a liam a, fa an han neih takah pheiah chuan a pasal a Nu leh Pa laka a awmdan a thlak tual tual a, duat chu sawiloh, hnawk atiin a fa te an awm mai mai pawh a phal heklo. Chu a lawina in sak nana hah taka thawktu Pu Tluanga te nupa chu inchhung bungrua nen a en hrang lova, a duata a enkawl tura a ko a Pathian ruat chu Aduhi tan zawng tar chhia, tar phunchiar mai bak anni silo. Sangtea hi mihring rilru chhelo leh tluang tak nimahse mipa hi zawng kanlo mawl ani e. Zantina mutpui leh fate nu ina “ I Nu hi, I Pa hi, chuti khati, I farnu te lah hi…. Indang ila a tha zawk, in hrang atangin kan enkawl thei tho alawm” an tih sa sa chuan ka “aw, e, nia “ duam duam thin si.

A kartu a thiam chuan mipa hi zawng kan nep fo thinin Sangtea pawh a bang silo,

“Mama tuna I indanga I Nu nen chauha min hnutchhiah anih chuan I laka ka rilru hi khuhhriang khup thawk ang ani ang, ka pension pawh hi kan eiseng lo anga, inluah man nen sum lamah zawng kan buailo ang, fapa neihchhun ina inhrang min chan san erawh chuan kan rilru zawng a na khawp ang” tih meuhin tawngkam thlah mahse Sangtea te chu indangin nizan khan an insawn chhuak ta a.

Note: Misual nula ho kha, Aduhi ang in nihloh hram ka beisei.

Similar Posts:

Recent Posts:

27 Responses to “I thlang sual e”

  1. 1
    Kher Kher Says:

    1st ve deuh kher kher teh ang.

    Report this comment

  2. 2
    ahooma_ Says:

    Hmeichhe sual deuh hi an awm tlat; Mahse nakimah an mote’n an tih dan chiahin an chungah an la ti ve leh ang a ti nia!

    Report this comment

  3. 3
    Jacka Pi Says:

    Naaaaahhhhh!!!! Sangtea hi a nep lutuk!!!! Hetiang ngei hi anih hi thaibawi chu, nau ek suk leh nau awih lam a ni lo.

    Report this comment

  4. 4
    Dave Chhangte Says:

    Miss Aduhi chu van sual reuh… :-P

    Report this comment

  5. 5
    lamea25 Says:

    #3, jacka pi, support

    Report this comment

  6. 6
    sheldon Says:

    Khawnge lamea25 thawnthu ziak chu kan chhiar ang e :-)

    Report this comment

  7. 7
    lamea25 Says:

    Yes, U sheldie rawn lang hi chuan thla a muang thin

    Report this comment

  8. 8
    Jacka Pi Says:

    Lamea chu a character dintu chu i ni bawk sia! :-S

    Report this comment

  9. 9
    Grey_RM Says:

    Short sory ngaihnawm , zirtir nei tha tak a ni. (Y) I ziakthiam

    Report this comment

  10. 10
    sheldon Says:

    Hmeichhia bawk min rawn sawt leh a, short story ka ziak ang a, mipa ho sawt ve thung teh ang :-D

    Ziak ngaihnawm khawp mai. Ni e, Aduhi ang khi hmeichhe zingah kan tam ang. Pasal nu leh pa leh chhungte va hmangaihpui lova pasal te lak hran tum tlat hi a awm ve theih alawm. Mihring nun diktak pho lanna short story thatak ani ka ti.

    Report this comment

  11. 11
    Fonz Says:

    Relationship lampang bawk ami? …relationship lampang leh nghal thui deuh deuh hi in ziak a…agony uncle in tam hmel hi mawle lol

    Report this comment

  12. 12
    Jacka Pi Says:

    Aduhi ang pawh lo ni se, mipa te hi Sangtea anga nep nih loh tur :-P

    Report this comment

  13. 13
    Dr John Says:

    (Y) Gud post. True story a ang khawp mai, tih chhan tumah ka nei lo a nia kei chu… :-P Zirtir a nei tha khawps mai.

    Report this comment

  14. 14
    lrpa Says:

    Tha viau mai!
    Hei hi inhnial theih viau mai. Hmeichhe tam tak hi an pasal chhungte atanga an pasal lak hran tum ngar ngar an awm ve a, thil mak tak chu ani lem lo in ka hre tho mai.
    Hetiang mi an nih tlat chuan in dan mai kha a tha tho tho zawk awm e. Khawi emaw lai a bo ta vang vang pawh an ni chuang lem lo a. Naupangte pawh hi pi leh pu bulah chuan an sual duh deuh an ti emaw ni!

    Report this comment

  15. 15
    lamea25 Says:

    U sheldie, i thawnthu ziah hi i feminist ltk minti fo asin..
    Jacka Pi, Aduhi ang neih chuan Sangtea nih a awl viau ang

    Report this comment

  16. 16
    Lamji Says:

    Haha! Duap ve aw…zahthlak.

    Report this comment

  17. 17
    Lamji Says:

    #1,,kher kher a :D :D

    Report this comment

  18. 18
    Chemtatrawta Says:

    Mipa hian nupui kan neih chuan kan nupuiteah hian kan rilru kan nghat anga, nu leh pa hmangaihna a dal tial tial dawn a ni. Chumi hunah chuan mo fel leh tha chu a pawimawh tulh tulh thung si.

    Mo thalo pakhat neih pawh hi chhungkaw kehdarhna tih hi ka pa min fuihna a ni reng fo.

    Chuvangin, tlangvalte u, i nu leh pa i la hmangaih zawk lai leh i nupui avanga i hmangaihna mit a del hma hian i nupui tur thlang thiam ang che. Tui ata enkawl seiliana tun dinhmun thlentu i nu leh pa laka i bat hi an damchhung reilote chhung tal hi chuan i theihtawpin hmangaihna nen rulh let i ba a ni tih hrenawn fo ang che.

    Report this comment

  19. 19
    Jacka Pi Says:

    Fonzie #11, agony uncle ka duh luutuuukk…heheheheh :-D

    Report this comment

  20. 20
    DuatDuat Says:

    Tlang pawh hi ral ah chuan a mawi em2 a,kal kan chak thin,mahse a hmun han thlen meuh hi chuan thosi,pangang,rul,vangvat,lung rual rem lo tak2 te leh thil dang2 te in a lo khat leh thin si a :-S

    Report this comment

  21. 21
    Jennifer Lo Says:

    ‘hmangaihna hi a chhuk luan’ anti em kha.. nu leh pa in fate kan hmangaih ang a nasa in fate hian nu leh pa hi anhmangaih let lo a niang chuvangin nu leh pa te tan chuan… fate hian min chawm lo leh awmpui lo turah inngai hmak ila,kan la thawh theih laiin kan tar hun a tan lo inruahman sa mai ila,min chawmtu leh awmpui tlat peihtu fa fel kan neih hlauh leh a thra a ni mai lom ni

    Report this comment

  22. 22
    Levi Says:

    Zanah ka chhiar ang ka ti a,ka khek a, a ngaihnawm hle mai. Paws darthlalang tak a ni e (Y)

    Report this comment

  23. 23
    Robert April Says:

    Chhiar ve se ka tih deuh deuh chu an awm maw le.. chungte chuan he site hi an lut dawn tawp silo a.
    Good post a ni e (Y)

    Report this comment

  24. 24
    Amris Puri Says:

    ‘Mipa in a nu leh pa a kalsan anga a nupui a vuan ang’ tih emawni kha a lo la thutak lutuk a nih chu mawle…a mahin a sawi ang ngei khian hmeichhiate chu an tlakna (mipa) a zir an ni….aman a zir a nih khi…ti mai teng….Gud Post (Y)

    Report this comment

  25. 25
    Guillermo endara Says:

    Sangtea apa lo khawp mai han ti ngawt dawn ila kar ah fa te an lo awm tawh si chuan han pa viau mahse fahrah siamna a ni bawk si.

    Report this comment

  26. 26
    vakul Says:

    Tum neia ziah a ni bawk a, a deng fuh ang chu maw.

    Report this comment

  27. 27
    creampie Says:

    Ziak tha khawp mai. Mapuia Zephyr ten han phuah belh sela a hmuhnawm ngawt ang te ka lo ti mai mai a!!!

    Report this comment

Leave a Reply

You must be logged in to post a comment.