Neuva

March 30th, 2012 8:30 pm by TuaiSialA

Darzaliana fapa Neuva (Tea) hian thiltih sawi tur tehchiam a nei lo va, a tuarchhelzia hi mihring dang pangti pu ve lo niin an ring hlial a, kâ chhawn lohva thihna ngei turah rei fe a dam theih avangin.

Amah hi Lianphunga khua Zawngtah-a an tlangval chhuanvawr pakhat a ni. Unau panga an ni a, an huaisen tlâng hle a. Ralte Kawlni, Chalchung an ni. A pianpuite chu Thangsavunga, Mangzika, Hnehbana leh Vailianthangi te an ni.

Neuva hi Mizo tlangvalah chuan lian tawk tak, chak tak, hmel pawh tha ve tak a ni a, tlangval ngo pawl a ni. A u Thangsavunga nen hian ramchhuah âtin an â a, tûl lai pawh ni se, sa bei tur chuan an kal zel mai a, buh ngah pawlah an tang leh tho si thin. Kum khat chu Tlawng kam an nei a, favang lamah chuan sai kap turin an kal dawn ta a.

An chhungte’n an remti lo va, “Kan lo a zau si, keini hmeichheho maiin kan vêng thei lovang. Buh pawh a tulzum tan tawh si a, Zawng-in a kheh zo vek mai ang,” an ti a. Anni chuan, “Zawng-in an kheh séng hlei lo’ng e,” an ti a, an kalsan ta a. Chumi kum chuan buh ngah pawl ber an la ni ta fo va. Chumi ram chu ‘Zawng kheh sèn loh ram’ an ti hlen ta a ni.

Tin, Mangzika hian nupui a nei dawn a, an insawi rem vek tawh a, sum inhlan chauh an bâk tawh a, an khuate chu ramchhuakin an kal dawn a. Thangsavunga chuan, “Mangzika chuan nupui lo nei sela, man pawh kan sawi fel vek tawh, in lo inhlân mai ang a. An ngen belh a, pêk tur zât pawh ka sawi vek tawh kha,” a ti a, a kal ta mai a. Mangzika chuan, “Ka u awm loh hlânin nupui ka nei duh lo,” a ti a, a zui ve ta a. A nupui neih tur pawh chu an thulh a ni ta mai a!

Vawi khat chu a u, Thangsavunga khualzin chuan pangang hlîng rahfuanpui an tih ang hi a vei a, an zâwn hawng a. Neuva chuan a lo zuk hmuak a, an zâwn chu a hmuh veleh, “Nghat teh u, ka han en ve teh ang,” a ti a, a u ke chu puanin an zem bâwk luau mai a. Neuva chuan a phelhsak a, kawng sira mau chu tiang tur a han sahsak a, a u chu a pe a. “Hei hi vuan la, ding teh, i thei em?” a ti a. Tiang vuan chuan a u chu a ding ta a. “I ke lehlam kha han pên teh,” a ti leh a. Harsa ti tak chung chuan a han pên hram a. “Lehlam pên leh teh, lehlam pên leh teh, pên leh teh,” a ti zel a, in thleng chuan zâwn lovin a kaltir ta a ni.

Neuva titi duhzawng te chu, ‘Tlum leh tlum inchena thûkin invit ila, kan khuaah chuan thi har ber ka ni ang’ tih te, ‘Ka mitmu hi kher chhuak ula, ka la tihlum thei tho ang che u’ tihte hi a ni. Tlangval huai inti deuhte chuan an ngaihthlak duh lohzawng tak a ni a, a dik leh dik loh han fiahpui ngam chi pawh a ni si lo va! Tin, savawm hliam beihnaah te hian a khawh thelh phawt chuan a thin a rim ta thin a, man tumin a ûm a, a u Thangsavunga khan a khap hram thin.

Vawi khat chu a mawngtamah khawihli pui a vei a, a hnai hunah chuan phulraw chhuat chu chemin a kar kau va, a zuk thut sawr a, chem phawi leh thawh a rual a, a tho zût thawt mai a. Khawihli pui zang chu a chhuak nghal vek a, in hnuai lam chu a hnai chuan a phuh berh nguai mai a ni. A vei chhûng khan tuman an hriatpui lo va, na nei lo ang maiin a duh duhin a thu thei tho a ni.

Vawi khat chu a kephahah panganghlîng a vei leh a, hlo a thlawhpui reng a, tho leh fanghmir-in a bawm pawhin a khawih duh lo va. A zual deuh deuh va, a kephah chu a pân tlang ta a. Khuangruang te, fanghmir te chu a pânah khan an lût tlang mur mur mai a, na nei lo ang maiin hlo a thlo hmiah hmiah reng mai a. Hemi an han hriat meuh chuan an khaw tlangvalte chuan, tlum inchena inviha thih har ber a inring te chu dikin an ring ta a. A mitmu kher chhuah hnu pawhin a khertu chu a la tihlum thei mai tak ang chu maw, a taksa hian nâ a hre ve lo a lo nih hi, an ti a, an hlau ta viau mai a ni.

Thulâkna: Mizo pi pute leh an thlahte chanchin by K. Zawla

A thih dan kimchangin la chhunzawm leh turah inngai teh ang.

Similar Posts:

Recent Posts:

52 Responses to “Neuva”

Pages: « 1 [2] Show All

  1. 51
    sillyBoy Says:

    Neuva hi Hmar hnam emaw ka lo ti thn a, Ralte a ni maw, a huai khawp mai. Tunlaiah nise hetiang hian a huai reng the angem le? An at huai ni hian ka hria.

    Report this comment

  2. 52
    Neuva hun hnuhnung | mi(sual).com Says:

    [...] Hetah a thih dan kimchang post ka lo insawiba tawh laklawh si a, ka han post chawm mai a ni. A la chhiar lo tan chhiar hmasak a pawi lovang. [...]

    Report this comment

Pages: « 1 [2] Show All

Leave a Reply

You must be logged in to post a comment.