Palak Dil – Mizorama Dil Lian Ber

March 12th, 2012 5:30 pm by Dr John

1. Thu Hmatheh:

Kum 1986, Shillong-a lehkha zira ka awm laiin Mizo țhian zaho awmkhawm chu hnamdang tlangval hian “Mizoramah dil lian te, tlang lian te, lui lian te in nei ve em?” tiin min rawn zawt a.  Kan țhianpa chuan “Mizoramah chuan Dil lian tak pakhat kan nei a, a hming chu RIH DIL a ni a, mahse Burma ramah a awm,” tiin a chhang a. Chu hnamdang tlangval chu a nuih a za khawp mai a. Fiamthu kan thawh-ah min ngaihsak a ni.  Hetih lai hian ka rilru chuan, “Mizorama Dil lian ber chu Palak Dil (Pala Tipo) a ni a, Tlang sang ber chu Phawngpui a ni a, Lui lian ber chu  Beinô (Chhimtuipui/Kolodyne) a ni,” ka lo ti rilru ve neuh neuhva.  Mahse, kan boruakin a zir loh tak em avangin ka sawi chhuak duh ta lem lova.

A ni lah taka, Mizorama Dil lian, Tlang sang leh Lui lian te hi Chhim lamah, Chhimtuipui District (tunah chuan Saiha District leh Lawngtlai District a ni ta) huam chhungah vek a awm a. Mahse, Zofate hian an chanchin hi kan hre tlem hle a, ngaihsak an hlawh vak lo bawk.

Burma rama awm Rih Dil hi a lâr zawkin ngaihsak a hlawh zawk emaw tih tur a ni a. Engnge a chhan ni ang? tiin ngaihtuahna thui tak min pe a. Tunlaia Chhim lam ațanga issue hrang hrang – Political, Ethnic Identity leh Union Territory te nen hian eng emaw ti taka inzawmna a nei em?

Zofate inpumkhatna atana kawng pawimawh tak zinga pakhat a ni thei ang em? tih thlengin min ngaihtuah tir hial a ni. Chuvangin, Zofaten Palak Dil (Pala Tipo) chanchin hi chiang leh zuala kan hriat theih nan te, Zofate inpumkhatna atan leh in-unauna tinghettu atana a țangkai beiseiin ka rawn chhawpchhuak a ni.

2. Palak Dil (Pala Tipo) Lo Awm Ţan Dan:

Palak Dil lo awm țan danah hian chanchin mak tak tak leh ngaihnawm tak tak a awm a. Palak Dil hi A.D 800-1200 inkar vel, Mara fate Burma ram ațanga an lo tlak thlak hun lai vel ațanga lo awm țan niin sawi a ni. A hun ngaihtuah-a a rei tawh nen, Mara faten pipute ațanga an inhlan chhawn dan (oral tradition) a danglam loh dan ațang hian Palak Dil lo awm țan dan hi a dik ngei ang tih a rin theih a ni. Mara pipute ațang tawh-a hriat dan tlanglawnah chuan Palak Dil lo awm țan dan chu hetiang hi a ni.

Hman lai chuan tuna Palak Dil awmna hmun phai zawlah khuan Hnychao khua a awm a, in 300 vel an ni. Hnychao tih awmzia hi, Hny chu Hnawl or len tihna a ni a. Chao tih chu mawng or kil tawp tihna a ni a. Hnychao awmzia chu A mawng tawpa hnawl/Kil tawpa hnawl tihna a ni. A thawnthu nen a inhmeh khawp mai. 

He Hnychao khaw lai takah hian Lungpui lianpui a awm a. Lungpui chuan a hnuaiah kua a nei a, a kua chu a bel tlun mai a. A khat tawkin Lungpui bul hnaia chhun-a naupang tualchai leh zana naupang pawnto te chu an bo leh daih țhin a. Hnychao khuaa awmte chuan an awmna hmun hi phaizawl ngaw dur pui a nih avangin Ramsa leh Ramhuai-ten naupangho chu an la bo ah an ngai mai țhin a ni. Mahse, țumkhat chu Mikhual Sumdawng Lasen zuar pawh zana a nula leng haw a bo tak tlat avangin a tukah chuan Khaw paho ngaih țha lo chuan Lungpui chu an han belchiang a.  Lungpui hnuaia kua bel tak awm chu Rulpui kua ni ngeiin an hre ta a. Chu Rulpui chuan mihring la-in a dawlh țhin niin an ring nghet ta a ni.

Tichuan Hnychao khaw paho leh tlangvalho zawng zawng chu chhuak khawmin, Rulpui man theih dan tur an ngaihtuah a. Nghakuai lian tawkah Ui tawktarha Rulpui chu man theih beiseiin, an nghakuaia ui tawktarh chu Rulpui kua nia an rinah chuan an thlak thla a, a hrui tawp lehlam chu Thingkung-ah an thlung a, an nghak ta a ni.

A tuk zingah chuan Tlangvalin an Nghakuai hrui chet laih laih thu leh thil awk a awm ngei thu an rawn tlangauva, tichuan a khawnawta chhuakin Paho leh Tlangval hoten Nghakuai hrui chu an pawt chhuak țan ta ni. Rulpui lian tak mai chu a lo awk ngei mai a, an han pawt chhuak zel a, mahse Lungpui lianpui vet nga zeta sei an pawhchhuah hnu pawh chuan an la pawhchhuah zawh theihloh fo avang leh khua te a lo tlai tak avangin Tlangval hovin an pawhchhuah theih chinah chuan an sat chum ta ringawt mai a.

An sahchhum veleh chuan an pawhchhuah bak Rulpui mei lam chu a kuaah chuan a tla lut a, ri mak leh ring, rapthlak em em a rawn richhuak ta uan uan mai a; khaw mipuite chuan mak an tiin an rap em em mai a. Tichuan, Rulpui an thah zan ațang chuan tui nasa em em mai hi Rulpui kua ațang chuan a rawn put chhuak ta hum hum mai a, rei lo te chhung lekin Hnychao Khua chu tui chuan a chimpil ta vek mai a, Dil lian takah a lo insiam ta a ni.

Palak Dil hi Mara țawng chuan Pala Tipo tih a ni.  Pala tih chu lem or dawlh tihna a ni a.  Tipo tih chu tui tam tak or Dil tihna a ni.  Tichuan Pala Tipo tih awmzia chu “Lem Dil” or “Tui tam takin a dawlh or Chimpil” tihna a ni. He Hnychao khua ațanga tlanchhuak hman ta te hi a piah lawka Tlangah awmhmun khuarin an khawsa a. A khaw hmingah pawh Pala khih, Lem Khua or Dawlh Khua an ti ta nghe nghe a ni. Mizo țawnga Palak Dil kan tih hi chuan a awmzia a phawk zo lo chauh ni lovin, a awmzia a bo hial niin alang. Palak Dil han tih tawp hi chuan, “ngaihruatin lunglen a hril chang chang” tih ang deuh kha a ni awm e.

3. Palak Dil Awmna Leh Zau Zawng:

Palak Dil hi Mara ram khawpui Saiha ațangin chhim-thlang lamah, km 94 laia hla-ah a awm a. A bul hnaiah hian khaw pathum Lawngban (Pala), Tongkalong (Tokalo) leh Phura khua te an awm a.  Phura tih loh khaw dang te hi chu Tlanga khaw awm an ni.  Palak Dil hi Phura khua ațanga chhim-thlang lam bawk km 6 vel lekah a awm a. Palak Dil pian hi Vahlah tui ang deuhva chhim leh hmar hawi zawnga sawl a ni.  Palak Dil sei zawng hi metres 870 zet a ni a, a zau zawng hi metres 700 zet a ni bawk. A thuk zawng hi metres 17 atanga 25 inkar a ni.  A tuichim chin hi mel khat leh a chanve bial vel a ni. Pu B. Lalthangliana sawi “a dung metres 783, a vang lam metres 475,” a tih hi tihsual palh a nih a rinawm (ref.Mizoram Encyclopedia, p.459).

Palak Dil hian Dil pathum a huam a, chungte chu a Pa, a Pui leh a Note tia vuahte an ni.  A Pa hi a Lian ber a, Palak Dil tih hming putu ber pawh hi a ni a, tuna kan sawi lai mek, Mizorama Dil lian ber hi a ni. A Pui hi a pa awmna ațanga chhim-chhak lam km 3 vela hla ah a awm a. A dung sei zawng hi ft. 280 a ni a, a zau zawng hi ft. 70 a ni. A thuk zawng hi a in ang lo nual a, a thuk lai ber hi ft. 27-30 vel a ni. A Note hi a pa awmna ațanga km 4 vela hla-ah a awm a. A pui ai hian a te deuh hlek a, țhal vaek char lai tak chuan Dil  Note-a tui awm hi chu a kang chat vek țhin.

Palak Dil (Dil Pa) ațang hian Mara rama lui lian pawl tak Pala lui a luang chhuak a.  He lui hi hmar lam hawi zawngin a luang a. A lui kam tawn hi ram zawl Leilet hmun, Phura zawl kan tih hi a ni a. Heng leilet te hi Mara ram ei leh bara chawmtu ber pakhat a ni.

4. Palak Dil Chhung Leh Bul Vela Chengte:

Tun hma chuan Ramngaw chhah țha takin a hual vel avangin Palak Dil bul velah hian Ramsa chi hrang hrang tam tak an awm țhin a. He lai ram ngaw velah hian thing lian pui pui, patling pawm rual rual leh Sai pum tiat tiat tur hi an la ding thelh thulh mai a ni. Hrui hnang chi hrang hrang, hruipui, hruitung, hruite, raichhawk, hnahbawr etc. pawh ala tam hle. Dil bul velah hian Ramsa chi hrang hrang – Sai, Sakei, Savawm, Sazuk, Sanghal, Sakhi, Zawng, Hauhuk, Ngau leh Dawr te pawh hmuh tur an la awm a ni.

Tun hma deuh chuan heng bul hnai vela Sai awm ten an thih dawnin Palak Dil hi an rawn pan țhin a, chuvangin Palak Dil mawngah hian Saingho pawh tam tham fe awm tura ngaih a ni.  Tin, Sava chi hrang hrang an la tam hle a, lei lama tla chi, Varihaw, Vahrit, Varung, Ramar te bakah, chunglama cheng Vapual, Vahai, Bullut leh Vate chi hrang hrang an la tam hle bawk.

Tin, Palak Dil-ah hian Sangha chi hrang hrang an awm a. A lar zualte chu, Nghameidum, Nghavawk, Nghakhing, Nghaleng leh Nghadeldul te an ni a.  Heng bakah hian Kaikuang, Chakai, Chengkawl bial, Satel leh Sumsi te an awm bawk. MADC (Mara Autonomous Distrcit Council) Forest Department ten an dah Sangha khawi chi – Major carp, Common carp leh Tilopia te an awm bawk. Major carp leh Common carp te hi an pung chak vak lova, Tilopia erawh hi chu a pung chak hle thung.  Heng bak hian Dila cheng chi Sava chi hrang hrang an awm bawk. Tui varak (Aquatic birds) phei hi chu Mizoram hmun dangah hmuh tur a awm ve meuh lo a ni awm e.

5. Palak Dil-in Huai A Nei?

Pipute hun ațangin Palak Dil hi thlarau khawvel nen inzawmna neia rinna nghet tak an lo nei a.  Mitthi thlarau kalna kawng niin an ngai bawk. Hman lai hun deuh phei kha chuan inbual leh a tui khawih pawh an serh hle a. Palak Dil tinawmnahtu, zunkhum, chilchhak, lunga vawm mai mai, țawng nawmnah, țawng tlahawlh tak tak hman leh awmze nei lova khawihtu chu Palak Dil Huai (Vengtu) hian a tina țhin a, damlohna-in a tlak buak ngei ngei țhin a, thih phah hialte pawh an awm nual tawh nia sawi a ni.

Sap hun lai khan Saheb pakhat, Mizovin Lalkaia an tih mai leh a hote chuan Mau pum hmangin Palak Dil chu an fangkual vel a. Dil lai tak an thlen chuan  Saheb chuan a Ngunhnam (sword) a ti tla palh ta hlauh mai a. A Sipai (Rahsi) zinga pakhat tui thiam ber chu a ngunhnam thlauh chu chhar tur chuan a tir ta a. Sipai chu Dilah chuan a liluh ta vang vang a. Mahse khawthim thleng pawha a rawn lan tak loh avangin tui ah a tlahlum ta niin an ngai a. Mahse, Saheb chuan “Tuia a tla hlum a nih chuan a ruang a rawn lâng tur a ni. Kan nghak rih ang,” a tih tlat avangin an hnial ngam ta lova, a ruang rawn lan hun an nghak ta ringawt mai a ni.

Mak tak maiin ni thum hnuah chuan Dil chhunga Sipai lut chu Saheb ngunhnam kengin a lo chhuak ta hlawl mai a!  A rui em em lehnghal a!  Dil chhungah ni thum lai a zu awm avang te, Zu rim a nam em em avang leh Dil chhungah zu in tur awm theia rin ngaihna an hriat loh avangin a thil hmuh leh tawn te sawi turin Saheb chuan a ti a. Sipai chuan “I thil hmuhte hi tumah hrilh suh ang che, i sawi chuan i thi ang min ti a, ka sawi ngam lo, ka sawi chuan ka thi ang,” a ti a.

Mahse, Saheb chuan a tihluih tlat avangin a hnial ngam ta lova, a thil hmuh leh tawnte chu a hrilh ta a, “Dil mawngah khuan khaw lian tak mai a lo awm a, mihring cheng te an awm a, chungho chuan chaw tui tak takin min hrai a, Zu te min intir a, ka rui lutukin ka lo awm rei palh ta a ni.  Ka lo chhoh dawn chuan min rawn thlah a, i thil hmuh leh tawn te hi tu hnenah mah sawi suh ang che, i sawi chuan i thi ngei ngei ang min ti a ni,” tiin hlau em em-in a sawi ta a ni.

A sawi ang tak tak chuan reilote-ah a thi ta mai a!  Saheb thinrim chuan a hote hnenah chuan an Silai (Rifle etc.) te hmanga Dil chhung chu kap turin thu a pe ta a. Dilah chuan Silai mu tam tawk an kap lut ta a ni. Chuveleh chuan thlipui nasa tak mai hi Dil ațang chuan a rawn tleh chhuak a, chunglam ațangin rial lian pui puiin a deng zui nghal bawk a. Thlipui leh rial chuan Saheb leh a hote chu a chanve deuh thaw a tihlum nghe nghe niin N.E. Parry chuan a ziak (The Lakhers(Tribal Research Institute, Aizawl: Firma KLM Pvt, 1932, p.561).

Sipai hote hian Palak Dil pana an lo kal lamah Mau satin Mauli Tlang an tihah chuan an vit phun hlawm a. Palak Dil ațanga an lo let leh lamah chuan Palak Dila thi ta Sipaite phun Mau te chu a let-ling zawngin a lo țo ta vek mai a!  Tun thleng khuan Mauli Tlanga mau te khu a chang leh a hnah te khu a letling zawng hlirin an țo zel nghe nghe a ni.

Tin, tunlai thleng pawha thilmak tak chhinchhiah tlak tak awm chu, Palak Dil tui hian Sen hun bik a nei țhin bawk. He Dil tui sen hun hi January leh February thlaah a ni duh bik. Tun hma 1990 hma lam kha chuan hetia Dil tui a sen hian a chheh vela khua Tongkalong, Phura leh Pala khua-ah te hian tlang hrileng, hritlang, luna leh mitna te an vei ngei ngei țhin a ni.

Kum 1991 January thla khan Tongkalong-ah Krismas leh Kum thar hmangin ka awm a. Hemi țum pawh hian Dil tui hi a sen phut mai a. Tongkalong ațang hian Palak Dil hi hla deuh mahse, a lan chian em avangin ka awm chhung kar khat chhung zawng chu kan thlir reng țhin a ni. Kan hawn lam chuan kan driver chu Dil lama kal turin ka ti a, Dil tui sen chu ka’n suak chhuak a, a hla ațanga a sen viau anga a lan laiin a hmunah leh han suahchhuah takah chuan a sen ai mahin tuihawk nu tak rawng hi a pawl zawk mahin ka hria. He Dil tui sen țhin hi Scienctific-a hrilfiah chi nge ni ang a, Dil Huai nen hian inzawmna a nei tak tak zawk ang? tih hi ngaihtuah leh chhui tham tak a ni.

Palak Dil chhung leh chungah khuan zanlai pelh hnu hian thil eng tak kal vel an hmu zeuh zeuh țhin bawk a. Hei hi Rulfepnei (Dragon) chaw zawng vak vel niin an ring ber ringawt. A chhan chu, hetia eng tak kal vel a awm lai leh a eng a chhuah lai hian tumah finfiah ngam an awm loh avangin, pipute ațanga an sawi leh rin dan Rulfepnei (Dragon) chaw zawng vak vel niin an ngai ta ber a ni. Tongkalonga ka cham chhung zan thum chu Dila thil eng tak kal vel țhin (Rulfepnei, Dragon nia an rin) chu hmuh ve ngei inringin zan khua-in, zing khawvar thlengin ka thlir țhin a. Mahse, ka en thla tih a hriat vang emaw ni? A rawn chhuak duh ta reng reng lova, engmah a awm tak loh avangin Rulfepnei chu ka hmuh loh phah ta nghe nghe niin ka hria.

Heng thil mak leh chanchin danglam tak tak avang hian tun hma chuan len den emaw, sangha man emaw, sava kah, ramsa kah te an serh hle țhin. Tunah erawhchuan hetiang thil avang a ni tia han puh dawt tur thil thleng hriat tur a awm khat tawh. Palak Dilah ngei pawh hian Len te dengin, Sangha te an man fo tawh a. Hei hi a chhan nia țhenkhat-in an rindan-ah chuan, Palak Dil Huai hian a chhuahsan tawh niin an ring a, țhenkhat thung chuan Chanchin Tha-in Dil Huai (Ramhuai) hi a rawn hneh (tlawm) tawh avangin, Lal Isua ringtute chu Dil huai hian a khawih na thei tawh lo niin an ngai ve thung a ni.  Tin, tlawhtute an tam tak vang nge, ramsa leh sava te pawh awlsam taka han hmuh mai tur an vang tan hle niin an sawi bawk.

6. Palak Dil Implications:

Palak Dil chungchang hi kan la sawi kim lovin, sawi tur a la tam hle naa duh tawk hnai mai ila. Palak Dil hian Zofate tan implications pawimawh tak tak a neihte zinga pathum chauh lo tarlang leh hram ila:

6.1. Spiritual Implication:

Palak Dil hian Mara fate tan thlarau lamah pawimawhna thuk tak a nei a. Palak Dil chu Pialral kalkawng a ni a. Mihring thlarau Pialral kal tur hian Palak Dil hi a paltlang ngei ngei țhin niin pipu ten an ring a ni.  Thlarau (ramhuai) awmna (chenna) hmun niin an ring bawk. Chuvangin, Mara fate tan chuan pipute sakhua, thawnthu leh rindan (religious beliefs and traditional practices) kan neih te a taka, lang theia min hriatpuitu (witness) chu Palak Dil hi a ni. Mara fate Kristian an nih hma kha chuan Palak Dil hian thlarau khawvelah Ramhuai leh Pialral a ngaihtuah tir a. Kristianna lo luh hnu erawhchuan, Ramhuai leh Pialral bakah, Vanram a ngaihtuah tir tel ta thung a ni.

6.2. Political Implication:

World Trade Centre tihchhiat a nih khan mihring nunna hlu tam tak luangral ta te, Building chhunga sum leh lehkha pawimawh tak tak kangral ta te bakah building man to tak kangral ta kha US sorkar ngeng chhun ber leh rilru tinatu ber a ni lo niin a lang. US sorkar rilru tinatu ber chu, khawvela Sorkar thiltithei ber Super Power nia a inhriat lai leh a pang tinatu awm thei lo tura a inngaih laia, Osama Bin Laden leh a pawlte chhiar tham lekin a inchhuan ruk vena ber World Trade Centre an han tichhe vek mai a, Pentagon an han tichhe nual lehnghal kha chu, US Sorkar tan chuan a tlawm thlakin a thinrim thlak tak meuh meuh a, an zak leh thinrim kha an kun ngawih ngawih ang tih a chiang a ni.

Hetiang deuh hian Palak Dil hi Zofate religious and political identity min petu a ni a (Mara fate tan a nil eh zual).  Palak Dil duhsaktu leh chawimawitu chuan Mizoram a hmangaih a, a țhatna tura thil a tih bakah, Zofate inpumkhatna a ngaihtuah tihna a ni. Palak Dil țhatna tur leh mawina tur ngaihtuah lova sawi hnawmtu chuan Zofate inpumkhatna a ngaih thah bakah Zo-hnahthlak hnam hrang hrang-te țhianah a insiam thei ngai dawn lo tihna a ni tel bawkin a lang. Tunah hian Palak Dil ngaihsak hlawh lo leh enkawl țhat mang lohva a awm hian implication tha lo dangte hi a nei em? tih pawh ngaihtuah tham a tling ta in a lang.

3. Cultural Implication:

Mizoram hian kan ram chhungah Tourist Spot atana itawm leh țha kan ngah lo hle a. Hmar lama awm ai khuan Chhim lamah awm ho hi Tourist Spot atana han chei tlak tak tak an ni zawk em aw tih tur an ni hlawm a. Kan sawi tak ang khan, Phawngpui tlang, Beinô (Chhimtuipui/Kolodyne) leh Palak Dil te hi Sorkarin țha tawp khawkin cheiin han enkawl sela, India ram chhunga mite chu sawi loh, khawvel ramdang ațang pawhin an rawn tlawh huai huai lovang tih tu nge sawi thei?

Tourist an lo tam chuan Mizoram Sorkar-in sum ala lut hnem dawn tihna a ni a, mipui pawhin sum lakluh mai bakah țhiante siamin nun khaw chhuah nana hmang pawh kan awm mahna le. Heng Tourist te kaltlang hian Mizo thil siamchhuah leh Mizo culture te hi khawvelah hriat an lo hlawh lehzual ngei dawn bawk dawn a ni. Tunah khuan, Palak Dil bul vela thingte an kit nual tawh a, ram ngaw chhah takin a hual thin kha a pan sawt ta hle a. Dil vengtu leh enkawltu awmna tur In țha tawk sak a, Lawng te chi leh Speed Boat te han dah nual a, Picnic spot leh intihlimna hrang hrang hmun atana han siam ve theih a chakawm hle a ni. Zoram Sorkara thuneitute leh sawi theitute an chet vat loh zawngin Palak Dil hian chhiat lam a pan tial tial dawn tih a chiang reng a ni. Palak Dil hi chei a lo nih a, Tourist spot țha tak a lo nih hunah chuan Zofate hi a hlawkpui tur berte kan ni.

7. Ngaihtuahzui Atan:

Mizorama Dil lian ber Palak Dil en tura lo kal i tum chuan a kawng chin leh senso zat tur awm chu hetiang hi a ni. Aizawl leh a chheh vel emaw, hmar lam ațanga lo kal tur chuan kawng a hla tham ve hle a. Aizawl ațangin Saiha hi Bus-in Zan khat kal a ni a. Maxi-cab leh motor te chuan ni leng ban tawk vel a ni. Bus-a kal tur chuan Bus fare, chaw ei man leh thingpui inna nen, Rs.800 (Maxi-cab chuan Rs.1000) vel-in Saiha i thleng phawt ang.

Saiha ațang hian Phura khua, Palak Dil hnai ber khua thleng turin Bus a service loh avangin, Maxi-cab chuan Rs.500-in i thleng thei ang. Mahnia motor hire chuan Rs.4000-6000 vel sen a ngai ang. Thawhkhawm Motor-a i chuang fuh hlauh a nih thung chuan Rs.300-400 vel lekin i thleng thei thung ang.  Phura khua ațang hian Palak Dil hi km 6 vel lek a ni a. Chuvangin, Palak Dil-a i riak duh kher te a nih loh chuan nilengin Dil bul velah a chet tlat theih a ni. Palak Dil-ah hian MADC sak Quest house a awm a, mahni mutbu tur inken chuan, a duh tan a riah theih bawk.

Saiha leh Phura inkar kawng hi Palak Dil vang chauh nilovin, Phura Zawl hi Mizoram chhimlam mara ram ei leh bara chawmtu ber, buh leh thlai te thar chhuaktu ber a nih avangin Sorkar in ngaihsak deuh seng chuan Mizoram changkanna kawng tur pakhat a ni.  Saiha leh Phura inkar hi Jeepable Road chauh anih avang leh fur lai phei chuan kal hlauhawm khawpin a chhia a.  A kawng țhat loh avang hian Thlai thar tam tak te chu hralhna tur awm hek lo, kum tin nuai tam tak man an țawih ral ta mai mai țhin a ni.

Kum 1998 ni ta-in ka hria, Mizoram Sorkar chuan a pawimawhna hriain, Saiha leh Phura inkar kawng hi Truckable Road-a siam turin a rawn ti a. Bus pawh an han kal luih tir ngial a.  Mahse, tunah khuan a hming leh thawm “Truckable Road” tih chauh chu record-a kan neih chu a ni a, a bak chu Jeepable road a la ni reng a ni.  Chuvangin, Palak Dil leh a chhehvel Phura Phaizawl khu Mizoram hnuk, Mizoram pumpui pawh chawm thei tur dinhmunah a la ding reng a ni tih hria-in mawhphurtute leh thuneituten ngaihsak deuh sela, hmasawnna tur kawng-te ngaihtuah nise thil duhawm tak niin alang.

PICS: Palak Dil thlalak hi ka hmuh chhun-te ka rawn dah. A neitu-pa ber “Official website of Mizoram Tourism Department” (http://mizotourism.nic.in/interest.htm) ah ka zawng a, Palak Dil thlalak hi pakhat mah zu han awm lova! Rih Dil thlalak erawhchu 3 lai an dah lawi!
 


Similar Posts:

Recent Posts:

27 Responses to “Palak Dil – Mizorama Dil Lian Ber”

  1. 1
    TuaiSialA Says:

    Post BVT tak a ni.

    Report this comment

  2. 2
    superpinqponq Says:

    Post tha hle mai.. (Y) Palak Dil hi kal ve chhin a chakawm. ‘huai a nei’ an tih thawm te pawh ka hre ve thin
    Pic khi a nalh khawp mai (Y)

    Report this comment

  3. 3
    ahooma_ Says:

    Bengvarthlak, ziak ngaihnawm thiam bawk si. Ka awih vak loh lai khi ngaihnawm ka tih ber lai a la ni zawk. Chuan tourism chungchangah hian hmasawn kan va la ngai nasa em.

    Report this comment

  4. 4
    ahooma_ Says:

    Bengvarthlak, ziak ngaihnawm thiam bawk si. Ka awih vak loh lai khi ngaihnawm ka tih ber lai a la ni zui. Chuan tourism chungchangah hian hmasawn kan va la ngai nasa em.

    Report this comment

  5. 5
    hnarliana Says:

    Mizoram tourism dept website chu ava mak awm ve, Rihdil atang pawisa an hmuh ka ring chiah lo e…Mizorama dil lian ber pawh an dah si loh chuan eng rilru tak pu ang maw..

    Report this comment

  6. 6
    Sceptor Says:

    Mizo fate chenna huam chhunga Tlang, Dil etc… huai neilo hi a awm tak tak emawnile ka ti ve mai mai….ngaihnawm khop mai..

    Report this comment

  7. 7
    kilung Says:

    A dik hle mai. Chanchinbu lian deuh a chhuah chi anih hi, sorkar beng thleng phak tur in. (Y)

    Report this comment

  8. 8
    roseparvul Says:

    Ka la kal ngei ang mawle.. Paws tha

    Report this comment

  9. 9
    BigZy Says:

    Ngaihsak phu a ni e…tuna Palak Dil panna kawng hi chu a ngaihna a awm ve thlawt lo a ni e…englekhawle Post tha tak zawng a ni e…

    Report this comment

  10. 10
    Pakak Says:

    I va han paws kimchang tak em (Y)
    kal ve ka chak ber te zing a mi ni mahse kawng that hun nghak mai teh ang

    Report this comment

  11. 11
    stan marsh Says:

    Ava bengvarthlak ve.Rihdil nen a chanchin ava’n inang. .

    Report this comment

  12. 12
    Othy fanai Says:

    a tha khawp mai,kn hrezau leh sot e

    Report this comment

  13. 13
    Pawngvina Thangthlawl Says:

    Ngaituah ati thui hle mai.. Ti ve duah ang e..
    Thawnthu ah Rulpui hi a lar phian a nih hi a..Chawngchilhi thawnthu ah, Ngaitei thawn thu ah, Chungleng leh hnuaileng indo…..
    Rih dil leh Palak dil a lo in ang hle mai a.. Rihdil trobul hre lo mah ila, a thawnthu te nen..
    Mara trawng chu hriat loh a lo va tam ve tih te thleng in ka ngaihtuah ta bawk a.
    Palak dil te phawngpui tlang te chei leh sawngbawl a ni lo chu a lawmawm lam ah ngai rih ta ila a thrat te ka lo ring rih deuh a, Ţhasiama Se no neihna an sawngbawl ang mai a an sawngbawl mai te ka lo hlauhthawn pui a…!
    Ţhang thar te Zoram khawvel eng zawk hnuaiah mawi leh chantlung taka chei leh enkawl a nih ka beisei e…

    Report this comment

  14. 14
    covenanter Says:

    Chhhimlam hi MNF hoho hunlai khan nasa takin kalkawng velah pawh beihpui an thlak a, contractor te pawhin an thawk nasa khawp mai. Mahse kum 2009 atang khan chawlhsan alo nih tak ah hian kawng siamsa pawh a chhe chawp ve zel in ka hria. Zawngling ( Zyhno) khaw kawng kha a ngaihawm ve khawp mai. An khaw mi te an fel em em mai lehnghal a. Mahse a hmun ah chuan inven a ngai deuh a nih kha mawle malaria veilo nih kha a zahthlak an ti tlat, kan awm rei ngam lo alawm….

    Report this comment

  15. 15
    H.Vangchhia Says:

    Kum 20 liamta khan Sports & Youth Services sponsor-in Palak Dil expedition cum wildlife study neiin kar 2 lei kan va riak a. Hetih lai hian a dil leh a kam/a chheh vel kan pal hneh hle awm e.

    A dil thuk zawng kan teh dan kha a hmanlai khawp mai. Mau Pum-ah thuin climbing rope-in (tlanglawnna hruizen) kan lungtum thlun chu kan thlak ta a. A hnuaiah hnim hnawk a tam avangina pil muang thin viau bawk. Chutia a pil riai riai chu a pil tak lemloh ( a dûm vangin apil riai ruai tho)hnu chuan hrui chu pawtchhuak-in kan teh ta thin a. Palak dil hi a kotlang bul atang maiin delchi bel ang deuh a chhuk deuh vut mai a ni a, a thuk lam feet 40 emaw bawr vel ni vekin kan teh kual. Hleuh chi vak a nilo thin, hnawk a tam vangin.

    Tlem chu ka ziak ve tak asin. Fahrah viau mahse,la chhiarlote tan kan phawrh ve mai mai ang e:

    http://henryvangchhia.blogspot.....ition.html

    Report this comment

  16. 16
    lrpa Says:

    Palak dil hi emni ‘Ngaitei hip’ tih thawnthu ami kha! A bengvar thlak hle mai. A hming hi chu kan hre vek hlawm anga, hetianga information tha tak a awm hi Dr. Johna bengvarna zar kan zo leh ta anih hi. (Y)
    Thil pahnih a tui a sen thin tih leh mei alh khi chu sawifiah zuai ila. Algae vang anih hmel, tui a to algae te khan periodic in spores (chi/seed) an siam chhuak thin a, hei vang hian tui rawng hi a hringte, a sen deuh te, a var chuai angte in an lang thin ani.
    Willow the wisp an tia tau-meichher chhi te hi, hetiang ang hi a awm anih hmel a, Methane gas vang ani awm e, methane gas te hi alh duh em em mai an ni a, boruaka oxygen nen an in tawn fuh chuan an alh pup thei an tia..
    Dil-in huai nei niawm tak a sawi hi keini chauh ring kan ni lem lo mai thei..African christian sulsutu pawimawh tak Pelendo a chanchinah pawh khan ‘dil huai’ thu chu a lang ve.

    Report this comment

  17. 17
    matea_tmj Says:

    ava bengvar thlak thin em!!! (Y)

    Report this comment

  18. 18
    shailendra Says:

    ka la tlawh hual riau riau.

    Report this comment

  19. 19
    chawnghilh Says:

    A va bengvarthlak kimchang lehzual tak em! Engemaw nial nual hi chu ka hre ve deuh roh va; mahse ka hnung thak hiat phak an awm meuh si lo va. Hei zet hi chuan kan pi pute legend kimchang thawkhat tak chu min fah ve ta e.

    Nia, Mizote leh anmahni hmunnghaka mite ai chuan a kawlhrawng zawk —ram dang mi nge nge te chuan Palak Dl pawh a thawnthu nena inmil awm deuhvin an lo finfiah leh hman chu a ni ngei mai maw.

    Ramhuai biaktlawn chi kan nih leh kan thawnthu hi an hre hmasa ngei ngei a, kan awih awm tur thil nena dawh zawm hi an thiam lahtak a. Eng dang a ni lo va, mipuite an influence tum dan kha vawiin thleng hian hnam mawl zawkte chungah Military lamte hi chuan an la chelek reng a nia! Hnam mawl zawkte pi pu thawnthu hi an zir tel ngei ngei thin reng a ni.

    Hetiang hi Missiology-ah pawh Pu Dr John-te chuan in zir hnehsawh ngawt ang chu. Atheni khuaah pawh khan an culture thil han hawh zeuhva, an hlaphuahthiam thu leh hla han hawh zeuhva, mipui attention draw-tira an awm tak chiaha, tarlan duhna lam thila thlekpui tak thut kha Paula pawh khan a thiam riau kha!

    Nia, a tui sen chhan pawh tau-meichher-chhi leh algae vang a ni thei khawp ang. Rih Dil pawh Eel breeding season nen a tui rawng inthlak a inmil ni awma an sawi kha maw! Mahse, Rih Dil danglamna riauva an sawi chu a tui sample hmun danga mi pawh a dil nut rualin a nu ve thin tih a ni a. Ka hawn ve ngial tawh a, chutia a nih tak chu ka hre lem hlei lo va.

    Maka an lo hriat hi mak turah kan ngai ve a ni ber a. Sawi leh inhrilh chhawn thiang a ni a. Eng pawh ni se, Palak Dila rulpui awm thina an sawi te, Tam Dil pawh antam kung khat pawh phawina atanga tui rawn put, tling khawma an sawite hi ngaihnawm ka ti a. Ka awih chuang lem hlei lo va. Ka awih loh thil ngaihnawm tak tak hi a tam teh mai!

    Tourism lam hi chu kan la thuanawp khawp mai a nih ber hi. Himachal-ah te Tourism lam hi an han chak mai mai khawp a, luikawr tui luang thla bir deuh pawh WATER FALL tiin Bus-in min hruai ngat ngat zel a. Hmuh chak deuhvin kan kal ve a, tangka chawi vekin —”Hetiang-te chu kan ram luikawr tinah a awm,” ka’n tih deuh hlak pek kha!

    Kan ram thil hlu hi mimir-te hian kan ngaihlu zawkmah niin a lang a, kan mi ropui thil ti theite erawh hi chuan chuti teh luain an ngaihven hran lo a la nih ber hi! A thawh hlawk ber H. Ropuia lah khan, “Department te tham min chantir …” tiin a la phun ang niah niah a. A lenzia zir chiang hman lovin an inkuangkuah leh tawh mai si … remhria inti deuhten lawn theih loh tlang hmingthang Thasiama Se No Neihna hmun-ah lah Children Park an siam lo chauh a ni bawk si … a hawih lo thei mai mai ngawt mai!

    Thlalak pakhatna khi ka download hmak e. Ka lak tum dan ang deuh chiaha lak a ni.

    Report this comment

  20. 20
    Telphawka Says:

    thlalak chu tu lak nge le, nalh hle mai a..

    Report this comment

  21. 21
    Aryan Says:

    Rihdil te chu Mizo history leh sakhuanena inzawm tlat ania Palak te chu khalai chhim kil khawra dil pakhat ve mai, Mizo tam zawk te tana culture leh sakhua nena pawimawhna pakhatmah neilo ania (lakher ho tan a pawimawh ani mahna), Rihdil anga an ngaihsak loh vanga vuivak vakna tur pawh a awmin ka hre lo.

    Mizo sakhua ah mi an thih in Rih dil ah an thlarua a kal thin a, Primary School a kan zir dan ni a ka hriat chu Rihdilah an kal phawta chumi zawh ah Hingtlang tlang, chuan Lunglohtui, chuan Pu Pawla (sairawkherhin thangchhuah lo ho a lo perh thin) hemi piah ah chuan Pialral ani lawm ni kha?

    Bakah thlalak en khian a dil khi a nawmloh hmel, Rihdil te chu phaitual hnim leh phul nuam takin sirkhatah a hual a awlsam te in a chen/ dai vel theih a, Palk dik ve khi chu a hnim ber bur si, vangvat leh thosi a tam hmel si. Adventure ah pawh ramhnuai lam adventure ngaina tan lo chuan a phur awm em em lo.

    Aizawl atanga Saiha direct flight a awm hunah ka la tlawh ve ang. (&)

    Report this comment

  22. 22
    no_nick Says:

    Aryana a hian flight a awm hunah rihdil a tlawh ve dawn anih chu..! lolzz

    Report this comment

  23. 23
    Dr John Says:

    Sawi hmaih lian tak ka nei. Tunlai hian BRGF-in kawngpui tha tawk an lai mek a, kawng kal dan tur hi Tuipang-Zawngling-Khopai-Laki-Lungpuk-Phura-Maisa-New Latawh-Kawlchaw a ni. Zawngling lama kal hi Laki a pel tawh a, Kawlchaw-Phura lam hi hma a sawn chak lo deuh. He Border Road hi laih zawh a nih hunah chuan Palak Dil pawh awlsam taka tlawh theih a ni ang.

    #13, Pu Pawngvina sawi hi a dik viau, ‘chei a nih pawhin awmze nei deuh leh a chin tawk hre chunga chei’ a ngai ngeiin ka ring ve.
    #14, Pu Covenanter sawi, Sorkar lai nen-a hmeh-rem khi chu a dik leh dik loh ka hre chiah lo, :-) Mahse, ngaihsak deuh hun leh ngaihthah deuh hun chu a lo awm pawh a ni mahna, ;-)
    #15, Pu HV, i expe khi i Blog-ah ka chhiar tawh, hetah hian han thailan ve pawh ka duh viau a, a thui tawh sia ka telh ta lo, min hrethiam dawn nia. He post hi chu ‘Palak Dil chungchanga i Post chhunzawmnaah’ ka ngai mai.
    #16, Pu lrpa, Algae leh Methane gas vang nia ring pawh an awm a, a dik mai thei bawk. Scientifically-a finfiahna a awm lo hi a buaithlakna lai chu a ni. Thil mak tak erawhchu, Palak dil tui sen hunlai vela a chhehvel khuaa mit-na hri leh tlang hrileng awm ziah hi sawifiah a har an tih ber chu a ni.
    #19, Pu Chawnghilha comment a ngaihnawm leh pek hle mai. Ni e, i sawi ang hian hnamdang leh ramdangah pawh traditional & religious beliefs (esp.folk religion) leh folk-lore (legends) nen-a inzawm thawnthu hi an lo ngah hlawm mai. Missionary-te pawhin, pawm sak vek dawnin ni chiahin an hre silo, hnawl vek chi an ni lawi si lo, an buaipui viau thin. Heng pipute thawnthu hi scientifically-a sawifiah theih chi leh sawifiah theih loh chi a awm ve tlat nia!
    #21, Aryana chu i rilru dik tak i sawi a, ka lawm e. Keima mimal ngaihdan maiah chuan “Mizo” tih tak hi kan chiang lovang tih ka hlau thin a, “inclusivism” aiah “exclusivism” hi kan uar palh ang a, “ka ta” tih leh “in ta” tih hian Zofate inpumkhatna tura “hem” rawn thlakin, Zoram kalsiam hi a buai palh ang tih ka lo hlauh ve em em vanga sawi ka ni. I ngaihdan pawh khi a thelh hauh lo, a dikna chen a awm, lawmawm ka ti.
    (Y) Comment-te ka hlawkpui hle mai, ka lawm e.

    _________________________
    I added cool smileys to this message… if you don’t see them go to: http://s.exps.me

    Report this comment

  24. 24
    RTPA Says:

    Aryan hi chu apuitling dawnlo reng reng a rilru hi..

    Post tha lutuk..

    Report this comment

  25. 25
    chawnghilh Says:

    Dr John : PHURA chanchin leh a thlalak nalh deuh rawn post teh. Ka hre chak teh mai a nia —Inchawimawina dam lai phungphun kawng sira in pi leh puten an neih thin ang kha.

    Report this comment

  26. 26
    Dr John Says:

    #25, Pu Chawnghilh, ka lo tum ang e, mahse lo nghakhlel lutuk lo la aw… :-)

    Report this comment

  27. 27
    Kawlni Says:

    tam dil insiam dan nen inang teuh hle mai- hmanlai kan pi pute khan han phuah danglam vak ngaihna an hrelo niang a?

    Report this comment

Leave a Reply

You must be logged in to post a comment.