Pathianin Tu Nge A Hman Thin? (Sunday Pual)

March 11th, 2012 6:26 am by Dr John

Bible chhiar tur: Gen.18:9-15, 50:20, Lk.1:35-38, 9:23-26, Joh.12:26, Rom.8:28).

1. Thu Kam Keuna:

Khawvelah hian mi țhenkhat chu hmantlak deuh leh mi aia chungchuang deuh bik an awm țhin niin alang. Rawngbawlnaah pawh mi țhenkhat langsar deuh leh hman tlak deuhte an awm țhin tih kan hmu, e.g. Mosia, Elija, Billy Graham, Benny Hinn etc. Hetiang mite hi an thusawi pawh kan ngai thla chak bik țhin a, an thusawiin mi pawh a hneh em em țhin.

A tlangpui thu-in an nungchang leh awmdan hrim hrim pawh a zahawm-in, belhchian an dawl a, an nun-ah zir tur a tam thei hle țhin a, an entawntlak ngei ngei țhin.  Khawvel Chhandamtu lo pianna atan pawh, Judai ramah nula hmelțha, pian nalh leh khawsa thei an tam dawn tehreng nen, engah nge Nazareth khuaa Mari kher kher hi Pathianin Chhandamtu pianna atan a lo thlan le? tih zawhna hian min deng fova, a chhan a awm ngei ang tih hre reng chungin Pathian mi hman țhin te chanchin i lo zirho teh ang u.

2. A Duhzawng Tihtum Tlat Tute Lalpan A Hmang Ţhin:

Khawvela awm kan nih avangin rilru, taksa leh khawsaknaah harsatna kan nei țheuh. Amaherawhchu, mi tupawh ama hamțhatna tur emaw, a chhungte tana hamțhatna tur emaw, ama mimal dinhmun țhatna tur emaw aia Pathian duhzawng ngai pawimawh zawk tlat a, rilțam, tuihal, chan leh mualpho hial pawh huam a, Pathian duhzawng ti hram hram tute hi Lalpa’n a chhinchhiah tlat a, Amah tilawmtute an nih avangin hetiang mite hi mal a sawm a, a hmang ngei ngei țhin a ni.

Pathian thu-in alo sawi chiang hle, “A ram leh a felna (Pathian duhzawng) zawng hmasa zawk rawh u, tichuan heng zawng zawng (malsawmna zawng zawng)-te hi a pek belhchhah ang che u,” (Mat. 6:33) tiin. Mi tam tak chuan a malsawmna hi kan zawng hmasa zawk țhin a, Pathian aiin keimahni kan inbuaipui hmasa zawk fo țhin bawk, hei hi Pathian-in min hman tak tak theih lohna chhan ber pawh niin a lang.

Mari kha Vantirhkoh Gabriela’n Chhandamtu pianna atana thlan anih thu a rawn thlen khan, ama mimal harsatna (personal problems) te, a mimal thiltum (personal plans) te, ama mimal duhzawng (personal desires) te a sawi buai lova, chutih ahnekin, “Lalpa bawihnu ka ni, I thu ang zelin ka chungah thleng rawhse”(Lk.1:38) tiin, a țul chuan thih pawh ngam-in Lalpa thu a awih a ni. Keini pawh Patianin min hmang duh em em țhin.

Nimahsela, rawngbawl tur a ni emaw, thil țha tih tur emaw a lo nih-in “Lalpa I thu ang zelin” tih ai chuan kan duhzawngte a lal zawk fo țhin a, Lalpa thu aiin keimahni thu te kan duh zawk ta țhin a, kan duhdan leh kan thiltum-te (plans & desires) a lal zawk ta țhin a, kan harsatna-te (problems) kan hmu lian zawk țhin bawk nen, hengte avang hian Pathianin min hmang thei țhin lova, Lalpa tana mi hmantlak kan ni thei țhin lo a ni.

3. A Man Pe Ngamtute Lalpan A Hmang Ţhin:

Mihringin Pathian kan an em em-na kawng khat chu – dinhmun chhe bera kan din lai te, harsatna nasa tak kan paltlang lai te-a min lainattu leh min țanpui a, kan lama țang tlat țhin-te hi kan theihnghilh thei ngai lo.  A langin emaw, a lang lovin emaw kan theihtawpin țanpui a, rulh let ve kan tum hram hram țhin a ni. Chutiang bawkin, harsatna kan tawh laia min nuihsantute emaw, harsatna leh lungngaihna min siamsak țhintu-te pawh kan theihnghilh thei tawh ngai lova, a chhe zawngin thungrulh lo mah ila, an bul hnaia awm leh khawsak tak ngial pawh kan tan thil harsa tak a ni tawh țhin (cf. Lk.9:26).

Josefa kha mifel tak a ni a, Pathian-a a innghah tlat avangin thil engkim hrethiam vek lo mah se a nupui hual Mari chung thu-ah khan Pathian thu a zawm ngam a ni.  Mari pawh khan, Lal Isua a pai lai khan thil kalsual palh ta hlauh sela – lunga den hlum mai tur, mi tenawm, future reng reng nei lo dinhmunah a ding a ni tih a inhrechiang em em a.  Mahse, chutichung pawhin, Mari chu Lalpaah a innghat tlat a, Lalpa remtih zawng a nih chuan lunga denhlum a huam a, thih pawh a huam tlat avangin khawvela hmeichhe nihlawh ber a lo ni ta a ni (Lk.1:38, 48).

Pathian ropuina tur kan thlan zawkna avanga kan mihring ropuina tur leh mawina tur (reputation & glory) sum leh pai, thiamna leh finna, hun leh tha kan chan ngam phawt chuan Pathianin a ropuina puanchhuah nan min hmang ngei ngei ang.  Kan dinhmun dik tak țheuh han in enchiang ila, Pathian tana kan insen nge tam zawk, keimahni mimal tana kan sen?

Lalpa tana kan insen hi a tam zawk a nih phawt chuan Lalpa tana mi hmantlak kan ni lo thei lovang. Pathian thu hi a rinawm a ni – “Tupawhin mi zui a duh chuan mahni hrehawm pawisa lovin, nitin a kraws puin mi zui rawhse, tupawh a nun humhim duh apiangin a chan ang a, tupawh keimah avanga a nun chan apiangin a humhim ang…tupawhin ka rawng a bawl chuan ani chu Pa-in a chawimawi ang” (Lk.9:23-24, Joh.12:26).

4. A Thutiam Ringngamtute Lalpan A Hmang Ţhin:

Kan Pathian hi Pathian rinawm, a thutiama dingnghet leh a thutiam hlen țhin Pathian a ni. Pathian thutiam erawh a hma leh a tlai a awm. Pathian thutiam tam zawk hi a muang chi a ni! Hei hi a chhan ber nia lang chu min fiah a duh vang a ni tlangpui. Abrahama leh Sari-te fa pek a tiam kha an beidawn hnuah (Abrahama kum 100, Sari kum 75 a nih hnu-ah) thutiam fa Isaka a pe chauh (Gen.18:9-15).

Josefa pawh khan a naupan laiin Pathian thutiam a dawng daih tawh. Mahse, a nu leh pa, a unau te ngei pawhin an awih sak lova, chutih ahnekin khuarkurum ah te an paih a, sumdawng hnenah an hralh a, dawta puh a ni a, a puhtu lah Roreltu nupui a ni si, Pawngsual case-in Jail-ah te ala tang leh rih a nih kha. Kum 40 a ral hnuah Pathian thutiam daw ngai lo chu alo thleng chauh a ni (Gen.50:20). Mari pawh khan Lal Isua chungchanga Pathian thutiam-te kha ataka alo thlen theih nan kum 30 zet a nghak a. Lal Isua’n kum 30 a rawn tlin a, rawngbawlna a rawn țan chiah khan Pathian thutiam leh thudik chu a takin a hrechiang ve chauh ti ila kan tisual lovang.

Ringtu tam tak chu Petera ang kha kan ni. Kan mimal țhahnemngaihna avangin Lal Isua kan chet-khalh țhin. Thil țha ti ve-a kan lo in ngai kha…Lal Isua’n min pawmpui lo mai ni lovin, Setan ka hnungah kal rawhtih kan hlawh phah zawk țhin (Mt.26:51, Mk.14:47; Mt.16:23, Mk.8:33).

Chuvangin, Fakna hla chuan, “Amah a lan hun apiangah, ropuiin kan lang ve ang” a ti a. Lal Isua hi kan ropui khalh țhin a, Lal Isua hi kan lar khalh țhin. Engkimah, Lal Isua hi a hmasaber-ah dah ila, midangte chu a dawt-ah, a hnuhnungber-ah mahni indah ngam zel ila, Lal Isua’n ropuina a channa apiangah keini pawhin Lal Isua ropuina chu kan țawmpui ve zawk dawn a ni.

Chuvangin, Pathian thutiam hi a muang emaw, a tlai emaw, a hma emaw, a rang emaw, kan țhatna turin a thleng ngei ngei a ni tih hi chiang taka kan hriat a țul a.  Phunnawi lova rinawm taka Pathian chet hun kan nghah hram hram a pawimawh. Pathian thutiam-a kan innghah tlat chuan Lalpa’n thil ropui min tihsak ngei ngei dawn tih hi i chiang ngam ang u. Pathian thu hi a nghet a ni – “Pathian hmangaihtu, amaha ruat anga a kohva-te tan chuan, an țhatna turin engkimin a thawhsak hlawm țhin tih kan hria…thiam a chantira te chu a chawimawi bawk a…” (Rom. 8:28, 30).

Helaia “thatna turin engkim” tih thu hian, lawmna, hlimna, țahna, lungngaihna, Pathian min chhanna hma, Pathian min chhanna tlai, kan duhzawng, kan duhloh zawng, kan lawm zawng, kan lawm loh zawng, kan rilrem zawng, kan rilrem loh zawng, etc. a huam tel vek tih theih-nghilh lo ila.

5. Tlipna:

Pathian tana mi hman tlak ni tur hian ruat-bik an awm țhin-in lang mah sela, rinna leh inpekzawhna kaltlangin he dinhmun hi luah turin Lalpa’n nang leh kei hi min phalsak a ni. Pathian ţihna leh hriatna avanga ama mimal hamțhatna turte chan ngam a, Pathian tana a hun hlu, sum leh pai, thiamna leh finna hmang ngam a, Pathian avanga mualpho leh retheih ngam-te hi Pathianin a hmuh-țhelh ngai lova, mal a sawm țhin a, Pathian tana mi hmantlak an lo ni ngei ngei țhin. Chuvangin, hlau suh, Pathianin a ko che a ni tih i hriat chian a, Amaha i in nghah ngam phawt chuan…Pathian Chak leh Rinawm chuan i chungah mawh a phur a, a hun te-ah a chawimawi ang che a, mal a sawm ngei ngei ang che.

I awmdan tur chu Lalpa chungah nghat la,
Amah chu ring la, Aman a ti vek ang
I felzia chu eng angin a chhuahtir ang a,
I thiam chanzia pawh chhun lai ang maiin
(Sam 37:5-6).

 

 

Similar Posts:

Recent Posts:

23 Responses to “Pathianin Tu Nge A Hman Thin? (Sunday Pual)”

  1. 1
    Chhuaklinga Says:

    Khai le.

    tren tren

    Report this comment

  2. 2
    ^-||R@lT€||-^ Says:

    Ziak tha khawp mai.

    Report this comment

  3. 3
    Chhuaklinga Says:

    A thain a ngaihnawm tluk tluk hle mai. (Y)

    Pathian mihmanah chuan Jona kha a man ka ti riau he he. Pathian thu sawi thiam tak maiin han sawi se ka ngithla chak, entir tha tak tak chu a nei leh ngei awm si a. (OT lutuk em aw, inthlahrung) ;-)

    tren tren

    Report this comment

  4. 4
    chawnghilh Says:

    Petera te chhiar ve atan ka va han duh tak em! A chiang chho thlup thlup mai si … ngaihnawm an ti ve dawn em mai! La deh leh puan tah thiam tak kutchhuak ang thlup thlup a ni ber e.

    “A ram leh …” tih hi “A lalram leh …” tih atan hian ka it thin, ka tilui hram hram thin bawk. Krista Lalram chanchin hian tun atang mai pawh hian Davida Lalram kha a khum chiang hle hian ka hre tawh si a.

    Abrama leh Saraii te kha, fa neih an chak tawh luat-ah, an han virpilh leh sasawi dante kha ngaihnawm letling tak a ni. Khatia Hagari lo ruak ta lo, ama awmna lam ram Aigupta a panna kawnga ULTRASOUND khawl ngai miah lova vantirhkohvin FAPA a hrin tur thu a lo sawilawk, hnam ropui tak ni tura a duanlawksak … chutianga thleng ta ngei … mahse, Hagari kha a fapa Ismaela nena an han chhuah leh nghawng nghawng khan, thutiam kha a lo theihnghilh hman leh tawh ni awm tak a ni … a mak hmanhmawh teh e.

    Mari ve thung zawng … a memory (retention) thatzia hi ka sawi lang ve chak tlat. Nazareth khuaa vantirhkoh nena an intawn dan leh a fapa hrinin ni 40 a tlina Puithiam Sumeon-a’n Pathian hnena a lo hlan dan leh tawngkam pawimawh zawng zawng kha … a hnu daihah Daktawr Luka tan Mari kha RESOURCE PERSON pawimawh lutuk a lo nih zui dan te …

    Pathian hian HMAN BIK chu a lo thlang ngawt mai. Jona pawh hmar lama kal tura tih a ni na khan, chhim lam a pan ngir ngir mai a. Sea level atangin tuifinriat mawng a zu thleng zak zak a … Ninevi khaw daiah nghapui chil-rialin a va pik chhuak hrim hrim ringawt mai pawh kha —hman bik hi zawng an lo awm na meuh mai.

    Jeremia hrilhlawk “kum 70 sal tan” pawh Pathianin a mi hman ve vek Daniela khan a hrethiam har hle a nih tho kha. Daniela tawngtaina lah a chhanna kha sual hna thawhin a lo THWART khawtlai bawk nen (Daniela 9 & 10).

    Mahse, THIL TIH NEI LO hian Pathian thu a kirlet ngai lo … Messia thisena lei tawh mihringte hi AMBASSADOR FOR CHRIST kan nih chianzia te, Petera tawngkam ang ngeia ROYAL PRIEST kan nih tawhzia te inhre chiang apiangin Dr John-a ziak ang hi chu an nihpui chiang viau ang.

    GOOD POST, save hmaks!

    Report this comment

  5. 5
    lr hlonchhing Says:

    (Y)

    Report this comment

  6. 6
    kilung Says:

    A pawimawh hle mai he thu chu..mi tamtak in pathian an hlat na chhan pawh ani thei ang. Pathian mihman ni tur chuan inpekna,rinna tak tak , inngaihtlawmna nen a kan intuk luh angai ani. Good post.

    Report this comment

  7. 7
    ahooma_ Says:

    Inkhawm loin chhiar keuh ang!

    Report this comment

  8. 8
    RafaEl Says:

    A tha khawp mai, keini sermon ngaihthlak tur neilo tan chuan hetiang post hi a hlu khawp mai

    Report this comment

  9. 9
    Mapuia Hmar BZy Says:

    Vawiin Ni nen a inhmeh khawp mai… Post tha tak a ni e….

    Report this comment

  10. 10
    XaiA Says:

    A mah phatsan thin,misual ber te pawh min hmang duh…thin.

    Report this comment

  11. 11
    century child Says:

    A va tha em. (Y)

    Report this comment

  12. 12
    Asteric™ Says:

    Ṭha khawp mai, a ngaihnawm bawk.
    Pathianin a hman ngailoh mite ve thung chu:

    1) Mi chapo te
    2) Mahni nihna anga lang chhuak ngam lo te
    3) Mi daw thei te
    4) Mi dawhzep te
    5) Ṭha ni a inngai te
    6) Harsatna hrethiam lo te
    7) Mahni ngaiha inti fing te
    8) Pathian aṭanga thangmawi chauh hmuh tum te
    9) Mahni thu duh lutuk te
    10) Dawh theihna nei lo te

    Hengte hi fing kur mahse Pathianin a hman ka hre ngailo reng reng. Mi ṭha tak ni a lang si, hriatthiamna nei hauhlo hi in hre ve ṭhin em? Fel tak chuan an lang ve bawk si, mahse ṭhian ah pawh kawm an hahthlak leh tlat lawi si. Hetiang te hi in tawng ve tawh em? Harsatna te pawh sawipui ila hrethiam awm taka lang a ngaihna hre hauhlo te, mi hmuha thangmawi loh hlauh avanga a dera inti zahawm luih tum vak vak nun lem hi. Heng nun lemchang hahthlak tak hi Pathianin a hman dawn chuan a ti mualpho hmasa zet ṭhin.

    Report this comment

  13. 13
    chhingdailova Says:

    A va tha kher em. Pathian in a Thlarau Thianghlim in mal sawm mawlh se…

    Report this comment

  14. 14
    Chhimphei val Says:

    Chhiar a nuam khawp mai.

    Report this comment

  15. 15
    hiho Says:

    Post chhiar hma ngawtin :
    http://i43.tinypic.com/2m2dxdf.jpg
    nge i ngaihdan le?

    Report this comment

  16. 16
    sonju_a Says:

    Pathian laka mi hel, Amah tlanchhiat san tum ngar ngar, Pathian aia mahni thu duh Jona angte pawh kha Pathianin zuk hmang duh tak tak a.
    Zarmawia’n, ”I rawngbawl atan hian, mifelte chauh thlang lova, kei misual min thlang hi a va ropui em!” a ti. Pathian hmangaihna hi zawng a thuk ani.

    Report this comment

  17. 17
    PKfanai Says:

    Post a tha khawp mai. Hnial tha ngam chiah si lovin Jona kan sawi chhuak leh thin a. Jona kha a background hriat chian ka chak hle mai. Ninevi Lalpa leh Ninevi khaw mipui ten a ngaihsan leh an rin em em ani ngei ngei ang. Hna bik atan hian mihring tha riau bik hi an awm thin a, Troy kulh ropui leh Hector a ngam/hneh tur chuan Achiles a tel ngei ngei angai tih an hria. Tumah ngaisang lo leh hlau lo anih avangin Lal nihna a kohchhuah ngawt chi a ni lo. A cheng hria leh a thu a zah em em mipakhat chiah a awm a, chumi ngei chuan ava sawm chhuak anih kha. Jona pawh chutiang mi Ninevi Lal leh a khaw mipuite ngaihsan leh an rin em em ani ngei ang. Hna bik atan hian koh bik hi chu an awm thin. Mahse chutiang chu exceptional case a ni. Saula Paula lo ni ta pawh kha koh bik a ni. (ka buai rih em a, nidangah post siam ka tum dawn nia).

    Report this comment

  18. 18
    Ignatia (33-115 AD) Says:

    A va han ngaihnawm teh reng em! A tluang parh mai lawm le. (Y)

    Abrahama’n a fapa duhtak VanlalIsaka a hlan kha lo thai tel la han sawizau ta bawk la ka lung i va ti hnur leh zual dawn em!

    Jona han sawi takah chuan a thiante’n zawhna an zawha a chhan dan kha ngaihtuah zui theih deuh a ni. Hebrai mi a nihzia a saw kha chu a zia deuh a. Tuiffinriat leh khawmual siamtu – PATHIAN betu a nihzia leh Amah hlaua tlanchhia a nih zia a sawi khan thil awm zel dan tur chu a chiang ve khawp mai. Pathian nung be lo tana hlauhawm turzia kha.

    Pathian mi hman hian hlawk takin thil an ti fo thin. Helaia Jona thiante pawh hian Pathian nung chu an ngaihtuah phah ve fo thin ngei ang le…

    Report this comment

  19. 19
    blackmagicwoman Says:

    Han sawibelh kher pawh ngai lovin a chiangin a thra thlawt e! Rilru a chawk thar hle mai. ‘I surrender all’ tih hi a practical chuan har ve fat fat tak chu ni, mahse Pathian tanpuina zarah theihloh chu nilo.

    Aste-a list ( #12) ah hian pakhat kan thawhbelh ve keuh ang e
    11. mi thatchhia

    Report this comment

  20. 20
    TuaiSialA Says:

    (Y)

    Report this comment

  21. 21
    Mama_B Says:

    Post tha tak a va ni em!
    Chawnghilh-a comment khi a ngaihnawm bon top bawk…!!

    Report this comment

  22. 22
    mr.Duhlova Says:

    A tha hle mai, Misual ho hi Pathian thu lamah pawh inlo ‘tu ru’ hlawm hle mai. God bless (Y)

    Report this comment

  23. 23
    Dr John Says:

    Ekhai…ni 3 chhung dam that loh avangin ka misual thei lova, Comment a tha hlawm ngei mai! In Comment-ho hi ka hlawkpui zawk zel nia, Thanks (Y)

    Report this comment

Leave a Reply

You must be logged in to post a comment.