Mizoram Ispat Industries Chungchanga Ka Article….

February 23rd, 2012 1:10 am by ThugAngel a.k.a Hipholik

July ni 13 kum 2011 khan he ka Article hi Aizawl-a chanchinbu hrang hrang email ka hriat theih zawng zawngah ka Address leh Phone number nen Pagemaker/MS word File in ka thawn darh a, ka hriat theih chinah chuan Vanglaini hian an ti chhuak lova, ka hresual anih chuan min ngai dam ula… 14/07/2011 khan The Zozam Times chuan an tichhuak a, hei bakah hian 16/07/2011 khan Evening Post chuan an rawn tichhuak ve bawk a. Chanchinbu dangah an tichhuak nge ti chhuak lo tih chu ka hre zui lo.

A hnuai ami hi ka Article Chanchinbu hrang hranga ka thawn chu a ni e, angai ang angin ka rawn Post e… zoho Post in Comment ka hmu nual a, in ngaihdan hriat achakawm khawp mai, han sawi tlat zel ang u… Article hi a sei deuha min lo hrethiam hram dawn nia…

 
Mizoram Ispat Industries Hi I Lo Hre Ve Tawh Em?
-Lalngaihawma

Mizoram Ispat Industries tih hi Mizoram mipui zingah hria kan tam lovang tih chu ka chiang sarh mai. Mizoram Ispat Industries hian Industries Deptt. ho ram EPIP(Export Promotion Industrial Park)Lengte, Lengte-ah Factory din tumin hma an la mek a, an din mek bawka, anni ho hi Industries Deptt., Mizoram Public Investment Board, Mizoram Pollution Control Board-a thawk thenkhat, Chief Secretary,  Lengte-a mi thenkhat, Lengpuia mi thenkhat, Supplier thenkhat te bakah Central YMA zinga mi thenkhat te deuh chauhin an la hmel hriat ka ring. Central YMA lam hian hre chiang turin bei zui ve deuh se a tha khawpin ka hria, he thil hi ram leh hnam hnuk khawih thil a ni ka ti ve tlat.

Achepa kaiah
Mizoram Ispat Industries ho hi Mizoram Public Investment Board-in an Clear hnua hetianga Mizorama Factory rawn din thei niin Pu R.L.Rinawma’n Twitter kal tlanga ka zawhnaah min hrilh a. Mizoram Ispat ho hian EPIP Lengte-a an Factory atangin kan hriat thiam dan turin Rod leh thir tlang ilo siam chhuah an tum a. New Companies In India-ah pawh an in ziak lut tawh a, heta an inziah luh naah chuan an Project chu:Manufacturing of Billets/Bars/Rods & TMT tih a ni a. Kumin January thla khan Department of  Industrial Policy & Promotion Ministry of Commerce & Industry hnuaia Industrial Entrepreneurs’ Memorandum (IEM)-ah pawh No.283 ah Mizoram Ispat Indutries hming hian achunga an siamchhuah tur ho tho khi tarlangin an in ziaklut ve thlap a ni. Ispat ho hian newsonprojects.com-ah EPIP Lengte-a an Plot No.28  atangin thir ton 29,700 lai kum khata siam chhuak tur angin an inziak a ni.

 
A neitu nia Industry Deptt.-a Plot dilna atanga alan dan chuan Rajendra Kumar Agarwal a ni a, a Address hi Chaltlang, Aizawl tih ringawt a ni. Ka hriat sual loh chuan Mizoram Ispat Industries hi Partnership-a kalpui niin, Rajendra Kumar Agarwal hian Mizoram chhunga awmsa ABCI Infrastructures neitu ti mai ang Hemant Baid bakah mizo pakhat an thu rual puia. An mizo thu rualpui hi chuan hlawkna emaw thu neihna aneih hmel loh, engemaw atana hmatheh atan an ti ni berin ka hria.

 
Rajendra Kumar Agarwal hi Mangla Ispat Industries(Jaipur) neitu Kailash Agarwal leh Sitaram Agarwal  te zing ami a ni a. Jaipur-ah hmun hma neiin thir lam siamchhuaktu niin an sumdawnna pawh a tla tha viau a ni mahna? Helai ami athawhpui ABCI Infrastructure lam ho ve thung hi chu Construction Company niin kum 1984-a indin tan an ni a, Kolkatta lama hmunpui nei niin Delhi, Guwahati, Silchar, Aizawl-ah te an in zar pharh bawk a ni. Aizawl-a ABCI Infrastructure hi Hemant Baid hian a enkawl a ni. Hman ni lawkah an mi leh sa an rukbo sak te kha an ni.

 
Ispat ho hian Eng Thil Nge An Lo Tih Tawh?
Mizoram Ispat Industries hian nikuma Industries Deptt.  lam ten EPIP Lengte-a Plot a dil theih an tih khan an dil ve ngei a, Deptt. lam hian ni 30 & 31 August 2010 khan Plot diltu Interview an kova, Interview Result hi 27 October 2010-ah an tichhuak a, Mizoram Ispat Industries ho hian an Interview zawh hnu September kar tir teah khan Lengte-ah mimal ram chu EPIP Area-ah ngaiin an lo vat ngawt a, hetihlai hian an Plot dil hi an hmu dawn nge dawn lo tih pawh Industries lam hian an la ngaihtuah hman hmel loh! Mimal ram an khawih a ni tih an inhriat hnu hian a hnu deuhah EPIP Area chhung hmun dangah hma an la zui leh nghal a, mimal ram an khawih thu hi a hrechiang tu tur chu Industries Deptt.-a EPIP enkawltu lam, huan neitu leh Lengte VC leh mipui te an ni. EPIP Lengte Plot dil tute zingah hian hnam dang pahnih chiah an awm a, an ni Mizoram Ispat Industries ho hian an sawi danin Industries Deptt. aia thu zawk thuin Interview Result chhuah hmaa hma la niin an insawi a. Rajendra Kumar Agarwal-a Partner Hemant Baid-a phei chuan Documents pawh nei thlapin a insawi! Mimal ram an khawih lai hian Interview Result ala chhuak lova, RTI hmanga Industries lamin ka zawhna  an chhannaah pawh Deptt. Lam chuan Plot diltu Interview Result chhuah hmain tumah hma la tura tih an neih loh thu min hrilh.

 
Industries Deptt. Lam Ve Thung
Industry Deptt. hian ramin hma sawn nan tiin hma an la nasa ve hle a, Policy te pawh siamin Zuangtui-ah te pawh hmun hma tha tak an nei a. Industries ho hian Policies in Mizoram tih lehkhabu an buatsaiha Industrial Policy of 1989-a alan dan chuan Industry ho ram neih chhungah hian Mizoram pawn lam mi hian Small Scale Sector-ah phei chuan Industry an rawn din a phal lo hul hual a, Medium leh Large Scale-ah chuan Joint-a an indin aphal a, heta Join an tihah hian Mizo an tel ve ngei angaih chu ka ring. An Policy Framework atang hi chuan Mizo te tana hamthatna tur leh Mizo zinga Entreprenuers te hmakhua ngai leh chimrala kan awmlohna tur lam chi chu an ngaihpawimawh zawng a ni. Hei bakah hian Industry awm thar tur te hian Factory an din hmain State Pollution Control Board atangin Clearance an lak angai a, Ispat ho hian Factory tura an hmun hma an khawih hnu feah State Pollution Control Board lam hi an dawr a. Pollution Control Board lam chuan kumin March thla tirah khan N.O.C an pe. Industry emaw Oil lam laihchhuaktu pawl emaw pawh nise Mizo mipui te hian kan ram leh boruak tichhe thei zawnga hmala tur chu i do zel ang u, Pollution Control Board lam te hi kan thlawp that an ngai khawpin ka hria. Hmasawnna tam tak hian ken tel tha lo tak tak aneih thin avangin kan fimkhur a tul, kan ram leilung leh boruak tana pawi lo tur pawh kan thlan thiam atul. Kan fimkhur loh chuan a tlai hunah chuan kan siam tha thei tawh dawn si lo, tui baw hnu a ruh theih lo ang bawkin boruak leh leilung tih bawlhhlawh tawh hnu hi siam that har tak a ni.

 
North East Business Summit, 2008-a Industries ho lehkhabu tihchhuah Business Opportunities in Mizoram tihah chuan EPIP Lengte-ah hian heng Unit te hi ngaihpawimawh tura an tarlan te chu 1)Gems & Jewellery, 2)Electronics & Software, 3)Agro-Based/Food Processing, 4) Bamboo Based Units, 5)Textile/Readymade Garments, 6)Handloom & Handicraft lam te a ni a, Ispat ho Steel Industry lam ang chi hi alang hauh lo. Ram leilung fate zinga mi pawh ni lo heti taka thil an kalpui thei hi amak a, athinrim thlak zawnga ngai duh tan phei chuan thinrim thlak tak a ni. Kan mizo pui zinga Zo Aqua siamchhuaktu te hi duhsak tlakah kei chuan ka ngai, hetiang ang te phei hi chu Deptt. lam hian ham thatna an hmuh theih zawng zawng nena tanpui zawk tur niin ka hria. Kan ram hian Small Scale Industry bak chu kan la phak lo deuh niin ka hria a, bakah Small Scale chunglam hi chuan boruak leh leilung an tihchhiat theih dan hi asang tawh avangin fimkhur angai viau niin ka hria. Ispat ho thil kalpui dan hi chu a hlawkna teltu vai hovin kan ram an tihchhiatna tur Chance tha tak ni main ka hmu.

 
Engtin Ni Zel Ang I Maw?
EPIP Lengte-ah hian Mizoram Ispat Industries ho hian an Factory ti puitling tur hian hma an la la zela, he an Factory hi lo siam puitling ni ta se Mizoram leh khua leh tuite hian hlawkna kan nei angem? Ka ring chiah lo, a ekchhia bak enge kan chan ang? Rod engilo atlawmin helai atang hian lo siamchhuak ta pawh nise, kan ram hian engtiang chiahin nge (environmentally & ecologically-a) a chhiat phah ang? EPIP hi Export Export Promotion Industrial Park tih a ni a, Mizoram atanga Rod leh thir dang lo thawnchhuah(Export) chu ava in tuha awm lo ve! Mizoram chhunga a tlawm deuha hralh turin ti pawh lo ni ta sela, mizo zingah ahlawkna tel tu kan awm angem? Rod zuar tam zawk lah vai tho, mizo Rod zuar ho hian a tlawmin EPIP Lengte atang hian an lei thei meuh angem? He Industry hi a neitu ber pahnih chu vai Hemant Baid leh Rajendra Kumar Agarwal an ni mai si a.

 
Lengte-ah hian Industries lam phalna hian Factory hi lo awm ta nual ni sela Lengpui-a kan Airport neih chhun te hi an thil siam khuchhuak hian a tibuai pha mai lo maw? Kan Environment tana tha lo thil hi engzat tak an thil siam chhuah avang hian chhuak ang imaw? Pollution Control Board lam Pu Dunglena te’n  an ngaihtuahna muk leh bing zawkin lo seng ve leh se ka van ti em! Ka thu sawi chungchangah hian tu pawhin a dik lo tiin emaw a dik tiin emaw pawh min Contact a duh a nih chuan lalngaihawma@gmail.com ah min rawn mail thei ang.

 

 

Similar Posts:

Recent Posts:

36 Responses to “Mizoram Ispat Industries Chungchanga Ka Article….”

  1. 1
    chhana Says:

    A thain a bengvarthlak e. Ka lawm e.

    Report this comment

  2. 2
    TuaiSialA Says:

    Chhiar ila..

    Report this comment

  3. 3
    littlerascal Says:

    Ka chhiar peih angem aw!!?? Lolz

    Report this comment

  4. 4
    chawnghilh Says:

    Awmze nei tak a ni. EYE OPENER a ni chiang hle mai.

    Report this comment

  5. 5
    H.Vangchhia Says:

    Ngaihtuah avan tithui ve. (Y) :-S

    Report this comment

  6. 6
    lrpa Says:

    Mizoram thirchhe leikhawm a, recycle an tum ani ber hmel a..
    Congress ho pawh an insawi fiah leh zuah zuah tawh kha! Enga tinge an mahniin an in sawi fel thin le? He vai ispat thurualpui Mizopa khan sawifiah se, chuan a buaipui tu officer ho khan in sawifiah se ani mai a lawm..A party ang zawng a in sawifiah chi hi a awm a, sawrkar dan leh eng ilo ah hi chuan sawrkar in sawi fiah se, party ni lo in!!

    Report this comment

  7. 7
    funny™ Says:

    Hetiang hi an la rawn tam zel dawn in ka hria. Heihi chhan tam tak a awm theia a main reason bera ka ngaih chu thil engkim ah hmun dang aiin mizoram ah hian competition a sang lo… Ram chungchangah ringawt pawh state lian dang te nena khaikhin chuan a tlawm fe ani. Raw materials neilo mahila kan la changkang lova factory te industry te ala tam lova company ding tantir tan chuan a spot a tha tawp ani tunlaia hmun danga competition san zia ngaihtuah in. Ngaihtuahna fim tak nen a lo hmachhawn angai ani. Hlawkna tel thei chin bak in an support ka ringlo he thil hi.

    Hman deuh khan ka train chuanpui pa hian min sawi hmuh deuha puan siamna factory an neia, north east state ho a factory outlet hawn belh zel a duh thu te min hrilh luam a. Kan ti ti nasa angreng a phone number tekha kan in pe a mahse ka phone number ka thlak daih a kan in be zui leh ta lo.

    An factory kha ala lian vaklo a north east ah chuan shillong ah chiah oulet an la nei ni in a sawia veivah velah pawh train in ala vei vak. Mahse vai ho hi an in ren viau aniang sum chu a ngah hmel viau lawi sia.

    Min rawn hmuh dan thalo deuh ka lo notice chu, khatia an product zuar tu tur a duh khan a offensive lemlo a mizo pawh vai pawh an in expand natur kha a duh ani ringawt a, mahse kan bluff ve deuha hnam dang ten dawr an rawn neih hi chuan zirlai pawl ho hian pawisa an khawn thin a ka’n tia leh… “Hetiang te chu pawisa tlem a zawng pe ila an lungawi mai lawm pawisa in an control vek theih” a ti ta roh a. Ka pride a hurt ve deuh he thil kher hi chuan…

    Report this comment

  8. 8
    ThugAngel a.k.a Hipholik Says:

    Kan sawi ve leh teh ang…

    Ram tana thil tha duh hi mi chi hnih kan awm theiin ka hria, hetiang chungchangah te pawh hian… pakhat chuan “Industry chu ding se changkanna hmanrua a ni a, hnathawh tur a siam chhuak teuh” pawh a ti thei a: Pakhat ve leh chuan hetiang te chu kan ram leilungin ala chhiat phah nasa dawn lutuk, tunah thawh tur nei awm phah mah se kan hmalam hun a ti thim thei a ni” a ti ve thei tlat…

    Chuan Ispat ho Case-a Mizo pa hi ABCI-a thawk Duhawma, Ramhlun South ami a ni a, ani hian 1% Share a nei a…Ani hi Ispat ho News Site hrang hranga Mizo pakhat 1% Share nei Chaltlang ami tih kha a ni, Chaltlang ami ni lovin Chaltlang Dawrkawn thlang lawka Office nei ABCI-a thawk a ni zawk. Ani hi ka dem ngawr2 lem lo, a chhanchu ABCI-a hnathawk a ni a, ABCI-a an hotu pa Hemant Baid-a hi Lengte EPIP buaipuia enkawl zuitu ber a ni kan ti thei awm e, a chhanchu aneitu pa ber Agarwal-a hi chu Mizoram-ah arawn kal zen2 lo tih ka hria…

    Duhawma hi chuan ABCI-a ahna chan a hlauh vangin Ispat-ah hi chuan apu sawmna hnial ngam lovin a inhnamhnawih a ni thei. Amah ka biak naah pawh Lengte-a Ispat hovin thil an tihna kawng reng rengah Mizo an duhsak ngai lo tih a sawi a, amah hian hlawkna ala neih ve loh thu leh pawisa pawh athawh ve loh thu a sawi. Amah hian athu sawi azuk anih ngawt loh chuan amah pawh hi han kawm kual ve ula ka ti ngawt mai…

    EPIP hi Industries Dept. ho hian hman tangkai an tumna hi chu a tha ve viauva, mah se thil an dawn thui tawk lo emaw chu ka ti ve? EPIP luah tute hian Subsidy hrang hrang bakah hramthatna tam tak hmuh tur an nei a, Mizoram pawn atanga bungraw phurh luh man mai bakah Electric Current thlengin hamthatna hmuh tur an nei..

    Industry hian ken tel ekchhia tam tak anei tih kan hre theuh anga, hetia vai hovin Steel industry an rawn din anih vaih chuan Chemical tha lo leh boruak chhia engtianga tam nge min hnutchhiah ang? Kei chuan hetiang hi nei lo ila, kan ram leilung leh boruak hi thianghlim takin awm se tih hi ka duh ai sam ala ni fo. Pollution Control Board lam pawhin Ispat ho hi chu chik zawk leh thuk zawkin lepse se ka ti khawp mai.

    Ka duh tawk rih ange, sawi ve leh phawt hlawm teh u… A Chepakaia ka hriat ber pawh nakina sawiah la khek teh ang…

    Report this comment

  9. 9
    Lamji Says:

    Hei chu a sawi a sawi lova a tih a tih hun niin ka hria. Kan tih a kan do loh vek chuan anni hi inzir nan kan hmang thei bawk a,a lehpek zela lo lut tur te ven lawk nan.

    A industry hrim2 hi chu kan neih a ngai ram hmasawn nan chuan,a pollution produce leh waste chemicals chungchang ah pawh a ram miten ti mah ila a fai deuh phah dawn chuang hleinem. Engpawh nise,a hrethiam leh a chinchang te khel ah dah teh ang..Zoram thatna,hmasawnna tur side2 ah ka tang e kei. A bengvarthlak hle mai. (Y)

    Report this comment

  10. 10
    Aryan Says:

    Mizorama iron rod leh adang te siamchhuak turin pig iron emaw, steel emaw ngai awm sia, hetiang hi rel leh truck a Bihar/ West bengal atanga rawn phurh chhoh angaih hmel bawk sia, Vairam iron rod aiin a let tam takin a to phah lo ang maw? Mizoram location nen an industry hi a in tuha lo, loan sawrkar dept in a guarantee sak theih dan atang khan Vaichhe fingphakar 2 leh Congress Minister te intiam ruala EIRUK an tumna plan anih hmel khawp mai.

    Report this comment

  11. 11
    funny™ Says:

    Haw ka tum tawh a ka’n sawi leh mai mai. Raw materials neilo mah ila nakin lawkah look east policy te avangin train te a rawn lut anga hmun dang atangin man tlawm zawkin raw materials lak khawm a har dawnlo. Tribal ah ro ro pawh hmui a chi thlum mum(sum, profit ngaihtuah a tlem a zawng…) tah a lungawi thei khawpa bum nuam kan la ni hi a buaithlak. hehe

    Ispat industry hian history an neih pawh ka hre lo e… MOB rule kan uar bawka duh leh MOB rule in kan um chhuak dawn nia han ti dawn ila MOB rule anga che chhuak ngam an awm leh tawp lo ang chu thing serh sat ngam mi huaisen ho zingah. LOL. MOB rule hian mipui ina an zuam mi rethei leh mi te ho chauh a huam… Hetiang khawp hian mizoram hi kan kal herh. hehe (N)

    Report this comment

  12. 12
    vemaimaia Says:

    Ti tha hle mai post tu pa chu, i fakawm e i thil chik dan leh i tih zawnga information i hai chhuah peih dan te. Nia kan ram hi chu a buaithlak anih hi a, sorkar lah chuan insawifiah nan sorkar hmasa tih tawh etc. tih ang vel te maw chhuanlamah an hmang thla zen zel a, sorkar hmasa tih tawh pawh ni se a that dawn loh chuan cancel mai awm tak hi nia ka ti ve mai mai thin !!!

    Report this comment

  13. 13
    Borat Says:

    Chutia steel rod siam an tum tak tak anih chuan lo sawisel ngawt chi pawh chu a va ni lo ve. Funny (#12) sawi ang khian helamah raw materials awm lo mah sela, Look East policy vangin ASEAN leh a piah lam (China, Japan, Korea) te nen free trade neih kan tum si a. Plan thui tan chuan a theih tlat. NE a sumdawn hi tax benefit tam tha mfe a awm a. Mizoram lah Myanmar ram hnaih, tuipui (Bay of Bengal) atanga hla lutuk lo ani ta deuh deuh. Kan state ah ngei pawh hian steel rod mamawhna a sang chho hle dawn, tih chu hai rual ani lo.

    Rinhlelh awmna tam deuh mah se, anni ang chi genuine investor chu kan welcome ngei ngei a tha ang. Hnam humhlah chhuan lama investor lo hnawl phiar chi ani lovang.

    Report this comment

  14. 14
    Ignatia (33-115 AD) Says:

    Inhnial thei tak – thu tlukna lam lam ka duh tur a ni dawn tlat mai! Mipui lam kan fimkhur erawh a tha viau mai thei.

    Pawimawh ka tih ber- ENVIRONMENTAL ASSESSMENT lam an pe tawh em? Engtin emaw tala mapping lam an tih loh chuan nakinah kan thlah kal zel ten minla dem thei!

    Report this comment

  15. 15
    latei Says:

    hemi thil ah hian investment or genuine investor lam a kawk lo tlat mai. chu a hnek in an ram hawh hmangin loan lo la ta u se la industries director a guarantor a nih leh si chuan an loan rulh theih loh rulhsak tu tur chu sorkar, sorkar chu mipui,mipui chu nang leh kei.kan in zuam em? kum 99 chhung ram an hawh dawn a a hawh man pawh pelovin subsidy tam tak an dawng ang a,loan an han puk ang a an rul tha duh dawn lova chuti chuan sum tamtak nen vairampur lam ah an bi bo ang a an leiba kan lo rul ang a maw Mizoram mipui in… hei hi chu kan phal thei dawn lo.an mahni sum hmang in investment lo ti dawn pawh nise a ram hawh man kan phut ve ang chu mawle.thluak thawl ho an permit cancell nghal rawh u.

    Report this comment

  16. 16
    zoho Says:

    A tha lutuk x3… kan var uar uar mai alawm…. (Y) Mizoram, ar hmai tiat lek, hill station ah hian engvang mah in mineral based industry hi a dingtur a ni lo,hei hi Tourism Dept pawn an ngai serious tur a ni…a wastage hi luilian pawh a tichhe vek thei a, tuipui hial pawh a tichhe vek thei a nia. 5 basic points for the success of an industry ah ah pakhat mah kan la ti hlawhtling lo,chung zing a pakhat tui a hnianghnar tawk tur a ni tih hi engtin nge an kalpui dawn… kawng tinreng ah hei hi kan DO tur a ni. a system a diklo a, cause & effect a chhe lutuk a, a phen a thil inmun pawh hi a tenawm lutuk…tun a tihtawp a nih loh chuan kan faten min la rawn haw lutuk dawn tlat….shala.

    Nimin nge nimin piah Vanglaini a ruling insawifiahna kha ka nui a van za tak, ka rawn post leh ngat dawn em ni aw ka ti hial, zialo tak a ni.

    Report this comment

  17. 17
    ThugAngel a.k.a Hipholik Says:

    Borat-a kha Ispat ho hi engtin nge Genuine Investor i tih theih a??? :-O An Address kim chang pawh i hria em ni?? Keichuan ka chhui hrep pawha ka hriat theih chu a tlem teh asin, Agarwal-a ber hi Mangla Ispat-ah a inhnamhnawih tih ka chhui luta, chuan Aizawl-ah chuan Chaltlang-ah ahmingin Office an nei ve tih ka hriat theih tawk a ni..Hetiang mi kan lo Welcome na vak tur chhan tha tak ka hre lo, an thil tih tur hi kan ram hian hlawkpuina tur tak tak a neih ka ring lo hulhual…

    ABCI ho erawh chu an chhui thui theih zawk mial mahna, mah se Industries Dept.-a Mizoram Ispat Industries neitu ni a inziak chu Rajendra Agarwal niin a Address chu Chaltlang tih tawp a ni.. Residential Address pawh Industries ho hian an hre lo, RTI hmangin ka dil tawha, Chaltlang tih bakin min hrilh thei lo!! (N)

    Industry din hrim2 hi ka duh lo a ni lova, an ni ang hi chu alem ka ti ngawih ngawih a. An Industry din tur hi kan ram leilung hian athat pui dawn lo tih ka chiang bawk.. Thiante hovin an lo sawi tawh angin Agro Based lamte leh Medicinal Plant lamte hi kei chuan ka thlawp hle… (Y)

    ABCI-a an hotupa Hemant Baid-a hi Truck Owner Assn. ho hnena Mizorama an kawng siam chhiat hma na chhana Truck ten an phurh tur aia rit an phurh vang tia sawitu kha a ni.. Anni Chaltlang dawrkawn-ah Pu Vanlalfela, Forest R.O Building luahin an awm a, Mizoram hmun hrang hrangah kawng(Road) an siam thin. Hmana chhui zui ve peih in awm chuan lo bawh zui ve rawh u, chuan an Office-ah hian 1% Share neitu Duhawma of Ramhlun South pawh biak turin a awm ang.

    Report this comment

  18. 18
    CFL Says:

    Vanglaini chuan lo chhuah ve vat kan tum ange. (I)

    Report this comment

  19. 19
    zoho Says:

    Mizoram hi mizopa thisen a luang tlat leh kan ram a siamtu Pathian lo duan dan in agro-based industry atan kan hual tlat a, sawrkar tha kan la neihloh vangin heti hi kan la ni a, chu chuan rilru a tihnat em em lai a, kan ram a vision kan lo neih kalh em em mai a, vaipa in kum 99 atan steel industry a rawn din hi eng ti kawng mah in ka thawp lo vet vet tak a ni…
    A system leh intention(kan hriatpui ve em em loh)hi dik thlap pawh ni se,steel Industry in a ken tel chu wastage, river pollution, air pollution leh vai(chhia)(sorry) chhungkaw 3000 chung… leh assimilation.
    Chuan Mizoram hi Tourism Industry a kan hmingthanna ber tur hi kan thlen tur ang kan theng leh tawh ngailo bawk ang..Steel Industry chu wasteland ah duh leh lo din ang hming…kan ram hi zawng, garden tur a nih hi….

    Report this comment

  20. 20
    Pc-a Says:

    15@Ram an hman man hi Mizoram sawrkarah an pe dawnlo i tihna mi?

    Report this comment

  21. 21
    zoho Says:

    Ruling insawifiahna point 1 lek… an loan lak hi rul thei ta lo se, Mizoram sawrkar in a rilsak dawn tihna a ni kherlo, Financial Institution khan ram neitu hawhna hi a chang mai dawn alawm an ti…. HAHAHA….. sawrkar ram ka hawh ve ang a, loan ka puk teuh ang a, ka rul duhlo ang a, ka loan pukna chuan ram hawhtu nihna chu a chang zui ang… kan Ispatho tan chuan rangkachak khur tha mi a ni ringawt…an chetchhiat theih patawp pawh in 0% loss mai a ni lo, hlep hlir, hlep hlir tihna a nih chu….

    Report this comment

  22. 22
    sheldon170 Says:

    He thil hi a thatna aiin a thatlohna lam hian a buk rit zawk hmel e, post leh comment te atanga ka ngaihdan chuan (lo ti ve niah niah)

    Report this comment

  23. 23
    zoho Says:

    Lengte ah chuan mandir an sa tan e… hei aia lian zawk hi lo beisei rawh u..
    http://i43.tinypic.com/2ecerg7.jpg

    Report this comment

  24. 24
    zoho Says:

    Land Revenue Dept. in kum 25 atan Industries Dept ah ram a lease a, Industries in kum 99 atan vaipa hnen ah a lease chhawng daih thung…ka hrethiam teh nuaih lo ve a… :-S

    Report this comment

  25. 25
    Borat Says:

    ThugAngel a.k.a Hipholik #17
    Mizoram Ispat Industries hi genuine investor ka ti lo. Ni se chuan engemaw chen welcome a ngai ,ka tihna zawk ani. Kan pute hian Mizoram chauh hi state zingah FDI (foreign direct investment) la dawng ve lo ani tih an hria emaw teh reng dawnni. Investor an bawh huam huam mai. He company hi chu ka ringhlel ve tho. Mahse anni kan hnawl na lamah nakin lawka lo kal tur genuine investor kan hnawl tel erawh chu a hlauhawm hle.

    Report this comment

  26. 26
    vemaimaia Says:

    Eng dang vak a awm lo, rorel tura kan thlan lal te hi an nep eeeem anih hi, min la hruai ral vek anga ti nia !!!! ThugAngel a.k.a Hipolik hi a fakawm thlawt e.

    Report this comment

  27. 27
    VaiVa Says:

    A ngaihnawm e. Tlemin kan hrechiang leh deuh e. Facebook lam group ah Congress lamin press mite hmaa an insawifiahna (?) leh mi thenkhat comment lam atangin eng eng emaw chu kan hriat belh zel a. Tan han la teh u khai, a chhia a tha hrethei turin leh mipuite duhthlanna nei thei tur khawpin sawrkar policy hi party lak sawi lo in a hun tawh a nia.

    Ka document ka hai a, Industrial Policy 1989 hnu a mi, central in NE Industrial Policy an rawn siam bawh zui a, MNF sawrkar laia New Industrial Policy 2002, Congress tan chhan ka hai chhuak fuh hlauh mai a. Net atanga ka download nita in ka hria. Lo zawng ve u la i han chip teh ang u.

    Thrust area, Eligibility, Incentives thlengin leh committee formation thlengin a awm kha. Hman veleh ka rawn theh ve ang :P

    Report this comment

  28. 28
    maawma Says:

    Helaiah hian kan sawi hot ringawt anga, a zuzi ral leh vek ang tih a va hlauhawm ve le, chet chhuah a hun tawh a nih hi, chhiar zawng ringawt pawhin a hah ul theih a lawm le.

    Report this comment

  29. 29
    lrpa Says:

    YMA in hma an la dawn a, thil dik lo awm an hmuhchhuah chuan a mawhphurtu chu ban rawh se :-(

    Report this comment

  30. 30
    LR_rengsi Says:

    A bengvarthlak a,..mahse hriatnuam tak chu ani lo…he thil hi ka… (N)

    Report this comment

  31. 31
    ThugAngel a.k.a Hipholik Says:

    Lengte EPIP Plot diltu hi mi 73 an awm a, hnam dang 2 an awm a. A pakhat zawk chu hetiang hian Name of Application-Rakesh Kumar Jindal, Name of Enterprise-Nutricis Agro Food(Delhi) Pvt.LTD., Address- C-213 Sector-44, Noida-201301, UP an awm a, hemi te hi ISPAT ho ai chuan Industries Dept.-a dilna an Submit-a an in tarlan danah pawh an Reliable hmel fee zawk… Mahse, in ti leh teh ang, hei pawh hi Mizo pa tih theih chi a nih hmel a, Mizo pa ngei maiin tise chu ka duh ai sam a ni e.. ISPAT ho in Plot dilna-a an in ziah dan chu hetiangin Name of Applicant-Rajendra Kumar Agarwal, Name of Enterprise-Mizoram Ispat Industries, Address-Chaltlang tih zawng hi!! (N)

    Article-a inziak ang khian Plot diltu Interview hi Aug ni 30/31 kum 2010 kha a ni a, Interview Result hi October 27 kum 2010 khan Dept. lam hian an tichhuak a, mah se hemi hma hian ISPAT ho hian mimal ram tha lai chu September ni 2/3/4 hian Lengpuia Mizo thenkhat hnathawka hmangin an samfai tir ngawt a!!! Hei hi anei tuten an hriatin ahmun hi Industries ami S.A. Pu CHD-a hovin September ni 7 kum 2010 khan an zuk finfiah a, Ispat hovin mimal ram an khawih hi ahre chiang tur chu Lengte VC leh mipui te an ni.. Hetia mimal ram an khawih hnu hian rei lote an chawl det a, October-ah chuan hmun tha laiah duh tawkin hma an la zui leh nghal…

    Hetiang thil athlen tirh hian ABCI ami Hemant Baid bakah an hnuaia thawk Anuj-a te hnenah “Engvanga hetianga ti nge an nih leh, tu Order peka thawk nge” an nih ka zawhin kan Mizoram Chief Secretary thua hmala niin an insawi a. Industries Officer ngei pawhin chunglam atanga thu hmu an nia!! a ti ringawt??? :-O ABCI ami Duhawma ngei pawh hian Chief Secretary thu hmu a hma la zel an nih thu min hrilh tawh..

    WebSite hrang hranga MPCC Media te in sawi fiahna leh Industries lam in sawifiahna kha han bel chiang ula thil dik lo chu atam hle tih in hre thei ngei ang le…

    MPCC Media Wing thu chhuah ah khan heti hian a awm a “Congress Sorkarin ISPAT te chu ram pe-in sum peipunna rawn siam turin kum 2011 khan phalna a pe a,” tiin, mak tak a ni, kum 2011-a phalna pek si kum 2010 September thla tirtea hma lo lak ngawt kha?? :-O (N)

    Ka hriat thiam phak loh leh chu.. hei hi Industries Dept. lam in sawi fiahna a ni a..
    “Mizoram ISPAT Industry te hi an investment a len tham avangin dan dinglai angin Mizoram chhunga registration pek mai theih anih loh avangin company registration ti tura hrilh an ni a. Hei hi hma la nghalin tunah hian an tifel tawh ni a hriat a ni a, an registration document -hi Mizoram sorkar ah an rawn thehlut leh dawn a ni.”

    Registration pawh nei uk lo hian kum 2010 atang khan hma an lo la tawh bawk si a… tunah pawh Registration Documents an la Submit lo an la ti chheu mai.. :-S:-S
    A tir bera EPIP-a Plot diltu ten Document an Submit tur an ziah lan zinga No.4-ah chuan heti hian “Attested photo copy of Memorundum/Registration CCertificate should be submitted along with this application” tiin..

    Ni 20 chhuak Vanglaini-a ISPAT chungchang ziak pawh pha uluk takin en ula, atawpa EPIP ram inpek dan tih kha.. ka thu sawi ho zawng zawng nen hi chuan a inkalh fai vek? Khawi atanga kha Information kha hmu nge an nih le?? Industries ho hian khatiang khan Information an tichhuak a nih ngat chuan Dept. tenawm tak ava ni dawn teh lul em??? :-O

    A thu hrimah Mizoram Public Investment Board hi engtik a ding nge tih leh eng vanga ding nge tih ka hre lova, Media lamah khan ahria chuan min han hrilh fing teh u…

    Report this comment

  32. 32
    Puii Says:

    Thuggie chu i ziak fiah hle mai….Ram hnuk a khawih (*) (O) …..Mahse Party Politics tuinuah kan chan tir ang tih a hlauhawm… :-$
    Ngaihtuah ngun a ngai e…Kan Industrial Policy chhui chian a va ngai ve…Commentho ka chhiar hman rih lo va,nakinah ka la chhiar ang…

    In ngaihdan ka hre lo na a, Investor tha tak te hi chu Mizoramah hian lo kal ve se tih chang ka nei thin…

    Report this comment

  33. 33
    H.Vangchhia Says:

    #31 (Y)

    Report this comment

  34. 34
    chhimkeite Says:

    Thianpa i hriatna a thukin, i thil chhui lai hi ka support che. Tunge i nih tih lam ai chuan tunge kan um zui emaw, tutenge kan umzui tih lam hi a pawimawh hmel tlat, kan dai theu tum ah hian zofa kan va in theu hnan duh hmel em.!! tihte pawh ka ngaihtuah. Mahse pawi lo. ka chhungte pawh tel dawn se, ka thlawp zel dawn che u. (Y)(Y)(Y)

    Report this comment

  35. 35
    keimah Says:

    Post belhchiandawl leh pawimawh tak a va ni em! Keini ang duang chuan han sawi leh chuan tur kan va hre lo ve! Dik lo taka thil titute hi AN VA TENAWM EM! Anchhia han lawh em chu a ni si lo va, LALPAN dik takin thungrul rawh se ti mai teh ang!

    Report this comment

  36. 36
    ThugAngel a.k.a Hipholik Says:

    #35 Keimah… I sawi ang chiah hian kei pawh hian sawi leh chuan tur vak ka hre lova… Rei tak chhung ka ngawih hnuah Pu Biakthansanga ten media lama an auchhuah pui hnuah leh YMA lam ten an zir chiang dawn tih ka hriat hnuah ka Article hlui ka rawn phawrh a nih hi…

    Hei tunah pawh Sorkar pawi chu ka sawi tawh viauin ka ring, amimal hmingte pawh ka lam rik nuaih mai hi…….. Mahse, thu dik tak ka sawi chhung chuan enge apawina awm?? Thu dik baka lal tur he khawvelah pawh a awm chuang em ni??? Dik lo chu dik lo a ni mai…

    He thu hi amu anga, areh leh daih ang tih hi ka va han hlau tak em…. Mizo hi chu thil hi avuak vetah kan sawi hluai a, ahnu rei loteah kan reh leh hmiah thin a… Kan tei rei peih lo thin lutuk a, a hun taka huaisen pawh hi kan zir angaiin ka hre ve thin…

    Report this comment

Leave a Reply

You must be logged in to post a comment.