Mizo Hla

January 31st, 2012 6:00 am by Dr Mahminga Sailo

(Thiamna nei si loin, ka luangliam ve em em lawi si. In ngaihdan han sawi teh u…)

Bual in chhunga nauawih
Fanu/fapa nei tawh ang zia zang in ka inbual laia ka rilru a awm leh ka hla sak chu nauawih hla zuk ni tlat a! Englekhawle, nau tak tak awi loin ka inbual a, ka vannei! Ka ngaihtuah chhunzawm zel phei chuan bual in chhung a keima rilru a tawp mai tur chuan ka ui ve khanglang. Ka thu leh hla khel thiam chin tawk min lo hriatthiam sak mai teh u…

Lei Lal puan ropui chu a tlawm ang…
Ringtu, Isua Kristaa rinna nghattute tan chuan he hla hi a hlu ngawt ang. Isua ringa, hrehawm leh lungngaih lai pawh a Amah chauh beiseitute hi mi vannei an ni. He hla hi kan naupan lai a (ti ve leh khanglang ila) hla kan hriat hmasak ber zing a mi a ni. A chhan chu nauawihna hla atan nu leh pa te’n an sak lar ber a nih vangin.

Chhungkaw pa berin thaibawih rilru pu miah lo a; a hmangaih em em, a thai dautlai, inchhungkhur buaina chhawk zangkhai tur a PA taka a nau awih nan a he hla hi an sa fo a. A thai iang in nau puak zei mah suh se, “Lily parmawi Lal Isua ka nei. Ka tan a par chatuan rammawi ah; Hrehawm ah pawh Ama’n min awmpui fo a, Lily parmawi Lal Isua ka nei.” ti a zai vawr in, naute mawng beng thak thak pah a chhungkaw pa ber a’n suk hluau hluau tawh chin ah zawng, nau chiauhiar hrim hrim an nih ngawt loh chuan lungmuang takin zuapa tang belin an mu siai siai thin.

Ka ngaihtuah kal zel a
Mizo hla dang tam tak ka rilru ah a lut zut zut a. Hla tha tak tak, thlarauthianghlim pawlna hnuaia hla phuahthiam te’n an phuah hi an hlu thlawt. A hun leh hmun a zir a hla kan nei hrang thliah thliah te hi vanneihthlak ka ti.

Kan changkang zel a, kan khawsak phung leh duh dan pawh a lo danglam zel a, nau kan awmhlimna pawh a dang zelin, sap hla tha tak tak te kan hre ta zel a. Naupang te paw’n an hlimpui turah ka ngai bawk. Mahse ka’n ti leh talh teh ang…, midang ngaihdan ka hre law. ‘Twinkle twinkle little star…’ tih hian nau awi ve dawn ta ni ila ka awi mu zo ang em aw..? ka ti mai mai. A thluk a ing-euh in, a kheuh-beuh em mai.

Hei vang hian sap hla ka sawisel hauh lo. Sap hla, Pathian fakna hla phei hi chu tha tak tak, duh leh ngainat em em; Pathian min hnaih tirtu leh, ka thinlung hnehtu ka nei ve teuh mai. Mahse Khuanu’n kan aw mil tawk a min pek Mizo hla ni hlamchhiah mai lo a, a hlutna mahni tawk ah kan hriat zel leh mizo kan kalkhawmna hmun ah phei chuan kan sak uar zawk zel ka duh vang a ni e.

Ka ngaihdan (midang ngaihdan a ni kher lo!!!)
Lalruotmawi, a lar na chhan kha eng nge ni ang le? Ele, Mizo hla, Mizo irawm chhuak dik tak thiam tak mai leh aw dam, fiah tak si a a sak vang a niin ka hria. A chhan chu a lar hma paw’n Mizo zaithiam dang pawh an tam a, mahse a hun lai na na na kha chuan el phak an awm lo kan ti thei ang. Sawi zel ang hmiang, keiin ka lo hriat ve dan chuan Mami Varte hi sap hla sathiam ti a lar hmasa a ni awm e. Mahse Mizoram pum a a larchhuah na erawh mizo hla hlang a sakna album a ni thung.

A hun leh hmun hriat
Ka thusawi a chian zawk nan mimal hming sawi ta zel mai ila. Mizo hla uar ka sawi laiin a hun leh hmun a zirin sap hla sak thiam erawh a tul tho. Kum thum kalta khan Naga Christian Fellowship, Bangalore praise and worship-ah ka thian te’n min sawm vangin ka inkhawm ve a. Saptawngin inkhawm an kaihruai a. Ka beisei miah lohin Debbie Ralte-in zaiin inkhawm a tan a. Sap hla a sa, a zaithiam hle bawk. Hnamdang zing ah, Mizo nih a nuam ka lo tih phah ve em em! Naga inkhawmna ah khan Debbie khan Mizo ka ni a tiin Mizo hla sa talh nise, Naga fellowship khan an sawm nawn tawh kher lo ang. Saptawng hmanga inkhawm a nih vangin sap hla a sa a, sawiselna tur reng ka hre lo.

Ka sawi duh ber chu: ‘Zaithiam te hian a hun leh hmun a zirin an hla sak tur ngaihtuah in hla sak tur thlang thin se, mipui in kan hlut dan pawh hi a dang thei deuh ang em?’ ka ti. Mizo kalkhawmna leh inkhawmna hmun a sap hla sak hi ka sawisel hauh lo, mahse mizo hla tha tak tak (midang sak lar tawh sa pawh ni rawh sek sek, sap hla hlei hlei an lar fe zawk si) sa thei zawk ta se ka va ti em. Saphla emaw hnam dang hla an thiam sa emaw kha chu hnamdang zing a sak atan khek tha ta mai se.

Chuvangin
I ngaihdan a thing tiah tiah’ min ti tawk awm mah se; Mizo hnama ka pian avangin, Mizo taka ‘thing tiah tiah’ nih ka thlang zawk. Bawihtei/a nu (tur), a fel vanga ‘Thaibawih’ tiin leng dang te’n min lo sel dawn pawh ni se ‘Twinkle twinkle little star…, emaw Old McDonald had a farm… E.I.E.I.O…’ sa euh euh chunga nau awih ai chuan ‘Lily parmawi Lal Isua ka nei, ka tan a par chatuan rammawiah…’ tia nauawiin, an mawng ben theh thek ka thlang zawk ngei ang… :-)

Similar Posts:

Recent Posts:

25 Responses to “Mizo Hla”

  1. 1
    RafaEl Says:

    A tha hle mai… chhiar ve teh u

    Report this comment

  2. 2
    Maisek Says:

    A van dik tak em…. (Y)

    Report this comment

  3. 3
    рдпģŤіСHAЩЯ Says:

    A ṭha hlawm dap dap hle mai

    Report this comment

  4. 4
    H.Vangchhia Says:

    A dik alawm (Y)

    Report this comment

  5. 5
    PKfanai Says:

    Contextualization hriat leh hman thiam hi line hrang hrang a mihlawhtling ni tur pawh hian a pawimawh tak zet. Post ka thlawp e.

    Report this comment

  6. 6
    lr hlonchhing Says:

    Puak tha leh phian si ve. Post ka thlawp tak zet e. (Y)

    Report this comment

  7. 7
    Awmtea Khiangte Says:

    Ka ril rem zawng tak a ni

    Report this comment

  8. 8
    Chhuaklinga Says:

    A dik lutuk, ka thlawp e. (Y)

    I hla rawn dah hi kan kawmthlanga hmeichhe naupang awm thinin a sak ar ar thin kha min ti hre chhuak.

    tren tren

    Report this comment

  9. 9
    Dr Mahminga Sailo Says:

    Good morning… :-)

    In tho hma hlawm hle mai. Vei ang ang hi ka’n puah chhuah pui ve phawng phawng thin a. In comment chhiar a nuam e.. (Y)

    Report this comment

  10. 10
    Asteric™ Says:

    2005 kum aṭang khan Pathian fakna hla lo hi chu ka ngaithla khat tawh khawp in ka hria. Kan tleirawl lai, ti ve khanglang ila, khang hun lai te kha chuan Rap, Hip-Hop, Rock lam te kha kan lo sak pui zut zut ṭhin a, tunah chuan sap hla zawm theih mumal pawh ka nei tawh lo. Ka laptop a hla awm reng reng te hi Pathian hla deuh vek a ni tawh.
    Love song leh Pathian hla ngaihthlak in nun a kaih thawh dan in an lohna pawh hi keima nun aṭang sawi tur ka hre ve nual in ka hria. Love song hi sual a ni em tih te pawh hi min zawt ve se, “Ka ngaihthlak ngun ber a nih chuan ni e” tiin ka chhang ang :-D

    Report this comment

  11. 11
    Ignatia (33-115 AD) Says:

    Ziak tha khawp mai!

    Lalroutmawi hla sak a lar bik chhan chu mizo irawm chhuak hla a sak vang a ni. Hnam tin mai hian lunglen zawng tihzawng kan nei theuh a, chumi mila thil kan tih chuan kan thinlai hi a tho awk awk mai ni. Mahse thangtharte zingah erawh a tlana lutuk lem lo a nih kha. Upa deuh leh hmanlai nun hre pha chin a hrut deuh phawkin ka hria.

    Zosapte khan anmahni culture milin hlate kha min zaipui deuh mah se kristian harhna leh kohhran nunchawmtu hlate chu mizo irawm chhuak hla Pu Pateate ho phuah kha a ni daih thung. An sawi fo thin hi: INkhawmnaah a ni emaw zailenkhawmnaah a ni emaw kan han hlima kan han lam thin tak tak pawh hian kan CHHEIH emaw kan HUIHA leh zeuh thin. Kan hmanlai nunphung kha kan peih thei tak tak lo. Chumi mila Pathian fak chu kei ka awt thin hle. Khawthlang lam zai hmanga fak pawh a tha lutuk e; mahse kan zia mila fak pawh hi awm tam lehzual se ka va ti em!

    A bik takin Presbyterian leh Baptistte kan chhehvela kan rawngbawl dan hi thlak danglam a ngai a ni. Bru leh Chakma mission lamah hian an hnamze mila Pathian chibai buk kan zirtir a tul. Tunah hian a tul thut thut a ni.

    I ziak tha e. Mahse A E I O U tih zawk tur niin ka hria.

    Report this comment

  12. 12
    vlhauhnar Says:

    ka tawmpui che…. (Y)

    Report this comment

  13. 13
    Dr Mahminga Sailo Says:

    Ignatia (33-115 AD)… Ka lawm e.

    Nia tiraw. A dik chiah.

    Nikum khan FMPB Kohhran pakhat, BMCF-in kan chawmlai kan va tlawh a. An mahni hnamzia leh mil tak khan Pathian an fak a. Zaipui ve thei lo mah ila, an zinga tel a nuam.

    A E I O U a ni zawk tak e. Ka nau awihlai a mu har ka ti reng aa(h)… :-D

    Report this comment

  14. 14
    kawlhawk Says:

    Ngaihnawm thlawt e, Dr thuziak thiam tak i ni. Tawng kau i chhep nalh, punctuation a tha, ziakzawm leh zawm loh hre bawk si… inzirna tlak i ni e, aw… ka pu, Dr. :)

    Report this comment

  15. 15
    Ignatia (33-115 AD) Says:

    Pu Mahming ka tisual zawk, EIEIO khi a dik zawk tih ka hrechhuak leh tlai khawhnu..tar tawh lamah hi chuan kan hriatna pawh hi a chawl ve ta deuh a ni e..

    Ka sawi leh hlek duh: Khaisi (Meghalaya) lam khu keini aiin Chanchintha hi kum 100 dawnin an dawng hmasa zawk; mahse keini angin za-a-za kristian an la ni thei lo. A chhan ni bera an ngaih chu contextualization lam hawiin zosapte khan rawng an lo bawl tam lo niin an inhria. A dik reng bawk a ni.

    Anmahni hnam milin Pathian chibai buk kha lo zirtir ta sela kawng tamtakin hma an sawn ang. Mizote hi kan vanneihna chhan chu kan hlima kan lawmna ber- zai hmang hian hmanlai hun angin kan Pathian hi kan fakin kan chawimawi thei tlat a ni. Kum 1920 chho vela mizo irawm chhuak hla lo awmte khan hnasa takin keimahniah a thawk a. Chu chuan kristian kan nihna kawngah rah tha tak a chhuah a ni. Chuti chu ni lo se mizo kristian ve lo kan kat nawk ka ring thin asin!

    Report this comment

  16. 16
    Dr Mahminga Sailo Says:

    # 14..Pu kawlhawk… Ka lawm e… :-)
    # Pu ignatia (33-115 AD) a dik chiah. Ka thlawp che.

    Report this comment

  17. 17
    lrpa Says:

    (Y) (Y)

    Report this comment

  18. 18
    ^-||R@lT€||-^ Says:

    A va tha in a va dik em! (Y)

    Report this comment

  19. 19
    mr.Duhlova Says:

    Tha khawp mai (Y)

    Dr.. tawng bungraw ngahlo ve tak tak an tam lai a, Dr..thu leh hla thiamtak inlo awm thin hi a lawmawm ka ti.

    Damlo pawh i bawl hlim viau thin in ka ring…medical Dr turah ka han ngai ngawt che a…diktak maw. Risk thelh em lo’ng chu maw ?

    Report this comment

  20. 20
    Dr Mahminga Sailo Says:

    19.. mr.Duhlova…Ka lawm e.

    Ran Doctor ka ni e (Tun thla tir comment thenkhat ah phei chuan, a chhia a chhia in ka hming a lan ve zauh zauh reng kha.. :-D )

    Kan pipute’n “Hmeichhia leh Uite, a chul nel peih peih” an ti thin kha a ni a. Uite, ka hnen rawn pan hian min nel viau thin a, nula erawh chul zeuh tur pawh ka hmu zo meuh lo… :-P

    Report this comment

  21. 21
    mr.Duhlova Says:

    20
    Dr Mahminga # Ka va risk thelh teuh ve… :-D

    I ti lawmawm e…min hrilhfiah a, i hnathawhna-ah chunglam malsawmna changin ‘a tak’ chul tur hmu thuai ang che. (F) (L)

    Report this comment

  22. 22
    Tete-i Says:

    A tha khawp mai, post tha tak a ni.. a bak sawi belh tur ka hre lau

    Report this comment

  23. 23
    Dr Mahminga Sailo Says:

    Pu mr.Duhlova… I mi duhsakna a lawmawm hle mai. :-)

    @ Tete-i… :-)

    Report this comment

  24. 24
    lrpa Says:

    (Y) (Y) Ni e, Mizo nih chuan Mizo hla sak hi a tha mai, A tu amah hi India ram/khawvelah zai lamah chuan kan lar dawn hmel lo bawk a. Accent a dik lo a, sap leh khawvel rilru mil hla pawh saptawng in kan phuah thiam hlei lawng e.
    Kei pawh ‘Lily parmawi Lal Isua ka nei’ tih hla hi lengkhawm zaiah chuan ka hriat hmasak ber ani.

    Report this comment

  25. 25
    Dr Mahminga Sailo Says:

    Accent a dik lo a, sap leh khawvel rilru mil hla pawh saptawng in kan phuah thiam hlei lawng e… (Y)

    @ lrpa… Ka inthlahrung deuh a, hemi chungchang hi ka telh ta lo a. I rawn sawi lang a, a lawmawm e.

    Report this comment

Leave a Reply

You must be logged in to post a comment.