Laisawr Ral Atangin

January 31st, 2012 12:15 am by coolsoul09

Hmanlai chuan mawm….

Keini khua ang khaw mawng ping, Aizawl lama Pathian a lokal pawha a tuk thum tuk vela hre ve chauh tur tan kha chuan thal va ek charah hian tui hi a han vang thei mai mai khawp a. Tunlai ang hian ‘tui connection’ te hi lak ve theih hek loh. Tui kan nghei lo chauh reng mai a. Apui apangin inbual kan ngaina tehchiam hlawm lo hlauh kha kan vanneihna a ni letling a. Tui harsat zual lai pawn kan ziaawm phah thin ni lek fangin ka hria. Thingtlang fahrin tih takah, a thangin kan thang hiam reng mai a. Inrinni hi Inrinni a ni satliah mai lova ‘inbual fai ni’ a ni thin.

Sikul lamah lah khan chuti tehchiamin kan zirtirtute khan min en uluk tawk thin lo te pawh a niang. Chat khir ngial ngial, a pawta paw hrat mai te kha kan ni nawk a. Pu Kima hova “Thawhlawm ken theihnghilh ngai lo, theihnghilh pawha let leh thin” tih hla vel, hla phuahchawp lutuk, sak nuam zek si dang mawn thler dawn dawna kan sak tuar tuar thin lai te kha, a hre pha ve lo te tan chuan hmanlai a ni chho ta mai dawn chu a nia leh! Keini tan erawh Facebook vela, US lama kan thiante nena, “Hey, how are you”, kan intih nak nak lai pawhin thinlungah a thar leh thin si!

Tlemin kan han leikang hret a. Zirtawp tlaiah sikul tlanga Hulhu lera sukbuk kan siam ngei maiah khan thu vang chungin lei si dawn dawnin kan han su kur dulh dulh a. A mik a mak pawh hre lovin vai hla kan sa a “Tarzan, my tarzan…a ja meri tumsa piari karte hawww..haw haw haw Tarzan” kan tih vak vak lai khan, venghmawr lam naupang, Tarzana hla hre ve lo te kha chuan kan sirah khan “Jubhi jubhi jub bhi..jhu jhub bi…” an lo ti ve vak vak bawk a. Ralte vahai no la an sawi te chu nep te..a rikin kan ri le lu mai thin a nih kha. Theih ni se, khang kan nun pawisawi lo leh nghilh har tak tak te kha kokir lehin vawi khat na reng reng chu hulhu buk te kha kan han chuan nghing leh lawih lawih mai tur hi a nia leh! A khat mawi tawka thlasik rawn inherchhuak thinin heti tak maia kan nun a han herdanglampui ta hi chu mak tak a ni..mak tak. Hulhu lera thu chunga thlawk delh delha inngai thin kha Air India Flight No. 292-ah te chuangin chhum rang karah kan thlawk kan thlawk ta mai a. Pu Rova’n kan tin a endik laia, a sei bik nih hlauva seh chawt chawt thin khan, sap pa ngo veng vawngin kan presentation a endik huna sawifiah thei lo bik nih te kan hlau ta! Eng kan ti zo ta nge maw ni le!?

Zanriah eikhamah Thlanawma te kawt zawlah kan han pawnto va. “Pang aw inzial inzial, pangpui pang par aw inzial inzial” ti chungin inkai diah diah chungin kan han inzial a. Kan rual u deuh kha a laiah an han ding ngei a, kan han inpawm khawm tal tal a. Chutah, ‘um khaiah um khaiah’ kan tia..kan han zuang suau va..kan darh hak a. A bul atang bawkin kan tan tha leh a. Zan a rei hmain ‘Tin dialah tin dialah’ tiin kut insuihin kan kual kal kual pat pat a. “Mahni in lam kawh theuh tur’ tih zawh chiah khan mahni in lam kha kan han kawk vang hlawm a. Khami hnu kha chuan mahni in lam pana chak mang khenga lim chung khan ‘Remsiam, mangtha aww’ te kha kan ti vawn vawn zel a. Mut dawna ka nu rule khauh zet mai ‘Ke sil lo chuan mut phal loh’ tih te kha tuna kan office-a ‘Dar 3:10 p.m. hma chuan sign out loh tur’ tih dan te nen hian ka nin dan a inang reng awm a sin. Mahni’n fai duh vang ni miah lo va, midangin kan fai an duh vang zawka ke han sil te kha..a va han hrehawm thin tak!

Inrinni a lo inherchhuak a. Tukthuan eikhamah Laisawr lam panin insu turin kan han inak liam ve ngei a. Kan u te hovin emping leh bucket vel meuh te phur chungin hma an hruai bawk a. Pial tlepa tawlh chak vang ngawr ngawrin kan U-te insu tlansanin Kurung lam kan han pan a. Saruak ngal ngatin kan han inphelh sek a. Chutah, sahbawn sen ngei mai khan kan han innawt a. Pialtlepah thiante an tawlh hawl hawl tawh avangin hmanhmawh zetin kan han inhnawih ve thuak thuak a. Mawng tawlh tur kan nih hrerengin ‘cial deuh takin mawng kan han hnawih nal a. Chutah, kan han tawlh ta thin a. Chemtatrawta thawnthu-a a tawpa tui-a kaikuang an thlakin ‘Pi leh pute khua chu nuam sing khaw!’ a tih kha a takin kan han chang a. Pial tlepah kan tawlh thla pur pur a, a hnuaia li-ah kan han tleng lut burh mai thin kha a nia. Speedo ho siam eng eng emaw nena infam ap chunga Swimming Pool, a nut pawh nu thei hlei lova, zuan luh nen hi chuan innawm hleih tak hi a ni ringawt.

Haw lama kan paltlang thin Pu Lura tuikhuah kha inbual fai vek tawha haw ni mah ila, cheng leh hram lova pelh a har thin ngawt mai. Chawhma lam atanga mi cheng an lo tam thin tawh avangin, fur lai tuihawk ang mai hian a nutin a lo nu phut tawh thin a. Mahse, kan cheng ve leh hram thin. Pu Lura tuikhuah kha chu khaw mawng maia awm a nih avang khan sikul banah pawh kan cheng fo thin a. Pu Lura tuikhuaha chen kan tum ni kha chuan sikul ban kha kan nghakhlel thei ngawt mai. Ban veleh hmanhmawh baklengin veng mawng panin kan lim thla ziai ziai a. Tuikhuah thlen dawn hnaih atang khan biang fawn hlawrh hlawrha tlan chung khan kan kawrkilh te kha kan phelh thla mawlh mawlh a. Tuikhuah kan thlen meuh kha chuan kerkawrte chauh kan ha tawh thin a. Tuikhuah sira hling buk chungah khan kan thawmhnaw kan han vawmkai hnawk a, kan zuang lut nghal bawrh thin. Chu’ng lai chuan, tui hleuh dan chi hrang te hi kan la hre ve lem lova. Mahse, breast-stroke, butterfly tih vel ai chuan keini freestyle ngei mai kha a lo nuam zawk fe a ni. Hmeithai rai rual zet tawh te pawh khan an thiam an han show a. ‘Mawngkawhur tui hleuh’ an tia, an mawng te kha an ti lang zoh zoh thin. Khang hun hlimawm tak te kha hmanlai an chang ta mai si a!

Tunah chuan thil engkim mai a letling zo ta. Kan khua, khua nuamah ngei pawh naupangin pawnto zai an rel peih tawh lova. Khawpui boruakin min tuam a; Zoram hmun dang ang bawkin kan tleirawlte pawn an sam zuah seiin Korean film an buaipui a. Sephung kaw laih nachang hria pawh an awm ta lo! A at te pawh hi an a hlawm tawh a nia!

He Laisawr ral, ram hla tak atang hian panlai nun kha ka thlir let fo thin. Zo nun ze rang chu tah khan a lang si.

(P.S. Thuziak hi in lo lachhawng thin a. Misual-a kan post in lakchhawn hian a source tal hi chu pe ve thin ula maw le (source – www.misual.com)…Aizawl leh Lunglei tih vel atang te hian “I thuziak a rawn chhuak a” an rawn ti leh nawlh thin a. A lawmawm rualin a lawmawm dan a dang thin -James Famkima)

Similar Posts:

Recent Posts:

39 Responses to “Laisawr Ral Atangin”

  1. 1
    Saitawk Says:

    A ngaihnawm ang, chhiar nghal te’ng.

    Report this comment

  2. 2
    Kawnga Says:

    Chhiar a kal zaih zaih hle mai. Kan naupan laia kan tih thin deuh vek, i la sawi famkim lo mah mah zawk a nih hmel. Naupan lai sawiin ti ti khawm ta ila, kan inthurual phian dawn a nih hi.

    Report this comment

  3. 3
    Saitawk Says:

    “Thawhlawm ken theihnghilh ngai lo, theihnghilh pawha let leh thin”

    He hla hi eng titih a hrechhuak leh nge maw i nih le! Nge a thuziak i lo nei reng bik??
    :-P (Y)
    Ka sak chhin rut rut chu.. thawhlawm ken i theihnghilh chuan.. ti khan a zawm ta em ni kha??

    Report this comment

  4. 4
    lrpa Says:

    Va ngaihnawm e..phek 100 dang pawh la awmse ka chhiar chhuak tho ang.. (Y) (Y)

    Report this comment

  5. 5
    Asteric™ Says:

    Chhiar zawh a chakawm viau nangin naktuk ah chhunzawm tawh mai teh ang :-) mangkhruish

    Report this comment

  6. 6
    mamboihi Says:

    #4 Larpa khi ka awih chiah lo eee.. Naupan lai min va ti ngai ve aw..

    Report this comment

  7. 7
    Asteric™ Says:

    lrpa vangin ka chhiar chhuak :-D Ngaihnawm khawp mai.

    Ka mu tak tak tawh teh ang Rempuii meng tawh bawk silo, mangṭha u.

    Report this comment

  8. 8
    lrpa Says:

    mamboih, awih mai teh! :-)
    Kan naupan lai chuan ke hi a chat thei lutuk aaa

    Report this comment

  9. 9
    mamboihi Says:

    Aste mangtha le.. Larpa hian a chhiarchhuak miah lo!!

    Report this comment

  10. 10
    chhingdailova Says:

    A va ngaihnawm ve aw. Lung i ti leng vawng vawng a lawm le. Mahse, i thu ziah te hi miin an lo chhuah chhawng bik a ni maw ? I va vannei bik ve mawle.. keini ve Vaivawm vahvai puitu thu leh hla hi chu chhuahchhawn tlakah an dah lo nge maw ni le aw…

    Report this comment

  11. 11
    joboty Says:

    Mannnn…..coolsoul09 ka hre ta chiah che,hman atangin ka hriat che hi ka ring renga….vanti lunglenthlak ve, bakah thuziah te chu iva thiam em!!

    Report this comment

  12. 12
    century child Says:

    A ngaihnawm hle mai (Y)

    Report this comment

  13. 13
    Ruata Pachuau Says:

    Ngaihnawm hle mai (Y) .

    Report this comment

  14. 14
    VaiVa Says:

    A ropui e tih mai loh chu comment dan ka thiam thei lo (Y) . A tluang thain chhiar a kal zaih mai. Tunlai naupang ho hi an â ngawt tak mai, pawnto nachang pawh an hre tawh lo :D

    Report this comment

  15. 15
    Chhuaklinga Says:

    Lunglenthlak lutuk. (Y)
    Vai hla kan sa ve lawk… Tit ti rit tit tit, ti rit tit tit…. Baw raw ki na ka naw ki, dunia he dil va naw ki…

    Tui hleuh dan ve thung thawh leh lawks… Burchhe tui lan, tuidungchhir, kawlpa tui sah, chhek rual, zangthal tui hleuh, hleuh pangngai, li luh, hmaiphum tui hleuh, zangthal tui hleuh a kan hleuh khan kut pahnih kan dah chhuak a, lehkhabu chhiar angin. Bible chhiar la, tawngtai thin la tih hla kha kan han sa ngei bawk a.

    Tawk mai teh se, ka phur lutuk dawn. :D Post min ti lungleng tak a ni.

    tren tren

    Report this comment

  16. 16
    VaiVa Says:

    Chhuakling a chu khalamah ni a chhuak tawh em ni? :P

    Kan la naupan ve deuh laiin Champhai Holy Cross ho hian swimming pool an nei a. Chawlhni inkhawm ban hian kan chengru thin a. Tlai khat chu kan u te rual Valtea an tih hian mihur tuihleuh hi a beichiam mai a. Hostel awm hmeichhe ho khan an thlir thap a. Chutih laitak mai chuan Bro. Chacko a rawn lim thla ta puat puat mai a. Keini kan tlanchhia, Valtea ber chu kekawrte lo phelh ve laklawh tawh si a, pawnah tleirawl ho an awm ve bawk sia. An in man chiang teh a sin :D

    Report this comment

  17. 17
    Chhuaklinga Says:

    @VaiVa, chuak chiah lo, tun ang huna chiang deuh a harh hi ka ching a, thlasik lai chuan ninawm khups mai. :D

    Ot loh nan, i am a disco dancer… :P

    tren tren

    Report this comment

  18. 18
    Mama_B Says:

    Ngaihnawm reuh lutuk. Naupan lai nun hian lung a tileng ve zauh zauh thin. He khawvel changkanna zuang nasa lutukah hian kum rei lo te chhungin naupan laia kan lawm leh hlimpui thinte hi a danglam chak lutuk tawh a, naupan lai hun han sawi paw’n tunlai naupangho chu an nuih pawh a za pha meuh tawh lo chu a ni e!!!

    Report this comment

  19. 19
    PKfanai Says:

    coolsoul chu hräm ve tawh hmel viau mai a. Mahse, “Thawhlawm theihnghilh chang pawhin kir leh zel thin,” i tih hi, “Dumbur theihnghilh chang pawhin kir leh zel thin, thawhlawm ken theihnghilh fo leh si…” tih lam zawk niin ka va hre em.

    Report this comment

  20. 20
    lr hlonchhing Says:

    A ngaihnawm zauh zauh mang e. Ka ka-ah Sahbawn i rawn tat a ni hawt e, a kal zaih mai.

    Report this comment

  21. 21
    coolsoul09 Says:

    PKfanai, i hredik. “dumbur ken theihnghilh ngai lo, theihnghilh pawha let leh thin” tih zawk tur a ni tak e..

    Balanced Diet hla te kha..haha.. “Santen, kawthalo, typhoid kan pumpelh theih nan,Tui chhuan so dah vawh thianghlim i in ang u…” kan han ti thap thap a..A thluk hria in awm em?

    Report this comment

  22. 22
    Dr Mahminga Sailo Says:

    A va’n ngaihnawm em! I thuziak a tluang, chhiar a kal zaih mai… (Y)

    ‘Mawngkawhur tui hleuh’ ang khian ka thianpa hian zangthal in a hleuh thin a, a sazu hi a lo tilawr zeuh zeuh zel a, kan nui nasa thin asin… :-D

    Theihai kung a saihmarthur (elephant-north-acid kan ti thin :-) ) mawng kan liah lai te, bailem kan chhum, buk kan sak leh thianza ho a ramchhuah hrim hrim te, sawi tur a va tam em. I thuziak chuan lung a ti leng hle mai.

    Report this comment

  23. 23
    chhurliana Says:

    Tha khawp mai, James-a nge nge. BMA Aw Editor i nihlai atang tawh khan i thu leh hla hi ka lo tuipui ve thrin aaa!! Ti zel teh!! Thuziak chhuahchhawn chungchang hi chu mizote hi inzir deuh chu kan la ngai khawp mai!! Thuziak chu sawiloh, kan TV-a kan news clip leh movie mizotawnga kan lo siam ve te thleng hian buaithlak hlawm nih hi maw.

    Report this comment

  24. 24
    coolsoul09 Says:

    Bangalore awm lai kha..thu tawi te te ka ziah hnem ber lai a ni awm a sin! BMA AW kha thla 14 vel ka enkawl ve a. Hna lama buai a na deuh thin nen..Pathianni-ah chawpchilh zetin ka han bei ta thin kha a nia..rilru-a awm ang ang chhut pawp pawp mai kha a ni thin a. Inkhawm kalkawngah Rickshaw-a chuan pahin kan han chhiar a..typos te kha a lo awm ta nual thin a. Siamthat ngaihna awm tawh thin hek lo..kan ropui lo thin teh zawng a nih kha.

    Report this comment

  25. 25
    saint sammoo Says:

    Laisawr nge laisawral (marpara bul)?

    Report this comment

  26. 26
    coolsoul09 Says:

    Laisawr a ni e. Lui hming a ni…#25

    Report this comment

  27. 27
    saint sammoo Says:

    Awkhei..

    Report this comment

  28. 28
    mr.Duhlova Says:

    Comment double lo mai ang… a hnuai a mi hi a tawk e.

    Report this comment

  29. 29
    mr.Duhlova Says:

    Thla-en zana ‘Pawnto khi’ a lunglen thlak ngawt mai, mahni in lam panin kan han tlan haw a, Sumhmun (Varandah), lo thim deuh ruih te kha, hlauh tur awm miah silo, kan han hlau tha leh deuh a, kawtzawl atangin ring tawk in “NU” kan han leh hnuhnawh ul ul a…. :-D :-D

    Hmanlai an chang zo ta tak tak e….Good post (Y)

    Report this comment

  30. 30
    lianchhiara Says:

    Post ngaihnawm cher cher e!

    PS: Kan khaw chanchinbuah pawh Lamea te, Sangpuii pa ten article an ziak fo mai! An pe ni hmiang ka ti :D

    Report this comment

  31. 31
    James Bond Says:

    coolsoul09. Khi khi nangma phuah tak tak ania maw? I lo va thiam laileng ve. Min pe then ve teh. “Pathian a lokal pawha a tuk thum tuk vela hre ve chauh” tur khawpa bengvar lo ni mah ila i thu vai thiam ang chanve pawh thiam ka chak

    Report this comment

  32. 32
    bulaya Says:

    Thu ziak i thiam hrep mai a. (Y)
    Thenkhatin kan tawn hriat ngei ngei pawh kan sawi chhuak thiam fumfe lova, a thenkhatte erawh hi chuan in tawn tak tak niawm a lang lo pawh in sawi ngaihnawm thiam viau zel mai a(h). :-D

    Report this comment

  33. 33
    doc_lib Says:

    ngaihnawm ve aw. thu hi in thiam teh hlawm mange aw. Keini tawngkam thiam lo ho hi ti hian in ti ti kotlangah hian lo khi ve sung reng ila anih ber mai hi :-D

    Report this comment

  34. 34
    lamea25 Says:

    30, lianchhiara, eng chanchinbu ah. Min hai nilo maw?

    Report this comment

  35. 35
    lamea25 Says:

    THU NGAÌHNAWM AH PAWH KA THUZIAK MI PAKHATIN ALO DAH VE NGAWT A.. In lachhawng nih pawhin misual.com ti tal se

    Report this comment

  36. 36
    H.Vangchhia Says:

    (Y)

    VaiVa #16 “Valtea” khi Vala (fam) of IB veng ani mial em Vengsang lam makpa hlui?

    Report this comment

  37. 37
    ultimate Says:

    eih vee, engpoh ni se facebuk a ka sawi toh ang khan ka ngaisang ber tho2 che, a-chhan- prove-na turin link i dah thei tlangpui a, a rinawm tlangpui bawk. Tih tak2 ah chuan Selthuama te nen chuan khaikhin tlakah ka ruat lo che. In in san hleih deuh ka ti.

    Report this comment

  38. 38
    hmingtea Says:

    Laisawral khua mi pakhat ke ruhtliak 2006 kum laihawl khan Civil hospital ah a awm reng tawh kan inkawm ve a hming ka hre ta lo.

    I ti lunglen thlak ve le aw nuapanlai tak kha chu aw nuam thei thin ti raw.Sukbuk buklem sak tuichen hahaha

    Kolasib Sister tuikhauh chen ruk thin lai kan thian te thawmhnaw an man kekawrte la hak hma an lian ve khat awh si ruak in mi in phen biru pah in an hawng a piah deuh atangin kan lo signal thin lai te kha min hriat tir (Y) (Y) (Y) (Y) (Y)

    Report this comment

  39. 39
    houdini Says:

    Ha ha ha! A va ṭha mai mai e…

    Report this comment

Leave a Reply

You must be logged in to post a comment.