Kumtawp zan duhawm lo

December 31st, 2011 6:30 pm by chhana

Naupan lai aṭanga tleirawl sual neilo, tunlai nu leh patena suala an ngaih ruihtheih thil ho reng reng chu sawi loh, zuk leh hmuam takngial pawh a engamah tilo ka nia. Tette aṭanga inkhawm ngaina, pawimawh fetah lo chuan ṭhulh hreh ngawih ngawih mi ka ni.

Hetiang mi hi ni mah ila; Pathian Thu-ah hian tuihal rukna erawh ka nei veng veng ṭhin. Mi’n Pathian Thu an sawia; ka hriat hnu vek leh ka mamawh ve loh, kei aia sual zawkte tana sawi ni tlatin ka hre ṭhin. Thi ta ila ka chan tur ka chiang (hremhmun).

Suala ka inhriat loh miau avangin in siamṭhat ngaihna ka hre chuang lo. Hetianga chawlawlna thlarau sualin min chim vel mek lai hian ka nunah sual kawnga tlan ve chakna a lo lang ta.

1999 (?) kum tawp ni a nia; kan club (Apollo Football Club) chu kumhlui thlah pahin kan picnic-a; ruaiṭheh zawha ni tla thlah nghal tum kan ni.

Ni tla te kan thlah zawh hnu chuan kan club member zinga pakhat chuan, “Äneiha VDP-in an la, U Marina-te pawisa a ru a ni awm e,”a ti ta mai. Nichin lawka kan picnic pui, kan club tana kan goal thun khawl ṭha ber pawl a nia; mak ka tiin ka lainat kher mai.

Zan inkhawm hun a lo nia; inkhawm ṭan hun awm velah kan in, Biak In bul mai aṭang chuan ‘énge kumtawp zan alawm le’tiin hmun hla lam ka pan. Insual ve ka chak tlat mai. Ka hmaa kal Mahmangaihtea (ka nuphal pa ni ta) hian kawng min lo kian ṭha lutuk lo chu kan nek lui deuh saka, a ni lah a huai tawkin a lo nam, min lo hlau chuang bik der si lo. Amaherawhchu hemi zan hi chuan tumah ka sual ta em lo.

Zan dar riat vel a nia; Umarinate pawisa chu an nau Zualtea lak a lo ni tih ka ṭhiante ka aṭangin ka hre ta. Chu pawisa chu chen kan tum ta. Sawi tak angin sual ve chaknain min zem tlat avangin ruk ruk mah nise timna ka nei hauhlo (a hmanna a tel). Veng ṭhenawmah ar kan ve tumin kan in buatsaih. Chumi hmain kan veng zu zuar U Tawia te zu kan han lam hmasa. A nin fimkhur tura min chah pahin Bawngkawna mi anga sawi turin min chah nghal a.

Tichuan, ar kan kan tumna Pu Rotluangate in (Hman deuhva Selesih daia an thlama thia an hmuh, mi thah emaw kan tiha thisen sang vang lo ni ta zawk kha, hetah pawh post a nih nghe nghe kha) kan thleng phei. Arte kan dah fel hnu chuan ka ṭhianpa Lalliantluanga chuan a bialnu rimpui turin mi sawma; a bialnute in hi tlema piah leh deuh a nih avangin kawngpuia ka scooter panin kan chhova. Hetih lai tak hian kan ṭhiante zinga ṭhenkhat chu hmanhmawh takin an rawn tlan thla. “Scooter bulah Lalrenga (khawtlang duty) a awm reng a nia; Zualtea pawisa ruk kha an hriaa,”an ti ta mai.

Kan mangang ta. Ro relin kan bial ta mam mam mai. Ka ṭhiante kha an lo fel ka ti. Thiamloh ka chan ve kha an remti hauh lo. “Nang chu an ringhlel chuang lovang che, chuvangin, Bawngkawnah nula rim turin min sawma; petrol man bakah cheng 300/- lai min pe bawk nen, kan kala; zu an lam ta a nih kha, hre lawk ila chuan ka kal miah lovang,”i ti dawn nia min tih ang chuan keimahin ka chhuak chho ta a; Lalrenga bulah chuan sawi tura ṭhianten min tih ang chuan ka sawi ta a; a awih a niang chu kan haw nghala; ka la phur zui.

Ina ka luh zawk hnuin ka chhuak leh a; inti rinhlelhawm lo takin ka chhuak leha, U Marina te inahte chuan ka va ṭawng vei ham hama.

A tuk chu kumthar ni a nia; ka ṭhiante ho chu khawtlang duty-ten zilh turin an la hlawm. Kei chu ka la vannei tluang zel. (A hnua ka hriat leh danin) Zan inkhawm ṭantu tur ka nih avangin min ko ve ta lo.

Kumthar ruai nawn nia kan kohhran upa Upa Zorama zawhna pawh dawt ngalngatin ka la chhang ham ham. Tunah hian thil awmzia an hre vek tawh awm sia; zahna khua a sei mang teh e.

Similar Posts:

Recent Posts:

16 Responses to “Kumtawp zan duhawm lo”

  1. 1
    khamrang Says:

    A hmasa ber atan kumthar chibai ka buk a che u :lol:

    Report this comment

  2. 2
    TuaiSialA Says:

    A tawpna teh tawp chu a! A ngaihnawm e.

    Report this comment

  3. 3
    James Bond Says:

    Hui ha. Chhana leh, I va che fuh lo tehlul em, han ti dawn ila, Aizawl pui roh hi Kristmas leh Kum Thar nawm dan hi a khingbai deuh riau. Engpawh nise, kumin (2011) ah hian darkar 4 leh minute 5 chauh ala awm a, kumthar lamah in greet zawk ang u. Zu in tam lutuk suh u aw, kum thar then hmain in rui chhum hmawk palh ang e.

    Report this comment

  4. 4
    Lersia Says:

    @Khamrang a chu le le…. Kumthar chibai in buk pawh a la hun tawp silo… “Chhawrawnaw” leh tawh niang…

    Report this comment

  5. 5
    khamrang Says:

    Vawiin zan chu halpuah a tlepin ka keng puak anga, Lersia hian bawn min ti leh dawn em :lol: :lol:

    Report this comment

  6. 6
    caribou Says:

    Halpuah leh halzit tel miah lovin kumhlui ka’n hmang liam ang e….

    Report this comment

  7. 7
    James Bond Says:

    Darkar 3 leh minute 24 ala awm

    Report this comment

  8. 8
    mamboihi Says:

    Chhana chu i va che chhe tteuh ve! I ziak ngaihnawm khawp mai..

    Report this comment

  9. 9
    mamboihi Says:

    Ka tlar tuarh mai! ka duhtawk hrih ang in reh hlawm em mai!!

    Report this comment

  10. 10
    bk Says:

    Kumtawp zan duhawm tak lo hmang ngei tawh turin ka duhsakna sang ber ka hlan a che.

    Report this comment

  11. 11
    dingtea Says:

    A ngaih nawm hld maì. Mahse a tawp dan hi ava mak teh tawp ve, ka inring hman lo a lawm le

    Report this comment

  12. 12
    Huha Says:

    A ngaihnawm hle mai.. Adv. Kumthar Chibai vek u le..
    Halpuah nge Bomb a puak leh zeuh zeuh a nia :lol: .

    Report this comment

  13. 13
    James Bond Says:

    Happy New year, at last! (in India and rest of the world east of it)

    Report this comment

  14. 14
    chhana Says:

    Zanin chu Taia pate inah kumhlui kan thlah vea; Daibuaia nen misual member pawh pathum lai kan awm a nih chu. Ṭawngṭaina nen kan hmang lemlo naa; kan hmang ṭha ve thawkhat tho chuan ka hria. Chhiartute kumthar hlim taka hmang ṭheuh turin duhsakna ka hlan a che u.

    Report this comment

  15. 15
    CFL Says:

    Ka chhiar chhuak dap e. A ngaihnawm thawkhat e.

    Report this comment

  16. 16
    Asteric Says:

    Haha…ziak ngaihnawm khawp mai. Sual hi thil ṭha chu a ni hauh lova, amaherawh chu misual tak hi a hawikir leh a nih chuan sual ngailo mi aiin hmangaihna ah a chianga a nghet zawk ṭhin. Lal Isuan a thlengtupa pharisai fel tak hnen ah a sawi ang khan, tangka 50 leh 500 ba tu ngaihdam ve ve an ni a, a tu zawk chu nge a ngaidam tu chungah lawm zawk ang? a tih ang khan bat nei ngah ni a in hri apiang te hian Pathian an lawm ṭhin a, bat nei mang lo “Ka naupan laia sual ka tih pawh ka hre lem lo” ti ang te hian Pathiana han lawm em em na hi an hmu tam lo chawk ṭhin. Pathianina kan chunga a duh ber chu “Misual ka ni tih ka in hriat hi” a ni daih a ni. “Mifel te lam tura lokal ka ni lo,”..”Mi bawrhsawm te chuan Dr an ngaia, mihrisel te chuan an ngai lo”..”Beram 99 chu kalsanin Beram bo 1 chu a hmuh hma a zawng lovangem ni?” tih te kan hmu.
    Sual lawm Pathian a nilova chutih rualin mihring zingah Fel inti a lawm chuang hek lo. :wink:

    Report this comment