Mizoram Development Intan Dan II

November 30th, 2011 5:00 am by lushai_er

( Chhunzawmna)

Mizote hi ran vulh mi kan ni ve a, ar leh vawk hi kan vulh deuh vek a, nimahsela eizawnnan hman tham kan vulh ve lo va. Chuvangin, ar chi tha leh vawk chi tha mi lak chhuah ve thain kan hria a. Sap  ram ar chi tha mi White Leghorn leh Rhode Island red te kan la chhuak a, tui awp keutir turin kan sem chhuak a. Aizawl leh a chhehvel khaw thenkhatah chuan heng ar thlah hi an lo tam ve ta a. Tin, vawk lian chi ( a var) chi thlahtu atan kan la chhuak bawk a. Hemi vawk thlahte hi mi tam takin an lo hlawkpui ta a ni. Tin, ar pul venna tru damdawia chiu-na te kan la chhuak a, Aizawl leh a chhehvel khuaa ar te kan chiu sak thei bawk a. Hei hi tun hmaa Mizorama thil la awm ngai lo, kan chin chhuah pakhat chu a ni.

Mizote hi puan tah mi kan ni a. Kan ram a vawt ve fu si a, sahmul puan tah te zir ve a tha ang e, tiin. Neihbawi ah khian Beram vulhna hmun kan siam a. Beram rual 50 lai Shillong atangin kan zuk la chhuak a. Heng Beram ho hmul hmang hian Sihphir khuaa hmeichhe hovin kawmawl te an tah thiam ta a. Heng Sahmul kawmawl te hi lum tak a ni a, an tangkaipui viauvin ka hria. Beram hmul sawisakna leh tah dan zirtirna te pawh kan siam bawk a. Nimahsela hei hi tunah hmuh tur a awm ta lo va, pawi ka ti hle mai.

Lushai Hills Community Development Project hi Mizoram hmasawnnahna thawh tanna hmasa ber kan ti thei ang a. Kum 3 atana relbawl a ni a, budget pawh cheng nuai sawmpahnih (12 lakhs) a ni a. Hei hi a tlem lutuk a, hnathawh theih pawh a tlem hle a ni. Kan hotupa Assam Sawrkar-a Development Commissioner leh Secretary ni bawk Pu K.Bhalachandran, I.C.S hnenah pawisa tlem lutuk nen hnathawh a harsat thu ka sawi a. Kum 1956 a All Idia Development Commissioners Conference-ah hei hi an ngaihtuah a. A bikin Special Multi-Purpose  Tribal Community Development Project Block siam an rawt thlu a, a budget pawh a letin an ti pung a. Chutiang Development Block chu Lunglei-a tan turin 1956 tawp lamah min phei tir leh ta a.

Aizawl- Lunglei kawng hi 1955 March thlaah a tlang thei hram a, a la zimin a la chhe em em a. Tuirial leh Matah lei a la awm lova, chuvangin furah chuan a kal tlang theih loh fo va. Chutianga kalkawng a la that loh avang chuan hnathawh a harsa lehzual a. Hnathawktute awmna turin in pawh kum 1 chhungin kan peih hlei thei lo va. Hemi Block-in a huam chin chu hmar lamah Ramlaitui leh Buarpui, chhak lamah Aizawl kawngah Thiltlang thlengin. Chhim lamah Sairep thlengin. Aizawl lama kan tih dan ang bawkin kan rel a. Agriculture lamah chuan Sihphira kan tih ang deuhin Theiriatah kan tan a, a kum khatna atangin kan hlawhtling nghal viau va, lawmawm pawh kan ti hle a. Nimahsela hna kan thawh tam hmain IAS zawm turin ka kalsan ta a, an thawh zui zel dan ka hriatpui vak ta lo a ni. Hei hi chu min thlaktu Pu Hauthuaman a hrechiang ang a, amahin la ziak zawm zel sela a tha ngawt ang.

Aizawl Project kan tan kum 1954 khan Aizawl Chilren’s Park hi kan siam tan a. Bawrsap Bangalow, tuna Governor in bul atangin tuna Aizawl Club thlanga Kawngpui thleng kan hung a. A chhungah Library cum Reading Room in kan sa bawk a. Bombay atangin pangpar hrang hrang chi ka chah chhuak a, kan tih tiah hnuin Park chhungah chuan kan phun a. Mahse, kar khat pawh awm hman lovin an pawtfai vek a. A dang kan phun pawhin chutiang bawk chu a ni leh ta a, kan bei a dawng hle a. Pangpar chin chu kan hlawhchham chiang hle mai. Tun hnu hian pangpar chin an tum leh ta ngai emaw ka hre lo va. Kan aia hnam fing zawkte ramah chuan pangpar chi hrang hrang hi hung lem loh pawn khawlaiah an par vul chek chuk mai a, kan in ang lo hle mai. Hetiang hun hi kan ramah engtik ah thleng ve tak ang maw?

A hmasa lama kan sawi tawh ang khan Mizoram hmasawnna (Development) hna kan thawh tan lai hun 1954-58 lai khan Sawrkar pawisa a la tlem em em mai a. Chuvangin thingtlang mite pawhin mahni intodelhna rilru puin thahnemngai takin hna an thawk thin a. Sawrkar hnathawk Officer-te pawhin pawisa awm chhun chu renchema hmangin theih tawp kan chhuah ve thin a. Tunlai hi chuan India Sawrkarin pawisa maktaduai telin a rawn sanction ta a. Hnathawh pawh awm lem lo va, Sawrkar pawisa rut teuhte pawh an awm mek ni awmin an sawi a. Pu Rajiv Gandhian, “Sawrkar pawisa development atana kan ruahman hi cheng khatah pawisa 85 hi ei rukah a ral a ni,” a tih an sawi hi Mizoramah pawh hian a dik  ve mai awm mang e! tih te pawhin min ngaihtuahtir a, India Sawrkarin kan ram development atana a sanction zawng zawng hi a hman dan dik taka hman chu ni sela, Japan leh S.Korea ramte ang khi kan ni ve thei tur a ni na a le.

Similar Posts:

Recent Posts:

19 Responses to “Mizoram Development Intan Dan II”

  1. 1
    mr public Says:

    va ngaihnawm e..hetiang lam hi han post zel teh khai!

    Report this comment

  2. 2
    joseph sr Says:

    Ka chhiar zo ta. A ngaihnawm e. Good morning……. (G)

    Report this comment

  3. 3
    bucko Says:

    Thawh ruala online paw’n comment hi lo awm ve hman ziah…
    Kam hotu hmasa te an lo thawk rim hle a ni. Dr.Zokhuma ziak pawh a ngaihnawm thin khawp mai… (C) (Y)

    Report this comment

  4. 4
    Chhuaklinga Says:

    Eheu ! Muthilh hlanin post chhiar tur a lo chhuak teuh mai, chhiar chur chur ang.

    tren tren.

    Report this comment

  5. 5
    saint sammoo Says:

    ti ti ik ik.. (C)

    Report this comment

  6. 6
    ZerO Says:

    Tuna NLUP an kalpui dan aiin an thawk tha zawk em aw? Mi huana pangpar thliah hi kan la sim thei lo chu a niah.. :-P

    Report this comment

  7. 7
    Maya Says:

    Kan mithiam hmasa tlem te ten ram an hmangaih a, ram hmasawnna tur an duh tak tak a an thawkrim ang khan , tuna mithiam tam tak te hi tangrual se ( sum a awlsam tawh zawk bawk sia ) chu kan thang zawt zawt ang mawle . post tha tak a ni e . (Y)

    Report this comment

  8. 8
    PKfanai Says:

    A ziaktupa (Rev.Dr.CL.Rema) hi ka mi hriatchian leh ka mi rin zawng tak a nia. 1994 a Pasighat a ka luh hlim khan a lo kal a, a vision leh Testimony te a sawi a, min hnehin ka rilru a khawih hle a ni. An unau 3 (CL.Ruala MP, leh Rev.Dr.CL.Hminga) te zingah pawh hian ka dah san ber a ni. “Arunachal hnam lian 2 Adi leh Nyishi te hi bei vak mai ila, anni hnam 2 hi kan hneh chuan Arunachal chu kan hneh a ni mai” tih a sawi a. Hei tunah (kum 18 hnuah) chuan, a lo dik zia kan hmu tan reng ta mai. Kristian Chief Minister lai kan nei ta.

    Report this comment

  9. 9
    James Bond Says:

    “Hna kan thawh tan lai hun 1954-58 lai khan Sawrkar pawisa a la tlem em em mai a. Chuvangin thingtlang mite pawhin mahni intodelhna rilru puin thahnemngai takin hna an thawk thin a. Sawrkar hnathawk Officer-te pawhin pawisa awm chhun chu renchema hmangin theih tawp kan chhuah ve thin a. Tunlai hi chuan India Sawrkarin pawisa maktaduai telin a rawn sanction ta a. Hnathawh pawh awm lem lo va, Sawrkar pawisa rut teuhte pawh an awm mek ni awmin an sawi a. Pu Rajiv Gandhian, “Sawrkar pawisa development atana kan ruahman hi cheng khatah pawisa 85 hi ei rukah a ral a ni,” a tih an sawi hi Mizoramah pawh hian a dik ve mai awm mang e! tih te pawhin min ngaihtuahtir a, India Sawrkarin kan ram development atana a sanction zawng zawng hi a hman dan dik taka hman chu ni sela, Japan leh S.Korea ramte ang khi kan ni ve thei tur a ni na a le”.

    A va dik tak em! Assam rama kan awm lai kha chuan pawisa awm chhun kha an hmang dik tlangpui thin tak asin. Tunlai kum khata cheng vaibalchhe 8000 dawn hmang ral sorkar hian 1972 hma lama an thawh ang zat hi thawk pawn an lang lo. Sorkar leh officer te hian mipui rawngbawl hi an hna ber ani tih hria pawn an lang lo. Sorkar office hi tawpna ani lova, means to an end chauh ani tih hi mipuite pawn kan hre lo. A chhan pakhat chu Mizoram sum hmuhna reliable ber hi sorkar hnathawk ho hlawh ala ni tlat. Zialo tak ani.

    Report this comment

  10. 10
    PKfanai Says:

    Rev.Dr.CL.Rema hi Mizo zinga I.A.S. Kan neih hmasak pawl a nia. India in Independence a han neih chhoh takah khan, Sap missionary ho khan min tin san a lo ngai ta si a, an aiawh zo tur India khua leh tui nisi, Assam ram(N.E.India) a an rawngbawlna awpkhawm thei tur mifel leh tling an dap vel ta a, ani hi Pathianin Isaia a kohna hmang khan kohna a hria a, “kei heta hi ka awm e, min tir ta che” ti a chhangin IAS hna chu ban sanin Sapho mission hna chu a chhunzawm ta a ni. A leh lamah chuan, annh ang ngei hian Kan Zoram te hi min han kaihruai se la chu aw, tih vawng vawng chang ka nei thin.

    Report this comment

  11. 11
    sheldon Says:

    “Sawrkar pawisa development atana kan ruahman hi cheng khatah pawisa 85 hi ei rukah a ral a ni” – Mizoramah hian hei ai hian kan lo sang reng ang e. A rapthlak mange :-(

    Report this comment

  12. 12
    Contessa Says:

    A bengvar thlak hle mai..

    Report this comment

  13. 13
    Sony Says:

    15% tal hmang dik sela kan la ziaawm viau zawk ta ve ang.

    Report this comment

  14. 14
    K^_~lhawk Says:

    Paws bengvarthlak thin mange! _er nge nge… (Y)

    Report this comment

  15. 15
    lushai_er Says:

    Hei, post ka vil hman dawn lo va, lunch breakah ka rawn online zuai, hman veleh ka rawn online leh ang. :bo nghal:

    Report this comment

  16. 16
    Thangchhuahpa Says:

    .. Mi hmasa Pathian leh Ram tana theihna thiamna hmang zo tute.. hriatreng ni hlawm rawh se .. (Y)(Y) A leh pek nghahhlelhawm thin hle mai….

    Report this comment

  17. 17
    lrpa Says:

    Nimin BBC a ka chhiar Huaxi khua, China ami khaevela thingtlang khaw hausa ber a in chhal chanchin tlem an rawn ziak a. Kum khat ah 8 billion dollar annual revenue atang in an hmu ani.
    Kan naupan laia kan zir thin chu switzerland chu tlang ram ani a. Lo neihte a harsat avangin manufacturing lamah an kal a, an ram a hausa em em tih te kha ani thin.
    Kan ram hmasawnna tur chuan hetiang lamah hian kan thanharh angai a. Ei leh barah intodelh thei bawk ila. Independent sual ve meuh te chuan ‘rilru independent’ kan zir angai ani.
    Hmasawnna lem lem, pawisa a leitheih te hi ngaisang lo ila, thawhrimna a lei tur hmasawnna hi dah pawimawh ila a tha.

    Report this comment

  18. 18
    CFL Says:

    Rev. Dr. C.L. Rema hi ka mi ngaihsan tak a ni ve a. A hmathlir a han sawite kha a va ropui tak em. Tihhlawhtlin ni thei se duhawm tak a ni.Tunlai chhuan te tan chona nasa tak a siam si a. (Y)

    Report this comment

  19. 19
    Contact Lens Technology - CLTech Cast Moulding Machinery Equipment Process Says:

    Contact Lens Technology – CLTech Cast Moulding Machinery Equipment Process…

    [...]Mizoram Development Intan Dan II | mi(sual).com[...]…

    Report this comment