Mizo thuhlaril hmasawn dan – Part 2

September 26th, 2011 7:00 am by Tluanga Chawngthu

HUN LAIHAWL : HRANGHLUITE

HUNLAI (1920-1970):
Kum 1920-1970 inkar hi Mizo thuhlaril thanchhohna kawnga sulsutu hranghluite hunpui chhuanawm leh chhinchhiah tlak tak a ni. Sapho leh Zosap hunlai khan Zofate zingah thu phuah leh hla phuah thenkhat awm nual tawh mah se, an kutchhuak a la tlem em em a. An kutchhuak tak tak lo lan hun chu hun laihawl a ni zawk. He hun chhung hian hla lam te, lemchan lam te leh thutluang ziak lamah hranghluihote hian par an chhuah vul lai tak a ni a. Lehkhathiam leh Pathian thu thiam(Pastor leh Tirhkoh) te an lo pung chho zel a, mahni inrintawkna rilru nei an thahnem tial tial a. Mizo thuhlaril chuan hmasawnna kawng chu chak takin a zawh mup mup ta a ni.

Mizo thuhlaril hmasawnna kawnga sulsutu pawimawh bik pathum, Zofate zinga mithiam Prof.Laltluangliana Khiangtea’n “Zo Lungthu Pathum” tia a vuah- Thanga, Liangkhaia leh Awithangpa te chanchin leh an kutchhuakte hi midang kan sawilan hmain tarlang hmasa ila. Chumi hnuah hla lam, lemchan lam leh thutluang lama mi pawimawh dangte kan belchiang chho leh dawn a ni.

ZO LUNGTHU PATHUMTE:

THANGA (1883-1957):
Thanga hi Zofate zinga hla phuahtu pawimawh leh letlingtu pawimawh tak a ni a. A hming hi Lalhmingthanga emaw Thangthura tia sawi an awm thin. Thanga tih hi a lar pui ta ber a, mi tam berin kan hriat dan pawh a ni. Kum 1883 khan Chaltlang-ah a lo piang a , nausen a nih laiin a pa, Thanglianmanga’n a thihsan avangin Vawngawnah te, Tanhrilah te, Hmunte-ah te, Mualbem-ah te an pem kual a. Chumi hnuah Lalsavunga hovin Zokhawsangah an awm ta a ni.

Sipai bel nawta tang chungin lehkha a zir a, Babu Sohon Roy-a hnenah a awm leh a,chumi hnuah Zosap chawm-hote awmna in sak tharah a lut hmasa ber zingah a tel ve a. Lehkha a thiam thei hle a. Kum 1899-a an ekzam tum chuan pakhatna a ni a, kum 1903-a Lower Primary ekzam-ah mi 27 zingah pahnihna a ni bawk. Kum 1900, December thlaah Zosapte nen Khasi ram an tlawh a, an haw hnu kum 1901, February thlaah baptisma a chang ve ta a. Mizoram thim zual laia ringtu hmasa, Zosapte tanpuitu a ni.

Kum 1906-a Mairang inkhawmpuia harhna zu chhimtu leh harhna hmasa ber pawchhuaktute zingah a tel a. Kum 1907-ah Cole Sap-in Scholarship a tihsak avangin Shillong-ah High School a zawm a, kum 1911 khan Mizo zinga Matric zir zo hmasa ber a ni ta a. Zofate zinga lehkhathiam hmasa, sulsutu pawimawh tak a ni. Matric a zawh hnu hian Bawhsap pisa-ah Clerk hna a thawh a, Head Clerk thlenga kai sangin kum 1940 khan a pension ta a ni.

Kum 1914-ah Mission Veng Kohhran Upa atan thlan a ni a. Hmarchan Kohhran ban pawimawh tak, Kohhran rawngbawlna bakah Red Cross Society leh Pawnpui Industry lama sulsutu zing a mi niin, YLA dintute zinga pakhat a ni. Kum 1957, April ni 15 khan a boral ta a. Mission Veng thlanmualah phum a ni.

Thanga hian Mizo hnam nunphung tarlanna lehkha bu Hmanlai Mizo Awm Dan tih a ziak bawk a. Hei hi tlai khawhnu kum 1992 ah tihchhuah a ni thung. Mizo Kohhran din tirh laia kristian hla siamtu hmasa ber niin a lang a. A tirah chuan Sap hla a letling phawt a. A hla lehlin zawng zawng chu 31 nia hriat a ni. Hla hi a phuah hma ve hle a, a hlaphuah hmasak ber chu ‘Kan Chatuan Pa Rawn Zawng Rawh U’ tih hi a ni. A lehlin ni lo, a hla phuahte chu a hla bul leh phuah hun/kum nen lo tarlang ila:

1. Kan Chatuan Pa rawn zawng rawh u (1903-04)
2. Aw Isu ka hmangaih ka rilruah (1906)
3. Ka Pa, aw ka Pathian (1906)
4. Misual ka ni (1906)
5. Vana Jerusalem thar mawi tak (1906)
6. Mizoram Mizoram ka thlahlel hle che (1907-1911)
7. Mizo fate u finna zawng ula (1907-1911)
8. Aw Lalpa chungnungber kan fak hle a che (December, 1910)

Kum 1915 hma lamah khan Mizo hla lehlin dang reng reng Thanga hla aia hma tawng(dah hmasak) hi a awm lo. Zofate zingah anmahni irawm chhuaka hlate phuah a, Mizo thuhlarila mi hmasa pathum hming lamchhuah loh theih lohte chu: Thanga-Liangkhaia-Awithangpa te hi an ni a. Anni pathum hi Mizo thuhlarila lungthu kimtu, Zo lungthu pathum tia vuah tur, sûlsutu pawimawh leh hmasa, ziaka thil vawn that hnua hmahruaitu pawimawh leh Mizo thuhlarila innghahna pate (Founding Fathers) an ni a tih theih ang.

Thanga hian hnamvoh hla(Patriotism) hi a lo nei hma hle a. Kum zabi 20-na intan lai khan a hnampuite chona hla tha tak a lo phuah daih tawh a ni. Pathian fakna hla siamtu a ni a, chhamhlaa chhiar tur a phuah ve bawk a, sap tawnga kan sawi dawn chuan Hymn writer-cum-poet tih tur a ni ang.

LIANGKHAIA(1884-1979):
Liangkhaia hi Saihum khuaah kum 1884-ah a lo piang a, a laiah hming chu Hrangchina a ni. Mahni tawka hmasawn tum leh tumruh tak anih avangin zirtirtu mumal pawh nei lovin lehkha a zir ve a. Kum 1908-a Lawr ekzam chu a bei ve tawp a, a vanneih a siamin pakhatna a ni a. Zosapte’n an hmelhriat a, Tirhkoh hna zir tura an sawm avangin kum 1910 atangin Aizawl-ah Tirhkoh hna a zir ta a. Kum 1913-ah Cherra lamah a zir zawm zel a, kum 1916 atangin Tirhkoh hna a thawk tan a, kum 1921-ah Pastor atan nemngheh a ni ta a ni.

Liangkhaia hian Pathian rawngbawla a hun pum a hman chhungin Mizo hnam tan thil tha a hnutchhiah hnem hle a. Mizoram dung leh vang fanga mi chi tin chi tang be pawp leh kawm reng a nih avangin a thil ziakte hi a rinawm tawk a, mi thil chhinchhiah thei mi bik a lo ni hlauh bawk nen. A hriatrengna a fimin a ziakin a chhinchhiah tha thlap zel bawk a, a tha lo thawh dan zawng zawngte hi a then a zar chauh lo tarlang ila:

Mizo hla leh a nun inthlun zawm dan hi tarlang hmasa ber ila. Kum 1908 khan Puma Zai a paw chhuak a. An lal Lalzika chuan a lo duh hle a. Sialin a ai ta hial a. Zoram dung leh vangah a lo darh ta a ni. Hnam hla an ti mai a, a thang zel a. Thlanglam Zai an ti zui ta hial a ni. A paw chhuaktu hi hla lama tui leh hla pawh phuah chho zui ta zel a nih avangin Puma zai bikah pawh hian hla pahnih khat chu a thawh ve ngeiin a rinawm. Mahse, a hla phuah thenkhat hi amah ngei pawhin a phuah angin a chhâl duh lem lo.

Kum 1913 atangin Kristian hla lehlin leh phuah a tan a. Hla hi 20 chuang a phuah a, 20 chuang fê letling bawk. Kristian Hla Bu ah hian a hla phuah leh lehlinte hi 31 a chuang thin a. Mizo zingah chuan hla nghah ber a ni. Tuna Kristian Hla Bu tharah hian a hla 30 a la chuang ta zel a. Mizo Kristian hla siamtu(Hymn-writer) te zingah chuan hmahruaitu pawimawh tak a ni. Hla hi a nei reng emaw tih theih mai turin a lehkha ziak dang dangah pawh hla chang a telh chamchi a, a thian thate an thihin hlain a sun thin bawk. Mizo hnam chanchin leh nunphung ziaka dahin a lo vawng tha khiau hi a hlu hle a. Mizo Sakhua a tobul atanga chhuiin, a kawngkal kimchang takin a ziak a, tun thlengin zirlaite leh hnam tan ro a tling. Mizo mi leh thil hmingthangte leh Mizo Sakhua leh Mizo Awmdan Hlui te hi Mizo hnam nunphung a tarlanna lehkhabu a ni a. Mizorama Harhna Thu pawh hian Pathian thua harhna lam hawi mah se, hnam ziarang leh rilru puthmang chu a pho chhuak tha hle a ni.

Liangkhaia hian kum 1911 vel atangin lehkha a ziak tan a. Kristian Tlangau, December,1911 chhuaka a thuziak kha vantlang hriata a lehkha ziak theh darh hmasak ber niin a lang. Mizo leh Vai Chanchinbu leh Kristian Tlangau-ah ringawt pawh a thuziak hi a chuang hnem hle. Lehkhabu a ziak zinga mi hriat hlawh ber mai chu MIZO CHANCHIN Part I&II hi a ni awm e. Kum 1926-a a ziak, kum 1938-a a bua chhut chhuah, Mizo hnam chanchin chiang tawk taka ziakna lehkhabu tha tak a ni. Mizo History a ziak rual hian Mizo hla hlui tam tak a khawn khawm a. Chu’ng hla hluite chu eng’emaw zat a lehkhabua thil bul chhut nan a hmang thin a ni.

Liangkhaia hian a hranpa ngatin Mizo hla hlui a thiante nena an fawmkhawm ZORAM KAN LO LUH HMA PAWI RAMA KAN LA AWM LAI LEH ZORAM LUH TIRH VELA CHHUAK |ANTE tiin lehkhabu thelep, phek 38-a chhah chu kum 1925 vel khan chhuah a ni a. He buthelepah hian Chai hla chi hrang hrang, Hlado, Zai leh hla hrang hrang a chuang a. Hla mal, hla chang 226 lai a chuang a ni. Kohhran thikthu chhiat lai a ni a, Pastor tan chuti ang hla han chhut chu a remchan loh avangin a hming erawh chu ziah lan a ni lo va. Mizo Chanchin bua hla chuang leh he hla bu ami hi a in an deuh vek avang leh hetiang hlate a lakkhawm thu sawi thei an awm a vangin Liangkhaia sulhnu chu a nih ngei a rinawm.

Mizo pi pute’n tawngkaa an inhlan chhawn thu leh hla chi hrang hrang ziaka lo vawng tha hmasatu niin Mizo thuhlaril tihhausak leh thil hlui vawn that kawngah pawh hmahruaitu a nih avangin thil a zir nasa hle a. Mizo pa thil chhut dan Arsi Chanchin a ziak atang hian a langchiang hle a ni. Chubakah mite khawhawi tizau thei tur lehkhabu chi hrang hrang a letling a, amahin a ziak bawk a. A lehkhabu ziak leh lehlin hi 30 vel a tling a, thuziak kawngah chuan hma a lo la zau hle a ni.

Kum 1947 khan Kohhranho Inkhawmpui chuan lehkhabu ziak leh lehlin hna thawk turin a ruat a. Baibul lehlin hna a thawk nghal a. Kum hnih chhungin Baibul a mi- Joba, Thuhriltu, Hla Thlankhawm, Jeremia |ah hla, Daniala, Ezekiela, Zakaria, Zephania, Hagaia, Habakuka, Malakia, a vaiin bu 12 a letling chhuak hman a ni. Heng a Baibul lehlin atang pawh hian thu leh hla thiam leh tui kawp a nih zia a lang chiang viau mai a. Mizo tawng a thiam tha tawk ani tih chu thil engkim Mizo tawnga a dah theih dan hian a lanchiantir hle a ni.

Thuziak, Hla phuah, Lehkhabu lehlin, lehkhabu ziak, Hrilhfiahna buatsaih, Rimawi leh a kaihhnawih lama a inhmanna bakah, Sap tawngin thu(article) a ziak nual a. Chubakah, fim taka thlirna thuziak a nei nual bawk. Hla thu tih te, Mizo hla tih leh Thuhlaril bik khawih thil a ziak atang hian midangte kutchhuak pawh a lo zir nasat dan a lang bawk. Hetianga thil chi hrang hrang- Pathian thu (Theology), Hnam chanchin (History), Hnamzia (Culture), Arsi chanchin (Astronomy), Thiamna thil(Education), Rimawi(Music/Solfa), Berampu leh thuhriltu (Pastor), Ziakmi (Writer) leh thuhlaril lama a kutchhuakte hi hlutsakin Mizo Academy of Letters chuan kum 1979 khan ACADEMY AWARD a lo hlan a. He chawimawina hlu tak hi Mizo zinga dawng hmasa ber a ni.

AWITHANGPA(1885-1965):
Awithangpa hi a hming tak chu Hmarlutvunga a ni a, Ralte Lelhchhun hnam a ni. Kum 1885-ah Kanghmun khuaah a lo piang a, kum 1903-ah Maubuang khuaah an kai a. Kawnpui khuaah kum 1965, April ni 11-ah a thi ta a ni. .

Awithangpa hi a tlangval chhuah hlimhlawta hla phuah ching tan a ni a; a nu pawh hi hla phuah thiam tak a ni a; an inchhun nufa hle a ni. Awithangpa chanchin ziaktu R.Vanlawma chuan a chungchang a sawi dan chuan “Awithang pa hi hla phuah thiam a ni ringawt lo va, Mizo tawng hi a thiamin, a han ti ti chang te hian Mizo tawng ni ve ngei si, a hriat pawh kan lo hriat tawh sa ni ngei, a hman khawm dan kan thiam ve loh emaw hi a hmang fo thin,” a ti a ni.

Awithangpa hla phuah zat chiah hi ziaka vawnthat vek anih loh avangin hriat a har hle a. Thluk nei hla 300 chuang leh Chhamhla tlem azawng a phuah ngeia hriat a ni. Hla a han phuah hian tawngkam thar tih tur ni teh chiam si lo a hmang thiam em em a. Chohar di han tih te leh Ram loh han tih ang chi hi a ni. A thu hman khawm tharte pawh tunah chuan mi tam takin kan hmang tawh a. A hla phuah reng reng hi a kal zat mai a. Sap tawnga a flow kan tih ang hi rualrem takin a hmang thiam tlat a ni. Chuvangin, a hla phuah leh a thluk hi a inchawih mawi em em a. Awithangpa hla phuah hmasak ber chu-
“|uahpui lo Par thlangah vaipuan sen iangin,
Chengrang phirin chhai ka nuam e,
Chungah kulva lo fu rawh,”
tih hi a ni a. Hetih hun laia hla lar leh an sak zin ber Chhimthlang Zai thluka a phuah a ni.

Awithangpa hla hi a tlangpuia kan thlirin hla phuah thiam a nitih a lanna pakhat chu, a hun lai hi lehkha ziak la thiam loh lai a ni a. A hla Mizoram mipuiin an hriat theihna pawh hi ziak awm hauh lo va mi rilrua a cham ang ang kha an kalna apiangah a darh ta a ni mai a. Ziak awm lo va darh theih a nih avangin mi pawhin tha an ti a ni tih a lang thei a. Chu lo rengah hriat a nuam em em a nih loh chuan ziak awm lo hian a darh theih a rinawm loh. Hriat nuam taka a lo phuah thei hi hla phuah thiam a ni tih a lanna a ni.

Midang hming hmerhin Awithangpa hian hla a phuah tam hle a. Thanseii phuahna te, Chawngthangpuii phuahna te, Chhingpuii phuahna te, Chhungi phuahna te, Lalliannguri phuahna te, Saingeni phuahna te, Zairemthangi phuahna te, Biakthanthuami phuahna te, Zadaii phuahna te, Rotuahi phuahna te, Lalpawngi phuahna te, Thangkungi phuahna te, Darrohnuni phuahna te, Pu Menga leh a nupui Darziki tana a phuahna te, Chali a phuahna te, Liansawii leh a u Zairema a phuahna te, Lalchani a phuahna te, Hrangliana a phuahna te, leh mimal tam tak a phuahna hlate hi a tam hle a. Chu mai bakah khuarel thil chi hrang hrang a phuahna te, Sunna hla te, Pathian Chawimawina hla te, Lawmthu sawina hla te leh Infuihna hla a phuah te hi a tam em em bawk a ni.

A hla phuah hi miin tha an ti a. Hun rei tak hnuah ziaka awm hauh lo, a hla te ziaka vawnthat tuma hmalak a nih laia mi rilruah a hla tam tak alo la cham reng leh heti zat ziaka vawnthat tur a lo la awm hi a mak hle a. Hei hi Awithangpa ropuina pakhat a ni. A hla thu ah hian mi la hman ngai loh a hmang tamin, Mizo tawng a tihausa a, Diriallova nena an inphuah tawnna ang chi lovah chuan dam thlap vek a ni a; hla thu hman a thiam vang leh thian a ngah avangin Diriallova pawh hian a ngam lo ni berin a lang.

Chawp leh chilha hla phuah zung zung thei mi a ni a. A hla phuahte hi ngaihtuah hmasa lo va a phuah zung zung a ni tlangpui. A hla phuah zinga panga(5) chauh lo tarlang ila:

A nupui a hel laia a hla phuah:
“Sawi tam leh tlangrel i dawn em ni
dawn kher hlei suh,
Khiangawi ang che Nunnemte,
kan run chhungah,
I chawi ang tuai duh Lalsangluaia,”

Maubuang khua atanga pem tura an sawm tuma a chhanna hla:
“Tu lallai zu mah a thlum bil lo,
Hmawng ang ka pem lo nang e Lalawithangpa,
Belh lai Laldanga ka then thei lo”.

Chhimtir no vak vai a phuahna:
“I nu khawnge i pa khawnge maw an awm le?
Lalawithangpa rairah riang keimah iang a,
Lam lai ah ar ang i lo vaih chu.”

Kum 1959-a MZP in Jeep-a Aizawla an phurh chhoha a phuah:
“MZP châng rel a sual ngai lo,
Khawmual lawngleng motor runah Awithangpa,
Senmei laitha-in mi hruai vung vung”

A tár hun tur a ngaihtuahnaa a hla phuah:
“Kan lenlai nghil nghiala di kan chhai,
Haiang tar leh sakhmel chul tur Awithangpa’n,
Ka dawn khawl lung reng a awi thei lo.”

Similar Posts:

Recent Posts:

10 Responses to “Mizo thuhlaril hmasawn dan – Part 2”

  1. 1
    Zephenath Says:

    Va reh ve……chhiar phawt teh ang!

    [Report abuse]

  2. 2
    covenanter Says:

    A tha hle mai a, hei hi thutha tak a ni. MZP hi pawl zahawm tak a lo ni tawh thin a, tunah erawh chuan political a involve tan mek in an sawi. An hmalakna erawh kan mamawh khawp mai. MZP changrel sual ngailo a din leh theih nan tan ila ang u hmiang (Y)

    [Report abuse]

  3. 3
    rowland vanlalawia Says:

    A chhiar chhung arei a. Read more>> III B.A MIZO BU.

    [Report abuse]

  4. 4
    Silver Oak Says:

    Good morning vek ule. he post chu atha dawn tlat hman deuh hunah kalo chhiar vat ang.

    [Report abuse]

  5. 5
    CFL Says:

    Post tha tawpthang a ni e.
    Misual.com a awm nuam ka tihchhan tlem ka’n sawi lawk teh ang:-
    Tunlai hian facebook a lar mek zel a. FB lama thu tawite te ka han post ve te hian ‘a sei lutuk’ titu hi an kuh tul zel mai a. Tunlai ka thangtharpui te hian lehkhachhiar hi kan peih ta lo lutuk emni chu aw ka ti thin. Misual.commers te hi chu lehkhachhiar peih tak kan lo ni hlawm a, a sei rawn ti ho pawh hian ‘ nakinah ka chhiar chhunzawm leh ang’ kan ti te hi a va ngaihnawm thin em. Keini awmhmuna thu leh hlaa lo tui ve tlut tan chuan he post pawh hi kan lem leh ta duak duak mai e.
    (I) (Y) (I)

    [Report abuse]

  6. 6
    H.Vangchhia Says:

    A tha hle mai (Y)

    Liangkhaia cc a “laiah hming” tih khi ka tawngkam hriat vawikhatna a ni. A nalh dangdai riau, mahse a thumal (word) hi a intih smart thlak ka ti riau (A chhe zawng ni lemlo vin :P )

    Awithangpa te thlalak kan thawh ve ang e.

    http://i53.tinypic.com/ipxhkg.jpg

    [Report abuse]

  7. 7
    lushai_er Says:

    I source hi i tarlang lova….Part-1 ah khan i source i tarlang turah ka lo ngai deu va :-O

    I source a zirin comment dan ka lo thlir e.

    [Report abuse]

  8. 8
    Tluanga Chawngthu Says:

    #7 Tlema a thui tham deuh avangin, ka lehkhabu rawnte chu a tawpah tarlan chauh ka lo tum zawk a.

    [Report abuse]

  9. 9
    H.Vangchhia Says:

    #8 tarlang zel rawh khai :-)

    [Report abuse]

  10. 10
    Ignatia (33-115 AD) Says:

    Tha hle mai. MZU lamah mark score duh chuan Rev Liangkhaia fak chiam tur an tih thin kha.

    Tak takin tun hma khan kohhran leh sakhaw puithiamte khan kan thu leh hla awmze nei taka a than theih nan an pawimawh tawpkhawk a ni ka ti thin. Tun hnu hian hman ang khan thil a kal ta lem lo va; mahse ZAH chu an la phu ve khawp mai.

    Pu Hv, laiah hming tihte chu a lar e…. :-) Piantirha hming phuah mahse hming dang pu leh ta daih kha an awm zeuh zeuh alawm.

    [Report abuse]

Leave a Reply

You must be logged in to post a comment.