That silver ring

September 30th, 2011 11:35 pm by LaMea CâcTùs FLh

Ber thla boruak nuam tak chuan ka lunglen a kaitho a. Zirna tul avanga kum 2 lai India khawpui lian Kolkatta a thangbo tur leh vawin ni a kal tur ka nih avang chuan tukthuan ka ei sawk sawk a. Ka U pasal min thlah tu tur nen chuan chhungte kan mangtha zawhah Lengpui Airport lam chuan kan chhuak ta a.

Fur ruahtui ten kiam lam an pan avang chuan khua a ti thiangin lunglen a kaitho a, hmun danga kal bo tur ka nih vang nge chhan hriatloh khawharna leh thlaphan rukna riau ka nei a, hmun dangah kum tam awmbo tawh mah ila mahni inlum a rei vaklo haw hi chuan kal leh hi a hreawm a,tiang hi chuan ka awm fo reng ani. Motor tui te kan thun zawh hnu chuan muangchangin titi luam chungin kan inkhalh thla a, Rangvamual kan pel thlain total prohibition in a prohibit ve loh tih hriat tak tak kan hmu thla nual a.

A khua kan pelh fel hnu lawk chuan kawngthlang lampang a mipui lo pungkhawm leh police thenkhat awm chuan ka thlunglu lian tak chu a kuai her a, hawkdak vang leh kan hmanhmawh vakloh avang chuan kan makpa bulah chuan en ve hrim hrim a that thu leh kan hmelhriat te alo nih takin chawlh pahin i ding zawk ang nui chunga ka tih chu a pawm avangin kawngsira motor kan side that hnu chuan kawngthlang lam ruang an zalhna lam chu ka pan thla a. Pa pakhat lo ding a hmel leh a hnar sawrbawk  dan atanga tuisik chauh a inlo tih hriat tak bulah chuan chanchin kan zawt a, ani chuan hmeichhe pakhat ruang an chhar thu leh Aizawl nula anih a rin thu te, an venga ruang an chhar fo chu a zialo a tih thu leh, an veng tan a mualpho thlak thu te a sawi zui duah a.

Mipui pungkhawm karah chuan chu ruang riang tak hmuh chian tuma ka kal hnaih chuan chu ruang khuhna puan kara a kut dinglam lo langa silver zungbun dangdai tak chuan ka mit ala a, vawileh khatah ka thinglung chu tlir a awmin a phu dut dut a, ka hma ah ka nunhlui theilhnghilh theihloh thin te chu a rawn phe chuai chuai a, ring phallo chunga mipui zi nuai nuai karah ruang khuhna puan chu keuin chu mihring ruang chu ka han en chuan, ani theilo!

Ka hma a lainat taka ruang zal chuan ka thinlung a chhu sawm a, ka biang a mittui rawn luang chu dan sen ani silo, mualpho hlau in ka kalsawn a. Motor ah lutin ka U bulah chuan a rang lama tlan turin ka ti a, ani chuan Hmel danglamna tlangah kal lemlo mah ila, ka hmel danglam chu hrethiam in enge ti a min zawhna chu chhan zai pawh ka rello!! Kan tlan ta, ka thinlung a hnimin a na a, ka nunhlui min ngaihtirin ka bag ah lai chhungril penga rawmawl var chul tawh taka ka fun SILVER zungbun, nichin lawka ka hmuh ruang kut dinglam a inthiat ang chiah chu humin, ka bianga mittui luang pawh hruk zai rello in ka ngaihtuahna khawvel ah ka cheng ta a.

Rilru ah hmanlai nun alo alang a, kei high school exam zo thawven lai ani in thiante zuiin Khatla ah kan leng a. Ka thiante nula rim karah ngawi renga thut reng chu ningin chhuanlam siamin dawrah thil leiin ka chhuak a. Meizial zuk paha kan lenna in panna stepa ka thut lai chuan ka hma step thim laia hmeichhe pakhat lo thu kun ngaih chuan ka mit a la,rei fe ka thlek hnu chuan ka zu en a, a bula zu thut thlak pah chuan harsatna enge a neih tih te ka zawt a. Min chhang mai lo, mahse chutia a hawn hawi chhuah chuan ka bula hmeichhia harsatna in a tlakbuak tih hriat taka a bianga mittui luang chu a hmel a chhe hauh lo tih chu zan thla eng chau tak karah pawh chuan ka hre thei nghal a. A thawmhnaw inbel chu chhelo mahse a chul rap tawh a, a pianzia leh vun ngo dan atang pawh chuan thlahtu nei tha tak, amaherawh chu harsatna avanga a tunhma nun pha ta lo a ang in ka hria a. Ka biakna te chu tha deuhin a chhang a, mahse a biang no taka mittui a luan chhan erawh min hrilh lo.

Rei tak kan thut dun hnu chuan a rawn pangngai chho ta deuh a, kan titi ta luam a. Amah chu pawl 10 zirlai ve tho a niin, exam erawh a pe zo lo a. Kei aiin a kum 1 in a nau zawk a, mahse a tawngkam inchheh fel dan atang chuan nula pangngai tak ani tih erawh a hriat hle a. An in pawh kan lenna piah lawk a RCC in lian vaklo chul tawh tak ania,kan inmangtha hnu chuan ka thiante zu finin,kan lenna nula chu ka zawt a.Amah chu Lalrindiki aniin,anu in a a thih san tawh alo ani a,a pa chu JE aniin zu heh tak hmanni lawka eiruk thubuai avanga chhui mek aniin,an fa neihchhun niin,nuhrawn pawh a hrawn nual tawh ani awm e,kan lenna sawi dan chuan nula fel tak leh lerlo,puitling tak ani awm e.Chumi zan ka haw chu,ka nula tawn baihvai tak chungchang chuan ka rilru ala peng a,a hmelthatna chuan ka thinlung a fan a,a tawngkam felfai leh harsat ti taka anui hmel chuan min hneh a,ka vei zui ta hle a.Ka thiante lenna Khatla ah pawh chuan ka zui zing ta hle in,ka mit erawh chuan zawn a nei a,a zawna zawng ta chu kan inhmu ta fo in kan inbe ta zeuh zeuh a,a pa awmloh emaw a chahthlak lai anih chuan ka leng ta zeuh zeuh in,patling rilru neilo chhungte tana buaina ral lian chattla hnar bawrh bawrh chu ka tan malsawmna ani fo erawh chuan,malsawmna kan tih hi ain an loh theih zia min hriat chhuah tir fo thin.

Tichuan hun te a ralin kum khat lai a khat tawka kan in kawm chhoh zeuh zeuh hnu chuan, min haw biklo tih chu ka hailo a, ka la hai lo September ni 11,chawlhni tlai chu dan pangngai a, a pa 4 thirsty rawn haw tlai ni tih hre chungin lungmuang takin ka leng a. Chumi ni chu ani ka huaisenna sawng khawma ka hmangaih biahthu ka hlanni chuh..Sakhmelah kei tlangval patawi, dangawk, mawng leh lunglen bak chhuan tur neilo hian ka phulo,mahse ka hmangaih na hi chuan a phu in ka hria a,tawn mang ah pawh ka man ngamloh ka biahthu chu  he ka vantirhkoh hian min chhang a,ka hlimna khan van a tawng hialin ka hria.. Hun te a liamin,kum te a rala, ani chuan pawl 10 a pass a, kumkhat computer a zir hnu in khawi office ah emaw MR in a thawk ta a. Kei chuan ka zirna ti tluangin Guwahati lamah kum 5 ngawt thiamthil zir tura ka liam a tul ta si. Heta tang hian ani, kan inkar a buaia, ka tana tha tura ngai a zirna run bela kum tam ka liambo tur chu ka hmangaih ka channa chhan pakhat leh vawiin ni thlenga ka thinlung rum chhan ani si.

Hming bula Dr tih dah tura ka di ka liamsan leh ka hlauh phah kha ka Degree hian a phu em tiin ka inzawt fo thin. Zawlkhawpui ah zawng awm ila, thil te hi a danglam phah te hian ka ring thin. Mahse kei rawlthar naupang tak khan engmah ka ti thei dawn chuanglo tih ka chhungril hian a hre si. Kan inkar thu pawh a pa in a hria a, mi huat thu leh huat loh pawh a sawi chuanglo a, mahse hetih lai vel hian a pa chu hrisel lohna in a tlakbuak chho a. Office-a a Pu, a pa thian pa officer tlangval senior zu heh tak, nupui neilo, nghei lemlo hian a rawn hel fo bawk a. Chung boruak vel avang chuan kan inkar ah buaina a in mun chho dawn ani tih kan hria a. Lung a zing lawk a, kei lah ka kal tep tawh si. Mahse ka kal hma tal chuan hlim taka hun hman dun erawh kan tum in kan inkar hmangaihna chu engpawh thleng se chhuchat lo turin nula tlangval inngaizawng dang ang te tho in tiamthu kan in hlan nasa mawlh mawlh hle a. Beiseina leh hmangaihna lantir nan tiin silver zungbun te kan siam tira. Chu zungbun chu dangdai takin a tlang heka siam tirin H tih kan chhut tir bawk a. A tlang hek chuan kan thinlung hi kan inhmangaihna avanga lak hekin a awm tih entir se, H hian Hope tih, kan inkarah emaw thil dangah emaw harsatna thleng mahse beiseina neih zel tur tih entir se tiin lungsi takin kan siamtir a.

Ka kal hma kar, tlai khat chu AR cinema hall a KUCH KUCH HOTA HAI tih kan enzo chu muangchanga in thlahlel taka leng chung in kan Silver zungbun siam tir chu kan lam haw a. Chu zungbun kan duhtaka kan siam chu inbuntirin, kan thinlung lawmna leh hmangaihna a khat chu inhmuhpui lo mah ila kan inhriatpui si.

A mak hi ka tia, tun hnua ka ngaihtuah let hian koh duat nana ‘ka nau’ ka tih ka hmangaih Didiki kha ka tlukloh zia ka hrechhuak leh thin. A nun khawhar mangan leh harsatna in a hual vel chung khan, a innghahna leh hmangaih ni mah ila, a harsatna leh buaina te kha a mai mai in a sawi ngai lo in, a hmel ah a lanchhuahtir ngai heklo. A chanchin min hrilh ni te kha, a lungchhe thup tum leh a bianga mittui luang tur dan a tum a, a in sehruh hmel te khan ka tan chuan tawrh a harin ka khawngaih a, chu khawngaihna chuan ka duhna a ti zualin ka hmangaihna a ti nghet tawlh tawlh si. A nu hi khawchhak lama Sailo Lal pakhat kal zel khawlai fa ani in, a nu in tleirawl a nih laiin a boralsan a, a nutei te bulah Aizawl ah awm zuiin chuta tanga a pasal (Didiki pa) nena intawng chu anni a. A pa hi Aizawl a Babu hmasa Pu Kawla tupa niin khawsak lamah an harsa lemlo a, mahse unau tlem chhung an nih avangin chhungkhat erawh an ngah loin, an baihvai ru hle a. Mahse an khawsak harsatlohna chuan,Sum ngaina te Khawpui Aizawl angah chuan thenrual an phang lem lo…A pa, Pu Rinawma hi pa lian hang lampang niin,a hmaifang erawh a chhe lemlo, Shillong a Diploma in Engineering zir zoin P&E dept ah JE hna a thawk a. Hetih hunlai vel hian ani, Didiki nu nena an intawn tak ni. Chutichuan Nupa inkawp fu tak anni in an hlim hle a, fanu an neih tak hnu phei chuan an khawvel a kimin tu dang an ngailo hle a.

Mahse mihring tung chho a kal tan chuan hlim reng hi a harin harsatna a tawh loh theih loh a,harsatna kan tawh a kan hmachhawn dan erawh a in anglo a, hetiang hunah hian ani Pathian a innghat mi leh milo a hriat thin ni. Pu Rinawma pawh pa nun tluang ni mahse Biakin bel mi ani lemlo. Khatia harsatna an tawh a, a nupui duatlai Pi Dingpuii misual kuta a boral a, an fanu kum sawm mi Didiki thichhawnga an kalsan khan a rilru ana in a tuar thiamlo hle a. A zinbo laia an in lo rawka a nupui thata a fanu sawisa tur kha chuan an mahni hrechiang tu nih a ngai tih hria in rinhlelh a nei a. Mahse Police lam chetmuan vang nge a mi rinhlelh kha Poice lam hotu hnaivai anih vang,an case pawh chhui mumallo in an titawp ta ngawt a. Tu mihring tan pawh tawrh a har dawn nen, Fapa mal leh duat rawn, harsatna hmachhawn ngailo Pu Rinawma tan zawng tawrh a harin, khawvela mi rilru hliamte tihsual fo thin zulzuiin Zu ah a tlan a. A tira no khat bak in ngailo kha no 2-3 ah kai chho in, ka rui buai ve ngailo,ka ruih pawn ka sawi ka hre vek ti fo thin kha, buaina chawk chhuaktu ani ta fo in khawlai leh luikawr ah a rui chat thla hmuh ani ta fo a. A hma a pa che fel leh taima tak tih thin kha pa thatchhe tak, a thing rim nam reng tih alo hlawh chho ta. A hna ah a kal peihloh in, a fanu a hmangaih a khawvel ni thin pawh kha a ngaihsaklo in a tuar tur a dawnpui ngailo. Rui chunga a hna thawk thin ta chu Sum pai ah a hmingchhe chhoin, fim taka midang in an tih a, thawhlawm an thawh hnem phah thin kha ani rui phual chung a ti ta chu, eirukna vanga suspend aniin, a rilru hah rui chuan a fanu kuthmawr pawha a tawh phalloh chu chumi zan chuan chhan awm manglo ah kut a thlak phah a. Khami zan kha a ni, stepa a thu ka hmuh chu ni. A pa chu awm ho in nuthlawi engemaw zah hruai haw fo in, an inchhung a nu leh pa te nena hlim taka an nuihna thin kha tah leh rumna run ah chang mahse ka bulah a sawi mai mai ngai lo a. Ka bula a awm chuan a nui hmel bak hmuh tur ka nei silo. Hei hi ka laka a tah leh rumna tihlan a duhloh vang ni bawk mahse ka bulah thlamuanna leh hlimna a hmuh vang a nih bawka, chu chuan mi tihlimin keimaha hmangaihna awm chu a tizual a, a innghahna nih a a nuna hlimna thlen chu ka tum ber ani si.

Ka kawi thui ta lua e, hun tam liam tawh mahse ka luangliam aniange ka sawi leh ta duah thin. Khatia tumah ngailo a hlimte a kan len lai khan, hun leh nite alo ralin ka kal alo hun ta reng mai si, ka sawi tak ang khan a chhungte han ti mai ila, a pa kha chuanin kan inkar hi chu a hria a,min duhleh duhloh erawh ka chungchang hi chu a sawi ngai lemlo. Kum tam liambo tur ka nih avang chuan hreawm ka tiin ni khat lek pawh inhmulo a awm theilo kha kawlvalenchham a zirna run bela rei kan thangbo tur chu tawrh thiam a har ani. Ka nau-i pawh chuan ka kalbo tur chu hreawm a tiin a khawvel chu ka tello a hmachhawn a huphurh tih ka hria a. Mahse a hmelah leh a chezia ah erawh a tilang hauhlo. Thup tum engang mahse kei a chezia, mizia leh nunphung hrechiangtu chuan ka hai hauh silo. Hmasawnna tur leh ka chhungte leh amah ngei pawh a nawm ve theih zawk nana kamdinna kawng anih beisei vanga ka zirnna hi chhunzawm tum ni mah ila a har ka ti a,kan inhmangaihna in par a chhuan lai leh amah ka nau-i pa bawrhsawm tan lai anih avang te chuan kal bosan ka hreh phah a. A ni reng a, thlahtu atanga khawsak harsa lo nimahse, chhung hnaivai a pu nau fate Aizawla tlem awmte tih bak chu laina hnai an neilo a. Chuvang chu ania khatia a pa, buhtawih ngainat luat avanga a bawrhsawm pawh khan ka buaipui nasa in tlangrel pawh dawnlo in ka theihtawp ka chhuah a. Ka nau-i damdawiina a riah pawn a chaw turte nen lam ka kensak thin ni. Ka hmun dang awm tur rilru hahnak alaiin a pa thianpa, MR a ama office a thuntu, OFFICER lalawma an tih mai Pu Kima lah chuan a rawn vir sek mai a. Ani hi officer te alo ni bakah a thian hlui ami men apa hian a be tha riau a, an damloh te pawn Ka nau-i chu office chawlh te rei tak chhung a pe a. An chhungte lawm mahse kei mipa erawh chuan ka buaina rallian ala ni dawn tih ka hriat avangin ka rilru pawh a kap reng hle ani. Aw ka kal dawnni te kha! Sumo stand ah kut inhum sak chungin rilru khawhar takin kan inkawm a,kan hma hun ah enge thleng dawn tih hre miah loin kan titi a, a mitmeng mawi taka mi en paha sawi sapa ‘U Francis, he zungbun hi ka nunah engpawh thleng se ka vawng tha zel anga,inhmu tawh dawnlo mah ila ka khawvel zinkawng ah harsatna ka tawh hunah  pawh BEISEINA leh HUAISENNA ENTIR nan ka kawl tha zel ang ‘tia a bianga mittui luang chunga a sawi lai te khan,ka khawngaih leh hmangaihna chu a zualin,ngawi reng a thusawi ngaihthlak tih chauhlo chu tihtheih kan nei silo..a chheber pawh thleng se tiin rinawmna thukan tiam anawn leh hnu chuan ka tlanliam san ta a.

Ka awmna lah chu a falin lung a leng duh hle a, chuta karah ragging vanga senior te kuttawrh leh rilru hreawm chuan di ngaih ati zual em em a. Tunlai angin mobile te hi a sakechek nazawngin an la neilo bawk nen, ka la nei silo a, an in landline an disconnect sak tawh bawk nen inbiak a har em em a. Vawi hnih thum chu PCO atangin kan hostel phone ah mi rawn phone a, chu lah chuan nghawng a neiin, 1st year ina phone call ka dawng chu zan khua khua in min ben phahin min hauh phah zui nen, kan inbe khat ta hle a. Kan hostel phone a chhiat zui hnu phei mi rawn be thei tawhlo in kei phei chuan biak ngaihna ka hle hlawl lo. lehkhathawn te chu ka han thawn ve in, a chhanna erawh ka hmu thei bawk silo, a chheber te dawnin ka mang hi a ang thei em em a.

Thla thum hnu vel aniang, tum khat chu a lehkha thawn ka dawng ta nawlh mai a. Chu kutziak ka hmuh a ka hlimna chu a chhunga thu inziak chuan ka hlimna erawh a khuh chiang hle. A chhungah chuan mi ngaih thu te, amah pawh a that thu leh a pa pawh a zia thu te a rawn ziak a. Mahse Pu Kiman a rawn rim ngawh zia te, a chhungte pawna an duhpuithu leh an nawr dan te a rawn ziah chuan ka lung a ti zingin ka thinlung chu feia chhun angin a ti na a. Ka la naupang em mai ti a chhuanlam a siam te chu a pa chuan a ngai pawimawh lo in, a pa damloh chungchanga Pu Kiman a sum leh pai, motor thleng a thawh te khan a chhungte a hmin hle ani tih a rawn ziah te chu ka tan chhiar a nuamlo in lunglen hnem a hnekin rilru a ti mangang hle ani.

Ka lehkhathawn dawn hnu atang khan ka ngaihtuahna a fim thei tawhlo in, ka rilru a hahin a na hle a. Ka nun a nguiin zan ka mu tha theilo a. Class kan kal hah bawk nen ka taksa te pawn a tuarin ka cher phah hle a. A hnu thla hnih hnu vel chuan mi sawi atangin Pu Kima nena inneih an tum thu ka hriat phei chuan ka awp rawpin lei val hi ka rum a. Ka biangah mittui a luang a. Ka hriat hnu ni 4 na ah chuan a lehkhathawn ka dawng nawlh mai a. Chu lehkha ah chuan min hmangaihzia te, a duhlo chunga pasal neih luihtir ani tur chu hreawm a tih thu leh a nun hi a hlim ngailoh tur te a rawn ziak a. Chu lehkha a,“Ka U,i tawrh dan leh hreawm i tihtur zia pawh ka hriatpui che a, tihtheih ka nei silo. Mahse ka hmangaihna hi min hriatpui la i rilru hah avangin kawng thalo i zawhlo hram ang tih min tiam rawh.I zirna kha he i rilru na hian ti bahlah lo se,i zirna tha takin zo la mi ngaihsan mi fel nih tum la, chu hunah chuan hei hi ka hmangaih Francis Lalhmangaiha kha ani tiin ka chhuangin ka thinlung ngui leh chau hi a rawn hlim ve ang a, a zungbun min pek pawh kha ka kut zungtang 10 hi an tan anih loh chuan ka bun anga, ka hmangaih zia che lantir na nise, kan nunah hreawm leh rumna rawn thleng mahse BEISEINA leh HUAISENNA min petu lo ni bawk rawh se” ti a, a rawn ziak chuan ka mittui a ko a,ka thinlung a tina in amah ka ngaihsanna a ti zualin ka tluklohzia min hriatchhuahtir bawk ani.

A pasal neihni Oct 25 te kha aw! Mahni in room ah val hi ka rum nilengin ka zungbun duhtaka kan siamtir chu nikum ka birthday a min pek rawmawl var nen chuan ka tahpui nileng a. Rilru nain hun ka hmang liam nitin a, a dam a dam ta chu hun te a liam zelin lunglen hnemtu chu hun ani an tih chu ka tan pawh dikna chen a awm a. Mahse ni khat pawh a hmel mittla lo hian ka hmang liamlo in, amah avang a ka na leh ka rumna erawh a zia ta deuh deuh a, mahse ka thinlung hliam chuan ngaihzawng va neih leh chakna a tibo in hmangaihna phei hi chuan ka thinlungah hmun a chang tawhlo a. Chu chuan ka zirna ah erawh mi tuitirin ama min chah ang ngeiin hlawhtlinna erawh chan ngei ka tum ani.

Hun te a rallin kum tam a liam ta a, kei pawh 4th year ni tawhin kum 1 hnua ka zirna zo tur ka ni ve tawh a. Tumkhat chu Khatla lampanga mi damlo buaipuiin Mizoram House ah ka kal a. An nu ber chu Didiki a hre mial em tia ka zawh chuan a chhanna chuan kum 3 kal ta a ka rilru natna aia nasa in ka rilru a rawn hliam leh ta tlat mai.Didiki chu a lo hria in an inhlatloh thu te a sawi a, a pasal neih hnu lawk khan a pa kha pumpui cancer avangin a boral a, a pasal Pu Kima lah zu duh mi leh ler tak a niin an innei rei lo a, an inthen hnu chuan nuthlawiin a thawhna office lah an pa hnuai anih avangin chhuanlam hote vangin an ban a. Tichuan dawr te siamin kum 1 hnu vel chuan Sipai pakhat nen an innei a, chu tah a vanduaina thuah hnih turin a pasal chu Kashmir indo naah a thi a, a pasala chhungte lah chuan a ro khawm tir loin a pension lah a pasala nupui hmasa leh an fate 1 khawm tir turin court ah an hneh a, compensation cheng 20000 vel bak chu an chan tir lo ani awm e. Tichuan Aizawl veng hmawr lampang ah amah a awmin thil commission in a kal kual thin a, Silchar velah te pawh bungraw lain a kal thin ani awm e.

Mihring hi nun a tleu laklawh chuan thawh leh a har thin ani!!! Tichuan ka nau tia ka koh thin kha nuthlawi hmeltha leh huaisen ti a hriat lo ni chho in, ani ang hmeichhe mal tan chuan eizawnna a lo har a phalloh thil te pawh rawn zuar chho ta zeuh zeuh in,thla hmasa mai pawh khan a awmna veng atangin an hnawtchhuak ani awm e. Chu thil ka hriat chuan ka rilru a tina hle a tihngaihna a awm silo. Tichuan hun a liam a keipawh chu ka zirna zoin Aizawl lamah ka haw chho a, hna te kan thawk a,mahse Ka nau-i chanchin erawh ka bengkhawn ru reng a. TV a zu zuar, ruang chhar an puan te hian a ruka thinphu chungin ka ngaihven ru thin. Tlangval ve ta chu lunglen hnemah ngaihzawng te pawh kan nei veleh a,ka thinlung erawh ka ngaihzawng duhloh vang nilo in ala phir ani !

Tichuan hun a liam a, ka hmalam thlir chungin zirna chhunzawm ka tum a, kal ka ta ani a. Mahse tukin zing a ka thil hmuh khan ka nunna hi a pawt chau a, kha hmeichhe awm tha duhlo an tih ruang leh a kuta zungbun inthiat khan ka nunhlui theihnghilh tum a kaitho thar leh a, ka hmuh sakruang kha chu ka hmangaih ka nau-i kha ala niin, a hmelah a tleirawl hmel bo tawh mahse, a sam sei ngil vaklo a hmawr kawi te, ka lawm thin a khabe veilam a khuavang chhinchhiah awm te khan ka lunglen a kaitho a. Mahse kan hmuh miruang, Ka nau ti a ka koh duat thin kha, a nun a harsatna tawh erawh a tun kan hriatpui silo. Engang manganna nge a tawh ang tih chu hriatfiah phaklo aniin, kum 4 liamta ina kan pahnih nuna a thil thlen erawh a inpersan hle si. Kum 4 kal ta kanthil tawh a inanglo in, kei chuan min thlahna lehkha a min duh angin ka zirna ka zo a, ani ah erawh mittui nena fanau maltluan chawi tura ka duhsakna hlan te kha a thlawn tih a lang si. Tinge maw khawvel ah hian humsual dai palh leh vanduai laklawh te tan dinchhuah a har thinni tiin ka hmangaih ka nau-i, Lalrindiki nun ngil rilru paukhauh tak kha Rangvamuala a ruang chhar tur khawpa a nun a danglamna lo thleng chu a chhan niawm rinthu a rilru na taka duang chungin Kolkatta lam chuan ka thlawk chhuak ta a,ka thinlung erawh chuan a zungbun ala bun dan atang khan a thutiam ah a ding a, Ka nau-i khan a nun harsatna leh buaina a khat ah khan kal ngaihna hrelo mahse a theih ang tawkin a hmalam pan tumin BEISEINA leh HUAISENNA  nen a bei ve tih ka hre si……..

( A sei ti an tam awm mange..he2)

Similar Posts:

Recent Posts:

22 Responses to “That silver ring”

  1. 1
    Saitawk Says:

    Va sei ve..

    Report this comment

  2. 2
    H.Vangchhia Says:

    Saitawk, lo chhiar rawh. Nakinah hun kanieh hunah ka rawn chhiar ve ang.

    Report this comment

  3. 3
    jellybaby Says:

    thawnthu tawi ngaihnawm tak ani e,ka chhiar chhuak dap mai.Mihring hmeichhia leh mipa inkara inngaihzawnna/induhna hi chhut chian chuan thil mak leh ropui tak niin ka hria.In hmangaih taka in ngaizawng zawng2 erawh an in nei vek kher lo si a…

    Report this comment

  4. 4
    CFL Says:

    A ngaihnawm hle mai.
    Thianpa Dr.Lamea, tha thlah mai lovin a dang pawh han ziak zel teh.

    Report this comment

  5. 5
    superpinqponq Says:

    A sei na in chhiar a inchhirawmlo khawp mai.. LIKE

    Report this comment

  6. 6
    troxx Says:

    ngaihnom hmel …mahse a sei … friday night ah chuan chhiar a har deuh ,… hehe

    Report this comment

  7. 7
    EmEich Says:

    Ziah laia facial expression zawng zawng nen comment.

    Report this comment

  8. 8
    VaiVa Says:

    A va han ngaihnawm reuh ve. Zanlaiah dai ngai loh ram kan fang delh delh mai a lawm. A dang lo nghak leh rih phawt ang aw (Y)

    Report this comment

  9. 9
    lamea25 Says:

    paragraph 15 na a,dr.tetea th khi pu.kima th tr ani e..facebk a group pakhata k post th ania,k thianpa hming k hman k edit a,k lo thlak kimlo ani e…heh..

    Report this comment

  10. 10
    lrpa Says:

    Min chhiar rik sak tur angai ani e..
    Engpawhnise, kan hnam a la naupang deuh a, kan thawnthu nei tam zawkte pawh nula leh tlangval in hmangaihna kar a buaina chanchin lam ani fo! Kan hla te pawh ani tho mai..
    Thu ziak tha tak anih hi a.. (Y) Uluk deuh zawk in ka chhiar tha leh ang..

    Report this comment

  11. 11
    nupuiipa Says:

    Mahni a inchanin ngaihtuahna ati kal thui hle mai…a veng hi kan awmna alo ve nen….. (Y)

    Report this comment

  12. 12
    paeia Says:

    Ka chhiar tui phian chu. Tha ka ti e.

    Report this comment

  13. 13
    swiftymcvay Says:

    ekhai .commers ho chu in va ngaihawm ve mawle. Buai luat tukah tunlai chu ka mi(sual) thei thin lo.

    Dr lamea lo ni lekin, ekhai pu CFLa pawh a lo la awm e. A ngaihnawm ka va ti em dr lame. A dang rawn ti leh zel teh khai

    Report this comment

  14. 14
    Chhuaklinga Says:

    Ngaihnawm khawp mai, tunlai kan zoram boruak nen a inhmeh a, lung a kuai khawp mai. Keipawh silver hi mawi ka ti. (Y)
    ‘Vawin’ tih tawh hnu a ‘ni’ i telh leh kher khi chu midang rawn sawiah ka khek ta mai. :P :D

    Report this comment

  15. 15
    aduhi Says:

    Tinge mawle Pu Kima chu a va dek anglo ve aw… ;-) (C) (B)(B)(F) (8)

    Report this comment

  16. 16
    Professor Lalrihema Says:

    A va han sei em. Ka chhiar ve hman rih lo tlat mai.

    Report this comment

  17. 17
    H.Vangchhia Says:

    (Y)

    Report this comment

  18. 18
    TuaiSialA Says:

    Ngaihnawm bawn tawp.

    Report this comment

  19. 19
    Chheponga Says:

    a tak2 ni nange hehe

    thil tete min tih hriat chhuah tir lom le (H) (Y)

    Report this comment

  20. 20
    hmarveng Says:

    a tha e (Y)

    Report this comment

  21. 21
    lianchhiara Says:

    A ngaihnawm kher mai. ‘Hlauh’ tih aiah ‘hloh’ tih hman tur ni awm tak… adt. sawi tur neuh a awm. A tha e. A sei hran lo.

    Report this comment

  22. 22
    Lamji Says:

    (tap aw tuau in)a changtunu khi engtia thi nge niang le?? ;( :P

    Report this comment