LUCY

September 30th, 2011 3:01 pm by coolsoul09

“Bedroom-a mut ngawr ngawr ai chuan a nuam zawk ange”, ti a Sitting Room-a a mutna atana khum kan dawhsaka mu chung chuan hmanlai chanchin, rambuai laia harsatna an tawh chi hrang hrangte chu a sawi sep sep a.

Pathianni a ni a, nidang ang chu ni se, Hostel atanga ka lo chhuah ve theih lai chu a rei lohzia hre rengin leh a tuk maia lut leh tur ka nih hrereng chuan, am taka hman tumin ka thiante nen Sikul tlang vel hrutin kan kual anga, hlimtaka Maliani nui ri awr awr karah a thenin Keifang khaw lam hawiin lung kan thlawh leh fua fua ngei ang.

Mahse, kan hun tawn azir zel hian mihringte duhthlanna te hi a inthlakdanglam a. Chumi tlai chuan ka nu bula thuta, a titi ngaihthlak baka thlakhlelh dang ka nei chuang lo. Cancer natnain dim lo baksaka a sawp avanga a hmel dang bei mai leh a mitkhur thuk dak tawh mai te chu ka thlir vawng vawng a.

A hmel hlim sarh thin kha hmuh tur a awm tawh lova, hneh ngei tuma theihtawpa a sual Cancer natna chuan a chungah ro a rel mek a ni si.

Chair-a thu chungin ka ke chu tukverh biangah ka hlang a. Ni tla turin Thapuichhip tlang a chhun en no nghulh mai thlir chung chuan ka nu thusawi chu ka ngaithla a. Hostela luh leh chu hreh namen lovin ka hreh a. A thusawi lai chu chawlhsanin, “Valte, lo tawlh hnai deuh teh”, a han ti a.

Tlemin ka thutna chu khum hnaih thei ang ber chuan ka han her hnai a. A kut cher riam mai chuan ka chawn chu a han chul hauh hauh a, “ I va han lian tawh tak e aw. I tetlai chuan ‘ani hi chu a tum a tawi deuh dawn a nih hi’ an ti thin che a. I chawn te hi a tawi tem thin a. Mahse, hei i thang ta zawt zawt sia”, a ngawi vang vang a. Chutah, thil hrechhuak ta thut niawm tak hian, “Ngawiteh, kan inteh lohna a rei tawh em mai. I eng chen nge ka nih i han teh tehreng ang..” tih pah chuan thawhkan tumin a han inherrem a.

Ka thutna atang chuan ka tho thuai a. A hnungah dawmin ka han pawm thova. A han thut hnu chuan muangchangin thawk a han la a. Chutah, a sam te chu a han zut mam leh te te a. Harsa tak chung hian ka ban vuan chungin a han ding a, kan han inteh a. Ka koki thleng vel chiah chiah a ni. “ I eng thleng nge ka nih le?” “ Ka koki thleng chiah chiah i ni”, “Kan inteh hnuhnun ber kha chuan i beng thleng kha ka ni sia”, tih pahin harsa ti tak hian a then sak a.

“Nia” ti ringawtin ka chhang a. Kan inteh hnuhnun ber lai pawh ka lo hre tawh meuh lova. Mahse, khami ni-a kan inteh kha a hring ahrana kan inteh hnuhnun ber a ni ta. Ni chu kawlah a liam tawh a; ral hla taka Kawlkulh khua chu a lang riai riai a. Tukverh kiangah chuan ngawirengin kan ding vang vang a.

A tuk zinga Hostel-a lut leh tura ka kal dawn laia, “I cham ve leh rih mai dawn em maw ni le” a tih zauh avanga cham hrih ka tum, kal tura min nawr leh si dan te kha mitthla-ah a la cham reng mai. Verandah atanga ka kal liam thlenga ding chunga min thlirzui vang vang lai hmel te kha ka mitthla-ah hian a la cham a.

Khami kum, kum 1998 September ni 28 zan, zanlai pelh tawh hnua Hostel atanga min rawn hruaichhuah lai leh ni 30 chawhnu dar 3:05-a min ngai ngawih ngawih chunga min peihlohsan tak thlenga ka rilru hrehawmna leh natna zawng zawng te kha thu maia sawifiah phak a ni lo.

Vawiin ni thleng hian ka nu nen tukverh bula dingin kan la inteh fova..a hring ahranin ka bulah ding tawh ngai lo mah se, min kalsan ngai lova. San zawngah kan inteh tawh ngai lova, hmangaihna ngah lamah te, khawngaihna neih tam lamah te, rinna chak zawngah te, beiseina nung neih tam lamah te kan inteh thin. Kan inteh apiangin ka nu ka phak ngai ta lo.

(Min hmangaih leh min ngai ngawih ngawih chunga mual min liamsantu ka nu Lucy Liandawli thih champha a ni a. Khawngaiha a thlarau tan leh kan chhungkaw tana min tawngtaipui turin ka han sawm che u a ni – James F)

Similar Posts:

Recent Posts:

26 Responses to “LUCY”

  1. 1
    Aryan Says:

    Nia. Kan lo tawngtai pui dawn che nia.

    Report this comment

  2. 2
    mirage_isme Says:

    “Hetah ka taksa ral mah se…
    Vanin nuam ah ka thlarau in
    I thatna a fak tawh ang..”
    Ka lo tawngtai pui ngei ang che u…
    (F) for your mom

    Report this comment

  3. 3
    ruata pachuau Says:

    Ka TV en laiah TSA condom fak lai tak ka hmeh chhuah nawlh chu le. :-)

    Report this comment

  4. 4
    zony Says:

    Nu/pa te hi an dam lai hian an hlut zia hriatloh a awl khawp mai, nu/pa neihloh hrehawm zia hi kan hrelo fo. Chuvangin nu/pa la nei te chuan an hlut zia hi i hre reng ang u. (W)

    Report this comment

  5. 5
    hmarveng Says:

    k mittui an tih thlak chu le..

    Report this comment

  6. 6
    H.Vangchhia Says:

    A ngaihnawm a, chhiar erawh a hahthlak roh mange a.

    Catholic te vanneihna: Thlarau tana in tawngtai sak theih nia rinna leh beiseina neih hi a ni. A hahdam thlak bik ngawt mai. Catholicah inkhawm tawhlo mah ila, ka thinlung erawh ala luah hneh hle thung.

    Report this comment

  7. 7
    abruzziko Says:

    Ngaihthlaknawm hle mai….

    Report this comment

  8. 8
    Chhuaklinga Says:

    Thinlung a va hneh ve, NU-te hi an va hlu em.

    Report this comment

  9. 9
    zualbonez Says:

    good post (Y)

    # 3 (H)

    Report this comment

  10. 10
    bulaya Says:

    Hnuk a ti ulh deuh reuh… (W)
    6 (Y)

    Report this comment

  11. 11
    mirage_isme Says:

    @Vangchhia, catholic ah chuan ngatinge i in khawm ngai tak loh?…

    Report this comment

  12. 12
    lamea25 Says:

    Nu te hi chu an hlu ngot mai,ka lung ati chhia ;-( catholic nih chu a nuam asin :-)

    Report this comment

  13. 13
    Asteric Says:

    Ziak ngaihnawm hle mai….i nu thlan ah chuan thinlungin he (W) hi ka lo dah ve ang e :-)

    Report this comment

  14. 14
    ltvangchhia Says:

    I nu nen in inteh zui dan hi aropui in amawi hle mai , i Nu hi khum tum in bei zel rawh , Van hmun nuam atangin athlir reng che in ka ring , i khum theih hun . I thu rawn Post hian ka hnuk ati ulh deuh tlat .

    Report this comment

  15. 15
    Professor Lalrihema Says:

    A va han ril ngaih ngaih em ve le. I ziak dan kalphung lah zirlai tan a zir tham a ni tlat mai. A common lo in a ril dan a tak tlat mai. Khitianga thu ziak khi thiam ve ka va han chak tak em.

    Report this comment

  16. 16
    nastycool Says:

    Hei chu lung a va kuai ve. (Y)

    Report this comment

  17. 17
    nastycool Says:

    Mirage…i spa ah min lo treat :-D

    Report this comment

  18. 18
    thiana Says:

    Thla hmasa hmasa leh, July thla mai khan kei pawh ka nu duh tak chuan min kalsan ve a, April thla khan ka pi (Ka nupuia nu) chuan min kalsan bawk. Keini nupa chuan NU kan nei ta lova, kan fate’n PI an nei ta lo bawk.
    Chutiang dinhmuna dingin i thu ziak ka chhiar hian engti takin nge min khawih i rin ? An 2 hian i nu nena kai thentu che u – CANCER vang vev vea thi an ni ve lehnghal. Ka tuarpui rual chein NU hlutna,ngaihawmna leh ropuina min hriatchhuahtir a,KA HNUK A ULH ……

    Report this comment

  19. 19
    coolsoul09 Says:

    in comments chhiar a nuam khawp mai..ka lawm takzet e.

    Report this comment

  20. 20
    doc_lib Says:

    I ziak lungkuai thiam hle mai.. Nu te hi an lo hlu a ni..He khawvela min la awm pui tek tek chhung hian ‘NU’ la nei zawng zawng chuan ‘ Mummy i love you ‘ tiin kan nu te hi i hmangaih leh zual ang u

    post tupa (Y) (Y)

    Report this comment

  21. 21
    saint sammoo Says:

    tha reuh hle mai.

    Report this comment

  22. 22
    saint sammoo Says:

    kohhran leh thurin ah an rawn OT chiam ka lo hlau deuh a, komen a puitling. lawmawm.

    Report this comment

  23. 23
    As_Khiangte Says:

    A ngaihnawmin thinglung a khawih hle mai.

    Zanin chu ka nu damlo damdawi ina awm ka pa hovin kan va kan a, ka tupa little Marcus pawh hruaiin kan va ri chel chul a, hlim takin kan haw leh ta. Tun thlenga nu leh pa min dampuitu ka nei hi vannei ka va inti em, an thu ka zawm zo lo fo leh an rilru ka tihah fo erawh hrehawm ka ti thrin. Nakinah a dam rei zawk ka nih phei chuan ka rilru natna tur a nih ka hre reng mai. He post hian rilruah nu leh pate hlutna min hriatchhuahtir hle mai, nasa zawka enkawl leh ngaihsak ka tum tawh ang.

    Report this comment

  24. 24
    Pc-a Says:

    Mittui parawl teuha ka chhiar zawh hnuah, comment 3 na khian minhnem viau a, mahse minhnem zo tak tak lo. Ka lung a chhe tlat. Ka lo chhiar ta kher kher a.

    Report this comment

  25. 25
    TuaiSialA Says:

    A ngaihnawm tawp.

    Report this comment

  26. 26
    hlatekhua Says:

    Lung a va kuai raih raih ve le!

    Report this comment