August ni 27-a Kurung lui-a tuitla an chhar dan.

August 30th, 2011 11:19 pm by H.Vangchhia

August 30 News : August ni 27-a Kurung lui-a tuitla 5th IR Vanlalrema ruang chu vawiin chhun dar 11:15 khan a tlakna atanga feet 300 velah hmuh a ni.

Vanlamrema leh a thian te 2 chuan August ni 27 khan Kurung luiah hian len an deng a, sangha Kg3 vel an man hnu chuan chawhnu lam dar3 velah hawn tumin luidung an zawh chho a, lungpher atanga lungko danga an lawnkai tur chu chesualin Vanlalrema chu lungpher leh lungpui inkara tui luang chak takah a tla luta lungpher hnuai puk thuk takah tui khauh tak chuan a len ken lai chawpin a lenlut ta a ni.

He lui hi a khawkrawkin a chhengchhe em em a, a tlakluhna atanga thlang deuh ah tui hi chak takin a luang chhuak leh a, chutah chuan a thiante pahnih chuan engemaw chen an lo chang a, engmah an chan chhuah tak si lohah chuan midang an pun ta a ni.

Vanlalrema Kurung luiah a tla tih hriat a nih veleh Sairang, Sairang Dinthar leh Sihhmui atangin tui thiam rualin ruang zawn hna hi an thawk nghal a ni.

Tui a tam avang leh a luidung hi, lungkhawkrawk chet harsa tak mai a nih avangin tuithiam tak tan pawh chetsual hleka thih mai hlauhawm tak a nih avangin valupa te chuan ruang zawnga luidung luhchilh tur pawh hian mi nazawng kal an phal lo.

Tuithiam leh helai luidung chinchang hriate thlang chhuakin, groupah insiamin group tinah hruaitu bik an ruat thlap thlap zela chutianga uluk leh fimkhur taka ruang zawn hna an thawk chung chuan ruang zawngtute zing a mi Sairang tlangval Biaknunga kum 22 chu August ni 28 Chawlhni khan Kurung luiah hian a chesual ve leh ta hlauh mai a ni.

Biaknunga te group hi group number 3 an ni a, an group-ah hian mi 7 an awm a, pathum te chuan hma hruaiin an kal hmasa a, pali dang te chu hnung deuh ah an rawn kal ve bawk a, sawi tawh angin he lui hi a khawkrawka lungpui leh lungbang sang tak tak hel ngai a tam a vangin in zui diah diah reng hleih theih a ni lo fo ang. Biaknunga chesual lai hi a thiante zingah tumah hmu an awm lo.

Biaknunga thian te luikam a an kal vel chuan lungpui bul tuia mihring ke lo lang chu an zuk hmu ta mai a, an hmuhna atang hian ruang awmna hi feet 30 vel lek mah ni se a lui a khawkrawk em em avangin ruang awmna hi an pawh mai thei lo.

Mihring ke ngei a ni tih erawh an hmu chiang hle a, an mi zawn 5th IR Pu Vanlalrema ruang ni ngei turah an ngai a, midang hrilh turin lamkal an in tir nghal a..chutia an thlir lai chuan ruang chu tuiin a len sawna a pil zui leh ta mai bawk si, an mangang hman hle mai.

Luimawng lamah an tlan khalha, athlang lawkah lui lah chu hmun hnihah a inthen phawka a khawi zawkah nge ruang hi a len tak ang!.. lamkal an intir then bawk si an indaih lo hle mai..midang an rawn thleng thuaia ruang an hmuh tanna atanga feet 100 vel, lungpui ti rek ruk hmunah ruang chu a khaikhup zawngin tuiluang chuan a len bet leh ta hlauh mai a ni.

Ruang chu a khaikhupa a awm avangin, an thianpa, an group member Biaknunga ruang a ni tih reng reng an la hre chuang lo. Vaukamah hnuh chhuah tuma an bawr lat lat lai te chuan a hma ni a, tuitla ni si a dul leh taksa a la puam lem miah lo te chu mak a ti hle tih an group leader chuan min hrilh.

Tichuan, vaukamah an zalha an han enchiang chu leh!..an thianpa an group member Biaknunga a lo ni reng mai si..an hrilh a hai tlang ngei mai!..Nichin lawkah an inzui tlang si..a la reilo lulai em mai..thawk tir leh hram dan a awm thei angem le!..a dulah te nemin a taksa a letling zawnga dahin a kawchhunga tui tih chhuah te an han tum a, mahse an thianpa hi chhan theih a ni tawh lo..

A hma lawka inzui tlang, an zingah a la awm ve zel tura an ngaih an thianpa ruang an chhar ta mai chu mak an ti a, a tlak lai hmu leh hria an awm bawk si lo. Biaknunga hmuiah hian hliam a awm a, a hnarah atangin thi a chhuak bawk niin an sawi.

Lungpui sira Biaknunga ke lo lang an hmuh hlim khan an miruang zawn Vanlalrema niturah ngaiin ruang an hmuh thu te pawh an hrilh darh hlawm a, Sairang khuaah pawh vantlang mike in Vanlalrema ruang hmuh a nih tawh thu an puang hmana, chu thu chuan vahchap kang ang miin hun reilo te chhungin Aizawl khawpui pawh a fan zau hman hle. Mahse Tlangval tlawmngai huaisen thianchhan nana a nun hlantu Biaknunga ruang zawk a lo ni..

Sairang khawtlang an fakawm thlawt a ni. An thian duhtak ruang an chhar ta mai hian an rilru a ngawng na hle mai. Mahse, tlawm an tum lo, an in sang mar sauh sauh a, “A tulchuan mitui nen pawh ruang zawn hna chu kan chhun zawm anga, he kan ruang zawn hi chhuah kan tum lo a ni” tiin an YMA President Pi Teressa-i chuan LPS Report-a ka interview-ah min hrilh a ni.

(Sairang YMA President Pi Teressa hi kum 64 mi a ni a, Sairang Joint YMA ah President te pawh lo ni thinin Sairang Branch YMA ah hian Kum 2 President hna a chelhna a ni.) YMA President in a lo sawi tawh angin tukin (August 30) khan khawtlang hruaitute ruang zawn zel dan tur chung changah an inhmu khawma “Kan khaw tlangval tlawmngai Lalbiaknunga’n a nun a hlanna a nih avang pawhin he ruang hi tuiah emaw, khawmualah emaw kan hmu ngei ngei tur a ni a, kan hmuh hma chuan kan zawng tur a ni” tih chu tukina kalkhawm te tho rolum chu a ni ta bur mai a ni.

Nimin chhun lamah ruah tlem a tlak bak chu ruah tih tham a sur ta lo a, Kurung lui pawh a kam chak khawp mai. Tlangval tuithiam rual chu group hrang hrangah inthenin luidung suartluan turin an thawk chhuak ta. Vawiin hi Vanlalrema a chetsual ni atanga ni 4 hmel a hmuhna a ni tawh a.

Fimhur takin tumruhna zawng zawng nen ruang zawn hna hi an bei tan leh ta a ni. Tichuan vawiin chawhma dar 11:15 vel khan a tlakna atanga feet 300 vel a hla, lungpui kehkak karah Vanlalrema ruang chhe tawh tak chu an hmu chhuak ta a ni.

Ruang hi a pilh nasa tawh hle a, thawmhnaw pakhatmah a in bel tawh lo. A puam nasa hle a, a kuang tura an siam pawh hmang ta lovin kuang dang lian zawk an siama tahchuan an zalh ta a ni. Vawiin chhun khan Vanlalrema ruang hi Sairang damdawiinah postmortem a ni a, postmortem tih zawh hnu hian Sairang khawtlang VC leh YMA ten a thlahna hunserh tawite an hmawn zawh hnuiin an veng, Chite veng lamah lak a ni ta a ni.

He chhiat tawhnaah hian 5th IR bakah Mizoram Police te an thawk tha hle a, Aizawl veng hrang hrang atangin tlawmngai thawk chhuak an thahnem hle bawk..Mizo nih hi a van nuam tak em!

Source: Vanneihthanga Vanchhawng

Similar Posts:

Recent Posts:

29 Responses to “August ni 27-a Kurung lui-a tuitla an chhar dan.”

  1. 1
    sisen Says:

    Bengvarthlak e

    Sairang khua an fakawm khawp mai

    Report this comment

  2. 2
    chicko Says:

    An hmu ta maw..khawngaih thlak kher mai..

    Report this comment

  3. 3
    Whatever Says:

    Va lainatthlak ve.

    Report this comment

  4. 4
    xela Says:

    An hmu ta chu a lawmawm hle mai..mahse thil pakhat “is it worth a life to find a lifeless?”

    Report this comment

  5. 5
    chhangteval Says:

    Van ziak ngaihnawm thiam em em (Y)

    Report this comment

  6. 6
    TuaiSialA Says:

    Vanneihthanga Vanchhawng hi a awm lovang tihte pawh a hlauhawm roh hi mawle!

    Report this comment

  7. 7
    sheldon170 Says:

    Tui len lai hi chuan luiah kal lo mai ila….Tikhian nunna hlu tak tak kan chan a, pawi eeee.

    Report this comment

  8. 8
    hmingtea Says:

    A ruang an hmu ta chu a lawmawm ti mai ang.Thi tih hriat ruang hlawm tur awm lo hi a thin nat duh hmel e mai.

    Kan thenawmpa thin hman deuh khan HPC ten an kidnaph ruang pawh hmuh tak lo a awm te kha ka hre chhuak hial e.

    YMA president hmeichhia ni bawk ropui ka ti hle mai.

    RIP

    Report this comment

  9. 9
    Soberboy Says:

    Pu VANA dam reng rawh seeee (Y)(Y)(Y)(Y)(Y)(Y)

    Report this comment

  10. 10
    benjamin rualthanzauva Says:

    Thildang daih kan lo sawi teh ang. Min lo hrethiam ula. Pu Vana report chu a kimchang khawp mai. Mahse “News nge essay?”

    Report this comment

  11. 11
    ReMpY_ScisSoR Says:

    :) news report ai mahin documentary film narrate te poh kn ang e.
    a ngaihnawm in rilru a khoih khop mai.

    Report this comment

  12. 12
    chhana Says:

    An hmu ta chu a lawmawm e.
    Muanga ruang pawh an hmuh leh thuai ka beisei.

    Report this comment

  13. 13
    Thangpasaisira Says:

    Sairang khua in2 pêkna hi ropui ka ti tawp thei lo,nasa takin Lalpan malsawm che u rawh se.. (G)

    Report this comment

  14. 14
    Lamji Says:

    An va lainatawm tak em!thlamuang takin chawl rawh se..Biaknunga chu a chetsual lai vel tur han mitthla phei chuan an va lainatawm lehzual em! ;( Group khat mi 7-ah an inthen a,an thianpa awmlo tih an hrelo mai chu(h),a ke an hmuh lai pawh hian an awmkhawm ngei awm sia… :(

    Report this comment

  15. 15
    H.Vangchhia Says:

    A pawi thin tehnuaih anih hi :-S

    Report this comment

  16. 16
    Unsung Says:

    A kimchang bawk a, a hmuna awm ve ang mai in chanchin kan hriat theih ve phah a, a bengvar thlak hle mai. Pu Vana i ti lawmawm e.

    Report this comment

  17. 17
    lushai_er Says:

    Tuitla hi an la awm leh ngei ang, tuna kan harsatna tawh atang hian in puahchahna tha zawk chu a la awm thei tih a chiang a. Ruang zawnna khan kal hrehawmah te hian kawng mumal deuh a sial theih em ? Hand rail vuah ngaina hmunah te vuah lawk a tha em ? Monkey ladder tal te hi kham kal harsatna hmunah vuah lawk theih a ni em?

    Report this comment

  18. 18
    rlchhana Says:

    Mizo nih hi a vanneihthlak hle a ni. Ruang zawnga feh chhuak leh ruang zawngtute lo buaipuitu tlawmngaite in fak awm hle mai. Thian chhan thih ngam hnam kan nihna alo lang leh ta, ava ropui em! Mizo mizona tlawmngaihna lo par chhuak leh thin hi, hnam dang hian an nei ve lo. Hei hi a kristian nun raih mai. Lal Isuan nun kan neih theihna tur anih avang chauh va, Pa thupek awih a, thihna azawnga thihna rapthlak ber ‘Kraws a Khenbeh’ alo thlang ta nen khan, ava inzul em ti r’u. Sairang YMA vul reng rawh se.

    Report this comment

  19. 19
    Chhuaklinga Says:

    Post tupa chu va ti tha ve, a kim chang hle mai. A hma a ka la hriat loh te pawh a awm nawk mai!! (Y)

    Sairang Br. YMA (Y)

    Sairang Br. YMA President hi MHIP Hqr. President ni bawk se. noi

    Report this comment

  20. 20
    Rumtea Says:

    Ruang zawng tur hi an inthlang uluk hle a, mahse tlawmngai tak2 kal tura ruat lem loh leh group a an inthen hma zing kara kal te pawh an awm a. Sairang VCP sawi danin, Biaknunga hi tlawmngai zingah telin, ruang zawng tur an thlanah hian a tel ve an hre lo.

    Report this comment

  21. 21
    Rumtea Says:

    Hman kum lawk khan, kan veng pa, buichali kai thlangah a len deng a tla a, tui a lian nasa si a, ruang zawng pawh kan beidawng tawh. Tawngtaia hrethei an rawn a, a tlakna zawnah a la awmthu leh hnawlah a inbah tan thu a sawi a, a sawi hnu lawkah Bairabi ah an ruang hi an hmu daih.

    Report this comment

  22. 22
    PKfanai Says:

    Report kimchang tha tak a ni e. @ 20.Biaknunga chu mi tlawmngai dik tak, chawimawi tlak a nih chu. @21. A huai pawh hi an huai thin e. Hetiang ho avang hian a lawm, tawnghriatloh te, Hlimsang ho te miin an ngaihnep phah thin. Tawngtaina atanga hrelo nih hreh siin, a risk ve tawp anih chu.

    Report this comment

  23. 23
    ChhanaPa Says:

    #21 :-D :-D .. Sairang ho an fakawm e. Biaknunga chhungte leh Pu Rema chhungte Lalpa’n awmpui zel rawh se.

    Report this comment

  24. 24
    Pc-a Says:

    Rumtea@ Biaknunga hi truck tlawnga tla, a seat chhunga mi te zu chhan chhuaktu kha an tih si mawww.

    Pu HV i ti tha e, Aizawl khawpui a mite i tlawm vek.

    Report this comment

  25. 25
    mate ainawn Says:

    A ni maw..A awm hla zawkin chhiar tur i rawn chhawpchhuah daih chu le (Y)

    Sairang YMA President Pi Teressa i tih khi ka van duh e..ka tan tawp..Mizorama Hmeichhia YMA President awmchhun a ni hial lo maw..ka ngaisang khawp mai..

    Report this comment

  26. 26
    Aguero Says:

    Mizo nih hi a lo nuam a, a zahthlak loh zia min hriat chhuah tir thin. Tlawmngaihna lo vul zel zawk rawh se
    (Y)

    Report this comment

  27. 27
    LR_rengsi Says:

    Lainatawm hle mai..RIP

    Report this comment

  28. 28
    kawlnicolney Says:

    Hetiang anga kimchang deuha thil ka hriatloh chuan news kimchanglo ka ti thin.mizo ten news kan hriat duhdan tak ni pawhin ka hria,duh ang hian akimchang theilo zawka,zawhna kan zawt kan zawt leh zawk thin si anih hi.Hats off…

    Report this comment

  29. 29
    Rugga Says:

    Kimchang khop mai, postmortem ah khan thil dang chhuiichhuah tur awm hranpa lo mi aw la ti hram teng, a pem leh hnarthi vel kha awm bok sia!

    Report this comment