Lalhmangaiha Sailo

July 26th, 2011 10:07 am by chawnghilh

Pu Lalhmangaiha Sailo hi Brig. (Rtd) Thenphunga Sailo, Mizoram Chief Minister pawh tum hnih ngawt lo ni tawh leh Pi Thansiami te fa palite zînga a upa ber dawttu a ni a. An unau upat dàn indawt chu –

Pu Lalsângliana, Class I Contractor, h/o Lalngaihawmi, Aizawl

Pu Lalhmangaiha Sailo, IRS (Rtd), h/o Pi Malsàwmi IRS, Aizâwl

Pi Laldingliani Sailo IRS, w/o Pu D. P. Singh IAS, New Delhi

Dr. Lalrinliana Sailo, Director Health Services, h/o Zodinliani, Luangmual — te an ni.

Zirna lam : Pu Lalhmangaiha Sailo hian St. Edmund’s School, Shillong-a lehkha zir tanin, Mount Hermon School, Darjeeling leh St. Anthony’s High School, Shillong-ahte a zir hnuah, kum 1966 khân tha takin Matric a passed chhuak a. Hemi hnu hian St. Joseph’s College, Darjeeling-ah College lùtin, kum 1970 khân BA English Honours tha takin a zo va.

Kum 1973 khân Guwahati University atangin MA English Literature tha takin a passed chhuak ta a ni. Lehkha a zir lai hian mi thiamthei tak a ni thìn a. Darjeeling-a BA Third Year a zir lai pawhin European History-ah mark a hmu sâng ber a. Tribal a nih avàngin a hma lama amah aia mark hmu sâng zàwk thìn a zirpui vai chi tha –mi pahnihte chuan chu result chu an pawm pui duh ta tlat lo mai a.

Principal hnènah chhànna paper chu en tha leh tùrin ngènna an theh lùt ta a. Principal chuan, “chhànna paper-te hi keima endik vek an ni a; mahse hetia complaint a awm tàk sìah chuan ka en tha leh vek ang,” a ti a. Ngun taka a en that leh vek hnu chuan engmah tihsual a hmu ta chuang lo va, “In tluk ngang lo a ni e,” a ti ta thlàwt a ni.

Infiamna leh Music lam : Pu Lalhmangaiha hi Mizo tlangvâl dangte ang bawkin mi harhvàng tak, Infiam leh Music lam pawh ngaina tak a ni a. Hockey leh Football (Soccer) khèlh pawh a thiam hle a ni. Infiamna dang Athletics lam pawh a ti thei pâwl tak a ni thìn a, medal pawh engemaw zàt a dawng ve tawh thìn nghe nghe a ni. Music lama tui-mi tak a nih bàkah zai lamah pawh eizawnna tling khawpa thiam a ni a.

Darjeeling-a College a kal lai pawhin a thiante nèn Rock Band an din a: College Function neih chânga mite tihlimtu ber an ni thìn a ni. Club lian tak takah te pawh zai tùra sàwm an ni fo thìn a. Hei hi an han hriat zau tàkah chuan India ram khawpui lian Mumbai leh Nepal-a Kathmandu-ah te pawh zai tùrin contract hna an hmu ta hial a. Mahse, College zirlai an nih hrih avàngin remchâng lova ngaiin, chùng contract-te chu an hnàwl ta zàwk a ni

. Hnam dangte zîngah Mizo tihmingthatu: Pu Lalhmangaiha hian a pa Brig.Thenphunga hi a chhùn avàngin pa huaisen tak mai a ni a. Lehkha a zir hun lai pawhin a Mizopui thiante’n hnam dangte nèn buaina an neih chângte hian an thlavàng hauhvin, an dik leh dik loh pawh ngaihtuah hmasa lo hian, a thiante chhan tùr hian a inpeih sa àt reng zèl mai a.

Tharum hmanga han innuai a awm chângte pawhin, a thiante thlavàng hauh hian a tel ve hial thìn a ni. Mizote hi tribal kan nih avàngin hnam dang zînga ngaihsàn hlawh khawpa awm hi thil harsa tak a ni a. Ngaihsàn hlawh ai hian, en-hniam nih hi kan hlawh mah mah zàwk thìn a ni.

Chutiang kârah chuan Pu Lalhmangaiha hi chu lehkha thiam thei fâl tak a nih avàng te, pumraw tha si, sports lamah mi thei fâl leh music leh zai lamah lah thiam tak a nih bawk si avàngin, a awmna apiangah hnam dangte pawhin an ngaihsàn leh Mizote hming tithatuah a tang thei zèl thìn a.

India ram khawpui hrang hranga hna thawka a lo awm tawhnaah te pawh, hèng khawpuia Mizo engemaw zàt awmte huikhàwm a, inpàwlhnona tha tak neihna kawng-ah te, mi tanpui ngaite tanpuina kawngahte a sùlsutu ber pâwlah a tang thìn a. A pa atanga rilru tha tak a rochun, mite tanpui duhna thinlung tha tak a putna kawngah hian a chhuanawm èm èm thìn a ni.

Sawrkâr hna a thawhna : Pu Lalhmangaiha hian kum 1973-a Guwahati University atanga MA a zawh kum hian Union Public Service Commission-ah inziak tlingin, Indian Revenue Service (IRS) pèk a ni a. He hna hi kum 1974 khân a zawm ta a. Indian Revenue Service-a a awm chhûng hian India ram khawpui hrang hrang –Guwahati, Jorhat, Kolkata leh New Delhi-ah te dinhmun pawimawh tak tak a chelh a.

Chief Commissioner thleng kai chhovin, kum 2010 khân a hna atang hian hming tha takin a pension ta a ni. Indian Revenue Service-a hna a thawh chhûng zawng hian Officer chhuanawm leh rinawm tak, a thawhpuite tân pawha mi entawntlàk tak niin a thawk thìn a. A pa atanga a rochùn thil hlu tak pathum –taimàkna, rinawmna leh diknate chu a kengkawh tlat thìn.

An chhûngkaw chanchin : Pu Lalhmangaiha Sailo nupui Pi Malsàwmi IRS hi, Director General (Intelligence), Chief Commissioner rank thawkin, tùnah hian New Delhi khawpuiah a awm mêk a. Mizo zînga hmeichhe IAS tling hmasa ber Pi L.Tochhawng hi Pi Malsàwmi nau a ni. Anni unau hi Mizo hmeichhiate zînga mi chhuanawm ber ber te zînga mi an ni. Pu Lalhmangaiha te nupa hian fa pahnih an nei a.

An fa upa zàwk Tv. Laltanpuia Sailo chuan BBA a zir zawh hnuin Alar Infrastructure Pvt. Ltd, Holland Company aiawhin New Delhi-ah hna a thawk a. An fanu Lalrinpâri Sailo chuan USA-a Denison University, Ohio-a Economics with Mathematics a zir zawh hnuin, USA-a Washington DC-a World Bank-ah hna a thawk zui nghàl a ni.

Pu Lalhmangaiha mizia : Pu Lalhmangaiha hi Mizopa dik tak, mi tawng tam lo, inngaitlâwm tak; amaherawhchu, amah bèl chiang tawh chuan an ngainat èm èm nungchang duhawm tak nei a ni a. Thiante tâna inpe zo tak mi, mi-lian leh mi tè thliarhrànna nei lo, mi kawm nuam tak a ni a.

Mite thusawi ngun tak leh dawhthei taka ngaichâng mi a ni bawk. Mi lehkha chhiar zau leh hriatna zau tak nei a ni a. Khawvèl ram hrang hrang –USA, Canada, England, Scotland, France, Italy, Belgium, Switzerland, Netherlands, Dubai, Brazil, Thailand leh Hongkong-te tlawhin a fang kual tawh a. Hèng ram a tlawh tawhte atang hian Mizote tâna rualawhna nasa tak neiin, ‘Engtikah nge hetiang dinhmun hi Mizote’n kan neih ve theih ang?’ tih hi rilrua a vei ber a ni.

A pa –Brig. Thenphunga Sailo leh Pi Thansiami te chhûngkaw inenkawlna (discipline) tha tak mai hnuaia seilian chho a nih avàngin, Pathian tihna, taimàkna, rinawmna leh diknate a nunah a behtîr tlat thìn a. Hei vàng hian Sorkâr hnaa pawisa tam berna hmun nia sawi thin Income Tax Department hnuaia kum 35 lai a thawh chhûng pawhin, an nupaa theih tàwpa an thawh chhuah tàwkah lungawiin, an thawhchhuah bàk engmah neih belh an tum ngai lo.

Tichuan, hming tha takin kum 2010 khân a pension ta a ni. Politiks-a a luh chhan : Pu Lalhmangaiha hian a pa Brig. Thenphunga Sailo –sipai atanga a pension a, politiks-a a luh kum 1975 khân, sorkar hna thawk tan ve chauh a ni a. Sorkâr hna thawk mah ni sela, a pa atanga ram vei mi tak an lo nihna chuan Pu Lalhmangaiha pawh hi Zoram hmasàwnna ngaihtuahna leh rilrua veina hian a chiah hneh hle a.

A pain Zoram hmasàwnna atâna Policy leh Programme tha tak SIX BASIC NEEDS duang chhuak a, theih tàwp chhuaha –chùngte chu tihlawhtling tùra bawhzuia hma a lo làk tawhnate chu, tihtakzeta thawh chhunzawm hi Zoram dinchhuahna atân kailàwn pawimawh tak nia hriatna nghet tak a nei a.

Amaherawhchu, a pa Brig. Thenphunga chu kum lama a lo upat ve deuh tàk avàngin duh angin politiks lamah a inhmang tam thei ta lo tluk a lo ni ta a. Chuvàngin, a pa hmachhawpte chu theih tàwpa thawk chhunzawm tùrin politiks-ah Pu Lalhmangaiha chu a lo zuang lùt ve ta a ni.

A hun takah Zoram hruaitu ni turin i duh/iai em?
Tunge DUHOM ber ang — Hawla, Zorama, Duhoma, Hmingthanga leh Hmangaiha te hi! Mi thar lawm riau hi kan awm em?

Mi thar politics-a rawn zuang lut a nih vànga inhmêlhriattîr ve hrim hrim nâna rawn post a ni e.

Similar Posts:

Recent Posts:

65 Responses to “Lalhmangaiha Sailo”

Pages: « 1 [2] Show All

  1. 51
    RenghangMan Says:

    Politician ho hi ka ei lo laklawh, mi dik tluantling an la awm lo chuan ka hria..ka haw vek mai grrr…. :-(

    [Report abuse]

  2. 52
    mach3 Says:

    Keipawh tuaisiala ngaihdan hi ka ngaihdan chiah ani. Hna thawh tawhna a rinawm taka thawk pheih chu a dangah pawh an rin tlak tlangpui ang. Hnam hmangaih avanga politics a zuan luh ngawt hi guarantee a tha em em hran lova an zuang lut lo hi ka dem lem lo khawp mai ;-)

    [Report abuse]

  3. 53
    Godspeed Khawlhring Says:

    pu thena hi mizo politician zingah chuan ka mi ngaihsan ber a ni a, a fa te chanchin hi ka hre tam lutuk lo a….amah ang an nih dawn chuan full support ka pe thei ang…an ni dawn lo anih chuan an sorkar hna thawk se pension ve mai mai rawh se……A pa chu a tih hmingchhiat loh hram ka beisei(a chanchin ka la hre ve lo tlat a)

    [Report abuse]

  4. 54
    mach3 Says:

    Mimal tak chuan keipawh kan politician zing ah chuan Pu Thena kha ka la duh ber. Haw fe fe chu an awm tho na in mi zawng zawng lawm nih chu a har aniang. SDO pa hna thawk tha lo a beng an tih te ang tan phei kha chuan lawm a har khawp ang.

    [Report abuse]

  5. 55
    ruatruatapa Says:

    A ni maw?

    [Report abuse]

  6. 56
    VaiVa Says:

    Politics khawvel a thil buaithlak inchingchivet chu hria leh thei ni a inhria ten an iai bawk si a. Thiam leh fin vang em em pawh ni lem lo, tul a hria ten khelmual ah thuilohkawr hain an han tei lut a, raymond suit ha ho in a tlin lohna lai an lo khel char char bawk si. BA pass lo chu a thenin kan tih laiin a thenin thiamna lamah chuan hlawhtling mahse… kan la ti hram a. Midang pen chhuah kan nghak a, duh ang erawh kan hmu thei si lo.

    Engtikah tak chunglam hian ranw tir ang maw? :-O

    [Report abuse]

  7. 57
    hmingtea Says:

    Pu Thenga fapa a ni a mi puitling tak chu a ni nghal ngei 2 ang tih ka ring.
    A pa hi chhimlam ka fanpui tawh pa zinpui nuam in zo leh ram chin poh hre tak ani A pa a tluk chuan kan Zoram tan chuan chhawrnawm tak anih ngei ka ring .Mahseng party party ti thin Mizo mipui te hian MLA 2 bak an pe leh loh mai ang a

    [Report abuse]

  8. 58
    hmingtea Says:

    PU Lalhmangaiha hi CM ni ta se Chawnghilh hi Parlimentary Secretary an tih ah hian awm bawk se MLA lal tak han ni mai seng ka va han ti kher ve le NOI

    Kar leh ah chuan GS ah a ruat mai thei NOI lolz

    [Report abuse]

  9. 59
    jAf Says:

    (H) (Y)

    [Report abuse]

  10. 60
    drake Says:

    misual.com ah chuan vote va hmu tlem leh si e!!

    [Report abuse]

  11. 61
    chawnghilh Says:

    Ka thang bo hlanin in lo comment ngaihnawm hle mai. Ka post hnu lawkah in lo tarchhuak a ni maw?

    Biloo (Lalhmangaiha Sailo) nena kan inhmuh lohna hi a rei hle tawh a, 1978 kha kan inhmuh tawp a ni.

    Party President-a thlan tlin a nih khan, Zoram chhunga Unit tina MPC Office-bearers-ho a hre kim thei ang em aw? ka lo ti vawng vawng a. Tawng dang cheleka inbe thin kan ni a. Mizo tawng a thiam leh thiam loh pawh chuti em emin ka lo chik chiang ngai lo va. Eng tak ang zel ang maw aw?

    Party te sikhaw ber akara a phel lehlam hruaitu lu ber a ni rih miau mai a. A thianpa Chhuihthangvala (Lalnunmawia)-teho nen khan Evergreen, Motinagar-a kan pun khawm let let lai bak kha engmah ka hre zui tawh bik rih lo. Kum 33 chuang a liam ve leh tawh a nih chu!

    [Report abuse]

  12. 62
    Vary Says:

    Amah hrim hrim chu a á¹­hat a rinawm, mahse Pension hnu ah chauh ram an hmangaih leh an vei a, ram hruaitu nih an tum hi a mak ka ti… (N)

    [Report abuse]

  13. 63
    vemaimaia Says:

    Tha ni a kan hriat kan zawm peih tluan tling thin lo hi Mizo te thanmawh bawk lian tak a ni. Pu Thena hi tha lo ti a sawi sel chu an tlem khawp mahse a kaih hruaina hnuaia awmtur sorkar din tir chu kan tum mang hlawm tawp si lo, hah thlak hlawm hian. Development chung changah hi chuan ani tluka vision nei leh hnathawh tak tak tum tun thleng hian an la awm lo chu anih hi a, a hun laia hmalak a tumna tam tak te kha MNF te rik rapna vangin a kal hlei thei lo zawk a, a pawi tak zek a ni.

    Tunah a fapa a aiawh turin a rawn pen chhuak a, a tha ang nge a tha lo ang tih chu lo sawi lawk vak theih a ni lo, amaherawhchu PC mi leh sa ni sa tan chuan theih tawp chhuah a lo tawiawm mai hi anih dan tur ni awm tak a ni, kha leh chen Pu Lalhmingthanga te hoin eng an nih pui thei tawh lo a ni si a, ani zarah hian a pa policy te pawh hian hlawhtlinna tak tak hmel a hmu khiah mai thei asin.

    [Report abuse]

  14. 64
    ruata Says:

    Misual.com hi campaign deuh roh nan pawh a that viau dawn hi a :-P

    [Report abuse]

  15. 65
    solar carpot komplettpaket Says:

    solar carpot komplettpaket…

    […]Lalhmangaiha Sailo | mi(sual).com[…]…

    [Report abuse]

Pages: « 1 [2] Show All

Leave a Reply

You must be logged in to post a comment.