Pathian rilru a dam em?

July 31st, 2011 1:24 pm by Aputea

- by K.L.Biakchungnunga

Keini mihringte ang bawkin kan Pathian hi lungngâi thei, na thei a ni (Isaia 53:3). Amah tilungngâitu leh a rilru tinatu ber pawh tu dang, eng dang ni lovin, nang leh kei, mihringte hi kan ni. Lazara thih chungchanga Mari leh khawhar lênpuitute tap a hmuhin Isua chu a rûm a, a lungngâi a ni tih Johana 11:33-ah kan hmu.

Mihringte avângin Pathian hi a lungngâi a ni satliah mai lo. Kan sualzia te, kan ngaihtuahna bawlhhlawhzia a hmuh hian, Pathian chu a rilru a na êm êm a, mihring min siam avâng hian a inchhîr hial a ni tih Genesis 6:6-ah kan hmu a ni.

Kan nun dân, kan thiltih leh awm dân, kan thusawi leh kan ngaihtuahnate hian Pathian thinlung chhûngril ber hi a nghawng thin a, keimahni avâng hian lungngâiin a awm a, hlim ni hmêl a hmu lo ti ila kan sawi sual kher lo vang.

Khawvêl pumpuia mihringte nun dân leh awm dân hi han thlîr ila, Pathian hre lo leh ngaihsak lo, Pathian pawisakna rêng rêng nei lo kan tam si a, Pathian rilru chu a va na thin dâwn êm! Chuvângin Pathian tilâwmtu, Pathian tana hlimna leh lâwmna thlentute hi Pathian tân an hlu êm êm a ni.

Ka hlim em, ka lâwm em, ka rilru a dam em, ka lungâwi em—tih aiin, Pathian a lâwm em? A rilru a dam em tih hi kan thupui ber tûr a ni.

PATHIAN LUNGAWINA BULPUI BER CHU:
Pathian lungâwina leh lâwmna bulpui ber chu Isua Krista a ni. “Hei hi ka Fapa duh tak, ka lawm êm êma chu a ni” tiin Pathianin Isua chungchâng a sawi tih Bible-ah kan hmu (Mathaia 3:17). Thih phah khawp hiala a thu zâwmtu a nih avângin, Pathian chu Isua chungah hian a lungâwi hliah hliah a, chawimawina sâng ber pein, hming zawng zawnga hming chungnung ber a pe hial a ni (Philippi 2:11)

Chuvângin, Pathian tihlâwm kan duh a, a lungtiawitu nih kan duh chuan, a lungdumtu Isua Krista hi kan thinlunga hmun lailum ber, hmun tha ber kan ken a ngâi. Keini mihringte pawh, kan duhzâwng min duhpuitu, kan tuizâwng min tuipuitu, kan ngaihsânzâwng min ngaihsân-puitu chu kan lungtiâwitu an ni thin angin, Isua Krista chhuangtu leh tuipuitu kan nih mai hian Pathian kan tilâwm a, kan lakah Pathian rilru a dam thin a lo ni.

Duhthawh deuhin i han sawi teh ang. Kohhrana kan inhman viau hian Pathian kan tilâwm ringawt lo. Bible kan chhiar hian Pathian rilru a dam ringawt lo. Mahni vei zâwng leh duhzâwng thlena kan tawngtai chiam chiam hian Pathian a lâwm ber lo. Kan nuna Isua Krista dah chungnung lova, a chanchin tuipui tak tak si lo hian, Kohhranah kan inhmang tui viau thei a, duah takin kan tawngtai hluah thei bawk.

An nuna Isua Krista chhuang tak tak si lova Pathian thuhril thin, ramhuai hial pawh hnawtchhuak thin, Pathian hminga thilmak ti thinte chu, “Ka hre ngai lova che u” a la ti dâwn a ni (Mathaia 7:21-23).

“Keia tân zawng nun hi Krista a ni” titu Tirhkoh Paula chungah khân Pathian a lâwm ngawt ang. A chhan chu, a zin program tam ber kha Isua tân a ni a, thu a sawiin Isua chanchin a sawi tam ber a; lehkhathawn a ziak pawhin Isua hming a lang tam ber a; harsatna leh hrehawm a tuar chhan ber pawh Isua vâng a ni a; Isua avângin Tân Inah vawi engemaw zât a tân phah a ni.

A thih chhan pawh, zu in tam vâng, meizuk nasat vâng ni lovin, Isua Krista avâng a ni. Chuvângin, Pathianin chawimawina ropui tak, lâwmna lallukhum (crown of joy) a hlân a nih pawhin nang leh kei hian kan sawisêlin kan thîk thei lo vang.

PATHIAN RILRU DAMNA:
Isua hming lama au vak vak te, Isua chawimawina hlâ sak apianga uar taka lâm nghawng nghawng hi a thâ e. Mahse, Isua hming lam peih tak, Isua fakna hlâ saa lâm peih tak ni si hian, ni tin nuna min hruai a tum dân ngaihtuah lêk lovin a awm theih tho tih kan hriat a pawimawh.

Pathianin he khawvêla mawhphurhna min pêk azirin Amah Pathian kan tihlâwm dân tûr a awm tih kan hriat a thâ. Solomona chu lal ni tûrin Pathianin a ruat tih kan hria. Lal a nih anga a tih tûr ti hman lêk lovin nilêng lêngin zâiin Pathian fakin lâm duai duai se, “Haleluia” tiin ring tak takin vêngthlang leh vêngchhak hriat khawpin au vak vak se, Pathian a tilâwm kher lo vang.

Pathianin amah fiah nân, “I duh apiang min dîl rawh, ka pe ang che,” a ti a. Solomona chuan, “Kei zawng naupang chhia mai ka ni a, thu kal lam leh haw lam pawh ka hrethiam lo vang. I mite rorêlsak tûrin hriatna thinlung min pe rawh, a chhia leh tha ka thliar thiam theih nân..” (I Lalte 3:5-9) tiin Pathian hnênah finna a dîl a, Pathianin mawhphurhna a pêk chu tha taka hlenchhuah a duh ber a ni.

Chu chuan Pathian a tilâwm êm êm a; damreina, hausakna leh a hmêlmate thihna emaw dîl lova, lal rorêl thiam tak ni tûra finna a dîl avângin, Pathian chuan a dîl loh hausakna, ropuina leh hmingthanna a pêk belhchhah a ni tih kan hmu (I Lalte 3:10-14).

Pathian fakin kan lâm ang. Theihpatâwpin Isua hming kan fak ang a, Haleluia leh Amen tiin a ring thei ang berin kan au ang. Hemi chin chauhah erawh kan duh tâwk tûr a ni lo vang. Enkawl tûr fâ min pe a nih chuan, nu leh pa tha tak ni tûrin Pathian hnênah hmangaihna, dawhtheihna leh finna kan dîl tûr a ni.

He khawvêla Pathianin thawh tûr leh mawhphurhna min pêk tha taka hlen thei tûrin kan mamawh dik tak hriat tum ila, chu kan mamawh chu dîl ila, Pathian rilru a damin a lâwm ang a, kan dîl loh pawh min pe mai dâwn a lo ni.

Similar Posts:

Recent Posts:

20 Responses to “Pathian rilru a dam em?”

  1. 1
    TuaiSialA Says:

    A dam ang. Adama a siam alawm.

    Report this comment

  2. 2
    troxx Says:

    Tha viau e … (Y)

    Report this comment

  3. 3
    PKfanai Says:

    Ka pawm zawng tak ani e. Good post.

    Report this comment

  4. 4
    ngaihdan tha a Says:

    Post tha tak ani.

    Report this comment

  5. 5
    Ozima Says:

    Tinge a ziaktupa hi a reh tlat le aw! @Aputea i rawn post hlauh a (Y) , han chhiar dawn ang hmiang….

    Report this comment

  6. 6
    blackmagicwoman Says:

    vawiin kan sunday pual chu van thra hlawm kher em! Nitin a kan hman trangkai tur chi hlir a ni. Rawn post tute in ti tha e! (Y)

    Report this comment

  7. 7
    son of God Says:

    Ava ropui ve aw!

    Report this comment

  8. 8
    mr.Duhlova Says:

    Sermon tha tak a ni e…Pathian ti lawm turin ke i pen ang u…Pi Chheee hmurrrrr (Y)

    Report this comment

  9. 9
    son of God Says:

    Facebook a te tlat mai. engmah ka hmu tham lo. enge awmzia ni ang?

    Report this comment

  10. 10
    muantea Says:

    @ozima #5, i va hre lo angreng :-D

    Aputea hi a reh rei ta vung vung khawp mai. A rawn comeback ta nge a rawn lut thuak ni ang aw!

    ‘Ka tih thinte ka tih a rem tawh lo’ tih ang khan ringtute chuan kan rinna siamtu leh tifamkimtu tan kan inpek thar zel a tul khawp mai. Tihtur min pek kan tiha a thu kan awih hi a duh mai a ni. ‘Inthawina aiin thuawihna’ a duh zawk si a.

    Report this comment

  11. 11
    Benny Says:

    A tha hle mai

    Report this comment

  12. 12
    Ozima Says:

    K’u muante nia hrelo ang reng. (H) A hming ang misual a ka hmuh kha amah turah ka lo ngai a. Anyway (Y)

    Report this comment

  13. 13
    chawnghilh Says:

    Pathian LUNGAWI tih satliah mai hi ka pawm ve lo. ACCEPTANCE tih hi PAWMNA tih a ni zawk a. Lungawi tih mai aiin a chek thuk zawk. ACCEPT tih thumal anonym chu REJECT a ni a. Pathian Yahweh hian a Fapa Yahshua inthawina famkim (thisen bua leh leh thisen theh)-ah khan min ACCEPT chiang a ni tih pawmtu ka ni a, ACCEPT tih thumal hi LUNGAWI tih satliah maina atan ka iai! PAWM tih ni ngei se ka duh.

    “LALPA lungawi kum” tih leh “Acceptable year of the LORD” tih thu ropui, kan Bible letlingtuten pawhlah taka an lo letling maite hi an chala pen fawk ka duh. Sazai an la hmu chiang khawp ang.

    Hebrew-a “Lire sonekhem” tih hi ‘for your acceptance” tihna a ni —a awmzia chu “pawm in nih nan” tihna a miau si a. LALPA lungawi lam ai mahin, a Fapa azara/avanga PAWM ACCEPT kan nihna a kawk thuk zawk e.

    Post tha tak, bengvarthlak a ni.

    Apute : Kan va inhmu khat ve, i course i zo dawn tawh em?

    Report this comment

  14. 14
    Ozima Says:

    Grik tawng, hebrai tawng tih in han sawi hi chuan amen tih mai hi ka chan tawk a ni sia :-P ( antonym? )

    Report this comment

  15. 15
    bk Says:

    (Y)

    Report this comment

  16. 16
    Tete-i Says:

    post tha tak a ni..chhiar a nuam khop mai……ziak zel roh… (Y)

    Report this comment

  17. 17
    TuaiSialA Says:

    @Son of God: Ctrl+ Mouse Scroll.

    Report this comment

  18. 18
    Asteric Says:

    (Y) han sawi ve ṭeuh pawh chakawm hle mai, mahse ka mut a chhuak ve tawh tlat si a ka tuihnih pui lem lo mai ang che ;-)

    Report this comment

  19. 19
    Atom c Says:

    Ka rilru a awm, hote pawh nise sawilang ve ang…,. (H)

    Mahni duty pawh hlenchhuak hman mumallo leh hna tul pawimawh tamtak kalsana Pathian biak Inkhawm ngaipawimawh an awm a, kawng lehlamah chuan mahni hna chanpual ( sual lam nilo) zawh hmanloh ai chuan Inkhawm thulh mai pawi tilemlo an awm ve thung a, mihring hi kan inanglo a ni . Zirlai tan exam lai leh tul hunlaia inkhawm ngaihpawimawh em em kha a fail thut thei a, rinawm taka mahni In lama lehkha zir ngat ngat pa kha a pass daih thei a ni. Pathian lakah thilsual kan tilo anih a, nakina midangte tana malsawmna kan nih theihna tur hun reilote chhung hi chu Pathian hian minpek phal hi keichuan ka ringtlat.. Inkhawm kha ka ngaipawimawhlo zawk, tihna lam ni lovin, hmun tin atangin Pathian hna hi a thawh theih a ni, tih hi ka ngaihdan deuh chu a ni thin a, mahse Pathian malsawmna nasa tak dawng tawhte sulhnu han enchian meuh chuan , Mahni hrehawm pawisa lovin an zui thin thung alo ni…..

    Report this comment

  20. 20
    chawnghilh Says:

    Ruattea titi ka ngaithla a, Sialsuk pa pakhat (a hming sawi kher lo ila) chu inkhawm a peih lo khawp mai a. An inkhawmna hmun lah kha anmahni in (House Church) a ni lawi si a.

    Mi dangte an inkhawm lai khan a ni chuan thukah meilum aiin inkhawmho chu a hnungchhawn hmiah zel a. A hnungchhawn loh chuan inkhawmah a inngai ve mai a. Mahse, a hnungchhawn tlangpui, an thusawi zawng zawng hre ve vek chung siin, a ti.

    Han inher kual hlek sela chu, inkhawm a ni ve mai tur!

    Report this comment

Leave a Reply

You must be logged in to post a comment.