Kristian nun Nghet

July 31st, 2011 2:36 am by CFL

1 Corinthians 10:12 by Rev. Vanlalzuata

Pathian thu hi kan nunpui peih loh avangin a sawi dan dangdai leh a sawi dan maksak lamah kan ram tang a. Thilmak tihna hmunah chuan ka pa hawn ber emaw tih turin kan pung khawm luai luai a. Tawngkam thar kan chher chhuak a, mi dangte aia danglam ta luaah inngaiin kan in-show kual vel a. Ni tin nun hlamchhiahin kan inthuk siak a, mi dangte hriat ve loh hre bik niin kan inngai a, hming thar kan invuah ngial thin a. Nimahsela kan nun hi miten an awt chuang reng reng si lo. Engtin nge ni zel ang le?

Dinga inring chu fimkhur rawh se, chutilochuan a tlu dah ang e (I Kor.10:12).

Milem ziaktu pakhat hian Lal Isua lem ziak a tum a, Isua ang ber tura a hriat zawng turin mipui tamna bazaar hmunah a kal a. Lal Isua ang bera a hriat tlangval pakhat chu a thuttir a, a lem chu a ziak ta mawlh mawlh mai a. Chumi hnu thla khat velah chuan a mantirtu Juda Iskariota lem ziak a duh leh ta a. A hma ang bawk khan mipui tamna hmunah bawk a kal a, Juda Iskariota ang ber tura a rin, mantirtu ni âwm reng, sual hmel tak tlangval pakhat chu a thuttir a, a lem chu a ziak leh dawn a.

Chu tlangval chuan, “Ka pu, hmanni lawk khan helai hmunah bawk hian keima lem hi i ziak tawh a, a va mak teh sek ve, i ziak sual palh em ni?” tiin a zawt a. Lemziaktu chuan chu tlangval chu en vang vang chungin, “Tlangval, a va mak tak ve mawle, hmanni khan Lal Isua i an teh lul nen, tunah erawh chuan a mantirtu i lo ang leh hman tawh a nih hi,” a ti ta ngawt mai a.

Kan ram Kristiante nun nghet lo lutuk hi kan vei tlâng theuh va, a dik tak chuan a veitute nun pawh hi a nghet bik hek lo va. Chuvangin tumah inhmusit lova kan ngheh lohna lai hi invei tawn a, nun nghet nei tura tan kan lak a pawimawh a ni. He pa ang hian a changin Isua kan ang viau va, a changin a mantirtu kan ni leh mai bawk a. kan tha viau emaw kan intih laiin kan lo sual leh phut a, kan sual viau emaw tih laiin kan lo tha thar leh phut phut bawk a. Jakoba’n a fapa Reubena hnenah, “Nang chu tui anga nghet lo i ni,” (Gen. 49:4), a tih ang kha kan ni ve thin. Pathian thua kan tui lai rau rau chuan da leh mai mai thei hmel pawh kan pu lo va, no thum bela no ruk chhum an sawi ang maiin kan khat a. Nimahsela kan dâk leh vek vek chuan tui leh thei hmel kan pu hek lo. Hmana tui kha tunah an ro der a, hmana tui lo kha tunah kan tui thar a, tumah hi inhmusit tur kan awm rih lo a ni.

Vawikhat chu sakei hnu chhuitu pakhat hian intihuaisen takin ramhnuaiah sakei hnu a chhui a. A hmuh apiangte hnenah chuan sakei awmna an hriat leh hriat loh a zawt a. Anni chuan huaisen an ti hle mai a, an en zui vawng vawng mai a. Nakinah chuan thing kittu pakhat hi a va hmu a, a hnenah, “He sakei kalna lam hi i hria em?” tiin huaisen hmel deuhvin a zawt leh a. Thing kittu chuan, “He sakei sual tak hi a awmna puk pawh ka hria asin, i beih ngam phawt chuan ka hruai nghal ang che,” a lo ti a. Chutah zet chuan sakei hnu chhuitu chu a zâm ta a, chhuanlam siamin a kir leh ta daih a.
He sakei hnu chhuitu ang hian kan pianthar hlim chuan kan huaisen hle a, Pathian thu hi ka hre zo ta vek emaw kan ti a. Kan tui em em a, Upate kan sit rum rum a, inkhawmna hmuna mite an kal muang lutuk thinte hi kan ngai thei lo va, kan tur hmanhmawh a.

Nimahsela kan kal zel a, a nuna nunpuina tak tak ram kan thlen dawn meuh chuan kan zâm leh a, thua kan tuinate kha a lo chuai rawih rawih a, kan nun hluiah bawk kan kir leh thin a ni. Pathian thu hi sawi tui atan chuan kan duh hle a, Pathian hla pawh hi lampui mup mup atan chuan kan duh a, nimahsela ni tina nunpui atan erawh chuan kan ngam lo a ni. Biak Inah Thlarau Thianghlimin min pawl se tih kan duh a, Biak In pawn lamah erawh chuan Thlarau Thianghlim hi a hnawk kan ti deuh tlat a. Biak Inah thosi kan thli fai a, pawn lamah sanghawngsei kan lem thin a ni.

Vawi khat chu tuai pakhat hian hian hmeichhia emaw intiin hmeichhe hnute lem hi a insiam chawp a. Chu chu mi dangin an sut palhsak ta a, a khamphei kha a tung chho zâwngin a awm ta hah mai an ti a. He tuai ang hian Kristian thenkhat chu kan piangthar fuh viau emaw kan tih lai hian min sutu azirin kan danglam leh mai mai thin. He tuai hnute hi a sutu hian a su na hle pawh a ni lo va, siam chawp a nih avangin a danglam hma hrim hrim a ni zawk.

Kan Kristian nun hi siam chawp leh hawh chawp a nih phei chuan, sut kher loh pawhin a danglam leh mai thin. Naupang pakhat chu a piangthar ve a, a nu chuan a tirh dawn apiangin, “I piangthar tawh si,” a ti ziah mai a. Nakinah chuan naupang chuan a nu tirhna chu a ning ta deuh va, “Ka nu, ka piangthar peih tawh lo,” a ti ta hlawl mai a. Pianthar chu kan duh e, nimahsela piangthar nuna nun aiin piangthar lo nuna nun hi kan peih zawk si. Kan ram Kristiante hian kan kawngte hi chhut ngun kan mamawh a ni.

Tlangval pakhat chuan nula a hmangaihzia hrilhin lehkha a thawn a. Chutah chuan, “Ka hmangaihzia che hi lo hre teh. Nang nena kan inkarah hian sipai thuah sarih pawh ding khat tlat sela ka rawn pal tlang hrim hrim ang. Ruah khi muzuk fei pawhin lo sur sela ka do han thak ang, zaninah pawh hian ruah a sur loh chuan lo len ka tum dawn nia,” tiin a ziak a. A inhuamna a nasat teh reng nen, a tawpah chuan “Ruah a sur loh chuan,” a ti ta lek mai a ni. Keini ngei pawh hi inen fiah ta ila, he tlangval pakhat ang hi kan ni ve thin a ni lawm ni? Pathian thu hi a sawia sawi lamah chuan van khi kan hawlh zawk zawk a, kan sawi atang ringawt chuan “Hei chuan martar pawh a hlau hauh lo vang,” tih tur kan ni a. Nimahsela kan sawi kha kan nunpui dawn tak tak chuan chhuanlam ho te siamin kan chauhpui leh thin.

Pathian thu hi kan nunpui peih loh avangin a sawi dan dangdai leh a sawi dan maksak lamah kan ram tang a. Thilmak tihna hmunah chuan ka pa hawn ber emaw tih turin kan pung khawm luai luai a. Tawngkam thar kan chher chhuak a, mi dangte aia danglam ta luaah inngaiin kan in-show kual vel a. Ni tin nun hlamchhiahin kan inthuk siak a, mi dangte hriat ve loh hre bik niin kan inngai a, hming thar kan invuah ngial thin a.Nimahsela kan nun hi miten an awt chuang reng reng si lo. Engtin nge ni zel ang le?

Vawikhat chu mi thatchhe tak pakhat hi mitdel lemah changin mitdelho kutdawhnaah kut a dawh ve a. A duh anga a hlawk loh avangin bengngawng tawngtheilo kutdawhnaah a va kal a. Chutah chuan hlawk zawk dawna a inhriat avangin tawng thei lo lemah a chang a, an zingah chuan a thu ve ta a. Nakinah chuan amah hre chiangtu pakhat hi a lo kal a, “Nang chu mitdel kutdawh zingah khan ka hmu thin che a, engtik lai khan nge i lo tawng theih loh le?” tiin a zawt a. Ani chuan, “Ele, nimin atang mai khan,” tiin a chhang a ni an ti a. Lemchang na na na hi zawng, a tak an chan dawn hian an che sual nge nge thin a ni. Piangthar lemte chu a lemin an nung a, piangthar takte chu a takin an nung.

Krista ngaihtuah buk tawnna,
Hmabak theuhvin kan awm;
A sakhat leh kawrawng chu,
A bukin a lang dawn.

Tlangval pakhat pawh hi a thianten zu inpuiah an sawm a. Ani chuan, “Ka piangthar tawh a, zu ka in dawn tawh lo reng reng,” tiin a hnial tlat a. Nimahsela a thiante chuan an kai lui a, a hmaah zu no an chhawpsak a, a in duh chuang hauh lo mai a. Mahse an tulh lui a, a in ve ta nge nge a. Chu tlangval chuan, “Zu ka in duh tawh lo ka tih ka tih pawhin min tulh lui a, in thiam lo a ni,” tiin a thiante chu a hâu va. A thiante chuan, “Ni e, kan thiam lo va; nimahsela nang pawh inngaihtuah ta che, zu chu i in duh lo va, mahse i duh lohnaah khan i nghet bik lo a nih kha,” an ti ta then a.

He tlangval ang hi kan ni ve fo mai. A him chinah chuan thil sual tih kan duh hauh lo va, nimahsela hlep ruk tur remchang tak a lo awm chuan kan duh lohnaah kan ding nghet zo lo fo mai. Sual chu haw hle mah ila, huat phal loh hun a lo thleng leh a, chutah chuan kan tlu a, sual chuan mahni inthiam chawpna kawr min haktir vat a, “Eng nge a nih bik,” tiin mi dangte tlin lohna min hmuhtir a. Sual sualzia tak hi chu aw!!

Zirtirna dik lo lo pian chhuahna chhan pakhat pawh hi nun nghet

Similar Posts:

Recent Posts:

17 Responses to “Kristian nun Nghet”

  1. 1
    ReMpY_ScisSoR Says:

    Post riang leh lainatawm! :(
    kn tihsual palh a CFL hnenah thupha kn chawi troih2 e… -@mins

    Report this comment

  2. 2
    ReMpY_ScisSoR Says:

    Post chu a thupuiah a lut don chiah a, a tawp daih nih khi..ngaihnom tho e

    Report this comment

  3. 3
    Ozima Says:

    Tinge taka insiam sak nghal vek law law lo a mi a @admin, a mah paw’n a lang kimlo a tih tak kha maw le!

    Report this comment

  4. 4
    CFL Says:

    Inkhawm kan bâng ta.
    ADMIN. te: comment in hawng ta chu ka lawm hle mai. Khitia chhumbung taka a awm insiam tha lo erawh ka sawisel phak bak a ni tawh e. In rawn tarlan chinah pawh khian mi pakhat talin hlawkna kan hmu a nih chuan post hlawhtlingah ka ngai tho mai.

    Report this comment

  5. 5
    blackmagicwoman Says:

    he post hi a thrat nen a vanduai chungchuang eee! lol a comment theihloh bakah a tawp lam a la chhum zui!! @CFL, ka hlawkpui tho a ni aw, lo lunghnur reng2 suh :-)

    Report this comment

  6. 6
    VaiVa Says:

    @CFL, BaKcHeh sawi ang khian lo pawm mai. Tunah a lang famkim tawh em?

    Report this comment

  7. 7
    CFL Says:

    @5 pi Bmw nge nge, tilawmawm thin mange.
    @6 VaiVa, la lang kim lo.

    Report this comment

  8. 8
    VaiVa Says:

    nun nghet tih zawh a mi khi draft ah i rawn dah belh thei em?

    Report this comment

  9. 9
    PKfanai Says:

    Rev.Vanlalzuata thusawi hi ka la ngaithla lova. Mahse, thusawi thiam leh ngaihthlak ninawm lo tak ani ang tih ka hre mai. Engahmaw? He a sermon hi han chìk ula, illustration 7 (pasarih) zet a hmang hman a. Ala zo lo lehnghal! Hetiang chi sermon hi a ninawm ngai lo. A fiah a, a ngaihnawm duh bawk. Tawngkam thiam taka thu uar thiam an nih a, nuih dar dar tur a awm zeuh zeuh phei chuan….

    Report this comment

  10. 10
    CFL Says:

    @8 VaiVa, i zahawm mange. Ka hman velah ka rawn tum ange.

    Report this comment

  11. 11
    bk Says:

    A tawp laklawh hle tak mai a :-D
    Pu Zuata sermon hi ka hre zauh zauha, thu hmuikeu sawi tur a hre hnem a nia…

    Report this comment

  12. 12
    lianchhiara Says:

    Pu Zuata hi chuan a sawi ve hluak mang lova, a sawi chhun erawh a takin a chiang thei khawp mai.

    Report this comment

  13. 13
    LR_rengsi Says:

    ”….remchang tak a lo awm chuan kan duh lohna ah kan ding nghet zo lo fo mai.Sual chu haw hle mah ila huat phalloh hun alo thleng leh a, chutah chuan kan tlu a.Sual chuan mahni inthiam chawp na kawr min hak tir vat a…” a va dik em..kei misualah ngei pawh hian. Pu CFL ti lawmawm e. Sunday sermon tha tak ani.

    Report this comment

  14. 14
    vakul Says:

    ngaihnawm chhumbung—a ni

    Report this comment

  15. 15
    chawnghilh Says:

    Comment theih loh reng a lo inhawng a ni maw … Last paragraph khi a kimchang lo palh a ni ngei ang! Analogy a tam fer fawr hle mai a, a ngaihnawm khawp mai!

    “Ruah hnuhnung apianga phun sawn theih ringtu inti hi kan tam tawh,” mate ainawni’n a ti.

    Thihpui ngam, nunpui thei si lo ringtu
    hian eng lawmawm nge a dawn ang aw?

    Apostol Petera’n, “Chi chhe thei lova piang thar (chunglam atanga hrin) in ni zawk si a,” a tih kha kan rama piantharna kan lo tih ve nen hi chuan a hrang deuh a ang viau.

    Pastor Kiaulinga pawhin, “Pulpita thu a han sawi meuh chuan, cham hlen se an tih tur khawpa thiam; a khawlai nun an va hmuh chian erawh chuan pulpit lawn nawn leh ngai hauh lo tura an duh …” ti lam zawnga a ziak kha —chutiang chu kan ni fur ber e.

    Gospel Singer thenkhatte lah kan khatih teh sek bawk thin kha!

    Report this comment

  16. 16
    Teatak2 Says:

    A tlai deuh toh naa, han ti ve leh hram teh ang. Lemziaktupa khian thlirna tlang hran atranga a thlir chuan mi 1 kha midangin a hmu a, MZP OB pakhat missionarya kal ta in Chakma leh Bru te a thlir dan tur min ngaihtuah tir. Mizo culture poh hi Evangelist thlir dan leh Pastor hmuh dan a danglam thei a, Silchar pel lo leh Australia a awm reng hmuh dan poh a dang khop ang. Kan tarmit bun dan a zirin a danglam khop ang. Biak In chhunga kan awmdan tur poh Salvation army leh Synod duhdan chu a inang lo fo. Hmangaihna tarmit atrang lo chuan thil hi kan hmu phe ruai duh khop mai.

    Report this comment

  17. 17
    KingJulien Says:

    1st kan tum tehreng nen… CFL nge nge..

    Report this comment