Zoram Hmangaihtu C. Pahlira kan chan ta

July 30th, 2011 10:43 am by jamesrdm

Pu C. Pahlira, Mizo Union hruaitu hlui, Mizoram tana vision nei tha berte zinga mi leh Mizoram hmasawnna tura huaisen taka bei a, achievement tam tak nei tawh chuan Kum 87 mi niin tukin zing dar 7:40 khan Chatuan ram min pan san ta. Mizo Politician te zinga ka ngaihsan, tuna politician zawng zawng

te pawhin an zah rawn leh Aizawl leh khaw hrang hranga CP Road sial chhuaktu kan chan ta mai hi Mizoram tan channa nasa tak a ni ngei ang.

C. Pahlira hi District Council hunlai khan term 2 chhung MDC a ni a, EM a ni bawk, UT laiin MLA ah thlan tlin a ni leh bawk. Mi huat leh sawisel pawh tawk nasa hle mah se Mizoram tan a la pawimawh dawn tih a hriat avangin Huaisen takin Aizawl khawpui leh hmun hrang hranga kawngpui sial hna a thawk a, a huaisenna leh thawhrimna avangin vawiina kan kawngpui te hi kan nei thei hram a ni. Pi pamham lo, ram hmangaihtu dik tak hi a dam laiin ka titi pui ve hman a, khatia tar chak lo tak a ni tawh chung pawh khan ram hi a la vei em em mai a, ama hnen atang hian kan political history pawh ka hriat belh teuh a ni.

A ruang hi a thihna hmun, Aizawl Civil Hospital Private Ward atangin ama chenna in, Upper Republic, near City Car Bazar & Rentals-ah lak phei a ni tawh a. Zaninah tlaivarpui a ni ang a, naktuk chhun dar 12 ah vui a ni ang. Hei hi amah uitu zawng zawngte kan inhriattirna ni teh se.

Also from H. Vangchhia -

“Pu C Pahlira hi Kum 1924 January ni 7 khan a pianga, kumin January ni 7 khan kum 87 a tling chiah a ni. Hun reitak atang tawh khan lung lam natnain a tlakbuak a, he a natna hian a ti buai ve thin hle. July ni 15 khan a pum na avangin Vaivenga Hospital (Care Hospital ni thin Civi Hospital bul ami) ah admit a ni a, investigation hrang hrang tih a ni a, Pumpui ulcer a neih bakah Jaundice a nei tih hriat a ni a, tin a pum a puar nasa hle bawk. A natna hi a critical deuh avangin Aizawl Civil Hospital lamah July ni 25 khan dahluh a ni leh ta a ni. Civil Hospital-ah Cabin-ah enkawl a ni a, A pum a puar nasa a, a chau in a hniam chak hle bawk. Doctor te chuan a natna hi cancer a nih ring deuh mahse a ma taksa dinhmun en in hmuhchhuah tuma beih chiam khan awmzia a nei lutuk tawh lo niin an ngai a, nachhawkna te nen theih ang angin an enkawl chho ta phawt mai niin thudawnna chuan a sawi.

Pu C Pahlira hi Mizo District Coucil-ah khan Term 2 MDC a ni a, PC Sorkar lai Bye-Election-ah khan Sateek bialah MLA-ah thlan tlin a ni.

MDC a nih lai khan Aizawl khawpui hi a lo la thang zel anga, lirthei leh mihring kan la pung nasa dawn a ni tih Pu C Pahlira hian a ngihtuah phak avangin theihtawp chhuahin kawngpui sial hna a thawk a. Mimal ram tamtak su tlangin mi an khum leh rel pawh a tawk nasa a, nakinah an la lawm dawn ani tih hriain mi sawiselna te chu pawisa lovin a bei zel a, Iptepui leh chemtum nen amahin hma a hruia a, tunhnu-a Aizawl khawpui ti nuamtu kawngpui pawimawh CP Road ti-a hriat zui tak hi a sial chhuah vek an ni. Pu C Phlira hian Aizawl mai bakah Lunglei, Kolasib, Champhai leh Vairengte-ah te pawh kawngpui sial hna hi nasa takin a thawk bawk. Heng a kawngsial tamtak zinga thenkhat hi chuan CP Road tih hming an pu zui lem lo niin hriat a ni.

Pu C Pahlira sulhnu thangthar ten kan hriat atana pawimawh em em pakhat chu. Tuna new Market Sobji Bazar kan tih hi hmanah chuan Dawrpui Biakin kawt phei kawngpuiah an in chap darh mai thin a, hun kalzel tur thlir thiam Pu C Pahlira chuan hei hi tha ti lovin a thlang sakawr in tuana New Market kan tih takah hian a suan thla ta a ni.

Ram leh hnam tana a theihna zawng zawng hlan tu, Politics hi ram rawngbawlna a nihna anga hmang ngam leh hmangtu, hausak nana hmang velo, mi huaisen Mizo Hnam Pasaltha Pu C Pahlira hi Zofa te tan hian a van hlu tak em.

Source: Vana LPS

Similar Posts:

Recent Posts:

61 Responses to “Zoram Hmangaihtu C. Pahlira kan chan ta”

Pages: « 1 [2] Show All

  1. 51
    mr.Duhlova Says:

    38
    lushai_er # Mi hlim pakhat i tih chu, Pu Saitawna,(Fam) (Chaltlang Pa Tawna tuikhuah neitu thin) Shillong (Happy valley) a awm ta kha a nih hmel.

    Amah ngeiin, hetiang deuh a, Pu Laldenga an dawr thu leh Pu Laldenga’n a in lamlet vaih chuan a nunna a tan a hlauhawm tur thu a sawi hi min hrilh thin.

    Thudik leh midik, ram hmangaihtu diktak hi chu, hun in a lailang zel chu a nih hi……..

    Report this comment

  2. 52
    Benny Says:

    Amah ang Mi huaisen, fing leh remhria, depde si lo hi a lawm mizoramin a mamawh chu. RIP Pu C.Pahlira. Ka ui takzet a ni.

    Report this comment

  3. 53
    hmingtea Says:

    CP Road Kolasibah khuan a awm thin a .Kan tet zual lai chuan eng tihna nge ka hre lem lova.Tin ka lo tlangval hnu erawh chuan pu C.Pahliran a lo duan tih kan hriat chuan kan politician zingah ram vei tak tak ani tih ka ringhlehlo ta nghal var a.
    UT hnu a politic a a hming lang ta lo hi a pamhnai ka ti thin khawp mai.

    Amah hi ka pu Chatuahkhuma te nen Mizo Union ruh rum rut thin an ni a MDC ni ho thin.

    A hniakhnung zui ngam ram hruaitu kan va mamawh tak em
    Lalpan a chhung a kalsan tak te awmpuiin thlamuan rawh se. (W) (F)

    Report this comment

  4. 54
    lushai_er Says:

    #51, mr.duhlo : Muallungthu khua Pu Thanghleia pawh kha thlarauvin a hriattir a, Political Party hrang hrangte kha an inrem a tul zia kum 1965 vel khan a sawi thin an ti.

    Report this comment

  5. 55
    aorta Says:

    mi ropui tak ni in kaa hria. amah ang mi hi kan mamawh a, kan nei thei tawh lo rih anih hi.pawi ngawt mai

    Report this comment

  6. 56
    Benny Says:

    Tunlai kan ram hruaitute ho hi chuan pu c. Pahlira kha chu a leh mawl an leh tih ang chu maw le!

    Report this comment

  7. 57
    Maverick Says:

    MNF ho chu an lo van tenom angreng ve mole. Hman deuha Zawngrengte-an ‘Hel’ a ruai an tih poh ka mak poh ka ti vak talo. An lo che thring uih eeeeeeee mai… Terrorist nen danglam na an neilo a lo nih tak chu…
    Eng terrorist mah hian ‘terrorist’ an inti duh ngailo hrim hrim. An inla ‘Freedom Fighter’ vek alom.

    Report this comment

  8. 58
    lushai_er Says:

    Politics lam a inbeih vak hi thil tha ber pawh a ni lo va, amaherawh chu thil awmdan a hmu leh hria te ziah hi keini thangthate chantawk a ni mai si a.

    India Sipaiin inchhung a Hnam Sipai tawm an kah chilh a, Hnam Sipaiin inchhung a Union-ho tawm an kah chilh bawk a.

    An mi thah turte an nghawngah an kai a, an thlan tur an laih tir a, an laih zawh khan an kap hlum mai thin tih an sawi te han hriat chuan awih a har letling zawk. Thawnthu ni awm a ni.

    MUP buatsaih “Rambuai leh Kei” tih kha lo chhiar ve teh u…! A bengvar thlak khawp mai !

    Report this comment

  9. 59
    chawnghilh Says:

    C. Pahlira —kan inlengte zinga pakhat, thingpui sen hang dawma rawn lut ve fo a ni. A fate Hmangaiha leh Nunmawia nena inkawm ngeih kan ni lehzel a. Amah Pu C. Pahlira hi chu ka pa aiin a rual u hret a.

    A fapa Hmangaiha kha a boral hma a, Shillong-a football kan khelh honaah heading a tihsual avangin a lua thisen-zam a chat a, a boral phah ta a.

    Nunmawia nen erawh hi chuan “Boy” tia inko kan ni thung a. Kohhran Thianghlim-ah awm mah se, ka chungah an zia a chhuah chuang ngai lo. A inah pawh hian riak ve ka ni a. A pa hming ni awm taka CP Road tih hi “Community Project” tihna a ni zawk lo maw?

    Thenawm leh thenawm inkara vantlang kawng sialtu ropui tak a ni thin a, thenawm leh thenawm intithiam lo rem pahin an ram feet 1½ ve ve vantlang tana pe ve ve turin a remsiam mai thin a. Vantlang kawng zim leh chep tak awmsa kha feet 3-in a lo zau belh phah ta a. Tun hnu lehzelah atira lungawi lote kha lawm taka siam kumkhua theia kha C. Pahlira a ni.

    A thil tih tawhah lawmthu sawi nawn lehin ani chu muang takin chawl se. A chhungte Lalpan thlamuanin awmpui zel rawh se.

    Report this comment

  10. 60
    jamesrdm Says:

    @Rumtea “Upper Republic, near City Car Bazar & Rentals-ah: advertisement”: Advertisement lam a ni lo, amah Pu C.Pahlira ngei hian a building luahtu City Car Bazar & Rentals hi ama address ziahna ah C/o ah a hmang ziah alawm. Amah uitu leh ngaisangtute’n a vuina in chhim duh takin leh a in awmna lai tak hre lo te tan hriat awlsam dan zawngin ka rawn thailang mai a ni e.

    Khunkhan takin darkar hnih vel chu ka titipui tawh a, ka ngaisang hle a ni. A thih khan Damdawiin atanga a chenna in panpui dawna motor-a a ruang zawn luhnaa ka tel ve thei kha vannei ka inti hle a ni.

    Report this comment

  11. 61
    saumbura Says:

    Mizote tana Model Politician pakhat chuan mual min lo liam san leh ta. Tu nge a hniak hnung zuai dawn le???? Ka ngaisangin ka zah hle mai.

    Ask not what your country can do for you,
    Ask what you can do for your country.

    ‘Pu Pahlir, i ram tana i hmathlirte chu tipuitling vek thei lo mahla,Zofate hian kan theihnghilh tawh ngai lo ang che.Zofate zingah nang anga ram hmangaihtu an la rawn chhuak anga, i duhthusam ram, hmuh chaka i thlir fo chu an la tipuitling dawn e. H (F) reawm leh lungngaih awm tawh lohnaah chuan thlamuang takin chawl mawlh ang che. (W)

    Report this comment

Pages: « 1 [2] Show All

Leave a Reply

You must be logged in to post a comment.