Zorimawi 1900 – 1975 ……Chhunzawmna

June 30th, 2011 9:30 am by H.Vangchhia

Joseph Zokunga chu Kum 1970 – 77 chhung M.R.A. hmunpui Puna bulah music leh rimawi lemchan (Rock Opera) lamah intuaihriam in a awm a, zai leh opera ah a khaidingtu (Director) niin Asia ram hrang hrang N.Korea thlengin hun an hmang a, Europe ram hrang hrang te leh U.S.A. ah te show an nei a, miin an hlut hle a.

Joseph Zokunga hi a vanglai chuan Octave 4 chhunga hla te hi chu harsatna nei miah lovin a sa kual thei a, a chhuanawm hle a ni. 1977 ah Zoram ah lo lutin Musical Drama (Opera) ‘Down to Earth’ leh ‘Prodical Son’ te a rawn chhuah a, a show neihna apiangah mipui an tleh dul dul mai thin a nih kha.

Kum 1979 a Zoram Sawrkharin Rimawi Zirna, Institute of Music & Fine Arts a din khan Joseph Zokunga chu a enkawltu ah hmangin tun thleng hian Zoram hmun hrang hrangah Beat & Solo Contest buatsaihin he Institute ah hian Music Instructor dangte nen thalaite music an zirtir reng a, he kum 1979 atang hian Music Timing/Beat/Bar kan lo mausam thin chu a pawimawhna leh a hmandan Zoram thalai te zingah thehdarh a la ni reng a ni.

Tin, Joseph Zokunga chuan hetia Music zirna a hun a hman hma hian Sweet Combination Band ah hlawhtling takin Bass perhin a zaitu pakhatah a tang a, Instructor dang te nen IMFA Band dinin kum 10 chhung zet chu Zoram Sawrkhar Band angin hun an hmang a. Delhi tlang thlengin vawi engemaw zat an lo feh chhuak thin a ni. Joseph Zokunga hi Mizo te Music kalphung dika min kaihruaitu, a vai tawng takin ‘Music GURU’ ropui tih loh rual a lo ni lo. Tin, Mizo zinga Musical Drama (Opera) puitling hlawhtlinpuia sapram thlenga zahpuiawm lo a show nei thin hi Zofa ah hian an la piang leh angem le ?

Hetih rual hian Burma a kan unau te Rimawi lama an inpekna leh an thiamna zarzotu te chu Zoram khawvela Mizo thalaite hi kan ni. Kum 1972 khan Mandalay ah Buta leh T.Zorampela ten Band hlawhtling tak an din a. Album pakhat Kawl Recording pangngai takah an lo siam tawh a, hei hi Recording pangngaia Mizo Band te hnuhma neih hmasaber a ni. Heta an member te chu T.Zorampela – Lead, Buta – Bass, B.Vanlalsiama (L) – Rhythm, Zothanmawia – Drum te an ni a, a zai tu ah Hmangaihveli leh Lalhlima te an ni.

Tichuan March 1975 khan Tahan-ah Mizo chek mil Rock rimnam si in Band Thar ‘ZODI’ a ding ta a, chuta member te chu
T.Zorampela – Lead
Ramthanmawia – Bass
Thangluaia – Drum
Thangvela – Rhythm te an ni.

An zaitu te hi an thahnem hle a, a chhan chu Kawl ho zinga an zai chuan Kawl hla thiam, Mizo hla sa thiam khatiang anga a remchan dan azira inpawt kual kha an ni a, a hlun deuha zaitu a an hman te chu Thangluaia, B.Vanlalsiama(L), L.Hlunmawii, Lalenkawli te an ni a. Kum 1977 khan an Album hmasaber ‘Damlai Pialral’ chu Mandalay ah 4 trac recording ah an siam a. 1980 khan ‘Phengpheleng’ leh ‘Rosepar’ chu Mandalay ah bawk an siam leh a.

1982 khan ‘Chingal leh Saum’ tih chu Rangoon ah an siam thung a, hetah hian Lead Guitar ah Ronghaka a ni thung.Heng ZODI hla te hi kan sawi tawh angin Mizo sentimental phawk chhuak Recording changtlung taka siam ni bawk, khang hunlai kha Tape Recorder 3/4 Band lar lai lo ni bawk nen, Zoram pum kha a al hneh takzet a ni.

Burma khawpui pakhat Mandalay atangin Butta’n Mizo Rock Band ‘Vulmawi’ chu kum 1976 khan a lo din ve leh ta a. An hla kalphung pawh Rock tak mai a ni a. Cassette-a ngaihthlak aiin an chezia chuan mipui a hip em em a, thalai lamin an tuipui zual. Anni hian Gospel Album ‘Agape hlamawi’ tih an siam a, Winter Studio Mandalay ah kum 1976 khan ‘Raldawna leh Tumchhingi’ tih Album an siam leh a, Oasis Studio Rangoon ah kum 1978 khan ‘Parmawi rimtui’ tih an siam leh bawk a.

‘Kawl a eng tan ta’ tih album kum 1982 khan May Studio Rangoon ah an siam leh bawk a ni. Zoram hmun hrang hrangah vawi 20 chuang Live Concert an nei a, miin an hlut em em a. Vulmawi leh Zodi Band te hian Zoram rimawi ah harh tharna nasa tak an siam a ni. Tunah hian Thawngnoa (Bass) leh Zothana (Drum) te chuan mual an liam tawh a. Lalruanga a zaitu U.S.A. ah a awm a. Butta chuan Aizawl ah Art Gallery a enkawl a ni.

Hetih hunlaia Aizawl leh Lunglei lama Band ding reng reng khan Mizo hla an sa ngai lo. Mizo hla chu Solo a sak tur deuh ah an ngai a, hetia Zodi leh Vulmawi in Mizo hla hmanga an han zai ta hian nghawng a nei nasa hle a ni.

Kum 1975 kuma Zorama Beat Contest hmasaber a’n awm te kha a pui ngei mai. A.R.Cinema Hall ah neih a ni a, Hall bang te kha pawh darh vek a ni a, a zai tur pawh pawn lam Stage hnuai atanga vah luh a ngai a. Lunglei atangin Murray’s Group, Lawngtlai atangin Lai Singing Melodies, Aizawl atangin Tha VANS, Young Generation, Don’s Weaving Beat, Flaming Splinter. Mipui lah kha a chhunga thu pha chin kha chu 10% (10 a pakhat) pawh an tlinglo. Hmun awm se, he Beat Contest hi chipchiar deuha ziah a ch^kawm khawp mai.

Zorama Mizo Group, Mizo hla sa (Gospel band) Sanglianthanga’n kum 1975 khan ‘Crusader’a din a, an rimawi a felfai thain ngaihthlak a nuam a. Khang hunlai khan Drum set leh Electric Guitar kha a kristian lo deuha ngaih a ni a. Pulpit hmaa han chhawp phei kha chu a la hla khawp mai. Anni Gospel band pawh hi kohhran hetiang lama lo in hawngzau hmasa Salvation Army lamah hun engemaw chen chu an awm phah.

Anni band hian Zoram dung leh vang kha an hrut chhuak a, album pawh mizo hla hlang Pathian fakna rimawi chikima style hran nei ngata an duhtawka an siam kha hralh a tlain hlut an hlawh hle a ni. Anni ho hi Zoram chhung chauh nilo Mizo te chenna Manipur leh Tripura te pawh an fang chipchiar hle.

Khata Crusader member te kha Pu Khawvelthanga, Information Officer kaihruainain
Sanglianthanga – Lead/Singer
Lalrammawia – Drums
Lalropuia – Bass
Thangkima – Rhythm te an ni.

Kum 1978 khan Pu Rosanga (P&S) Tape Recorder lian hmangin album an siam a. Otto ah Transistor Radio te modify hmangin Album dang an siam leh a. Otto chuan a hnuah Recording puitling a din ta nghe nghe a ni. Crusader hming hian Album 3 an siam a, a mimalin Pu Sanglianthanga hian Album 8 a siam leh bawk a, tin Soundtrack Music (Programme Music) El Bethel hunlai atang khan a lo siam tawh a, Mizo ah chuan a ching chhuaktu a ni bawk.

Tin 1970 chho vel ah Mizo Rocker dik tak Jeremy Zobiakvela(L) khan Aizawl thalai chu Rock Music lamah min chawk phur em em a. ‘Young Generation’ band dinin ama hlaphuah tha tak tak hmang khan Zawlkhawpui a nghawr vel a ni ber a. Mizo music history ah chuan ani kha arsi lian a ni. Tin, Zokhaw lamah chuan Biate khi rimawi lamah chuan an harhvang viau mai.

Kum 1962 Krismas leh Kumthar inkar khan K.Lalkailiana, Lalthara(L), V.L.Sawma ten Pu Hauzuala te inah Musical Group an lo din a, anni hi tingtang zaipawl an ni a, Violin, Banjo, Ukulele leh Double Ban te nen Biate tlang an lo nghawr nghing thin a. Kum 1963 a Pu Pachhunga Manager, Pu Zanawka’n Biate a Belpui Cup a chhuah denchhen khan Solo Competition an lo buatsaih a, endiktu te chu, Malsawma Colney, Saibela, Dosanga te an ni a.

Hmeichhe zaithiam berah Lalkovi Biate, Mipa ah Rothanga Chalrang te an ni a, lawmman ah Laltin an khai haw thei bik anih chu. Hemi hnu hian a remchan dan azirin Tuipui leh Tuichang vel Beat Contest an lo buatsaih a, a hnuhnung ber chu 2008 October thla khan Biate Hall ah Sound system chikim nen Biate Hall ah neih a ni a. Beat Group 10 chuang an chhuak a. E.Lungdar Beat Group pakhatna an ni. He thu ziaktu hi endik turin a kal ve nghe nghe.

Heng ka han ziah tak te hi kum 1900 atanga 1975 vel thlenga Zo rimawi inlumlet dan a ni a, 1975 atanga 2010 thlenga kan Zo rimawi dinhmun chu a rem a nih leh kan la ziak leh dawn nia. Tin, tuna ka ziah te hi Fakna hla lam nilo ka rawn thlur bik a ni e.

Laltlanthanga Pachuau
Upper Republic, Aizawl.

Similar Posts:

Recent Posts:

24 Responses to “Zorimawi 1900 – 1975 ……Chhunzawmna”

  1. 1
    Pc-a Says:

    ka hawng hmsa.

    Report this comment

  2. 2
    TuaiSialA Says:

    A hmasa ami nen ka’n save hial teh ang. Mizo music thanlen leh hmasawn dan a ziak chipchiar ka ti a. A sentence pawimawh lo lai leh chuangbang pakhatmah a awm lo.

    Report this comment

  3. 3
    Pc-a Says:

    OTTO Band lo pian dan leh an chanchin hi ka chiang chaj khawp mai.

    Report this comment

  4. 4
    Sm0kester Says:

    Bengvar thlak khawp mai. B. Lalthansiama tih zawh a “love sign” lo lang khi chu ka hrethiam tlat lo mai..GOOD POST

    Report this comment

  5. 5
    Sm0kester Says:

    B. Vanlalsiama zawk a ni e.lol

    Report this comment

  6. 6
    m¡(khual)p@ Says:

    Ngaihnawm hle mai.. Beat contest hmasa ber, kum 1975 a AR cinema hall a neih chanchin chu hriat va chakawm ve aw? Mizoram a Beat contest neih tawh zawng2 chanchin te rawn ziak leh teh, pliz!!

    Report this comment

  7. 7
    valtolo Says:

    Bengvarthlak thei hle mai. ZODI’s Ronghaka khi chu ka hria, Ramhlun South-ah sawn tunah a awm, zo zial Rs.5 man a lei thin :D

    Report this comment

  8. 8
    Keimah Thingtlangpa Says:

    1975 thleng ni si 2008 te kan hmuh nawk nawk chu(h)!!

    Report this comment

  9. 9
    bucko Says:

    A va han ngaihnawm in a va han bengvar thlak ver le….. chiang vak lova ka lo hriat ve te kha tunah chuan a chiang ta e…. post tupa a lawmawm e… ngalfim in dam ang che… (L) :-D :-)

    Report this comment

  10. 10
    PKfanai Says:

    Article tha tak dah that reng tlak anih hi. An hunlai na na na chuan ropui leh thiam tak hlawm an ni. 1986 a Joseph Zokunga band Shillonga an han che tak tak mai kha chu aw, Mizo nih a nuam asin. Guiterist Dawnga kha a thiam dan a pro. Khawp mai. zodi, Vulmawi, Crusader leh Sweet Combination te, Jb leh The Rock wizzard te tak kha aw. An hun lai na na na kha chuan…

    Report this comment

  11. 11
    saint sammoo Says:

    kei chu ka lung a leng tlat.. Ka comment lo mai ang.. sob..sob…

    Report this comment

  12. 12
    kongkeki Says:

    A van tha ve, rawn ti zel teh post tupa

    Report this comment

  13. 13
    PayableOnDeath(Zrma_C) Says:

    Lalruanga leh Siam an zai, Drummer Zothna……
    tih hla te kha a awm thrin in ka hria. :-D

    Report this comment

  14. 14
    bucko Says:

    He he he…….. PayableOnDeath(Zrma_C) #13 chu chiang lo ve hle mai maw……… :-P

    Report this comment

  15. 15
    PayableOnDeath(Zrma_C) Says:

    @14 Nia, Chiang vaklo kan hunlai ni lo a… :-D

    “Zokhaw lamah chuan Biate khi rimawi lamah chuan an harhvang viau mai.”
    Biahte sawi takah chuan, hman kum an beat contest ah pawh tute emaw ni in ‘Sweet
    Child O mine’ an sak kha in en ve tawh hlawm m? YouTube ah pawh awm in ka hria,
    Ropui mep2 tak ani haha!

    Report this comment

  16. 16
    mate ainawn Says:

    @ 3..PCa..OTTO Band i hriatchian chak chuan..Khitiang hun lai a Best Drummer Saithangpuia Sailo..tuna USA a awm mek khu zawt rawh. Mizo Musician hlun..tuna Post a hming lang ho khi a Play pui tawh deuh vek an nih bakah ‘The Vans” ah te khan a tel a..OTTO Band ah pawh a thawk a..Tunah khuan French Embassy..Washington DC ah play turin an inbuatsaih mek bawk.

    Report this comment

  17. 17
    shailendra Says:

    He post chu a va hlu mai mai ve.

    Report this comment

  18. 18
    Mama_B Says:

    He post hi a va hlu em! Thanx HV. Ka’n save hmak ange

    Report this comment

  19. 19
    chawnghilh Says:

    Ngaihnawm bengvarthlak lung kuai hle mai!

    Report this comment

  20. 20
    mate ainawn Says:

    Khitiang hunlai a Musician Pakhat pawh, a lo thleng tlai lutuk a, an Boss deuh ber khan.”I va tlai ve..kan nghak reng che lawm” a ti a,”Zodin ah Cinema ka en a lawm mawle” a ti a,”Eng film nge..tunge chang Tu Pa..?” a ti a..”Antho Quinine a channa a noa, hmuhnawm lutuk.” a ti

    Report this comment

  21. 21
    mate ainawn Says:

    Khitiang hunlai a Musician Pakhat pawh, a lo thleng tlai lutuk a, an Boss deuh ber khan.”I va tlai ve..kan nghak reng che lawm” a ti a,”Zodin ah Cinema ka en a lawm mawle” a ti a,”Eng film nge..tunge chang Tu Pa..?” a ti a..”Antho Quinine a channa a nia, hmuhnawm lutuk.” a ti

    Report this comment

  22. 22
    H.Vangchhia Says:

    Thuhlawm (para) tawp ber atanga 3na ami Double ban tih khi, “Double bass” anih ka ring.

    Report this comment

  23. 23
    darkhuanga Says:

    beng a v ti varin lung a va tileng si ve aw

    Report this comment

  24. 24
    boihchhuks Says:

    va bengvar thlak ve. Chhunzawm ngei ang che

    Report this comment