YMA Day chibai

June 15th, 2011 6:30 am by chhana

A hmasain chhiartute YMA day hlim taka hmang ṭheuh turin duhsakna ka hlan a che u.

YMA Day pualin YMA nihphung hrang hrang ka han lawrkhawm e.

A din hun:

1935 June ni 3, Thawhṭan zan a nia, Zosap Missionary ṭhenkhat leh Mizo Kristian hmasate inkhawm bang chu ruahpui vanawnin a dan avangin Biak In bul lawka Pi Zaii quarter-ah chuan an tlan luta. Hetah hian thu mai mai sawi pahin Welsh rama Young Welsh Association chungchang chu sawikaiin Mizo ṭhalai pawl din ve chu ṭhain an ring ta a.

An pawl hmingah chuan ṭhenkhat chuan Young Mizo Christian Association (YMCA) tih te an han rawt a, lungthukna tak an neih lawk loh hnuin Rev. David Edward (Zorema pa) khan, “Kristian tan bik anga kan tih chuan mi kan hip tawk lo vang a; Wales rama Young Wales Association ang deuh khuan ‘Young Lushai Association’ i ti mai ang u hmiang,” a han ti a. Chu chu lungrual takin an pawm tlang ta a ni. A hawn ni atan June ni 15 an ruat a, an ṭin ta a.

Tutenge tel thei?:

Hemi zana Pi Zaii Bangla-a lengkhawmte hi chiang taka hriat ni tawh lo mahse, hengte hi an tel ngeia hriat a mi Rev. David Edward (Zorema, pa) Upa D. Thianga, Rev.L.Evans (Pu Niara) Upa Chawngzika, Miss K. Hughes (Pi Zaii) Pu Muka, Rev Chhuahkhama, Pu Vankhuma, Pu L.Kailuia B.A, Pu L.H.Liana Upa CH.Pasena.

A reltu leh a din chhuaktute han en hian ‘Young’ han tih awm hmel an awm lem lo. ‘Elder’ inti awm pui puiin ‘Young’ an intih nachhan hi eng nge ni le? An sawi danin heta ‘Young’ hi naupang emaw, tleirawl emaw, ṭhalai emaw ni lovin Mizo hnam an lo sawina a ni, hmasawnna kawng zawha ṭhanglai mek Mizo hnam an lo kawhtir a ni. An mahni ho pawh khan ‘Young Lushai Association’ hi ‘Mizo thanglai’ tiin, Mizo tawngin an sawi ve thin a. Pawl member ni tur pawhin naupan leh upat thuah kum bithliah a awm ngai lo. Vawiin ni thlengin hei pawh hi pawl kal dan a la ni zel.

YMA hi kan sawi tak ang hian kan Missionary-te din a nia, anni thinlungah chuan Pathian rawngbawlna peng pawimawh taka an ngaih vanga an din a ni ngei ang. Mahse tuna kan kalpui danah hi chuan a khawvel ta mah mah lo maw? Kohhran ṭhalai pawl leh YMA chu kan enhrang ta mai niin a lang. YMA-a inhmang chu kohhran zaipawlah an tel ngai ta mang lo.

Tin, chubakah kohhran upa fate chu YMA-ah an inhmang khat hle bawk.

YMA hi tarlan tak ang khian kan missionary-te din mah nise, Rev. David Edward (Zorema pa) sawi ang khian Kristian tan bik liau liauva din a nilo tih hi hriat a pawimawh hle. Kan Juda unau, member active tak tak an tam a; sakhaw dang betute pawh an awm mahna. Amaherawhchu, hetih mek lai hian sakhuana atana din a ni lo tih la vawngin ṭhenkhat chuan YMA thiltihnaa Pathian thu leh ṭawngṭaina lam hlamchhiah ta an tam. Heng zingah hian hruaitu hlui zinga mi PL Liandinga hi Kristian a ni ta lo emaw tih tur khawpin YMA prog.-ah kher lo pawh ṭawngṭai kan ching fo hi a sawisel fo nia mawle. Mak chu ka ti khawp mai. Kristian nihloh chu a duh awm der silova.

YLA ATANGIN YMA-AH:

Lushai aiah Mizo: Kan hriat angin he ram hi tunhma chuan “Lusei Ram” (Lushai Hills) tih ani thin. Sipaiahte tangin ram pawnah an va chhuak a, lehkhate pawh an va zir a. Eng hnam nge sawi a ṭul tawh chuan Hmar, Ralte, Pawih, Paihte etc. annih sawi lovin Lusei ka ni an ti ṭheuh ṭhin. Zirlai pawl an indin pawhin Lusei Zirlai Pawl (Lushai Student Association) an ni mai a. Zaipawlin khua an fan pawhin “Lusei ZaipawIin Sylhet an tlawh, India ram an fang…….” an ti zel.

Khawvel Indopui pahnihnaah Politics luipui a lo nghing a, awptu Sapho tin leh India ram Independent rual rualin Mizo zingah Politic lama harhna leh insingsakna nasa tak a lo thleng ve nghal a. Chuta hnam rilru inthlei vel chuan ram hming leh hnam hming tihdanglam duhna a rawn thlen ta a ni. A ngial a ngana lehlin chuan “Young Lushai Association” tia an lo din ngei pawh hi “Lusei Thalai Pawl” tihna a ni a. Chutiang chu a nih laiin 1947 Politics chhuah hlim maiah khan Lushai Student Association ‘Mizo Zirlai Pawl’ tia thlak a ni a, chumi kum October ni 7-a Central YMA Committee chuan YLA hming pawh chu ‘Young Mizo Association’ tiin an thlak ve nghal a ni.

Hruaitute:

A hmasa ber:

1935-36
President : Rev Lewis Evans (Pu Niara)
Vice President : Miss Katie Hughs (Pi Zaii)
Gen. Secretary : Ch. Pasena
Asst Secretary : Vankhuma
Treasurer : Rev David Edwards (Zorema Pa)

Tun a mi:

2009-2011
President : Lalchungnunga
Vice President : C. Zoramliana/J.H. Zoremthanga
Gen. Secretary : Lalbiakzuala
Asst Secretary : Vanlalruata
Treasurer : R. Lalngheta
Fin. Secretary : J. Lalsailova

Engzatnge kan nih?:

Member : 3,62,220 kan awm meka; group 47 awmin branch 777 kan awm thung. (KṬP leh YMA danglamna chu KṬP ah chuan branch aiin group a te zawk, ha ha ha.)

Ka source hi 2009 inkhawmpui lai daih kha a nih avangin a dikhlel deuh mai thei. Website hi an update thalo lutuk a.

Sub-Headquarters, hi panga hengte hi an awm:

1. Champhai
2. Kolasib
3. Lunglei
4. Mamit
5. Serchhip

General Conference:

General Conference hi tum 57-neih a ni tawhin a hmasa ber chu 1941 khan Aizawlah neih a nia; thupui chu ‘Kan tihtur’ tih a ni. A hnuhnung ber ve thung chu 19th. Tuesday-21st. Thursday 2010 ah Lungleiah neih a niin thupui chu “Khawtlang nun siam that” tih hman a ni.

General Conference-ah hian tum nga kal ve tawhin ka kal hmasak ber na chu 1998 kuma Kawrthah khuaa neih khan a ni a; hemi ṭum hian ‘Ram leh hnam humhalh’ tih hman a ni a; ṭhian ka neih vak loh avangin nuam ka ti lo hle. Hnahthiala 2000 kuma ‘Ram leh hnam humhalh’ tih tho thupuia hman a nih ṭum khan rorel palaiah ka tel ve. Ka kal hnuhnunna ber chu 2006 kuma Saituala ‘Hunawl hman ṭhat’ tih thupui neih a nih tum khan a nia; a remchang bawka; khawvel pum ang pawha ka kal chakna Tam dilte ka va tlawha; a manhla kher mai.

Motto:

1, Hun awl hman ṭhat: Mi ṭhenkhat chuan, ‘hun awl a awmlo’ emaw ‘hun awl neih chu hnam mawl zia’ tih ang dawn dawnte’n an sawi ṭhin. Hun awl hi chu a awm ve renga; chu chu kan nitin hnathawh karlak ie: len vah, infiam,tv en adt. hetiangah hian kan ṭangkai pui theih tura hun hman thiam hi hunawl hmanṭhat chu ni berin ka hria.

2, Kristian nun dan ṭha ngaihsan: Kan Mizo pui, Juda naa in saphun ta ṭhenkhat chuan ‘Kristian nun dan ngaihsan’ tih ang deuhva ngaiin an helh deuh thin. Kristian nundan ṭha ngaihsan tih tur a ni a; chumi awmzia chu, hnam fing pawh, hnam mawl keini aia kan hmuh hniam zawkte pawh nise an tihdan tha chu kan copy zel tur a ni. Chutiangbawkin, Kristian nun dan ngaisang mai lovin an nundan ṭha, mawi leh duhawm lai chauh kha kan entawn tur chu a nih hmel.

3, Zofate hmasawnna ngaihtuah: YMA hi a lo din tirh aṭang renga Kristianna nena inzawm tlat, Kohhran Puithiam ten an din a ni a. Kristian nundan ṭha, mi tamtak ngaih a tlahniam mek ni a lang chu chawinung thar leh turin YMA Member-te hian mawhphurhna pawimawh tak kan nei ṭheuh mai. Chumi atan chuan kan theih ang angin Kum 2011 chhung ngei hian uar deuh zawka hma la thar turin kan in sawm a ni.

YMA leh kei:

YMA-ah hian ka phak ang tawkin ka inhmang ve ṭhin, ka chanvo san lai berin section comt. leh branch sub. comt.-ahte ka tel ve ṭhin. Kum khat chu librarian ka ni ve bawk. Hman deuhva Mission Vengthlang Branch YMA-te’n rukru an dawp naa kut an lo thlak nat deuh palh avanga a boral phah khan mi tamtakin an dem luih luih a nih kha. An lo tina palh deuh a ni maia; ka dem hran lo. Amaherawhchu, kha thil thleng avanga lung in tangte an chhuah ṭuma chawimawina parṭhi an lo awrhtir erawh kha chuan ka thin a khei zak mai thung.

Pi Khawlkungi paw’n a Padma Sree hlu tak chu hlan let a duh phah hial a nih kha. Keipawh, YMA-a member ka nihna bansan ka duh phah rum rum hman. Amaherawhchu, a chunga YMA-a ka nihna ka tarlan tak aṭang khian lo bansan ve ngawt ila; tun ka ui ka ar min tihdawn loh zia ka chiang sia; chuvangin ka bansan leh zak ta deuh a ni. Life member hial nih phah khawpin YMA-ah ka pianthar phaha; ka lawm khawp mai.

Ka lawm e.

YouTube Preview Image

Similar Posts:

Recent Posts:

40 Responses to “YMA Day chibai”

  1. 1
    sisen Says:

    Ch1bai ule

    Report this comment

  2. 2
    triplestar Says:

    Misual zawng zawngte YMA Day chibai u le. Kan chhiar ve a nge awmmmm

    Report this comment

  3. 3
    H.Vangchhia Says:

    Chibai ule

    Report this comment

  4. 4
    triplestar Says:

    YMA a ‘Y’ hian mizo hnam young a kawk a nih chuan kha tih hun lai kha chuan a awm tho mai, tunah erawh hi chuan hei, kum 70 chuang a lo liam ta, mihring chu nise a tar ve bam tawh ang chu. Ka sawi tum chu kan la young reng dawn em ni, hawh u kan nuna naupang zia hi paih i tum tawh ang u.

    Naupang nia kan inhriat reng chuan eng tikah mah kan puitling thei ngai lovang. Puitlin a hun tawh e, kum 70 lai a liam ta.

    Report this comment

  5. 5
    Xingibera Says:

    YMA Day a lo thlen hi chuan mahni khawlam te pawh a ngaihawm thar thin. Mizo tan chuan ni pawimawh tak a ni in ka hre ve thin.. Hlim tak leh tangkai taka YMA day hman turin duhsakna ka hlan a che u

    Report this comment

  6. 6
    m¡(khual)p@ Says:

    ‘Kristian nun dan tha ngaih san’ Veng chhung atanga hnawh chhuah, ensan tih fo mai te, YMA ang zawng a in elna ( inter village football tournament/Red Ribbon, adt..)a kan inti buai luih2 zel thin te hi a kristian kan ti em? Uirenu ‘Sualna neilo chuan deng rawh u’ titu kan Lal Isua Krista duh dan a ni angem?

    Report this comment

  7. 7
    muansakhi Says:

    YMA day chibai vek ule. Pawl ropui tak a ni. Chuan tun tum a kan Central YMA President pui roh hi a thusawi [mi sawi chhawn leh] ka hriat chu a ‘bon’ angreng riau nia. Sairawkherh a vai perh tur a thalai te fuihin amah pawhin a perh tawh thu te a sawi a ni awm a. Ngaithlatute lawm lah chu a la hlawh phian lehnghal a ni awm e. Nangni awm ve ula sawi tha in ti ve angem?

    Report this comment

  8. 8
    ZerO Says:

    Fiamthu: YMA motto te khi mu chungin a tih theih vek alawm le.

    Mu chunga lehkha kan chhiar hian hunawl kan hmang tha a lo ni reng a.

    Mu chungin Kristian nundan tha a ngaihsan theih a, mu chung vekin Zofate hmasawnna a lo ngaihtuah theih reng alawm! :-D

    Report this comment

  9. 9
    Rumtea Says:

    YMA day chibai vek u le. He ni ah hian mahni in dahthain, midang te tan kan nun leh hun hmang theuh ang u

    Report this comment

  10. 10
    ZerO Says:

    Rumtea, ‘in’ kan dahthat chuan khawiah nge kan awm tak ang? ‘Indahtha’ i tihna em ni? ;-)

    Report this comment

  11. 11
    PKfanai Says:

    YMA day chibai vek ule. Mizo ram leh hnam dinhmun hlauh awma a awm dawn tak tak, thupui-hlapui a, sipai rual ropui tak anga che chhuak thei tur pawl ropui chu YMA hi ani e. Mizo ten kan hman thiam theih loh leh kan chhiatpui nasat em em ‘Ruihhlo’ a dona kawngah sawichhiat leh tlangrel a phur na a, kei chuan, zofate tan Himna kulhpui nghet a ni ka la ti reng. Kan sawi sel duh anih pawhin ‘destructive’ lovin, ‘constructive’ zawngin aw. Kum 23 ka nihin YMA branch 14 awmna Group ah office bearer ka ni ve a, ‘Record’ (hruaitu naupang ber) ka ni thei angem aw?

    Report this comment

  12. 12
    ngaihdan tha a Says:

    Y.m.a day leh khawchhait hi a inhmeh tawh e

    Report this comment

  13. 13
    Pc-a Says:

    Chhana, Mizo zinga thisen pe tam ber vawi 53 pe tawh an tih kha i ni mial lo maw? Tualsiala lah khan hmannia i post a i sawi kha a awih loh viau bawk si.

    Vai ho khuan vawi 100 chuang chuang an lo pe thei bik nia. ‘Mizo zingah Century siam thei tur nghah mek a ni.’

    Report this comment

  14. 14
    TuaiSialA Says:

    Young Mizo Association-a ‘Young’ awmzia ka hriat phah e. Ka lawm e.

    I tan chauh,
    TuaiSialA.

    Report this comment

  15. 15
    XaiA Says:

    YMA day chibai vek u le.

    Report this comment

  16. 16
    Pc-a Says:

    YMA day chibai vek ule. (Y)
    MLTP Act. Hman hmaa kan YMA kal dan kha chu kohhran mi tan chuan a tihbaiawm deuh thin bawk a lawm, zurui inhmukhawm kha kan ni deuh ber a. Tunah eraw a ni ta lo. Rui chunga khawharin kal te pawh thil zahthlak a ni ta.

    Report this comment

  17. 17
    muantea Says:

    Rawlthar chhuah atanga ka lo kurpui ve thin YMA chuan a NI special tak a lo thleng leh ta! Ka YMA member-puite chibai vek ule. A lawmna hmun YMA hall lamah ka zuk then thla ve ang e.

    Report this comment

  18. 18
    pui76 Says:

    YMA Day chibai vek u le
    ‘Chanhai riangvaite puitu
    Thlafam lusun te hnem tu
    Kristian eng chu an lo chhi
    Duhaisam chu he ngei hi’

    Report this comment

  19. 19
    muantea Says:

    Kan thawhpui Zosangzuala pawh Lunglei Dist. a thisen pe hnem ber lawmman a dawng a, vawi 40 a pe tawh.

    Report this comment

  20. 20
    Amaria.vch Says:

    YMA vul zel rawh se. (Y)

    Report this comment

  21. 21
    Pc-a Says:

    Pi,Pu Kristian hmasa te kha anlova khawngaihthlakawm tak em Zu hmunah te khan an han pem bo san leh duak thin a, a hranpaa dinthat leh te kha a ngai a. Biakin ah te khan an lo e vel.

    Report this comment

  22. 22
    lrpa Says:

    Good post (Y)
    YMA hi awm ta lo se kan chhe khawp ang.
    YMA dam reng rawh se..
    YMA Day chibai vek ule.

    Report this comment

  23. 23
    H.Vangchhia Says:

    lrp, i dam maw, i thleng chho tawh ang chu maw?

    YMA dam reng rawh se

    Report this comment

  24. 24
    shailendra Says:

    YMA Day Chibai vek ula…

    Report this comment

  25. 25
    lrpa Says:

    23 @Pu Hv..ka dam e. Ni 4 khan ka thleng..thanks

    Report this comment

  26. 26
    PKfanai Says:

    Pu PL.Liandinga hi maw? Translator tha el khen a ni a, Sherlock a lehlin avangin Literature huangah a hming a dai leh tawh ngai lovang. YMA erawh a theih leh thiam dan dan in a sawi sel thin. A life history chhui let ila, chhan thatè alo awm mahna? Psychological thil a ang tlat. Pu Ch.Saprawngan sapho a huat tlatin chhan tha tak a nei ang deuh kha a nih hmel e.

    Report this comment

  27. 27
    H.Vangchhia Says:

    lrp (Y) (B)

    Report this comment

  28. 28
    Benny Says:

    YMA DAY chibai u le. YMA vul zel rawh se

    Report this comment

  29. 29
    vlchinzah Says:

    YMA hian hian hun khirh khan tak tak te alo paltlang in ruam thuk tak te alo dai kai tawh thin. Kan hnam in nghahna kan kulhpui ani a, a chang chuan thahnem ngaih luatah kal pai nawk nawk chang anei na meuh e, mahse YMA hlut na leh tangkaina erawh in kian ni anei lawng nge.

    YMA hian a kuang lo a nawr ti in selna tam tak a awm thin dikna chin pawh a awm ngei ang mahse kan hnam,sakhua etc tan a ahlutna hi hmu thiam fo ila sel angaihna lai ah siamthat tum zel ang u.

    @Chhana, PL LIandinga in sawi lang kher erawh khi chuan ka ngaihdan ah i post hlutna a ti hniam.

    Report this comment

  30. 30
    nidoz Says:

    YMA vul zel rawh se

    Report this comment

  31. 31
    CyberThug Says:

    YMA leh MZP a din chhung chu Mizo hnam tan lungngaihna tur a awm love…
    Sawitu – CyberThug

    Report this comment

  32. 32
    malsta27 Says:

    Tha hle mai, Selna tam tak hi chu awm thin mahse chhiatni a kan in nghahna ber chu a la nih rih zel hi maw, hemi hi kan hmu thelh mai thin pawh a. (Y) (Y)

    Report this comment

  33. 33
    chhana Says:

    @Pc-a, ni love, kha kha chu ka unaupa Lalawmpuia Varte, Civil Hospital-a thawk a nih kha.

    Report this comment

  34. 34
    PayableOnDeath(Zrma_C) Says:

    YMA day chibai vek u..
    Bai bai.

    Report this comment

  35. 35
    Manghaka Says:

    Bengvar thlakin a ropui hle mai, sawi angin a din chhan leh thil tum te, kan hriat reng a tul, a dintu te an zah awm hle mai, YMA damreng rawhse.

    Report this comment

  36. 36
    Krista Says:

    Hmanlai hun anga tlawmngai, mi nun chhan nana thisen vawi 50(ka tisual em aw) lai lo pe tawh a post tu kan misual thian a ni hi kan chhuang em em e. Kei hian ka chawimawi e.. (Y) :-D (Y) (G) YMA zel ang che.

    Zofa zawng zawngte YMA chibai mawlh mawlh u!

    Report this comment

  37. 37
    kawlhawk Says:

    Bengvarthlak kher mai. (Y)

    Report this comment

  38. 38
    karei Says:

    Kan hruaitu te khi anva young silo ve ;-(

    Report this comment

  39. 39
    karei Says:

    Tunlai YMA chu Politics khelh nan leh sawrkar hnathawk promotion hmuhna ang tawh zawk

    Report this comment

  40. 40
    tlana_fanai Says:

    YMA Day chu kan lo hmang zo leh ta reng mai. Mizoram chhung hmun hrang hrangah a hlawk thei ang bera kan hman ka beisei e. He ni lo thleng hian tlawmngaihna, rinawmna leh tumruhna min pe thar mawlh rawh se. Tlawmngaihna i vawng nung zel ang u, kan hnam rohlu a ni si a.

    Report this comment