Mizo Superstar thlang ve thung ila.

June 5th, 2011 4:15 pm by doc_lib

Mizo Icon, Idol, Zo-Star, Hmarthlang Lelte, Lunglei Idol leh The Hunt thlengin kan thlang a, chumai nilovin Super Model thlengin kan nei ta. Hetiang boruakin kan thalai te rilru leh ngaihtuahna a luah zawh mek lai hian India sorkar ropui tak chuan kan ram chhungah ngei rel kawng luh tir a, kan ram pal tlanga Look East Policy hlawhtlin tir tumin hma a la vut vut tawh mai bawk si a. Chuvangin he Zoram hi chimrala a awm loh a, India ram state dangte entawn tlaka kan chhuah theih nan leh Globalization avanga Zoram hi a ral loh nan Mizo Superstar thlan chhuah hi a ngai ta ani. He inelna hi chu zaithiam emaw, pianmawi emaw lam ani tawh lo anga, Lehkhathiam, hriatna zau, India foreign policy leh international politics thlenga tui pui phak te in elna ani thung ang.

Tute nge tel thei ang : He inelna ah hian eng subject pawha graduate chin an tel thei ang. Idol emaw Icon angin a dilna form siam ani ang a, chutah chuan eng subject nge he in elna ah hian a tel pui dawn tih chiang taka ziah lan tur ani ang.

Engtianga in elna chu kalpui tur nge ni ang : A hmasa berin written exama in eltir tur ani. Judge tura ruat ten subject tina atan question siam se (Written exam atan chuan MCS syllabus te pawh hman ni ta se), chuta tang chuan cut off mark e.g 60% hmu phak chin te chu live interview hmachhawn turin an tling ang. Heta tang chiah hian in elna chu a pawimawh zual dawn ta ani.

Live interview ah hi chuan mahni subject chauh bik ni tawhlovin, hriatna zau lamah te, India ram politics leh policy mai bakah international politics a an ngaihdan thlengin Judge ten zawhna an zawt tawh ang. Contestants te pawh hemi atan hian an inbuatsaih that hle angai dawn a. Mahni subject bakah lehkhabu hrang hrang leh News paper hrang hrang a bikin National News paper te pawh an bih ngun a tul dawn ani. Chuta tang chuan a titha zual sawm (top ten) thlan leh ni se. Tichuan top ten te chuan interview kaltlang bawkin inelna nei leh se, duh leh Icon/Idol ang deuhin a tichhe zual pakhat zel tla ve ta se. Tin interview hi English a tih ni se, amaherawhchu Mizo tawng a lo lettu awm thung se. Contestants ten zawhna an chhan danah te, English an lam dan leh an tih dik loh lai thlengin Judge ten huai takin comment pe thin se.

Lawmman : He inelna a a titha zual 5 te chu a pawisa faia lawmman pek aiin UPSC exam-a an tlin theih nan Coaching an kalna tur ngaihtuah sak ni ta zawk se. Coaching kal duh lo an awm anih chuan, a aiah top ten tling te kha an tih that dan a zir a koh ni ta se.

Tute nge Judge ah tang ang : Jugde atan hian subject tin atangin expert pakhat an tel ngei chu a ngai anga, chubakah IAS, IPS, IFS leh service dang dang a mi pension tawh emaw, tanglai emaw awm bawk se. Civil / Central Services a lo tling tawh te experience hi contestants ten an hlawkpui  em em dawn ani.

Eng vangin nge he inelna hi a pawimawh : Hetiang inelna hi zoram hian a mamawh a, kan thalai te hian an mamawh tawh ani. Icon leh Idol thlan en ringawta kan naupang School kal rual ten hun an hman ai chuan hetiang in elna hi thlir tam ta se an rilru ah thiamna lama in elna a va pe nasa dawn em. Kan duh emaw duh lo emaw rel kawng hian kan ram a rawn lut dawn a, chutiang bawkin ‘Globalization’ hian min kal pel dawn lo. Chuta tan chuan kan ram hi kan buatsaih a ngai a. Chutiang huna kan ram a ral loh nan kan thalai te hi kan hruala, kawng kan kawh hmuh a ngai.

Tun hma kum 30 liam ta khan Mizoram chu IAS her chhuahna khawl ang hiala ngaih ani thin. Tunah erawh IAS emaw IPS/IFS lam emaw eng service ah pawh hian Mizo thalai lut an va tlem ta em. Kan thalai te hian ‘competitive mind’ an hloh ta ani. Chuvangin kan thalai te rilru ah Competitive mind kan tuh leh a, India rama hna pawimawh ber ber hi an vawn leh theih nan hma kan lak pui a pawimawh ani. Hmasawnna kawng kan pawh dawn apianga kan la inpeih lohna rilru hi kan paih a, kan thalai te hi khawvel hmachhawn ngam tura chherchhuah a hun tawh ani.

He inelna avanga kum tin IAS emaw IPS emaw IFS emaw, central service dang engemaw talah pathum tal kan thalai-te an hlawhtlin theih chuan a va hlawk dawn em. A hlawkna tel tu tur chu kan Zoram hi a ni dawn ani. Icon leh Iol kan thlang, a ropui e. Amaherawhchu Icon leh Idol hian zoram pelin hmasawnna atan min zuan pui dawn lo ( Icon leh Idol ka sawisel chuang lo). Central in Look East Policy a buaipui lai leh ‘Globalization’ in kan ram a tuam mek tawh lai hian kan thalaite hi a thlir liamtu ni lovin a lungphum pawimawha an tan a hun tawh ani.

Indian Foreign Service ah hian mizo tlangval ngei hi 20 tal pawh awm se, India Foreign policy chu Zoram tlangval ngeiin an kuai lek mai dawn ani. Chutiang bawkin State tina Chief Secretary emaw Central-a department pawimawh tak tak khu Mizo tlangval IAS ngeiin a enkawl hnu leh law and order kengkawh tura IPS, Mizo tlangval ngei India ram hmun tina an awm tawh hun chuan Relkawng avanga inchimralna hi kan hlau tawh lo anga, Globalization hian eng ang pawhin min nuai mahse, India ram hotu lawk lian liana Mizo ngei an thut ther fuk hnu-ah chuan Mizoram hi a nghing hek lovang. Hnamdangin in population hmanga min chimral an tum pawhin keimahni zawkin kan thiamna hmangin India ram ropui tak hi kan chimral tawh zawk dawn ani. Khaile Kan visual media te khan heti lam hawi zawng hian tan han la leh teh u. LPS nge Zonet che hmasa dawn le. Zoramin tun hun atan a ko che u a, Zoram thalaite hian in hmalak hun an thlir e.

Similar Posts:

Recent Posts:

51 Responses to “Mizo Superstar thlang ve thung ila.”

Pages: « 1 [2] Show All

  1. 51
    Chalkima Says:

    A that viau hmel rualin a utopian mah mah lo maw i rawtna hi. Hetianga a chhip thuai lam ai chuan a bulthut lama tan laka Central Sawrkar hna lak zawng zawng innghahna NCERT syllabus zir nachang kan hriat ve hunah chuan hma kan sawn ve em em ang. Phaia tette atanga sikul kal ve thei lo tan chuan NCERT lehkhabu ring ho han el chu a har ve bawk a ni. Thil tih hup hup leh lar zawnga promote kan tum zel chuan kan value system hi a chhe tawlh tawlh zawk angem le?
    :-(

    Report this comment

Pages: « 1 [2] Show All