Chik chhuak nun

February 28th, 2011 6:00 am by Dina Pa

Mihring nunah hian duhawm leh mawi, fak tlak leh chawimawi tlak, ze duhawm tak mai kan awm laiin nun rimchhia, midangte’a an thinhrik, an chhungte leh an lam hnai nih tak ngial pawh hrehawm an tih nungchang leh khawsa zia pu hi kan awm a.

Hetiang nunze in anglo tak 2(pahnih) an awm lai hian keimahah chuan ‘Chik Chhuak Nun’ a lo thleng ve hlauh mai le. Ka rilru leh ngaihtuahna fim tak ka hmang chung pawhin he nun hian a duhna hmunah tak mi hruai lut a. A duh tawk a ngah hma chuan chu hmunah chuan tanhmun min remtir a. “Aw…..he ‘chik chhuak nun’ hi chu ka va ning tak em” ka ti vawng vawng a. Mahse a sawt silo.

Midang an awm ve ang tih hi ka hlau ngawih ngawih a ni. Ka rilru a ti chau-in, ka thlarau leh taksa pawh a ti zawi zova. Chakna leh thathona reng ka nei lo. He ‘ Chik chhuak nun’ ka lo neih dan chu hriat tlak ni lo mahse chhiar theihin ka dah ve reng reng tur a ni tih rilru ka pu tlat a. Chu rilru chuan tun hun hi min hruai thleng ta a ni.

Zing dar thum a ni a, Zoram mipui tam zawk chu tui taka an mut hun a ni a. Zan hram rannung an reh tawh a, zing lam sava an la tho chiah bawk silova, a reh vung vung mai a. Thawm ka hriat chhun, khual bawng laka tual bawng inhrosa thawm emaw ka tih hial chu kan thenawmpa hnar ri a lo ni a. Chu lo chu thawm dang reng a awm lo. Mahse, thawm ri dangin a zui thuai dawn tih erawh keimahah hrilh lawktu a awm tlat, chu chu ‘Chik chhuak nun’ lo in tan tak tak na tur a lo ni reng leh nghal.

Keimaha hrilhlawkna lo thleng chu,hetiang a ni. Ka pum chhungah hian nasa taka indona a thleng a. Kargil War lai India leh Pakistan sipaite laipui-a an insai thawm ang mai a ani a. Kawl kil li atanga khawpui lo ri ang mai hian ka pum chu a ri kual ruih ruih mai a. Achang chuan ruam atanga lo irh chhuak ni awm tak hian a rawn inhrosa a. A chang leh tlan chhe chunga ral kap ang mai in a rawn ri leh kawrh bawk a. Chu mai chu ni lovin, ka tha neih ang ang pawh chu, ka kut leh ke pawh ni lo, ka taksa peng zawng zawng a kumkar leh kilkhawr ber laiah chuan sawr bing a ngai a.

Tha han thlah zauh ila chu ‘mualphona’ a thleng nghal dawn tih ka hre reng mai si a. Tang fan fan chungin bathroom ka pan a, chutah zet zawng chik chhuak nun hi a takin, a tak takin ka tawng ve ta a ni.  Ni dangah chuan he room ka luh hian keimah atanga chhuak chu proportion tha takin, nunphung tibuai miah lo-in ka manage mai thin a. tun tum zet chu a proportion a dik lo lutuk a, a buaithlak ta a ni. Rough taka kan pakla hisap pawh hian a ratio hi 95% – tui 3% – solid, 2% – mawm niin ka hria. Hetiang taka chhungril a buai hian miin ‘Chik chhuak nun’ an lo nei thin a lo ni.

Chutia bathroom chhunga  tanhmun ka thawhsan a ka din rual chiah te chuan ngai teh…….. a ‘next’ ami tur ni awm tak hi ka chhungrilah chuan a tla ri rawi rawi a. Tun hun atan a ni dah lawmaw tiin kan thu hniam leh thuai a. Engemaw chen ka nghah hnu pawh chuan engmah a thleng leh ta silova. Zuai raih hian bathroom chu ka chhuahsan ta riai riai. Khum tlang ka thleng a kan mu ta zan mai a. Mahse, rilru nuam taka mut erawh a har hle a. Engtikah nge ? Enganga hmanhawhin nge? Ka thawh leh ang tih ka ngaihtuah a.

Bathroom ka luh ngun poh leh a hma aiin ka tuai hret zel niin ka hria a. Ni hnih chhung zet ‘Chik chhuak nun’ ka’n neih hnu phei chuan a contralto part sa tlak pawh ka awm tawh lova. Chik chhuak nun avang vek chuan ka zawi em em mai a. Hetiang dinhmuna ka awm lai tak hi chuan Hm…..buan chaklo an tih te hi chu ka lakah chuan Sai an ni hial ang.

Tha thlah ngaitheilo lai  ‘Special Area’ avang chuan rilru a tih paukhauh theih hauh loh. “My Dear, ka vawih………. Tin, ka haw nghal dawn” tih kha rilru-ah a lian em em bawk.

Ka ‘Chik chhuak nun’ tih tawp a nih theihna atan hian Doctor dik tak te, intihre ve hrim hrim te, experience lo nei tawh te leh sawi ve hrim hrim te hnen atangin damdawi chi hrang hrang tha tak tak ka dawng nual a. Ganja tui sawr pawh min in tir a, eng a ang lo. Opium pawh tha an ti mahse ka ngeih tham ei tur ka nei lo a niang, ngai ka awh. Hatkora tui fir, Japan hlo, Kawlthei hnah tui sawr, Wood Vinegar, Lungthi etc etc a tam hle mai. Mahse a vanglai chuan damdawi tha a vang hle a.

Chikchhuak laklawh ti tawp hmak thei erawh a hlauhawm mai thei bawk. Ka dampui ngeia ka rin chu Upa Thankunga sawi ‘Saphai Mit’ ngei kha a ni. Min pe sela chuan ka dam ngei ngei ang tih hi ka ringhlel lo. Min pe chuang lova, Ka lu chunga kut nghatin hriak thianghlim min thih lova, chuvang chuan ka dam har niin ka hre ta ber mai. Hmana ka hriat ve thin S.G. leh Mum – uk te kha a tha tawh lo em ni aw ka ti a. Doctor te lah chuan min chawh der lova.

An damdawi min chawh thisen zama thun chi lah chu ka lo hre sual a, Orphan leh Matron ti mai hian ka hria a. Engtia dawn sawn chi ni dawn maw ka ti hman nghe nghe a. Cifran leh Metronidazole an lo ni a. Thisen chaw khai bakah  O.R.S. tam tawk in tur an ti bawk a. O.R.S. tui chi Frooti type aiin, a dip siam sa sachin pocket tiat vel tur chu an recommend a. Thil tui tha tak, tui lem lo tak a ni a. Ka that deuh hnu phei chuan tui/thingpui hang nena chi leh chini liah hmeh ka duh rum rum a. Mahse Doctor thu zawm leh Nurse thu awih hi thil tha ber a ni tih erawh ka pawm.

He ‘Chik chhuak nun’ ka neih chhunga min rawn tlawhtu, Cigarette zu chunga lo kal an awm erawh a zia lo hle a. “ Thian tha chu ni lo la, thal fang char” tia Rs.200/- chawi tir mai ka duh a. Mahse ka ti ta em lo. A hnu–a lo kal pahnih pawhin an zu a. Thiam loh an inchantir lo, enge a chhan?  Ka lo thurualpui thinte an ni tlat a ni. Engpawh nise, chik chhuak nun hi nun retheihthlak, tha leh zung mai baka tuisik pawh heh tak mai a ni a. Kekawrte condemn tawh pawh hman zel ngai nun a ni a.

He nun neih lai ngat hi chuan kekawrte reng reng phelh nuam a piang a tha a, ro har erawh a tha lo. Tin, thal lai tui harsat lai phei chuan he nun hi neih duh hauh loh tur a ni, tui a hek tlat. Chhemhulna khawl nei ila chu a tha fu ta ve ang. Engle khawle, he chik chhuak nun tlansan a, nun thlamuang ka nei ta hi ka lawm a. Duhsakna tawngkam tha min hlantu zawng zawngte chungah ka lawm bawk a ni.

Similar Posts:

Recent Posts:

8 Responses to “Chik chhuak nun”

  1. 1
    Fugitive Says:

    a lo ni maw?

    Report this comment

  2. 2
    H.Vangchhia Says:

    A thupui chu kan nuih huk chu a… :-$ tih palh

    “My Dear, ka vawih………. Tin, ka haw nghal dawn” tih tawngam hi Chhimtuipui rafting kan kal thin laiin Pu Lalneihsanga khan alawm thei khawp mai. A sawi a a nui kur kur thin, a awm ta der mai si lova, lung a tileng mange!

    I kawthalo i sermon pui thiam kher mai a :-P

    Report this comment

  3. 3
    Benny Says:

    Zing thang2ah muk deuhvin ka chhiar tana, a rei tial2a ka khi suk2a ka khi ta vur2 mai. Vanneihtluanga nau i ni hawt e. I ziak thiam hle mai!

    Report this comment

  4. 4
    RL Says:

    Good morning phawt… (C)

    Class ban huna chhiar ah ti phawt teh ang (I)

    Report this comment

  5. 5
    ma-a Says:

    A thupui ringawt chhiar chuan,’engchu a awmzia ni dawn maw’? ka ti hman!A thu han chhiar chhuah chuan beisei loh lam ah kan peng daih ..hehe.. :-P

    Report this comment

  6. 6
    TuaiSialA Says:

    Ka rin lohna lamah daih! A va hlimawmin chhiar a va ninawm loh tehlul em! I chik chhuak nun chuan min tihlim takzet. ‘Kawthalo’ tih thumal hi i hmang miah lo va, i sawina a ni tih erawh a chiang em em tho si. Thuziak i thiam ngei mai.
    Chik chhuak nun hi chu tlangkang tënau a ni ringawt.

    Report this comment

  7. 7
    Zodin_RM Says:

    I va ziakthiam tak em (Y) , adawt leh ah :-D haha
    ‘a kawthalo hmanhmawh tawwk in ek in ah a tlan lut, ek in kawngkhar a hawng chiah a kekor elastic rul a lo suih tak pek chu ni in’ tih fiamthu kha ka hre chhuak zawk. Hmanhmawh thil ah chuan buaithlak viau ang, min tihlim hle maia he thu ziak chuan. (Y)

    Report this comment

  8. 8
    Kawnga Says:

    Ka khat a tha lo, ka hnih a tha lo, ka thum a tha lo…… sawm thleng han tichho zel teh.. :-)

    Report this comment