Klinefelter’s Syndrome

November 30th, 2010 10:45 am by caribou

Post khat man ah mahni rilrua awm ang ang, ziak ve leh phawng mai teh ang. Tunlaiah tuai an pung tual tual a, tuai chungchang sawi chhuah changin Klinefelter’s Syndrome hi sawi chhuah a ni ve fo thin. Enge a lo nih chiah tih hi ka hriat ve dan, a chepa kai atanga chhuiin ka han sawi ve hrim hrim ang e.

Thenkhat te’n thiam taka love story ngaihnawm tak tak an ziak lai te, zantiang tawnmang, suihlunglen, phuloh Di zun, hmangaihna tih lampang thu lungkuai tak tak an ziak lai leh , Misual Charity lam pang kan khel mup mup lai hian pure science lam ka’n ziak ve daih ang e.

A thupuia luh hmain sex determination in human hi sawi zau hmasa phawt ang. Chuti lo chuan a fiah thei dawn tlat lo.

Mihring hian chromosomes 46 (pair 23) kan nei a, pair khat hi pa atanga lokal a ni a, pair khat dang leh chu nu atanga lokal a ni. Heng chromosomes te zingah hian hmeichhiana leh mipana siamtu bik an awm a, chungte chu sex chromosomes an ti. Mihringah sex chromosomes pahnih a awm a, chungte chu X leh Y chromosomes an ti. Hetah hian hmeichhia leh mipa kan inang lova, hmeichhia ah chuan X leh X a in pair a, chutih laiin mipa ah ve thung chuan X leh Y a in pair ve thung. Mipa in Y chromosome kan nei a, hmeichhia in Y chromosome an nei ve lo. Chuti anih chuan mipa ti mipa tu chu Y chromosome a ni a, hmeichhia ti hmeichhia theitu pawh X chromosome pahnih inkawp tlat te hi a ni.

Klinefelter’s Syndrome chu le:

Hmeichhe chi leh mipa chi a insiam lai hian chromosomes pair te kha a half ah an tlahniam ta a. Mipa chi in a chromosome half a keng a, chutih laiin hmeichhe chiin a chromosomes half a keng bawk a. Hmeichhia chuan chromosomes 22 + X nei chi a siam a, mipa chi erawh chuan 22 + X emaw 22 + Y emaw a lo nei thin. Hmeichhe chi leh mipa chi a lo inzawm hian 22 + X leh 22 + Y emaw 22 + X leh 22 + X emaw te a lo inzawm ta a. Tichuan, chihnih, 44 + XY emaw 44 + XX emaw a lo insiam ta thin a ni. Nu in naute a lo pai ta a, 44 + XY zawk anih chuan naute chu mipa a ni dawn a, 44 + XX anih chuan naute chu hmeichhia a ni ve thung dawn a ni. Hei hi normal condition ah a ni.

Mipa leh hmeichhia chi a insiam laia meiosis hun lai takin zat leh zatin chromosome an insem darh thin a, chutianga an insem darh lai chuan a inthen darh dan tur pangai lo deuh hleka inthendarhna (non-disjunction) a lo thleng palh thei a. Chumi avang chuan hmeichhe chi X chromosome pakhat chauh nei tur khan XX chromosome a keng palh thei a; chutiang bawkin mipa chinung pakhatin X chauh emaw Y chauh emaw nei tur khan XY a lo keng palh thei. Chung abnormal gametes te chu normal gametes nen in fertilised ta se, abnormality a lo awm dawn tihna a ni. (Ka sawi chipchiar lutuk mah mah em aw ka ti deuh).

Entirna pakhat lo sawi ta ila: Hmeichhe chi ah X chromosomes pahnih te, a half a inthen darh tur an nih laiin a ruka inthen darh ve lo a awm thei. Tichuan chi 22 + X siam aiah 22 + XX a lo siam palh hlauh thei thin. Hei hi mipa chi 22 + Y nen a lo inzawm palh hlauh chuan 44 + XXY nei mihring a rawn siam dawn tihna a lo ni. Hetiang mihring hian hmeichhe character hi an nei tam tlat mai dawn a ni. Hetiang ang hi a hmuchhuaka zir chiangtu ber Dr. Henry Klinefelter-a hming chawiin Klinefelter’s syndrome an ti a ni.

Male gamete (23 chromosomes) + female gamete (23 chromosomes) = Foetus (46 chromosomes)

22 + X fertilise with 22 + X = 44 + XX (female foetus having normal 46 chromosomes)

22 + Y fertilise with 22 + X = 44 + XY (male foetus having normal 46 chromosomes)

22 + XY fertilise with 22 + X = 44 + XXY (trisomic male having having abnormal 47 chromosomes)

A hnuai ber ami hi Klinefelter’s syndrome a ni a; mi pangngaiin chromosomes 46 an neih laiin extra X chromosomes (hmeichhe nihna siamtu chromosomes) an nei a, chuvangin chromosome 47 an nei bik a ni.

Klinefelter’s syndrome hi a tam em em a, mipa 500 zinga pakhat talin Klinefelter syndrome hi nei tura ngaih a ni a. A symptom pawh hi a lan chhuah dan a inang lo thei hle a. Thenkhat ah a symptom a nasat laiin thenkhatah ve thung chuan a hriat lutuk loh thei thin. An taksa ah testerone a insiam tlem bik vangin mipa dang aiin an character hi a “pa lo” deuh thin a, an chak lo deuh zawk bawk.

Klinefelter’s syndrome nei mipa hi mipa pangai diktak ve tho an ni a. An nausen laiin hriselna inang rau rau ah nausen mipa dang aiin an chawrche hle zawk a, an thawm pawh a zawi hle a, an thu har a, an bawkvak har a, an kal thei har thin bawk. An lo thang lian a, naupang dawldang, chak lo tak, cher tak, sa pan leh sang lam, harh lo tak leh tihrawl pawh ngah lo tak an ni thin tlangpui. Mipa te ti mipa tu ber testerone an taksa in a siam tlem bik vangin tihrawl an nei tlem a, an vun leh hmai bawr velah hmul an nei tlem a, an voice a thum lo va, a lang chhuak nasa ah phei chuan an kawng bawr pawh a vawng laih a, hmeichhe hnute ang mai nei te pawh an awm hial thei. An zakzum a, an harh zawk zawk lova, mipa naupang dang angin an tha a za zek zek lo va, thu an awih em em thin bawk. A tlangpuiin mipa pangai aiin an khan a sang deuh thin bawk. He syndrome lan chhuah dan hi mi hrang hrangah a inang lo thin a. Thenkhat ah chuan a symptom hi a nasa hle a, chutih laiin mi thenkhatah erawh mipa dang pangai nen an danglamna a lang vak lo thung. Mipa dang ang thovin normal sex life an nei a, mahse an chi ah mipa chinung a insiam tlem bik thin avangin fa nei thei lo (infertile) an ni duh khawp mai.

A tihdam theih em?

A enkawl dam lam pang hi chu medical science lam chanpual liau liau a ni tawh a, thui tak ka ziak ve ngam tawh lo. Gene therapy thiamna sang zelah hian an gene defect hi siam that theih a ni tawh em ka chiang chiah lova. He chromosomal disorder trisomy hi siam tha kher lo pawhin Testerone treatment (testerone replacement therapy) hmangin tha takin a enkawl dam ve theih a ni. Testerone treatment avang hian a hmaa a neih ngai loh mipa character thenkhat aw thum deuh te, hmaia hmul to te, tihrawl te a lo insiam a. Hei mai pawh ni lovin fa nei thei chiang bal turin a enkawl dam theih a ni. He treatment hi hlawhtling tur chuan enkawl hma a tha ber niin mithiam te’n an sawi.

Trisomic te i sawi kai nuaih a, triploid te nen hian a in ang em? Science students te pawhin an chhiar ve fo si a, sawi zau belh hlek teh.

Zawh na fing tak anih hi. Aneuploidy leh Polyploidy chung chang hi mi tam takin an hriat pawlh fo thin asin.

Chromosome te hi a pair in an awm tur anih kha. Trisomy/trisomic ah chuan chromosome pair khat zingah khan chromosome extra pakhat lo awm belh ve ta se. Chu pair bikah chuan chromosome pahnih aiah pathum a lo awm tawh ang. Chu chu trisomy an ti. 44 +XY mipa insiam tur aiah 44 + XY + X nei a rawn chhuak ta a. Chu organism chuan 47 chromosomes a lo nei ta thin a ni. Trisomy hi Klinefelter’s syndrome ah kan hmu. Tin pair khat zing ami chromosome pakhat hi kim lo ta se, tichuan chu pair bik chuan chromosome pakhat chauh a nei ang. Chutiang chu monosomy an ti bawk. Monosomy hi Turner’s syndrome ah kan hmu thin.

Triploid ah ve thung chuan organism pakhatin chromosome set thum a nei daih ve thung. Human chromosome set khat hi 23 chromosomes a ni a, chu chu haploid a ni. Normal human in chromosome set 2 kan nei thin a, chutah chuan chromosome 46 a awm. Chu chu diploid an ti a. Triploid anih dawn chuan chromosome set 3 a awm a ngai. Chuti a lo nih si chuan, human in chromosome 69 a neih a tul ang. Triploidy hi human ah a awm thei lo hrim hrim a, plant ah erawh chuan nasa takin chromosome set te an danglam thei a, triploid mai pawh ni lovin tetraploid thlengin an lar em em thin.


Kan ram ah tuai an tam hle a, heng te hi Klinefelter’s Syndrome an ni em?

Tam tak hi chu an ni mai thei a. Tam tak hi chu psychological effect mai mai an nih ka ring a, thenkhat hi chu sex influenced tha lo tak vang ani thei bawk ang. Tam tak hi chu an intihhmuh mai mai anih ka ring bawk. Thudik tak erawh ka bik hre hauh lo mai le.

Similar Posts:

Recent Posts:

68 Responses to “Klinefelter’s Syndrome”

Pages: « 1 [2] Show All

  1. 51
    mparalte Says:

    A va ngaihnawm reuh ve… @ kawlhawk: Eng maw i nick thar. Thil hi ka man muang a….

    Report this comment

  2. 52
    evergreen Says:

    @khumchikthei
    Abnormal karyotype ho chu a post tu khian phenotypic manifestations an neih dan a ziak chiang viau.
    Tin, An behavior normal-in rawn lang chhuak kher lo mah se fertility a khawih danglam.

    Ka thil prospose khi chu i sawi ang deuh khian Project tenau-ah nei thei ila a tha khawp ang. A nih loh pawn MZU biotech dept velah an tih thei ka ring, Vety colge Selesih pawn hmanrua an nei tha khawpin ka hria.

    Cytogenetics Lab nei an awm em ka hre lo mizoram zirna in lianah khian, an awm chuan Project proposal siam se thil interesting tak tur a ni.

    Report this comment

  3. 53
    mach.zt Says:

    @caribou, i sawifiah thiam bawk a, chhiar a va nuam ve.

    Report this comment

  4. 54
    Zephenath Says:

    I sawifiah kimchang hle mai… a ngaihnawm e.. XII sc zirlai min hriatchhuahtir a..lung te pawh i tileng e. :roll:

    Report this comment

  5. 55
    van damme Says:

    Good post,kei chu 44XYYYY ka niin ka hria. Tuai ho kha ka kiangah rawn kal tir rawh u,ka lo sem then ang. :lol:

    Report this comment

  6. 56
    shylo Says:

    A engmah sawibelh tur nei vaklo mah ila evergreen rawtna hi tih puitlin ni ta se a that ka lo ring ve em em ringawt. Tlem lai khan Tuai,patil, neih in ang tih vel kha kan media ho khan an ziak chiam mai a, kan society a chiah hneh viau tawh bawk nen. Hengte hi mumal taka zirna leh rintlak data neih a that ka ring khawp mai. Engvang nge patil,tuai etc ni ta nge an nih tih pawh a hriat theih deuh ang.
    Fa nei theilo kan tih te pawh heng syndrome vang hi a ni thei dawn hle tihna a ni maw, Pu.Post tupa ?

    Report this comment

  7. 57
    Zephenath Says:

    Fact: Laughing lowers levels of stress hormones and strengthens the immune system. Six-year-olds laugh an average of 300 times a day. Adults only laugh 15 to 100 times a day.

    Report this comment

  8. 58
    muantea Says:

    Ka comment ve hmain in lo va sawi hnem tawh ve!caribou hi a ril teh mai a nia, a subject lam na na na hi chu chiang tak a ni, a naute ho pawhin an fak teh a nia. Tha lutuk ringawt, Ka LIKE e

    Report this comment

  9. 59
    ChhawnBura Says:

    Hei zet chu a ropuiin a ril hle mai.

    Report this comment

  10. 60
    Mama_B Says:

    Great post.
    Science lampang hi mizotawnga sawifiah a har teh lul nen i rawn titha hle mai.
    Ngaihnawmin bengvarthlak tak zet e.
    A dang pawh han thawh zel teh, chhiar turin kan inring reng e…

    Report this comment

  11. 61
    caribou Says:

    Vawiinah ka online hman ve lo va, mithiam tak takin an rawn comment laiin ka mobile phone atangin ka rawn thlir zeuh zeuh. Han titi ho a chakawm tehreng nen. Saptawnga tawitea ziak theih kha mizotawnga han hrilhfiah dawn chuan a lo sei duh khawp mai. Min comment saktu te zawng zawng chungah rilru leh tihtak zetin lawmthu ka sawi e.

    Report this comment

  12. 62
    rose malsawmi Says:

    OMG

    Kan training lai khan klinefelters syndrome’ vang hian kan tutor nen kan inhnial nasa mai a,internet hman mai tur awm hek lo,hahchhiau tuar tuar khawpin library kan ching darh a,ka lung a ti leng.

    Kha tih lai khan he post hi lo chhiar tawh ila a tha tur… ;);););););););):):):):):)

    Great post.

    Report this comment

  13. 63
    caribou Says:

    “Gay gene” a awm nia scientist ten an sawi kha, an hmuchhuak chiang ta em? Hria kan awm em le? Miin gay gene a neih chuan Gay a lo ni mai dawn niawm tak ani.

    Report this comment

  14. 64
    loneeagle26016 Says:

    63#…Gay Gene te chu awm dawn em ni ? Perversion kha ni mai a, an sim thei hlom tlat mai…lesbian lo ni hrep toh khan, piangtharin pasal tha tak a nei a..fate a nei a…Gay lo ni toh thin, tleirol tet atanga lo in hmang toh khan alo pianthar chuan a nun dan abansan a, nupui a nei a ministry ah ain hmang zui a..a fate nen…hetiang ho hi hmnu tinah hmuh tru an awmmai..Youtube lamah te pawh…a gene ang zawng chuan ka ringmang lo ka ti… :D :o

    Report this comment

  15. 65
    caribou Says:

    Hmel hi siam that a harsa a, nungchang erawh siam that a harsa lo, tum tak takna a awm chuan. Tuai tam zawk hi chuan tum tak tak ta se, society mil turin zawi zawiin an insiam that ve mai theih ka ring (exceptional case chu awm ve tho mahse).

    Report this comment

  16. 66
    Promo Madagascar Says:

    Promo Madagascar…

    [...]Klinefelter’s Syndrome | mi(sual).com[...]…

    Report this comment

  17. 67
    Canon S95 Powershot Says:

    Canon S95 Powershot…

    [...]Klinefelter’s Syndrome | mi(sual).com[...]…

    Report this comment

  18. 68
    incarcator netbook Says:

    incarcator netbook…

    [...]Klinefelter’s Syndrome | mi(sual).com[...]…

    Report this comment

Pages: « 1 [2] Show All

Leave a Reply

You must be logged in to post a comment.