Ka vei zawng in vei ve em ?

August 31st, 2010 2:00 pm by Kawlri

Kan hma lawk September ni 20 hian Mizoram Governor Lt. Gen (Retd) Madan Mohan Lakhera chuan Mizoram Assembly vawi 6-na a kova, he hunah hian Supplementary Demands (Regularization of Excess Expenditure) chungchang sawihovin September ni 22-ah vote lak a ni dawn.

Mizoram Assembly session hi vawi engemawzat an thukhawm tawh a, mipui khawih thil chi hrang hrang an ngaihtuah tawh thin. Chutih lai chuan, mipui nawlpuiin kan chhawr lem loh hi kan aiawha kan thlan MLA te hian an rel tamin an pass tam zawkin ka hria. Chuvangin, he hun pawimawh tak kan MLA rual ten kan ram thanna tur an ngaihtuah leh hunah hian misualte hian kan ram thatna tur leh hma sawn a, mi retheite thleng phak Assembly session an neih theih nan hian hma kan lak tha ka ti, inti ve em le ?

Misual.com hian tlawhtu a ngaihin heng zingah hian sawrkar mi pawimawh officer lian tak tak leh Minister te thleng pawh an awm niin ka hria a, chuvangin, tih takzeta ngaihtuahna sawrbingin kan ram leh hnam tundinna kawngah hian pen khat tal kan thawh ve dawn lawm ni ?

Serlui B Hydel Project hi inthlanpui kan neih hnuhnun ber hma MNF sawrkar lai khan ka tlawh ve tawh a, khatih laia Sawrkar lam hotute chuan inthlanpui neih hma ngeia hawn a nih tur thu min hrilh a, kha thil kha MNF sawrkar puipate khan sawi turin Official lam an rawn pawh a ni mai thei. Mahse, hei Congress Sawrkar pawh kum 2 dawn kan hrawn tawh a, anla hawng lo chu a nih hi. Khawl pahnih chu an enchhin a, pakhat erawh anla zo lo niin ka hria. Engtikah tak hawng tak tak ang maw ? Kan Politician te hian DAWT hi min hrilh tawh suhse tih hi ka duhdan a ni.

NLUP pawh rangtaka semtum tute hian tun thlengin anla sem thei lova, engtikah nge an sem dawn ? Congress sawrkar lai mek pawh hian an mahni thlangtu mipuite hi zahna chang hre ve mawlh sela a tha ngawtin ka hria. NLUP hi an sem thei lawk dawn lo a nih chuan chiangtakin sawi mai sela, kut hnathawka eizawng rethei em em, zanriah buhfai thlak tur pawh puk chawpte hi mihring ve tho kan ni e.

Sawi tur a tam, a thenin a sei kan ti leh tawh awm si a, duhtawk dawn phawt ila. September ni 20.2010-a Mizoram Assembly session neih turah hian kan MLA zawng zawngte hian ram hmangaihna tak tak neiin thusawi sela, an enkawl hmeithai leh pachhiate rilru tina tur hian thu tak lem lem hi min fah lul tawh suh se.

A Tawp ber atan chuan kan MLA rual 40 te hi misual.com hming hian ngenna lehkha thawn ila, kan ram hmangaiha enkawl ngai ngawh ngawih, a chhunga cheng hmun li a thena hmun thum rethei tak takte thleng phak Assembly House-a sawi tur leh thu dik tak hmanga min kai hruai turin i ngen ang u hmiang, enge in ngaih ve dan le ?

Similar Posts:

Recent Posts:

55 Responses to “Ka vei zawng in vei ve em ?”

Pages: « 1 [2] Show All

  1. 51
    PimPom Says:

    Kan Politician-te chunga rinna nghah hi chu lungpui suttlang a theih loh ang tluk deuh hian ka ngai tawh. Thangthar ram hmangaih tak taktu kan va mamawh tawh em.

    Report this comment

  2. 52
    mc_ralte Says:

    Vei ve tehreng mai. A thim zawnga ka thlir chang hi chuan ka hah hluah hluah thin.Party mal khai phei chuan eng party-ah mah hian beisei ka nei lo. Inthlanpui a vote thlak dawn hian Mimal zawngin duh ka lo thlang ve thin a mahse mimal thu ai chuan party thu lah hi a lal leh zawk si a! a hahthlak a ni e. Politics tui nu, insawi thiamna, inchirh thehna, in bumna, etc. hi ka hne tawh. Hetiang reng reng a kan kal a nih chuan kan hmabak chu a eng lo khawp ang le! ‘Bei nge sei Run dung’ ti in keini thianho chuan ‘Tun sawrkar thar hi i nghak leh phawt teh ang’ kan ti a, mahse nghahchhuah duhawm tak erawh kan nei tam dawn in a lang lo.

    Report this comment

  3. 53
    mc_ralte Says:

    * ruaruatapa, hei pawh hian comment tu a nei tlem leh pharh maithei a ni

    Report this comment

  4. 54
    Zephenath Says:

    Vei ve khawp mai. Kan ram siam tha tur chuan a bul berah chuan Chief Minister hi a pawimawh ber. Tin, thuneitu ber leh thil titheitu ber tur pawh a ni. Hemi atangin, Minister ah…ti chuan Sorkar Officers –> Mipuite…

    Report this comment

  5. 55
    niMai Says:

    ka lut ve thei tawh lo maw ka ti, ka lo lut thei renga ! ka vei zawng in vei ve em? tih tho a lo la lang reng a !

    Report this comment

Pages: « 1 [2] Show All