Tawngtaina chhangtu Pathian

July 25th, 2010 12:32 pm by digimalt

Favang a rawn thleng a, khua a nuamin thian hova han chhuah vah chakna a awm. Nitin office-ah buai taka khawsa thin kan nih hlawm avangin Ni thum lai chawlh la ila, Tichuan Chalfilh tlangah ni hnih riakin i hawi khawthawng ang u kan ti ta a. Kan phur em em, pawisa kan phal ang tawk tlem lua awm lo chuan kan thawh khawm a, kan vai chuan mi 8 kan ni thei dawn a, kan phur tak zet a ni.

Kar khat chiah a awm tawh, kan committee a, kan mamawh tur chu kan nei kim ta. Tunah chuan kal chiah hmabak a ni tawh. Zantin khan kan tawngtai a, kan ruahmannate a hlawhtlin theih nan. Chutih lai chuan vanduaithlak takin ka ke dinglam chu ka bilh ta hlauh mai, ruhkhawih thiamte ka pan a, a khawih rem hnu chuan mar tha takin min tuam sak. Ka rah ngam mai ka ring. Amaherawhchu a lo na deuh a ni, ka rap ngam ta hauh lo mai. Kar khat chiah a awm tawh si, ka dam hman dawn si lo.

Kan inbuatsaih ve nasa tawh si a. Ngaihtuahna thar ka nei, Ka Pathian hi engkimtithei a ni, nidanga ka damloha a hnena ka tawngtai pawhin damna min pe thin alawm…tiin kar khat chhung chuan nasa takin ka ke a dam hmanna tur chuan ka tawngtai ta char char a. Naktuk mai a ni ta, kimloa kal kha thiante pawhin nuam an ti dawn lo tih a chiang, chutihlai chuan ka ke chu ka la rap tha ngam bawk si lo. Kar khat chhung ngawrh takin ka tawngtai a nih kha.

Hma ka sawn pawh ka hre lo, khawnge Pathian ? Danglam ngailo Pathian a ni lawmni ? Ngatinge a hmaa min chhan a, tunah min chhan tak loh ? Tiin nasa takin zawhna ka inzawt, Chalfilh tlanga chawlh hman ka chak em avang chuan. Thiante hnenah chuan naktuk zingah chauh ka confirm ang, naktukah pawh ka la dam thut thei,..tiin beiseina sang tak ka nei a, Pathian pawh ka ring a ni tih ka hria.A tuk zing a rawn ni ta, kan kal tum ni chu a ni.Mahse ka ke chuan ziaawm lam a pan hauh lo, heti a nih chuan ka kal thei dawn lo a ni tih pawh ka chiang. Hrehawm ka ti em em a, Kal dawn darkarah pawh Miracle a la awm thei a ni tih ka la ring fan.

Mahse ka beiseina chu a thamral ta. Khawnge Pathian ? Khawnge ka rinna ? ka ti..mahse Pathian dem tur hian tunge maw ka nih le tiin ka inngaihtuah harh a. Ka chunga thil thleng chu ka pawm thiam ta. Thiante chu an kal ta, Monday-ah an chhuak a, a hma ni Sunday khan kan thianpa pakhat Delhi atangin a rawn haw a, a ni chu a kal ve chak em a, inbuatsaih lemlo chuan a kal ve ta chawt a, ka Bedding leh bungrua eng eng emaw chu a chhawm ta a, mi pariat tho an nih avang chuan ka tello pawh chuan an hlim tho dawn tih ka hria.

Hlimtakin ni thum chhung chu Chalfilh tlangah chuan hun an han hmang a, khatih chhung zawng khan kal ve chak rengin hun ka hmang a ni. An rawn haw ta a, kan thian pakhat last minute-a kal a kha Malaria-in a rawn damlo haw ta hluah mai. An rawn haw chu thawk pawh la hmanloin damdawi in lamah chuan an inbuaipui ta a. Ka ke nat aia rei daih chu dam tha em em loin hun a hmang ta a ni.

Heta ka hriatchian tak em em chu, Pathian hian kan tawngtaina hi a chhang vek tih hi.

Amaherawh chu amah kan hnaih theih dan tur zawng zelin kan tawngtainate chu a chhang thin zawk a lo ni. Kan tawngtaina hi kum khat hnuahte min chhang a, tunah pawh min chhan nghal chang a awm thin bawk. Amah kan hlat phahna tur thilte a nih phei chuan thil dangin min chhang daih thin. Kan thianpa pawh kha Delhi tlangah khawvel takin a nun a lo hmang thin, mahse khatia a rawn damloh vak takah kha chuan Pathian ngaihsakna chang a rawn hre ve ta a, kei lah Malaria in damlohna ka tawh loh phah mai bakah a ni’n Pathian lam a hnaih phah ve ta zawk a.

Tawngtaina chhangtu Pathian a ni.

Similar Posts:

Recent Posts:

25 Responses to “Tawngtaina chhangtu Pathian”

  1. 1
    Lemonvale Says:

    Tha khawp mai, mahse, han edit tha leh teh, para repeat i nei nuai mai. An sawisel hma in !

    Report this comment

  2. 2
    Goldmember Says:

    Edit tawh e. :)

    Report this comment

  3. 3
    shailendra Says:

    Pathian in a chhanna che chu, i thianpa chu Amah a hnaihtir ta zawk a ni maw…

    Report this comment

  4. 4
    chawnghilh Says:

    Edit nawn a la ngai tho mai! Mahse, a tha vek e, kan hrethiam sawlh sawlh tho ve.

    Tawrhna leh natna ticket khera Pathian hnaih leh tawngtaina chhangtu a nih hriatchhuah pawh hi a tha ve vek! Hrisel taka ka awm hi Pathianin mal min sawmna leh lawmthu ka thlen min chhanletna ni ngeiin ka ngai ve tho bawk.

    Zawlnei Daniela Bung 10 kha ngun takin chhiar hlawm teh u, Prayers’ answers DELAYED chanchin a inziak chiang teh asin!

    Report this comment

  5. 5
    lalmisualpa Says:

    Tawngtaina chang hrelovin mihring takin i ke na chu tuar ta chawrh chawrh ang ni ta la, Pathian remruatna ropui zia chu i hmu dawn lo tih na ani sia.. Tawrhna phenah hian malsawmna hi Pathian hian kan tan a lo ruat thin ani tih hi kan hre lo fo thin.
    Keipawh Pathian ka hnaih ber lai hun hi chu harsatna ka tawh lai hi ani duh fo. Khawvel thil taka hlim lai hi chuan Pathian hi theihnghilh mai a lo awl thin

    Report this comment

  6. 6
    kilung Says:

    Nia, tawngtaina hi pathian hian chawpleh chilh pawh in a chhang chiang tih atak in ka tawng tawh!!!
    Thih ngam a han nat hi chuan Pathian kan hnaih rawk2 xel thin ania.

    Report this comment

  7. 7
    mzvision Says:

    Pathian Thil Rel dan KHB-22 hla hi he post hian min hriat chhuah tir zawk chu le

    Pathian thil rel dan chu
    A va mak em
    Hriat phak rual loh a ni,
    Thil te ber pawh a veng,
    Van thil a rel kim e;
    Pathian ruat ang zelin,
    Engkim a thleng.

    Khawvel pum pui hi
    Aman a veng
    A kutan an awm vek
    Ama relan
    Hetah lo thiat mahse
    Hmun dangah a din thar;
    A tum a ni.

    Thim chhahna lai ber pawh
    A lo eng thin
    A buaina lai ber pawh
    Chiang tawk takin
    A lo veng fel thuai ang
    Thihna lui ralah chuan;
    A thawh dan lan hunin,
    Mak kan ti ang.

    http://www.youtube.com/watch?v=veLOdhEFMLA a hla samuelapa dah

    Report this comment

  8. 8
    Rairahtea Says:

    Mihring hi chuan harsatna leh tawrhna cu kan nei theuh awm e. Milem biate pawh an bang bik chuang lo. Miin hrisel taka Pathian a hnaih theih chuan a tha a, harsatna tawh hnua a hnaih pawhin a tha tho. Ringtute vanneihna cu harsatna leh thihna ruamah pawh Pathian malsawmna chhiar thiam a, lawmna kan la nei thei hi a ni.. Chatuan nunna nen!

    Report this comment

  9. 9
    Ku Muanga Says:

    A ngaihnawm khawp mai, a tha.

    Pathian hian kan mamawh ang ni lovin kan duh ang apiang hian kan tawngtaina hi chhang thin ta se kan buai pherh thin awm mang e aw. Kan dil, kan ngen, kan au, kan kar, kan tah-awh thul; eng angin nge min chhan a, engnge min zirtir a tum tih hi enzui loh fo a awl thin.

    Kan rin Pathian leh Amah biak hi innghahna tlak a ni.

    Kan thianpa erawh chuan, “Ka bialnute nen kan han inthen chiah hi chuan Pathian an zawng ruai zel, Camping hmasaah an lut rawk rawk zel mai a ni,” a ti… :lol:

    Report this comment

  10. 10
    tlau Says:

    mak tak maiin kan kal dawn darkar teah chuan miracle chu a rawn thleng ta. Ka ke na chu a lo awm ta miahlo mai a. Lei pawh ka rap ngam ta tiin chhiar zawm ka lo tum ve mai2 a

    Report this comment

  11. 11
    Lonelyboy Says:

    Kawmen sei teh duah hlawm ve

    Report this comment

  12. 12
    XaiA Says:

    Lo Amen ve phawt mai teh ang.

    Report this comment

  13. 13
    sparta Says:

    Ka thlarauvin Khristaah chauh,
    Muanna a zawn thrin kha;
    Malsawmna tam tak hriat phak loh,
    Tunah a lo hmu ta.

    Amahah chawlhna zawng lo va
    Khawvel thil dang zing a,
    Ka zawn laiin, ka Chhandamtun,
    Khawngaihin min vuan ta.

    Aw Lalpa, khaevela tuikhur,
    Chawi turin ka tlan a;
    Mahse a tui ka in thei lo,
    Thihna tur a lo ni.

    Report this comment

  14. 14
    dolien Says:

    Vai pathian em ni in pathian chu, ban sawm nei ang chi kha :) hahai

    Report this comment

  15. 15
    Taikhery Says:

    ka til then lohna lam tak a ni e, heti lam biahthu hi zawng :lol:

    Report this comment

  16. 16
    muantea Says:

    ‘Zawi takin thu min hrilh rawh,
    Ka hriat fiah theih turin’

    tih hla ang hian Pathianin zawitea min hrilh lai hian a thu zawm mai a tul, na taka min koh hun kher hi nghak lo hram ang u.

    Report this comment

  17. 17
    chhana Says:

    Harsatna kan tawha, kan tawngtaia, chhana kan lo awm chiah hian, “Lalpan kan tawngtaina a ngaithla thin.Kan dil apiang erawh a aw mai ngai lo. A changin ‘nghak rawh’ a ti a, A changin ‘heti chuan ni love’ a ti bawk thin. Kan tan a thil tha a ruat zawk vangin. Pathian khawtlaina hi min hnawlna a ni lova; kan tawngtainate a ngaithla thin a ni. Kan harsatna engkim a hre vek a; nitin a kan lungkham em em pawh a hria a ni. A tanpuina chu a rawn thleng mek a ni. Hringnun a kan mangannate a thlir reng a. A hnen kan pan lehna hmanruaah a hmang a ni. Ani chu a rinawm a ni tih i hmu ang. I harsat leh mangan lai ber pawh khan i tan thil tha ber a lo ruat diam tawh asin!”
    “Kristiante nunah hian tawngtaina chungchang hi sawi uar tawk a awm theilo. A chhanchu van hawnna chabi a nih vangin. Kan thlarau nuna Pathian hnathawh theihna thlentu a nia, tawngtaina chuan Thlarau Thianghlim thiltihtheihna chawkthovin Bible thute chu ruh chhunga meiling inkhung ang main a tinunga. Ruh chuktuah thlenga kangin Isua Krista’n ataka min awmpuinate min hriatchiantir thin a ni. Tawngtaina chuan nunna, thlarau leh rilru a tilawma; Pathian duhzawng hre thei tur leh zawm thei turin kan mit a timenga; min tichak bawk a ni. Tawngtaina chuan tlang sawn theihna mai nilovin kan duhna a tichaka; kan ngaihtuahnate Lalpaa nghatin sual leh setana hnathawh do let theihna khawngaihna min neihtir a ni,”
    “Thinlunga rinhlelhna, sual zep ruk, Pathian duhzawng ngaihpawimawh lohna leh Pathian thupek pawisak lohnate hian tawngtaina hi chhanin a awmtir lo theia, thinlung zawng zawnga tawngtai, lungsi taka tawngtai, tih chunga tawngtai, dil ngat ngat, beidawng lova tawngtai, Isua hminga tawngtai, ring chunga tawngtai, tihtak zeta tawngtai, huaisen taka tawngtai, Pathian duhdana tawngtai leh thlarauva tawngtainate hian chghanin kan awm thung dawn a ni.
    “Engkim in tawngtaia in dil apiang chu hmu tawhah inngai ula; tichuan in hmu ang” (Mar 11:24) leh tupawhin ring chunga kan tawngtai chuan chhanin kan awm ang.

    Report this comment

  18. 18
    wonderboy Says:

    A hunte a rah thin a ni miau a!

    Report this comment

  19. 19
    wonderboy Says:

    @digi, i ke na khi setana hnathawh a nia, i pianthar na tur chance a bawhpelh tir che a. Han kal lui lang chuan i piangthar ve tawh ni mai tur! :twisted:

    Report this comment

  20. 20
    Pc-a Says:

    Hmuifang kal chak vanga han tawngtai duahhluah mai chu ho kava ti e. Mahse, Pathian nen in intawk hlauha, a ropui hle mai.

    Report this comment

  21. 21
    Pc-a Says:

    Hmuifang kan tive ngawt chu a. Chalngalh…awh, chalkawlh eh, chalfilh.

    Report this comment

  22. 22
    Noddy Says:

    A tha lutuk. Ka chhiar chhuak e. Thu ka sawi ve hun hun chuan tawngtaina thil tih theih zia hi ka la tlangau pui ang ka ti thin. Mahse, tun thleng in ka la sawi ta chuang lo hi ka inthiam thei thin lo.

    Mahse, remchang ala awm turah ngai ila. I rawn ziah hian min chhawk khawp mai.

    Report this comment

  23. 23
    digimalt Says:

    @wonderboy…lolzzzz ka nuih a za lutuk … i dam maw…. i va ngaihawm vung vung ve…. engtikah nge i rawn chhuk dawn ?

    Report this comment

  24. 24
    wonderboy Says:

    @digi, a sa a na i tih hun ah chuan a za lo viau ang….lolzz
    ka chho leh tawh, ka hman lo ltk a, next ah chuan ka lo kal ngei2 tawh ang..

    Report this comment

  25. 25
    lalpeace Says:

    A tha e, mahse kan dil ang diak diak erawh chuan Pathian hian kan tawngtaina hi a chhang kher lo mai thei.

    ‘Ka dilloh zawk Malsawmna’ tih hla kan hriat chhuah zawk chu..

    Report this comment