Ngaihdan a tam, eng ber nge thaa zawm tur pawh hriatthiam a har, a sawi hnuhnung apiang sawi hi tha ber maiin a hriat zel bawk si, a sawitute leh ziaktute lah hi an thiam si, an fing si, an rau si, ka hriat theih chinah ngawt pawh, Pulpit atang hian kan rawngbawltute’n tuna kan thupui lam hawi hian vawi tam tak Sermon an lo thlak tawh thin a ni, an la sawi zel dawn ni paw’n a lang, Article lamah pawh hmun a luah bang chuang lo.
Thalaite hian ‘selna’ anka nem lo tak tak an dawng fo thin, Speaker hmui hmang thiam tak tak, tawngkam thiam bak thiam nei lo ni mai awm tak ho hian an han diriam kual vel a, hnehsawh tak takin fiamthu thawh nan an hmang fo thin, chumai bakah Central K.T.P lam paw’n 2009 kumah ngat pheite chuan thalaite nundan tur khawhhmuhna lam hawi zirlai a rawn chhawp chhuak fo a ni. Mobile phone, In cheina etc… Film hial kan insiamsiak a nih kha, ka sawisel love a tha thlawt a ni. Pathian thu lam chang lo pawh, nungchang mawi leh kan nun atana thil pawimawh tam takte hi kan inzirtir fo thin tur a ni reng a ni.
Tunlai thalai tam takte hi nu leh pate mit an tlung zo lo ni ber hian a hriat a, mahse chuti teh vaka diriam a dem tur an ni em? tih leh dem thei kan ni em? tih hi ka rawn thlur deuh bik tur chu a ni.
Tunlai thalaite hi India khawpui Delhi chu sawi loh, U.S khawpui Washington D.C Kawtthler lun lai berah pawh laitual mawi vel mah se, an thawmhnaw inbel te hi a zahpuiawm hauh tawh lo chiang a ni. Kan thawmhnaw han chawk luhna reng rengte pawh hi Kolkata, Gauhati, Katmandu etc. tih vel mai mai a ni tawh lo, Bangkok, China tih lam daih a ni, hei pawh hi nakin lawkah chuan kan la duh tawk lo thuai ang a, U.S.A lamah kan la in-bazar siak sup sup in a nia ka rin.
Kan thalaite hian Britney Spears mawngkawkehkak lang rualin an lo ti lang ve thuai a, Junpiaua te Gamchha awrh rualin an lo awrh ve vat zel bawk a, Kim-jandi-i leh Han ji eun-i te Hair style lahin kan nula te copy a hlawh nangiang mai, kan tlangvalte pawh an lu ringawt chu hmu i la mipa nge a nih hmeichhia tih pawh hriat hran har fe fe an tam khawp ang le, chal hma sam mit leh lam khuh vekte phirsi mang kheng te, engtin nge heti anga an insiam chhiat peih reng zawk le, thenkhatte phei chuan Eye Brow pawh an hmang hial tawh a ni. An pheikhawk bun duh zawng pawh a mai mai lo, na mai lo tak a ni, Super star, Timberland etc.. sang hnih khat man lek a ni lo, Sangkhat man aia tlawm hi chu bun enah pawh an en meuh tawh lo chu a ni. Thenkhatte phei chuan show room ami kher lo hi chu an ti deuh tlat tawh a ni.
Ka thianpa hman deuhah khan Timberland pheikhawk ka lei pui a sangsarih man a nih chu, a rawn chhuah tantirh deuh kha a ni bawka, tunah chuan a tlawm deuh tawh mahna, a hunlai kha chuan engmah ka sawi duh hauh lo a, thawh chhuah a neih loh chu sawi loh an chhungkua pawh an hausa lo khawp mai lehnghal a, ka hriat ruk dan phei chuan a chhung ten pawisa an puk chawp hial a ni. Chumai a ni lo ka hriat chian deuh mai Nula pakhat pawh, kan in bul stepa ka thut mai mai lai chuan, a nu nen min tawk zawngin an rawn kal a, a nalh khawp mai nalh tak a ni, super star pheikhawk man to leh nalh zet mai a rawn bun a, a T-shirt leh Jeans kekawr tlawnin bel ringawt pawh kha enthuak paw’n a man a tlawm lo tih chu hai rual a ni lo, a sam kha arawn ti tial bawk a, a nail polish inhnawih pawh rawng chikhat mai a duh tawk lo.
Rangkachak thi leh zungbun, bengbeh, ngun, sana, chumai a ni lo Mobile phone N-series chu a rawn keng lang va zui a, hre chiang viau lo ila chuan khawi lam mihausa fanu nge aw? ka ti vawng vawng ta ve ang, mahse ka hriatchian lutuk veng thlang lama mi Inhnuai luah a khawsa ve naw naw a nu chuan, a hnung deuhah bazar a a chawhmeh hralh bang chu em-in a rawn phur haw a, ka zawn a lo thleng chuan “I va haw hma ve” ka lo ti a, ani chuan B.P.L family inhlawhnaah a kal ve thuai duhthu-in min chhang a, kha nula kha ka nuih pawh a tiza lo, ka khawngaih zawk a ni.
Hetiang lam sawi apianga ka theihnghilh theih hauh loh, kan venga awm thin tlangval pakhat pawh a thawmhnaw inbel reng rengte hi a nalhin a tunlai a, a incheina kha man tlawm leh thing tak a awm ngai lo, a mobile phone thleng khan changkang leh man to tak vek an ni a, a hman thlak zing viau lehnghal, fiamthu ti tak deuh hian Mihausa fapa tiin ka ko thin, mahse an In chu a chhiat tawh lutuk avangin thirhruiin an pawt tup a, an choka kha an sitting room a ni nghal a, room nen puanzar-in an dai dan tawp a ni. Mahse, pâwn lama a lan dan chuan mihausa fapa ni mai awm tak a ni. Hetiang ang chi hi sawi tur an tam a, nangni paw’n inhriat ve teuh ka ring.
Emo style an ti kan tlangval thenkhatte phei chu an nu zo vek tawh a, hmeichhe hak tur niawm tak tak hi mipa-in an ha a, make-up hmeichhe hman tur chauh a kan ngaih thin kha heng ho hian an hmang ve duh ta zel mai bawk si. Korean film a rawn lar a, Full house, F4, My Girl, Green rose etc. thalai chu sawi loh nu leh pitar thlengin an buaipuia, a film a thui si an tlaivarpui thak thak a, en zo thak tur chuan zan khat tlaivar mai a tawk lo zan tam tlaivar a ngai a, tih tur thulhin T.V hmaah an thu thup zel a nih hi. Hindi Film-ah pawh Kasauti-te kha kan han buaipui khawp a, kalna apiangah an lo en ni mai khan ka hria Sneha, Kasak-i leh Prem-te kha thalaiin an atchilh a nih kha, Prem-a phei kha chu chah chhuah an tum hial a ni law’m ni?
Kan nulate bengbeh duh zawngte hi kual lian mangkheng gymnastic phei chu thiam se, an bengbeh kual chhungah hian an lut chhuak thei hialin ka ring, hnar beh te chumai a ni lo, mitko tlang leh hmui thlengin an beh a, hmun khatah mai an duh tawk lo, a leng thei tawpin an beh ni hian ka hria. Nu leh pa thenkhat tan chuan hriat thiam an har reng a ni. Mahse, heng kan sawi rual hian an vai chuan an ni hauh lo tih chu kan hriat kha.
Sawi kim vek theih a ni lo ang, a leng dawn lo a hlai tawk lo tlat. A nih leh Nu leh pate u… Tunlai thalaite hi dem thei kan ni em? Diriam tur bik kan awm em? tih hi han ngaihtuah chiang chhin teh ang u, tizawng hian aw… Tunlai thalaiten Korean Film leh Hindi Film an atchilh maw? Sholay leh Enter the Dragon lar vang laite kha dawn kir ve la, heng chauh lo pawh film dang tam tak sawi vek sen an ni lo ang, a hunlai kha chuan inbuaipui ve em kha maw! Amitabh Bachan, Bruce Lee, Elvis etc. an tam lutuk in atchilh ve viau kha mawle! Tunlai ang hian Information Technology-ah lo sang tawh phei ula chuan in tu leh fate aia nasa hian in uar zawk lo ang tih hi sawi thiam a har, Film chuah lo pawh internet tih velte phei chu intlaivar pui zing ve viau mai thei a sin. Shangmawia phei chuan an sawi uar khawp a “Enter the Dragon rawn lar tirh khan entu an tam lutuk a, Pushpak a en tur ho kha Bawngkawn Veng tawntirh vel atangin an innek phei tan tawh e” a tia lawm, a uar ve khawp mai.
Cinema Hall hrang hrangah pawh khan ticket chan loh hlauin i intlar ve fo thin mahna! A.R velah phei kha chuan i tam thin lutuk an ti. Fashion lamah pawh Chartin pheikhawkte kha a tuk uar pawlah i tang ve em, nalh inti takin i kal ri ve tlauh tlauh thinin ka ring! Show room-te leh tunlai pheikhawk manto leh nalh tak takte hi awm ve ta se, a ngen to pawl i ni mai lo maw, Kekawr mawng pawp miah lo pawh i bel hram a sign hrang hrangin, tawka lema i bel phei kha chu ila dah tha hial ta ve ang, chutah i kekawr tlawn pawh a tlangarh theih tawpin i siam a, rawng hrang hrangin i la tial buai zui a, chumai a la ni lo kekawr tlang zuih an rawn uar a ha zuih pawlah i tang ve leh a.
Thenkhat phei chu kekawr an ha tite thin lutuk a phelh tur paw’n midang tanpuina an mamawh hial thin an ti, an uar deuh nge phei chu ka hre lo, sam pawh zuah sei pawl chu i ni mahna, hmeichhe lam paw’n tawrh bawm siamte kha an intihhmuh a, tunlai ang hian style chi hrang tam tak lo hre tawh ni ula chuan in ti danglam ve viau maithei a ni, motor leh bike-te pawh tunlai ang hian tam ngat phei se zawng fawr nasa fe fe tur chu in awm maw le. Mobile phone-te pawh awm ta se top-up in thun zing ve viau mai lo maw? tunlai tawng takin C.K deuh deuh tur chu in awm chiang a ni. Tunhnai lawkah pawh Ruotmawi kha in Pathian biak lo chauh chu a ni.
Hetiang hi kan nundan phung chu a ni, tuna kan nun dan tam tak hi hman a in nun dan kha a ni a, hman a lar kha tunah a rawn lar thar ve leh a chuti vel mai mai chuan a kual a ni. Amaherawhchu, khawvel lo changkang zelah hman ai kha chuan kan nunphung khawsak leh hmanrua a lo chang kang a, chu chuan thil tha leh tha lo tam tak a rawn hring chhuak tih chu kan chiang tlang. Tunlai thalaite nundanah leh hmanlai thalaite nundanah pawh ni se kan pawm tlan miah loh tur thil tam tak chu a awm a ni. Chhungkaw khawsak phu loha thawmhnaw manto inbel te, chhungkaw khawsak paw’n lo phu teh reng se, thawhchhuah nei hauh lo chhungte thawhchhuah sa ring a in la lian vak mai te, mipa in make-up hman tak tlat ang chi leh a dang tam tak pawh a la awm ang.
Thil reng reng chu LUTUK a tel tawh chuan a pawi thin, chutiang ang ni lo, a hun lai ang zela thil eng pawh uar emaw lar bik lo awm thin thalaite nundan rawn thlak danglam thei thil lo thleng thin tam tak kan sawisel thin hi chu ngaituah chiang tlang thin teh ang u, Information Technology lamah ngatte phei hi chuan kan dan theih thil hi a tam lo viau ang, lo sawisel a lo khap leh bur thin ai chuan kan tu kan fa ten engtin nge an hman tangkai theih ang tih lam hian in rilruah hmun chang mawlh teh se, Incheina leh film chungchang pawh ka sawi tak angin thil tharah ka ngai lo, lo do teh chiam chi pawh ni lo inka hria hman tangkai tum zawk mai ang u.
Inhriat thiamah hian chin tawk chu awm bawk mah se tunlai thalaite nundan tam tak inhunlai a la awm ngai lo emaw awm tawh pawh ni se i hriatthiam loh hi i hriat thiam sak a tul chang a awm fo thin. Thalai i nih ve hunlai a i thil tih te, i duh zawng te, i lawm zawng te nuam i tih zawngte pawh kha dawn kir ve thin la, chutih teh vaka indiriama indem thei leh fiamthu thawh nan a inhmang thei kan awm dawn em maw ni le? tih hi ngaihtuah tham tak a ni. Kan pi leh pu ten sial rangin sial rangin a hring an lo tih ve bawk kha maw! Mahse Serafim ianga i lo fel bik ta viau a nih chuan i hre thiam lo mahna!
Similar Posts:
- Voice SMS thawn duh tan
- Min lo pui ve teh u
- Zir ngai kan hlamchhiah thenkhatte
- Thlahrang/ramhuai
- Hringnun
...
(I...
March 3rd, 2010 at 6:40 am
Zanin ah ka tlingtla law law mai teh ang. Ziaktha khawp mai, chhiar a nuam. Mahse, kan thil post (ngaihdan) kan ziahah hian fimkhur erawh a ngai hle in ka hria. Kan sawiduh zawng sawi chu a pawi lo. Mahse, thil pakhat kan sawifiah duh vang a, thiltul lo kan sawi kual duah hi chu a tha lo ka ti hle. Entirnan, “mi inhnuai luah” “choka pawh thirhruia pawh, choka leh inpui inzawm”! Heihi sawitum ber nilomahse (diriam zawng hmusit zawnga sawi tum ni lo mahse), mitamtak tan chhiar nuam kher lovang (misual ho zingah pawh kan awm nuk thei). Keipawh hi mi inhuai pawh luah phak lo ka ni maithei a sin.!
Thalaite inchei dan leh khawsak danhi chu buaipui tham a tling hrim hrim! Engpawh nise! Hmanlai kan nu leh pa te khan an phak tawk in fashion chu an lo uar ve ang. Mahse, an thatchhia lo tlat…
[Report abuse]
March 3rd, 2010 at 6:58 am
hetiang article hi kan sawi zing a, hma erawh kan sawn chaklo nihian a lang a.. a hre tur leh chhiar tur awmte hi a chhiar peihlo hlei hlei an lo ni bawk nen…
[Report abuse]
March 3rd, 2010 at 7:00 am
Tunlai thalaite hi sual bik anga sawi dawn chuan kan sual zawk a, fel leh tha fe zawka sawi tum pawhin a sawi theih ve tho mai..hei hi chu a sawitu a zir a ni e
[Report abuse]
March 3rd, 2010 at 7:27 am
Bible chuan, “sualnate a pung ang a,” a ti a, hranghluite aiin thangtharte hlei hlei chuan suahsualna an ngah/tipunlun zawk dawn tihna a ni thei mai bawk alawm!
Hun awl-ah ngun takin ka la chhiar mai dawn, a caption kalhmang atang chauhvin ka rawn comment!
[Report abuse]
March 3rd, 2010 at 7:30 am
Natna hrik a punga, mihring kan pung a, sualna a pung bawk. That’s it nothing less hairehai
[Report abuse]
March 3rd, 2010 at 7:31 am
A va thui ve
Ni e, mahni phu tawka inchei (ngam) hi chu a tha khawp mai.
[Report abuse]
March 3rd, 2010 at 7:38 am
Ziak tha dep dep khawp mai! Thatlai hun hi chuan thiante rual pawl loh hlau reng rengin kan awm a, thil experience kan chak a, mi in an ngaihsan kha ngaihsan loh bik kan duh lova, thalai te sual bik vang pawh ni lovin, khawvel nun dan zir chho mek an nih avangin, sual bik anga hmuh mai an awl ni berin a lang. thatlai hun chen ve tak, puitlin hnua fel tak tak an tam ani. Sual hlen ta chu tlemte!!
[Report abuse]
March 3rd, 2010 at 7:49 am
Thralai future ngaihtuah pha chumi atana inpuahhah nachang hria kan mamawh. Thereng ang maia hram eitur fanghmir anga chhek khlaw silo thralai te hian zirtur an nei.Eng hunah pawh thralai te hian ram leh hnam ngaihtuah sela chung chuan kawng dik a zawh tir ang.
Heng ang kawng dik hi tunge kawhmuh ile
Thralai kaihhruai hi Sports ringawt ani lo – Intodelh self independent life mahni ke ngeia din theih hi kan zirtir a trul. Hlim leh nuam te pawh hi an duh an nei tur ani mahse chung afford tur chuan an phak tawk mil thliar tir kan zirtir erawh a ngai ang
[Report abuse]
March 3rd, 2010 at 7:56 am
Ka nu leh pa an lo kalsual avanga min demna kan lo dawnsawn loh viau tur a awm dawn em ni? Mahni pate Zu ngawlvei hian afapa hnenah zu ngawl vei thatloh zia a fah hi a rem ka ring.
I rawn tarlan angin khawvel thar tiin kan bawh chiam mai hi a tha vek chu a ni hauh lo mai. Suangtuahna leh world view hi liberal sela, nundan erawh conservative lam hi a tha fo. Hman deuh khan US ah survey an nei, nu leh pa enkawl ai chuan, pi leh pu enkawl naupang normal takin an thang chho zawk tih a lang. Heti a nih chuan, nun hi uluk tak leh puithu deuh zawka hman hi a tha fo.
Mizoramah pawh Aizawl nula tlangval hi kan changkang (inti chkang pawh an tam) mahse, khawpui post tha ber ber leh India ram hmun danga zirna min luhkhalhtu chu thingtlang mi an ni fo nia. A zirlaia tithei ho pawh thingtlang mi hi zu ni ve fova…Keipawh thingtlang product ka ni tlat.Hei hian a tihlan dan chu, “CHANGKANG LO TAWK VEL HIAN KAN CHANGKANG”a ni mai thei em? Ele-khaw-le ka mimal ngaihdan mai a nia.
[Report abuse]
March 3rd, 2010 at 8:49 am
@Epis: Sawi hi ka thlawp khawp mai.
Kum a vei tam tawh lo ang, tuna Aizawl khawpui a kan Officer fanu/fapa te ho hian an nu leh pate hna hi a tam zawk chuan an chhunzawm thei dawn tawh lo in a lang. Zirna lam ah an tlafual chak em ema. Khawvel lam in cheinavel ah an sang em em thung. Tiang hi kan chezia anitawha a bik in zirlaite tan chuan in chei atchilh loh hi a thra ber in ka hria. Eitur mumal pawhnei lo hian, a sang sang man kan inbel fer fur hi chu ngaihtuah a ti tam thei hle mai.
[Report abuse]
March 3rd, 2010 at 10:13 am
Heng thilte hi tunlaina saltih maiah kan ngai thei dawn em ni? Sawi tur ka va ngah tak em, Post tupa sawi chen zet sawi ve a ngai dawn sia. sawi lo mai ang.
Hriatthiamna chin chu kan neih angai ngei ang, mahse, chintawk a awm a ngai a, hnam dang style lak hi changkanna a ni veklo tih inzirtir uar ang u tih hi ka sawi hram e.
[Report abuse]
March 3rd, 2010 at 10:19 am
#1 Jaspi ka thlawp e. Misual ah hian kan tawngkam uluk hi a tul tanin ka hria kei pawh.
[Report abuse]
March 3rd, 2010 at 11:07 am
Aw!! An duh duh dan chuan va inchei mai mai se, in neih chhe teh mah an eilo….. chengkhat pawh in hek in, in hlawk phah lo, a sawisel tur hriat loh thlak e mai…
[Report abuse]
March 3rd, 2010 at 11:14 am
Kawmngeih hman lohvin nundan a danglam zung zung.
Thiana siam hman loh khawpin ngaihhlut zawng a inthlak;
Kawl reng tlak lohvin thil hlu a hlui zung zung si.
Neihkim sen loh thil tharin min hual reng bawk e.
Hlimpui hman loh khawp hmasawnna thar leh zual ngei pawh hian!
A aia tharlam style luahlantu a hring chhuak zel si!
He hla tho hi kan nu leh pa te lo sak tawh thin a ni a. He hla sa tho bawk hian thangthar zel te pawh nguibanin an la awm ang.Tunlai kan nunphung hi a hriatthiampui ringawt a khawvar nghah chu a ngam awm loh !.
TUR a nih chuan Poison kan ti mai ang !,HMAWMSAWM a ni e tih khawmawi mai chu a him lo vang.Beidawng mai lovin a damdawi kan zawn tlan zel nak chuan,matheilovin Kan hmuh hun a thleng lo thei lo.
[Report abuse]
March 3rd, 2010 at 11:16 am
Ram kal phung hi a zung a tran in a dik tawh loh a.Midang sawisel reng rengin kan buai zo ta anih hi.
A leina an neia an lei a an duha an in bel ani mai a lom eng nge chu chu a saulna bik ni te ka ti a.
Pheikhawk Rs 7000 man pawh a leina anei an nimai a lom duh leh lei ang hmiang.
Tak tak a timberland hi a lo quality zek nia kei pawh ka trhian pakhat in min pe a ka bun trhina kan hnathawhna a kan boss hian min en sak a timberland chu atrha asin a ti mai a dawr ah kan zawt chu kan cheng in 600 ai in a lo tlom lo daih mai a.Kei ve lem cheng 50 man bak lei ngam ngai lo hian kan bun ve a lo nih chu hahahhhahaahaha
[Report abuse]
March 3rd, 2010 at 11:24 am
Incheina ihi uluk tur anih rualin kan nihna leh kan neih, a hun leh a hmun, ngaih tuah chung a in thuam a pawimawh ni ber in i sawi ni maw? Ka pawm e… Inthuamna ah chuan Pu K.L Liana hi ka sangawizawn pui ni awm tak a ni e, hei vang hian a lawm vawikhat pawh Kolkata a lehkha ka zir ve lai in, Mizoram House a zing tawngtai inkhawm ka hruai tur aizawl nun(in khawm tur a ka sawm kual dan dan lai chu) hmunphiah a min vawm pah in ” Hmun in va rawn phiat tlai thei em em ve” min lo tih ni!!! Ka dem love. kathiam lo a ni ange…
[Report abuse]
March 3rd, 2010 at 11:34 am
Chhiar chhuah dawn chuan mit in a tlin lo, comment ve reng2 ang.
Tunlai thalaite hi an sual bik em tih zawhna hi a awm fo a. Mahni hun zela ngaihtuah chuan an sual han tih ngawt bik chu a dik ber lo in ka hria.
Primary school kan kal laiin khaini kan hmuam ru a, meizial kan zu ru a, middle school kal laiin zu kan in ru bawk a, petrol hnim etc. kan ching. Senior Deptt kan nihin ganja kan zu ru tran bawk. Tunlai primary leh middle school zirlaite hian kan tih ang hi an tih ve ka ring mang lo.
Kan rual u zawk te kha party hrat, Hey tonight tih vel lampui mup mup thrin,(Pu mz a te pawh a lam kawisawi pawl an ni mai thei
) chawhnu her tawha tlawnga picnic tura liam thla chat thla rem rum tawk te pawh awm thrin kha an nia, kei ni ai chuan an ziaom lo zawk.
sualna hi chu a ziarang a dang a, homosexuality te pawh Thuthlung Hlui lam daihah kan hmu tawh a nia.
Chuvangin tunlai zelah hian sualna hi a pung kan ti zel mai niin ka hria
[Report abuse]
March 3rd, 2010 at 11:43 am
He post atanga ka zirchhuah tak chu changkang ni tur chuan zirchhuah tur leh paltlang tur hi a lo van tam tak em…..
[Report abuse]
March 3rd, 2010 at 12:48 pm
‘Sual’ hi define phawt la, Tunhma sual leh tunlai sual te pawh.
[Report abuse]
March 3rd, 2010 at 1:08 pm
Epis hi a thu a fing thei riau! Tukin newspaper ah pawh NLUP chungchang a article ka chhiar a, a va tha tehlul em! Pitar putar inchei lerh, awm mawh leh huaikawm bawl thin an van em vang alawm thalaiten an ai an awh ni
[Report abuse]
March 3rd, 2010 at 2:32 pm
#19 @hitchhiker zawhna khi ka zawhna a ni ve e?
[Report abuse]
March 3rd, 2010 at 2:35 pm
Sawisel sawisel suh u, sawisel a in awm loh nan. In sawisel ang bawkin an la sawisel ang che u, in tehna ngai bawkin an la teh sak ve ang che u.
[Report abuse]
March 3rd, 2010 at 4:28 pm
kan value system hi a ni ber mai…. siamtha leh tur erawh zawngin khuarei a ngai awm e….keipoh thawmhnaw lawm tih takah superstar te. timberland te,air force 1 te, ka nei ve a, mahse ka thawhchhuah a ka lei ani.. mi in an bun miau chuan it awm duh ve tak ania…. mahse nu leh pa te poisa a lei zawng ka duh bau lo
[Report abuse]
March 3rd, 2010 at 8:24 pm
Tunlai thangthar thalaite hi chu an sual a nih hi mawle…!!! Incheina kawngah te,, eizawnna kawngah te,, rualkawm chungchangah te,,, aia upa te zahna kawngah te,, tlawmngaihna kawngah te hian,,,,,!!!!! Mahse, tunlai thalaite kan tih hian kum engzat chin nge?? Engrual chin hi nge?? kan huam tir?? Tunlai thlai te hi engtik atanga sual tawh nge??? Kan hunlai theuh ah hian han chhut ila,,, mahni tawka sual ve tak te,, uchuak ve tak te an tam ve thin kha,,. Kan nu leh pa / pi leh pu te hun atang tawhin TUNLAI THANGTHAR TE HI CHU AW an lo ti ve fo tawh an ti asin… Tin, tunlai thangthar te chherchhuak tu te hi an hma chiah generation a awm an ni a sin,,, Chutiangbawkin, tuna thangthar te hian, thangthar lo piang leh tur te hi engtin nge an tih ang??? an sual leh sual loh te,, an tlawmngaih leh ngaihloh te, an incheina te thleng hian an sawisel ve leh tho mai lovang maw????
Engpawhnise,, Eng chhuan leh hun (generation) a cheng tin te pawh hian Thangthar te hi chu kan duhdan diak diak hi chuan kan kaltir thei lo a ni… A chang chuan thangthar te hi a hlui te ho hian kan thik deuh vang emaw ni?? ka ti thin…
[Report abuse]