Hualtungamtawna

September 2nd, 2009 2:00 am by Kawnga

Hman lai hian pa pakhat hian fanu hmeltha tak leh fapa pahnih a nei a, a fanu hming chu Keimingi a ni. Anmahni chu Keimi an ni a. Chung lai chuan an khaw piahah tlangval hmeltha leh huaisen tak hi a awm a, a hming chu Hualtungamtawna a ni a.

Hualtungamtawna chuan sa a kap thei em em mai a, a sa kah lu chu an bang laiah hian a tar teuh a, Sakei lu te pawh tam tak a tar a. Chutia Hualtungamtawna’n Sakei a kap fo mai leh, a lu a tar teuh mai chu Keimi-ho chuan an haw em em a, tihhlum dan kawng an ngaihtuah ta a.

Vawi khat chu Keimingi nu leh pa chuan an fanu hnenah chuan, “Hualtungamtawna thang kamnaah va kal la, ‘khawilam mi nge i nih?’ a lo tih che chuan, ‘mi rethei vak vai mai ka ni e, neih tur te hi awm sela neih ka duh em em a ni,’ va ti la; ‘innei ang,’ a tih leh ‘aw’ i ti dawn nia,” an ti a. Keimingi chu a kal ta a, Hualtungamtawna chuan hmeltha a lo ti hle mai a, thu pawh chu a lo zawt ngei a. Keimingi chuan a nu leh pa chah ang khan a chhang a, an innei ta a.

Ni khat chu a pasala nau nen Keimingi chu an ramvak a, changel hmunpui hi an va thleng a, Keimingi chuan, “Chemte, helai changel hmun chu nunchan zir nan a va tha em !” a ti a. Keimi nula chuan a nauvin a hlauh a rin avangin a zir hreh deuh si a.

A nauvin, “Han zir teh- ka hlau lo ve,” a han tih hnu chuan, “A nih leh – min hlauh tak em leh hei hian min deng dawn nia, ka bang vat ang e,” a ti a. Tichuan Keimingi chu, “Huk huk huk…” tiin mei kawh hian a lim ta chiam mai a, a nau chuan a hlau ta em em mai a, “Ka u bang tawh rawh,” a han ti thin a, a ban duh tak si loh avangin a hawsan ta a.

Chutia thlabar em ema a haw chu a na zui ta a; a nu te chuan an thawi thin a, “Ka nu, min thawi mah ula ka dam hlei lo vang e,” a ti a, a dam theih lohna chhan an zawh lahin a sawi ngam bawk si lo. Nakinah chuan an ngen angin a sawi ta vek a, a nu leh pa te chu an thinrim ta em em mai a.

Tichuan Keimingi tihhlum dan ngaihtuahin ‘Khuang i chawi teh ang’ an ti a, khuang an chawi ta a. Khuang chungah chuan Keimi nula chu an chuantir a, chutih lai chuan lo kahhlum tur a ni. A pasal Hualtungamtawna chu zuin an hrai rui a, khuang chunga Keimi nula a chuan lai tak chuan, “Keimah Hualtungamtawna ka ni ngai e,” tia hming chhal meuh hian a silaiin a han kap a, a ruih lutuk avangin a kap fuh ta lo va. Keimi nula chuan a hlau a, mei kawh hian a lim ta zur zur mai a. Keimi nu leh pa pawh chu, Hualtungamtawna’n an fanu thah a tum avang chuan an thinrim ve em em bawk a.

Vawi khat chu vawk an talh dawn a, Hualtungamtawna te chuan Keimingi chhungte chu an chah a. Tichuan Keimingi nutate pahnih chu an lo kal a, Hualtungamtawna in chhungah chuan an han lut a. Bang laiah chuan Sakei lute chu a lo intar thut mai a, an han hmuh chuan an rilru a na em em mai a. Zan a lo thlen chuan an han mu a, Keimingi te nupa chu an muhil bawrh bawrh a, an nau erawh chu a muhil ve lo va. Chutih lai chuan Keimingi nutate chuan banglaia Sakei lu intar chu an tah ta a –

Ka u aw nger ngur,

I dam laia ramsa i hawl a,

I thih hnua laibang i mawi;

Ka u aw nger ngur,

Thingthu aw tlum zuk,

Hualtungamtawna seh nan.

an ti an ti ta mai a. Chu chu Hualtungamtawna nau khan a lo hre reng mai a, a hlau leh ta em em mai a. Nakinah chuan a zun a tichhuak der a, “Ka pa tho rawh, ka zun a chhuak e,” tiin a pa chu a kaitho ta ringawt mai a. A pa lah chuan engmah hre ve hek lo, “Va zung mai tawh, engmah hlauh tur a awm lo ve,” a lo ti mai a.

Nimahsela a fanuin, “Ka ngam lo, mi hruai rawh,” a tih tlat avangin a pa chuan a va hruai ta a. Pawn an thlen chuan a fanu chuan, “Ka pa, kan mikhualte kha an tap a, ka hlau em mai,” a ti a, an tah dan te a hrilh a. Hualtungamtawna chuan, “Zuk ni taka le ! hlau suh, kal rawh, i lut leh ang,” a ti a. An mikhualte chu Sakei an lo ni reng mai tih a hriat chuan a thinrim em em a, in chhungah chuan an lut leh ta a. An mikhualte chuan anmahni chu an seh mai hlauvin mei an tuah eng a, ditipa sazu awm hlei lo chu, “Khi pawh, khi pawh,” an ti a, an perh an perh ta mai a. An mikhualte chuan, “Nangni pafa chu engtizia nge zanlai-laia sazu in perh in perh le?” an ti a, “Keini zawng kan dan ve reng a nia,” an tihsan mai a.

Hualtungamtawna chuan a mikhualte chu, “Sarep ka mun ang che u,” a ti a, thirhlum a munsak a, a chungah an lungnilo hle mai a. A tuk khua a lo var chuan an hnenah, “Khai le, ka vawkpa chu i talh ang u hmiang, nangni tlangval chak in ni a, va luh chhuak ta che u,” a ti a.

Tichuan Keimingi nutate chu vawk huangah chuan an lut ta a. Sakeiah an chang a, vawk chu hukin an um ta zawr zawr mai a. Chutih lai tak chuan Hualtungamtawna chuan an zakdawh tak maiah hian silaiin a lo kap chat chat mai a, Keimingi nutate chu an thi ta a.

Hualtungamtawna’n a nutate a thah avang chuan Keimingi chu a thinrim leh ta em em a, a thih theihna tur a ngaihtuah ve ta a. Nupa nih nak-a-laiin intihhlum theih dan ngawt an ngaihtuah tawn ta mai a. Hualtungamtawna chuan dawi a thiam em em a.

Vawi khat chu a nupui raino laiin a hnenah, “Keiming, eng nge i duh ber, ka laksak ang che,” a ti a. Keimingi chuan a thihna tur ngei nia a rin chu sawiin, “Trawia nghalphusen sa ka ei loh chuan ka rawp a reh thei lo,” a ti ta tlat mai a. Hualtungamtawna chuan eitir ngei tumin, “Ka la ang e,” tiin a ui a hruai a, a liam ta a.

Ngamtawna chuan Trawia thing zawng zawng chu hmun khatah a dawi khawm vek a, phuanberh kung hi a lo dawi hmaih hlauh a. A dawi hnu chuan thingah a lawn a, a han changtum raih a. Chutah nghalphusen chu an lo chhuak ta dum dum a, chu chu a thalin a lo kap chat chat mai a. Thing hrang hrangah chuan a tlan kai zel a, a tawpah chuan pakhat chauh hi tihhlum loh a nei ta a.

A thing dawi hmaih phuanberhah khan a tlan kai a, mahse a lo tliah hlauh avangin a tla ta a. A ui hnenah chuan, “Va zualko ta lang, mi tam tak an lo kal anga, min han zawn dawn ang a. Thing lian pui puia min zawn an tum ang a, an thei lo vang, diin min zawn rawh se. Tin, kawngkaah min luhpui an tum ang a, an thei lo vang. I kawngkaah min luhpui rawh se. Chhuata min zalh dawn hunah chuan hmunphiah ka thutbet tlat la. Keimingi’n hmun a han phiat dawn ang a, “Ui” a han tih veleh a kaihza tha chhat thawt ang che,” a ti a.

Ui chu zualko tur chuan a kal ta vang vang a. Mi chu a va ko va, an lo kal teuh mai a. A zawn nan thing an han hmang dawn a, a tliak hmawk thin a. Chutih lai chuan Ui chuan a chungah chuan di a lo dah thin a, mite chuan, “He ui hian eng nge maw a hriat teh fo le, di hi i dah teh ang u, a chhan riau a awm a ni ang e,” an ti a. An han dah a, a tliak ta lo va. In an thlen chuan kawngkaah an han zawn lut dawn a, a leng leh ta hauh lo mai a. A ui chuan kawngka hnuai a en a, a vir sek mai a.

Mite chuan, “Ngawi teh u, he ui hian kawngka hnuaiah luhpui tur a ti a ni awm e,” an ti a. Kawngka hnuaiah chuan an han rawlh a, an luhpui ta zan mai a. A ruang an zalh chu Keimingi chuan pawiti ni awm tak hian a tah a tah mai a, a rilru tak erawh chuan a lawm hle si a. Nakinah chuan Keimingi chuan hmun a han phiat dawn a, hmunphiah chu ui hian a lo thut a; “Ui, i hnawk e,” a han tih veleh Ui chuan beleuh pah hian Keimingi kaihza tha chu a han chhat thawt mai a, a tlanbo ta nghal a, Ngamtawna ruang chu an phum ta a.

Ngamtawna Ui chu Chinghnia hi a ni a, sa a seh apiangin a pu thlana hnahkiah bulah chuan a sa seh thin leh lung chu a dah ta ziah a. Tun thleng hian a la dah ta zel a ni an ti.

Similar Posts:

Recent Posts:

18 Responses to “Hualtungamtawna”

  1. 1
    caribou Says:

    Hriat fo hnu pawh nise, hetia mizo thawnthu in rawn post thin hi a tha. Ngaihnawm leh khawp mai.

    Report this comment

  2. 2
    chawnghilh Says:

    Vai-èn-chawp Mizo thawnthu ngaihnawm tak a ni ve hranpà awm e. Phantom leh Tarzan tih vél aduang aia hmasa zàwk a nih a rinawm bawk. ‘Keimi’ leh ‘mihring’ inkâr a han ni hrim hrim pawh hian —pasaltha inchhûngkhur leh ramvachàlna lam kawnga min hnùk harh tùra a thawnthu hi duan a ang khawp mai. Ngamtàwna hian an khaw hming hi a hmingah a pu tel a, chutiang chu thil awm ve fo a ni thìn rèng a ni — “Mari Magdalini (Magdala khuaa Mari), Kapernaum (Nahuma khua)’ tih ang maiin HUALTU hi Bàktàwng bul lawka mi khi a nih hmèl mang e. ‘Ronald Sàpa Tlau of Washington DC’ inti thin pawh kha Hualtu khaw-chhuak an ti ve tho. (NOI)

    (thimtham kâra)
    “Thingthu aw tlum zùk”

    tih lai tlar ber mai khian hmulthì a tiding duh ur ur mang e … kan pi leh pute khàn tawngkam danglam riau, tihbaiawm tak hi an lo thiam phian mai!

    Culture inang lo, nupaa infawm ta ngawt an ni bawk a. An buai ru thei hle mai. Lei dawh lam ai chuan bang pìn phui mai piah lama insuat an rilrùk tlat hian an society chu sawi-nghìng pha lo mah se, an inchhûngkhur chu ‘hmêltha inhmêl duhnaa infàwm ngawt’-na khàn kori a tu pha lia lua lo ngawt mai! Habakuka’n “Keitèin a zia a thup thei lo,” a tih ang maiin, anni keimi zàwk zèl khàn an zia an thup thei si lo. Adaptability lam chu a lang lo khawp mai! Kan pi leh pute pawhin mihring chungnùn zàwkna an lo hre khawp mai!

    Hualtungamtàwna dawithiam thu hi rem leh rem lova zeh tel luih belh hràm a ang khawp mai! Chuti teh luain a chhawr tangkai vak bawk si lo. Trawi tlâng hi ramchhuah nân chuan a àwm tàwk viau —Hualtu khua atang chuan!

    A ui fing lah Chinghnia —tùn thlenga chinghniain Hnahkiah kùng bula an sa seh ‘thin leh lung’ a dah ziah, tih hi râwlthar laia Lungleh Pàndawngram leh Nghasih kawnga sava veha kan ramchhuah lai khân —ni tak tak tùra ngaiin Hnahkiah kùng bul hi ka thlîr ngun ziah bawk thìn. Kan thawnthute hian min lo influence hneh hle tih a lang. Hmuh tùr èm chu ka la tawng hauh lo thung … chinghne rual bawng seh/bei lai ka hmuh te hian Hualtungamtàwna hi ka rilru-ah a rawn lang hmasa ber thìn.

    Chinghnia-in anmahni mei an han zun khum hmasa ngei a, an beih tùr bawng chungah an han tlàn lâwn a. An mei huh, zun hîng tùr danglam takin bawng mit an han hlap hmasa te te a. Bawng mit a mìm, meng thei lovin a thìp, a pual ti’tih ta thìn. Chutih lai tak, khaw hmu thei lova bawng a tàlbuai lai chuan bawng tai (mawngkaw bâwr) an sehsak ta hmiah hmiah thìn a. An seh hìkin a chhuak thei thei an phih chhuak vek a, bawng pumpui leh rîl an phawrh chu a ni ta reng mai a … Hualtungamtàwna ui atâna Chinghnia an lo phuah tel hian kan Mizo thawnthu hian Phantom leh Tarzan thawnthute a tithangtlâwm sawta hriat rùkna hi ka nei khauh thìn.

    Thawnthu namai lo tak, ngaihnawm dangdai tak —ka hriatchhuah zawh tawh ngang loh min rawn hlui tharsak leh a, ka làwm e, Kawnga. Tèt laia Lâwr Sikul-a min zirtîrtu fam chang kim tawhte min ngaihzualtîr zàwk hle mai! An thawnthu min hrilh kha ka la hlùtin —an hmêl hlim ka mitthlâah a rawn lang nawn hlawm tih rawn hre thei phei se, an va làwm ve dâwn tak èm! An chhûngte hnènah tal làwmthu ka rawn thlen nawn leh e.

    Hualtungamtàwna leh a ui hriat reng nân Hnahkiah hnaha ùm bekang tui tak hmeh pèk pèk ila a ni mai!

    Report this comment

  3. 3
    H.Vangchhia Says:

    A sei thei hlawm eeeeeeeeeeeeeee :D

    Report this comment

  4. 4
    chawnghilh Says:

    Father Denis-a paw’n a ziak tawi vak ngai chuang em ni? Sei tih bìk a awm a niang! NOI

    Climatic change hi a mak thei teh asin … September 1 atangin tihluih ang maiin a vawt vàr mai! BER thla season hi a fiah chiang nalh mai a ni!

    Report this comment

  5. 5
    mzvision Says:

    Father Denis-a i star a keiin Kawng ka star i tihna em ni chawnghilh? A ngaihnawm hle mai, mahse he thawnthu hi han belhchian deuh chuan imported a ang ka ti.

    Report this comment

  6. 6
    feeder Says:

    ka fate awm nan a tangkai khawp mai, dah that atan pawh atha e

    Report this comment

  7. 7
    zuala12 Says:

    “Ka u aw nger ngur” tih lai tak hian hmaaanah,naupan lai nun kum tam liam tawh hnu a mi kha min ngaihtuah chhuah tir veng veng mai le,khang hun te kha thinlai darthlaleng an a lo lang viai viai a,Kawnga i ti tha kher mai,i ti lawmawm takzet.He thawnthu hi ka hriat ve tawh hnu kha zawng a ni ve ngei a,ka pa in kan unau zan mu tur min hrilh melh melh thin lai kha ka la hre vau vau mai,mahse mumang ram mai an lo chang zo tawh a lo nih hi,ka lung a leng huai mai.Chhungkaw ki kawm lai,oh,chhungkaw kima kan damlai kha ka van ngai tak em!!!!!

    Report this comment

  8. 8
    Emi Says:

    Ngaihnawm hle mai, in rawn thawh tha thin e. Naupan laia ka hriat dan aiin a kim deuh lehnghal. Chawnghilh comment khi a ngaihnawm bawk, ngaihtuah tham takin a rawn critique a. An pahnih hian ka download ang.

    Hemi hi a English translation nei/hria kan awm em aw?

    Report this comment

  9. 9
    samuelapa Says:

    Khualtungamtawna ti pawhin an sawi thinin ka hria, ka chiang tawh chiah lo.
    An nupa nun chu a ‘happily ever afer’ lo ve hle mai a.

    Report this comment

  10. 10
    chhangte_ll Says:

    Hualtungamtawna Khawlhring of Hualtu Khua ani maw. Kuki ho zingah pawh he thawnthu hi a lâr khawp mai, mahse Ngamton leh Keining an ti (Same historical roots, I guess). Mizo thenkhat chuan Keimingi ti loin Keihlingi/Keihningi tiin an sawi bawk :)

    Report this comment

  11. 11
    XaiA Says:

    thawnthu te hi hnam hrang daih a kan ngaih te nen pawh hian inang tak tak a lo awm thin.Hei hian in chhui in chhui chuan thlah tu hmun khat kan nih zia te pawh a ti lang thei awm e.Lalruanga thawnthu te,Pialral kan ngaih dan te pawh hi Thailand leh a chhak leh deuh te nen pawh a in ang a awm nual awm a sin.

    He thawnthu hi a ngaihnawm ka ti thin a, a la ngaih nawm zel e.. tu tu te emaw nen chuan ‘kan naupang tha leh’ an tih STAGE kha kan thleng tan tawh ni awm tak a ni,ngaihnawm kan ti thei em mai :lol:

    Report this comment

  12. 12
    rotekawlasepa Says:

    @Kawnga, i ti tha ka ti thin ngei mai. Mizo thawnthu hi tha ka ti a, ka hlut bawk a. Ka fate ka chhiarsak thin a, ngaihnawm kan ti thin khawp mai. Rawn tizel tehkahi. Mahse hei Admin leh a post tu hian pawi in ti em lo ang chu ka ti a, ka lo copy/save ve hmiah hmiah mai a sin. Huan thlai pehchhiat lutuk chu ka nei em long chu maw!!!!! A dang ka lo chang zel e…..

    Report this comment

  13. 13
    H.Vangchhia Says:

    A thawnthu a sei ka tilo.

    Hualtungamtawna thawnthu te chu tet laia ka pi leh pu ka sawi nawn tir ve awn awn thin kha ania sin.

    Hetiang hian Mizo thawnthu te hi dah fo a tha ka ti. Fate hrilh leh chhawn ah atha. Mahni hnam thawnthu ngei hrilh hriat hi a finthlak riauin ka hria.

    Tawi tlang ah hian Nghalmal muhil kan ti harh tawh. A lim chak mai mai hairehai

    Report this comment

  14. 14
    Kawnga Says:

    @rotekawlasepa, a lawmawm e. Lo save hmiah hmiah rawh u. Peih fal leh a hlutna hrechiang taima bawk si tan phei chuan collect teuh a, a bu-a siam a tha ber. Lo ngaihtuah belh ve zel rawh u.

    Report this comment

  15. 15
    H.Vangchhia Says:

    Kawnga, i ziak ngaihnawm khawp mai. Ka fanu tlemin han hleitling deuh se hetiang, Mizo thawnthu hi ania hrilh ka chak tawh ni.

    Report this comment

  16. 16
    chawnghilh Says:

    @HV : “Fanu hleitling …” —tùnah khân a tawngchham rih deuh em ni? Fanu tawngchham i la nei a ni maw?

    Report this comment

  17. 17
    H.Vangchhia Says:

    Ka fanu te zawk ka sawina, atawng erawh a chham lovin ka hria . Hnial hrat hrit hret viau suh hairehai :D fiamthu

    Report this comment

  18. 18
    Mizo Thawnthu List Directory - All Mizo Says:

    […] Hualtungamtawna leh Keimingi […]

    Report this comment

Leave a Reply

You must be logged in to post a comment.