Thawipuii leh Khampa

August 31st, 2009 8:55 pm by Kawnga

Hman laiin ram pakhatah hian lal thar a awm a, fanu hmel tha tak Thawipuii a nei a. A ram kiangah chuan lal pahnih, lal hlui leh lal thar an awm bawk a; lal hlui fapa chu Khampa a ni a, lal thar fapa chu Khuangzampa a ni. Thawipuii pa chuan Khuangzampa pa tangka za a puksak a, Thawipuii nulat hnuah Khuangzampa nen innei turin an tiam a.

Nakinah chuan Khampa nu leh pa chu an thi a, chu mi hnu chuan Khampa chu a niin a kurpui a, a ni hi Thawipuii te khuaa awm a ni. Thawipuii leh Khampa chu nula tlangval an nih hnuin tlai khat chu Thawipuii leh a thiante an inkawibah a. A thiante chuan Thawipuii kawi chu an lensak a, a kawi tlan chhar chuan Thawipuii chu Khampa ni in thlengin a kal a. Chutih lai chuan Khampa chu a niin thulah a lo khung a, a hmel lang thei riau riauin a chhin a. Chu chu Thawipuii chuan a kal pahin a han hmu zawk a, hmeltha a ti ta hle mai a.

An inkawibah chu a bang a, Khampa ni hnenah chuan mikhual a neih leh neih loh a va zawt ta ringawt mai a. Chu velah Khampa chuan, “Keimah hi ka ni ang,” a ti a, a lo chhuak nghal a, an inkawm ngeih ta em em mai a. Nakin deuhah chuan Khampa chuan a ni hnenah Thawipuii chu neih a ngen ta a, a ni chuan lal thar an nih avangin a sit deuh hlek a. Chung lai chuan Kuangzampa pawhin Thawipuii chu neih a lo tum ve mek bawk a, tichuan Thawipuii chuan inleng pahnih a nei ta a.

Thawipuii pa chuan Kuangzampa a duh zawk a, Thawipuii erawh chuan Khampa chu a duh zawk. A tawpah chuan Thawipuii pa chuan, pangpar mawi leh rimtui hmu tha zawk zawkin Thawipuii chu neihah, tiin an inlengte pahnih chu a ineltir ta a. Khampa chuan a pa pangpar huana pangpar mawi leh rimtui deuh deuh hi a va la teuh a, Kuangzampa erawh chuan hruichun par hi a rawn hum vuai ve chun a. A hmuh that loh avangin Khampa pangparte chu a dil a, tlem a pe ve a.

In an han thleng a, Kuang zampa chuan hmu tha zawkin a insawi leh nghal a. Thawipuii pa chuan ram Tumpang sial khalh haw turin a ineltir leh ta a. Tumpang chu awmkhauh neka khalh theih a ni lo va, a koh dan riau bik awm a ni a. Khampa chuan awmkhauh nekin a zuk bei ringawt mai a, a lo vawrh nawlh mai a, a thi thaw a. Mahse a koh dan bik, ‘Baba’ tiin a han ko a, chi te a liah a, awl takin a khalh haw ta ruau ruau mai a; Kuangzampa erawh chuan huanga a luh dawn tepin a hrui a lo vuan ve hman chauh a. Tu khalh luh zawk nge tia an han zawh chuan Kuangzampa bawk khan, “Kei hleh le,” a lo tih khalh pek a. Khampa thinur chuan a hruiah a han phih lawih a, tumpang chu a tlanbo leh ta daih a. An va bei nawn leh a, Khampa ngei chuan a va khalh lut leh a.

Chumi hnu chuan sangha man tamah an inel leh a, Khampa bawk chuan a man tam zawk a. Mahse, Kuangzampa chuan tawng-thei-sa-bawp a chang leh fo a. In sak zawk ranah an inel leh a, Khampa bawkin a sa zo hmasa leh a. Kawng chho deuh maiah an intlansiak leh a, he mi tum hi chuan Kuangzampa chu a chak zawk hle mai. Mahse tlang chhip a chhuah dawnah a che sual a, a lum ta vak mai a, a hah lutuk chu ni sarih tlawng a thlan a sa an ti ! A tlan chak lo zawk Khampa chuan a thlen khalh leh ta a. Thawipuii chuan kawng tinrengah Khampa chu a duh zawk deuh deuh a, a pa erawh kha chuan Kuangzampa chu neihtir a tum lui tlat a. A tawpah phei chuan Kuangzampa hote chu Thawipuii han hruai turin a chah ta mai a. Kuangzampa khaw lam pan chuan Thawipuii chu a zawnin an zawn ta a; khua an thlen veleh Thawipuii chuan, “Fu ka chak e,” a ti a. An putsak teuh a, an feh bang chu parawl rethei an pe a. Chutiang chuan tihlungawi tumin serthlum pawh ei sen loh an pe a, mahse Thawipuii chuan tlan bona remchang a ngaihtuah reng a. “Sakawr chung chuan ka chak e,” a ti leh a. Tichuan Sakawr an rawn la a, a chuang a, vawi-leh-khatah um phak rual loha chakin a tlan a, a tlanbo ta daih a. Khampa hnenah a kal a, an innei ta zawk a.

Nakinah chuan Thawipuii chuan mumang a nei a. A mumangah chuan sai ding thei lo hian Khampa chu a lo tlanpui chiam a, a ngaih pawh a tha meuh lo va. A mumanga a hmuh ang deuh chuan Kuangzampa hote khan Thawipuii chu an rawn tihder a, Khampa awm loh hlan chuan a lemah an rawn chang ta a. Mahse Thawipui chuan a hriat avangin kawng a lo hawn duh lo va, an kir leh ta a. Nakinah chuan Khampa khawilo kal chu a pum a nat avangin a lo haw a. Mahse Thawipuii chuan Kuangzampa hote bawkah ngaiin kawng a lo hawng duh lo leh a. Khampa chuan, “A nih leh bang lai chhunga ka pa fei inthiat kha lo en reng rawh,” a ti a. In chungah a lawn a, fei awmna zawn chu tipawpin a inthlak thla a, fei chuan a lo thil hlum ta a. Thawipuii inchhir lutuk chu a tap a tap ta a.

Thawipuii chuan Kuangzampa hnenah thu a than thuai a, “Khampa a thi ta, in duh chuan mi han hruai rawh u,” tiin. Kuangzampa hote chu lawm em emin an thawk chhuak a, an han hruai dawn a. Mahse Khampa ruang chu hal rih tur a ni a, Kuangzampa leh a hote chu an cham ta a. Meipui an chhep hluah a, Khampa ruang chu an hal a. Meipui a alh vanglai tak chuan Thawipuii leh Khampa ni chu an inkaihkuah a, meipuiah chuan an zuang lut a, ruang thum hal a ni ta reng mai a, Kuangzampaho chu hrilhhai em emin an haw leh ta a ni.

Comment : He thawnthu hi ka lo hre ngai hauh lo. In hre tawh hlawm em aw..? A thu awmze har deuh lai pawh a awm nual mai. Tin, a ngaihnawm fahran lo leh nghal. Mizo thawnthu hlui zinga tel a ni miau a, ka han post hrim hrim a ni e.

Similar Posts:

Recent Posts:

16 Responses to “Thawipuii leh Khampa”

  1. 1
    XaiA Says:

    Idol chhuak zo tep,chu mi hnu ah chhiar ang,a ngaih nawm hmel tlats..Mizoram pawn ho…awhfik/awhthik /awhsik NOI :lol:

    Report this comment

  2. 2
    chawnghilh Says:

    An hming hi a Mizo vak lo em ni le aw? Lai-unaute hnam hming “Kawmpa/Kompa” tih pawh a zûl thuak thuak zàwka hriatna ka nei.

    He thawnthu hi vawikhat mah ka la hre ngai lo, ka hriat vawikhatna a ni. A ngaihnawm hle. Thanks.

    Kawibah, thûl, ramvàchàl, art chi hrang hranga intihsiaknate hi a Mizo viau thung. Anthurium festival pawh a lang tel hman hialin ka hria. Sakawr tih a tel tawh hi chuan … Mizo ranvulh zinga tel ngai lo a ni bawk a, a thawnthu hi a hlui thei vak lo mai thei. Vailen hnu lama “tû-pâ zukhàwn chang lo,” thawnthu hmeh rem mai mai a ni thei ang em âw?

    Hmeichhe luck tak pawh a ni àwm e …a pâ leibat rulhna han nih chu a romantic lo èm bawk a ni! Zoram leibat nasat zia, piangthla-hlim pawh leibasa kan nihzia a lang hle. A changtunû dinhmun hi a luck luatah a BAM lek lek thìn. Intlànsiak vèlah hian Grik mythology-a Hermes te mitthlâah a rawn lang. Atalanta-i te pawh min tihrechhuak rum rum; mahse, han belna èm tùr ka hmu zo meuh si lo. Hah luat vànga chawlhkâr khat tawp thlantui a tlàk chuan dehydration lam a hlauhawm khawp ang; balhla han keih zauh sela, dehydration a vèn dâwn vei nèn —tùnlai tennis stars-te keih hmek ang hian!

    A thawnthu hi a Indian hlein ka hre bawk a … tùnhmâa SATI an tih, pasalte ruang hàlna pyre-a nupui lusûn inhàl hlum ve angte pawh kha a phawk lek lek mai. He thawnthu hi hei aia sei chu ni phei se, William Bentick-a te pawhin thawnthu tàwp lam an rawn luah thuak mai thei asin! Mizo-te hi hnam dang aia thu uar uchuak kan ni ziah bawk a, a nî nèna meipuia an han zuang lùt leh kher kher pawh hian “sati system” a khùm chiang leh viau bawk.

    A ngaihnawm khawp tho mai!

    Mizo culture leh Hindu Culture thlun zawm nâna rawn hmangin, SAFFRONAGE DRIVE-a rethei dai kilkâra chèng keini min rawn thlèmna tùr atâna thawnthu fuh tak a ni thei ang.

    Thawipuii a nih ang ngeiin —a THAWI fua fua reng mai! FUH chat lo deuh zàwng a awm a ni ber e. Mizovin kan thawnthu-a CREMATION $ SATI kan neihkawpna neihchhun a ni ang em? Thlànmual chu kan lo nei lo viau a nih dâwn tak tak khi! Tunlai kan politician-te hmuipuipu leh mi tak tak engmah ni lova thamral leh site chungchang a ni hial lo maw? A tawng chak zàwk pawh a hamtha chuang lo tih kan hriatna ni se … a ropui thawkhat e. Kan politician-te hian chhiar ve se, an tâna dârthlalang fiah fîm han ni ve thei hràm se …

    Report this comment

  3. 3
    Kawnga Says:

    Pu Chawnghilha meuh pawn a hre ngai lo ve tho a nih chuan, ka awm a nuam leh ta huai e. A lar lo hle nih dawn hi!

    Report this comment

  4. 4
    H.Vangchhia Says:

    Tripura lam thawnthu nen a van inang vele.

    Report this comment

  5. 5
    srj Says:

    thawnthu mak pawl tak anih awm hi,ka hrethiam vek lo lehnghal.thil hlui hrim hrim hi post toh lovang u,

    Report this comment

  6. 6
    samuelapa Says:

    Thawipuii tih hi chu la zia deuh a, Khampa tih hi a Zo lo tlat. Mizo thawnthu hlui zinga tel si, ka benghriat ngai loh lam a ni.

    Report this comment

  7. 7
    muantea Says:

    Kei pawh he thawnthu hi ka hre ngai lo tih ka puang e.Kawnga hian a phuahchawp mai mai a ni lo maw!!! Thawipuii hi Thoipi nise Khampa tih leh hming dangte nen hian Paihte unau lam thawnthu a ni thei mai zawk angem aw!!

    Report this comment

  8. 8
    bawmrang Says:

    kei pawh ka vawi khat hriatna.

    @srj, thil hlui chu eng vang nge an post tawh loh a nga???
    thil hlui post a trang hian chhar tur tam tak kan nei treuh thei tho a sin.

    Report this comment

  9. 9
    Kawnga Says:

    @srj says : thil hlui hrim hrim hi post toh lovang u

    A ngaihnawm i ti bik lo hle a ni maw…. A awm viau e :) Kan lawm tlang vak lo a ang hle. Mizo thawnthu-a kan puang thei lo a nih chuan puang lo daih ang u. Ka phuah pawh ni hlei lo :)

    @Muante, ka phuahchawp chu ni lul love, hetianga ngaihnawm loh leh maksak hian thawnthu ka phuah thiam lo.

    Ka sawi thin tawh ang khan, Mizo thawnthu hlui a tam thei ang ber inhrilh nawn leh hi a thamral mai loh nan thain ka hre ve si a, he thawnthu hi ka lehkhabuah ka chhiar miau si alawm le. Min dem lul s’u…lenrualte u… :)

    Thawnthu hlui dang ka’n Post leh nghal te’ng :)

    Report this comment

  10. 10
    chhangte_ll Says:

    He thawnthu hi Meitei ho khuan an nei ve bawk, mahse Khamba leh Thoibi an ti thung. Tun thlengin ‘Khamba leh Thoibi Dance Ritual’ hi an la neia, mipui punkhawmna tawh phawtah chuan an entir ve ziah thin. Pitarte rul lu ei pawh kha thawnthu ah an nei ve bawk.

    Meitei ho hi hnam pasarih insuihkhawm an ni a, mahse Bengali Brahmin hoin ‘Hindu Sakhua-a’ an leh hma chuan kan inang viau aniang. Burma Ram, Kabaw Valley ah, khuan an la tam fu ani.

    Report this comment

  11. 11
    vivi Says:

    Ka vawikhat hriatna.

    Report this comment

  12. 12
    Hmeithai Says:

    Pu Kawng, keipawh ka vawikhat hriatna.
    Thawipuii chu a tawp lamah chuan a va che fairlo reuh ve a, amah hruai turin a ko te te a, mei ah a zuanluh san leh daih si…fairlo eee.

    Report this comment

  13. 13
    hehe Says:

    He thawnthu hi ka hriat vawi khatna a ni ve tho mai..Mizo thawnthu hlui zinga tel a ni miau a tih lai tak kha…a source ka hre chak khawp mai…mizo in inhal te kan lo ching ve tawh reng reng amaw ni…..tumpang koh dan bik “baba” tih pawh hi a vai ve riau in ka hria…mahse la hriat ngai loh hriat thar belh hrim hrim theih hi a hlu ka ti…misual ho in fakawm e… min ti bengvar leh sawt mai..

    Report this comment

  14. 14
    Kawnga Says:

    @hehe.. a source chu lehkhabu hlui deuh a ni tawp. A bak ka hre bik lo. A kawm mai bakah a tir lam tam fe, a tawp lam tam fe a awm tawh bawk si lo. A bu hming leh a buatsaihtu pawh ka hre bawk lo. Mizo thawnthu ho hlir karah a awm miau sia lawm. Min dem lul s’u ka tih mawlh mawlh khi :)

    Report this comment

  15. 15
    Bete Says:

    Meitei (Manipuri) ho hian Thoibi leh Khamba thawnthu an nei a. Chumi te hming nen chuan a in ang khop mai.

    Report this comment

  16. 16
    Bete Says:

    Meitei (Manipuri) ho hian Thobi leh Khamba thawnthu an nei a. Chumi te hming nen chuan a in ang khop mai.

    Report this comment